ಕಾಳ್ಜಾ ಗಾಜ಼್: ಅಕ್ಟೋಬರ್ 2014

ಕೊಣಾಜೆ ಫಾತ್ರಾಲಾಗಿಂ

ಜೊವ್ಳೆ ಕೊಣ್ಜೆ ಫಾತೊರ್ ಕಾಳೆ ಕೋಟ್

ನ್ಹೆಸ್ ಲ್ಲ್ಯಾ ವಕಿಲಾಪರಿಂ ಕಿತ್ಲೆ ಗಂಭೀರ್!

ಬಾವ್ಳ್ಯಾರ್ ಚಡ್ಲೊಂ ತಾಂಚ್ಯಾ

ಜೀವ್ ಅಬೊಲ್ಯಾ ಜಸೊ ಕಿಣಾನ್ ಹಗೂರ್

ಮುಳಾಂತ್ ರಾವುನ್ ತಾಂಚೆ ಊಂಚಾಯೆಕ್

ಉಡ್ಲ್ಯೊ ಆಸ್ಡ್ಯೊ!

ತಾಂಚೆರ್ ಬಸುನ್ ಆತಾಂ ತಿಳ್ತಾಂ ಸಕ್ಲಾ

ಶಿಂಪಾಡ್ಲ್ಯಾತ್ ಭಿರ್ಮಣ್ಣಾ ನಾಯ್ಕಾಲ್ಯಾ ಬೇಕರಿಚ್ಯೊ ತುಕ್ಡ್ಯೊ

ಸಾಯ್ಭಾ! ಸಕ್ಲಾ ಆಸ್ತಾನಾ ತ್ಯಾ ತುಕ್ಡ್ಯಾಂಕ್ ಚ್ ಮೂ

ಆಮ್ಚೆ ಮಧೆಂ ವೆಗ್ಳಾಚಾರ್ ಜಾಲ್ಲೊ

ಹರ್ ತುಕ್ಡ್ಯಾ ಕುಡ್ಯಾಂಕ್ ಮುಯೆಪರಿಂ ಝುಜ್ತಾನಾಂಚ್

ನಿರಾಶೆನ್ ಹರ್ ದೀಸ್ ಬುಡ್ಲೊ

ಕಾಳ್ಯಾ ಕೊಟಾಚ್ಯಾ ಜೊವ್ಳ್ಯಾ ವಕಿಲಾಂನೋ

ಕಿತ್ಯಾಕ್ ರೆ ಮೌನಿ, ವಾದ್ ಮಾಂಡಾತ್ ನಯ್?

ಅಸಲ್ಯಾ ಧ್ಯಾನಾನ್ ಕಿತೆಂ ಉಜ್ವಾಡ್ತಾ

ಲೊಳೊನ್ ವ್ಹಚಾ, ಸೊಡಯಾ ತುಕ್ಡ್ಯಾಂಚೊ ನ್ಯಾಯ್

“ಸಮಾಧಾನಾನ್ ವ್ಹ ಚ್ ಸಕ್ಲಾ, ಕೊಣಾಕಿ ಸಾಂಗಿನಾಕಾ”

ಪುಸ್ಪುಸೊ ಆಯ್ಕುನ್ ಘುಂವ್ಲೊಂ, ಫಾತೊರ್ ಉಲಯ್ಲೊ?!!

“ಮುಳಾಂತ್ ರೆ ಅಪಾ ಗಾಡಿಯೊ ಜಮ್ತಾನಾ

ಆಮ್ಚಿ ಆಡಿ ಹಾಲ್ತಾ ಹಾಂಗಾ

ತುಕ್ಡ್ಯಾಂಗಾರ್ ಕೆನ್ನಾಂ ತರೀ ಪಾವುನ್

ಆಮ್ಚೆಯ್ ವಾಂಟೆ ಘಾಲ್ಚೆನಾಂತ್ ಕಿತೆಂ?

ಸಮಾಧಾನಾನ್ ವ್ಹಚ್ ಸಕ್ಲಾ, ಹಿಂಗಾಚೆಂ ಹಿಂಗಾ ಸೊಡುನ್”

ಹಾಂವೆಂ ಆತಾಂ ಸಗ್ಳೆಂ ಸಾಂಗ್ಲಾಂ

ಮ್ಹಜೆ ಜಿಬೆರ್ ಉರಾನಾ ಉತರ್

ತುಮಿ ತರೀ ವಗೆ ರಾವಾ

ಪ್ರಸಾರುಂಕ್ ನ್ಹಯ್ ಹಿ ಬರಿ ಖಬರ್!