ಮಾಸ್ಳೆ ಭೊಂವಾರಿಂ – ವ್ಯಾಪ್ತ್, ಜಿವಿತ್ ಆನಿ ಬಾವಾಡ್ತ್
ಕರಾವಳಿಚ್ಯಾ ಲೊಕಾಚಿ ಜೀಬ್ ಮಾಸ್ಳೆಕ್ ವ್ಹಳ್ಸಾಲ್ಲೆ ತಿತ್ಲಿ ಹೆರ್ ಖಾಣಾಂಕ್ ವ್ಹಳ್ಸಾನಾ. ಜಾಂವ್ ತೊ ವರ್ಗ್ ಮಧ್ಯಮ್ ವ ದುಬ್ಳೊ, ಮಾಸ್ಳೆಚೆಂ ಜೆವಾಣ್ ಖಾಯ್ಸ್ ಕರ್ತಾ. ಕಾರ್ಯೆಂ ಸೊಭಾಣಾಂನಿ ಮಾಸ್ಳೆಕ್ ಭಿಲ್ಕುಲ್ ರೀಗ್ ನಾ ತರೀ ದಿಸ್ಪೊಡ್ತೆಂ ಮಾಸ್ಳೆಕಡಿ ಶಿವಾಯ್ ಶಿತ್ ರುಚನಾ! ಹ್ಯಾ ವಗ್ತಾ, ಮಾಸ್ಳೆಚೊ ವಾಪಾರ್ ಭುಕೆಕ್ ಆನಿ ಭಲಾಯ್ಕೆಕ್ ಮಾತ್ರ್ ಸೀಮಿತ್ ಮ್ಹಣ್ ಚಿಂತ್ಲ್ಯಾರ್ ಆಮಿ ಚುಕ್ಲ್ಯಾಂವ್. ವಿಚಿತ್ರ್ ತರೀ ನೀಜ್, ಹ್ಯಾ ಮಾಸ್ಳೆ ಭೊಂವಾರಿಂ ಕ್ರಿಸ್ತಾಂವ್ ಧರ್ಮಾಚಿಂ ಪಾಳಾಂ ವಿಸ್ತಾರ್‍ಲ್ಲಿಂ ಆಸಾತ್. ಮಾಸ್ಳಿ ಪಾಗ್ಚಿ ಇಸ್ರಾಯೆಲಿತ್ ಸಾಧ್ಯಾ ಲೊಕಾಕ್ ಕಶಿ ಪೆÇೀಟ್ ಭರ್ಚಿ ವ್ಯಾಪ್ತ್ ಜಾವ್ನಾಸ್‍ಲ್ಲಿಗಿ, ತಿಚ್ ವ್ಯಾಪ್ತ್ ತಾಂಕಾಂ ನವ್ಯಾ ಜಿವಿತಾಚಿ ವ್ಹಳಕ್ ಕರ್ನ್ ದಿತಾ ಆನಿ ನವ್ಯಾ ಜಿಣ್ಯೆ ರಿತಿಕ್, ಭಾವಾಡ್ತಾಕ್ ವಾಟ್ ಕರುನ್ ದಿತಾ.
ಗಾಲಿಲೆಯಾ ಸರೋವರ್ ಆನಿ ಜೆಜುಚ್ಯಾ ಕಾಳಾರ್ ಮಾಸ್ಳೆ ವ್ಯಾಪ್ತ್:
ಆಮ್ಚ್ಯಾ ಪವಿತ್ರ್ ಪುಸ್ತಕಾಂತ್ ಚೋವ್ಗೀ ವಾಂಜೆಲಿಸ್ತ್ ಗಾಲಿಲೆಯಾ ಸರೋವರಾಚೊ ಉಲ್ಲೇಕ್ ಕರಿನಾಸ್ತಾಂ ರಾವನಾಂತ್. ತೊ ಏಕ್ ಸರೋವರ್ ವಿಸ್ರೊಂಚೆಪರಿಂಯ್ ನಾ. ತಾಚೆ ಭೊಂವ್ತೊಣಿಂ ಆಮ್ಚ್ಯಾ ಭಾವಾಡ್ತಾಕ್ ಸಂಬಂಧಿತ್ ಜಾಯ್ತ್ಯೊ ಗಜಾಲಿ ಘಡುನ್ ಗೆಲ್ಯಾತ್. ಜೆಜುಚ್ಯಾ ಜಿವಿತಾಕ್ ಆನಿ ಮಿಸಾಂವಾಕ್ ಪೂರಕ್ ಪಾಟ್‍ಥಳ್ ತ್ಯಾ ಸರೋವರಾನ್ ದಿಲಾಂ. ತ್ಯಾ ಸರೋವರಾಕ್ ಗೆನೆಜರೆತ್ ಸರೋವರ್ ಮ್ಹಣ್ ಯಿ ವ್ಹಳ್ಕತಾತ್. ಇಸ್ರಾಯೆಲಾಚಿತ್ಲೊ ಹೊ ಸರೋವರ್ ಕಾಂಯ್ 13 ಮೈಲಾಂ ಲಾಂಬ್ ಆನಿ 7 ಮೈಲಾಂ ರೂಂದ್ ಆಸತ್. ಜೆಜುಚ್ಯಾ ಕಾಳಾರ್ ಹಾಂಗಾಸರ್ ಮಾಸ್ಳಿ ಪಾಗ್ಚಿ ವ್ಯಾಪ್ತ್ ವೇಗಾನ್ ವಾಡ್ತಾಲಿ ಆನಿ ಖಂಡಿತ್ ಮೊಟ್ಯಾ ಆದಾಯಾಚಿ ವ್ಯಾಪ್ತ್ ಹಿ ಆಸ್ಲಿ. ಜುದೆವ್ ಇತಿಹಾಸ್ ಕಾರ್ ಜೋಸೆಪುಸ್ ಪರ್ಮಾಣೆಂ 230 ತಾರ್ವಾಂ ಥಂಯ್ಸರ್ ತವಳ್ ಆಸ್ಲಿಂ. ಜೆಜುಚೆ ಅಪೆÇಸ್ತಲ್ ಪೆದ್ರು ಆನಿ ಅಂದ್ರು ಹ್ಯಾ ವ್ಯಾಪ್ತೆಂತ್ ಹೆಳ್‍ಲ್ಲೆ. ತಾಣಿಂ ಧರ್‍ಲ್ಲಿ ಮಾಸ್ಳಿ ಸ್ಥಳೀಯ್ ಲೊಕಾಕ್ ವಿಕ್ತಾಲೆ ಮಾತ್ರ್ ನ್ಹಯ್, ಜೆರುಸಲೇಮ್ ತಶೆಂಚ್ ಗ್ರೀಸ್ ರಾಶ್ಟ್ರಾಕ್ ಧಾಡ್ಚ್ಯಾಕ್ ಮಿಟಾನ್ ಸಾಂಭಾಳ್ನ್ ದವರ್ಚಿ ಸವ್ಲತ್‍ಯಿ ಆಸ್‍ಲ್ಲಿ. ದಿಸಾ ಉಜ್ವಾಡಾಕ್ ದಾದ್ಲೆ ಕಾಮಾಂತ್ ವೆಸ್ತ್ ಆಸ್ತಾಲೆ. ಧರ್ ಲ್ಲಿ ಮಾಸ್ಳಿ ಮೆಕ್ಳಿ ಕರಿಜೆ, ಜಾಳಾಂ ಧುಯ್ಜೆ, ಪಿಂದ್‍ಲ್ಲಿಂ ಜಾಳಾಂ ಸಾರ್ಕಿಂ ಕರಿಜೆ, ತಿಂ ಸುಕಯ್ಜೆ.. ಆಶೆಂ ಉಜ್ವಾಡಾಚೆಂ ಕಾಮ್ ತರ್ ರಾತಿಕ್ ಪಾಗ್ಚೆಂ ಕಶ್ಟಾಂಚೆ ಕಾಮ್ ತಾಂಚೆಂ ಆಸ್ಲೆಂ. ಹೆ ಪಾಗಿ ತಾಂಚ್ಯಾ ಶೆತಾಂತ್ ಭೋವ್‍ಚ್ ಪರಿಣತ್. ತೆ ಅನ್ಪಡ್ ಆಸ್ಯೆತ್ ಪುಣ್ ಆಪ್ಲ್ಯಾ ವ್ಯಾಪ್ತೆವಿಶಿಂ ವಿಶೇಸ್ ಭಕ್ತ್ ಆನಿ ಶಿಸ್ತ್ ಆಸ್ಚೆ. ದರ್ಯಾಂತ್ ವ ನಂಯ್ತ್ ಜಾಯ್ತೊ ವೇಳ್ ರಾವುನ್ ಮಾಸ್ಳಿ ಖಂಯ್ ಆನಿ ಖಂಚ್ಯಾ ವೆಳಾ ಪಾಗ್ಯೆತ್ ಮ್ಹಳ್ಳೆ ಖಾತಿರ್ ಸಯ್ರಾಣ್ ಘೆವ್ನ್ ಕಾಮ್ ಕರಿಜೆ. ಗೂಂಡ್ ಉದ್ಕಾಕ್ ದೆಂವ್ಚೆಂ ತರ್ ತಾಕಾ ಚಡಿತ್ ಸಂಗಟಿತ್ ವಾವ್ರ್ ಗರ್ಜ್ ಆಸ್ತಾಲೊ. ಥೊಡೆ ಪಾವ್ಟಿಂ ತಾಣಿಂ ದೋನ್ ತೀನ್ ದೊಣಿ ಸಾಂಗಾತಾ ವ್ಹರುನ್ ಜಾಳ್ ಉಡವ್ನ್ ಮಾಸ್ಳೆಕ್ ಸಾಂಪ್ಡಾಂವ್ಚೊ ತಂತ್ರ್ ವಾಪಾರಿಜೆ ಪಡ್ತಾಲೊ (ಲೂಕ್ 5:10). ಮಾಸ್ಳಿ ದರಬಸ್ತ್ ಮೆಳ್ಚ್ಯಾ ದಿಸಾಂನಿ ಚಡಿತ್ ದಿಸಾ ಕುಲಿಚ್ಯಾ ಆಳಾಂಕ್‍ಯಿ ಕುಮ್ಕೆಕ್ ಘೆಜೆ ಪಡ್ತಾಲೆಂ. (ಮಾರ್ಕ್ 1:20) ಹೆಂ ಕಾಮ್ ಸಗ್ಳಿ ರಾತ್ ಕರುನ್ ಸಕಾಳ್ ಜಾತಾನಾ ತಡಿಕ್ ಪಾವಾಜೆ ಆಸ್ಲೆಂ ಕಿತ್ಯಾ, ಮೊಗೊರ್, ಮಾಸ್ಳಿ ವಿಕ್ರೊ ಕರ್ಪಿ ಆನಿ ಘೆವ್ಪಿ ಜಾಯ್ತಿಂ ರಾಕುನ್ ಆಸ್ತಾತ್. ಭೋವ್‍ಶಾ ತಾಂಚೆಂ ಧಯ್ರ್, ಸಯ್ರಾಣ್, ಹಟ್ ಆನಿ ಸಂಗಟಿತ್ ವಾವ್ರ್ ಪಳೆವ್ನ್ ಜೆಜುಯಿ ಖೂಬ್ ತಾಂಚೆರ್ ಪಾತ್ಯೆಲೊ; ಸರ್ಗಿಂಚೆಂ ರಾಜ್ ವಿಸ್ತಾರುಂಚೆಂ ಕಾಮ್ ತಾಂಚೆ ಹಾತಿಂ ಘಾಲುಂಕ್!
ಸೊಮಿ ಅನಿ ಮಾಸ್ಳೆ ನಾತೆಂ:
ತೊ ಆಸ್ಲೊಚ್ ತಸೊ! ಎಕ್ದಮ್ ಸರಳ್, ಎಕ್ದಮ್ ನಿತಳ್. ತಾಚೆಂ ಮನ್ ವೊಡ್ತಾಲೆಂ ಎಕ್‍ಚ್ ದೊಂಗ್ರಾಳ್ ಸುವಾತ್ಯಾಂಕ್ ಮಾಗಿರ್ ಪರತ್ ಗಾಲಿಲೆಯಾ ಸರೋವರಾಚೆ, ವೆಳೆಕ್. ತೊ ಕಾಳೊಕ್ ಪಡ್ತಾನಾ ದೊಂಗ್ರಾಕ್ ಚಡುನ್ ವೆತಾಲೊ, ದೀಸ್ ಉಜ್ವಾಡ್ತಾನಾ ಸರೋವರಾಚೆ ವೆಳೆರ್ ಮಾಸ್ಳಿ ಪಾಗ್ತೆಲ್ಯಾಂಸಂಗಿಂ ದಿಸ್ತಾಲೊ. ತೊ ಸನ್ನೆಶಿ ವ ವಾಟ್ಸುರಿಗಿ, ಗುರು ವ ದೋಸ್ತ್? ಪೆÇಟಾರಿ ವ ಶಿಸ್ತೆಚೊ ಪುಜಾರಿ? ಏಕ್ ವ್ಹಯ್, ಅನ್ಯೆಕ್ ನ್ಹಯ್ ಮ್ಹಣುಂಕ್ ಸಾಧ್ಯ್‍ಚ್‍ನಾ!
ತಿತ್ಲೊ ಸರಳ್ ತೊ ಆಸ್ಲೊ ತರೀ ದೆಕ್ತೆಲ್ಯಾ ದೊಳ್ಯಾಂಕ್, ಮತಿಂಕ್ ಛಿomಠಿಟex ಜಾವ್ನ್‍ಚ್ ವ್ಹೆತಾಲೊ. ಪುಣ್ ಏಕ್ ತೆಂ ಸತ್, ತೊ ಮನಿಸ್ ಜಾವ್ನಾಸ್ಲೊ, ಮ್ಹಜೆ-ತುಜೆಬರಿ. ಏಕ್ ಉತ್ತೀಮ್ ಮನಿಸ್-ದೆವಾಪರಿಂ ಮ್ಹಣ್ತಾಂವ್ ಪಳೆಯಾ ತಶೆಂ, ತೊ ದೇವ್‍ಚ್.
ತಾಕಾ ಆಮಿ ‘ಸೊಮಿ’ ಮ್ಹಣ್ತಾಂವ್ ಆನಿ ತಾಚೆಲಾಗಿಂ ಥೊಡೆ ಘುಟ್ ಆಸ್ಲೆ- ಮನ್ಶಾಮತಿಕ್ ಎದೊಳ್ ಉಗ್ಡಾಪುಂಕ್ ನಾತ್ಲೆಲೆ. ತೆ ಘುಟ್ ಸರ್ಗಿಂಚ್ಯಾ ರಾಜಾಚೆ. ಮನ್ಶಾಮತಿ ಕಿತ್ಲಿ ಹುಶಾರ್‍ಗಿ ತಿ ಸಂಸಾರಾಭಿತರ್ಲಿ, ಸಂಸಾರಾಭಾಯ್ಲಿ ಹರ್ಯೇಕ್ ಸಂಗತ್ ಪಾರ್ಕುಂಕ್ ಸಕ್ತಾ. ತಿ ಸಕತ್ ರಚ್ನಾರಾನ್ ದಿಲ್ಯಾ. ಹ್ಯಾಚ್ ವೆಳಾ, ಮನ್ಶಾಮತಿಚಿ ಪೆÇಕೊಳಾಯ್- ತಿ ಅಪ್ಣಾ ಭಿತರ್‍ಚ್ ಪಯ್ಣ್ ಕರುಂಕ್ ಸೊಡಿನಾ ವ ವಿಸ್ರಾತಾ. ಭಾಯ್ಲ್ಯಾ ದಿರ್ವ್ಯಾ ಥಂಯ್ ಮನ್ಶಾಮತ್ ಪಿಶಿ ಜಾತಾ, ಪುಣ್ ಭಿತರ್ಲ್ಯಾ ದಿರ್ವ್ಯಾಚಿ ಬೆಪಾರ್ವಾ ಕರ್ತಾ.
ಆನಿ ‘ಸೊಮಿ’ ಅಸಲೊ ಏಕ್ ಘುಟ್ ಮನ್ಶಾಖಾತಿರ್ ಉಗ್ಡಾಪುಂಕ್ ಆಯಿಲ್ಲೊ-ಭೆಟ್ತಾ ಅನ್ಪಡ್ ಪಾಗಿಂಕ್! ಹ್ಯಾ ಪಾಗಿಂಚಿ ಮತ್ ಗಾಲಿಲೆಯಾ ಸರೋವರಾಚೆ ತಡಿ ಆನಿ ಗಡಿ ಭಿತರ್ ಮಾತ್ರ್ ಸುರಾಂಟಿ ಮಾರ್ತಾಲಿ. ಹೊಡ್ಯಾಂ ಥಾವ್ನ್ ಜಾಳಾಂಕ್, ಜಾಳಾಂ ಥಾವ್ನ್ ಮಾಸ್ಳ್ಯಾಂಕ್, ಮಾಸ್ಳ್ಯಾಂ ಥಾವ್ನ್ ದಿಸ್ಪೊಡ್ತ್ಯಾ ಗ್ರಾಸಾಕ್-ಇತ್ಲಿಚ್ ತಾಂಚಿ ದಿನಚರಿ ಆನಿ ತಿತ್ಲ್ಲೊಚ್ ತಾಂಚೊ ಸಂಸಾರ್! ಅಸಲ್ಯಾ ಮಂದ್‍ಮತಿಂಕ್ ಸೊಮ್ಯಾನ್, ‘ಸರ್ಗಿಂಚೆ ಘುಟ್’, ‘ಮನ್ಶಾಭಿತರ್ಲೆಂ ದಿರ್ವೆಂ’ ಉಗ್ಡಾಪುಂಕ್ ಪೆಚಾಡ್ಚೆಂ-ಕಾಮ್ ನಾತ್ಲೆಲ್ಯಾ ಆಚಾರಿನ್ ಭುರ್ಗ್ಯಾಚೊ ಕುಲೊ ತಾಸ್‍ಲ್ಲೆಪರಿಂ ನ್ಹಯ್‍ಗಿ?
ರೆಡ್ಯಾಕ್ ಭಾಸ್ ಬೊಡ್ಯೆಚಿ, ಪಾಗಿಕ್ ಭಾಸ್ ಮಾಸ್ಳೆಚಿ! ಸೊಮ್ಯಾ ಮುಕಾರ್ ಆಸ್ಲೊ ಗಾಲಿಲೆಯಾ ಸರೋವರ್, ಉದ್ಕಾಂತ್ ಪಾಗ್ಪಿ, ವೆಳೆರ್ ಮಾಗೊರ್, ಕಾಂಟಿ, ಭಾಟಿ, ಮಾಸ್ಳೆಚಿ ರಾಸ್, ಹೊಡಿಂ ಜಾಳಾಂ... ಸೊಮ್ಯಾನ್ ಸರ್ಗಾಕ್ ಆನಿ ಜಾಳಾಂಕ್ ಸಯ್ರಿಕ್ ಘಡ್ಲಿಚ್! ಸೊಮಿ ಪಾಂಯ್‍ವಾಟೆನ್ ಘುಟ್ ಸಾಂಗೊಂಕ್ ಸೊಧ್ತಾಲೊ ಪುಣ್ ಮೊಗ್ರಾಂಕ್ ಪಾಂವ್ಚಿ ವಾಟ್ ನಂಯ್ಚಿ, ತೆಂ ಕಳ್ತಚ್ ತಾಚ್ಯಾ ಶಿಕೊವ್ಣೆಕ್ ನಂಯ್ ಭೊಂವ್ತೊಣಿಚೆಂ ಪರಿಸರ್‍ಚ್ ಚಡ್ ತಾಕಾ ಖಾಶೆಲೆಂ ಆನಿ ಲಾಗ್ಶಿಲೆಂ ಜಾಲೆಂ.
ತಾಣೆಂ ಶಿಕಯ್ಲೆಂ, ಸರ್ಗಿಂಚೆಂ ರಾಜ್ ಮ್ಹಳ್ಯಾರ್ ಕಸಲೆಂ? ತೆಂ ಜಾಳಾಪರಿಂ. ಜಾಳ್ ದರ್‍ಯಾಕ್ ಉಡಯ್ತಾತ್ ಅನಿ ಸರ್ವ್ ಥರಾಂಚಿ ಮಾಸ್ಳಿ ರಾಸ್ ಕರ್ತಾತ್. ತ್ಯಾ ಉಪ್ರಾಂತ್ ಬರ್ಯಾಂಕ್ ಪಾಡ್ ಮಾಸ್ಳೆಥಾವ್ನ್ ವಿಂಗಡ್ ಕರ್ತಾತ್. (ಮಾತೆವ್ 13:47) ವ್ಹಾ! ಕಸ್ಲಿ ಸರ್!
ಹ್ಯಾ ಮೊಗ್ರಾಂಕ್ ಭೊಗ್ಲೆಂ ಜಾಯ್ತ್, ‘ಹೊ ಕೋಣ್ ನವೊಚ್! ಮಾಸ್ಳ್ಯಾಂ ವಿಶ್ಯಾಂತ್ ಉಲಯ್ತಾ’. ಆಶೆಂ ಚಿಂತ್ತಾನಾಂಚ್ ಸೊಮ್ಯಾಚೊ ಅನ್ಯೇಕ್ ಉಲೊ, “ಯೆಯಾ ಮ್ಹಜ್ಯಾ ಪಾಟ್ಲ್ಯಾನ್, ಹಾಂವ್ ತುಮ್ಕಾಂ ಮನ್ಶಾಚಿ ಪಾಗಿ ಕರ್ತಲೊಂ”. (ಮಾತೆವ್ 4:19) ತ್ಯಾ ಮೊಗ್ರಾಂಚ್ಯಾ ಸಪ್ಣಾಂಕ್ ಪಾಕಾಂ ಫುಟ್ಲಿಂ ಆಸ್ತೆಲಿಂ. ನವೆಂ ಆಫರ್ ಮೆಳ್ಳಾಂ, ಮಾಸ್ಳಿ ಪಾಗ್ಚಿ ತರ್ ಕಿತ್ಯಾ ನಜೊ? ಆನಿ ‘ತಕ್ಷಣ್ ತಾಣಿಂ ಜಾಳಾಂ ಸಾಂಡ್ಲಿಂ ಆನಿ ಪಾಟ್ಲಾವ್ ಕೆಲೊ!’ (ಮಾತೆವ್ 4:20)
ತಾಂಚೆ ಪಯ್ಕಿ ಮುಕೆಲಿ ಮೊಗೊರ್ ಪೆದ್ರು, ನಂಯ್‍ಚ್ಯಾ ಕಾಳ್ಜಾಂತ್ಲ್ಯೊ ಸಂಗ್ತಿ ಬರ್ಯಾನ್ ಜಾಣಾಸ್ಚೊ, ಎಕಾ ರಾತಿಂ ಸಂಪೂರ್ಣ್ ಸಲ್ವಾಲೊ. ರಾತ್‍ಭರ್ ನೀದ್ ಖಳೊನ್ ಪಾಗುನ್ ರಾವ್ಲೆ ತರೀ ಕಾಂಯ್ಚ್ ಮೆಳ್ಳೆಂನಾ. ತ್ಯಾಚ್ ಘಡ್ಯೆ, ‘ತುಮ್ಕಾಂ ಮನ್ಶಾಪಾಗಿಂ ಕರ್ತಾಂ’ ಮ್ಹಳ್ಳೊ ಸೊಮಿ, “ಜಾಳ್ ಉಜ್ವ್ಯಾಕ್ ಉಡಯ್” ಮ್ಹಣ್ತಾನಾ, ಪೆದ್ರುಚ್ಯಾ ವಾಂಟ್ಯಾಕ್ ಅಜ್ಯಾಪಾಂಚೆಂ ದಾರ್ ಉಗ್ತೆಂ ಪಡ್ಲೆಂ! ಆನ್ಯೇಕ್ ಪಾವ್ಟಿಂ ತ್ಯಾಚ್ ಸೊಮ್ಯಾನ್ ತೆಂಪ್ಲಾಚೊ ತಿರ್ವೊ ಭಾಂದುಂಕ್ ಪೆದ್ರುಕ್ ದಾಡ್ಲಿ ಸಂಗತ್‍ಯಿ ಕುರ್ಕುರಿತ್. ಜಾಳಾಕ್ ಸಾಂಪಡ್ಲೆಲ್ಯಾ ವ್ಹಡ್ಲ್ಯಾ ಮಾಸ್ಳೆಚ್ಯಾ ತೊಂಡಾಂತ್ಲೆ ನಾಣ್ಯಾಂನ್ ತಿರ್ವೊ ತಿರ್ಸಿಲೊ! ಹೆಂ ಮಾಸ್ಳೆಂಚೆಂ ನಾತೆಂ ಇತ್ಲ್ಯಾಕ್ ಥಾಂಬಾನಾ, ಸೊಮಿ ಮೊರೊನ್ ಜಿವಂತ್ ಜಾವ್ನ್ ಎಕಾ ಫಾಂತ್ಯಾಕ್ ತೊಚ್ ಸೊಮಿ ಮಾಸ್ಳಿ ಇಂಗ್ಳ್ಯಾರ್ ಭಾಜುನ್ ಶಿಸಾಂಕ್ ಆಪವ್ನ್ ‘ಯೆಯಾ, ನಾಶ್ಟೊ ಕರಾ’ ಮ್ಹಣ್ತಾ.
ಮಾಸ್ಳಿ - ಸೀಕ್ರೆಟ್ ಕೋಡ್?
ನವ್ಯಾ ಸೊಲ್ಲ್ಯಾಂತ್ ಮಾಸ್ ಬಾರೀಚ್ ಉಣೆಂ ಪಾವ್ಟಿಂ ಉಲ್ಲೇಕ್ ಜಾಲಾಂ, ಪುಣ್ ಮಾಸ್ಳೆವಿಶಿಂ ಉಲ್ಲೇಕ್ ಜಾಯ್ತೆ! ದೊಂಗ್ರಾವ್ಹಯ್ಲ್ಯಾ ಪ್ರಸಂಗಾಂತ್, “ತುಮ್ಚೆ ಪಯ್ಕಿ ಕೋಣ್ ತೊ ಬಾಪುಯ್ ಉಂಡೊ ಮಾಗ್ತಲ್ಯಾ ಪುತಾಕ್ ಫಾತರ್ ದೀತ್? ವ ಮಾಸ್ಳಿ ಮಾಗ್ತೆಲ್ಯಾಕ್ ಜಿವ್ದಾಳ್ ದೀತ್?” (ಮಾತೆವ್ 7:9-10). ಎಕ್ಸುರ್ಯಾ ಸುವಾತೆರ್ ಶಿಕವ್ನ್ ಆಸ್ತಾನಾ ಲೊಕಾಕ್ ಖಾಂವ್ಕ್ ನಾತ್ಲ್ಯಾ ವೆಳಾ ಶಿಸಾಂಲಾಗಿಂ ಮಾಸ್ಳಿ ಆಸ್ಲಿ (ಮಾರ್ಕ್ 6:38). ಜೆಜುನ್ ಲೊಕಾಕ್ ಉಂಡ್ಯಾ ಮಾಸ್ಳೆನ್ ವಾಡ್ಲೆಂ (ಜುವಾಂವ್ 6:1-13). ಮಾಸ್ಳೆಚೊ ವಾಪಾರ್ ಹಾಂಗಾಸರ್ ಜೆವ್ಣಾ ಖಾಣಾಕ್ ಸೀಮಿತ್ ಆಸ್ಲ್ಲೊ ತೊ, ಸುರ್ವಿಲ್ಯಾ ಕ್ರಿಸ್ತಾಂವಾಂಚ್ಯಾ ಭಾವಾಡ್ತಿ ಜಿವಿತಾಕ್ ಭೋವ್ ಗರ್ಜೆಚೊ ವಾಂಟೊ ಜಾಲ್ಲಿ ಗಜಾಲ್ ನಿಜಾಯ್ಕಿ ವಿಶೇಸ್!
ಸೊಮಿ ಸಂಸಾರ್ ಸಾಂಡುನ್ ಗೆಲ್ಯಾ ಉಪ್ರಾಂತೀ ಮಾಸ್ಳೆಚೆಂ ನಾತೆಂ ಕ್ರಿಸ್ತಾಂವಾಂನಿ ಸಾಂಬಾಳ್ಳೆಂ. 64 ಂಆ-ಂತ್ ಸುರ್ವಿಲೆ ಕ್ರಿಸ್ತಾಂವ್ ವ ಸುರ್ವಿಲಿ ಪವಿತ್ರ್ ಸಭಾ ರೋಮ್ ಚಕ್ರವರ್ತಿ ನೀರೊಚ್ಯಾ ಹಾತಾಂತ್ ಬೋವ್‍ಚ್ ಕಶ್ಟಾಲಿ, ಅಸಲ್ಯಾ ಆಡ್ಚಣೆ, ದಗ್ದಣ್ಯಾ ಮಧೆಂಯ್ ಪಾಂಚ್ ಭಾಗಾಂನಿ ಕ್ರಿಸ್ತೀಯ್ ಸಭಾ ಬಳ್ವಂತ್ ಜಾಯಿತ್ ಅಯ್ಲಿ: ಜೆರುಸಲೇಮ್, ಅಂತಿಯೊಕ್, ರೋಮ್, ಅಲೆಗ್ಸಾಂಡ್ರಿಯಾ ಆನಿ ಬೈಜೆಂಟೈನ್. ಮಾಡ್ತಿರ್‍ಪಣಾಚಿ ಸಾಕ್ಸ್ ಕ್ರಿಸ್ತಾಂವ್ಪಾಣಾಕ್ ಏಕ್ ಭರ್ಮ್ ದೀಂವ್ಕ್ ಪಾವ್ಲಿ. ದಗ್ದಣ್ಯಾಮಧೆಂ ಕ್ರಿಸ್ತಾಂವಾಂಕ್ ಸಾಂಗಾತಾ ಮೆಳುಂಕ್, ಎಕಾಮೆಕಾ ವ್ಹಳ್ಕುಂಕ್, ಬಾವಾಡ್ತಾಚಿ ಪಾಚಾರ್ಣಿ ಕರುಂಕ್ ‘ಮಾಸ್ಳೆ’ನ್ ಸೀಕ್ರೆಟ್ ಕೋಡ್ ಜಾವ್ನ್ ಕಾಮ್ ಕೆಲಾಂ- ಹೆಂ ಇತಿಹಾಸಿಕ್ ಸತ್!
‘ಮಾಸ್ಳಿ’- ಕ್ರಿಸ್ತಾಂವಾಚ್ಯಾ ಭಾವಾಡ್ತಾಚೊ ಸಂಕೇತ್ ಜಾಲಿ. ಪರ್ಗಟ್ ರಿತಿನ್ ಕೊಣೆಂಯ್ ಭಾವಾಡ್ತ್ ಉಚಾರ್ಲ್ಯಾರ್ ತಾಕಾ ಮರಣ್ ರಾಕುನ್ ಆಸ್ತಾಲೆಂ. ಅಸಲ್ಯಾವೆಳಾ ಕ್ರಿಸ್ತಾಂವಾಂನಿ ಎಕಾಮೆಕಾ ವ್ಹಳಕ್ ಧರುಂಕ್ ‘ಮಾಸ್ಳಿ’ ಸೀಕ್ರೆಟ್ ಕೋಡ್ ಜಾವ್ನ್ ವಾಪಾರುಂಕ್ ಸುರು ಕೆಲೆಂ. ಎಕ್ಲ್ಯಾನ್ ಮಾಸ್ಳೆಚೊ ಪಾಟಿಚೊ ಗೀಟ್ ವೊಡ್ಲೊ ತರ್ ಆನ್ಯೆಕ್ಲ್ಯಾನ್ ಮಾಸ್ಳೆಚೊ ಪೆÇಟಾಚಿ ಗೀಟ್ ವೋಡ್ನ್ ಸಂಪೂರ್ಣ್ ಕೆಲ್ಯಾರ್ ತೊ ಕ್ರಿಸ್ತಾಂವ್ ಮ್ಹಣ್ ವ್ಹಳ್ಕುಂಕ್ ಸುಲಭ್ ಜಾತಾಲೆಂ. ಮಾಸ್ಳಿ-ಹ್ಯೆ ಪರಿಂ ಸೊಡಯ್ತಾನಾ ತಿ ಭಾವಾಡ್ತಾಚಿ ಉಚಾರ್ಣಿ ಜಾತಾಲಿ. ಆನಿ ಹ್ಯಾ ಸಂಕೇತಾಕ್ ಗ್ರೀಕ್ ಭಾಶೆನ್ ಮಾಸ್ಳೆಕ್ ‘ICHTHUS’ ಮ್ಹಣ್ತಾತ್ ಜಾಲ್ಲ್ಯಾನ್ ಹರ್ಯೇಕಾ ಅಕ್ಷರಾಕ್ - ‘ಜೆಜು ಕ್ರೀಸ್ತ್, ದೆವಾಚೊ ಪೂತ್, ಸೊಡ್ವೊಣ್ದಾರ್’ - ಮ್ಹಳ್ಳೊ ಅರ್ಥ್ ಯೆತಾಲೊ. ಹಾಂತುಂ ಜೆಜು ಆನಿ ತಾಚೆಂ ಮಿಸಾಂವ್ ಕಿತೆಂ ಮ್ಹಣ್ ಸಮ್ಜುನ್ ಯೆತಾಲೆಂ.
ಉದ್ಕಾಂತ್ಲಿ ಮಾಸ್ಳಿ ಆನಿ ಪವಿತ್ರ್ ಸ್ನಾನ್
ಕ್ರಿಸ್ತಾಂವಾಂಕ್ ಉದ್ಕಾನ್ ಸ್ನಾನ್ ದಿಂವ್ಚ್ಯಾ ರಿವಾಜಿ ಪಾಟ್ಲ್ಯಾನ್‍ಯಿ ಏಕ್ ವಿಶಿಷ್ಟ್ ಅರ್ಥ್ ಆಸಾ. ಸುರ್ವಿಲ್ಯಾ ಪವಿತ್ರ್ ಸಭೆಂತ್ಲ್ಯಾ ಹರ್ಯೆಕ್ಲಾಕ್ ‘ಉದ್ಕಾನ್ ಸ್ನಾನ್ ಆನಿ ಮಾಸ್ಳಿ’- ಹಾಂಚೆಮಧೆಂ ಆಸ್ಲ್ಲೊ ಅರ್ಥ್ ಕಳಿತ್ ಆಸ್ಲ್ಲೊ, ಮಾಸ್ಳಿಯ್ ಕ್ರಿಸ್ತಾಂವಾಚ್ಯಾ ಪವಿತ್ರ್ ಸ್ನಾನಾಚೊ ಸಂಕೇತ್. ತವಳ್ ಉದ್ಕಾಂತ್ ಸಂಪೂರ್ಣ್ ಕೂಡ್ ಬುಡೊವ್ನ್ ಪವಿತ್ರ್ ಸ್ನಾನ್ ದಿತಾಲೆ, ಮ್ಹಣ್ಜೆ, ಹೊ ಸ್ನಾನ್ ಘೆತಾ ತೊ ಜೆಜುಕ್ರಿಸ್ತಾಚ್ಯ್ ಮರ್ಣಾ, ನಿಕೆಪಣಾ ಆನಿ ಜಿವಂತ್ಪಣಾಂತ್ ಆಪ್ಣಾಕ್‍ಚ್ ಬುಡೊವ್ನ್ ಘೆತಾ. ತ್ಯಾ ಶಿವಾಯ್ ಜೆಜು ಕಸೊ ಮೆಲೊ ಮ್ಹಣ್ ಶಿಕಂವ್ಚೆಂ ಜಾಲ್ಯಾರಿ ಮಾಸ್ಳೆಕ್‍ಚ್ ದಾಕವ್ನ್, ತಿಚಿ ಶಿಮ್ಟಿ ‘x’ ಆಕಾರಾಚಿ ತಿ ದಾಕವ್ನ್ ಖುರ್ಸಾರ್ ಮೆಲೊ ಮ್ಹಣ್ ಸಮ್ಜಯ್ತಾಲೆ.
ಮಾಸ್ಳಿ ಗೋಡ್ ಉದ್ಕಾಂತ್ ಉಪ್ಯೆತಾ, ತಿ ಬುಡನಾ. ತ್ಯಾ ಮಾಸ್ಳೆಪರಿಂಚ್ ಹರ್ಯೇಕಾ ಕ್ರಿಸ್ತಾಂವಾನ್ ಆಪ್ಣೆಂ ‘ಬಚಾವ್’ ಜಾಯ್ಜೆ ತರ್ ಸಂಪೂರ್ಣ್ ಬುಡಾಜೆ, ಅತ್ಮೀಕ್ ಥರಾನ್ ಬಚಾವಿ ಜೊಡಿಜೆ ತರ್ ಜೆಜುಚ್ಯಾ ಮೊಗಾಂತ್ ಆಮಿ ಬುಡ್ಲೆಲಿಂ ಆಸುಂಕ್ ಜಾಯ್, ತೊ ಮೋಗ್ ತಾಣೆಂ ಖುರ್ಸಾರ್ ಪ್ರಾಣ್ ಅರ್ಪುನ್ ದಾಕಯ್ಲೊ.
ಉಂಡೊ ಅನಿ ಮಾಸ್ಳಿ - ಎವ್ಕರಿಸ್ತಿಕ್ ರೂಪ್?
ಮಾಸ್ಳಿ - ಏಕ್ ಸಂಕೇತ್ ಜಾವ್ನ್ ಕ್ರಿಸ್ತಾಂವಾಂನಿ ವಾಪಾರ್ಚೆ ಆದಿಂಚ್ ರೊಮಾಗಾರ್ ಆನಿ ಗ್ರೇಕ್‍ಯಿ ವಾಪಾರ್ತಾಲೆ. ತಾಣಿಂ ವಾಪಾರ್ತಾನಾ ತ್ಯಾ ಸಂಕೇತಾಕ್ ತಾಂಚೊಚ್ ಅರ್ಥ್‍ಯಿ ಆಸ್ಲ್ಲೊ. ಆಶೆಂ ಮಾಸ್ಳಿ ಸಂಕೇತ್ ಜಾವ್ನ್ ವಾಪಾರ್ಚೆಂ ಕಾಂಯ್ ನವೆಂ ನ್ಹಯ್ ಜಾಲ್ಲ್ಯಾನ್ ದಗ್ದಣಿ ವೆಳಾ ಕ್ರಿಸ್ತಾಂವಾಂನಿ ಹೊ ಸಂಕೇತ್ ವಾಪಾರ್ಲ್ಯಾರಿ ಕೊಣಾಯ್ಕಿ ದುಬಾವ್ ಜಾಯ್ನಾತ್ಲೊ. ಕಾತೆಕುಂಬಾಂನಿ ವಾ ಮಾಗ್ಣ್ಯಾಕ್ ಖಂಯ್ಸರೀ ಸಾಂಗಾತಾ ಮೆಳೊಂಕ್ ಆಸಾ ತರ್ ಮಾಸ್ಳಿಚೊ ಸಂಕೇತ್ ಭಾಯ್ಲ್ಯಾನ್ ಕಾಂತವ್ನ್ ದವರ್ಲ್ಯಾರ್ ಕ್ರಿಸ್ತಾಂವಾಕ್ ತೆಂ ಸಮ್ಜಾತಾಲೆಂ ಆನಿ ತೆ ಮಾಗ್ಣ್ಯಾ-ಜೆವ್ಣಾಕ್ ಸಾಂಗಾತಾ ಮೆಳ್ತಾಲೆ.
ಆತಾಂ ಸವಾಲ್ ಎವ್ಕರಿಸ್ತಾಚಾ ಜೆವ್ಣಾಂತ್ ‘ಮಾಸ್ಳಿ’ ಆಸ್‍ಲ್ಲಿಗಿ? ಸುರ್ವಿಲ್ಯಾ ಕ್ರಿಸ್ತಾಂವಾಂನಿ ಕಾಂತಯ್ಲೆಲ್ಯಾ ಪಿಂತುರಾಂನಿ ಮಾಸ್ಳಿ, ಎವ್ಕರಿಸ್ತ್ ಜೆಜುಚ್ಯಾ ಮರ್ಣಾ-ಜಿವಂತ್ಪಣಾಚೊ ಉಡಾಸ್ ಹಾಡಯ್ತಾ. ತ್ಯಾ ಭಾಯ್ರ್ ವಾಂಜೆಲಿಸ್ತ್ ಜುವಾಂವ್ನ್ 21 ಅಧ್ಯಾಯಾಂತ್ ದಾಕಲ್ ಕೆಲ್ಲೆಂ ಘಡಿತ್-ಎಕ್ಷೆಂ ತ್ರೆಪನ್ ಮಾಸ್ಳಿ ಧರ್‍ಲ್ಲೆಂ- ಜಾಯ್ತ್ಯಾ ಸಾಂಕೇತಿಕ್ ಅರ್ಥಾಗುಣಾನ್ ವಿಣ್ಲೆಲೆಂ. ಆಶೆಂ ಆಸ್ತಾಂ, ಥೊಡೆ ದೇವ್ ಶಾಸ್ತ್ರಿ ಜೆಜುನ್ ಉಂಡೊ ಆನಿ ಮಾಸ್ಳಿ ತಾಂಕಾ ಮೊಡುನ್ ದಿಲ್ಲಿಯ್-ಎವ್ಕರಿಸ್ತಾಚ್ಯಾ ಭಾಂದಾವಳಿಕ್ ತಾಳ್ ಪಡ್ತಾ ಮ್ಹಣ್ ಸಾಂಗ್ತಾತ್. ತರೀಪುಣ್ ವಾಯ್ನ್ ಆನಿ ಉಂಡ್ಯಾಸಾಂಗಾತಾ ಮಾಸ್ಳೆಚೊ ವಾಪಾರ್ ಜಾತಲೊ ಮ್ಹಣ್ ಅಧಿಕೃತ್ ಶಿಕೊವ್ಣ್ ಖಂಯ್ಸರೀ ದಿಸಾನಾ.
ನಿಮಾಣೆಂ ಉತರ್:
ಸರೋವರಾಚ್ಯಾ ಭೊಂವಾರಿಂ ಫುಲ್‍ಲ್ಲೊ ಆನಿ ಮಾಸ್ಳಿ ಪಾಗ್ತೆಲ್ಯಾ ಲೊಕಾಮುಕಾಂತ್ರ್ ಪರ್ಗಟ್ ಜಾಲ್ಲೊ ಕ್ರಿಸ್ತೀ ಭಾವಾಡ್ತ್ ಆಮ್ಕಾಂ ಮೆಳ್ಳಾ. ಆಜ್ ಆಮ್ಚಿ ವ್ಯಾಪ್ತ್ ವೆಗ್ಳಿ ಆಸ್ಯೆತ್ ಪುಣ್ ಭಾವಾಡ್ತಾಚಿಂ ಸತಾಂ ಆಮ್ಚ್ಯಾ ವ್ಯಾಪ್ತಿ ಭಿತರ್‍ಯಿ ಘುಸ್ತಾತ್ ಆನಿ ತೊಚ್ ಸೊಮಿ ಆಮಿ ಜಿಯೆಂವ್ಚ್ಯಾ ಪರಿಸರಾಮುಕಾಂತ್ರ್ ಆಮ್ಚೆಸಂಗಿಂ ಸಳಾವಳ್ ಕರ್ತಾ ಆನಿ ಆಮ್ಚೆ ಭಿತರ್ಲಿಂ ದಿರ್ವಿಂ ಉಗ್ತಾಡಾಕ್ ಹಾಡ್ತಾ. ದೆವಾಳಾಂತ್ಲೆ ಭೆಟೆ ಪ್ರಾಸ್ ಆಮ್ಚ್ಯಾ ಜಿಣ್ಯೆ ಘುಂವ್ಡೆರ್ ಭೆಟ್‍ಲ್ಲೊ ಸೊಮಿ ಚಡ್ ಲಾಗ್ಶಿಲೊ ಜಾಲೊ ತರ್ ಜಿಣ್ಯೆ ದಿಶಾ ಖಂಡಿತ್ ಬದಲ್ತೆಲಿ.
***
(Published in 'Naman Ballok Jesu', Konkani Monthly's June issue 2016 - Spiritual Article based on 'Symbolic Role of Fish in Christian faith. )
