ಕಾಳ್ಜಾ ಗಾಜ಼್

ನ್ಯಾನೊ ಕಾಣಿಯೊ

ಚಾಯ್ ವಾಲಾ

ತಾಚೆಂ ಭಾಶಣ್ ಅಭಿಮಾನಿಯ್ ಆಯ್ಕಾತಾಲೆ, ದುಸ್ಮಾನ್ ಯಿ ಆಯ್ಕಾತಾಲೆ. ಭಾಶಣ್ ಜಾಲ್ಲ್ಯಾ ದುಸ್ರ್ಯಾ ದಿಸಾ ’ತೊ’ ಮನಿಸ್ ದುಸ್ಮಾನಾಂಚಿಂ ಖಬ್ರೆ ಪತ್ರಾಂ- ವೆಬ್ ಸಾಯ್ಟಿ ಉದಾಳ್ನ್ ತಾಚ್ಯೊ ಚುಕಿ ವಾಚ್ತಾಲೊ, ಸಮ್ಜಾತಾಲೊ. ಪರತ್ ಸಮಾವೆಶಾಕ್ ವೆತಾನಾ ದೆವಾಕ್ ಹಾತ್ ಮುಗ್ದುನ್ ತಾಣೆಂ ಮಾಗ್ಲೆಂ: “ಮ್ಹಜಿಂ ಉತ್ರಾಂ ಆಯ್ಕುನ್ ದುಸ್ಮಾನಾಂಚೆಂ ಪರಿವರ್ತನ್ ಹಾಂವ್ ಭಿಲ್ಕುಲ್ ಆಶೆನಾ. ತಶೆಂ ಘಡ್ಲೆಂ ತರ್ ಮ್ಹಾಕಾ ಅಸ್ತಿತ್ವ್ ಅಸ್ಚೆಂನಾ. ದೆಕುನ್ ದೆವಾ, ದುಸ್ಮಾನ್ ಮ್ಹಜೊ ಅಭಿಮಾನಿ ಜಾಯ್ನಾ ಜಾಂವ್”

**

ನಾಸ್ತಿಕ್ ಮ್ಹಳ್ಯಾರ್ ಕೋಣ್? ದುಮ್ಗಾಚೆಂ ಸವಾಲ್

ಖಂಡನ್ ಕರ್‍ಚೆ ಖಾತಿರ್ ಚ್ ’ಚಾಯ್ ವಾಲಾ’ ಚೆಂ ಎಕ್ಕಿ ಭಾಶಣ್ ಸೊಡಿನಾಸ್ತಾಂ ಆಯ್ಕುಂಚೊ ಪತ್ರ್ ಕರ್ತ್”

**

ಆಜ್ ಪಯಿಲ್ಲೆ ಪಾವ್ಟಿಂ ರಾಂದ್ಣಿರ್ ಶಿತಾ ಮೊಡ್ಕಿ ತಿಣೆಂ ದರ್ಬಾರಾನ್ ಚಡಯಿಲ್ಲಿ. ತಿ ಗುಜ್ಗುಜ್ತಾನಾ ತುಚ್ಯಾ ದೊಳ್ಯಾಂನಿಂ ದುಖಾಂ! ಘೊವಾನ್ ಘೊಳ್ ಲ್ಲ್ಯಾಂತ್ ಆಜ್ ಪಯಿಲ್ಲೆ ಪಾವ್ಟಿಂ ರಾಂದ್ಣಿರ್ ಶಿಜ್ತಾ! ಕಾಲ್ ಪರ್ಯಾಂತ್ ಘರಾಚ್ ಲೊಳೊನ್ ಆಸ್ ಲ್ಲ್ಯಾ ಘೊವಾನ್ ಅಂಗಡ್ ಘಾಲ್ಲಿ. ನಾಂವ್- ’ನಮೋ ಟಿ’. ಭಾರೀಚ್ ಡಿಮಾಂಡ್ ಖಂಯ್!! ಫಾಲ್ಯಾಂ ಥಾವ್ನ್ ತಿಯ್ ಘೊವಾಕ್ ಕುಮೊಕ್ ಕರುಂಕ್ ವೆತಾ ಖಂಯ್!

**

ಸಾಹಿತಿ: ತೊ ಪ್ರಧಾನಿ ಜಾಲ್ಯಾರ್ ಹಾಂವ್ ದೆಶ್ ಸೊಡ್ತಾಂ.

ವಿರೊಧ್ ಪಾಡ್ತಿಚೊ: ಹಾಂವ್ ರಾಜಕೀಯ್ ಸೊಡ್ತಾಂ

ದಲಿತ್ ಬರವ್ಪಿ: ಹಾಂವ್ ಜಾತ್ ಸೊಡ್ತಾಂ

ದುಬ್ಳೊ: ತೊ ಜಾಲ್ಯಾರಿ, ಜಾಯ್ನಾತ್ಲ್ಯಾರಿ ಹಾಂವ್ ಪ್ರಾಣ್ ಸೊಡ್ತಾಂ.

**

ತೊ ಆಯಿಲ್ಲೊ ಭಾಶಣ್ ದಿಂವ್ಕ್. ರಸ್ತೊ ಜ್ಯಾಮ್!!

ಆಸ್ಪತ್ರೆಕ್ ವೆಚ್ಯಾ ಸ್ತ್ರೀಯೆಚೆಂ ಕಾರ್ ಯಿ ಶಿರ್ಕಾಲೆಂ. ದುಸ್ರೆ ಸಕಾಳಿಂ ಖಬ್ರೆ ಪತ್ರಾರ್ ಖಬರ್ ಛಾಪ್ ಲ್ಲಿ: ’ತಾಕಾ’ ಪಳೆಂವ್ಕ್ ಟ್ರಾಫಿಕಾರ್ ರಾಕ್ ಲ್ಲಿ ಗರ್ಬೆಸ್ತ್ ಸ್ತ್ರೀ”

**

ತಾಚ್ಯಾ ಉಜ್ವ್ಯಾ ಹಾತಾಂತ್ ತಲ್ವಾರ್ ಆಸ್ ಲ್ಲಿ. ಧಾವ್ಯಾ ಹಾತಾಂತ್ ಚಾಯೆಚೆಂ ಕೊಪ್.

ಮತ್ ದರ್ ಚಾ ಪಿಯೆಲೊ ಆನಿ ಭಯ್ರ್ ಆಯ್ಲೊ.

ದಿಲ್ಲಿ ’ಕನ್ನೆ ಚಾ’ ಮ್ಹಣ್ ತಾಚ್ಯಾ ತೊಂಡಾರ್ ಕಾಂಯ್ಚ್ ಕಳಾನಾತ್ಲೆಂ!!!

ಭಿತರ್ ವ್ಹಚುಕ್ ಭಾಯ್ರ್ ಆಯಿಲ್ಲ್ಯಾಂಚ್ಯಾ ತೊಂಡಾರ್ ಭೊಗ್ಣಾಂಚ್ ನಾತ್ ಲ್ಲಿಂ

**

’ಹಾಚ್ಯಾ’ ಆಂಗ್ಡಿಚ್ಯಾ ಚಾಯೆಕ್ ’ತಾಚ್ಯಾ’ ಆಂಗ್ಡಿಚೆಂಚ್ ದೂದ್; ಸೆಜಾರಿ ದೆಕುನ್ ’ತೊ’ ’ಹಾಕಾ’ ಉಣ್ಯಾಕ್ ಚ್ ದಿತಾಲೊ. ಹ್ಯಾ ಇಡ್ಯಾಂತ್ ಪೋರ್ ’ತೊ’ ಎಲ್ಕೊ ಭಾಶಣ್ ಬಿಗ್ದುನ್ ಗೆಲೊ ಪಳೆಯಾ… ತ್ಯಾ ಉಪ್ರಾಂತ್ ’ತಾಣೆಂ’ ದೂದ್ ದಿಂವ್ಚೆಂ ರಾವಯ್ಲೆಂ! ’ತಾಣೆಂ’ ಭಾಶಣ್ ದೀವ್ನ್ ಘೆಲ್ಯಾ ಉಪ್ರಾಂತ್ – ತೊ ದೂದ್ ದೀನಾ, ಗಾಂವ್ಚ್ಯಾಂನಿ

ವಾಡಯಿಲ್ಲ್ಯಾ ಮೊಲಾಕ್ ದೂದ್ ಹಾಡುಂಕ್ ಹಾಕಾ ಪುರೊ ಪಡನಾ.

ದೆಕುನ್ ಆತಾಂ ಹೊ ’ಕನ್ನೆ ಚಾ’ ಮಾತ್ರ್ ವಿಕ್ತಾ ಮ್ಹಣ್ ಖಬರ್!

**

“ಚಾಯ್ ವಾಲಾ ಪ್ರಧಾನಿ ಜಾಲೊ ಕಂಯ್?”

“ಕೊಣೆಂ ಮ್ಹಳೆಂ?”

“ಚಾಯೆಚ್ಯಾ ಆಂಗ್ಡಿ ಉಲಂವ್ಚೆಂ ಆಯ್ಕಾಲೆಂ”

“ಮಾಗಿರ್?”

“ಚಾ ಪಿಯೆವ್ನ್ ಉಟೊನ್ ಘೆಲೆ”

**

ಭಾಶಣ್ ಕಾರಾಚ್ಯಾ ಪಿ. ಎ. ಕ್ ಘರಾ ಥಾವ್ನ್ ಕೋಲ್ (ಬಾಯ್ಲೆಚೆಂ) ಆಯ್ಲೆಂ. ’ಅವ್ಗಡಾಂತ್ ಭುರ್ಗೆಂ ಮೆಲೆಂ!” ಭಾಶಣಾಚ್ಎ ಬೊಬೆಕ್ ಕಾಂಯ್ ಆಯ್ಕುಂಕ್ ನಾ.

ತಾಣೆಂ ಸವಯೆ ಬಳಾನ್ ಜಾಪ್ ದಿಲಿ: “ತುಮ್ಚೆ ಸಮಸ್ಸೆ ಕಿತೆಂಯ್ ಆಸ್ಲ್ಯಾರ್ ಭಾಶಣಾ ಉಪ್ರಾಂತ್… ಆತಾಂ ಟಿ. ವಿ. ಆನ್ ಕರ್ನ್ ಭಾಶಣ್ ಆಯ್ಕಾ”

**

ಭಾವ್ ಮಾಪ್ಳ್ಯಾಂ ಸಾಂಗಾತಾ ಕಾಮಾಕ್ ವೆತಾ. ಭಯ್ಣ್ ಪೊರ್ಬುಂಗೆರ್ ಗಸ್ಟೊ ಕಾಡ್ತಾ. ಆವಯ್ ದಿಸಾಕ್ ಸ ಘರಾಂ ನಿತಳ್ ಕರ್ತಾ.

ಉರ್ ಲ್ಲೊ ಅನ್ಯೆಕ್ಲೊ ಕಾರ್ಯಕರ್ತ್… ಹರ್ದೆಂ ಬಡವ್ನ್ ಸಾಂಗ್ತಾ, “ಆವಯ್ನ್ ಮ್ಹಾಕಾ ’ತಾಚೆ’ ಖಾತಿರ್ ಸೊಡ್ಲಾ” (ದೆವಾಕ್ ಸೊಡ್ ಲ್ಲ್ಯಾ ಪಾಡ್ಯಾ ಪರಿಂ?!)

**

ತಾಣಿಂ’ ಏ ಪೋಸ್ಟರ್ (ಫ್ಲೆಕ್ಸ್) ರಸ್ಯ್ತಾ ದೆಗೆರ್ ಉಭಾರ್ಲೆಂ.  ಬಗ್ಲೆಕ್ ’ಹಾಣಿಂಯ್’ ಉಭಾರ್ಲೆಂ. ಸಕಾಳಿಂ ಎಕಾಂತ್ಲೆಂ ಪೋಸ್ಟರ್ ನಾ!!

ಉತ್ರಾಂಕ್ ಉಅತರ್! ಫಾತ್ರಾಕ್ ಫಾತೊರ್!! ಕರ್ಫ್ಯೂ!!!

ಪೋಸ್ಟರ್ ಪಿಂದುನ್ ವ್ಹೆಲ್ಲೊ ಭಿಕಾರಿ ತೆಂ ಪಾಂಗುರ್ನ್ ಬಸ್ ಸ್ಟೆಂಡಾ ಪಾಟ್ಲ್ಯಾನ್ ಸುಶೆಗಾತ್ ನಿದ್ ಲ್ಲೊ!