ಕಾಳ್ಜಾ ಗಾಜ಼್

ಹಾಯ್ಕು.. ದೊಳ್ಯಾ ದಿಷ್ಟಿಂಕ್ ಸಾಸ್ವಾ ಕಣ್. ಪುಣ್ ತಾಂತುಂ ಲಿಪ್ಲೆಲ್ಯಾ ಅಗಾಧ್ ಸಕ್ತೆಚಿ ವ್ಹಳಕ್ ಜಾಂವ್ಚಿ ವಾಚುನ್, ನಿಯಾಳ್ನ್ ಜಿರಯ್ಲ್ಯಾರ್ ಮಾತ್ರ್! ಹಾಯ್ಕು ಏಕ್ ಜಪಾನೀಸ್ ಕವಿತಾ ಪ್ರಕಾರ್. ಜಪಾನಿಸಾಂತ್ ಹ್ಯಾ ಪ್ರಕಾರಾಕ್ ಕಿತ್ಲೆಂ ಖಾಯ್ಸ್ ಅಸಾಗಿ, ಹಾಯ್ಕು ರಚುಂಕ್ ಜೊಕ್ತಿಂ ನಿಯಮಾಂಯ್ ಆಸಾತ್. ಹೆರ್ ಭಾಸಾಂನಿ ಹಾಯ್ಕು ರಚ್ತಾನಾ ಜಪಾನಿಸ್ ರುಲಿ ಪಾಳುಂಕ್ ತಿತ್ಲೆಂ ಸಲೀಸ್ ನ್ಹಯ್. ಹಾಯ್ಕುಚಿ ವಿಶೇಶತಾ ಆಸ್ಚಿಚ್ ತಾಣಿಂ ಠರಾಂವ್ಚ್ಯಾ ದಿಸ್ಪೊಡ್ತ್ಯಾಂ ಸಂಗ್ತಿಂ ಥಾವ್ನ್! ತಾಂಚ್ಯಾ ಠರಾವ್ಣ್ಯಾಂಕ್ ಲಾಗುನ್ ಹಾಯ್ಕು ಕಾಳ್ಜಾಕ್ ಲಾಗ್ಶಿಲಿಂ ಜಾತಾತ್. 

ಹಾಂಗಾಸರ್ ಹಾಂವೆ ಪಯಿಲ್ಲೆ ಪಾವ್ಟಿಂ ಹೆಂ ಏಕ್ ಪ್ರೇತನ್ ಕೆಲಾಂ.  ಕಿತ್ಲ್ಯಾ ಮಾಫಾನ್ ಹ್ಯಾ ಪ್ರಕಾರಾಂತ್ ಹಾಂವೆಂ ಜಯ್ತ್ ಜೊಡ್ಲಾಂ ಮ್ಹಣ್ ಸಾಂಗುಂಕ್ ಹಾಂವ್ ಸಕನಾ. ಮುಕಾರ್ ಸಾಧನ್ ಕರ್ತಲೊಂ !

ರುಕಾರ್ ರೊಸಾಳ್ ಆಂಬೆ
ಪೋಟ್ ಝರಂವ್ಚ್ಯೊ ಚಾನಿಯೊ
ಹಾಂಗಾ ವೋಂಟ್ ಲೆಂವ್ಚಿಂ ಯೆವೆಚಿಂ ಬಾಳ್ಕಾಂ

*

ಮಾತಿ ಖೆಲ್ಲೊ ವಾಟೆ ಖಾಂಬೊ
ವಯ್ರ್ ಉಜಳ್ಚೊ ದಿವೊ
ಹಾ! ಹಾಂವ್ ನಶೀಬ್ ವಂತ್ ಪಾತ್ಕಿ!

*

ವಾಹನ್ ಚಲ್ತಾ
ಡ್ರೈವರ್ ಜೆಮೆತಾ
ಮಿರೊಣ್ ಘಾಂಟಿರ್ ಉಮ್ಕಾಳ್ತಾ

*

ನೋಟ್ ಬುಕಾರ್ ಮೂಂಯ್
ಕೊನ್ಸೊ ಹುಲ್ಪಾಲ್ಲಿಂ ಪಾನಾಂ
ಹಾ! ಹೊ ಪರಿಕ್ಶೆ ಕಾಳ್

*

ವಾಟೆರ್ ಮಯ್ಲಾ ಫಾತೊರ್
ನಿಸ್ರೊನ್ ವೆತಾ ಸಾಂಜ್
ಹೊ! ಹಾಂವ್ ಅನಿಕೀ ಧಿಮ್ಕುರೆಂ ಬಾಳ್!

*

ಮೆಜಾರ್ ನವೆಚ್ ಅರ್ಥ್ ಕೋಶ್
ಸಬ್ದಾಂಚೊ ಸೊರ್ಮುಣ್
ಮ್ಹಜ್ಯಾ ಮೌನಾಕ್ ’ಅರ್ಥ್’ಚ್ ಮೆಳನಾ!

*

ತೊ ವಿಗಾರ್
ಗೊಬೊರ್ ತಾಚ್ಯಾಯ್, ಮ್ಹಜ್ಯಾಯ್ ಮ್ಹಾತ್ಯಾರ್;
ಆಮಿ ಭಾಭಾವ್!

*

ಮೆಜಾರ್ ಅಡ್ಡಾದಿಡ್ಡಿ ಬೂಕ್
ಪಾನಾಂಗಟ್ಲ್ಯಾನ್ ಬರಪ್
ಭಾಯ್ರ್ ಗುಜ್ರಿವಾಲ್ಯಾಚಿ ಬೋಬ್ 

*

ರುಕಾರ್ ಆಂಬೆ
ಆಂಬ್ಯಾರ್ ಪಾಕೆ
ಕಾಳ್ಜಾಂತ್ ಭೊಕೊರ್ಲೆಲೆ ಘಾಯ್!

*

ಏಕಾಂತ್ ಕಾಳೊ ಕೊರಿಡಾರ್

ವೊಣ್ತಿರ್ ಚಿಕ್ ಚಿಕ್ ಪಾಲ್

ಹಾಂವ್ ಪಳೆ ಜಾಗೊ, ಬುದ್ಧ