ಕಾರ್ಟುನಾಂ

                 ವಾಟ್ಸಾಪ್ ಸಂಪಾದಕಾಂಲಾಗಿಂ                 

ನಮಸ್ಕಾರ್ ಸಂಪಾದಕಾಂನೊ... 
(ಏಕ್ ಸ್ಮೈಲಿ ಆನಿ ಜೊಡ್‍ಲ್ಲೆ ಹಾತ್ ಚಿಡ್ಕಾಯ್ಲ್ಯಾತ್)

ಜಾಣಾಂ, ತುಮ್ಚ್ಯಾ ಮೊಬಾಯ್ಲಾಥಾವ್ನ್ ‘ಟಿಣ್’ ಮ್ಹಳ್ಳೊ ಆವಾಜ್ ಅತ್ತಾಂ ಆಯ್ಲೊ ಆನಿ ತುಮ್ಚೆಂ ವಾಟ್ಸಾಪ್ ಉಗ್ತೆಂ ಜಾಲೆಂ! ಹ್ಯಾ ‘ಟಿಣ್’ ಸಬ್ದಾಕ್ ಸಂಸಾರಾಂತ್ಲೆ ಖಂಯ್ಚೆಯ್ ಆವಾಜ್ ಮಾರುನ್ ಉಡಂವ್ಕ್ ಸಕನಾಂತ್ ನ್ಹಯ್‍ಗಿ!?

ವಿಶಯಾಕ್ ಯೆವ್ಯಾಂ, ಗಜಾಲ್ ಸಂಪಿ, ತುಮ್ಚೆಬರಿ ಹಾಂವ್‍ಯೀ ಸಂಪಾದಕ್, ಮ್ಹಜ್ಯಾ ವಾಟ್ಸಾಪಾಕ್. ತುಮ್ಚೆಥಾವ್ನ್ ಬರೆ, ಬುರ್ಶೆ, ತಿಕ್ಶೆ, ಮಕ್ಕರಾಚೆ, ನಿಕ್ಕರಾಚೆ ಪೋಸ್ಟ್ ಆಯ್ಲ್ಯಾತ್, ನೋ ಡೌಟ್! ಕಾಣಿ, ಕವಿತಾ, ವಿಡಂಬನ್, ಮಾಗ್ಣ್ಯಾಕ್ ಉಲೊ, ಅರ್ಗಾಂ ಬ್ಲೋಕ್, ಇಸ್ತಿಹಾರಾಂ, ಖೊಡಿ, ನಂಜ್ಯೊ ಸಗ್ಳೆಂ ಮ್ಹಾಕಾ ದಿಸಾಚ್ಯಾ ಚೊವಿಸ್ ವೊರಾಂಯ್ ತುಮಿ ಧಾಡ್ತಾತ್! ವ್ಹಾ.. ತುಮಿ ನೀದ್ ಖಳ್ನ್ ವಾವುರ್ತಾತ್. ಕಿತ್ಲೆಂ ಮ್ಹಳ್ಯಾರ್‍ಯೀ ಸಂಪಾದಕಾಚೆಂ ಕಾಮ್‍ನೆ! 

ಸಂಪಾದಕಾಂನೊ, ಏಕ್ ಸವಾಲ್ ತುಮ್ಚೆಮುಕಾರ್ ದವರ್ತಾಂ, ಜಾಪ್ ಸೊಧ್ಚೆಂ ಪ್ರಯತ್ನ್ ಕರಾ. ಜಾಪ್ ಜರೂರ್ ಮೆಳಜೆ!

ತುಮಿ ಹಿಂಸಾ ಪಸಂದ್ ಕರ್ತಾತ್‍ಗಿ? 

“ಯೂ ಮೀನ್ ಡು ವಿ ಲೈಕ್ ವಾಯ್ಲೆನ್ಸ್?” 

ವ್ಹಯ್, ಹಿಂಸಾ! ಡು ಯು?

ಆಮಿ ಕಿತೆಂ, ಸೀಜರ್, ಇದಿ ಅಮಿನ್, ಅಲೆಗ್ಸಾಂಡರ್, ಹಿಟ್ಲರ್.. ಮ್ಹಣ್ ಚಿಂತ್ತಾಯ್‍ಗಿ ತುಂ? ಮ್ಹಣ್ ಆಸ್ಡ್ಯೊ ವಯ್ರ್ ಕರ್ನ್ ಪಳೆನಾಕಾತ್. ಸೀರಿಯಸ್ಲಿ ಚಿಂತಾ. 

ಕ್ರೈಂ ಪೆಟ್ರೋಲ್, ಕ್ರೈಂ ಡೈರಿ ಘಾಲ್ನ್ ರಗ್ತಾಪಾತ್, ಖುನಿ, ಅನಯ್ತಿಕ್ ಸಂಬಂಧ್.. ಹೆಂ ಸಗ್ಳೆಂ ರಂಗವ್ನ್ ಸಾಂಗ್ತೆಲ್ಯಾಕ್ ಕುಟ್ಮಾಸಮೇತ್ ಬಸೊನ್ ಖಂಯ್ಚ್ಯಾಗೀ ಎಕಾ ಸಿನೆಮಾಚೊ ವಾಂಟೊ ಮ್ಹಳ್ಳೆಬರಿ ಕೂಲ್ ಜಾವ್ನ್ ಪಳೆಂವ್ಚೆಂ ಉಡಾಸ್ ಕರಾ. ಪೆÇೀರ್ ಕಾವೇರಿ ವಿಶ್ಯಾಂತ್ ಗಲಾಟೊ ಜಾಲೊ, ರಿಕ್ಶ್ಯಾರ್ ವೆತೆಲ್ಯಾ ದೊಗಾಂ ಬಾಯ್ಲಾಂಕ್ ತಮಿಳ್ನಾಡಾಂತ್ ಸುರಿಯೆನ್ ತೊಪುನ್ ಹಲ್ಲೊ ಕೆಲೊ.. ಅರೆ! ತುಮ್ಕಾಂ ಯೇವ್ನಾಂ ಗಿ ವಿಡಿಯೊ! ಮ್ಹಾಕಾಚ್ ಪಾಂಚ್ ಥಾವ್ನ್ ಸ ಜಣಾಂನಿ ಧಾಡ್ಲಾ, ತೆಂಯ್ ಎಕೆಕಾ ಮಿನುಟಾಚ್ಯಾ ಅಂತರಾರ್!! ಬ್ರೇಕಿಂಗ್ ನ್ಯೂಸ್ ದೀಂವ್ಕ್ ತುಮಿ ಕಾಡ್ಚಿ ವಾಂವ್ಟ್ ಮ್ಹಳ್ಯಾರ್ ಆಸಾನೆ, ಸಂಪಾದಕಾಂನೊ, ಚೆಪೆಂ ಉಕಲ್ಜೆ!

ಆತಾಂ ಸಾಂಗಾ, ಹಿಂಸಾ ಪಸಂದ್ ನಾ?

ಆಮಿ ಖಾಲಿ ಫಾರ್ವರ್ಡ್ ಕೆಲ್ಯೊ ಮಾತ್ರ್, ಆಮಿ ಖಂಯ್ ಹುಲ್ಪಯ್ಲಾಂ ವಾ ಜೀವ್ ಕಾಡ್ಲಾ? ಹೆಂ ಸವಾಲ್ ಖಂಡಿತ್ ಮ್ಹಾಕಾ ಪಾಟಿಂ ಮಾರ್ತೆಲ್ಯಾತ್.

ಉದ್ಕಾಖಾತಿರ್

ಸಗ್ಳೊ ಗಾಂವ್ ಜಳ್ತೇ ಆಸಾ

ಹಾ! ಕಸಲೆಂ ಪಿಶೆಂಪಣ್ ಪಳೆಯಾ

ಉದ್ಕಾಕ್ ರಾವಂವ್ಕ್

ಉಜೊ ಗೆಲಾ! 

ಹಿ ಮಟ್ವಿ ಕವಿತಾಯ್ (ಕವಿ: ರೋಶು ಬಜ್ಪೆ) ಮ್ಹಾಕಾ ಆಯಿಲ್ಲಿ!

ಸಾಂಗಾ, ಉಜೊ ಕಸೊ ಉದಕ್ ಪಾಲ್ವಂವ್ಕ್ ಗೆಲೊ? 

ಟಿ.ವಿ.ಚ್ಯಾ ಆಂಕರಾಂನಿ ಹಿ ಗಜಾಲ್ ಫುಂಕ್‍ಲ್ಲ್ಯಾನ್ ಘಡ್ಲ್ಯಾ ಮ್ಹಣ್ತಾತ್? ಹ್ಹಹ್ಹ.. ಟಿವಿರ್ ಪ್ರಸಾರ್ ಜಾತಾಜಾತಾನಾ ಸ್ಕ್ರೀನ್ ಶೋಟ್‍ಕಾಡ್ನ್ ವಾ ವೀಡಿಯೊ ರೆಕೊಡಿಂಗ್ ಕರ್ನ್ ಧಾಡ್‍ಲ್ಲೆಂ ಕೊಣೆಂ ವಾಟ್ಸಾಪ್ ಸಂಪಾದಕಾಂನೊ? ಖಂಯ್‍ಗಿ ಏಕ್ ಆವ್ಘಡ್ ಘಡೊನ್ ಎಕ್ಲ್ಯಾಚೊ ಪಾಂಯ್, ಹಾತ್, ಗೊಮ್ಟಿ ದೋನ್ ಜಾವ್ನ್ ಆಸ್ಲ್ಯಾರ್‍ಯೀ ತಾಚೊ ವಿಡಿಯೊ, ಖಂಯ್‍ಗಿ, ಕೆದಾಳಾಗಿ ಘಡ್‍ಲ್ಲ್ಯಾ ಸಂಗ್ತಿಂಚೊ ವೀಡಿಯೊ ಪ್ರಸ್ತುತ್ ಘಡಿತಾಕ್ ಲಿಂಕ್ ಕರುನ್ ಧಾಡ್‍ಲ್ಲೊ ಕೊಣೆಂ? ಥೊಡೆ ಪಾವ್ಟಿಂ ಹತ್ತ್ಯಾ, ಆವ್ಘಡ್ ಘಡ್ಲಾಂ ಮ್ಹಣ್ ಟಿವಿಚ್ಯಾಂಕ್ ಕಳ್‍ಲ್ಲೆಂಚ್ ವಾಟ್ಸಾಪಾರ್ ಪಯ್ಲೆಂ ಆಯ್ಲ್ಯಾ ಉಪ್ರಾಂತ್. 

ವಾಟ್ಸಾಪ್ ಸಂಪಾದಕಾಂನೊ, ಆಜ್‍ಕಾಲ್ ಘಡ್ಚ್ಯಾ ಜಾಯ್ತ್ಯಾ ಅಪಪ್ರಚಾರಾಕ್, ಹಿಂಸೆಕ್ ಪ್ರಚೋದನ್ ಮೆಳ್ಚ್ಯಾಕ್, ಮಾನ್ ಕಾಡ್ಚ್ಯಾಕ್, ಎಕಾ ಪಂಗ್ಡಾವಿರೋಧ್ ಆನ್ಯೇಕಾಕ್ ಉಬ್ಜಂವ್ಚ್ಯಾಕ್ ಶೀದಾ ತುಮಿಂಚ್ ಕಾರಣ್. 

ತುಮ್ಚ್ಯಾ ವಾಟ್ಸಾಪಾಥಾವ್ನ್ ಯೆಂವ್ಚ್ಯಾ ಹರ್ಯೆಕಾ ಪೊಸ್ಟಾಕ್ ತುಮಿಚ್ ಜವಾಬ್ದಾರ್. ತುಮಿಚ್‍ನೆ ಥಂಯ್ ಬರವ್ಪಿ ಆನಿ ಸಂಪಾದ್ಪಿ. ಕೊಣೆಂಗಿ ಧಾಡ್ಲೆಂ ಮ್ಹಣ್ ಫಾರ್ವಡ್ ಕರ್ತೆಲ್ಯಾಂಕ್ ಸಂಪಾದಕಾಚೆಂ ಕರ್ತವ್ಯ್ ನಾಂಗೀ ತರ್? ಗಡ್ ರಾಕ್ಚ್ಯಾ ಸೊಜೆರಾಬರಿ ತುಮ್ಚಿಂ ಬೊಟಾಂ ಹರ್ಯೆಕಾ ‘ಟಿಣಾ’ಕ್ ರಾಕೊನ್ ದಡ್ಬಡೊನ್ ಜಾಪಿ ಲಿಖ್ತಾತ್‍ನೆ, ಆತಾಂ ಕಿತೆಂ ಮ್ಹಣ್ತಾತ್? 

ಅರೆ, ಕಿತ್ಯಾ ಆಫ್‍ಲೈನ್?! ಖಂಯ್ ಗೆಲ್ಯಾತ್, ಹಲೋ?

ಮಾಗಿರ್ ವಾಚ್ತೆಲ್ಯಾತ್, ಲಿಖುನ್ ವೆತಾಂ. 

ಕೀಳ್ ಕಮೆಂಟ್ಸ್, ದೊಡ್ಯಾ ಅಭಿರುಚಿಚೆ ಪೋಸ್ಟ್, ರಗ್ತಾಪಾತಾಚ್ಯೊ ವಿಡಿಯೊ, ರಗ್ತಾನ್ ಬುಡ್ಲೆಲ್ಯಾ ಕುಡಿ ಸಮೇತ್ ಆಕ್ಸಿಡೆಂಟಾಚಿ ವರ್ದಿ ಛಾಪುನ್, ಧಾಡ್ನ್, ಫಾರ್ವರ್ಡ್ ಕರ್ನ್ ತುಮಿ ‘ಸಾಂಜೆಚ್ಯಾ’ ಪೇಪರಾಬರಿ ಜಾಂವ್ಚಿ ಗರ್ಜ್ ಕಿತೆಂ? ಆಜ್ ವಾ ಫಾಲ್ಯಾಂ ಖಬರ್ ಸಕ್ಡಾಂಕ್ ಪಾವ್ತಾಚ್. ಪುಣ್ ತ್ಯಾ ಎಕೆಕಾ ಘಡಿತಾ ಪಾಟ್ಲ್ಯಾನ್ ಭಲಾಯ್ಕೆಭರಿತ್ ಚರ್ಚಾ ಜಾಂವ್, ಅಸಲ್ಯೊ ಸಂಗ್ತಿ ಚುಕಂವ್ಚೆವಿಶಿಂ ಜಾಣ್ವಾಯೆಚಿಂ, ಪ್ರಭುದ್ಧ್ ಚಿಂತ್ಪಾಂ ಯೇಂವ್.

ಹೊ! ತುಂ ಭಾಗೆವಂತ್‍ಗಿ? ತುಂವೆಂ ಆಶೆಂ ಕರುಂನಾಯ್ ದಿಸ್ತಾ ಮ್ಹಣ್ ನಾಕ್ ಮೊಡಿನಾಕಾತ್. ಸಕ್ಕಡ್ ಚುಕ್ತಾತ್, ಸಂಪಾದಕಾಂನಿ ಎಕ್ಸ್‍ಟ್ರಾ ಕೇರ್ ಕಾಣ್ಘೆಜೆ ಮ್ಹಣ್ಚೆಂ ಹಾಂವೆಂ, ತಿತ್ಲೆಂಚ್. 

ಉದಕ್ ಪಾಲ್ವಂವ್ಕ್ ವೆಚ್ಯಾ ಉಜ್ಯಾಬರಿ ಚೀಪ್ ಜಾಂವ್ಚೆಂ ನಾಕಾ.

ಹೆಂ ವಾಚುನ್ ವಾಟ್ಸಾಪ್ ಧಾಂಪುನ್ ವೊಗೆ ಬಸನಾಕಾತ್, ಶೇರ್ ಕರಾ

- ಜೊ. ಸಿ. ಸಿದ್ದಕಟ್ಟೆ, ಕಾರ್ಮೆಲಿತ್

ಕವಿತೆ: ನೀರು

ನೀರು

ಮಟಮಟ ಮಧ್ಯಾಹ್ನ

ಊರೂರು ಅಲೆದು ಸುಸ್ತಾಗಿ

ತೊಟ್ಟು ನೀರಿಗಾಗಿ ಹುಡುಕಿದಾಗ

 ರಸ್ತೆ ಪಕ್ಕದ ನಲ್ಲಿಯೊಂದರ ಬುಡದಲ್ಲಿ

ಪಸೆ ಕಂಡು ಓಡಿದೆ

ಬೊಗಸೆಯಲ್ಲಷ್ಟು 

ನೀರು ತುಂಬಿಕೊಂಡು ತಲೆ ಎತ್ತಿದರೆ

ಅರೆ.....

ಪಕ್ಕದಲ್ಲೊಂದು ನಾಯಿ

ಕೊಂಬೆ ಮೇಲೆ ಕಾಗೆ

ಪೊಟರೆಯೊಳಗೆ ಅಳಿಲು

ದಿಟ್ಟಿಸಿ ನನ್ನನ್ನೆ ನೋಡುತ್ತಿದ್ದವು!

 ಹಸಿದವರ ಮುಂದೆ

ಊಟ ಮಾಡಲಾಗದೆ ಬುತ್ತಿ ಮರಳಿ

ಬ್ಯಾಗಿಗೆ ತುರುಕಿ ಕಿಟಕಿಯ ಹೊರಗೆ ನೋಡುವ

ರೈಲು ಪ್ರಯಾಣಿಕನಂತೆ

ಬೊಗಸೆ ನೀರು

ಗಿಡವೊಂದಕ್ಕೆ ಸುರಿದು ಮುನ್ನಡೆದೆ

ಇತಿಹಾಸ್

                       ಕಾಳಿಘಾಟ್ ಆನಿ ನಿರ್ಮಲ್ ಹೃದಯ್                   

ಕಾಳಿಘಾಟ್ ದಕ್ಶಿಣ್ ಕಲ್ಕತ್ತಾಂತ್ ಆಸ್ಚೊ ಏಕ್ ಸುಪ್ರಸಿದ್ಧ್ ಜಾಗೊ. ಕಿತ್ಯಾಕ್ ಹಾಂಗಾಸರ್ ಕಾಳಿ ದೇವಿಕ್ ಸಮರ್ಪಿತ್ ಏಕ್ ದೀವ್ಳ್ ಆಸ್‍ಲ್ಲೆಂ. ಹೂಗ್ಲಿ ನಂಯ್ ತಡಿರ್ ಆಸ್ಚ್ಯಾ ಹ್ಯಾ ದಿವ್ಳಾಕ್ ಜಾಯ್ತೆ ಯಾತ್ರಿಕ್ ಯೆತಾಲೆ. ಮದ್ಲ್ಯಾ ಯುಗಾಚ್ಯಾ ಇತಿಹಾಸಾಪ್ರಕಾರ್, ಹಿಂದ್ವಾಂಚ್ಯಾ 51 ಪವಿತ್ರ್ ಜಾಗ್ಯಾಂ ಪಯ್ಕಿ ಹೊಯ್ ಏಕ್! ತ್ಯಾ ಜಾಗ್ಯಾರ್ ಹಜಾರಾಂನಿ ಭಕ್ತ್ ಯೆತಾತ್, ಕಾಣಿಕ್, ಆಂಗವ್ಣ್ಯೊ ಭೆಟಯ್ತಾತ್. ನಾಮಕರಣ್, ಉಪನಯನ್, ಕೇಸ್ ತಾಸ್ಚೆಂ, ಕಾಜಾರಾಂ, ಮಾತ್ರ್ ನ್ಹಯ್ ಮರ್ಣಾ ವಿಧಿಯ್ ಹಾಂಗಾಸರ್‍ಚ್ ಜಾತಾಲಿ. 

ಹ್ಯಾ ಕಾಳಿ ದಿವ್ಳಾ ಮುಕಾರ್‍ಚ್ ಮದರಾನ್ ಆಪ್ಲೆಂ ಸೆವಾ ಶೆತ್ ಜಾವ್ನ್ ವಿಂಚುನ್ ಘೆತ್‍ಲ್ಲೆಂ ಘಡಿತ್‍ಯೀ ವಿಶೇಸ್. ದೊದೋನ್ ಪಾವ್ಟಿಂ ರಸ್ತ್ಯಾಕ್ ಮರೊಂಕ್ ತೆಂಕ್‍ಲ್ಲ್ಯಾಂಕ್ ಲಾಗ್ಶಿಲ್ಯಾ ಆಸ್ಪತ್ರೆಕ್ ವೆಲ್ಲ್ಯಾ ವೆಳಾರ್ ತಾಂಕಾಂ ಚಿಕಿತ್ಸಾ ದಿಂವ್ಕ್ ಆಯ್ಕಾನಾತ್ಲ್ಯಾ ದಾಕ್ತೆರಾಂಚೆಂ ಮನ್ಜಾತಿಪಣ್ ಪಳೆವ್ನ್ ಖೂಬ್ ದುಕಿ ಜಾಲ್ಲಿ ತಿ ಆಪುಣ್‍ಚ್ ಖುದ್ದ್ ಕಿತೆಂ ತರ್‍ಯೀ ಕರ್ತಾಂ ಮ್ಹಣ್ ಆಶೆಲಿ, ಮುನ್ಸಿಪಾಲಿಟಿಕ್ ವ್ಹಚೊನ್, “ಹ್ಯಾ ಎದ್ಯಾ ವಡ್ಲ್ಯಾ ಶ್ಹೆರಾಂತ್ ಮನಿಸ್ ರಸ್ತ್ಯಾರ್ ಮರ್ತಾ. ಆಮ್ಕಾಂ ಏಕ್ ಘರ್ ದಿಯಾ. ಆಮಿ ತಾಂಕಾಂ ಏಕ್ ಗವ್ರವಾಚೆಂ ಜೀವನ್ ದೀವ್ನ್ ದೆವಾಕ್ ಸಮರ್ಪಿತಾಂವ್” ಮ್ಹಣ್ ಚಿಕ್ಕೆ ವಡ್ಲ್ಯಾನ್‍ಚ್ ಉಲಯ್ಲಿ. ತಿಚಿ ಬೋಬ್ ಆಯ್ಕೊನ್ ಅಧಿಕಾರಿ ಭಿಯೆಲೆ. ಏಕ್ ವಿದೇಶಿ ಸ್ತ್ರೀ ಯೇವ್ನ್ ಹ್ಯೆ ಪರಿಂ ಉಲಂವ್ಚೆಂ ಪಳೆವ್ನ್ ವಿಜ್ಮಿತ್ ಜಾಲೆ ಆನಿ ಆಸ್ಪತ್ರೆಂತ್ ಮೆಳ್‍ಲ್ಲೆ ತೆ ನಿರಾಕರ್ಣೆಚಿ ಗಜಾಲ್ ಆಯ್ಕೊನ್ ತಾಣಿಂ ಮೆಡಿಕಲ್ ಕೊಲೆಜಿಚ್ಯಾ ಅಧಿಕಾರಿಕ್ ಕಳವ್ನ್, ಹಿಂದು ದಿವ್ಳಾ ಮುಕಾರ್ ಆಸ್‍ಲ್ಲ್ಯಾ ಖಾಲಿ ಪಡ್‍ಲ್ಲ್ಯಾ ಎಕಾ ಗೆಸ್ಟ್ ಹಾವ್ಜಾಂತ್ ತಿಚೆಂ ಮಿಸಾಂವ್ ಕರುಂಕ್ ಆವ್ಕಾಸ್ ದಿಲೊ. ಹೊ ಗೆಸ್ಟ್ ಹಾವ್ಜ್ 1952, ಫೆಬ್ರೆರ್ 22 ತಾರಿಕೆರ್ ‘ನಿರ್ಮಲ್ ಹೃದಯ್’ ಜಾವ್ನ್ ಬದಲ್ಲೊ. 

ದಿವ್ಳಾ ಮುಕಾರ್ ಕೊಡ್ಕಾರಾಂಚೊ ಆನಿ ಭಿಕಾರ್ಯಾಂಚೊ ಅಸ್ರೊ ಉದೆಲ್ಲೊ ಪಳೆವ್ನ್ ಸಂಪ್ರದಾಯ್‍ವಾದಿ ಉಚಾಂಬಳ್ ಜಾಲೆ. ಪ್ರತಿಭಟನ್ ಸುರು ಕೆಲೆಂ. ದೀಸ್ ವೆತಾಂ ವೆತಾಂ ಹೆಂ ಚಡ್ಲೆಂ. ಏಕ್ ದೀಸ್ ಮದರ್ ಹಾಂಚೆ ಸಾಮ್ಕಾರ್ ರಾವ್ಲಿ ಆನಿ ಮ್ಹಣಾಲಿ, “ತುಮಿ ಮ್ಹಾಕಾ ಕಿತೆಂ ಕರುಂಕ್ ಸಕ್ತಾತ್ ತೆಂ ಕರಾ. ಪುಣ್ ಭಿತರ್ ಥಂಯ್ಸರ್ ಆಸ್ಚ್ಯಾ ತಾಂಕಾಂ ತಾಂಚ್ಯಾ ಜಿಣ್ಯೆಚ್ಯೊ ನಿಮಾಣ್ಯೊ ಘಡಿಯೊ ಸಮಾಧಾನಾನ್ ಸಾರುಂಕ್ ಸೊಡಾ”. ಹೆಂ ಆಯ್ಕೊನ್ ಪ್ರತಿಭಟನ್ ಸದ್ದ್ಯಾಕ್ ಥಾಂಬ್ಲೆಂ ತರ್‍ಯೀ ಥೊಡ್ಯಾಚ್ ದಿಸಾಂನಿ ತೆಂ ದುಸ್ರ್ಯಾ ರುಪಾನ್ ಪರತ್ ಉದೆಲೆಂ. ಏಕ್ ದೀಸ್ ಪೆÇಲಿಸ್ ಅಧಿಕಾರಿ ಆಸ್ರ್ಯಾ ದಾರಾರ್ ಠೊಕೆ ಮಾರಿಲಾಗ್ಲೆ. ಪಾಟ್ಲ್ಯಾನ್ ಉಪ್ರಾಟಿ ಲೊಕಾ ಜಮೊ!! ಅಧಿಕಾರಿ ಭಿತರ್ ಗೆಲೆ ಆನಿ ಭಿತರ್ಲೆಂ ದೃಶ್ಯ್ ಪಳೆವ್ನ್ ಏಕ್ ಘಡಿಯ್ ಥಂಯ್ ರಾವೊಂಕ್ ಜಾಯ್ನಾಸ್ತಾಂ ಭಾಯ್ರ್ ಆಯ್ಲೆ. ಮದರ್ ಎಕ್ಲ್ಯಾಚ್ಯಾ ತೊಂಡಾರ್ ಜಾಲ್ಲ್ಯಾ ವ್ಹಡ್ ಘಾಯಾಂತ್ಲೆ ಕಿಡೆ ವಿಂಚುನ್ ಕಾಡ್ತಾಲಿ. ತಾಂಚೆಂ ಆಂಗ್ ಹಿಂವಾಳ್ಳೆಂ ಹೆಂ ಪಳೆವ್ನ್! ಅಧಿಕಾರಿ ಉಪ್ರಾಟಿ ಲೊಕಾಲಾಗಿಂ ಮ್ಹಣಾಲೆ, “ಶಾಂತ್ ಜಾಯಾ! ಆಮಿ ಹ್ಯೆ ಸ್ತ್ರೀಯೆಕ್ ಹಾಂಗಾ ಥಾವ್ನ್ ಧಾಡುಂಕ್ ತಯಾರ್ ಆಸಾಂವ್, ಪುಣ್ ಏಕ್ ಶರ್ತಾಖಾಲ್. ತುಮ್ಚ್ಯೊ ಆವಯೊ ವ ಭಯ್ಣಿ ಯೇವ್ನ್ ಹಾಂಗಾ ಹಿ ಸ್ತ್ರೀ ಕರ್ತಾ ತೆಂ ಕಾಮ್ ಕರ್ತಿತ್ ತರ್ ಹಿಕಾ ಗಡಿಪಾರ್ ಕರುಂಕ್ ಆಮಿ ತಯಾರ್” ಉಪ್ರಾಟಿ ಲೋಕ್ ಥಂಯ್ಚೊ ನಿಕಾಳ್ಳೊ! 

ಥೊಡ್ಯಾ ದಿಸಾಂನಿ ದಿವ್ಳಾಚೊ ಪುಜಾರಿ ಖೆವಾದಿಚ್ಯೆ ಪಿಡೆನ್ ಗಡೀಸ್ ಜಾಲೊ. ಆಸ್ಪತ್ರೆಂನಿ ತಾಕಾ ಘೆತ್ಲೊ ನಾ. ಘರ್ಚ್ಯಾಂನಿ ಪಯ್ಸ್ ಕೆಲೊ. ದಿವ್ಳಾಥಾವ್ನ್ ಭಾಯ್ರ್ ಘಾಲೊ. ಮದರಾನ್ ತಾಕಾ ನಿರ್ಮಲ್ ಹೃದಯಾಕ್ ಯೇಂವ್ಕ್ ವಿನತಿ ಕೆಲಿ. ತೊ ಪಿಡೆನ್ ಕಶ್ಟಾತಾಲೊ ತರ್‍ಯೀ ಅರ್ಗಂಟಿ ಜಾವ್ನ್ ವಚಾನಾಸ್ತಾಂ ದಿವ್ಳಾಭಾಯ್ರ್‍ಚ್ ಉರ್ಲೊ. ನಿಮಾಣೆಂ ತಾಚಿ ಪರಿಸ್ಥಿತಿ ಗಡೀಸ್ ಜಾತಾನಾ ಮದರಾನ್ ತಾಕಾ ವಿಂಚುನ್ ಹಾಡ್ಲೊ. ಥೊಡ್ಯಾಚ್ ದಿಸಾಂನಿ ತೊ ಸರ್ಲೊ ಆನಿ ಹಿಂದು ಸಂಪ್ರದಾಯಾಖಾಲ್ ತಾಚಿ ಮರ್ಣಾರೀತ್ ಕೆಲಿ. ಹ್ಯಾ ಘಡಿತಾ ಉಪ್ರಾಂತ್ ಪ್ರತಿಭಟನ್ ಸಂಪೂರ್ಣ್ ರಾವ್ಲೆಂ ಆನಿ ಮನ್ಶಾಪಣ್ ಜಿಕ್ಲೆಂ.

ಪಳೆ ಆನಿ ಪಾರ್ಕಿ

                            ನಶಿಬಾಚೊ ಖೆಳ್                     

               ನಿರ್ದೇಶಕಾಚ್ಯಾ ಖಾಂದಾರ್ ಜೂಂವ್ ಹಳೂ          

ಪಾದ್ರಿ ಸಿನೆಮಾ ಯೇವ್ನ್ ಧಾ ವರ್ಸಾಂ ಉಭ್ಲಿಂ. ಪಾಟ್ಲ್ಯಾ ದೋನ್ ವರ್ಸಾಂಥಾವ್ನ್ ಮಂಗ್ಳುರಾಂತ್ ತುಳು ಸಿನೆಮಾ ರಂಗ್ ಹಾಸ್ಯಾಚೆಂ ಎಕ್‍ಚ್ ಫೆÇರ್ಮುಲಾ ಘೆವ್ನ್ ಪಾಕಾಂ ಫುಲವ್ನ್ ರಾವ್ತಾನಾ ಕೊಂಕ್ಣಿ ಮನಿಸ್‍ಯೀ ಜಾಗೆ ಜಾಲ್ಯಾತ್ ತೆಂ ಖರೆಂ. ಪಾಟಾಪಾಟ್ ದೋನ್ ಸಿನೆಮಾ ಪಡ್ದ್ಯಾರ್ ಯೆಂವ್ಚಾರ್ ಆಸಾತ್, ದೋನ್ ಥಿಯೆಟರಾಂನಿ ಎದೊಳ್‍ಚ್ ಪಾವ್ಲ್ಯಾಂತ್. ತಿಂ ಜಾವ್ನಾಸಾತ್ - ಏಕ್ ಅವೈಜಾಸಾ, ಜಿಎಸ್‍ಬಿ ಸಿನೆಮಾ ಆನಿ ಪೋರ್‍ಚ್ ಮಂಗ್ಳುರಿ ಪರ್ಜೆನ್ ಪಳೆವ್ನ್ ಪಸಂದ್ ಕೆಲ್ಲೆಂ ಸಿನೆಮಾ - ನಶಿಬಾಚೊ ಖೆಳ್. 

ಹ್ಯಾ ಸಿನೆಮಾಚಿ ಕಾಣಿ ತೀಸ್ ವರ್ಸಾಂ ಆದಿಂ ನಾಟಕಾಖಾತಿರ್ ಹೆನ್ರಿ ಡಿ’ ಸಿಲ್ವಾನ್ ಲಿಕ್‍ಲ್ಲಿ. ತೊ ಕಾಳ್ ಆನಿ ಆಯ್ಚೊ, ರಾತ್ ದೀಸ್ ಫರಕ್ ಆಸಾ. ಕಾಣಿ ಹ್ಯಾ ಕಾಳಾಕ್ ಸಲ್ವಂಚಿ ತರ್‍ಯೀ ತಿ ಘಟ್ಟ್ ಧರ್ನ್ ಹ್ಯಾ ಕಾಳಾಕ್ ಸರಿ ಜಾಯ್ಶೆಂ ನೀಟ್ ಉಬಿ ರಾವಯಿಲ್ಲಿ ಶ್ಯಾತಿ ನಿರ್ದೇಶಕ್ ಹ್ಯಾರಿ ಫೆರ್ನಾಂಡಿಸಾಚಿ. ಹ್ಯಾ ಸಿನೆಮಾ ಮುಕಾಂತ್ರ್ ಕೊಂಕ್ಣೆಕ್ ಏಕ್ ಬರೊ ಆನಿ ನಿಪುಣ್ ನಿರ್ದೇಶಕ್ ಮೆಳ್ಳಾ ತೆಂ ಖರೆಂ. ಎದೊಳ್‍ಚ್ ತಾಚಿ ಶ್ಯಾತಿ ಬೋಜ್‍ಪುರಿ ಸಿನೆಮಾ ರಂಗಾಂತ್ ಹೊಗ್ಳಿಕೆಚಿ ಆಸಾ. 

ಪಾತ್ರ್‍ವರ್ಗಾಕ್ ಜೊಕ್ತ್ಯಾಂಕ್ ವಿಂಚ್ಲೆಲೆಂ ಶಾಭಾಸ್ಕೆಕ್ ಫಾವೊ. ತೊ ಈಶ್ಟ್, ಹೊ ಪಯ್ಶೆ ಘಾಲ್ಲೊ ಮ್ಹಣ್ ದಾಕ್ಶೆಣೆಕ್ ಪಡಾನಾಸ್ತಾಂ,  ಕೊಂಪ್ರಾಮೈಸ್ ಕರುಂಕ್ ವಚನಾಸ್ತಾಂ, ಬಗಾರ್ ನವ್ಯಾಂಕ್‍ಯೀ ಸಾಂಗಾತಾ ಘೆವ್ನ್ ರಿಸ್ಕೆಚೆಂ ಮೇಟ್ ಸಿನೆಮಾ ಪಂಗ್ಡಾನ್ ಘೆತ್ಲಾಂ ಆನಿ ನವ್ಯಾನ್ ಆವ್ಕಾಸ್ ಮೆಳ್‍ಲ್ಲ್ಯಾ ಕಲಾಕಾರಾಂನಿ ನಿರಾಶಿ ಕರುಂಕ್ ನಾ. 

ನಿರ್ಮಾಪಕ್ ಅನಿ ನಿರ್ದೇಶಕ್ ದೊಗ್‍ಯೀ ಕೊಂಕ್ಣಿ ಮನಿಸ್ ತರ್‍ಯೀ ಪುಣ್ ಮರಾಠಿ ಪರಿಸರಾಂತ್ ಲಾಂಬ್ ಕಾಳಾಚ್ಯೆ ವಸ್ತೆ ನಿಮ್ತಿಂ ಮರಾಠಿಚೊ ಮೋಗ್ ತಾಂಕಾಂ ಆಸ್ಚೊ ಆಮಿ ಒಳ್ಕಾಜೆ. ದೋನ್ ಪದಾಂ ಮರಾಠಿ ಮುಳಾಚಿಂ ಆಸಾತ್, ವಾಯ್ಟ್ ನಾ. ಉತ್ರಾಂನಿ ಗಿರೆಸ್ತ್‍ಕಾಯೆನ್ ಭರ್ಲೆಲಿಂ ಮಂಗ್ಳುರಿ ಮುಳಾಚ್ಯಾ ಗೀತ್‍ಕಾರಾಂಚಿಂಯ್ ಪದಾಂ ಆಸಾತ್, ಮನಾಂ ಪಿಸ್ವಯ್ತಾತ್.

ಹ್ಯಾರಿ ಫೆರ್ನಾಂಡಿಸಾಚ್ಯಾ ಖಾಂದಾರ್ ಹಿ ತೀಸ್ ವರ್ಸಾಂ ಆದ್ಲಿ ಕಾಣಿ ಉರ್ಭೆನ್ ಭರ್ಲ್ಯಾ ಮಾತ್ರ್ ನ್ಹಯ್ ಎಲ್ಟನ್, ಕ್ಲೆನ್ವಿನ್, ರಂಜಿತಾ, ಎಸ್ತೆರಾಸವೆಂ ಮಾಲ್ಘಡೆ ಕಲಾಕಾರ್ ಸ್ಟ್ಯಾನಿ ಅಲ್ವಾರಿಸ್, ಪ್ರಿನ್ಸ್ ಜೇಕಬ್ ಆನಿ ಸುಜಾತಾ ಅಂದ್ರಾದೆ ಹಾಣಿಂ ಆಪ್ಲ್ಯಾ ನಟನಾವರ್ವಿಂ ಪಾತ್ರಾಂಕ್ ಜೀವ್ ದಿಲಾ. ವೊಟ್ಟಾರೆ ಸಾಂಗ್ಚೆಂ ತರ್, ಹ್ಯಾ ಸಿನೆಮಾಚೆಂ ಮೇಕಿಂಗ್ ಸೊಭ್ಲಾಂ ಜಾಲ್ಲ್ಯಾನ್ ಕಸಲೆ ಊಣ್ ದಿಸ್ಲ್ಯಾರ್‍ಯೀ ಕೊಂಕ್ಣಿ ಸಿನೆಮಾ, ನಿತಳ್ ಕಾಮ್ ಕೆಲ್ಲೆಂ ದಿಸೊನ್ ಯೆತಾ ಜಾಲ್ಲ್ಯಾನ್ ಸುದಾರ್ಸುನ್ ವ್ಹರ್ಯೆತ್ ಆನಿ ಹ್ಯಾ ನಿರ್ದೆಶಕಾ ಹಾತಿಂ ಜರ್ ಫ್ರೆಶ್ ಕಾಣಿ ಮೆಳ್ಳಿ ತರ್ ನವಾಲ್ ಘಡ್ಚ್ಯಾಂತ್ ದೋನ್ ಉತ್ರಾಂ ನಾಂತ್.

ಪಳೆ ಆನಿ ಪಾರ್ಕಿ

ಓ.. ಲಾ.. ರೆ..  

ಕೊಂಕ್ಣಿ ಅಲ್ಬಮ್ ಏಕ್ ಭರ್ವಸ್ಯಾ ನೆಕೆತ್ರ್ ಜಾಯ್ತ್?

ಕಲಾಕಾರಾಕ್ ಭಾಶೆಚಿ ವಾ ಧರ್ಮಾಚಿ ಬಂದಡ್ ನಾ. ಪುಣ್ ಥೊಡ್ಯಾ ಕಲಾಕಾರಾಂಕ್ ಪಾಟಿಕ್ ಲಾಗ್ಚಿ ಬೆಂದೆರ್ ಮ್ಹಳ್ಯಾರ್ ‘ಬ್ರ್ಯಾಂಡ್’ ಥಾಪ್ಚೆಂ. ತೊ ಗಾವ್ಪಿ ರೊಮ್ಯಾಂಟಿಕ್ ಪದಾಂಕ್ ಮಾತ್ರ್, ಹೊ ದುಕಾಳ್ ಗಿತಾಂಕ್ ಮಾತ್ರ್ ಮ್ಹಣ್ ಬ್ರ್ಯಾಂಡ್ ಕರ್ನ್ ದವರ್ಚೆಂ. ಸಿಡಿ ಕಾಡ್ತಾನಾಂಯ್ ಗಾವ್ಪ್ಯಾಚಿ ವಿಂಚವ್ಣ್ ಅಶಿಚ್ ಚಲ್ತಾ. ತ್ಯಾ ಪ್ರಕ್ರಿಯೆಂತ್‍ಯೀ ಬ್ರ್ಯಾಂಡಾ ಪರ್ಮಾಣೆಂಚ್ ಗಾವ್ಪ್ಯಾಚಿ ವಿಂಚವ್ಣ್ ಜಾತಾ. ಆದಿಂ ಖಂಯ್ಚ್ಯಾ ಗಾವ್ಪ್ಯಾನ್ ಕಸಲ್ಯಾ ಗೀತ್ ಪ್ರಕಾರಾಂತ್ ಜೀಕ್ ಜೊಡ್ಲ್ಯಾ, ತ್ಯಾಚ್ ರಿತಿಚ್ಯಾ ಗಿತಾಕ್ ತಾಚೊ ತಾಳೊ ಮಾತ್ರ್ ಜಾಯ್ತ್ ಮ್ಹಣ್ ಪಕ್ಕಾ ಕರ್ನ್ ಘೆತಾತ್. ಬ್ರ್ಯಾಂಡ್ ಥಾಪ್ಚೆಂ ಎಕಾ ಕಲಾಕಾರಾ ಥಂಯ್ ಆಸ್ಯೆತ್ ಜಾಲ್ಲ್ಯಾ ಶಕ್ಯತಾಯೆವಯ್ರ್ (Potentiality) ಆಡ್ ಪರಿಣಾಮ್ ಬಸ್ತಾ ತೆಂ ಖಂಡಿತ್. 

ಶಿಲ್ಪಾ ಕುಟಿನ್ಹಾ-ಕೊಂಕ್ಣೆಂತ್ಲಿ ಪ್ರಭುದ್ದ್ ಗಾವ್ಪಿಣ್, ತಾಲೆಂತ್‍ವಂತ್. ತಿಚ್ಯಾ ರಂಗೀನ್ ತಾಳ್ಯಾವರ್ವಿಂ ಬೊವ್‍ಶಾ ಮಂಗ್ಳುರಿ ಕೊಂಕ್ಣಿ ಗಾವ್ಪಿಣ್ಯಾಂಪಯ್ಕಿ ಉಂಚ್ಲೆಂ ಸ್ಥಾನ್ ತಿಕಾ ಆಸಾ. ತಿಕಾಯ್ ಸಬಾರ್ ತೆಂಪಾಕ್ ಏಕ್ ಭಕ್ತಿಕ್ ಗಿತಾಂಚಿ ಗಾವ್ಪಿಣ್ ಮ್ಹಣ್‍ಚ್ ಬ್ರ್ಯಾಂಡ್ ಕರ್ನ್ ದವರ್‍ಲ್ಲೆಂ ಆಸಾ. ಆತಾಂ ‘ಫೈರ್ ಬ್ರಾಂಡ್’ ಕಶಿ ಕೊಂಕ್ಣಿ ಪದಾಂನಿ ಆಪ್ಲಿಚ್ ಏಕ್ ಮ್ಹೊರ್ ಮಾರುಂಕ್ ಮುಕಾರ್ ಸರ್ಲ್ಯಾ. 

‘ಓ ಲಾ ರೆ..’ ಏಕ್ ಮೊಗಾ ಸಂಗೀತಾಚೆಂ ಪಯ್ಣ್. ಹ್ಯಾ ಆಲ್ಬಮಾಂತ್ಲಿಂ ಪದಾಂ ಶಿಲ್ಪಾ-ಸ್ಟೀಫನ್ ಹಾಂಚ್ಯಾ ಕಾಳ್ಜಾಚೊ ಕುಡ್ಕೊಚ್. ಹ್ಯಾ ದೊಗಾಂಯ್ನಿ ಆಪ್ಲೆಂ ಪಯ್ಣ್ ಏಕ್ ಘಡಿ ಥಾಂಬವ್ನ್ ಆಪ್ಣಾಚಿಚ್ ಮೊಲಾಮಾಪ್ಣಿ ಕರ್ನ್ ಬ್ರ್ಯಾಂಡಾಚ್ಯಾ ಜಾಳಾಥಾವ್ನ್ ಭಾಯ್ರ್ ಯೇಜೆಚ್ ಮ್ಹಳ್ಳೊ ಉದ್ದೇಶ್ ದವರ್ನ್ ಬಾರಿಚ್ ನಿರೀಕ್ಷೆನ್ ತಯಾರ್ ಕೆಲ್ಲೊ ಆಲ್ಬಮ್.  

ಹ್ಯಾ ಆಲ್ಬಮಾಂತ್ ಆಸಾತ್ 12 ಪದಾಂ. ಲೋಯ್ಡ್ ತಾಕೊಡೆ, ಐರಿನ್ ಡಿ' ಸೋಜಾ, ಸಂಗೀತ್ ಮಾಂತ್ರಿಕ್ ಜೊಯೆಲ್ ಪಿರೇರ್, ರಿಚರ್ಡ್ ಅಲ್ವಾರಿಸ್ ಹಾಂಚ್ಯೆ ಲಿಕ್ಣೆಂತ್ ಉದೆಲ್ಲಿ ಹಿಂ ಗಿತಾಂ ಉತ್ರಾಂನಿ ಗಿರೆಸ್ತ್. ‘ಶೆನನ್ ಪ್ರೊಡಕ್ಶನ್’ ಥಾವ್ನ್ ನಿರ್ಮಾಣ್ ಜಾಲ್ಲ್ಯಾ ಹ್ಯಾ ಆಲ್ಬಮಾಂತ್ ನಿತಿನ್ ಕುಟ್ಟುಂಗಲ್, ಜೊಯೆಲ್ ಪಿರೇರ್ ಆನಿ ರೋಶನ್ ಡಿ ಸೋಜಾ ಹಾಣಿಂ ಸಂಗೀತಾಚೆಂ ಪಕ್ವಾನ್ ವಾಡ್ಲಾಂ. 

ಆಲ್ಬಮಾಕ್ ಉಕಲ್ನ್ ಧರ್ಚಿಂ ಗಿತಾಂ 

ಜೊಯೆಲ್ ಪಿರೆರಿಚ್ಯಾ ಉತ್ರಾಂನಿ ವಿಣ್ಲೆಲೆಂ ಗೀತ್ - ಧೊಣು ಧೊಣು. ಸ್ಪ್ಯಾನಿಶ್ ಸಂಗೀತ್ ಪ್ರಕಾರಾಚೆರ್ ಹೊಂದ್ವೊನ್ ಜೊಯೆಲಾನ್ ಬರೊ ಪ್ರಯೋಗ್ ಕೆಲಾ. 

ರಾತ್ ಜಾಲಿ- ಡಿಸ್ಕೊ ಮೂಡಾರ್ ಆಸ್ಚೆಂ ಗೀತ್ ಸ್ಟೀಫನಾನ್ ಎಕ್ಲ್ಯಾನ್‍ಚ್ ಪಯ್ಲೆ ಪಾವ್ಟಿಂ ಅಪೂರ್ಬಾಯೆನ್ ಗಾಯ್ಲಾಂ. 

ತುಂ ಗೆಲೊಯ್ ಸಾಂಡುನ್ - ನಿತಿನ್, ಲೋಯ್ಡ್ ಆನಿ ಶಿಲ್ಪಾನ್ ಸಾಂಗಾತಾ ಮೆಳೊನ್ ನಿರ್ಮಾಣ್ ಕೆಲ್ಲಿ ಅಪೂರ್ವ್ ಕಲಾಕೃತಿ ಹೆಂ ಗೀತ್! ಶಿಲ್ಪಾ ಥಾವ್ನ್ ನಿತಿನ್ ತಸಲ್ಯಾ ಸಂಗೀತ್ ವಿದ್ವಾಂಸಾನ್ ಏಕ್ ಅಪೂರ್ಬಾಯೆಚೆಂ ಗೀತ್ ಭಾಯ್ರ್ ಕಾಡ್ಲಾಂ. ಶಿಲ್ಪಾಚಿ ಗಾವ್ಪಾ ತಾಂಕ್ ಹಾಂತುಂ ಧರ್ ಧರ್‍ಶಿ ದಿಸ್ತಾ.

ಓ ಲಾ ರೆ.. ಏಕ್ ರ್ಯಾಪ್ ಪದ್. ಕೊಂಕ್ಣೆಂತ್ ಹೆಂ ನವೆಸಾಂವ್. ರೋಶನ್ ಹಾಚ್ಯಾ ಪಯ್ಲ್ಯಾ ಪ್ರಯತ್ನಾಕ್ ಚೆಪೆಂ ಉಕ್ಲುಂಕ್ ಜಾಯ್. 

ತುಜ್ಯಾ ದೊಳ್ಯಾಂತ್ಲಿಂ – ಪದ್ ಸಂಗೀತ್ ಸಂಯೋಜನಾಖಾತಿರ್ ಉಟೊನ್ ದಿಸ್ತಾ ತರ್,  ತುಂ ಜಾಯ್ ಮ್ಹಾಕಾ – 10/4 ರೊಕ್ ಶಾಯ್ಲೆರ್ ಆಸಾ. ಹೆರ್ ಪದಾಂಯ್ ಮನಾಂ ಧಲಂವ್ಚಿಂಚ್. ತಾಂತುಂಯ್ ಏಕ್ ಬಾಯ್ಲಾ ಪದ್ – ಗುಟುರ್ ಗುಟುರ್ ಕಾರ್ಯೆಂ ಸೊಭಂವ್ಕ್ ಅವ್ವಲ್ ಪದ್. 

ಹರ್ಯೇಕ್ ಪದಾಕ್ ಈಶ್ಟ್-ಮಂತ್ರ್ ಮ್ಹಣ್ ದಾಕ್ಶೆಣೆಕ್ ಪಡಾನಾಸ್ತಾಂ ಗುಣಾತ್ಮಕ್ ಗಾವ್ಪ್ಯಾಂಕ್‍ಚ್ ಪ್ರಾಶಸ್ತ್ಯಾ ದಿಲ್ಲಿ ಬರಿ ಗಜಾಲ್. ಶಿಲ್ಪಾ-ಸ್ಟೀಫನ್ ಜೊಡ್ಯಾಚೆಂ ಹೆಂ ಪಯ್ಲೆಂ ಪ್ರೇತನ್ ಕೊಂಕ್ಣಿ ಸಂಗೀತ್ ಶೆತಾಕ್ ಏಕ್ ನಿರ್ದಿಶ್ಟ್ ವಾಟ್ ದಾಕಯ್ತ್ ಮ್ಹಳ್ಳೊ ಭರ್ವಸೊ ಮ್ಹಜೊ.  

ಸಂಪಾದಕೀಯ್ NBJ September - 2016

ಆವಯ್ ಬಾಪಯ್ - ಭುರ್ಗ್ಯಾಂಚಿಂ ಸರ್ವೆಟಾಂ?

ಸರ್ವೆಂಟ್ ವಾ ಆಯಾ – ಮ್ಹಳ್ಳೆ ಸಬ್ದ್ ಆಯ್ಕಾತಾನಾ ಗಲ್ಫಾಂತ್ ವಾ ಇಸ್ರಾಯೆಲಾಂತ್ ಕೇರ್ ಟೇಕರ್ ಜಾವ್ನ್ ವಾವುರ್ತೆಲ್ಯಾಂಚೊ ಉಡಾಸ್ ಯೇತ್ ತುಮ್ಕಾಂ. ಘನಾಚೆಂಚ್ ಕಾಮ್ ಮ್ಹಣ್ಯಾಂ. ಪುಣ್ ಏಕ್ ಆವಯ್ ಬಾಪಯ್ ತಾಂಚ್ಯಾ ಭುರ್ಗ್ಯಾಂಚಿ ಸರ್ವೆಂಟಾಂ ಮ್ಹಣ್ ಹಾಂವ್ ಸಾಂಗಿನ್ ತರ್ ಎಕ್ಯೆ ಘಡ್ಯೆ ತುಮಿ ಒಪೆÇ್ವಂಚಿಂ ನಾಂತ್! ತರ್‍ಯೀ ಪುಣ್ ತುಮ್ಚ್ಯಾ ಭುರ್ಗ್ಯಾಂಕ್ ಪಯ್ಲ್ಯಾನ್ ಪಯ್ಲೆಂ ಜಾಯ್ ಏಕ್ ಸರ್ವೆಂಟ್‍ಚ್! ತರ್ ಸರ್ವೆಂಟ್ ಮ್ಹಳ್ಯಾರ್, ತಾಂಚ್ಯಾ ಹಾತಾ-ಪಾಂಯಾಂಕಡೆ ನಿರಂತರ್ ರಾವೊನ್, ತಾಂಚ್ಯಾ ಉತ್ರಾಂ ಫುಡೆಂಚ್ ಗರ್ಜ್ ಸಮ್ಜೊನ್ ಘೆವ್ನ್ ತಿ ಪೂರ್ಣ್ ಕರುಂಕ್ ತಯಾರ್ ಆಸ್ಚೆ ತಸಲಿಂ ಮ್ಹಣ್ ತುಮಿ ಒಳ್ಕಾತಾತ್ ತರ್ ತೆಂ ಸಾರ್ಕೆಂ. ಹರ್ಯೇಕ್ ಆವಯ್ ಬಾಪಯ್ ತಾಂಚ್ಯಾ ಹೆಳ್ಕೆವಿಣೆಂ ಹೆಂಚ್ ಕರ್ತಾ ಆನಿ ಭುರ್ಗ್ಯಾಂಕ್‍ಯೀ ಜಾಯ್ ಅಸಲಿಂ ಸರ್ವೆಂಟಾಂ!

ಬಾಳ್ಪಣಾರ್ ಅಸಲೆಂ ಆಯಾಪಣ್ ಆವಯ್ ಬಾಪಯ್ ಕರ್ತಾತ್ ಆನಿ ಹಾಂತುಂ ಅವೆಕ್ತ್ ಸುಖ್‍ಯೀ ಭೊಗ್ತಾತ್. ತೆ ಮಧುರ್ ದೀಸ್ ತಾಂಚ್ಯಾ ಕಾಳ್ಜಾಂ ಮನಾಂನಿ ಛಾಪುನ್ ಉರ್ತಾತ್. ಪುಣ್ ಜೆದ್ನಾಂ ಹೆಂಚ್ ಬಾಳ್ ವಾಡೊನ್ ಯೆತಾ, ತೆದ್ನಾಂ ಎಕ್ಯೆ ಆವಯ್ ಬಾಪಯ್ನ್ ಆಪ್ಣಾಕ್‍ಚ್ ಉಡಾಸ್ ಕರ್ನ್ ಘೆಜೆ ತಸಲಿ ಗಂಭೀರ್ ಗಜಾಲ್ ಕಿತೆಂಗಿ ಮ್ಹಳ್ಯಾರ್, ತಾಂಚ್ಯಾ ಆಯಾಪಣಾಚೆ ದೀಸ್ ಕಾಬಾರ್ ಜಾವ್ನ್ ಆಯ್ಲೆ ಆನಿ ಆತಾಂ ದುಸ್ರೊ ಏಕ್ ಪಾತ್ರ್ ತಾಂಕಾಂ ಖೆಳೊಂಕ್ ಆಸಾ. 

ಕಶೆಂ ಭುರ್ಗಿಂ - ಬಾಳ್ಪಣಾಥಾವ್ನ್ ಪ್ರೌಢಾವಸ್ಥೆಕ್ ಉತರ್ತಾತ್, ತ್ಯೆಚ್‍ಪರಿಂ ವ್ಹಡಿಲಾಂನಿ ಆಯಾಪಣಾಥಾವ್ನ್ ಮಾರ್ಗದರ್ಶಿ/ಗೈಡ್ ಜಾಂವ್ಚ್ಯಾ ಪಾಂವ್ಡ್ಯಾಕ್ ಉತ್ರಾಜೆ. ಜಾಯ್ತ್ಯಾ ಸಂದರ್ಬಾಂನಿ ಆವಯಾಂಥಂಯ್ ಆಶೆಂ ಘಡ್ತಾ, ಬಾಳ್ಪಾಣಾರ್ ಭುರ್ಗ್ಯಾಕ್ ಆಯಾ ತಿ ಜಾವ್ನಾಸ್‍ಲ್ಲಿ ಸಾಸ್ಣಾಕ್ ಆಯಾಚ್ ಜಾವ್ನ್ ರಾವೊಂಕ್ ಸೊಧ್ತಾ. ವಾಡ್ಲೆಲ್ಯಾ ಭುರ್ಗ್ಯಾಚ್ಯೊ ಅತೀ ಲ್ಹಾನ್ ಗರ್ಜೊಯ್ ಪೂರ್ಣ್ ಕರ್ಚೆಂ ತಿಚೆಂಚ್ ಕಾಮ್ ಮ್ಹಳ್ಳೆಪರಿಂ ಕರ್ತಾ. ತಾಚ್ಯೆವಯ್ರ್, ಖೊಟೊ ಮುಟಿ, ಆಕ್ಮಾನ್ ಮೆಳ್ಳ್ಯಾರ್‍ಯೀ ತಿ ಸೊಸ್ತಾ – ಕಿತ್ಯಾ ತಿ ಅಜೂನ್ ಆಯಾಚ್ ಉರ್ಲ್ಯಾ!

ಭುರ್ಗ್ಯಾಂಚೆ ಪ್ರೌಢಾವಸ್ಥೆರ್ ‘ಬರೆಂ – ವಾಯ್ಟ್’ ಹ್ಯಾ ಸಂಗ್ತಿಂಚಿ ಕಸ್ಲಿಯ್ ಫಿಕಿರ್ ತಾಂಕಾಂ ಆಸಾನಾ. ಮತಿಕ್ ಕಿತೆಂ ‘ಥ್ರಿಲ್’ ದಿತಾ ತೆಂಚ್ ಸಾರ್ಕೆಂ ಮ್ಹಣ್ ತಿಂ ಲೆಕ್ತಾತ್. ಅಸಲ್ಯಾ ಸಂದರ್ಬಾರ್ ವ್ಹಡಿಲಾಂ ಜರ್ ಆಯಾ ಜಾವ್ನ್ ಉರ್ಲ್ಯಾಂತ್ ತರ್ ಹ್ಯಾ ಭುರ್ಗ್ಯಾಂಕ್ ತಾಂಚೊ ಫಾಯ್ದೊ ಉಟಂವ್ಕ್ ಸಲೀಸ್.

ಆಯಾಪಣಾಥಾವ್ನ್ ಮಾರ್ಗದರ್ಶಿಚ್ಯಾ ಪಾತ್ರಾಕ್ ರಿಗ್ಚೆಂಯ್ ಬೋವ್ ತ್ರಾಸಾಚಿ ಗಜಾಲ್. ತಾಂಕಾಂ ಧೊಸ್ಚೆಂ ಸವಾಲ್ ಹೆಂ - ಹಾಂವ್ ಜೆಂ ಕಿತೆಂ ಭುರ್ಗ್ಯಾ ಖಾತಿರ್ ಕರ್ತಾಂ ತೆಂ ಮೋಗ್ ದಿಂವ್ಚೆ ಖಾತಿರ್ ಕರ್ತಾಂ ವಾ ತಾಚೆಥಾವ್ನ್ ಮೋಗ್ ಪಾಟಿಂ ಮೆಳ್ಚೆ ಆಶೆನ್ ಕರ್ತಾಂ? ಜರ್‍ಯೀ ಮೋಗ್ ಪಾಟಿಂ ಮೆಳ್ಳೊ, ತಿ ವರ್ತಿ ದಾದೊಸ್ಕಾಯ್! ಪುಣ್ ಜಿಂ ವ್ಹಡಿಲಾಂ ಮಾರ್ಗದರ್ಶಿ ಜಾಂವ್ಕ್ ಸೊಧ್ತಾತ್ ತಿಂ ಜಾಣಾಂತ್, ತಾಂಚೆಂ ಕಾಮ್ ಮೋಗ್ ದಿಂವ್ಚೆಂ ಮಾತ್ರ್. 

ಮಾರ್ಗದರ್ಶಿ ಜಾಲ್ಲ್ಯಾ ವ್ಹಡಿಲಾಂಕ್ ಚಡಾವತ್ ಪಾಟಿಂ ಮೆಳ್ಚೊ ಮೋಗ್ ನ್ಹಯ್, ‘ಐ ಹೇಟ್ ಯೂ’ ಮ್ಹಳ್ಳೆ ರಿತಿಚೆಂ ವರ್ತನ್. ಕಿತ್ಯಾಕ್ ಪ್ರೌಢಾವಸ್ಥೆಕ್ ಪಾವ್ತಾನಾ ವ್ಹಡಿಲಾಂಚ್ಯಾ ಆಯಾಪಣಾಚ್ಯಾ ‘ಕಂಫರ್ಟ್ ಝೊನಾ’ ಥಾವ್ನ್ ಭುರ್ಗೆಂ ಭಾಯ್ರ್ ಯೇಂವ್ಕ್ ತಯಾರ್ ಆಸಾನಾ. ಪರಿಣಾಮ್, ತುಮ್ಚ್ಯಾ ಆನಿ ತಾಚ್ಯಾ ಚಿಂತ್ಪಾಮಧೆಂ, ಜಿಣ್ಯೆ ಆನ್ಬೋಗಾಮದೆಂ, ನಯ್ತಿಕ್ ಮಾವ್ಲ್ಯಾಂ ಮದೆಂ ಘರ್ಶಣ್ ಸುರು ಜಾತಾ. ಹ್ಯಾ ವೆಳಾ ಜರ್ ವ್ಹಡಿಲಾಂ, ಆಪ್ಣಾಚೊ ಇರಾದೊ ಭುರ್ಗ್ಯಾಂಚೊ ಮೋಗ್ ಕರ್ಚೊ ಶಿವಾಯ್ ತೊ ‘ಪಾಟಿಂ ಆಶೆಂವ್ಚೊ’ ನ್ಹಯ್ ಮ್ಹಣ್ ಘಟ್ಟ್ ನಿಚೆವ್ ಧರ್ತಾತ್ ತರ್ ತಿಂ ಉತ್ತೀಮ್ ಮಾರ್ಗದರ್ಶಿ ಜಾತಾತ್. ದಾಕ್ಶೆಣೆಕ್ ಪಡ್‍ಲ್ಲ್ಯಾ ದಿಸಾ ವ್ಹಡಿಲಾಂ ಸಲ್ವಾತಾತ್. ಏಕ್ ಉಡಾಸ್ ದವರ್ಯಾಂ, ಪ್ರೌಡಾವಸ್ಥೆಂತ್ ಜರ್ ತುಮಿಂ ವ್ಹಡಿಲಾಂನಿ ಮಾರ್ಗದರ್ಶಿ ಜಾವ್ನ್ ಉತ್ತೀಮ್ ಪಾತ್ರ್ ಖೆಳ್ಳೊ ತರ್ ತೆಂ ಭುರ್ಗೆಂ ಕೆದ್ನಾಂಯ್ ತುಮ್ಚೆಂಚ್ ಜಾವ್ನ್ ಉರ್ತೆಲೆಂ. ಜರ್ ಆಜ್ ಹೊಗ್ಡಾಂವ್ಚ್ಯಾ ಭಿಂಯಾನ್ ದಾಕ್ಶೆಣೆಕ್ ಪಡ್ಲ್ಯಾರ್, ಮುಕಾರ್‍ಯೀ ಹೊಗ್ಡಾಯ್ತೆಲ್ಯಾತ್. 

ಮಾರ್ಗದರ್ಶಿ ಜಾಂವ್ಚ್ಯಾ ವ್ಹಡಿಲಾಂಕ್ ಜರೂರ್ ಪ್ರೌಢಾವಸ್ಥೆವಿಶಿಂ ಜಾಣ್ವಾಯ್ ಜಾಯ್. ತ್ಯೆ ಪ್ರಾಯೆರ್ ಭುರ್ಗ್ಯಾಂಚ್ಯೆ ಮತಿಚ್ಯಾ ವಾಡಾವಳಿಚೊ ಇಲ್ಲೊ ತರೀ ಜೋಪ್ ಆಸಾಜೆ. ಹ್ಯಾ ವಿಶಯಾಚೆರ್ ಹ್ಯಾ ಅಂಕ್ಯಾಂತ್ ಆಮಿ ಕಾಂಯ್ ಇಲ್ಲಿ ಸಮ್ಜಣಿ ಹೆಳ್‍ಲ್ಲ್ಯಾ ಮನಾಶಾಸ್ತ್ರಿ ದಾಕ್ತೆರಾಂಥಾವ್ನ್ ತುಮ್ಚೆ ಮುಕಾರ್ ದವರ್ಚೆಂ ಪ್ರೇತನ್ ಕೆಲಾಂ. ಉಪ್ಕಾರಾಚೆಂ ಜಾತೆಲೆಂ ಮ್ಹಣ್ ಪಾತ್ಯೆತಾಂ. 

ಭುರ್ಗಿಂ ಆಮ್ಚಿಂ, ಕುಟ್ಮಾ ವೊಡ್ತಾಂತ್ಲಿಂ ಫುಲಾಂ. ತಿಂಯ್ ಮೊಂತಿ ಮಾಯೆಕ್ ಕಾಳ್ಜಾಲಾಗ್ಶಿಲಿಂ ಜಾವ್ನ್ ಫುಲೊಂದಿತ್ ಮ್ಹಣ್ ಮಾಗೊನ್ ತುಮ್ಕಾಂ ಸಮೇಸ್ತಾಂಕ್ ಮೊಂತಿ ಫೆಸ್ತಾಚೆ ಉಲ್ಲಾಸ್ ಪಾಟಯ್ತಾಂ. 

- ಜೊ. ಸಿ. ಸಿದ್ದಕಟ್ಟೆ, ಕಾರ್ಮೆಲಿತ್