ಕಾಳ್ಜಾ ಗಾಜಾಕ್ ಪಯ್ಲೊ 'ಹ್ಯಾಪಿ ಬರ್ತ್ ಡೇ!'
ಮ್ಹಾಕಾ ಉಡಾಸ್ ನಾತ್ಲೊ. ಕಾಳ್ಜಾಗಾಜ್ ಮ್ಹಜೊ ಬ್ಲಾಗ್ ಜಲ್ಮಾಕ್ ಯೇವ್ನ್ ಹ್ಯಾ ಮ್ಹಯ್ ನ್ಯಾಂತ್ ಏಕ್ ವರಸ್ ಸಂಪ್ತಾ!! ಮಾರ್ಚ್ ೫ ತಾರಿಕೆರ್ ಜಲ್ಮಾ ದೀಸ್ ತರೀ ಮ್ಹಯ್ ನೊ ಆಕೇರ್ ಜಾಂವ್ಚೆ ಫುಡೆಂ ಉಡಾಸ್ ಜಾಲೊ!
ಕೊಂಕಣಿ ಪತ್ರಾಂನಿ ವೆಬ್ ಸಾಯ್ಟಿಂನಿ ಬರಯ್ತೆಲ್ಯಾಕ್ ಏಕ್ ಬ್ಲಾಗಾಚಿ ಕಿತೆಂ ಗರ್ಜ್ ಮ್ಹಣ್ ಮ್ಹಾಕಾ ವಿಚಾರ್ ಲ್ಲೆಂ ಆಸಾ. ಕಾರಣ್ ಸಂಪೆಂ, ಪತ್ರಾಂಕ್ ಬರಯ್ತಾಂ ಜಾಲ್ಯಾರೀ ಮ್ಹಜೆಲಾಗಿಂ ಕಾಂಯ್ ತರೀ ಗಿಚ್ಚುಂಕ್ ಮ್ಹಣ್ ನೋಟ್ ಬುಕ್ ತರೀ ಆಸುಂಕ್ ಜಾಯ್ ನ್ಹಯ್.
ಎದೊಳ್ ಚ್ ಆದ್ಲ್ಯಾ ವರ್ಸಾ ಪಾಂತ್ತೀಸ್ ಬರ್ಪಾಂ ಹ್ಯಾ ಕಾಳ್ಜಾಗಾಜಾಂತ್ ದಾಖಲ್ ಕೆಲ್ಯಾಂತ್ ಆನಿ ಹ್ಯಾ ವರ್ಸಾ ಯೆದೊಳ್ಚ್ಯಾ ಮಟ್ಟಾಕ್ ಪಾಂಚ್. ಹಾಂತುಂ ವೆರಯ್ಟಿ ಆಸಾ. ಕವಿತಾ, ನಾನೋ ಕಾಣೀಯೊ, ಕಾಣಿ, ಲೇಕನಾಂ, ಕಾರ್ಟೂನಾಂ, ಪರ್ನೆ ಉಡಾಸ್, ಹಾಯ್ಕು, ಐತಿಹಾಸಿಕ್ ಜಾಗ್ಯಾಂಚೆರ್ ನದರ್, ಥೊಡೆ ಮ್ಹಜೆ ವೀಡಿಯೊ ಆನಿ ಹೆರ್.
ಎಕೊಡಿ ನದರ್ ಮಾರ್ಲ್ಯಾರ್ ಮ್ಹಾಕಾ ಹಿಂ ಬರ್ಪಾಂ ದಾಖಲ್ ಕರ್ತಾನಾ ಜಿಣ್ಯೆಂತ್ ಉದೆಲ್ಲ್ಯಾ ಘಡಿತಾಂಚಿ ಯಾದಿ ಎಕಾ ಪಾಟ್ಲ್ಯಾನ್ ಏಕ್ ಯೇವ್ನ್ ಕಾಳ್ಜಾಕ್ ಅಪ್ಟುನ್ ಆಪ್ತ್ ಜಾತಾತ್. ಹರ್ಯೆಕ್ ಬರ್ಪಾ ಪಾಟ್ಲ್ಯಾನ್ ಹಾಂವ್ ಖಂಚ್ಯಾ ಸ್ಥಿತಿಗತಿಂತ್ ಉರ್ಡುನ್ ಆಸ್ ಲ್ಲೊಂ, ಕಶಿಂ ಜಯ್ತಾಚಿಂ ಮೆಟಾಂ ಕಾಡ್ತಾಲೊಂ, ಕಸಲ್ಯಾ ದಿಶೆನ್ ಹಾಂವ್ ವೆತಲೊ ಹೆಂ ಸಗ್ಳೆಂ ಮತಿಕ್ ಕಿಣಾನ್ ಜಳ್ಕಾತಾ ಆನಿ ಅಶೆಂ ಪುರಾ ಘಡುನ್ ಗೆಲೆಂ ನ್ಹಯ್ ಗಿ ಮ್ಹಣ್ ಕಾಳಿಜ್ ಫುಮಾರ್ ಜಾತಾ.
ಕಾಂತಯಿಲ್ಲೆಂ ಎಕೇಕ್ ಉತರ್ ಮ್ಹಜ್ಯಾ ಜಿಣ್ಯೆ ಡಯ್ರಿ ಪರಿಂ ಗಯ್ರಿ ಗಯ್ರಿ ಪುಣೀ ಛಾಪ್ ಸೊಡುನ್ ವೆತಾ.
ಬ್ಲಾಗಾಂತ್ ಬರವ್ನ್ ಜೊಡ್ ಲ್ಲಿ ಧಾದೊಸ್ಕಾಯ್ ನಿಜಾಯ್ಕಿ ಹೆರ್ ಖಂಚ್ಯಾಯ್ ಪತ್ರಾರ್ ಬರವ್ನ್ ಮೆಳುಂಕ್ ನಾ. ತುಮಿ ಜಾಯ್ತ್ಯಾಂನಿ ಮ್ಹಜೊ ಕಾಳ್ಜಾ ಗಾಜ್ ಆಯ್ಕಾಲ್ಯಾ. ಮ್ಹಾಕಾ ಕಳಾನಾತ್ಲೆಂ ತರೀ ಮ್ಹಜ್ಯಾ ಕಾಳ್ಜಾಗಾಜಿಕ್ ಕಾನ್ ತುಮಿ ದಿಲಾ.