ಗೊಂವಾಕಣಾಚೆಂ
‘ಅಲ್ಲೆಲೂಯಾ’ ಗೀತ್
ವ್ಹಯ್,
ಅಂಬ್ಯಾ ಪಾರ್ ವ ಕಸ್ಲೆಂಯ್ ತೆಂ ಭಿಂ ಫಳಾಂನಿ ಲಿಪ್ಲಾಂ ತೆಂ ಮಾತ್ಯೆಚೆಂ ಆನಿ ಮಾತ್ಯೆಕ್ ಪಾಟಿಂ ಸಮರ್ಪಿತ್!
ಮಾತಿಯೆಕ್ ಪಾವ್ ಲ್ಲೆಂ ಭಿಂ ಆಪ್ಣಾಚೊ ರಂಗ್, ಆಕಾರ್, ಸರ್ವಸ್ವ್ ಹೊಗ್ಡಾಯ್ತಾ ಆನಿ ಧರ್ತೆ ಗರ್ಭ್
ಚಿರುನ್ ಎಕಾ ದಿಸಾ ಭಾಯ್ರ್ ಯೆತಾ ಆನಿ ಸುರ್ಯಾಕ್ ಮುಖ್ ಕರ್ನ್ ‘ಅಲ್ಲೆಲೂಯಾ’ ಗೀತ್ ಗಾಯಾ!
ಕಸ್ಲೊ
ಸಂಭ್ರಮ್, ಕಸ್ಲೊ ಮಿಸ್ತೆರ್, ಕಸ್ಲೆಂ ವಿಚಿತ್ರ್ ನಿಯಮ್ ಪೃಥ್ವೆಚೆಂ!!
ಹೆಂ
ನಿಯಮ್ ಸಾಧೆಂ ಮ್ಹಣ್ ಆಮ್ಕಾಂ ದಿಸ್ತಾ ತರ್ ಜೆಜುಚೆಂ ಜಿವಂತ್ಪಣ್ ಸಂಸಾರಾನ್ ನವಾಲ್ ಮ್ಹಣ್ ದೆಕ್ಚೆಂ
ನ್ಹಯ್. ಮನ್ಶಾಕುಳಾನ್ ಸಹಜ್ ಜಾವ್ನ್ ಸಮ್ಜುನ್ ಘೆಜೆ ಜಾಲ್ಲೆಂ ಸತ್ ಹೆಂ! “ಏಕ್ ಗೊಂವಾಕಣ್ ಮಾತಿಯೆಂತ್
ಪಡುನ್ ಮೆಲ್ಲ್ಯಾಖರಿತ್…” ಮ್ಹಣ್ ಸಾಂಗ್ ಲ್ಲೊ ಜೆಜುಕ್ರಿಸ್ತ್ ಚ್ ಆಮ್ಕಾಂ ಪ್ರತ್ಯಕ್ಷ್ ಸಾಕ್ಸ್!
ಪಾಸ್ಖಾಂಚಿ
ರಾತ್ ಹೆರ್ ರಾತಿಂಪ್ರಾಸ್ ವಿಶಿಸ್ಟ್!
ತಿ
ರಾತ್ ಪಾತ್ಕಾಚ್ಯಾ ಭಾಂದ್ಪಾಸಾ ಥಾವ್ನ್ ಮನ್ಶಾಕುಳಾಕ್ ಸುಟ್ಕಾ ಲಾಭಯಿಲ್ಲಿ ರಾತ್. ದೆದೆಸ್ಪೊರ್ ಕಾಳ್ಜಾಂಕ್
ಭರ್ವಸ್ಯಾಚೆಂ ಕೀಟ್ ಪೆಟಯಿಲ್ಲಿ ರಾತ್. ಪಾಸ್ಖ್ ನಾತ್ ಲ್ಲೆಂ ತರ್ ಆಮ್ಕಾಂ ಕ್ರಿಸ್ತಾಂವಾಂಚೊ ಭಾವಾಡ್ತ್
ಕಿತೆಂ ಜಾವ್ನಾಸ್ತೊ? ಸಾಂ. ಪಾವ್ಲ್ ಮ್ಹಣ್ತಾ, “ಜರ್ ಕ್ರಿಸ್ತ್ ಮೆಲ್ಲ್ಯಾಂತ್ಲೊ ಜಿವಂತ್ ಉಟುಂಕ್
ನಾತ್ಲೊ ತರ್ ಆಮ್ಕಾಂ ಪ್ರಗಟುಂಕ್ ಕಾಂಯ್ಚ್ ಆಸ್ತೆಂ ನಾ, ಪಾತ್ಯೆಂವ್ಕ್ ಕಾಂಯ್ಚ್ ಆಸ್ತೆಂ ನಾ. ಜಿವಂತ್ಪನಾವಿಣೆಂ
ಆಮ್ಚೊ ಭಾವಾಡ್ತ್ ಬುನ್ಯಾದ್ ನಾತ್ ಲ್ಲೊ ಜಾತೊ”. ಜೆಜುಚೆಂ ಜಿವಂತ್ಪಣ್ ಕ್ರಿಸ್ತಾಂವಾಂಕ್ ಆಪ್ಲೆ
ಜಿಣ್ಯೆಕ್ ನವಿ ದಿಶಾ ದಿತಾ.
ತಾಚ್ಯಾ ಜಿವಂತ್ಪಣಾಂತ್ ಜೀವ್ ಜಾಲ್ಲಿಂ ಸತಾಂ
೧.
ಜೆಜು ತಾಚ್ಯಾ ಜಿವಂತ್ಪಣಾದ್ವಾರಿಂ ಫಕತ್ ಇತಿಹಾಸಾಂತ್ಲೊ ಕೋನ್ ಗಿ ಏಕ್ ವೆಕ್ತಿ ಜಾವ್ನ್ ಉರನಾ ಬಗಾರ್
ಆಮ್ಚ್ಯಾ ಭಾವಾಡ್ತಾಚೊ ವೆಕ್ತಿಯಿ ತೊ ಜಾತಾ. ಜೆಜುಕ್ ಭೆಟುಂಕ್, ತಾಚೆವಿಶಿಂ ತಾಚ್ಯಾ ಜಿಣ್ಯೆಚ್ಯಾ
ವೆಳಾಕಾಳಾವಿಶಿಂ ಅಧ್ಯಾಯನ್ ಪಾವನಾ ಬಗಾರ್ ಜೆಜು ದೆವಾಚೊ ಪುತ್ ಮ್ಹಣ್ ಆಮಿ ವ್ಹಳ್ಕುನ್ ಪಾತ್ಯೆಂವ್ಕ್
ಜಾಯ್. ಎಕ್ಲ್ಯಾನ್ ಜೆಜುವಿಶ್ಯಾಂತ್ ಪಿಎಚ್ ಡಿ ವಾ ಮಾಸ್ಟರ್ಸ್ ಕರ್ಯೆತ್ ಪುಣ್ ವೆಯಕ್ತಿಕ್ ಅನ್ಭವಾವಿಣೆಂ
ಜೆಜುವಿಶ್ಯಾಂತ್ ತೊ ಉಲಯ್ತ್ ತರ್ ತೆಂ ಪಾತ್ಯೆಲ್ಲೆಂ ಸತ್ ಜಾಯ್ನಾ. ಜೆಜು ವಿಶ್ಯಾಂತ್ ಸಂಶೋಧನ್ ಕೆಲ್ಲೊ,
ಮನಿಸ್ ಡಾಕ್ಟರೇಟ್ ಜೊಡ್ ಲ್ಲೊ ಮನಿಸ್ ಎಕಾ ಸಾಧ್ಯಾ ಭಾವಾಡ್ತ್ಯಾಚ್ಯಾ ದೈವಿಕ್ ಆನ್ಭವಾ ಮುಕಾರ್ ಪೊಕೊಳ್!
೨.
ಜೆಜು ವೆಳಾಕಾಳಾಕ್ ಬಂಧಿ ಆಸ್ಚೆ ತಸಲೊ ನ್ಹಯ್. ತೊ ಸದಾಂಚ್ ಆಸ್ಚೊ. ಮನಿಸ್ ಜಾಲ್ಯಾರ್ ಫಲಾಣ್ಯಾ ಜಾಗ್ಯಾರ್,
ಇತ್ಲಿಂಚ್ ವರ್ಸಾಂ ಜಿಯೆಲೊ ಮ್ಹಣ್ ಸಾಂಗ್ಯೆತ್ ಪುಣ್ ಜೆಜುಕ್ ಹೆಂ ಲಾಗು ಜಾಯ್ನಾ. ತೊ ವೆಳಾ ಕಾಳಾಚೊ
ಧನಿ, ಅಬ್ರಾಹಾಮಾ ಆದಿಂಚ್ ಆಸ್ಲೊ ತೊ, ಅಜೂನ್ ಆಸಾ ತೊ! ತಾಚೆರ್ ಪಾತ್ಯೆಲ್ಲೊ ಕ್ರಿಸ್ತಾಂವ್ ಭಿಯಾಂನ್
ದಾರಾಂ ದಾಂಪುನ್ ಬಸ್ಲ್ಯಾರೀ ಥಂಯ್ ಭೆಟ್ ದಿಂವ್ಚೊ ತೊಚ್ ಕ್ರಿಸ್ತ್ ಅಜೂನ್ ಆಮ್ಚೆ ಸಾಂಗಾತಾ – ‘ಇಮಾನುಯೆಲ್’
೩.
ಜೆಜು ಜಾತಿಕಾತಿ, ಸಂಸ್ಕೃತಿ, ಭಾಸಾಂಕ್ ಮಿಕ್ವೊನ್ ವಾಡ್ ಲ್ಲೊ ಜಾವ್ನಾಸಾ. ತೊ ಸಕ್ಡಾಂಲಾಗಿಂ ಭರ್ಸಾಲೊ,
ಉಲಯ್ಲೊ, ಗೂಣ್ ಕೆಲೆಂ, ಸಕ್ಡಾಂಚೊ ಜಾಲೊ. ಜೆಜು ವ ತಾಚಿ ಸುವಾರ್ತಾ ಹರ್ಯೆಕಾ ಸಂಸ್ಕೃತೆಂತ್ ಸಾಕರ್
ಉದ್ಕಾಂತ್ ಭರ್ಸುನ್ ವೆಚೆಪರಿಂ ಭರ್ಸುನ್ ವೆತಾ ಆನಿ ಸುವಾರ್ತಾ ತ್ಯಾ ತ್ಯಾ ಸಂಸೃತೆಂತ್ ಜಿವಿ ಆನಿ
ನವಿ ಚ್ ಉರ್ತಾ!
೪.
ಜೆಜು ಆಮ್ಚ್ಯಾ ಮತಿಂತ್ಲೊ ವ ವಿಚಾರಾಂನಿ ಘುಂತ್ಲೊಲೊ ಜಾವ್ನ್ ಉರನಾ. ತೊ ‘ಆಮ್ ಆದ್ಮಿ’ ಜಾವ್ನ್ ದರ್ಯಾ
ವೆಳೆರ್, ಎಮ್ಮಾವ್ಸಾಚೆ ವಾಟೆರ್, ಫುಲಾಂ ಭಾಗಿಂನಿ, ಆಸ್ಪತ್ರೆ ಕೊನ್ಶಾಂನಿ, ಬಂಧಿಖಾನ್ಯಾಂನಿ, ಮಾಸಾ
ದಂದ್ಯಾ ಗಲ್ಲೆಂನಿ, ಪಯ್ಣಾಚೊ ಆನ್ ವ್ಹಳ್ಕಿ ಸಾಂಗಾತಿ ಜಾವ್ನ್ ತೊ ಭೆಟ್ತಾ.
೫.
ಪಯ್ಲೆಂ ಮನಿಸ್ ಆನಿ ಮನ್ಶಾಪಣ್ ಮ್ಹಣ್ ಶಿಕಯಿಲ್ಲೊ ಆನಿ ಅಭ್ಯಾಸ್ ಕರ್ನ್ ದೇಖ್ ದಿಲ್ಲೊ ಜೆಜು ಮನ್ಶಾಪಣಾಚೊ
ಧರ್ಮ್ ಉಕಲ್ನ್ ಧರ್ತಾ. ಮನ್ಶಾ ಮಧೆಂ ತೊ ಮನಿಸ್ ಜಾತಾನಾ ಆಮಿ ಕೊಣೆಂಯ್ ಸರ್ಗ್ ನಿವಾಸ್ಯಾಂಪರಿಂ ಭಾಗೆವಂತ್ಪಣಾಚೊ
ಶೆಲೊ ಪಾಂಗುರ್ನ್ ಭುಮಿ ಅಂತ್ರಾಳಾ ಮಧೆಂ ಉಬ್ಚಿ ಅಧ್ಯಾತ್ಮಿಕತಾ ತೊ ಪ್ರತಿಪಾದನ್ ಕರಿನಾ. ತಾಚೊ ಸಂದೇಶ್
ಸ್ಪಷ್ಟ್ – ಮನ್ಶಾಂ ಪಯ್ಕಿ ಉತ್ತೀಮ್ ಮನಿಸ್ ಜಾಂವ್ಚೊ ಚ್ ಪ್ರಥಮ್ ಆನಿ ಉತ್ತೀಮ್ ಧರ್ಮ್.
ಅಸಲ್ಯಾ
ಸತಾಂಚೆ ಶಿಸ್ ಆಮಿ ಜಾಯ್ಜೆ ತರ್ ಗೊಂವಾಕಣ್ ಮಾತುಯೆಂತ್ ಲಿಪೊಂಕ್ ಚ್ ಜಾಯ್. ಅಂಬ್ಯಾ ಪಾರ್ ಚಿಂವುನ್
ಉಡಯಿಲ್ಲೆಪರಿಂ ಸಂಸಾರ್ ಕಾಂಠಾಳ್ತಾನಾ ಧರ್ತೆ ಗರ್ಭಾಂತ್ಲೊ ಸಂಭ್ರಮ್ ಪಾರ್ಕುಂಕ್ ಸಕ್ಚೊಚ್ ನೀಜ್
ಸಾಂತ್. ತಸಲ್ಯಾಂಚ್ಯಾ ವೊಂಟಾಂನಿ ಮಾತ್ರ್ ‘ಅಲ್ಲೆಲೂಯಾ’ ಗೀತ್ ವಾಳ್ತೆಲೆಂ. ಜರ್ ಆಮಿ ಕ್ರೀಸ್ತ್
ಮೆಲ್ಲ್ಯಾಂತ್ಲೊ ಜಿವಂತ್ ಜಾಲಾ ಆನಿ ತೊ ಕೆದಿಂಕ್ ಚ್ ಮೊರಾಸೊನಾ, ತೊ ಸದಾಂಚ್ ಆಮ್ಚ್ಯಾ ದಿಸ್ಪೊಡ್ತ್ಯಾ
ಎಮ್ಮಾವ್ಸಾಚೆ ವಾಟೆರ್ ಜಿಯೆತಾ ಆನಿ ಸಾಂಗಾತಾ ಯೆತಾ ಮ್ಹಣ್ ಪಾತ್ಯೆತಾಂವ್ ತರ್ ತಾಚ್ಯಾ ಇತಿಹಾಸಾವಿಶಿಂ
ಚಿಂತುನ್ ವೇಳ್ ವಿಭಾಡ್ಚ್ಯಾ ಬದ್ಲಾಕ್ ‘ಆಜ್ ಆಸ್ಚ್ಯಾ ತಾಚೊ ಅನ್ಭವ್ ಜೊಡುಂಕ್ ಶಿಕಾಜೆ. ಸಂಸಾರಾಚೆ
ಆಕೇರ್ ಪರ್ಯಾಂತ್ ಹಾಂವ್ ತುಮ್ಚೆ ಸಾಂಗಾತಾ ಆಸ್ತಲೊಂ’ ಮ್ಹಳ್ಳೊ ತೊಚ್ ಕ್ರೀಸ್ತ್ ಆಮ್ಚೆ ಮಧೆಂ, ಜಿವಂತ್
ಆಸ್ ಲ್ಲ್ಯಾಮಧೆಂ ಆಸಾ; ಮೆಲ್ಲ್ಯಾಂ ಮಧೆಂ ನ್ಹಯ್! ದೆಕುನ್ ಪ್ರಸ್ತುತ್ ಕಾಳಾಕ್ ಮನ್ಶಾ ಪಯ್ಕಿ ಉತ್ತೀಮ್
ಮನಿಸ್ ಜಾಂವ್ಚಿ ಸುವಾರ್ತಾ ಆಮಿ ಪರ್ಗಟುಂಕ್ ಆಸಾ. ಖುರಿಸ್ ಆಮ್ಚೆಂ ಸತ್, ವಾಟ್ ಆನಿ ಜಿವಿತ್ ಆನಿ
ಅಲ್ಲೆಲೂಯಾ ಜಾಂವ್ ಆಮ್ಚ್ಯಾ ಪಯ್ಣಾಚೆಂ ಗೀತ್.