ಜಾತಿ ಭಾಯ್ರ್ ಕಾಜಾರ್ ಜಾತೆಲಿಂ ಧರ್ಮ್ ದ್ರೋಹಿ ಜಾಲಿಂ?

ಸಮಡ್ತಿ ಭಾಯ್ಲೆಂ ಕಾಜಾರ್ ಮ್ಹಣ್ತಾನಾ ಸಮಡ್ತ್ ಪಾಳಿನಾತ್ಲ್ಯಾಕೀ ಏಕ್ ಪಾವ್ಟಿಂಚ್ಯಾಕ್ ಆಂಗಾರ್ ಯೆತಾ, ಸಮಡ್ತಿ ವ್ಹಯ್ಲೊ ಅಭಿಮಾನ್ ಉಟೊನ್ ರಾವ್ತಾ ಆನಿ ಸಮಡ್ತಿ ಭಾಯ್ರ್ ಕಾಜಾರ್ ಜಾಲ್ಲ್ಯಾಕ್ ಥೊಡ್ಯಾ ತೆಂಪಾ ಖಾತಿರ್ ಪುಣೀ ಅಪ್ರಾಧಿ ಸ್ಥಾನಾರ್ ದವರ್ತಾ. ಅಸಲ್ಯಾ ಕಾಜಾರಾಂವಿಶಿಂ ಆಮ್ಚೆಂ ಧೋರಣ್ ಕಸಲೆಂ ಜಾಯ್ಜಯ್? ಕಸಲೊ ಎಪ್ರೋಚ್ ಆಮ್ಚೊ ಆಸುಂಕ್ ಜಾಯ್.. ಯೆಯಾ ಇಲ್ಲೆಂ ಉಲೊವ್ಯಾಂ

ಅವಿನಾಕ್ ಸಮ್ಜಲ್ಲೆಂ...

ಮ್ಹಜೆಂ ಸ್ವಪಣ್ ಆನಿ ಪಾತ್ಯೆಣಿ ಕಶಿ?

ವಿಮಾನ್ ಮ್ಹಜ್ಯಾ ವಾಂಟ್ಯಾಕ್ ಅಜೂನ್ ಏಕ್ ಅಜ್ಯಾಪಿ ವಸ್ತ್ ಜಾವ್ನ್ ಉರ್ಲ್ಯಾ. ಕಿತ್ಯಾಕ್, ಹಾಂವ್ ಅಜೂನ್ ಯಿ ತ್ಯಾ ವಿಮಾನಾರ್ ಉಭೊಂಕ್ ನಾ! ಲ್ಹಾನ್ ಆಸ್ತಾನಾ ಮೊಳ್ಭಾರ್ ಆವಾಜ್ ಜಾಲ್ಲೆಂಚ್ ಕಿತ್ಲ್ಯಾ ಉತ್ಸುಕತೆನ್ ತೆವ್ಶಿನ್ ವಯ್ರ್ ಗೊಮ್ಟಿ ಲಾಂಬ್ ಕಾಡುನ್ ತಿಳ್ತಾಲೊಂಗೀ ತ್ಯಾಚ್ ಉತ್ಸುಕತೆನ್ ವಿಮಾನ್ ಉಭ್ತಾ ಮ್ಹಣ್ತಾನಾ ವಯ್ರ್ ಪಳೆತಾಂ.

ವಿಮಾನಾ ವಿಶ್ಯಾಂತ್ಏಕ್ ಮಜೆಚಿ ಗಜಾಲ್ ಆಸಾ, ಸಾಂಗ್ತಾಂ. ೧೮೯೦ ಇಸ್ವಿ. ಅಮೇರಿಕಾಂತ್ ಎಕ್ಲೊ ಸುವಾರ್ತಾ ಪರ್ಗಟ್ ಕರ್ತಾನಾ ತಾಕಾ ಸಭೆಥಾವ್ನ್ ಏಕ್ ಸವಾಲ್ ಆಯ್ಲೆಂ ಖಂಯ್. “ಮನಿಸ್ ಆಕಾಸಾರ್ ಉಭೊಂಕ್ ಸಕ್ತಾಗಿ?”

ಸವಾಲ್ ವಿಚಾರ್ಲೆಲ್ಯಾಕ್ ದೊಳೆ ವಾಟಾರ್ನ್ ಹೊ ಸುವಾರ್‍ತಾ ಪರ್ಗಟ್ಣಾರ್ ಮ್ಹಣಾಲೊ, “ಮನ್ಶಾನ್ ಆಕಾಸಾರ್ ಉಭಾಜೆ ಮ್ಹಣ್ ದೆವಾಚಿ ಖುಶಿ ವ್ಹಯ್ ಜಲ್ಲಿ ತರ್ ದೇವ್ ಪಾಕಾಟೆ ದಿತೊ; ದೀಂವ್ಕ್ ನಾಂತ್ ನೇ… ದೆಕುನ್ ತಾಣೇಮ್ ಉಭೊಂಕ್ ಜಾಯ್ನಾ, ಹಿ ಮ್ಹಜಿ ಪಾತ್ಯೆಣಿ”

ಮೆಜೂನ್ ತೆರಾ ವರ್ಸಾಂನಿ ೧೯೦೩ ಇಸ್ವೆಂತ್ ದೊಗಾಂ ಭಾವಾಂನಿ ಅಮೇರಿಕಾಂತ್ ವಿಮಾನ್ ಉಭಯ್ಲೆಂ! “ಹೆಂ ಕಶೆಂ ಸಾಧ್ಯ್ ಜಾಲೆಂ?” ಮ್ಹಣ್ ವಿಚಾರ್ಲೆಲ್ಯಾಕ್ ತಾಂಚಿ ಜಾಪ್, “ಮನಿಸ್ ಆಕಾಸಾರ್ ಉಭೊಂಕ್ ಸಾಧ್ಯ್ ಆಸಾ ಮ್ಹಳ್ಳಿ ಆಮ್ಚಿ ಪಾತ್ಯೆಣಿ!”

ಆತಾಂ, ಗಮ್ಮತೆಚಿ ಗಜಾಲ್ ಮ್ಹಳ್ಯಾರ್, ತ್ಯಾ ದಿಸಾ ಸವಾಲ್ ಫುಡ್ ಕೆಲ್ಲ್ಯಾ ಸುವಾರ್ತೆ ಪರ್ಗಟ್ಣಾರಾಚೆಂ ನಾಂವ್ ಬಿಷಪ್ ರೈಟ್ ಆನಿ ವಿಮಾನ್ ಉಭಯಿಲ್ಲೆ ಗ್ರಾಯ್ಕ್ ಅರ್ವಿಲ್ ರೈಟ್ ಆನಿ ವಿಲ್ಬರ್ ರೈಟ್. ತೆ ದೊಗೀ ಬಿಷಪ್ ರೈಟಾಚೆ ಭುರ್ಗೆ!

ತಾಂಕಾಂ ಪದ್ವೆ ಶಿಕಾಪ್ ನಾತ್ಲೆಂ, ಸವ್ಲಾತಾಯ್ ನಾತ್ಲಿ, ಗ್ರೇಸ್ತ್ ಕಾಯ್ ನಾತ್ಲಿ. ತಾಂಚೆ ಲಾಗಿಂ ಆಸ್ಲೆಂ ಮ್ಹಳ್ಯ್ಆರ್ ಏಕ್ ಸ್ವಪಣ್ ಆನಿ ತೆಂ ಸ್ವಪಣ್ ಜ್ಯಾರಿ ಕರುಂಕ್ ಜಾಯ್ ಆಸ್ಚಿ ಧೃಡ್ ಪಾತ್ಯೆಣಿ.

ಆಮ್ಚ್ಯಾ ದೇಶಾಂತೀ ಎಕ್ಲೊ ಚೆರ್ಕೊ ಆಕಾಸಾರಾ ಉಭ್ಚಿಂ ವಿಮಾನಾಂ ಪಳೆವ್ನ್ ಚ್ ವಾಡ್ ಲ್ಲೊ. ಹರ್ಯೆಕ್ ಪಾವ್ಟಿಂ ವಿಮಾನ್ ಪಳೆತಾನಾ ತಾಚೆಂ ಸ್ವಪಣ್ – ಆಮ್ಚೊ ದೇಶ್ ಯಿ ಆಕಾಸಾಚೆ ಸಕ್ತೆಂತ್ ಬಳ್ವಂತ್ ಜಾಯ್ಜೆ. ತೊ ಸ್ವಪಣ್ ಪಾತ್ಯೆಲೊ, ಪ್ರಮಾಣಿಕ್ಪಣಿಂ ತೆ ದಿಶೆನ್ ಕಾಮ್ ಕೆಲೆಂ ಆನಿ ಹೊಚ್ ಭುರ್ಗೊ ಏಕ್ ದೀಸ್ ಇಸ್ರೊಚೊ ಮುಕೆಲಿ ಜಾಲೊ. ತೊಚ್ ಆಮ್ಚೊ ದೆವಾದೀನ್ ಎ.ಪಿ.ಜೆ ಅಬ್ದುಲ್ ಕಲಾಮ್. 

ದೆವಾನ್ ಸ ದಿಸಾಂನಿ ಸಂಸಾರ್ ರಚ್ಲೊ ಆನಿ ತೊ ಸಂಪೂರ್ಣಾಯೆಕ್ ಪಾವಂವ್ಚಿ ವ ವೃದ್ಧಿ ಕರ್ಚಿ ಜವಾಬ್ದಾರಿ ಮನ್ಶಾಕ್ ದಿಲಿ. ಸಂಸಾರ್ ವೃದ್ಧಿ ಕರ್ಚೆ ದಿಶೆನ್ ಮನ್ಶಾಚೆಂ ಸ್ವಪಣ್ ದೇವ್ ಯಿ ಭೆಸಾಂವಾಂನಿ ಭರ್ತಾ. ಪುಣ್ ತೆಂ ಸ್ವಪಣ್ ಮನ್ಶಾಕುಳಾಚ್ಯಾ ಬರೆಪಣಾಕ್ ಪಡ್ಚೆ ತಸಲೆಂ ಆಸ್ಲ್ಯಾರ್ ಜಾಲೆಂ!

ಭುರ್ಗ್ಯಾಂಚಿಂ ಸ್ವಪ್ಣಾಂ ಥೊಡೆಪಾವ್ಟಿಂ ಚಿಲ್ಲುನ್ ಉಡಂವ್ಚಿ ಸವಯ್ ಥೊಡ್ಯಾಂಕ್ ಪುಣೀ ಆಸಾ. ತಾಂಚ್ಯಾ ಸ್ವಪ್ಣಾಂಕ್ ದಮನ್ ಕರ್‍ನ್ ಆಮ್ಚಿಂ ಸ್ವಪ್ಣಾಂ ಸಾಕಾರ್ ಕರುಂಕ್ ವ್ಹಡಿಲಾಂನಿ ದಬಾವ್ ಘಾಲ್ಚೊ ಆಸ್ತಾ. ಜರ್ ಎಕ್ಲ್ಯಾಕ್ ಸ್ವಪಣ್ ಆಸಾ ಆನಿ ತೆಂ ಸ್ವಪಣ್ ಸಾಕಾರ್ ಕರ್ಚಿ ಧೃಡ್ ಪಾತ್ಯೆಣಿ ಆನಿ ಪ್ರಮಾಣಿಕ್ ಪ್ರೇತನ್ ಆಸಾ ತರ್ ತಾಂಕಾಂ ಆಮ್ಚೊ ಪಾಟಿಂಬೊ ಜಾರೂರ್ ಫಾವೊ. ತವಳ್ ತಾಂಚ್ಯಾ ಸ್ವಪ್ಣಾಂಚ್ಯಾ ಯಶಸ್ವೆಂತ್ ಆಮಿಯ್ ಉಭ್ಯೆತ್ ನ್ಹಯ್ ಗಿ?

Hello.. 1..2.....3

ಮ್ಹಜ್ಯಾ ಉತ್ರಾಂಕ್ ಮೋಲ್ ಆಸಾ, ಬಳ್ ಆಸಾ, ಇಫೆಕ್ಟ್ ಆಸಾ!

ಏಕ್ ಭುರ್ಗೆಂ ಜಲ್ಮಲ್ಲೆಂಚ್ ರಡನಾ ತರ್ ಆಮಿ ಗಾಭಾರ್ತಾಂವ್. ಕುಲ್ಯಾಕ್ ಚಿಮ್ಟೊ ಕಾಡ್ನ್ ಪುಣೀ ರಡಯ್ತಾಂವ್ ಆನಿ ಭುರ್ಗ್ಯಾಚ್ಯಾ ತೊಂಡಾಂತುನ್ ಕಾಂಯ್ ತರೀ ಆವಾಜ್ ಯೆತಾಗಿ ಮ್ಹಣ್ ರಾಕ್ತಾಂವ್. ಭುರ್ಗೆಂ ರಡನಾ ತರ್ ಆಮ್ಕಾಂ ಆಕಾಂತ್! ಭುರ್ಗೆಂ ಉಲಂವ್ಕ್ ಸಕನಾ ಕೊಣ್ಣಾ ಮ್ಹಳ್ಳೊ ಆಕಾಂತ್ ಹೊ!!

ಏಕ್ ಪಾವ್ಟಿಂ ಭುರ್ಗ್ಯಾಚ್ಯಾ ತೊಂಡಾಂತ್ ಆಮ್ಚೆಂ ಉತರ್ ಘಾಲ್ತಾಸರ್ ಆಮ್ಕಾಂ ಸಮಾಧಾನ್ ನಾ. ಭುರ್ಗೆಂ ಉಲಂವ್ಕ್ ಲಾಗ್ಲ್ಯಾರ್ ಆಮ್ಕಾಂ ಆಮ್ಚೆರ್ ಚ್ ಅಭಿಮಾನ್, ಕಿತೆಂಗಿ ಅಚೀವ್ ಕೆಲ್ಲಿ ತೃಪ್ತಿ.

ತಶೆಂ ಪಳೆಂವ್ಕ್ ಗೆಲ್ಯಾರ್ ಉತ್ರಾಂನಿಚ್ ಆಮ್ಕಾಂ ಸಕ್ಡಾಂಕ್ ವಾಡಯ್ಲಾಂ. ವ್ಹಡಿಲಾಂಚಿಂ ಉತ್ರಾಂ ಆಯ್ಕುನ್ ನ್ಹಯ್ ಗಿ ಆಮಿ ವ್ಹಡ್ ಜಾಲ್ಲ್ಯಾಂವ್? ದೆವಾಚೆಂ ಉತರ್ ಆಯ್ಕುನ್ ನ್ಹಯ್ ಗಿ ಆಮಿ ವ್ಹಡ್ ಜಾಲ್ಲ್ಯಾಂವ್? ತರ್ ಆಮ್ಚ್ಯಾ ವ್ಹಾಡಾವಳಿ ಪಾಟ್ಲ್ಯಾನ್ ದೆವಾಚೆಂ ಉತರ್ ಆಸಾ, ವ್ಹಡಿಲಾಂಚೆಂ ಉತರ್ ಆಸಾ, ಧರ್ಮ್ ಗ್ರಂಥಾಂತ್ಲೆಂ ಉತರ್ ಆಸಾ, ನಿತಿ ಪಾಠಾಂತ್ಲೆಂ ಉತರ್ ಆಸಾ, ಮ್ಹಾನ್ ಮನ್ಶಾಂಚೆಂ ಉತರ್ ಆಸಾ, ಶಿಕ್ಶಕಾಂಚೆಂ ಉತರ್ ಆಸಾ. ಗಜಾಲ್ ಆಶಿ ತರ್, ಆಮ್ಚ್ಯಾಯ್ ಉತ್ರಾಂನಿ ಕೋಣ್ ನಾ ಕೋಣ್ ವಾಡ್ತಾ, ಮ್ಹಣ್ಜೆ ಮ್ಹಜ್ಯಾಯ್ ಉತ್ರಾಂಕ್ ಮೋಲ್ ಆಸಾ, ಇಫೆಕ್ಟ್ ಆಸಾ, ಸಕತ್ ಆಸಾ!

ಬೈಬಲ್ ಮ್ಹಣ್ತಾ, ದೆವಾಚೆಂ ಉತರ್ ಭೆಷ್ಟೆಂ ನಿರ್ಫಳ್ ನ್ಹಯ್. ಜಶೆಂ ಪಾವ್ಸ್ ವೊತುನ್ ಭುಂಯ್ ಭಿಜವ್ನ್ ಫಳ್ ಕಾಡ್ ಲ್ಲೆ ಖರಿತ್ ಪಾಟಿಂ ವ್ಹಚನಾ ತಶೆಂಚ್ ದೆವಾಚೆಂ ಉತರ್. ದೆವಾನ್ ಮ್ಹಳೆಂ,”ಉಜ್ವಾಡ್ ಜಾಂವ್” ಆನಿ ಥಂಯ್ ಉಜ್ವಾಡ್ ಜಾಲೊ! ಜೆಜು ಅಂಜುರಾಚ್ಯಾ ರುಕಾಕ್ ಉದ್ದೇಸುನ್ ತೀಕ್ ಉತ್ರಾಂ ಉಲಯ್ಲೊ, ರೂಕ್ ಚ್ ಬಾವೊನ್ ಗೆಲೊ. ಆನಿ ತೊಚ್ ಜೆಜು ಆಮ್ಕಾಂ ಸಾಂಗ್ತಾ, ‘ತುಕಾ ಸಾಸ್ವಾತಿತ್ಲೊ ಭಾವಾಡ್ತ್ ಆಸಾ ತರ್ ತ್ಯಾ ರುಕಾಕ್ ಹಾಂಗಾಚೊ ಹುಮ್ಟುನ್ ದರ್ಯಾಂತ್ ಪಡ್, ತಶೆಂಚ್ ಜಾತೆಲೆಂ’ ಕಿತ್ಯಾಕ್ ತುಜ್ಯಾ ಉತ್ರಾಂಕ್ ಮೋಲ್ ಆಸಾ, ಸಕತ್ ಆಸಾ, ಇಫೆಕ್ಟ್ ಆಸಾ!

ಆಜ್ ಕಾಲ್ ಜಾಯ್ತೆ ಜಣ್ ಆಪ್ಲ್ಯಾ ಉಲವ್ಪಾಖಾತಿರ್ ಫೇಮಸ್. ತಾಂಚ್ಯಾ ಉಲವ್ಣ್ಯಾಚೊ ಪ್ರಭಾವ್, ಬರೊ ವ ವಾಯ್ಟ್, ಆಯ್ಕಾತೆಲ್ಯಾಂಚೆರ್ ಪಡ್ತಾಚ್. ಮ್ಹಜೆಂ ಉತರ್ ಮ್ಹಾಕಾ ಏಕ್ ಇಮೇಜ್ ದಿತಾ. ಮ್ಹಜ್ಯಾ ಉತ್ರಾಂಕ್ ಲಾಗುನ್ ಮ್ಹಜಿ ಅಭಿರೂಚ್ ಕಿತೆಂ, ಕಸಲ್ಯಾ ಸಂಗ್ತಿಂಕ್ ಹಾಂವ್ ಮೆಚ್ವತಾಂ, ಕಿತೆಂ ಮ್ಹಾಕಾ ಆಂವಡ್ತಾ ಮ್ಹಣ್ ಮ್ಹಾಕಾ ಆಯ್ಕತಲೊ ಕಿಣಾನ್ ಸಮ್ಜತಾ ಆನಿ ಮ್ಹಜ್ಯಾ ಉತ್ರಾಂಕ್ ಲಾಗುನ್ ಆಯ್ಕಾತೆಲ್ಯಾಚ್ಯಾ ಮತಿಂತ್ ಮ್ಹಜೆಂ ರುಪ್ಣೆಂ ಶಾಶ್ವಿತ್ ಉರ್‍ತಾ. ದೆಕುನ್ ಉತ್ರಾಂಚೆರ್ ನಿಗಾ ಜಾಯ್. ಮ್ಹಜೆಂ ಉತರ್ ಭಾಂದುಂಕೀ ಸಕ್ತಾ, ಮೊಡುಂಕೀ ಸಕ್ತಾ. ಮ್ಹಜ್ಯಾ ಉತ್ರಾಂಕ್ ಮೋಲ್ ಆಸಾ, ಇಫೆಕ್ಟ್ ಆಸಾ, ಸಕತ್ ಆಸಾ!

ಮ್ಹಜೆ ಪ್ರಕಾರ್ ಏಕ್ ಮನಿಸ್ ಪರಿಪಿಕಾಯೆಕ್ ಪಾವ್ಲ್ಯಾ ಉಪ್ರಾಂತ್ ತಾಚಿಂ ಉತ್ರಾಂ ಚ್ ತಾಕಾ ವಾಗಯ್ತಾತ್. ತಾಚ್ಯಾ ಎಕಾಂತಾಂತ್ ತೊ ವಾಗ್ತಾ. ತುಂ ತುಜ್ಯಾ ಕುಡಾಂತ್ ಆಸ್ತಾನಾ, ನ್ಹಾಂವ್ಕ್ ದೆಂವ್ತಾನಾ, ಎಕ್ಲೊಚ್ ಜೆವ್ತಾನಾ, ಪಾರ್ಕಾಂತ್ ಬಸ್ತಾನಾ ತುಂ ತುಜೆಚ್ ಲಾಗಿಂ ಉಲಂವ್ಕ್ ಲಾಗ್ತಾಯ್, ಸಂದರ್ಶನ್ ಕರ್ತಾಯ್, ತುಕಾಚ್ ಭೆಟ್ತಾಯ್. ತ್ಯಾ ತುಜ್ಯಾ ಎಕಾಂತ್ಪಣಾಂತ್ ಕಸಲೆಂ ಉಲೊಣೆಂ ತುಜೆಸ್ತಕಿಂ ಜಾತಾ, ತುಜೆಲಾಗಿಂಚ್ ಕಸೊ ಚಲ್ತಾಯ್, ತೆಂಚ್ ತುಕಾ ಪಬ್ಲಿಕಾರ್ ದಾಕಯ್ತಾ.

ದಾಕ್ಲೊ ಘೆವ್ಯಾಂ – ಆಮಿ ಚಡಾವತ್ ಜಾವ್ನ್ ಗಾಳಿ ಆಯ್ಕುಂಚ್ಯೊ ರಸ್ತ್ಯಾರ್. ಟ್ರಾಫಿಕ್ ಸಿಗ್ನಲ್ ಮೋಡ್ನ್ ಕೋಣ್ ಆಡ್ ಆಯ್ಲೊ ತರ್, ಓವರ್ ಟೇಕ್ ಕೆಲೆಂ ತರ್, ಜ್ಯೋರ್ ಹಾರ್ನ್ ಮಾರ್ತಾ ತರ್,.. ಆಮ್ಚ್ಯೊ ಗಾಳಿ ಸುರು. ರಸ್ತ್ಯಾರ್ ಮೆಳ್ತಾ ತಾಚಿ ಆಮ್ಕಾಂ ಕಾಮ್ಯ್ ವ್ಹಳಕ್ ನಾ. ತರೀ ಉತ್ರಾಂನಿ ನಿಂದಾ ಕರ್ಚಿ ಆಮ್ಚಿ ಸದಾಂಚಿ ಗಿರಾಂತ್. ಆಮ್ಚ್ಯಾ ಗಾಳಿ ವರ್ವಿಂ ತೊ ಕಾಂಯ್ ಬದ್ಲಾನಾ, ಆನಿ ಮ್ಹಜಿಂ ಉತ್ರಾಂ ಆಯ್ಕುನ್ ತೊ ಕಾಂಯ್ ರಾವೊಂಕೀ ರಾವನಾ. ಹೆರಾ ವೆಳಾ ಆಮ್ಚೆ ಕಡೆ ಪೊಜ್ಡೆಂ ಉತರ್ ನಾ, ಆಮಿ ಸಮಾ ಆಸಾಂವ್, ಪುಣ್ ತ್ಯಾ ರಸ್ತ್ಯಾರ್ ಮಾತ್ರ್ ಪೊಜ್ಡೆಂ ಭಾಯ್ರ್ ಯೆತಾ, ಕಿತೆಂ ಕಾರಣ್? ಹಿ ಆಮ್ಚ್ಯಾ ಎಕಾಂತ್ಪಣಾಂತ್ ವಾಪಾರ್‍ ಲ್ಲಿ ಭಾಸ್, ಮ್ಹೆಳಿ ಭಾಸ್. ಆಮ್ಚ್ಯೆ ಹೆಳ್ಕೆವಿಣೆಂಚ್ ಆಮ್ಚ್ಯೆ ಭಿತರ್ ತಿ ದೆಂವುನ್ ಗೆಲ್ಯಾ. 

ಉಡಾಸ್ ಆಸೊಂ, ಆಮಿಂ ಆಮ್ಚ್ಯಾ ಎಕಾಂತ್ಪಣಾಚಿಂ ಬಾಳಾಂ!

ಮ್ಹಜ್ಯಾ ಉತ್ರಾಂಕ್ ಮೋಲ್ ಆಸಾ, ಬಳ್ ಆಸಾ, ಇಫೆಕ್ಟ್ ಆಸಾ, ಚತ್ರಾಯ್!