ನಬಾಜೆ - ದಸೆಂಬರ್ 2016 ಅಂಕ್ಯಾಚೆಂ ಸಂಪಾದಕೀಯ್

   ‘ಫಾಳಿಯಾಂನಿ ಗುಟ್ಲಾಯ್ಲೆಲ್ಯಾಕ್’ ಪಳೆವ್ನ್ ವ್ಹಳ್ಕಾ   

ಆದ್ವೆಂತ್ ಕಾಳ್ ಸುರ್ವಾತ್ಲಾ. ದಸೆಂಬರ್ ಮ್ಹಯ್ನ್ಯಾಚೆಂ ಶೀತಳ್ ವಾರೆಂಚ್ ನತಲಾಚ್ಯಾ ವಿಶೇಸ್ ಕಾಳಾಕ್ ಏಕ್ ಕಳಾ ಹಾಡ್ತಾ. ಆದ್ವೆಂತ್ ಸುರು ಜಾಲ್ಲೊಚ್ ಆಮ್ಚಿಂ ಕಾಳ್ಜಾಂ-ಮನಾಂ ಎಕಾ ಥರಾಚ್ಯಾ ವಿಶೇಸ್ ಭುಲಿಕ್ ವಳಗ್ ಜಾಲ್ಲೆಬರಿ ಧಲ್ತಾತ್. ಆಮ್ಚ್ಯಾ ಸಕ್ಡಾಂಚ್ಯಾ ದೊಳ್ಯಾಂನಿ ಪರ್ಜಳ್ ಉಮಾಳ್ತಾ. ಯಾದಿಂಚಿ ಸವಾರಿ ಅಪಾಪಿಂಚ್ ಸುರ್ವಾತ್ತಾ. ದೆಕ್ತಾಂ ದೆಕ್ತಾಂ ಇಗರ್ಜಾಂನಿ, ಘರಾಂನಿ ಹೊ ಸಂಭ್ರಮ್ ದಾಟೊನ್ ಯೆತಾ ಆನಿ ಸಂಭ್ರಮ್ ಶಿಖರಾಕ್ ಪಾವ್ತಾನಾ ಜೀವ್ ದೆವಾಚ್ಯಾ ಹಾಜ್ರೆಂತ್ ಫುಮಾರ್ ಜಾತಾ.

ನತಾಲ್, ಬೆತ್ಲೆಹೆಮಾಂತ್ ಕೆನ್ನಾಂಗಿ ಜಲ್ಮಾಲ್ಲ್ಯಾ ಬಾಳೊಕ್ ಜೆಜುಚೆಂ ಫೆಸ್ತ್ ಮಾತ್ರ್ ನ್ಹಯ್, ದೆವಾಚೆಂ ರಾಜ್ಯ್ ಆಮ್ಚೆಮದೆಂ ಆಸಾ ಮ್ಹಳ್ಳ್ಯಾಚಿ ಖಾತ್ರಿಯ್ ವ್ಹಯ್.                                                                                             

         

ಲುಕಾಚ್ಯಾ ವಾಂಜೆಲಾಂತ್ ಜೆಜುಚ್ಯಾ ಜಲ್ಮಾಚಿ ಖಬರ್ ಆಯ್ಕಾಲ್ಲ್ಯಾಂ ಪಯ್ಕಿ ಪಯ್ಲೆ ಆಸಾತ್ ಗೊವ್ಳಿ. ದೇವ್ ದೂತ್ ತಾಂಕಾಂ ಏಕ್ ಗುರ್ತ್ ದೀವ್ನ್ ಮ್ಹಣ್ತಾ, “ಫಾಳಿಯಾಂನಿ ಗುಟ್ಲಾವ್ನ್, ಖಾವ್ಣೆಂತ್ ನಿದಾಯ್ಲಲೊ ಏಕ್ ಬಾಳೊಕ್ ತುಮ್ಕಾಂ ಮೆಳ್ತಲೊ”. ‘ಫಾಳಿಯಾಂನಿ ಗುಟ್ಲಾಯ್ಲಲೊ’ ಹೊ ಕಸಲ್ಯಾ ಮಹತ್ವಾಚೊ ಗುರ್ತ್ ಮ್ಹಣ್ ವಿಚಾರ್ಶ್ಯಾತ್ ತುಮಿ. ಸಹಜ್, ಬಾಳಾಂಕ್ ಹ್ಯೆಚ್ ಬರಿ ಗುಟ್ಲಾಯ್ತಾತ್. ತಾಂತು ಹೊಚ್ ಸೊಡ್ವಣ್ದಾರ್ ಮ್ಹಣ್ ಕಶಿ ವ್ಹಳಕ್ ಧರ್ಚಿ? ಲುಕಾಕ್ ಹೊಚ್ ಗುರ್ತ್ ಭೋವ್ ಮಹತ್ವಾಚೊ. ಉಡಾಸ್ ಕರಾ, ಜೆಜುಚ್ಯಾ ಸಂಸಾರಿ ಜಿಣ್ಯೆಚ್ಯಾ ನಿಮಾಣ್ಯಾ ದಿಸಾ ತಾಕಾ ಸಣಾಚ್ಯಾ ವಸ್ತ್ರಾಂನಿ ಗುಟ್ಲಾವ್ನ್ ಸಮಾಧೆಂತ್ ದವರ್ಲೊ. ಪಾಸ್ಖಾಚೊ ಘುಟ್ ಉಗ್ಡಾಪೊ ಕೆಲ್ಲೊಚ್ ದೊಡುನ್ ಬಗ್ಲೆಕ್ ದವರ್ ಲ್ಲ್ಯಾ ಸಣಾಚ್ಯಾ ವಸ್ತ್ರಾಂನಿ. ಖೊವೊಳ್ನ್ ದವರ್ ಲ್ಲೆಂ ಲುಗಟ್ ಯೀ ಜಿವಂತ್ಪಣಾಕ್ ಏಕ್ ಸಾಕ್ಸ್. ಆತಾಂ, ಗೊವ್ಳ್ಯಾಂನಿ ‘ಫಾಳಿಯಾಂನಿ ಗುಟ್ಲಾಯ್ಲಲ್ಯಾ’ ಬಾಳಾಕ್ ಸೊಧಿಜೆ. ಮೆಸ್ಸಿಯಾಕ್ ‘ಫಾಳಿಯಾಂನಿ ಗುಟ್ಲಾಯ್ಲಲೊ’ ಪಳೆವ್ನ್ ವ್ಹಳ್ಕಾಜೆ! ವಿಶೇಸ್ ಮಹತ್ವಾಚೊ ಗುರ್ತ್‍ಗಿ ಹೊ? ನಿಜಾಯ್ಕಿ ಹೊ ಗುರ್ತ್ ಜಾವ್ನಾಸಾ ದುಬ್ಳಿಕಾಯೆಚೊ, ಲ್ಹಾನಾಂತ್ಲ್ಯಾ ಲ್ಹಾನಾಂಚೊ, ದೆವಾನ್ ಆಪ್ಣಾಕ್‍ಚ್ ಖಾಲಿ ಕೆಲ್ಲ್ಯಾಚೊ! ಪರಮಹೋನ್ನತ್ ದೇವ್ ಆಪ್ಣಾಕ್ ಪರ್ಜೆನ್ ವ್ಹಳ್ಕೊಂಚೆಖಾತಿರ್ ತಾಂಚೆಬರಿಚ್ ಜಾತಾ, ರಗ್ತಾಮಾಸಾಚೊ ಜಾತಾ. ಪುಣ್ ಮನ್ಶ್ಯಾಕುಳಾಚೆಂ ದುರ್ಭಾಗ್, ಜುವಾಂವ್ ಮ್ಹಣ್ತಾ (1:10), ‘ತಾಚೆಚ್ ಮಾರಿಫಾತ್ ಜಾಲ್ಲೊ ತೊ ಸಂಸಾರ್ ತಾಕಾ ವ್ಹಳ್ಕಾಲೊನಾ!’.

ಆಯ್ಚಿ ಆಮ್ಚಿ ಪರಿಗತ್ ಆಶಿ ಆಸಾ, ಫಾಳಿಯಾಂನಿ ಗುಟ್ಲಾಯ್ಲೆಲ್ಯಾಕ್, ರಗ್ತಾಮಾಸಾಚ್ಯಾಕ್ ವ್ಹಳ್ಕೊನ್ ಜಿಯೆಂವ್ಚ್ಯಾ ಬದ್ಲಾಕ್ ಇಮಾಜಿಂಕ್‍ಚ್ ಪೊಟ್ಲುನ್ ಧರ್ನ್ ರಾವೊಂಕ್ ಲೋಕ್ ಗಣ್ಣ್ ರಾಸ್ ಪಡ್ತಾ. ದೆವಾಳಾಂತ್ ಭಕ್ತಿನ್ ವೊಮ್ತಿಂ ಪಡ್ಚಿಂ ಆಮಿ, ಭಾಯ್ರ್ ಯೆತಾಚ್ ಫಾಳಿಯಾಂನಿ ಗುಟ್ಲಾಯ್ಲಲ್ಯಾಂ’ ಥಂಯ್ ಭೊಗ್ಣಾಂವೀಣ್ ಜಾತಾಂವ್!

ಕೋಣ್ ಹಿಂ ‘ಫಾಳಿಯಾಂನಿ ಗುಟ್ಲಾಯ್ಲಲಿಂ?’ ಫಾಳಿಯಾಂನಿ ಗುಟ್ಲಾವ್ನ್ ಖಾವ್ಣೆರ್ ನಿದಾಯ್ಲಲೊ ಜೆಜುಚ್ ಮ್ಹಣ್ತಾ, “ಜೆಂ ಕಿತೆಂ ತುಮಿ ಹ್ಯಾ ಮ್ಹಜ್ಯಾ ಅತೀ ಲ್ಹಾನ್ ಭಾವ್/ಭಯ್ಣಿಂ ಮಧ್ಲ್ಯಾ ಎಕ್ಲ್ಯಾಕ್ ಕೆಲೆಂ, ತೆಂ ಮ್ಹಾಕಾಚ್ ತುಮಿ ಕೆಲೆಂ”.

ಎಕ್ಲೊ ಮಾನೆಸ್ತ್ ಶಿಣ್ ಉಚಾರಿ, “ಪಾಪ್ ಸಾಯ್ಭಾನ್ ಸಿರಿಯಾಥಾವ್ನ್ ಆಯಿಲ್ಲ್ಯಾ ನಿರ್ವಾಸಿತಾಂಕ್ ಕೆನಡಾ ಆನಿ ಹೆರ್ ರಾಶ್ಟಾಂನಿ ಭಿತರ್ ಘೆಜೆ ಮ್ಹಣ್ ವತ್ತಾಯ್ ಕರ್ಚಿ ಸಮಾ ನ್ಹಯ್. ತೆ ಮುಸ್ಲಿಮ್. ಬೊಂಬ್ ಭಾಂದುನ್ ಘೆವ್ನ್ ಭೊಂವ್ಚೆ ಮನಿಸ್. ಏಕ್ ಪಾವ್ಟಿಂ ರೀಗ್ ದಿಲ್ಯಾರ್ ಸಗ್ಳೆಂ ರಾಶ್ಟ್ರ್ ಆಕ್ರಮಣ್ ಕರ್ತಿತ್. ಪಾಪಾಕ್ ಹೆಂ ಪುರಾ ಸಮ್ಜನಾ..” 

ಪಾಪಾಕ್ ಬರ್ಯಾನ್ ಸಮ್ಜತಾ. ಎಕಾ ಕಾಳಾರ್ ಬೆತ್ಲೆಹೆಮಾಥಾವ್ನ್ ಎಜಿಪ್ತಾಕ್ ಪೆÇಳಾಪಳ್ ಘೆತ್‍ಲ್ಲಿಂ ಜುಜೆ, ಮರಿ ಆನಿ ಜೆಜುಯೀ ನಿರ್ವಾಸಿತಾಂ ಜಾವ್ನಾಸ್ಲಿಂ ಮ್ಹಣ್ ತೊ ಬರ್ಯಾನ್ ಸಮ್ಜತಾ. ನಿರ್ವಾಸಿತ್ ಜಾವ್ನ್ ಎಜಿಪ್ತಾಂತ್ ಲಿಪ್ಲೆಲ್ಯಾ ‘ಫಾಳಿಯಾಂನಿ ಗುಟ್ಲಾಯ್ಲೆಲ್ಯಾಕ್’ ಸ್ವೀಕಾರ್ ಕರ್ತೆಲ್ಯಾಂನಿ, ಆಜ್ ಫಾಳಿಯಾಂನಿ ಗುಟ್ಲಾವ್ನ್ ಉರ್ಲೆಲ್ಯಾ ಬಾಳಾಂಕ್ ಘೆವ್ನ್ ಆಯಿಲ್ಲ್ಯಾ ನಿರ್ವಾಸಿತ್ ಆವಯಾಂಕ್ ಆಮ್ಚಿಂ ನ್ಹಯ್ ಮ್ಹಣ್ಚೆಂ ಕಶೆಂ? ರಗ್ತಾಮಾಸಾಚ್ಯಾಂಕ್ ವ್ಹಳ್ಕಾನಾ ತರ್ ಖಂಯ್ ಪಾವ್ಲೊ ಆಮ್ಚೊ ದೆವಾಚೊ ಮೋಗ್? 

ಸಂಪಾದಕೀಯ್: ನಬಾಜೆ - ನವೆಂಬರ್ 2016

ಪೊಸ್ಕಿ ಕುಟ್ಮಾಂ ಸಶಕ್ತ್ ಜಾಂವ್ಚಿಂ ಕೆದಾಳಾ?

ಜುವಾಂವ್ಚ್ಯಾ ವಾಂಜೆಲಾಂತ್ (12:1-7) ಜುದಾಸಾನ್ ಉಭಾರ್‍ಲ್ಲೆಂ ಸವಾಲ್, ‘ಕಿತ್ಯಾ ಹೊ ವಿಭಾಡ್?’ ಮ್ಹಳ್ಳೆಂ ಆಜ್ ಕಥೊಲಿಕ್ ಪವಿತ್ರ್ ಸಭೆಕ್ ಪಳೆತಾನಾ ಸಭಾರಾಂಕ್ ಉದೆತಾ! ಜೆಜುಚ್ಯಾ ಪಾಂಯಾಂಕ್ ಮೊಲಾದೀಕ್ ಸುಂಗಧ್ ತೇಲ್ ವೊತುನ್ ಬಸ್‍ಲ್ಲೆ ಸ್ತ್ರೀಯೆಥಂಯ್ ಆನಿ ತಿಚಿ ಸೆವಾ ಸಾಸೂ ಕರಿನಾಸ್ತಾಂ ಮರ್ಜೆನ್ ಭೊಗ್ಚ್ಯಾ(!) ಜೆಜುಕ್ ಪಳೆವ್ನ್ ಜುದಾಸ್ ಚಿಂತ್ತಾ ಜಾವ್ಯೆತ್, ಮೆಸ್ತ್ರಿ ಕಿತೆಂ ಕುಡ್ಡೊ ಜಾಲಾ! ಇತ್ಲೊ ದುಬ್ಳೊ ಲೋಕ್ ಆಸ್ತಾನಾ ಆಪ್ಣಾಚ್ಯಾ ಪಾಂಯಾಂಕ್ ತೇಲ್ ಮಾಲಿಶ್!?

“ಕಿತ್ಯಾ ಹೊ ವಿಭಾಡ್?” ಜುದಾಸಾಚ್ಯಾ ಸವಲಾಕ್ ಜೆಜುಚಿ ಜಾಪ್ ಆಮ್ಕಾಂ ಕಳಿತ್ ಆಸಾ. ಹೆಂಚ್ ಜುದಾಸಾಚೆಂ ಸವಾಲ್ ಸಭಾರ್ ಕ್ರೀಸ್ತಾಂವ್ ತವಳ್ತವಳ್ ವಿಚಾರ್ತಾತ್. “ಹೊ ಕಿತ್ಯಾ ವಿಭಾಡ್? ದುಬ್ಳ್ಯಾಂಕ್ ದಿಂವ್ಕ್ ಜಾಯ್ನಾಂಗಿ?” ಪುಣ್ ಸವಾಲ್ ಘಾಲ್ಲ್ಯಾಂಚ್ಯಾ ಘರ್ಚೆಂ ಕಾಜಾರ್ ಕಾಂಯ್ ಲ್ಹಾನ್ ಮಟ್ಟಾರ್ ಜಾಯ್ನಾ, ಹಿ ದುಸ್ರಿ ಗಜಾಲ್! ಆಸೊಂ, ನಿಜಾಕ್‍ಯೀ ಸಗ್ಳ್ಯಾ ಸಂಸಾರಾರ್ ಲೇಕ್ ಕಾಡ್ಲ್ಯಾರ್ ಕಥೊಲಿಕ್ ಅಜೂನ್ ದುಬ್ಳೆ ಆಸಾತ್, ತರ್‍ಯೀ ಪುಣ್ ತೆ ಕಥೊಲಿಕ್‍ಚ್ ರಾವ್ಲ್ಯಾತ್! ತಾಂಚ್ಯಾ ದುಬ್ಳಿಕಾಯೆಕ್ ತೆ ಪವಿತ್ರ್‍ಸಭೆಕ್ ಬೋಟ್ ಜೊಕಿನಾಂತ್. ಕಿತ್ಯಾಕ್ ತೆ ಜಾಣಾಂತ್, ತಾಂಚ್ಯಾ ದುಬ್ಳಿಕಾಯೆಕ್ ಕಾರಣ್ ಆಸಾತ್, ತಾಂಚೊ ಸರ್ಕಾರ್ ಆನಿ ಅನೀತಿನ್ ಚಲಂವ್ಚೆ ಸಂಪ್ರಾದಾಯ್, ಜೆ ಅಜೂನ್ ತಾಂಚ್ಯಾ ರಾಶ್ಟ್ರಾಂನಿ ಬಳಾನ್ ವಾಡೊನ್ ಆಸಾತ್. ಹೊಚ್ ದುಬ್ಳೊ ಲೋಕ್, ಪಾಪಾ ಫ್ರಾನ್ಸಿಸ್ ತಾಂಚ್ಯಾ ರಾಶ್ಟ್ರಾಂಕ್ ಭೆಟ್ ದಿತಾನಾ ಹಾರಿಹಾರಿಂನಿ ರಾಸ್ ಪಡ್ತಾ. ಕಿತ್ಯಾಕ್, ‘ಪವಿತ್ರ್ ಸಭಾ ಆಪ್ಣಾಚಿ ಆನಿ ಆಪ್ಣಾಕ್ ಸಾಂಡಿನಾ’ ಮ್ಹಳ್ಳೊ ಭರ್ವಸೊ ತಾಂಚ್ಯಾ ಕಾಳ್ಜಾಂನಿ ಅಜೂನ್ ಜಿವೊ ಆಸಾ. 

ದುಬ್ಳ್ಯಾಂಚೆ ಪಕ್ಶೆಕ್ ರಾವೊನ್ ಸೆವಾ ಚಾಕ್ರೆ ಮುಕಾಂತ್ರ್ ಕಥೊಲಿಕ್ ಪವಿತ್ರ್ ಸಭಾ ದುಬ್ಳ್ಯಾಂಚಿ ಜತನ್ ಘೆತಾ ಮ್ಹಣ್ ಪ್ರತ್ಯಕ್ಶ್ ದಾಕಯಿಲ್ಲೆ ಸಾಂತ್, ಸಾಂತಿಣ್ಯೊ ಜಾಯ್ತ್ಯೊ ಆಸಾತ್. ತಾಂತುಂಯ್ ಮದರ್ ತೆರೆಸಾ, ವಿಶೆಂತ್ ಪಾವ್ಲ್, ಅಸ್ಸಿಸಿಚೊ ಫ್ರಾನ್ಸಿಸ್ ಉಡಾಸಾಂತ್ ಉರ್ಚೆ ತಸಲೆ. ತಾಂಕಾಂ ಕಥೊಲಿಕ್ ಪವಿತ್ರ್ ಸಭಾ ಸೊಡ್ನ್ ವೆಚಿ ತಾಳ್ಣಿ ಆಯ್ಲಿನಾ. ಬಗಾರ್ ಆಪುಣ್‍ಚ್ ತಿಚೊ ವಾಂಟೊ ಜಾವ್ನ್ ದುಬ್ಳ್ಯಾಂಚೆ ಪಕ್ಶೆಕ್ ರಾವೊಂಕ್ ತಾಣಿಂ ಪಂಥಾಹ್ವಾನ್ ಘೆತ್ಲೆಂ. 

ಜುದಾಸಾಚ್ಯಾ ವಯ್ಲ್ಯಾ ಸವಲಾಕ್ ಜೆಜುಚಿ ಜಾಪ್, “ದುಬ್ಳೆ ತುಮ್ಚೆಸಂಗಿಂ ಸದಾಂಚ್ ಆಸ್ತೆಲೆ”. ಹಾಚೊ ಅರ್ಥ್ ಅಸೊ ನ್ಹಯ್, ದುಬ್ಳ್ಯಾ ಭಾವಾ ಭಯ್ಣಿಂ ಥಂಯ್ ಆಮಿ ದೊಳೆ ದಾಂಪ್ಚೆ. ಪುಣ್ ಜರೂರ್, ಆಮ್ಚ್ಯಾಚ್ ಮರ್ಜೆಕ್ ಲಾಗೊನ್ ದೆವಾನ್ ದಿಲ್ಲ್ಯಾ ಸಂಪನ್ಮೂಳಾಂತ್ಲೆಂ ಸಮಾನ್ ರಿತಿನ್ ವಾಂಟಾಪ್ ಜಾಂವ್ಕ್ ನಾ ಹೆಂ ಸತ್. ಹೆ ಅನೀತಿಚೊ ಅನುಪಾತ್ ಉಣೊ ಕರ್ಚ್ಯಾಕ್ ಕಥೊಲಿಕ್ ಪವಿತ್ರ್ ಸಭೆನ್ ಕೆಲ್ಲೊ ವಾವ್ರ್ ಸತ್ತ್ಯಾನ್ ಎದೊಳ್ ಖಂಯ್ಚ್ಯಾಯ್ ಜಾಗತಿಕ್ ಸಂಘಟನಾನ್ ಕರುಂಕ್ ನಾ! ಅಜೂನ್ ಆದಿವಾಸಿಂ ಸಂಗಿಂ, ನಿಮ್ನ್ ವರ್ಗಾಚ್ಯಾ ಲೊಕಾಮಧೆಂ ಘುಸೊನ್, ಸಭಾರ್ ಧಾರ್ಮಿಕ್ ಭಾವಾ ಭಯ್ಣಿಂನಿ ತಶೆಂಚ್ ಲಾಯಿಕ್ ಮಿಶನರಿ ಭಾವಾ ಭಯ್ಣಿಂನಿ ಕಥೊಲಿಕ್ ಪವಿತ್ರ್ ಸಭೆಚ್ಯಾ ಅಸ್ತಿತ್ವಾಕ್ ಸಾಕ್ಸ್ ದಿಲ್ಯಾ ಆನಿ ದುಬ್ಳ್ಯಾಂಚೆ, ನಿರ್ಗತಿಕಾಂಚ್ಯೆ ಪಕ್ಶೆಕ್ ರಾವ್ಲ್ಯಾ. ಹಿ ಸೆವಾ ಫಕತ್ ಆಪ್ಲ್ಯಾ ಭಾವಾಡ್ತಿ ಭಾಂವ್ಡಾಂಕ್ ಸೀಮಿತ್ ನಾ. ಕಥೊಲಿಕ್ ಪವಿತ್ರ್ ಸಭಾ ಸಕ್ಕಡ್ ವರ್ಗಾಚ್ಯಾಂಕ್ ಆಪ್ಲೆ ವೆಂಗೆಂತ್ ಘೆತಾ. 

ಚಿಂತ್ಯಾಂ, ಕಥೊಲಿಕ್ ಪವಿತ್ರ್ ಸಭೆನ್ ಆಪ್ಣಾ ತಾಬೆನ್ ಆಸ್ಚ್ಯಾ ಸರ್ವ್ ಮೊಲಾದಿಕ್ ವಸ್ತುಂಕ್ ವಿಕ್ಲೆಂ ಆನಿ ಮೆಳ್ಳೊಲೊ ಆಯ್ವಜ್ ದುಬ್ಳ್ಯಾಂಕ್ ವಾಂಟ್ಲೊ, ಆತಾಂ ಹೆಂ ಕಾಮ್ ಸಂಸಾರಾಚ್ಯಾ ದುಬ್ಳಿಕಾಯೆಚ್ಯಾ ದರ್ಯಾಂತ್ ಏಕ್ ಥೆಂಬೊ ಗಳಯಿಲ್ಲೆಬರಿ! ಸಂಸಾರಾಂತ್ಲ್ಯಾ ಸರ್ವ್ ದುಬ್ಳ್ಯಾಂಚ್ಯಾ ಏಕ್ ಪಾವ್ಟಿಂಚ್ಯಾ ಭುಕೆಕ್ ಆಖ್ಖ್ಯೆ ಪವಿತ್ರ್ ಸಭೆಚಿ ಗ್ರೇಸ್ತ್‍ಕಾಯ್ ಪಾವತ್. ಪುಣ್ ದುಬ್ಳೊ ಫಾಲ್ಯಾಂ ಪರತ್ ಭುಕೆತಾ! ಆಸ್‍ಲ್ಲ್ಯಾಂನಿ ದುಬ್ಳ್ಯಾಂಸಂಗಿಂ ವಾಂಟುನ್ ಘೆನಾಸ್ತಾಂ ಉಬ್ಜಾಯಿಲ್ಲೆಂ ಖರ್ಗ್ ಹೆಂ ನ್ಹಯ್‍ಗಿ?!

ಪವಿತ್ರ್ ಸಭೆಲಾಗಿಂ ಆಸ್ಚಿಂ ಇಸ್ಕೊಲಾಂ, ಆಸ್ಪತ್ರ್ಯೊ, ವಿಧ್ಯಾ ಸಂಸ್ಥೆ, ಅನಾಥ್ ಆಸ್ರೆ, ಪ್ರಾಯೆಸ್ತಾಂಚಿ ಘರಾಂ ಕೆದಾಳಾಯ್ ದುಡ್ವಾನ್ ಭರ್ಚಿಂ ತುಪಿಂ ನ್ಹಯ್. ಥೊಡ್ಯಾ ಸ್ಥಳೀಯ್ ಪವಿತ್ರ್ ಸಭೆಂನಿ ಅಸಲ್ಯಾ ಸಂಸ್ಥ್ಯಾಂಥಾವ್ನ್ ಮುನಾಫೆÇ ಮೆಳ್ಚೆ ತಿತ್ಲೊ ಆನಿಥೊಡ್ಯಾ ಸ್ಥಳೀಯ್ ಪವಿತ್ರ್ ಸಭೆಂನಿ ಮೆಳಾನಾ. ಎಕಾ ದೋನ್ ಸಂಸ್ಥ್ಯಾಂತ್ ಜಾಂವ್ಚ್ಯಾ ಮುನಾಫ್ಯಾಕ್ ಪಳೆವ್ನ್ ಸಕ್ಕಡ್ ಪೆÇಟಾರ್ ಪಾಂಯ್ ದವರ್ನ್ ಜಿಯೆತಾತ್ ಮ್ಹಳ್ಯಾರ್ ತೆಂ ನೆಣಾರಿ ಚಿಂತಾಪ್. ತಿತ್ಲ್ಯಾಕ್‍ಯೀ ಹೆ ಸಂಸ್ಥೆ ಅರ್ಥಿಕತೆಂತ್ ವಾಡೊಂಕ್ ಉಭಾರ್‍ಲ್ಲೆ ಖಂಡಿತ್ ನ್ಹಯ್, ಬಗಾರ್ ಸೆವೆಚ್ಯಾ ಸ್ಪಿರಿತಾನ್ ಭಾಂದ್ಲಲೆ. ಸೀಮಿತ್ ತಾಂಕಿ ಭಿತರ್ ಸೆವಾ ಖಂಡಿತ್ ಜಾತಾ. ಹಾಂವೆಂ ಮಾಗ್‍ಲ್ಲೆಂ ಸಕ್ಕಡ್ ಮೆಳಾಜೆ, ಫುಂಕ್ಯಾಕ್ ಮೆಳಾಜೆ ಮ್ಹಣ್ ಪವಿತ್ರ್ ಸಭೆಕಡೆ ಝಗಡ್ಚೆ ಜಾಯ್ತೆ ಪಾವ್ಟಿಂ ಚಾರ್ ಕಾಸ್, ಇಲ್ಲಿ ಸೆವಾ ಹಾತ್ ಉಕಲ್ನ್ ದಿಲ್ಲೆ ನಾಂತ್! ಪವಿತ್ರ್ ಸಭೆಚ್ಯಾ ವ್ಹಡಿಲಾಂಕಡೆ ಮ್ಹಾಕಾ ಮೆಳ್ಳೆಂನಾ ಮ್ಹಣ್ ಝಗಡ್ತಾತ್ ತಿಂಚ್ ಸರ್ಕಾರಾಕಡೆ ಝಗ್ಡುಂಕ್ ವ್ಹಚಾನಾಂತ್ ಕಿತ್ಯಾ? ಸರ್ಕಾರ್ ಅಲ್ಪ್ ಸಂಖ್ಯಾತಾಂಕ್ ಮ್ಹಣ್‍ಚ್ ಸ್ಕೀಮಾ ದಿತಾ, ಪುಣ್ ಥಂಯ್ ವ್ಹಚೊನ್ ಇಲ್ಲೆ ಕಶ್ಟ್ ಕಾಡ್ನ್ ತಿ ಸೆವಾ ಘೆಂವ್ಕ್ ಮರ್ಯಾದಿಚಿ ಆಡ್ಕಳ್! ಥೊಡ್ಯಾ ಫಿರ್ಗಜಾಂನಿ ವಿಶೆಂತ್ ಪಾವ್ಲ್ ಸಭಾ ನಿಜಾಕ್‍ಯೀ ಉರ್ಭೆನ್ ದುಬ್ಳ್ಯಾದಾಕ್ಟ್ಯಾಂಚೆ ಪಕ್ಶೆಕ್ ರಾವೊನ್ ಆಧಾರ್ ದಿತಾ. ಪುಣ್ ಮ್ಹಜ್ಯಾ ಗುಮಾನಾಕ್ ಆಯಿಲ್ಲೆ ಪರ್ಮಾಣೆಂ, ಆಶೆಂ ಕುಮೊಕ್ ಮೆಳ್‍ಲ್ಲಿ ವರ್ಸಾಂ ವರ್ಸಾಂ ಉಭೊನ್ ಘೆಲ್ಯಾರ್‍ಯೀ ಕಿತ್ಲಿಶಿಂ ಜಣಾಂ ದುಬ್ಳಿಂಚ್ ಉರ್ತಾತ್ ಕಿತ್ಯಾ? ವರ್ಸಾನ್ ವರ್ಸಾ ತಿಂಚ್ ದುಬ್ಳಿಂ, ತಾಂಕಾಂಚ್ ಆಧಾರ್, ತಾಂಚೊಚ್ ಪೋಸ್! ತರ್ ತಾಣಿಂ ಆಪ್ಲ್ಯಾ ಪಾಂಯಾರ್ ರಾಂವ್ಚಿ ಗರ್ಜ್‍ಚ್ ನಾ? ಸಭಾರಾ ವರ್ಸಾಂಚ್ಯೆ ಕುಮ್ಕೆ ಉಪ್ರಾಂತ್ ಕುಟಮ್ ಆತಾಂ ಆಪ್ಲ್ಯಾ ಪಾಂಯಾರ್ ಉಭೆಂ ರಾವೊಂಕ್ ಸಕ್ತಾ ಮ್ಹಣ್ ಸಭೆನ್ ಕುಮೊಕ್ ರಾವಯ್ಲ್ಯಾರ್ ‘ಆಮ್ಕಾಂ ಸೊಡ್ನ್ ಘಾಲೆಂ’ ಮ್ಹಣ್ ತೋಂಡ್ ಫುಗಂವ್ಚಿ ಕಾಲೆತ್ ಚಡ್ ದಿಸ್ತಾ ನ್ಹಯ್? ತಾಣಿಂ ಸಭೆಕ್‍ಚ್ ಅಂಟೊನ್ ರಾಂವ್ಚೆಂ? ವಾ ಮೆಳ್‍ಲ್ಲೆ ಕುಮ್ಕೆನ್ ಸಶಕ್ತ್ ಜಾವ್ನ್ ಫಾಲ್ಯಾಂ ತಾಂಚೆ ಬರಿಚ್ ಆಸ್ಲಲ್ಯಾಕ್ ಕುಮೊಕ್ ಕರುಂಕ್ ಆಸಾ? ಆಪ್ಣಾಕ್ ಸಭಾ ಪೆÇಸ್ತಾ ಮ್ಹಣ್ ಅಶಕ್ತ್‍ಪಣಾಂತ್ ಪರಮ್ ಆನಂದ್ ಭೊಗ್ಚೆಂ ಖಂಡಿತ್ ಸೊಭಾನಾ! 

ದುಬ್ಳ್ಯಾಧಾಕ್ಟ್ಯಾಂಕ್ ಸಶಕ್ತ್ ಕರ್ಚೆಂ ಕಾಮ್ ಪವಿತ್ರ್ ಸಭೆಚ್ಯಾ ವ್ಹಡಿಲಾಂಕ್ ಕಿತ್ಲೆಂ ಭಾಂದ್ತಾಗೀ ತಿತ್ಲೆಂಚ್ ಸಶಕ್ತ್ ಜಾಲ್ಲ್ಯಾ ದುಬ್ಳ್ಯಾಂಕ್‍ಯಿ ಸಭೆಂತ್ ಮೆಳೊನ್ ಸೆವಾ ದಿಂವ್ಚಿ ಜವಾಬ್ದಾರಿ ಆಸಾ. ಅಸಲೆಂ ಚಿಂತಾಪ್ ಬಳ್ ಜಾಂವ್ ಆನಿ ತವಳ್ ಪವಿತ್ರ್ ಸಭೆಂತ್ ಆಸೊನ್‍ಯೀ ‘ತಿ ಪಕ್ಶಾಪಾತಿ’ ಮ್ಹಣ್ಚೆ ಪ್ರಾಸ್ ‘ಆಮಿಂಚ್ ದುಬ್ಳ್ಯಾಂಚಿ ಕಿತ್ಲ್ಯಾ ಮಾಪಾನ್ ಪಕ್ಶಾ ಘೆವ್ಯೆತ್’ ಹಾಚಿ ಜಾಣ್ಕಾರಿ ಜರೂರ್ ಆಮ್ಕಾಂ ಮೆಳ್ತಲಿ.  

ಲೇಕನ್: ನಬಾಜೆ - ನವೆಂಬರ್ 2016:

“ದುಬ್ಳ್ಯಾಂಖಾತಿರ್ ದುಬ್ಳಿ ಜಾಲ್ಲಿ ಪವಿತ್ರ್ ಸಭಾ 

ಪಳೆಂವ್ಕ್ ಹಾಂವ್ ಕಿತ್ಲೊ ಆಶೆತಾಂ!”

“ದುಬ್ಳೊ, ಫಕತ್ ದುಬ್ಳೊ ದೆಕುನ್ ತಾಚೆಂ ಲುಟಿನಾಕಾ. ಶ್ಹೆರಾಚ್ಯಾ ದಾರ್ವಾಟ್ಯಾಕಡೆ ಗರ್ಜೆವಂತಾಕ್ ದಗ್ದಿನಾಕಾ. ಕಿತ್ಯಾಕ್ ಸರ್ವೆಸ್ಪರ್ ತಾಂಚೊ ಪಕ್ಶ್ ಘೆತಾ ಆನಿ ತಾಂಚೆಂಲುಟ್ತಲ್ಯಾಂಚೊ ಜೀವ್ ತೊ ಲುಟ್ತೊಲೊ” ಮ್ಹಣ್ಣ್ಯಾಂಚ್ಯಾ ಪುಸ್ತಕಾಂತ್ ಮೆಳ್ಚಿಂ ಉಜ್ಯಾಚ್ಯಾ ಕೆಂಡಾಂಬರಿ ಚತ್ರಾಯ್ ದಿಂವ್ಚಿಂ ಉತ್ರಾಂ ಹಿಂ.

ಹ್ಯಾ ಉತ್ರಾಂಚಿ ಗಂಭೀರತಾ ಜೆಜುನ್ ಮನಿಸ್ ಜಾಲ್ಲ್ಯಾ ಮಿಸ್ತೆರಾಂತ್‍ಚ್ ಝಳ್ಕತಾ. ದೇವ್ ತೊ ತರ್‍ಯೀ ತಾಣೆಂ ಮನ್ಶ್ಯಾಚೆಂ ರೂಪ್ ಘೆತ್‍ಲ್ಲೆಂ ನ್ಹಯ್, ನೀಜ್ ಮನಿಸ್ ತೊ ಜಾಲೊ! ಆಪ್ಲ್ಯೆ ಪರ್ಗಟ್ ಜಿಣಿಯೆಚ್ಯೆ ಸುರ್ವೆಕ್‍ಚ್ ಇಸಾಯಿಯಾಚ್ಯಾ ಕೊವ್ಳ್ಯಾಂತ್ಲಿಂ ಉತ್ರಾಂ ವಿಂಚುನ್, “ದುರ್ಬಳ್ಯಾಂಕ್ ಬರಿ ಖಬರ್ ಪರ್ಗಟ್ಚ್ಯಾಕ್ ಮ್ಹಾಕಾ ವಿಂಚ್ಲಾ” ಮ್ಹಣ್ ಆಪ್ಣಾಚೆಂ ಮಿಸಾಂವ್ ಸ್ಪಶ್ಟ್ ಕೆಲೆಂ.

ಹೆಂ ಮಿಸಾಂವ್ ಶಿಸಾಂನಿಯ್ ಉಕ್‍ಲ್ನ್ ಧರ್‍ಲ್ಲೆಂ ಆಸಾ. ಸುರ್ವಿಲ್ಯೆ ಪವಿತ್ರ್ ಸಭೆಂತ್ ಕೊಣ್‍ಚ್ ಗರ್ಜೆವಂತ್ ಆಸೊಂಕ್ ನಜೊ, ದುಬ್ಳೊ ಮ್ಹಳ್ಳೆಖಾತಿರ್ ಲಜ್ ಭೊಗುಂಕ್ ನಜೊ ದೆಕುನ್ ‘ಸಕ್ಕಡ್ ಸಮಾನ್’ ಮ್ಹಳ್ಳೆಂ ಚಿಂತಪ್ ರುತಾ ಕರ್ಚ್ಯಾಕ್ ಶಿಸಾಂನಿ ಆನಿ ಭಾವಾಡ್ತಿ ಲೊಕಾನ್ ಆಪ್ಣಾಚೆಂ ಮ್ಹಣ್ ಆಸ್‍ಲ್ಲೆಂ ವಿಕುನ್ ಮೆಳ್‍ಲ್ಲೊ ಐವಜ್ ಗರ್ಜೆವಂತಾಂಕ್ ಮ್ಹಣ್ ಅರ್ಪಿಲ್ಲೊ ಆಮಿ ಆಯ್ಕಾತಾಂವ್.

ಪುಣ್ ವರ್ಸಾಂ ಉಬ್ತಾನಾ, ರಾಯ್ ಕೊನ್ಸ್‍ಟೆಂಟಾಯ್ನಾಚ್ಯಾ ಪೊದೊರ್ನ್‍ಪಣಾಕ್ ಲಾಗೊನ್ ಪವಿತ್ರ್ ಸಭಾ ಗಿರೇಸ್ತ್ ಜಾಲಿ ಆನಿ ಗ್ರೇಸ್ತಾಂಚಿಚ್ ಆಸ್ತ್ ಜಾವ್ನ್ ವಾಡ್ಲಿ. ದುಬ್ಳೊ ಪವಿತ್ರ್ ಸಭೆಚಿ ಆಸ್ತ್ ಮ್ಹಳ್ಳೆಂ ಚಿಂತಪ್ ಪುಸುನ್ ಕಾಡ್ಲೆಂ. ದುಬ್ಳ್ಯಾಚಿ, ಗರ್ಜೆವಂತಾಂಚಿ ವೀದ್‍ವಾವ್ಳಿ ಜಾಲಿ! ಪವಿತ್ರ್ ಸಭಾ ಮ್ಹಳ್ಯಾರ್ ಮಂತನಾಚಿಂ ಕುಟ್ಮಾಂ, ಗೊವ್ಳಿ ಆನಿ ತಾಂಚೊ ದಳ್ಬಾರ್ ಶಿವಾಯ್ ದುಬ್ಳೊ ಲೆಕಾಭಾಯ್ಲೊ ಜಾಲೊ!

ಸರ್ವೆಸ್ಪರ್ ತೊ ಜಿವೊ ದೇವ್. ತೊ ವೆಳಾಕಾಳಾಕ್ ಸರಿ ಜಾವ್ನ್ ಪ್ರವಾದ್ಯಾಂಕ್ ಉಬ್ಜಯ್ತಾ. ತಾಚೆಂ ಸಪಣ್ ತೊ ತ್ಯಾ ಪ್ರವಾದ್ಯಾಂಥಂಯ್ ರೊಯ್ತಾ ಆನಿ ಉದಕ್ ಈಟ್ ವೊತುನ್ ಫಳ್ ದೀಶೆಂ ಕರ್ತಾ. ಪ್ರಸ್ತುತ್ ಕಾಳಾರ್ ಅಸಲೊ ಏಕ್ ಪ್ರವಾದಿ ಸರ್ವೆಸ್ಪರಾನ್ ಆಮ್ಕಾಂ ಪಾಟಯ್ಲಾ ಆನಿ ಅಖ್ಖ್ಯೆ ಪವಿತ್ರ್ ಸಭೆಚೆಂ ಸುಂಕಾಣ್ ತಾಚೆ ಹಾತಿಂ ದಿಲಾಂ. ನಾಂವಾನ್‍ಚ್ ತೊ ದುಬ್ಳ್ಯಾಂಚೆ ಪಕ್ಶೆಚೊ ಕಶೆಂ ದಿಸೊನ್ ಯೆತಾ ಮಾತ್ರ್ ನ್ಹಯ್ ಕಾರ್ಯಾನ್ ತೊ ದುಬ್ಳೊ ಮುಕೆಲಿಚ್ ಸಯ್!

ನಾಂವ್ ಆನಿ ಮಿಸಾಂವಾಚೊ ದಿಶ್ಟಾವೊ ಒಳ್ಕಲ್ಲೊ ಪಾಪಾ

ಸುಮಾರ್ 5,000 ಪತ್ರ್‍ಕರ್ತಾಂಕ್ ಉದ್ದೇಸುನ್ ಏಕ್ ಪಾವ್ಟಿಂ ಉಲಯ್ತಾನಾ, “ತುಮಿ ಫ್ರಾನ್ಸಿಸ್ ಮ್ಹಳ್ಳೆಂ ನಾಂವ್ ಕಿತ್ಯಾಕ್ ಪಸಂದ್ ಕೆಲೆಂ?” ಮ್ಹಳ್ಳೆಂ ಸವಾಲ್ ಜಮ್ಯಾಥಾವ್ನ್ ಉಬೊನ್ ಆಯ್ಲೆಂ. ಪಾಪಾನ್ ಏಕ್ ಘಡಿತ್ ವಿವರಿಲೆಂ. ತೊ ಅರ್ಜೆಂಟಿನಾಚೊ ಕಾಡ್ದಿನಾಲ್ ಜಾವ್ನಾಸ್ಲೊ. ಬಾಪ್ತಿಜ್ಮಾನ್ ತಾಚೆಂ ನಾಂವ್ ಆಸ್ಲೆಂ, ಜೊರ್ಜ್ ಮಾರಿಯೊ ಬರ್ಗೊಗ್ಲಿಯೊ. ತ್ಯಾ ದೀಸ್ ಪಾಪಾಚ್ಯೆ ವಿಂಚ್ಣುಕೆಕ್ ಗುಪಿತ್ ಮತ್ ಲೇಕ್ ಕರ್ತಾನಾ ಪಾಪಾ ಮ್ಹಣಾಲೊ, “ಹಾಂವ್ ಕಾಡ್ದಿನಲ್ ಕ್ಲಾವ್ದಿಯೊಚ್ಯಾ ಬಗ್ಲೆಕ್ ಬಸೊನ್ ಆಸ್ಲೊಂ”. ಸಗ್ಳೆ ಮತ್ ಆಪ್ಣಾಶಿಂ ಘುಂವ್ತಾನಾ, ಆನಿ ಆಪ್ಣಾಚೆರ್ ವಿಂಚವ್ಣ್ ಪಡ್ತಾ ಮ್ಹಣೊನ್ ಕಳ್ತಾನಾ ಕಾಡ್ದಿನಲ್ ಕ್ಲಾವ್ದಿಯೊನ್ ಪೊಟ್ಲುನ್ ಧರ್ನ್ ಮ್ಹಳ್ಳೆಂ, “ದುಬ್ಳ್ಯಾಂಕ್ ವಿಸ್ರಾನಾಕಾ”.“ಆನಿ ತೆಂ ಉತರ್ ಮ್ಹಜ್ಯೆ ಮತಿಂತ್ ಘುಂವೊಂಕ್ ಸುರು ಜಾಲೆಂ.. ದುಬ್ಳೊ.. ದುಬ್ಳೊ.. ಆನಿ ಹೆಂಚ್ ಚಿಂತುನ್ ಆಸ್ತಾನಾ ಮತಿಕ್ ಆಯ್ಲೊ ಸಾಂ. ಫ್ರಾನ್ಸಿಸ್ ಹಾಂವೆಂ ಚಿಂತ್ಲೆಂ ಹ್ಯಾ ನಾಂವಾಕ್ ಆನಿ ವಾಂಜೆಲಾಂತ್ಲ್ಯಾ ಜೆಜುಚ್ಯಾ ಮಿಸಾಂವಾಕ್ ಬರೆಂ ತಾಳ್ ಪಡ್ತಾ”.

ತ್ಯಾ ಉಪ್ರಾಂತ್ ಸಬಾರಾಂನಿ ವೆವೆಗ್ಳಿಂ ನಾಂವಾಂ ಸುಚಾಯ್ಲಿಂ ಕಂಯ್ ಮ್ಹಣ್ತಾ ಪಾಪಾ. ಕೊಣೆಂಗೀ ಆಡ್ರಿಯನ್ ಸವೊ (15ವ್ಯಾ ಶತಮಾನಾಚೊ ಪಾಪಾ) ಹಾಚೆಂ ನಾಂವ್ ಘೆ ಮ್ಹಳೆಂ. ಕಾರಣ್, ತ್ಯಾ ಪಾಪಾಕ್ ಲಜೆಕ್ ಘಾಲುಂಕ್! ಕಿತ್ಯಾಕ್ ಮ್ಹಳ್ಯಾರ್ 15ವ್ಯಾ ಶತಮಾನಾಂತ್ ಜೆಜ್ವಿತಾಂಚಿ ಸಭಾಚ್ ಹ್ಯಾ ಪಾಪಾನ್ ನಿರ್ನಾಮ್ ಕೆಲ್ಲಿ! ಆತಾಂ ತ್ಯಾಚ್ ಸಭೆಚೊ ಪಾಪಾ ಜಾಲಾ!

ಪಾಪಾ ಮ್ಹಣಾಲೊ, “ಪವಿತ್ರ್ ಸಭೆಚೆಂ ಕೇಂದ್ರ್ ಜೆಜು ಕ್ರೀಸ್ತ್ ಆನಿ ನ್ಹಯ್ ಸಾಂ. ಪೆದ್ರುಚೊ ಉತ್ತರಾಧಿಕಾರಿ!”. “ಸಕ್ಡಾಕ್‍ಯಿ ಕ್ರೀಸ್ತಾಲಾಗಿಂ ವ್ಹಚಾಜೆ. ತಾಚೆ ಶಿವಾಯ್ ಉತ್ತರಾಧಿಕಾರಿ ಜಾಂವ್, ಪವಿತ್ರ್ ಸಭಾ ಜಾಂವ್ ಅಸ್ತಿತ್ವಾಂತ್ ನಾ!”

ಕಿತ್ಲಿ ಸ್ಪಶ್ಟ್ ಆನಿ ಗುಂಡಾಯೆಚಿ ಸಮ್ಜಣಿ ಪಾಪಾ ಫ್ರಾನ್ಸಿಸಾಚಿ! ಎದೊಳ್ ವರೇಗ್ ಯಾಜಕೀ ದಳ್ಬಾರಾಚ್ಯೆ ದಿಶ್ಟಿನ್ ಪವಿತ್ರ್ ಸಭೆಕ್ ಪಳವ್ನ್ ಆಸ್‍ಲ್ಲ್ಯಾಂಕ್ ಏಕ್ ಧಾಗ್ ನ್ಹಯ್‍ಗಿ? ಹಿ ಪವಿತ್ರ್ ಸಭಾ ಜೆಜುಚಿ ಆನಿ ಜೆಜು ದುಬ್ಳ್ಯಾಂಕ್ ಬರಿ ಖಬರ್ ಹಾಡ್ನ್ ಆಯಿಲ್ಲೊ. ತರ್, “ದುಬ್ಳಾಂಖಾತಿರ್ ದುಬ್ಳಿ ಜಾಲ್ಲಿ ಪವಿತ್ರ್ ಸಭಾ ಪಳಂವ್ಕ್ ಹಾಂವ್ ಕಿತ್ಲೊಂ ಆಶೆತಾಂ!” ಅಶೆಂ ಉದ್ಗಾರ್ತಾ ಆನಿ ಭರ್ವಸ್ತಾ ಪಾಪಾ ಫ್ರಾನ್ಸಿಸ್.

ದುಬ್ಳ್ಯಾಂಚೊ ಮೋಗ್: ಕಮ್ಯೂನಿಸ್ಟ್ ಚಿಂತಪ್ ವಾ ವಾಂಜೆಲಾಚಿ ಶಿಕವ್ಣ್?

ಪವಿತ್ರ್ ಸಭಾ ದುಬ್ಳ್ಯಾಂಚಿ ಜಾಯ್ಜೆ, ದುಬ್ಳ್ಯಾಂಕ್ ಲಾಗಿ ಹಾಡ್ಚಿ ಜಾಯ್ಜೆ ದೆಕುನ್ ಗೊವ್ಳ್ಯಾಂನಿಚ್ ದುಬ್ಳಿಕಾಯೆಚಿ ಆನಿ ಸಾದ್ಯಾ ಜಿವಿತಾಚಿ ವಿಂಚವ್ಣ್ ಕರಿಜೆ ಮ್ಹಣ್ ಉಗ್ತ್ಯಾನ್ ಪಾಪಾ ಫ್ರಾನ್ಸಿಸಾನ್ ಸಾಂಗ್ಲೆಂ ಮಾತ್ರ್ ನ್ಹಯ್ ಥೊಡ್ಯಾ ಕಾಡ್ದಿನಲಾಂಕ್ ಐಶಾರಾಮಿ ಆಫಿಸಾಥಾವ್ನ್ ಭಾಯ್ರ್ ಕಾಡ್ಲೆಂ! ಹೆಂ ಕ್ರಾಂತಿಕಾರಿ ಮೇಟ್ ಪಳಲ್ಲ್ಯಾ ಸಬಾರಾಂನಿ ಪಾಪಾಕ್ ದುಬ್ಳ್ಯಾವಯ್ಲೊ ಮೋಗ್ ಕಮ್ಯುನಿಸ್ಟ್ ಕಾಲೆತಿಚೊ ಮ್ಹಣ್ ಗಾಬ್ ಪ್ರಸಾರುಂಕ್ ಸುರು ಕೆಲಿ. ಹಾಕಾ ಪಾಪಾಚಿ ಜಾಪ್ ಸ್ಪಶ್ಟ್ ಆಸಾ. ತೊ ಮ್ಹಣ್ತಾ, “ಜರ್ ಹಾಂವ್ ದುಸ್ರ್ಯಾ ವಾ ತಿಸ್ರ್ಯಾ ಶತಮಾನಾಚ್ಯಾ ಪವಿತ್ರ್ ಸಬೆಚ್ಯಾ ಶಿಕವ್ಣಾದಾರಾಂಚ್ಯಾ ಪುಸ್ತಕಾಂತ್ಲ್ಯೊ ಥೊಡ್ಯೊ ವೊಳಿ ವಿಂಚುನ್ ಶೆರ್ಮಾಂವಾಂತ್ ಸಾಂಗಿನ್ ತರ್ ಜಾಯ್ತೆ ಮ್ಹಣೊಂಕ್ ಪುರೊ, ಹಾಚೆ ಶೆರ್ಮಾಂವ್ ಮಾಕ್ರ್ಸ್‍ವಾದಿ ಕಾಲೆತಿಚೆ!”. ಸಾಂ. ಅಂಬ್ರೊಸ್, ಸಾಂ. ಜುವಾಂವ್ ಕ್ರಿಸ್ತೊಸ್ತಮ್ ಹಾಣಿಂ ಪವಿತ್ರ್ ಸಭೆಚ್ಯಾ ಸುರ್ರ್ವಿಲ್ಯಾ ದಿಸಾಂಚ್ಯೆ ದುಬ್ಳಿಕಾಯೆವಿಶಿಂ ಆನಿ ಕಶೆಂ ದುಬ್ಳೊ ಪವಿತ್ರ್ ಸಭೆಚಿ ಆಸ್ತ್ ಜಾವ್ನಾಸ್ಲೊ ಹೆಂ ಬರವ್ನ್ ಘಾಲಾಂ. ಪಾಪಾ ಮ್ಹಣ್ತಾ, “ದುಬ್ಳ್ಯಾಂಚೆರ್ ಹುಸ್ಕೊ, ಹಾಂವೆಂ ಸೊಧುನ್ ಕಾಡ್‍ಲ್ಲೆಂ ನವೆಸಾಂವ್ ನ್ಹಯ್. ವಾಂಜೆಲಾಂತ್ಲ್ಯಾ ಪಾನಾಂ ಪಾನಾಂನಿ ಹೆಂ ಆಸಾ. ಪವಿತ್ರ್ ಸಬೆಚ್ಯಾ ಸಂಪ್ರದಾಯಾಂತ್ ಆಸಾ. ದೆಕುನ್ ಹೆಂ ಕಮ್ಯೂನಿಸಂ ನ್ಹಯ್. ದುಬ್ಳ್ಯಾಚಿ ಆನಿ ದಲಿತಾಂಚಿ ಪಾಡ್ತ್ ಘೆಂವ್ಚಿ ಪವಿತ್ರ್ ಪುಸ್ತಕಾಂತ್ಲ್ಯಾ ವಾಂಜೆಲಾಂತ್ಲೆಂ ಚಿಂತಪ್”.

ವಸ್ತು ನಿಶ್ಟ್ (objective) ಆನಿ ವೈಯಕ್ತಿಕ್ (subjective) ದುಬ್ಳಿಕಾಯ್:

ಮನಿಸ್ ದೋನ್ ರಿತಿಂನಿ ದುಬ್ಳೊ ಆಸೊಂಕ್ ಸಕ್ತಾ. ಎಕ್ಲ್ಯಾಕ್ ಮುಳಾವ್ಯಾ ಸವ್ಲತಾಯಾಂಚಿ ಕಮೀ ಆಸಾ ವಾ ತಿ ನಾಂಚ್, ತರ್ ತಿ ವಸ್ತುನಿಶ್ಟ್ ದುಬ್ಳಿಕಾಯ್. ತೊ ಆಪ್ಣಾಚೆಂ ಜೀವನ್ ಎಕಾ ಮನ್ಶ್ಯಾಚ್ಯೆ ಘನತೆಕ್ ಸರಿ ಜಾವ್ನ್ ಜಿಯೆಂವ್ಕ್ ಸಕನಾ ತ್ಯೆ ಸ್ಥಿತೆರ್ ಆಸಾ.

ಆನ್ಯೇಕೆ ವಾಟೆನ್ ಮನಿಸ್ ಆಪ್ಲ್ಯೆ ವಿಂಚವ್ಣೆಕ್ ಲಾಗೊನ್ ದುಬ್ಳೊ ಜಾಲ್ಲೊ ಆಸ್ಯೆತ್. ಸ್ವತಾ ಜಾವ್ನ್ ಆಪ್ಣಾಕ್ ಸಂಸಾರಾಚಿ ಗ್ರೇಸ್ತ್‍ಕಾಯ್ ನಾಕಾ ಮ್ಹಣ್ ಆಂತರಿಕ್ ಸ್ವತಂತ್ರಾಯೆನ್ ಜಿಯೆಂವ್ಚ್ಯಾಕ್ ಆನಿ ಖಂಯ್ಚ್ಯಾಯ್ ವಸ್ತುಂಕ್ ಲಬ್ದೊನ್ ಜಿಯೆನಾಸ್ತಾಂ ರಾಂವ್ಚ್ಯಾಕ್ ಘೆತ್‍ಲ್ಲ್ಯಾ ನಿರ್ಧಾರಾನ್ ತೊ ದುಬ್ಳಿಕಾಯ್ ವಿಂಚ್ತಾ. ಆತಾಂ, ಪಾಪಾ ಫ್ರಾನ್ಸಿಸ್ ಹ್ಯಾ ದುಸ್ರ್ಯೆ ಸ್ಥರಾಚ್ಯೆ ದುಬ್ಳಿಕಾಯೆಕ್ ಚಡ್ ಭೊರ್ ದೀವ್ನ್ ಉಲಯ್ತಾ. ಐಶಾರಾಮಿ ಜಿವಿತಾಕ್ ಲಬ್ದಲ್ಲ್ಯಾ ರಾಶ್ಟ್ರಾಂಕ್ ಜಾಗವ್ನ್ ಕೋಣ್ ನಿಜಾಯ್ಕಿ ಮುಳಾವ್ಯಾ ಸವ್ಲತಾಯಾಂಖಾತಿರ್ ಕಶ್ಟಾತಾ, ತಾಂಚೆರ್ ದಯಾ ದಾಕಂವ್ಚ್ಯಾಕ್ ತೊ ಉಲೊ ದಿತಾ.

ಪವಿತ್ರ್‍ಸಭೆನ್ ದುಬ್ಳಿಕಾಯೆಚಿ ವಿಂಚವ್ಣ್ ಕರಿಜೆ ಮ್ಹಣ್ತಾಸ್ತಾನಾ, ‘ಸಗ್ಳೆಂ ವಿಕುನ್ ಸೊಡಾ’ ಮ್ಹಳ್ಳೊ ಸಂದೇಶ್ ನ್ಹಯ್ ಪಾಪಾಚೊ. ದುಬ್ಳಿಕಾಯೆಕ್ ವಿಂಚ್ಚೆಂ ಮ್ಹಳ್ಯಾರ್ ‘ಪಾಪರ್’ ಜಾಂವ್ಚೆಂ ವಾ ಭಿಕಾರಿ ಜಾಂವ್ಚೆಂ ಮ್ಹಣ್ ನ್ಹಯ್. ದುಬ್ಳಿ ಪವಿತ್ರ್ ಸಭಾ ಮ್ಹಳ್ಯಾರ್, ಆಪ್ಣಾಚೆ ತಾಬೆನ್ ಆಸ್ಚ್ಯಾ ವಸ್ತುಂಚಿ ಗಿರೆಸ್ತ್‍ಕಾಯ್ ವಾಂಜೆಲಾಚ್ಯೆ ಶಿಕವ್ಣೆಕ್ ಸರಿ ಜಾವ್ನ್ ಜಿಯೆಂವ್ಚ್ಯಾಕ್ ವಾಪಾರ್ಚಿ ಆನಿ ಆಮಿ ಜಾಣಾ ಜಾಯ್ಜೆ, ವಾಂಜೆಲಾಚ್ಯೆ ಶಿಕವ್ಣೆಚೊ ಅಗಾಧ್ ವಾಂಟೊ ಪೆಲ್ಯಾಚೊ ಹುಸ್ಕೊ ಆನಿ ಗರ್ಜೆವಂತಾಚ್ಯೆ ಜತ್ನೆಚೆರ್ ಆಸಾ. ದೆಕುನ್ ಪವಿತ್ರ್ ಸಭೆಂತ್ಲ್ಯಾ ಹರ್ಯೆಕಾ ದುಬ್ಳ್ಯಾಕ್ ಪಾಪಾಚೊ ಶೀದಾ ಉಲೊ ಆಸೊ ಆಸಾ- “ತುಮ್ಚೊ ಭರ್ವಸೊ ಖಂಯ್ಚ್ಯಾಯ್ ಕಾರಣಾಕ್ ಲುಟುನ್ ವಚೊಂಕ್ ದೀನಾಕಾತ್! ಕೋಣ್ ತುಮ್ಚೊ ಭರ್ವಸೊ ಲುಟ್ತಾ? ಹ್ಯಾ ಸಂಸಾರಾಚೊ ವೊಸೊ, ಗ್ರೇಸ್ತ್‍ಕಾಯ್, ಪೊಕ್ಳೆಂಪಣ್, ಹಂಕಾರ್... ಹೆಂ ಸಗ್ಳೆಂ ತುಮ್ಚೊ ಭರ್ವಸೊ ಚೊರ್ತಾ. ತುಮಿ ತರ್ ಭರ್ವಸೊ ಕೊಣಾಥಂಯ್ ಸೊಧ್ಚೊ? ದುಬ್ಳ್ಯಾ ಜೆಜು ಥಂಯ್, ಆಮ್ಚೆಖಾತಿರ್ ದುಬ್ಳೊ ಜಾಲ್ಲ್ಯಾ ಜೆಜುಥಂಯ್! ದೊಳ್ಯಾಂಕ್ ದಿಸನಾತ್ಲ್ಯೆ ದುಬ್ಳಿಕಾಯೆವಿಶಿಂ ಉಲಂವ್ಕ್ ಸಾಧ್ಯ್ ನಾ. ದುಬ್ಳೊ ಜೆಜು ದಿಸನಾ ಮ್ಹಣನಾಕಾತ್! ಭುಕೆಲ್ಲ್ಯಾ ಹರ್ಯೆಕಾ ಬಾಳಾಥಂಯ್, ಪಿಡೆಸ್ತಾಥಂಯ್, ಸಾಮಾಜಿಕ್ ಆನಿ ಧಾರ್ಮಿಕ್ ದಳ್ಬಾರ್‍ಪಣಾಕ್ ಸಾಂಪ್ಡಾಲ್ಲ್ಯಾಂಥಂಯ್ ಜೆಜುಚಿ ಕೂಡ್ ಆಸಾ. ವಚ್ ಆನಿ ಪಳೆ ತ್ಯೆ ಕುಡಿಕ್”. (ಪ್ರಸಂಗ್, ಜೂನ್ 7, 2013)

ಜ್ಯಾ ಕೊಣೆಂ ದುಬ್ಳಿಕಾಯೆಚಿ ಆಂಗವ್ಣ್ ಘೆತ್ಲ್ಯಾ ತಾಣಿಂ ಪಾಪಾ ಫ್ರಾನ್ಸಿಸಾಚ್ಯಾ ಹ್ಯಾ ಉತ್ರಾಂಕ್ ಇಲ್ಲೆಂ ಗುಮಾನ್ ದಿಂವ್ಚೆಂ ಬರೆಂ-“ದುಬ್ಳಿಕಾಯ್ ಕೊಣೆಂ ‘ವ್ಯೆಯುಕ್ತಿಕ್ ಗಜಾಲ’ ಮ್ಹಣ್ ಪಾಳುಂಕ್ ಜಾಯ್ನಾ. ತುಮ್ಚ್ಯಾ ರುಲಿಪುಸ್ತಕಾಂತ್ ಛಾಪ್ಲಾಂ ದೆಕುನ್ ಪಾಳ್ಚೆಂಯ್ ವ್ಹೆರ್ಥ್. ದುಬ್ಳಿಕಾಯ್ ಕಿತೆಂ ಮ್ಹಣ್ ದುಬ್ಳ್ಯಾ ಕ್ರೀಸ್ತಾಚಿ ಕೂಡ್ ಭುಕೆಲ್ಲ್ಯಾ, ಭಿಕಾರ್ಯಾಂ, ದುಬ್ಳ್ಯಾಂಥಂಯ್ ಆಪ್ಡುನ್ ಭೊಗಾ. (ಪ್ರಸಂಗ್ ಮೇ 8, 2013)

ವಾಂಜೆಲಾಚೊ ಸಂತೊಸ್ ಆನಿ ದುಬ್ಳ್ಯಾಂಚೊ ಮೋಗ್

‘ವಾಂಜೆಲಾಚೊ ಸಂತೊಸ್’-ಅಪೊಸ್ತಲಿಕ್ ಶಿಕವ್ಣೆಂತ್ ಪಾಪಾ ಫ್ರಾನ್ಸಿಸ್, ಆಮ್ಚೊ ಭಾವಾಡ್ತ್ ಆನಿ ದುಬ್ಳ್ಯಾಮದೆÉಂ ತುಟನಾತ್ಲೊ ಬಾಂದ್ ಆಸಾ ಮ್ಹಣ್ತಾ. “ಮನ್ಶ್ಯಾಚ್ಯಾ ಜಿವಾಕ್ ಗವ್ರವ್ ದಿಂವ್ಚ್ಯಾಕ್ ಕಶೆಂ ‘ಜಿವೆಶಿಂ ಮಾರಿನಾಕಾ’ ಮ್ಹಳ್ಳೊ ಉಪದೆಸ್ ಆಸಾ, ತಶೆಂಚ್ ಆಜ್ ‘ದುರ್ಬಳ್ಯಾಂಕ್ ವಿಸ್ರನಾಕಾ, ಭಾಯ್ರ್ ದವರಿನಾಕಾ, ತಾತ್ಸಾರಾನ್ ದೆಕನಾಕಾ’ ಮ್ಹಳ್ಳೊ ಉಪದೆಸ್ ಖಂಡಿತ್ ಗರ್ಜ್. ದುಬ್ಳ್ಯಾಕ್ ಭಾಯ್ರ್ ದವರ್ಚ್ಯಾ ಚಿಂತ್ಪಾಚಿ ಆರ್ಥಿಕತಾ ನಿಜಾಯ್ಕಿ ಜಿವೆಶಿಂ ಮಾರ್ತಾ” ಮ್ಹಣ್ತಾ ಪಾಪಾ. ಸಾಂ. ಜುವಾಂವ್ ಕ್ರಿಸೊಸ್ತಮಾಕ್ ಉಲ್ಲೇಖ್ ಕರ್ನ್ ಮ್ಹಣ್ತಾ, “ಚಡ್ ಆಸ್‍ಲ್ಲ್ಯಾಂತ್ಲೆಂ ದುಬ್ಳ್ಯಾಥಂಯ್ ವಾಂಟುನ್ ಘೆನಾಸ್ತಾಂ ರಾಂವ್ಚೆಂ ಮ್ಹಳ್ಯಾರ್ ದುಬ್ಳ್ಯಾಚ್ಯಾ ಜಿಣಿಯೆಂತ್ಲೆಂ ಚೊರ್ಚೆಂ ಆನಿ ತಾಣಿಂ ಜಿಯೆನಾತ್ಲೆಬರಿ ಕರ್ಚೆಂ. ಆಮಿ ಪುಂಜಾಯ್ತಾಂವ್ ತೆಂ ಆಮ್ಚೆಂ ನ್ಹಯ್, ತೆಂ ತಾಂಚೆಂ!” (ಎವಾಂಜೆಲಿ ಗೌದಿಯುಮ್ 48, 53, 57)

“ತುಮಿಂಚ್ ಕಿತೆಂ ಪುಣ್‍ಯೀ ಖಾಂವ್ಕ್ ದಿಯಾ” (ಮಾರ್ಕ್ 6:37) ಮ್ಹಣ್ ಜೆಜುನ್ ಸಾಂಗ್‍ಲ್ಲ್ಯಾಚೊ ಅರ್ಥ್ ಸಮ್ಜೊನ್ ಘೆತ್ಲ್ಯಾರ್ ಆಮಿ ಹಂತಾಹಂತಾನ್ ಭುಕೆಲ್ಲ್ಯಾಂಚಿಂ ಪೊಟಾಂ ಥಾಬಂವ್ಚಿಂ ಆನಿ ತಾಂಕಾಂ ಸಶಕ್ತ್ ಕರ್ಚ್ಯೆ ದಿಶೆನ್ ಮೆಟಾಂ ಕಾಡ್ಚೆಂ ಖಂಡಿತ್” (ಎವಾಂಜೆಲಿ ಗೌದಿಯುಮ್ 188)

ಹ್ಯಾಚ್ ಆಪೊಸ್ತಲಿಕ್ ಶಿಕವ್ಣ್ಯಾಂತ್ಲ್ಯೊ ಆನಿ ಥೊಡ್ಯೊ ಗಜಾಲಿ ವಾಚಾ - 

ಪವಿತ್ರ್ ಸಭೆನ್ ಕೊಣಾಸರ್ಶಿಂ ಧಾಂವ್ಚೆಂ?

ಮಿಸಾಂವಾಚ್ಯೆ ಉರ್ಬೆನ್ ಭರ್‍ಲ್ಲ್ಯೆ ಪವಿತ್ರ್ ಸಭೆನ್ ಸಕ್ಡಾಂಸರ್ಶಿಂ ಪಾವೊಂಕ್ ಆಸಾ. ಪುಣ್ ಪಯ್ಲ್ಯಾನ್ ಪಯ್ಲೆಂ ಕೊಣಾಲಾಗಿ ವೆಚೆಂ? ವಾಂಜೆಲಾಚ್ಯಾ ಉಜ್ವಾಡಾನ್ ವೆಚೆಂ ತರ್, ಗಿರೇಸ್ತ್ ಸೆಜಾರ್ಯಾಥಂಯ್ ನ್ಹಯ್, ಚಡ್ ಕರುನ್ ದುಬ್ಳ್ಯಾ ಆನಿ ಪಿಡೇಸ್ತಾಂಥಂಯ್ ವೆಚೆಂ, ಜಾಂಚೆಥಾವ್ನ್ ಆಮ್ಕಾಂ ಕಿತೆಂಚ್ ಪಾಟಿಂ ಮೆಳ್ಚೊ ಭರ್ವಸೊ ನಾ, ತಾಂಚೆಶಿಂ ವೆಚೆಂ. (ಲೂಕ್ 14:14)

ಹ್ಯಾ ಸಂದೆಶಾಂತ್ ಕಸ್ಲೊಯ್ ದುಬಾವ್ ಆಸ್ಚೊ ನಾಕಾ. ಆಜ್ ಆನಿ ಸದಾಂಚ್ “ದುಬ್ಳಿಂ ಜಾವ್ನಾಸಾತ್ ವಾಂಜೆಲಾಚಿ ಪರ್ಗಟ್ಣಿ ಲಾಬ್ಲಲಿಂ ಪಯ್ಲಿಂ ಮನ್ಶ್ಯಾಂ”. ಜೆಜುನ್ ದುಬ್ಳ್ಯಾಂಕ್ ಬರಿ ಖಬರ್ ಪರ್ಗಟ್ಲಿ ಮ್ಹಳ್ಳ್ಯಾರ್ ತಾಂಚೆಮದೆಂ ದೆವಾಚೆಂ ರಾಜ್ ಸ್ಥಾಪಿತ್ ಜಾಂವ್ಚ್ಯಾಚಿ ನಿಶಾನಿ ತಿ (ಎ.ಗೌ. 48)

ಝರ್ಕಟ್ಲಲಿ, ಘಾಯೆಲ್ಲಿ ಆನಿ ಮ್ಹೆಳಿ ಪವಿತ್ರ್ ಸಭಾ ಜಾಯ್

“ಹಾಂವ್ ಏಕ್ ಝರ್ಕಟ್ಲಲಿ, ಘಾಯೆಲ್ಲಿ ಆನಿ ಮ್ಹೆಳಿ ಪವಿತ್ರ್ ಸಭಾ ಆಶೆತಾಂ. ಕಿತ್ಯಾಕ್ ತಿ ಆಜೂನ್ ರಸ್ತ್ಯಾಂನಿ ಆಸಾ! ಸ್ವತಾಚಿ ಸುರಕ್ಶತಾ ಸೊಧ್ಚಿ, ವೊಣ್ತಿಂಭಿತರ್ ಬಂಧಿ ಜಾಲ್ಲಿ ಪವಿತ್ರ್ ಸಭಾ ಬಿಲ್ಕುಲ್ ಭಲಾಯ್ಕೆಂತ್ ನಾ. ಆಪ್ಣಾಕ್‍ಚ್ ಕೇಂದ್ರಿತ್ ಕರ್ನ್, ಉಪ್ರಾಂತ್ ಸಂಸಾರಿ ಬಾಂದ್ಪಾಸಾಚ್ಯಾ ಜಾಳಾಂತ್ ಸಾಂಪ್ಡೊನ್ ಆಸ್ಚಿ ಪವಿತ್ರ್ ಸಭಾ ಹಾಂವ್ ಆಶೆನಾ.

ಆಮ್ಚ್ಯಾ ಅಂತಸ್ಕರ್ರ್ಣಾಕ್ ತೊಪಜೆ ಜಾಲ್ಲಿ ಗಜಾಲ್ ಹಿ, ಕಿತ್ಲಿಶಿಂ ಆಮ್ಚಿ ಭಾವ್ ಭಯ್ಣಿಂ ಕಸ್ಲಿಚ್ ಸಕತ್ ನಾಸ್ತಾಂ, ಜೆಜುಚೊ ಉಜ್ವಾಡ್ ಆನಿ ಭುಜ್ವಣ್ ನಾಸ್ತಾಂ, ಭಾವಾಡ್ತ್ಯಾಂಚೊ ಸಾಂಗಾತ್ ನಾಸ್ತಾಂ ಕಶ್ಟತಾತ್..... ಆಮ್ಚ್ಯಾ ದಾರಾರ್ ದುಬ್ಳಿಂ ಭುಕೆನ್ ಆಸ್ತಾನಾ, ‘ತಾಂಕಾಂ ತುಮಿಂಚ್ ಕಿತೆಂ ಪುಣ್‍ಯೀ ದಿಯಾ’ ಮ್ಹಣ್ ಜೆಜು ಸಾಂಗ್ಚೆಂ ರಾವಂವ್ಚೊ ನಾ (ಎ. ಗೌ. 49)

ದುಬ್ಳ್ಯಾಂಥಂಯ್ ಭೆಟನಾತ್ಲೊ ಜೆಜು ದೆವಾಳಾಂತ್ ?

“ವ್ಹಡಾ ಚುರ್ಚುರಾಯೆನ್ ಹಾಂವ್ ಸಾಂಗ್ತಾಂ, ದುಬ್ಳ್ಯಾಂಚ್ಯಾ ಅತ್ಮೀಕ್ ಗರ್ಜೆಕ್ ಪಾವೊಂಕ್ ಘಳಾಯ್ ಕರ್ಚಿ ಬರಿ ನ್ಹಯ್. ಸಬಾರ್ ದುಬ್ಳ್ಯಾಂಕ್ ದೆವಾಚ್ಯಾ ಮೊಗಾಚಿ ತಾನ್ ಆಸಾ. ತಿಂ ಭಾವಾಡ್ತಿ ಜಿಣಿಯೆಕ್ ಉಗ್ತಿಂ ಆಸಾತ್. ಅಸಲ್ಯಾಂಕ್ ಇಶ್ಟಾಗತ್, ಬೆÉಸಾಂವ್, ದೆವಾಚೆಂ ಉತರ್, ಸಾಕ್ರಾಮೆಂತಾಂಚೆಂ ಆಚರಣ್ ಪಾಟಂವ್ಕ್ ವೇಳ್ ಕಾಡ್ಚೊ ನ್ಹಯ್. ಧಾರ್ಮಿಕಾಂನಿ ವಾ ಲಾಯಿಕಾಂನಿ, ‘ಆಮ್ಚ್ಯಾ ದಿಸ್ಪಡ್ತ್ಯಾ ರಾಟಾವಳಿಂಕ್ ಲಾಗೊನ್ ದುಬ್ಳ್ಯಾಂಕ್ ಲಾಗಿಂ ಜಾಂವ್ಕ್, ತಾಂಕಾಂ ಪಾವೊಂಕ್ ಸಾಧ್ಯ್ ಜಾಯ್ನಾ’ ಮ್ಹಣ್ಚೆ ಬರಿ ನಾ”. (ಎ. ಗೌ 200-201) ದುಬ್ಳ್ಯಾಂಥಂಯ್ ಭೆಟನಾತ್ಲೊ ಜೆಜು ದೆವಾಳಾಂತ್ ಭೆಟತ್‍ಗಿ ತರ್?

ಸಂಪ್ಣಿ:

ಸರ್ವ್ ಬದ್ಲಾವಣ್ ಸುರ್ವಾತೆಕ್ ತಿ ಪಿಶಿ ಕಶಿ ದಿಸ್ತಾ. ಪುಣ್ ಕ್ರಮೇಣ್ ಬಳಾಧಿಕ್ ಸಾಕ್ಶಾಂಕ್ ಪಳೆವ್ನ್ ಬದ್ಲಾವಣ್ ಆಮಿ ಮಾಂದುನ್ ಘೆತಾಂವ್. ವಾಂಜೆಲಾಚಿ ನಾಕಾದೊರಿ ಬಾಂದುನ್ ಘೊಡ್ಯಾಕ್ ಉದ್ಕಾಸರ್ಶಿಂ ವ್ಹರ್ಚೆಂ ಪ್ರೇತನ್ ಪಾಪಾ ಕರುನ್ ಆಸಾ. ತಾಚ್ಯಾ ಉತ್ರಾಂಚಿ ಆನಿ ಕರ್ಣ್ರ್ಯಾಂಚಿ ಬಳಾಧಿಕ್ ಸಾಕ್ಸ್ ಆಮ್ಚೆಮುಕಾರ್ ಆಸ್ತಾನಾ ಆಮಿಂಯ್ ತಿ ಮಾಂದುನ್ ಚಲ್‍ಲ್ಲ್ಯಾಂತ್ ಬರೆಂ ಆಸಾ. ವಾಂಜೆಲಾಚ್ಯೆ ವಾಟೆಕ್ ಆಮಿ ಪರ್ತವ್ಯಾಂ ಆನಿ ವಾಟೆರ್ ಮೆಳ್ಚ್ಯಾ ದುಬ್ಳ್ಯಾಕ್‍ಯೀ ಸಂಗಿಂ ಘೆವ್ಯಾಂ

ಥೆಂಬೆ ಥೆಂಬೆ

                                    ನಿತಳ್                                    

ಪಾವ್ಸಾನ್ ಧುವ್ನ್ ಕಾಡ್’ಲ್ಲ್ಯೆ

ಶಿರೊತೆರ್ 

ತಾಣಿಂ ಉಶ್ಟೆಂ ಸೊಡ್ಲೆಂ

ಆನಿ ಲೊಳೊನ್ 

ನಿತಳ್ ಜಾಯಾ ಮ್ಹಳೆಂ!

**

ಗಾವಾಂತ್ ಸಗ್ಳಿಂ

ನಿತಳ್ ನೆಸ್ಚಿಂಚ್!

ತರ್’ಯೀ ಹವೊ ಕಿತ್ಯಾ

ಉಚಾಂಬಳ್?

ಮನಾಂತುಲ್ಯಾ 

ಡಂಪಿಂಗ್ ಯಾರ್ಡಾಕ್ 

ಧಾಂಪುಂಕ್ 

ಮೊಲಾಂವ್ ಖಂಯ್ಚಿ ಕಾಂಬಳ್!

**

ಪಾಕೆಂ ಪೊವ್ಲೆಂ

ಗಳ್ಳೆಂ ಉದಕ್ ,

ಘರ್’ಭರ್ ಮ್ಹೆಳೆಂ.

ತೊ ಮ್ಹಣಾ -

"ಪಾವ್ಸ್ ಕೊಣಾಕೊಣಾಗೆರ್ 

ವ್ಹಚೊನ್ ಆಯ್ಲಾ ಕೊಣ್ಣಾ!"

**

ಗಾಂವಾಂತ್ ಜಾಲಾಕ್ ಜಾಡ್ಚೆಂ 

ಶೆಣ್ 

ಶಹರಾಂತ್ ಘಾಣ್...

ಹಾ! ಮರ್ಜಿ ಪಳೆಯಾ

ಸ್ವಿಮ್ಮಿಂಗ್ ಫೂಲಾಂತ್ 

ನ್ಹಂಯ್ ಗಿ 

ಹಾಂಚೆಂ ನ್ಹಾಣ್?

**

ಉಂಬಳ್ತಾನಾ 

ಮ್ಹೆಳೆಂ ಉದಕ್ 

ಪಾವ್ಲೆಂ ಮಾಡಾ ಮುಳಾಕ್

ಅಜ್ಯಾಪ್ ನೀಜ್!

ಬೊಂಡ್ಯಾಂತ್ 

ಖಂಯ್ಚೆಂ ಆಯ್ಲೆಂ ರುಚಿಕ್!

ಕಾರ್ಟುನಾಂ

                 ವಾಟ್ಸಾಪ್ ಸಂಪಾದಕಾಂಲಾಗಿಂ                 

ನಮಸ್ಕಾರ್ ಸಂಪಾದಕಾಂನೊ... 
(ಏಕ್ ಸ್ಮೈಲಿ ಆನಿ ಜೊಡ್‍ಲ್ಲೆ ಹಾತ್ ಚಿಡ್ಕಾಯ್ಲ್ಯಾತ್)

ಜಾಣಾಂ, ತುಮ್ಚ್ಯಾ ಮೊಬಾಯ್ಲಾಥಾವ್ನ್ ‘ಟಿಣ್’ ಮ್ಹಳ್ಳೊ ಆವಾಜ್ ಅತ್ತಾಂ ಆಯ್ಲೊ ಆನಿ ತುಮ್ಚೆಂ ವಾಟ್ಸಾಪ್ ಉಗ್ತೆಂ ಜಾಲೆಂ! ಹ್ಯಾ ‘ಟಿಣ್’ ಸಬ್ದಾಕ್ ಸಂಸಾರಾಂತ್ಲೆ ಖಂಯ್ಚೆಯ್ ಆವಾಜ್ ಮಾರುನ್ ಉಡಂವ್ಕ್ ಸಕನಾಂತ್ ನ್ಹಯ್‍ಗಿ!?

ವಿಶಯಾಕ್ ಯೆವ್ಯಾಂ, ಗಜಾಲ್ ಸಂಪಿ, ತುಮ್ಚೆಬರಿ ಹಾಂವ್‍ಯೀ ಸಂಪಾದಕ್, ಮ್ಹಜ್ಯಾ ವಾಟ್ಸಾಪಾಕ್. ತುಮ್ಚೆಥಾವ್ನ್ ಬರೆ, ಬುರ್ಶೆ, ತಿಕ್ಶೆ, ಮಕ್ಕರಾಚೆ, ನಿಕ್ಕರಾಚೆ ಪೋಸ್ಟ್ ಆಯ್ಲ್ಯಾತ್, ನೋ ಡೌಟ್! ಕಾಣಿ, ಕವಿತಾ, ವಿಡಂಬನ್, ಮಾಗ್ಣ್ಯಾಕ್ ಉಲೊ, ಅರ್ಗಾಂ ಬ್ಲೋಕ್, ಇಸ್ತಿಹಾರಾಂ, ಖೊಡಿ, ನಂಜ್ಯೊ ಸಗ್ಳೆಂ ಮ್ಹಾಕಾ ದಿಸಾಚ್ಯಾ ಚೊವಿಸ್ ವೊರಾಂಯ್ ತುಮಿ ಧಾಡ್ತಾತ್! ವ್ಹಾ.. ತುಮಿ ನೀದ್ ಖಳ್ನ್ ವಾವುರ್ತಾತ್. ಕಿತ್ಲೆಂ ಮ್ಹಳ್ಯಾರ್‍ಯೀ ಸಂಪಾದಕಾಚೆಂ ಕಾಮ್‍ನೆ! 

ಸಂಪಾದಕಾಂನೊ, ಏಕ್ ಸವಾಲ್ ತುಮ್ಚೆಮುಕಾರ್ ದವರ್ತಾಂ, ಜಾಪ್ ಸೊಧ್ಚೆಂ ಪ್ರಯತ್ನ್ ಕರಾ. ಜಾಪ್ ಜರೂರ್ ಮೆಳಜೆ!

ತುಮಿ ಹಿಂಸಾ ಪಸಂದ್ ಕರ್ತಾತ್‍ಗಿ? 

“ಯೂ ಮೀನ್ ಡು ವಿ ಲೈಕ್ ವಾಯ್ಲೆನ್ಸ್?” 

ವ್ಹಯ್, ಹಿಂಸಾ! ಡು ಯು?

ಆಮಿ ಕಿತೆಂ, ಸೀಜರ್, ಇದಿ ಅಮಿನ್, ಅಲೆಗ್ಸಾಂಡರ್, ಹಿಟ್ಲರ್.. ಮ್ಹಣ್ ಚಿಂತ್ತಾಯ್‍ಗಿ ತುಂ? ಮ್ಹಣ್ ಆಸ್ಡ್ಯೊ ವಯ್ರ್ ಕರ್ನ್ ಪಳೆನಾಕಾತ್. ಸೀರಿಯಸ್ಲಿ ಚಿಂತಾ. 

ಕ್ರೈಂ ಪೆಟ್ರೋಲ್, ಕ್ರೈಂ ಡೈರಿ ಘಾಲ್ನ್ ರಗ್ತಾಪಾತ್, ಖುನಿ, ಅನಯ್ತಿಕ್ ಸಂಬಂಧ್.. ಹೆಂ ಸಗ್ಳೆಂ ರಂಗವ್ನ್ ಸಾಂಗ್ತೆಲ್ಯಾಕ್ ಕುಟ್ಮಾಸಮೇತ್ ಬಸೊನ್ ಖಂಯ್ಚ್ಯಾಗೀ ಎಕಾ ಸಿನೆಮಾಚೊ ವಾಂಟೊ ಮ್ಹಳ್ಳೆಬರಿ ಕೂಲ್ ಜಾವ್ನ್ ಪಳೆಂವ್ಚೆಂ ಉಡಾಸ್ ಕರಾ. ಪೆÇೀರ್ ಕಾವೇರಿ ವಿಶ್ಯಾಂತ್ ಗಲಾಟೊ ಜಾಲೊ, ರಿಕ್ಶ್ಯಾರ್ ವೆತೆಲ್ಯಾ ದೊಗಾಂ ಬಾಯ್ಲಾಂಕ್ ತಮಿಳ್ನಾಡಾಂತ್ ಸುರಿಯೆನ್ ತೊಪುನ್ ಹಲ್ಲೊ ಕೆಲೊ.. ಅರೆ! ತುಮ್ಕಾಂ ಯೇವ್ನಾಂ ಗಿ ವಿಡಿಯೊ! ಮ್ಹಾಕಾಚ್ ಪಾಂಚ್ ಥಾವ್ನ್ ಸ ಜಣಾಂನಿ ಧಾಡ್ಲಾ, ತೆಂಯ್ ಎಕೆಕಾ ಮಿನುಟಾಚ್ಯಾ ಅಂತರಾರ್!! ಬ್ರೇಕಿಂಗ್ ನ್ಯೂಸ್ ದೀಂವ್ಕ್ ತುಮಿ ಕಾಡ್ಚಿ ವಾಂವ್ಟ್ ಮ್ಹಳ್ಯಾರ್ ಆಸಾನೆ, ಸಂಪಾದಕಾಂನೊ, ಚೆಪೆಂ ಉಕಲ್ಜೆ!

ಆತಾಂ ಸಾಂಗಾ, ಹಿಂಸಾ ಪಸಂದ್ ನಾ?

ಆಮಿ ಖಾಲಿ ಫಾರ್ವರ್ಡ್ ಕೆಲ್ಯೊ ಮಾತ್ರ್, ಆಮಿ ಖಂಯ್ ಹುಲ್ಪಯ್ಲಾಂ ವಾ ಜೀವ್ ಕಾಡ್ಲಾ? ಹೆಂ ಸವಾಲ್ ಖಂಡಿತ್ ಮ್ಹಾಕಾ ಪಾಟಿಂ ಮಾರ್ತೆಲ್ಯಾತ್.

ಉದ್ಕಾಖಾತಿರ್

ಸಗ್ಳೊ ಗಾಂವ್ ಜಳ್ತೇ ಆಸಾ

ಹಾ! ಕಸಲೆಂ ಪಿಶೆಂಪಣ್ ಪಳೆಯಾ

ಉದ್ಕಾಕ್ ರಾವಂವ್ಕ್

ಉಜೊ ಗೆಲಾ! 

ಹಿ ಮಟ್ವಿ ಕವಿತಾಯ್ (ಕವಿ: ರೋಶು ಬಜ್ಪೆ) ಮ್ಹಾಕಾ ಆಯಿಲ್ಲಿ!

ಸಾಂಗಾ, ಉಜೊ ಕಸೊ ಉದಕ್ ಪಾಲ್ವಂವ್ಕ್ ಗೆಲೊ? 

ಟಿ.ವಿ.ಚ್ಯಾ ಆಂಕರಾಂನಿ ಹಿ ಗಜಾಲ್ ಫುಂಕ್‍ಲ್ಲ್ಯಾನ್ ಘಡ್ಲ್ಯಾ ಮ್ಹಣ್ತಾತ್? ಹ್ಹಹ್ಹ.. ಟಿವಿರ್ ಪ್ರಸಾರ್ ಜಾತಾಜಾತಾನಾ ಸ್ಕ್ರೀನ್ ಶೋಟ್‍ಕಾಡ್ನ್ ವಾ ವೀಡಿಯೊ ರೆಕೊಡಿಂಗ್ ಕರ್ನ್ ಧಾಡ್‍ಲ್ಲೆಂ ಕೊಣೆಂ ವಾಟ್ಸಾಪ್ ಸಂಪಾದಕಾಂನೊ? ಖಂಯ್‍ಗಿ ಏಕ್ ಆವ್ಘಡ್ ಘಡೊನ್ ಎಕ್ಲ್ಯಾಚೊ ಪಾಂಯ್, ಹಾತ್, ಗೊಮ್ಟಿ ದೋನ್ ಜಾವ್ನ್ ಆಸ್ಲ್ಯಾರ್‍ಯೀ ತಾಚೊ ವಿಡಿಯೊ, ಖಂಯ್‍ಗಿ, ಕೆದಾಳಾಗಿ ಘಡ್‍ಲ್ಲ್ಯಾ ಸಂಗ್ತಿಂಚೊ ವೀಡಿಯೊ ಪ್ರಸ್ತುತ್ ಘಡಿತಾಕ್ ಲಿಂಕ್ ಕರುನ್ ಧಾಡ್‍ಲ್ಲೊ ಕೊಣೆಂ? ಥೊಡೆ ಪಾವ್ಟಿಂ ಹತ್ತ್ಯಾ, ಆವ್ಘಡ್ ಘಡ್ಲಾಂ ಮ್ಹಣ್ ಟಿವಿಚ್ಯಾಂಕ್ ಕಳ್‍ಲ್ಲೆಂಚ್ ವಾಟ್ಸಾಪಾರ್ ಪಯ್ಲೆಂ ಆಯ್ಲ್ಯಾ ಉಪ್ರಾಂತ್. 

ವಾಟ್ಸಾಪ್ ಸಂಪಾದಕಾಂನೊ, ಆಜ್‍ಕಾಲ್ ಘಡ್ಚ್ಯಾ ಜಾಯ್ತ್ಯಾ ಅಪಪ್ರಚಾರಾಕ್, ಹಿಂಸೆಕ್ ಪ್ರಚೋದನ್ ಮೆಳ್ಚ್ಯಾಕ್, ಮಾನ್ ಕಾಡ್ಚ್ಯಾಕ್, ಎಕಾ ಪಂಗ್ಡಾವಿರೋಧ್ ಆನ್ಯೇಕಾಕ್ ಉಬ್ಜಂವ್ಚ್ಯಾಕ್ ಶೀದಾ ತುಮಿಂಚ್ ಕಾರಣ್. 

ತುಮ್ಚ್ಯಾ ವಾಟ್ಸಾಪಾಥಾವ್ನ್ ಯೆಂವ್ಚ್ಯಾ ಹರ್ಯೆಕಾ ಪೊಸ್ಟಾಕ್ ತುಮಿಚ್ ಜವಾಬ್ದಾರ್. ತುಮಿಚ್‍ನೆ ಥಂಯ್ ಬರವ್ಪಿ ಆನಿ ಸಂಪಾದ್ಪಿ. ಕೊಣೆಂಗಿ ಧಾಡ್ಲೆಂ ಮ್ಹಣ್ ಫಾರ್ವಡ್ ಕರ್ತೆಲ್ಯಾಂಕ್ ಸಂಪಾದಕಾಚೆಂ ಕರ್ತವ್ಯ್ ನಾಂಗೀ ತರ್? ಗಡ್ ರಾಕ್ಚ್ಯಾ ಸೊಜೆರಾಬರಿ ತುಮ್ಚಿಂ ಬೊಟಾಂ ಹರ್ಯೆಕಾ ‘ಟಿಣಾ’ಕ್ ರಾಕೊನ್ ದಡ್ಬಡೊನ್ ಜಾಪಿ ಲಿಖ್ತಾತ್‍ನೆ, ಆತಾಂ ಕಿತೆಂ ಮ್ಹಣ್ತಾತ್? 

ಅರೆ, ಕಿತ್ಯಾ ಆಫ್‍ಲೈನ್?! ಖಂಯ್ ಗೆಲ್ಯಾತ್, ಹಲೋ?

ಮಾಗಿರ್ ವಾಚ್ತೆಲ್ಯಾತ್, ಲಿಖುನ್ ವೆತಾಂ. 

ಕೀಳ್ ಕಮೆಂಟ್ಸ್, ದೊಡ್ಯಾ ಅಭಿರುಚಿಚೆ ಪೋಸ್ಟ್, ರಗ್ತಾಪಾತಾಚ್ಯೊ ವಿಡಿಯೊ, ರಗ್ತಾನ್ ಬುಡ್ಲೆಲ್ಯಾ ಕುಡಿ ಸಮೇತ್ ಆಕ್ಸಿಡೆಂಟಾಚಿ ವರ್ದಿ ಛಾಪುನ್, ಧಾಡ್ನ್, ಫಾರ್ವರ್ಡ್ ಕರ್ನ್ ತುಮಿ ‘ಸಾಂಜೆಚ್ಯಾ’ ಪೇಪರಾಬರಿ ಜಾಂವ್ಚಿ ಗರ್ಜ್ ಕಿತೆಂ? ಆಜ್ ವಾ ಫಾಲ್ಯಾಂ ಖಬರ್ ಸಕ್ಡಾಂಕ್ ಪಾವ್ತಾಚ್. ಪುಣ್ ತ್ಯಾ ಎಕೆಕಾ ಘಡಿತಾ ಪಾಟ್ಲ್ಯಾನ್ ಭಲಾಯ್ಕೆಭರಿತ್ ಚರ್ಚಾ ಜಾಂವ್, ಅಸಲ್ಯೊ ಸಂಗ್ತಿ ಚುಕಂವ್ಚೆವಿಶಿಂ ಜಾಣ್ವಾಯೆಚಿಂ, ಪ್ರಭುದ್ಧ್ ಚಿಂತ್ಪಾಂ ಯೇಂವ್.

ಹೊ! ತುಂ ಭಾಗೆವಂತ್‍ಗಿ? ತುಂವೆಂ ಆಶೆಂ ಕರುಂನಾಯ್ ದಿಸ್ತಾ ಮ್ಹಣ್ ನಾಕ್ ಮೊಡಿನಾಕಾತ್. ಸಕ್ಕಡ್ ಚುಕ್ತಾತ್, ಸಂಪಾದಕಾಂನಿ ಎಕ್ಸ್‍ಟ್ರಾ ಕೇರ್ ಕಾಣ್ಘೆಜೆ ಮ್ಹಣ್ಚೆಂ ಹಾಂವೆಂ, ತಿತ್ಲೆಂಚ್. 

ಉದಕ್ ಪಾಲ್ವಂವ್ಕ್ ವೆಚ್ಯಾ ಉಜ್ಯಾಬರಿ ಚೀಪ್ ಜಾಂವ್ಚೆಂ ನಾಕಾ.

ಹೆಂ ವಾಚುನ್ ವಾಟ್ಸಾಪ್ ಧಾಂಪುನ್ ವೊಗೆ ಬಸನಾಕಾತ್, ಶೇರ್ ಕರಾ

- ಜೊ. ಸಿ. ಸಿದ್ದಕಟ್ಟೆ, ಕಾರ್ಮೆಲಿತ್

ಕವಿತೆ: ನೀರು

ನೀರು

ಮಟಮಟ ಮಧ್ಯಾಹ್ನ

ಊರೂರು ಅಲೆದು ಸುಸ್ತಾಗಿ

ತೊಟ್ಟು ನೀರಿಗಾಗಿ ಹುಡುಕಿದಾಗ

 ರಸ್ತೆ ಪಕ್ಕದ ನಲ್ಲಿಯೊಂದರ ಬುಡದಲ್ಲಿ

ಪಸೆ ಕಂಡು ಓಡಿದೆ

ಬೊಗಸೆಯಲ್ಲಷ್ಟು 

ನೀರು ತುಂಬಿಕೊಂಡು ತಲೆ ಎತ್ತಿದರೆ

ಅರೆ.....

ಪಕ್ಕದಲ್ಲೊಂದು ನಾಯಿ

ಕೊಂಬೆ ಮೇಲೆ ಕಾಗೆ

ಪೊಟರೆಯೊಳಗೆ ಅಳಿಲು

ದಿಟ್ಟಿಸಿ ನನ್ನನ್ನೆ ನೋಡುತ್ತಿದ್ದವು!

 ಹಸಿದವರ ಮುಂದೆ

ಊಟ ಮಾಡಲಾಗದೆ ಬುತ್ತಿ ಮರಳಿ

ಬ್ಯಾಗಿಗೆ ತುರುಕಿ ಕಿಟಕಿಯ ಹೊರಗೆ ನೋಡುವ

ರೈಲು ಪ್ರಯಾಣಿಕನಂತೆ

ಬೊಗಸೆ ನೀರು

ಗಿಡವೊಂದಕ್ಕೆ ಸುರಿದು ಮುನ್ನಡೆದೆ