ಧಾಂವ್ಚ್ಯಾ ರಯ್ಲಾರ್... (ಕವಿತಾ)

ಧಾಂವ್ಚ್ಯಾ ರಯ್ಲಾರ್

ಧಾಂವ್ಚ್ಯಾ ರಯ್ಲಾರ್ ಹಾಂವ್ ಚಡ್ಲಾಂ.

ತೆ ಗಾದೆ, ತೆ ಗುಡೆ, ತೆ ಮನಿಸ್, ತೆ ಪೆಟೆ
ಬಿಂದಾಸ್, ಸ್ವಚ್ಛಂದ್, ಉಗ್ತೆ, ಮುಕ್ತ್ ಜಿಯೆಂವ್ಚೆ...
ಸಕ್ಕಡ್ ಹ್ಯಾ ಕೆಮರಾಂತ್ ಫಿಚಾರ್
ಪುರ್ಸೊತೆರ್ ಪಾಂಯಾರ್ ಪಾಂಯ್ ಘಾಲ್ನ್ ಫಾಲ್ಯಾಂ ಪಳೆತಾಂ.

ತ್ಯೊ ಆವಯೊ, ತಿಂ ಭುರ್ಗಿಂ, ಫೆಸ್ತಾ ಸಾಂತ್, ದಿವ್ಳಾ ಪುಜಾ
ಹ್ಹಿಹ್ಹಿ ಚೆಡ್ವಾಂ, ಪೊಕ್ರಿ ಚೆಡೆ, ಚಾಯ್‍ವಾಲೆ, ವಡಾಪಾಂವ್
ಸಗ್ಳೆಂಚ್ ಕೆಮರಾ  ಪೊಟಾಂತ್
ಪುರ್ಸೊತೆರ್ ವೆಗಿಂಚ್ ತುಮ್ಚೆಖಾತಿರ್ ಅಪ್‍ಲೋಡ್ ಕರ್ತಾಂ

ಬಗ್ಲೆಚ್ಯಾ ಪಯ್ಣಾರ್ಯಾಕಡೆ ವಿಚಾರ್ನ್
ದಿಸಾಳೆಂ ಸೊಡಯ್ಲ್ಯಾರ್
ಪಬ್ಲಿಕ್ ಟೊಯ್ಲೆಟಾಚೆಂ ಮೊಡ್ಕುರೆಂ ದಾರ್
ಉಗ್ತೆಂ ಕರುಂಕ್‍ಚ್ ರಾಕ್ಚ್ಯಾ ಘಾಣಿಪರಿಂ
ಖಬ್ರೊ –
ಗಾದ್ಯಾಂತ್ ಉಮ್ಕಾಳ್ಚೊ ರೈತ್
ಬುಲ್ಡೊಜರಾ ಘಾಸಾಕ್ ಗಾದೆ
ಸುತಾಂ ನ್ಹೆಸಾನಾತ್ಲೆ ಮನಿಸ್
ವೇನಾರ್ ಬಂಧಿ ಪೆಟೆ
ಬಿಕ್ಕುಂಚಿಂ ಹ್ಹಿಹ್ಹಿ ಚೆಡ್ವಾಂ
ಖೊಡ್ಯಾಂನಿ ಚೆಡೆ...
ಹೆಂ ಸಗ್ಳೆಂ ಮ್ಹಜ್ಯಾ ಕೆಮರಾಚೆ
ಝಳ್ಕೆಕ್ ಯೆನಾತ್ಲೆಂ!

ಭೊಗ್ಸಿಯಾ,
ತೆಂ ಸಗ್ಳೆಂ ಫಿಚಾರ್ ಕರುನ್
ಪಯ್ಣಾಚೆಂ ಥ್ರಿಲ್ ಹೊಗ್ಡಾಂವ್?
ತಿತ್ಲ್ಯಾಕ್‍ಯಿ ಹಾಂವ್ ಎದೊಳ್‍ಚ್
ಧಾಂವ್ಚ್ಯಾ ರೈಲಾರ್ ಚಡುನ್ ಜಾಲಾಂ...

ಗಿರಾಯ್ಕ್ - ಏಕ್ ಕವಿತಾ

(ಏಕ್ ಸಾಂಗ್ತಾಂ, ಆನಿ ಹೆಂ ಪಳೆಂವ್ಕ್ ಜಾಯ್ನಾ. ಅನಾದಿ ಕಾಲಾಥಾವ್ನ್ ಜೀವ್ ದೀವ್ನ್ ಆಯಿಲ್ಲಿ ಗಾಯ್ ಆಜ್ ಜೀವ್  ಕಾಡವ್ನ್ ಆಸಾ. ಗೊಟ್ಯಾಂತ್ಲಿ ಗಾಯ್ ಕಾಳ್ಜಾಂತ್ ಘುಂಸ್ಲ್ಯಾ ಆನಿ ಶೆಣ್ ಘಾಲುಂಕ್ ಲಾಗ್ಲ್ಯಾ. ತ್ಯಾ ಶೆಣಾಂತ್ಲೆ ಕಿಡೆ ತುಳುಕ್ ಪುಳುಕ್ ಉಡೊನ್ ಎಕೆಕ್ಲ್ಯಾಚಿಚ್ ಗೊಮ್ಟಿ ಧರುನ್ ವಾಗಾನಾಚ್ ನಾಚುಂಕ್ ಲಾಗ್ಲ್ಯಾತ್. ಪಳೆತಾ ಪಳೆತಾನಾಂಚ್ ಮ್ಹಜೆ ದೊಳೆ ಗಯ್ರೆ ಜಾತಾತ್, ಕಾಳಿಜ್ ಜಡ್ ಜಾತಾ.. ಗಾಯ್ 'ಮಾಂಯ್' ಮ್ಹಳ್ಳೊ ಭುತ್ ಆನಿ ಕಿತ್ಲ್ಯೊ ತಕ್ಲ್ಯೊ ಉಸ್ಳಾಯ್ತ್ ಮ್ಹಣ್ ಕಳಿತ್ ನಾ! ಮನ್ಶಾಪಣಾಚಿಂ ಫುಲಾಂ ಕಚ್ರ್ಯಾಕ್ ಉಡವ್ನ್ ವ್ಹೆತೆಲ್ಯಾಂಕ್ ಕಿತೆಂ ಮ್ಹಣುಂ?)

*********************************

ಗಿರಾಯ್ಕ್ 

ಫುಲಾಂ ಘೆಂವ್ಕ್ ಆಯಿಲ್ಲ್ಯಾಚೆ

ದೊಳೆ

ಧುಂವ್ರಿ ಪಡ್ ಲ್ಲ್ಯಾ ಫಾಂತ್ಯಾಚ್ಯಾ ರಸ್ತ್ಯಾ ಜಶೆ

ಗಯ್ರೆ ಗಯ್ರೆ ದಿಸ್ಲೆ

ದೊಳ್ಯಾ ಖಾಂಚಿಂನಿ ಉದೆಲ್ಲೆ ಥೆಂಬೆ

ಬೊಟಾಂನಿ ಚಿಡ್ಡುನ್ ಉಡಂವ್ಚೆ ಭಿತರ್

ಪಳ್ಳ್.. ಕರ್ನ್

ಗುಲೊಬಾರ್ ಪಡ್ಲೆ

ಮ್ಹಾಕಾ ಹೆಂ ನವೆಂ ನ್ಹಯ್;

ಸದಾಂ ಕೋಣ್ ಎಕ್ಲೊ

ಕಾಳಿಜ್ ಭರೊನ್

ಹಿಂ ಫುಲಾಂ ಭಿಜಯ್ತಾ -

ಆನಿ ಕೋಣ್ ಕಾಳಿಜ್ ತುಟೊನ್

“ಕಿತ್ಲಿಂ ಜಾಯ್ ಫುಲಾಂ?” ಭುಜ್ವಣೆ ತಾಳ್ಯಾನ್

ಫಿರ್ಗಾಂಲೊಂ ಹಾಂವ್

“ಮ್ಹಜ್ಯಾ ದೊಳ್ಯಾಂನಿ ಪಳೆಲ್ಲ್ಯಾ ಹರ್ಯೆಕಾ

ಹಲ್ಲ್ಯಾಂಕ್ ಪಾಂವ್ಚೆ ತಿತ್ಲಿಂ!” ಜಾಪ್ ಆಯ್ಲಿ

ಫುಲಾಂಚೆ ಖೆಟಿ ಮಧೆಂಯ್

ತಾಚ್ಯಾ ವ್ಹಾಣಾಂಕ್ ಲಾಗ್ ಲ್ಲ್ಯಾ ಶೆಣಾಚಿ

ಘಾಣ್ ತೀವ್ರ್ ಜಾವ್ನ್

ನಾಕ್ ಶಿಂದಿಲಾಗ್ಲಿ!

ಮ್ಹಜಿಂ ಆವಯ್ ಬಾಪುಯ್ ಭಾಗೆವಂತಾಂ

ನಮಾನ್ ಬಾಳೊಕ್ ಜೆಜು - ಅಕ್ಟೋಬರ್ ೨೦೧೫ 

ಅಂಕ್ಯಾರ್ ಫಾಯ್ಸ್ ಜಾಲ್ಲೆಂ ಲೇಖನ್

ಹಾಂವ್ ವ್ಹಳ್ಕನಾ! - ಕವಿತಾ

ಹಾಂವ್ ವ್ಹಳ್ಕನಾ!

ಆಪಂವ್ಕ್ ಚ್ ಮ್ಹಣ್ ದವರ್ ಲ್ಲ್ಯಾ

ನಾಂವಾನ್ ಕೊಣೆಂಗಿ ಉಲೊ ಕರ್ತಾನಾ

ಹಾಂವೆಂ ಪಾಟಿಂ ಪಳೆಂವ್ಕ್ ಧಯ್ರ್ ಘೆತ್ಲೆಂ ನಾ

ಕಾಲ್ ಕೊಣಾಚ್ಯಾಗೀ ಮ್ಹಾತ್ಯಾರ್ ಥಾವ್ನ್ 

ರಸ್ತ್ಯಾರ್ ಗಳ್ ಲ್ಲ್ಯಾ ಗುಲೊಬಾಕ್

ಎಕಾ ಬಳಿಷ್ಟ್ ಪಾಂಯಾನ್ ಮಸ್ತಿತಾನಾ

ಹಾಂವ್ ‘ಗುಲೊಬ್’ ಮ್ಹಣ್ ಸಾಂಗುಂಕ್

ಉಸಯಿಲ್ಲೆ ಫುಲಾಚೆ ವೋಂಟ್ 

ತಶೆಚ್ ಉಗ್ತೆ ಉರ್ ಲ್ಲೆ ಪಳೆಲ್ಯಾ ಉಪ್ರಾಂತೀ…?

ತೆ ‘ತಾಚ್ಯಾ’ ನಾಂವಾಚೆ ದೆಕುನ್

ಅತ್ತಾಂ ಧುಂವೊರ್ ವೊಂಕ್ ಲ್ಲಿ ಬಂದೂಕೆ ನಳಿ 

ತಾಂಚಿ ಸುಕುರ್ ನಳಿ ಚಿರ್ಡಿಂಚಿ ಟಿವಿರ್ ದೆಕ್ತಾನಾ

ಮ್ಹಜ್ಯಾ ತೊಂಡಾಂತುನ್

‘ಜೆಜು!” ಮ್ಹಳ್ಳೆಂ ನಾಂವ್ ಯೆತಾನಾಂಚ್ 

ಕರೆಂಟಾನ್ ಜೀವ್ಗಾತ್ ಕೆಲೊ..

ತ್ಯಾ ಉಪ್ರಾಂತೀ…?

ತೊ ‘ತ್ಯಾ’ ನಾಂವಾಚೊ ದೆಕುನ್

ತೊ ‘ತ್ಯಾ’ ನಾಂವಾಚ್ಯಾ ಮನ್ಜಾತಿಕ್ ಖಾತಾ ದೆಕುನ್

ತಾಚೆಂ ನಾಂವ್ ಚ್ ನಾತ್ಲೆಲ್ಯಾಪರಿಂ ಕರ್ತೆಲ್ಯಾಂಚೊ

‘ವಿಜಯೋತ್ಸವ್’ ದೆಕ್ ಲ್ಲ್ಯಾ ಉಪ್ರಾಂತೀ…?

ಹಾಂವ್ ಖಂಚ್ಯಾಕೀ ನಾಂವಾನ್ ವ್ಹಳ್ಕನಾ

ಹರ್‍ಯೆಕಾಕ್ ತಾಂಚ್ಯಾ ಕಾಮಾನ್ ಪಾರ್ಕಿತಾಂ