ಕಾಳ್ಜಾ ಗಾಜ಼್

ಆಜ್ ’ಸ್ತ್ರೀಯಾಂಚೊ ದೀಸ್’ ಮ್ಹಣ್ ಸಂಸಾರ್ ಮಾನಯ್ತಾ. 

ದೆವಾ ಉಪ್ರಾಂತ್ ರೂಪಕಾಂ ವಾಪಾರ್ನ್ ಧುಂಪಯ್ಲಾಂ ತರ್ ತೆಂ ಸ್ತ್ರೀಯೆಕ್! ಸಾಧ್ಯಾ ಉತ್ರಾಂಕ್ ಮಿಕ್ವಂಚಿ ಸ್ತ್ರೀ ರೂಪಕಾಂನಿ ಸೊಭ್ಲ್ಯಾರೀ ರೂಪಕಾಂಕ್ ಲಾಗೊನ್ ಚ್ ತಿಚೆರ್ ಆಕ್ರಮಣ್ ಚಲ್ಲಾಂ. ತಿಕಾ ’ಫುಲ್’ ಮ್ಹಳಾಂ ಆನಿ ಸುಶೆಗಾತ್ ಪಿಸ್ಡುನ್ ಸೊಡ್ಲಾಂ. ತರೀ ಹೊ ಏಕ್ ದೀಸ್ ತಿಕಾ ಸಮರ್ಪಿತ್... ಸಮಾಜೆನ್ (ದಾದ್ಲ್ಯಾ) ಹ್ಯಾ ದಿಸಾ ಏಕ್ ಖುರ್ಸಾ ವಾಟ್ ಕರುಂಕ್ ಫಾವೊ!

ಹ್ಯಾ ವಗ್ತಾ ಹಾಂವೆಂ ದೊಗಾಂ ಅಪ್ರತಿಮ್ ಕವಿಂ ಥಾವ್ನ್ ದೋನ್ ಕವಿತಾ ರಿಣಾರ್ ಹಾಡ್ಲ್ಯಾತ್, ತುಮ್ಚ್ಯಾ ಧಾದೊಸ್ಕಾಯೆಕ್ ಲಾಗುನ್...

ಸ್ರೀಯಾಂನೋ, ತುಮ್ಕಾಂ ಪರ್ಭಿಂ :)

ಆಕ್ರಮಣ್

ಬಂಗಾಳಿ ಮೂಳ್: ತಸ್ಲೀಮಾ ನಸ್ರೀನ್

ಹೊ ಲೋಕ್ ಕಿತ್ಲೊ ವಿಚಿತ್ರ್ ಗಿ ಮ್ಹಳ್ಯಾರ್

ತುಂ ಬಸ್ಲ್ಯಾರ್, "ನಾಕಾ, ಬಸನಾಕಾ" ಮ್ಹಣ್ತಾತ್

ರಾವ್ಲ್ಯಾರ್ ತಾಕಾ ಯ್ ಏಕ್ ಸಾಂಗ್ತಾತ್

"ಉಭೆಂ ಕಿತ್ಯಾ? ಭೊವೊಂಕ್ ಜಾಯ್ನಾಯೆ?"

ಭೊಂವ್ಲ್ಯಾರ್, "ಸದಾಂಚ್ ಭೊಂವೊಂಕ್ 

ಲಜ್ ದಿಸಾನಾಯೆ?" ಮ್ಹಣ್ತಾತ್

ಚಡ್ ವೇಳ್ ನಿದ್ಲ್ಯಾರ್ ತೆ ಮ್ಹಣ್ತಾತ್,

"ಸದಾಂ ಕಿತೆಂ ನಿದೊನ್ ಆಸ್ತಾಯ್, ಊಟ್"

ತುಂ ನಿದ್ಲೆಂ ನಾಂಯ್ ತರ್ ತಾಕಾ ಏಕ್ ಸಾಂಗ್ತಾತ್, 

"ಸುಶೆಗ್ ಚ್ ನಾ, ನಿದೆ"

ಆಶೆಂ ಮ್ಹಜೆ ದೀಸ್ ಫಕತ್ ಬಸೊನ್ ಆನಿ ಉಬೆಂ ರಾವುನ್ ಚ್ ಸಾರ್ತಾಂ

ಹಾಂವ್ ಆತ್ತಾಂಚ್ ಮೊರ್ತಾಂ ಮ್ಹಳ್ಯಾರ್ ತೆ ಸಾಂಗ್ತಾತ್

"ಕಿತ್ಯಾ? ತುಂ ಅನಿಕೀ ಜಿಯೆಜೆ ಜಾಲ್ಲೆಂ , ಜಿಯೆ"

ಹಾಂವೆಂ ಜಿಯೆಂವ್ಚೆಂ ಪಳೆವ್ನ್ ಪರತ್ ತೆಚ್ ಮ್ಹಣ್ತಾತ್

"ಲಜ್ ದಿಸಾನಾ ತುಕಾ? ಅಜೂನ್ ವಾಂಚ್ಲಾಂಯ್ ನೆ? ಮೊರ್ನ್ ವ್ಹಚ್" 

***

ನಂಯ್ ಚಿ ಕವಿತಾ

ನಂಯ್ ಭಿತರ್ ಆಸಾತ್ 

ಮೊಳಾಬ್, ಕುಪಾಂ ಆನಿ ಸುರ್ಯೊ

ಮ್ಹಜ್ಯಾ ಹಾತಾಂತ್ ಲ್ಯಾ ಕೊಪಾಂತ್

ಆಸಾ ನಂಯ್.

ಜರೀ ಹಾಂವೆಂ ಹಾತ್ ವಯ್ರ್ ಉಡಯ್ಲೆ

ನಂಯ್ ಥೆಂಬ್ಯಾಂನಿ ಗಳ್ತೆಲಿ, ಶಿಂಪ್ಡಾವ್ನ್ 

ಮೊಳಾಬ್, ಕುಪಾಂ ಆನಿ ಸುರ್ಯೊ ಮ್ಹಜೆವಯ್ರ್.

ಮ್ಹಜ್ಯಾ ಹಾತಾಂತ್ಲ್ಯಾ ಕೊಪಾಂತ್ಲಿ, ಜರೀ ಪಿಯೆಂವ್ ನಂಯ್

ತೆನ್ನಾಂ ಮ್ಹಜೆ ಭಿತರ್

ಸುರ್ಯೊ, ಕುಪಾಂ ಆನಿ ಮೊಳಾಬ್.

ಕನ್ನಡ ಮೂಳ್: ಮಮತಾ ಜಿ. ಸಾಗರ್