ನಾಟಕಾಚೊ ವಿಮರ್ಸೊ:
ನೈತಿಕತೆಚ್ಯಾ
ಪೊಪಿಸಾಕ್ ಬುರಾಕ್ ಲಾಂವ್ಚಿಂ ಸತಾಂ!
ಪ್ರಸ್ತುತ್
ಸಮಾಜೆಂತ್ ಖುನಿ, ತಾಚೆ ಪಾಟ್ಲೊ ಮಿಸ್ತೆರ್ ಸೊಧುನ್ ವೆಚಿಂ ಚಾನೆಲಾಂ, ಪತ್ರ್ ಕಾರ್ ಆನಿ ಖುನಿಯೆ
ಪಾಟ್ಲ್ಯಾ ಮಿಸ್ತೆರಾಂಚಿ ಘುಂವ್ಡಿ ದೊಳ್ಯಾಂ ಆಸ್ಡಿ
ದಾಂಪಿನಾಸ್ತಾ (ಐಪಿಎಲ್ ಮ್ಯಾಚ್ ಪಳೆಲ್ಲೆಪರಿಂ) ಪಳೆಂವ್ಚೆ ಪ್ರೇಕ್ಷಕ್ ಜಾಯ್ತೆ ಆಸಾತ್. ತಶೆಂ ಮ್ಹಣ್ತಾನಾ
ಖುನಿ ಆನಿ ಜರ್ ತಾಚೆ ಪಾಟ್ಲ್ಯಾನ್ ಅನೈತಿಕ್ ಸಂಬಂದಾಚೊ ವಿಶಯ್ ತಾಳ್ ಪಡೊನ್ ಆಸಾ ತರ್ ಪತ್ರಾಂಕ್
ಆನಿ ಚಾನೆಲಾಂಕ್ ಖೂಬ್ ಖಾಯ್ಸ್. ಆಶೆಂ ಭೊಗ್ತಾ, ಆಜ್ ಪ್ರೇಕ್ಷಕ್ ಅಸಲ್ಯಾ ಖಬ್ರಾಂಕ್ ಭುಕೆವ್ನ್ ಆಸಾ.
ಜಾಂವ್ಕ್ ಪುರೊ ಹಿ ದೊಳ್ಯಾಂನಿ ಪಳೆವ್ನ್ ಥಾಂಬಂವ್ಚಿ ಭುಕ್ ಕೊಣಾಚ್ಯಾಗಿ ಕುಡಾಂತ್ ಆನಿ ಕುಡಿಂತ್
ಶಿಜ್ಲ್ಯಾ ಆನಿ ಫಾಲ್ಯಾಂ ಆಸ್ ಪಾಸ್ ವ ಪ್ರೇಕ್ಷಕಾಚ್ಯಾ ಘರಾಚ್ ಘಡಾತ್! ದೆಕುನ್ ಭೊವ್ ಶಾ ಉದೆಲಾ
ನಾಟಕ್ – ಜೊಯೆಲ್ ಪಿರೇರಿಚ್ಯಾ ಲಿಖ್ಣೆ ಥಾವ್ನ್, “ಉಚಾರ್ನ್ ಸಾಂಗ್ತಾಂ!”
ಜುಜೆ
ಕೊಸ್ತಾಚ್ಯಾ ಘರಾಣ್ಯಾಂತ್ ಘಡ್ಚೆಂ ಏಕ್ ಘಡಿತ್ ಪ್ರೇಕ್ಷಕಾಕ್ ನಾಟಕಾಚ್ಯಾ ನಿಮಾಣೆ ಘಡಿಯೆ ಪರ್ಯಾಂತ್
ತಾಂಡುನ್ ವ್ಹರ್ತಾ. ಏಕ್ ಅವಿಭಕ್ತ್ ಕುಟಮ್. ವ್ಹಡ್ಲೊ ಭಾವ್ ನಿಕು ಕೊಸ್ತ್, ಕುಡಿ, ಕೆಪ್ಪೊ, ಚಾಪ್ಪೊ
ಮ್ಹಣ್ ಚ್ ಸಕ್ದಾಂ ಮಾನ್ತಾತ್. ದುಸ್ರೊ ಜುಜೆ ಕೊಸ್ತ್, ಏಕ್ ಮಾತ್ರ್ ಕುಟ್ಮಾಚೊ ಬಳಾದಿಕ್ ಖಾಂಬೊ,
ತಾಚೆಂಚ್ ಬಿಸ್ನೆಸ್ ಆಸಾ, ಬುದ್ವಂತ್, ಶಿಂತಿದಾಚೊ ಮನಿಸ್ ಆನಿ ಬಿಸ್ನೆಸಾಚೊ ಹಾರ್ ಭಾರ್ ತಾಣೆಂ ಆಪ್ಲ್ಯಾ
ನಿಮಾಣ್ಯಾ ಭಾವಾ ಎಡಿ ಕೊಸ್ತಾಚೆರ್ ಸೊಡ್ಲಾ! ಜುಜೆ ಕೊಸ್ತಾಚಿ ಬಾಯ್ಲ್ ತರ್ನಿ, ತಾಂಕಾ ಏಕ್ ಧುವ್.
ಜುಜೆ ಕೊಸ್ತ್ ಅಚಾನಕ್ ಏಕ್ ದೀಸ್ ಮೊರೊನ್ ಪಡ್ತಾ ಆಪ್ಲ್ಯಾಚ್ ಘರಾಂತ್. ವ್ಹಡ್ಲ್ಯಾ ಭಾವಾಕ್ ಹಿ ಖುನಿ
ಮ್ಹಳ್ಳೊ ಧುಬಾವ್ ಆನಿ ತೊ ಧುಭಾವ್ ಹೆರಾಂಚಾ ಕಾನಾಂಕ್ ಫುಂಕ್ತಾ ಆನಿ ಜಿವ್ಘಾತ್ ಮ್ಹಣ್ ಬಂಧ್ ಜಾಲ್ಲಿ
ಕೇಸ್ ಪರತ್ ಉಸ್ತುಂಚೆ ಪರಿಂ ಕರ್ತಾ. ಮುಕಾರ್ ಧುಬಾವಾಚಿ ತಲ್ವಾರ್ ಎಕೆಕ್ಲ್ಯಾಚೆರ್ ಚ್ ಘುಂವೊನ್
ಪ್ರೇಕ್ಶಕಾಕ್ ಕೋಣ್ ಖುನಿಗಾರ್ ಮ್ಹಳ್ಳೊ ಹಿಸೊಬ್ ಸಯ್ತ್ ಮೆಳನಾ, ಆಕ್ರೆಪರ್ಯಾಂತ್! ಉಚಾರ್ನ್ ಸಾಂಗಾಜೆ
ಜಾಲ್ಲೊ ಜಿವಾಂತ್ ನಾ. ಕಳಿತ್ ಆಸ್ ಲ್ಲೊ ನಿಕು ಕೊಸ್ತ್ ಖೆಳ್ ಖೆಳಯ್ತಾ. ಮೆಲ್ಲೊ ಆತ್ಮೊ ಜಾವ್ನ್
ಪಾತ್ರಾಧಾರಿಂಚೆಂ ಸೂತ್ರ್ ಧರ್ ಲ್ಲೊ ಜುಜೆ ಕೊಸ್ತ್ ಆಕ್ರೆ ಪರ್ಯಾಂತ್ ಧೊಸ್ತಾ ಆನಿ ಮಿಸ್ತೆರ್ ಭುಂಯ್
ಪಡ್ಚೆ ಆದಿಂ ಕೆಪ್ಪೊ ಚಾಪ್ಪೊ ವ್ಹಡ್ಲೊ ಭಾವ್ ನಿಕು ಕೊಸ್ತ್ ಚಲಾಕೆನ್ ಖುನಿಗಾರಾಂಕ್ ಕಾನೂನಾಚ್ಯಾ
ದಾರಾರ್ ಪಾವಯ್ತಾ.
ಸಗ್ಳ್ಯಾ
ನಾಟಕಾಂತ್ ಜುಜೆ ಕೊಸ್ತ್ (ನಟ್-ಲೆಸ್ಲಿ ರೇಗೊ) ಆನಿ ನಿಕು ಕೊಸ್ತ್ (ನಟ್ – ಆಲ್ವಿನ್ ವೇಗಸ್) ಪ್ರೇಕ್ಷಾಂಕ್
ಮುಟಿ ಭಿತರ್ ದರ್ತಾತ್. ಎಕಾ ಮೆಲ್ಲ್ಯಾ ಮನ್ಶಾನ್ ಸೂತ್ರಧಾರಿಚೆಂ ಕಾಮ್ ಭೋವ್ ನಾಜೂಕಾಯೆನ್ ಆನಿ ತಿತ್ಲ್ಯಾಚ್
ಸೂಕ್ಶ್ಮ್ ಆನಿ ಉತ್ರಾಂಚೊ ತೀರ್ ಮಾರ್ನ್ ನಾಟಕಾಕ್ ಉಂಚಾಯ್ ದಿಲ್ಲಿ ಖ್ಯಾತ್ ಲೆಸ್ಲಿಕ್ ಫಾವೊ ಜಾತಾ.
ಸಾಂಗಾತಾಚ್ ಆಲ್ವಿನ್ ವೇಗಸ್, ಚಡ್ ಜಾವ್ನ್ ತುಳು ರಂಗ್ ಮಾಂಚಿಯೆರ್ ದಿಸೊನ್ ಯೆಂವ್ಚೊ ಹ್ಯಾ ನಾಟಕಾಂತ್
ಪ್ರಭುದ್ಧ್ ಪಾತ್ರ್ ಖೆಳ್ಳಾ ತೆಂ ಉಟೊನ್ ದಿಸ್ತಾ. ತುಳು ಹಾಸ್ಯಾ ಕಾರ್ಯಾಂನಿ ಹಾಂವ್ ತಾಕಾ ವ್ಹಳ್ಕಾತಾಂ
ಆನಿ ತಾಚೆ ಶಯ್ಲಿ, ಮ್ಹಾಕಾ ಭೊಗ್ ಲ್ಲ್ಯಾ ಪರ್ಮಾಣೆಂ, ದೇವ್ ದಾಸ್ ಕಾಪಿಕಾಡಾಕ್ ತಾಳ್ ಪಡ್ತಾ. ಪುಣ್
ಹ್ಯಾ ನಾಟಕಾಂತ್ ತಾಚಿ ಸಾವ್ಳಿ ಸಯ್ತ್ ನಾ!! ತುಳು ಪ್ರಭಾವಾ ಭಾಯ್ರ್ ರಾವ್ ಲ್ಲ್ಯಾ ಆಲ್ವಿ, ಕುದೊಸ್! ನಾಟಕಾಚೊ ತೀರ್ ಖಂಯ್ ಜೊಕ್ಲಾ ಮ್ಹಣ್ ಸೂತ್ರಾಧಾರಿನ್
ಪಾತ್ರಾಂಚಿ ಪರಿಚಯ್ ಕರ್ನ್ ದಿತಾನಾಂಚ್ ಸೂಕ್ಶ್ ಪ್ರೇಕ್ಶಕಾಕ್ ಕಳಾಜೆ. ಆಪ್ಲೆ ಬಾಯ್ಲೆವಿಶಿಂ ವ್ಹಳಕ್
ದಿತಾನಾ ಸೂತ್ರಧಾರಿ ಜುಜೆ ಕೊಸ್ತಾಚೊ ತಾಳೊ ವ್ಯಂಗ್ಯ್ ಆಸಾ. “ತಾಚೆಂ ಕಾಪಡ್ ಬೊಂಬ್ಲೆ ಸಕಯ್ಲ್..”
ಆನಿ ಹಾಂವೆ ಚೀತ್ ದಿಲ್ಲೆ ಪರ್ಮಾಣೆಂ ತಿ ತರ್ನಿ ಬಾಯ್ಲ್
ಮಾಂಚಿಯೆರ್ ಕಿತ್ಲೆ ಪಾವ್ಟಿಂ ಆಯ್ಲಿ ತಿತ್ಲೆಯ್ ಪಾವ್ಟಿಂ ಬೊಂಬ್ಲಿ ದಾಂಪುಂಕ್ ಪ್ರೇತನ್ ಕರ್ತಾಲಿ!
ಹಾಂವೆಂ ಚಿಂತ್ಲೆಂ ತಿ ಲಜೆತಾ! ಪುಣ್ ನಾ! ಹೊ ಏಕ್ ಬಳಾದೀಕ್ ಸಂಕೇತ್ ನಾಟಕಾಂತ್ ವಾಪಾರ್ ಲ್ಲೊ. ತ್ಯಾ
ಲಿಪವ್ಣೆಂತ್ ಸಗ್ಳೊ ಮಿಸ್ತೆರ್ ಆಟಾಪ್ ಲ್ಲೊ.
ಪುಣ್
ಬಾಯ್ಲ್ ಜಾವ್ನ್ ತಿ ಚಲಿ ಖೂಬ್ ಲ್ಹಾನ್ ಪ್ರಾಯೆಚಿ ಆನಿ ತಿಚ್ಯಾ ನಟನಾಂತ್ ಸಯ್ತ್ ಅಪರಿಪಕ್ವ್ ಪಣ್
ಥಂಯ್ ಥಂಯ್ ಉಟೊನ್ ದಿಸ್ತಾಲೆಂ. ೫೫
ಪ್ರಾಯೆಚ್ಯಾ ದಾದ್ಲ್ಯಾಕ್ ತಿತ್ಲಿ
ತರ್ನಿ ಬಾಯ್ಲ್ ಆನಿ ತಾಂಕಾಂ ಪಿಯುಸಿಂತ್ ವ ಡಿಗ್ರಿಂತ್ (!) ಶಿಕ್ಚಿ ಧುವ್?! ಇತ್ಲೆಂಚ್ ನ್ಹಯ್ ಆಸ್ತಾಂ,
ಆವಯ್ ಆನಿ ಧುವೆ ಮದ್ಲ್ಯಾ ಸಂಬಂದಾಚೆಂ ಅನಾವರಣ್ ಜಾಂವ್ಕ್ ಆವ್ಕಾಸ್ ನಾತ್ಲೊ. ವ್ಹಡ್ಲೊ ಭಾವ್ ಕೆಪ್ಪೊ
ಮ್ಹಣ್ ಮ್ಹಣ್ತಾತ್ ತರೀ ’ನಿಕ್ಕು – ಕುಕ್ಕ” ಸನ್ನಿವೇಶ್ ಸೊಡ್ಲ್ಯಾರ್ ಹೆರ್ ಸಗ್ಳೆಂ ಪರ್ಫೆಕ್ಟ್
ಆಯ್ಕಾತಾಲೆಂ. ಶಿಂತಿದ್ ನಾತ್ ಲ್ಲೊ ವ ಬೆಬ್ದೊ ಮ್ಹಣ್ ಮಾತ್ರ್ ಸಾಂಗ್ ಲ್ಲೆಂ ಜಾಲ್ಯಾರಿ ಪಾವ್ತೆಂ!
ಬಾಯ್ಲ್ ದೆರಾ ಸಾಂಗಾತಾ ವ್ಹಚೊಂಕ್ ಎಡಿನ್ ದಿಲ್ಲೆಂ ಕಾರಣ್ “ತುಜಿ (ಜುಜೆಚಿ) ಆಸ್ಕತ್ಕಾಯ್”. ಘೊವಾಚಿ
ಕಸ್ಲಿ ಆಸ್ಕತ್ಕಾಯ್? ಎಡಿಚ್ ಸಗ್ಳೊ ಹಾರ್ ಭಾರ್ ಪಳೆತಾಲೊ ಜಾಲ್ಲ್ಯಾನ್ ಜುಜೆ ಬಾಯ್ಲೆಕ್ ಸೊಡ್ನ್
ಪಯ್ಸ್ ಪಯ್ಣಾಕ್ ಗೆಲ್ಲಿ ಸಾಧ್ಯತಾ ನಾ. ಹಾಚೆ ಭಾಯ್ರ್ ತಾಕಾ ಲೈಂಗಿಕ್ ಅಸ್ಕತ್ಕಾಯ್ ಆಸ್ ಲ್ಲಿ ತರ್
ಧುವ್ ಕಶಿ ಜಲ್ಮಾಲಿ?! ತರ್ “ತುಜಿ ಆಸ್ಕತ್ಕಾಯ್” ಎಡಿನ್ ದಿಲ್ಲೆಂ ನೀಬ್ ಮಾತ್ರ್?! ತೀನ್ ಹರ್ಕತ್ಯೊ
- ಗರ್ಜೆಭಾಯ್ರ್ ಪೊಲಿಸಾಂಚ್ಯಾ ಮೊಚ್ಯಾಂಚೊ ಆವಾಜ್, ನಿಕುಚೆಂ ಅಸ್ಪಶ್ಟ್ ಉಲೊಣೆಂ ಆನಿ ಡಲ್ಲ್ ಜಾಲ್ಲೆಂ
”ಟೈಟಲ್ ಸೋಂಗ್’ ಸೊಡ್ಲ್ಯಾರ್ ಪೋಶಕ್ ನಟ್ ನಟಿಂನಿ ನಾಟಕಾಕ್ ಬರೊ ತೆಂಕೊ ದಿಲಾ.
ನಾಟಕಾಂತ್
ಮಾರ್ಮಿಕ್ ಉತ್ರಾಂಚೆಂ ಆವ್ರ್ ಆಸಾ ಮಾತ್ರ್ ನ್ಹಯ್ ಹಾಂತು ಜೊಯೆಲ್ ಪಿರೆರಿಚಿ ದೋನ್ ಧಾರಿಂಚಿ ಲಿಖ್ಣಿ
ಉಜಳ್ತಾ! ಹಾಚೆ ಬರಾಬರ್ ಸಂಗೀತ್ ಆನಿ ಉಜ್ವಾಡಾಚೊ ಪಾತ್ರ್ ಸಮರ್ಪಕ್ ರಿತಿನ್ ಖಳಯ್ಲಾ. ಕುಕಾರ್ಯಾಂ
ಆನಿ ಶಿಲೊಣ್ಯಾ ಭಾಯ್ರ್ ಕಾಂಯ್ ಹೊ ನಾಟಕ್ ಚಾರ್ ಮತಿಂನಿ ಘೊಳೊಂಕ್ ಲಾಗ್ಲಾ ಜಾಲ್ಯಾರ್ ನಾಟಕ್ ಯಶಸ್ವಿ
ಆನಿ ದಿಗ್ದರ್ಶಕಾಕ್ ಶಾಭಾಸ್ಕಿ.