ಕಾಳ್ಜಾ ಗಾಜ಼್

ವಿಸ್ರೊಂ ಮ್ಹಳ್ಯಾರ್... ಕಶೆಂ?

ಪಾಡ್ ಪಡ್‌ಲ್ಲೊ ಪಾವ್ಸ್. ಹೆ ಪಿಕೆ ಸಾಂಜೆರ್‌ಚ್ ಸುರು ಜಾಯ್ಜೆ! ತೆವ್ಶಿನ್ ಜೋರ್‌ಯಿ ನ್ಹಯ್... ಏಕ್ ತರ್ ಆಯಿನ್ ಪುರ್ಪುರ್ಚೆಪರಿಂ... ಪಿರಿಪಿರಿ... ಪಿರಿಪಿರಿ... ಇತ್ಲೆಂಚ್‌ಗೀ, ಚಿಕಾರ್ ಭರ್‌ಲ್ಲ್ಯಾ ಲೊಕಾಚೆಂ ಕಚಿಪಿಚಿ ಉಲವ್ಣೆಂ, ತ್ಯಾಚ್ ಥರ್ಡ್ ಕ್ಲಾಸ್ ಪಾವ್ಸಾಪರಿಂ.

"ಪುರೂ, ಹೇಯ್ ಪುರು... ತುಂ ಪುರು ನ್ಹಯ್?”

ಬಸ್‌ಸ್ಟೆಂಡಾಂತ್ ರಾವ್‌ಲ್ಲ್ಯಾ ಮ್ಹಾಕಾ ಹೊ ಬಾರೀಕ್ ತಾಳೊ ಆಯ್ಕಾಲೊ. ಮ್ಹಾಕಾ ವಿಚಾರ್ಲೆಂಗೀ? ಕೊಣ್ ಹಾಬಾ! ದಾವ್ಯಾಕ್ ದೀಶ್ಟ್ ಲಾಯ್ತಾನಾ ಕಿರೆಂಚಿ ಲಾಗತ್ ಮ್ಹಳ್ಳ್ಯಾ ಫಿಕಿರಾಯೆನ್ ಕಾಪ್ಡಾಚ್ಯೊ ಮಿರಿಯೊ ಎಕಾ ಹಾತಾನ್ ಮಾತ್ಶೆಂ ಆರಾವ್ನ್ ಧರ್ನ್ ಆನ್ಯೇಕಾ ಹಾತಾನ್ ವೆನಿಟಿ ಬೇಗ್ ಮ್ಹಾತ್ಯಾರ್ ದವರ್ನ್ ಯೆಂವ್ಚಿ ಚಲಿ ದಿಸ್ಲಿ!

“ಹೇಯ್ ಪುರು, ವಳಕ್ ಮೆಳ್ಳಿನಾಂಗಿ?’’ ತೆಂ ಪಾಕ್ಯಾಪಂದಾ ಆಯ್ಲೆಂ. ಕೋಣ್ ಹೆಂ ಆಶೆಂಯ್ ‘ಪುರೂ’ ಮ್ಹಣ್ ಉಲೊ ಕರ್ತಾ? ಪುರಂದರ್ ನಾಂವ್ ಮುಗೆಲೆಂ; ಕೊಂಡಾಟ್ಯಾನ್ ‘ಪುರು’ ಮ್ಹಣ್ತಾತ್ ತಿತ್ಲೆಂಚ್.

ಹಾಂವ್ ಚಿಕ್ಕೆ ದೆಗೆಕ್ ಸರ್ಲೊಂ. ‘ವಳಕ್ ಮೆಳ್ಳಿನಾ’ ಮ್ಹಣ್ ಸಾಂಗೊಂಕ್ ಚಡ್ಪಡ್ತಾನಾ ತೆಂಚ್ ಉಲಯ್ಲೆಂ.

“ಹೆಂ... ಹಾಂವ್‌ರೆ ಸುಮಿ. ಹುಣ್ಸೂರ್ ಇಸ್ಕೊಲಾಂತ್ ಸಾಂಗಾತಾ ಶಿಕ್‌ಲ್ಲ್ಯಾಂವ್... ಉಡಾಸ್ ಆಸಾ?’’ ಮತಿಕ್ ಝಗ್ಲಾಣೆಂ ಮಾರ್ಲೆಂ.

“ಹ್ಹೊ! ಸುಮಿ... ತುಂ!” ತಾಣೆಂ ಹಾತ್ ವೊಡ್ಡಾಯ್ಲ್ಯಾರೀ ಹಾಂವ್ ಹಾತ್ ದೀಂವ್ಕ್ ಪಾದ್ದೆಲೊಂ. ಕಸ್ಲಿ ಅನಿರಿಕ್ಷಿತ್ ಭೆಟ್! ತಾಣೆಂ ಮ್ಹಜೊ ಹಾತ್ ಧರ್ನ್ ಮುಡ್ಡಿಲೊಚ್.

“ಕಶೆಂ ಚಲ್ತಾ ಸಗ್ಳೆಂ? ಶ್ರೀಮತಿ ಆನಿ ಭುರ್ಗಿಂ... ಕಿತ್ಲಿಂ ಭುರ್ಗಿಂ ತುಕಾ?”

ಆನಿ ಕಿತೆಂ ಸಗ್ಳೆಂ ಆದ್ಲೆಂ ಸಾಂಕ್ಳೆ ರುಪಿಂ ಭಾಯ್ರ್ ಯೆತಾ ಮ್ಹಣ್ತಾನಾಂತ್ ತೆಂ “ಹ್ಹೊ, ಬಸ್ಸ್ ಆಯ್ಲೆಂ. ಚುಕ್ಲ್ಯಾರ್ ಘರಾ ಪಾವ್ತಾನಾ ಕಾಳೊಕ್ ಜಾತಾ... ಬಾಯ್, ಸೊರ್ರಿ... ಸೀಯೂ ಎಗೇನ್” ಚಿಕ್ಕೆ ಪಯ್ಸ್ ಪಾವ್ತಾನಾ ಪಾಟಿಂ ಘುಂವೊನ್ “ಪುರು, ತುಜಿ ‘ವಿಸ್ರೊಂ ಮ್ಹಳ್ಯಾರ್... ಕಶೆಂ?’ ಕವಿತಾ ವಾಚ್ಲಿ; ಎಕ್ದಮ್ ಜಬರ್‌ದಸ್ತ್. ತುಜ್ಯೊ ಆದ್ಲ್ಯೊ ಶಾಯಿರಿ ಬರ್‍ಯೊ ಉಡಾಸ್ ಆಸಾತ್” ಮ್ಹಣೊನ್ ಬಸ್ಸಾರ್ ಚಡೊನ್ ಹಾತ್ ಹಾಲಯ್ಲಾಗ್ಲೆಂ. ಹೀಂಗ್ ಖೆಲ್ಲ್ಯಾ ಮಾಂಕ್ಡಾಪರಿಂ ಹಾಂವೆಯಿ ಹಾತ್ ವಾರ‍್ಯಾರ್ ಹಾಲಯ್ಲೊ.

ಛೆ! ಕಸ್ಲೆ ಪಿಸಾಂಟ್ ಸಂಬಂಧ್ ಹೆ; ಜಗ್ಲಾಣ್ಯಾಪರಿಂ ರಪ್ಪ್ ಕರ್ನ್ ಮಾರ್ನ್ ಫಳಾಪಳ್ ಘೆಂವ್ಚೆ ತಸಲೆ. ದೊಳೆ ದಾಂಪ್ತಾನಾ ಏಕ್ ಹುನೊನಿ ಥೆಂಬೊ ಪುಳ್ಳ್ ಕರ್ನ್ ಗಳ್ಳೊ. ಪಾವ್ಸಾನಿಮ್ತಿಂ ಥಂಡ್ ವಾರೆಂ ಕಾನಾಂನಿ ರಿಗ್ತಾನಾ, ಆಂಗ್ ಸಗ್ಳೆಂ ಹಿಂವಾನ್ ಕಾಂಪ್ಲೆಂ. ಬೊಲ್ಸಾಂತ್ಲೊ ತುವಾಲೊ ಕಾಡ್ನ್ ಹಾಂವೆಂ ದೊಡುನ್ ಕಾನ್ ದಾಂಪ್ಚೆಂಪರಿಂ ಮಾತ್ಯಾ ಭೊಂವಾರಿಂ ಹಾಡುನ್ ಕಪಲಾರ್ ಭಿಗ್ಡಿಲೊ. ಕಾಳಿಜ್ ಫುಲೊನ್ ರಾವ್‌ಲ್ಲೆಂ. ಸಾಂಗಾತಾಚ್ ಭಿತರ್ಲೆ ಭಿತರ್ ಭಾರೀಕ್ ತೊಪ್ಣಿ...

ಮಧೆಂ ಭಾಂಕ್ ಕಾಡ್ನ್ ಉಗಯಿಲ್ಲೆ ಹಳ್ತ್ ಲಾಂಬ್ ಕೇಸ್, ಧವೆಂ ಶರ್ಟ್ -ನಿಳಿ ಚಡ್ಡಿ, ಖಾಂದಾರ್ ಆನಾನ್ ಹಾಡ್ನ್ ದಿಲ್ಲೆಂ ಖಾಕಿ ರಂಗಾಚೆಂ ಸ್ಕೂಲ್ ಬೇಗ್, ತೊಂಡಾಂತ್ ಆವಾಳೆ ಘಾಲ್ನ್, ರಸ್ತ್ಯಾರ್ ಮೆಳ್ಚೆ ಫಾತೊರ್ ಕುಟ್ಟುನ್ ವೆಚೊ ಥೇಟ್ ವಿದ್ಯಾರ್ಥಿ ಜಾಲೊಂ ಹಾಂವ್!

ಸುಮಿ... ಭಾರೀಕ್ ಇರಾಚಿ ಕಾಡಿ, ದೋನ್ ಮಟ್ವ್ಯೊ ಫಾಂತಿಯೊ ಘಾಲ್ನ್ ಯೆತಾಲೆಂ. ತಾಕಾ ಆವಾಳೆ ಮ್ಹಳ್ಯಾರ್ ಎಲರ್ಜಿ. ಗಾಲಾಂನಿ ಪಡ್ಚೆ ತೆ ಫೊಂಡ್ಕುಲೆ ಪಳೆವ್ನ್ ಮಸ್ಕಿರಿ ಕರುಂಕ್ ವಿಶ್ವನಾಥ ಮಾಸ್ಟ್ರಾಕ್ ಖಂಯ್ ನಾತ್‌ಲ್ಲಿ ಖುಶಿ. ತ್ಯಾ ಆಕ್ರೇಚ್ಯಾ ಬಾಂಕಾರ್ ಬಸೊನ್ ಟಿಚೆರಿಚ್ಯಾ ಕಾಪ್ಡಾಂವಿಶಿಂ ಬಿಂದಾಸ್ ಶಾಯರಿ ಘುಂತುನ್ ಬಸ್‌ಯಾಂ’ಶೆಂ ಭೊಗ್ಲೆಂ. ಸುಮಿಚ್ಯಾ ಆಂಗಾಂತ್ಲೊ ಪಾವ್ಡರಾಚೊ ಘುಮ್ಮ್ ಪರ್ಮಳ್ ಆನಿಕೀ ತೆಣೆಂಚ್ ಪಾಸಾಯೊ ಮಾರ್ತಾಲೊ ಆನಿ ಹಾಂವ್ ಥಂಯ್ಚ್ ಖುಂದ್ಯಾಕ್ ವೊಣ್ಕೊನ್ ರಾವ್ಲೊಂ.

ಪಾವ್ಸಾನ್ ಆಪ್ಲೊ ವೇಗ್ ಆರಾಯಿಲ್ಲೊ. ಸಳ್ ಕರ್ಚ್ಯಾ ಭುರ್ಗ್ಯಾಪರಿಂ ವೊತುಂಕ್ ಲಾಗ್ಲಾ. ಫಕ್ಕರ್ನ್ ಥಾಂಬ್ಚಿಂ ಖುಣಾಂ ದಿಸ್ಲಿಂನಾಂತ್.

ಸುಮಿಕ್ ಚಿಂತುನ್ ಆಸ್ತಾನಾಂಚ್ ಆಪಾಪಿಂಚ್ ಮತಿ ಪಡ್ಡ್ಯಾರ್ ‘ಕಿಸ್ಣ’ ಉದೆಲೊ. ‘ಸುಮಿ-ಕಿಸ್ಣ... ಹ್ಹೆ ಹೆ ಹ್ಹೆ...’ ಹೆಳ್ಕೆವಿಣೆಂ ಸಬ್ದ್ ಜಿಬೆವಯ್ಲೆ ತುಟೊನ್ ಭಾಯ್ರ್ ಪಡ್ತಾನಾ ಕೊಣೆಂಯ್ ಆಯ್ಕಾಲೆಂಗಿ ಮ್ಹಣ್ ಘಾಬರ್ನ್ ತೊಂಡಾಕ್ ಹಾತ್ ಲಾಯ್ಲೊ. ಸಕ್ಕಡ್ ತಾ’ತಾಂಚಾ ರಾಟವಳಿಂನಿಂಚ್ ಮಗ್ನ್. ಸುಮಿಚೆಂ ಘರ್ ಖಂಯ್ಸರ್ ಮ್ಹಣ್ ಮ್ಹಾಕಾ ಕಳಿತ್ ನಾ ಆನಿ ತಾಚ್ಯಾ ಬಾಪಾಯ್ಕಿ ಪಳೆಲ್ಲೊ ಉಡಾಸ್ ನಾ. ತಾಚಿ ಆವಯ್ ಏಕ್ ದೀಸ್ ಇಸ್ಕೊಲಾಕ್ ಆಯಿಲ್ಲಿ, ಕಸ್ಲೆಂಗಿ ಕಂಪ್ಲೇಂಟ್ ಘೆವ್ನ್. ತೊ ಉಡಾಸ್ ಆಸಾ ಮ್ಹಾಕಾ. ಸುಮಿಚೆಂ ಧಾಕ್ಟೆಂ ಭಯ್ಣ್ ಮ್ಹಸ್ತ್ ಉಚಾಂಬಳ್ ಚೆಡುಂ. ತಿಸ್ರೆಂತ್ ಆಸ್‌ಲ್ಲೆಂ.

ಛೆ! ಸುಮಿ ವಳಕ್‌ಚ್ ಮೆಳ್ಳಿನಾನೇ... ತಾಚೆಥಂಯ್ ಕಸ್ಲಿ ಬದ್ಲಾವಣ್ ಜಾಲ್ಯಾ? ಸಾತ್ವಿ ಪರ್‌ಯಾಂತ್ ಸಾಂಗಾತಾ ಶಿಕ್‌ಲ್ಲ್ಯಾಂವ್, ಉಪ್ರಾಂತ್ ತೆಂ ಮಾದ್ರಿಂಚ್ಯಾ ಕೊನ್ವೆಂಟ್ ಸ್ಕೂಲಾಕ್ ಗೆಲೆಂ; ಹಾಂವ್ ಆನಿ ಮ್ಹಜೆ ಪಾಡಾರಿ ಸಾಂಗಾತಿ ಸರ್ಕಾರಿ ಶಾಳಾಕ್. ಚಡ್ ಕಾಂಯ್ ಮೊಟೆಂ ಜಾವ್ನಾ ಹಾಬಾ. ಗಾಲಾರ್ ತೆಂಚ್ ಆಪುರ್ಬಾಯೆಚೆ ಫೊಂಡ್ಕುಲೆ, ತಿಚ್ ಸುಡ್ಸುಡಾಯ್, ತಿಚ್ ಆಪ್ತತಾ. ದೋನ್ ಫಾಂತಿಯೊ ಮಾತ್ರ್ ಆಜ್ ನಾತ್‌ಲ್ಲ್ಯೊ. ಥಂಯ್ ಹಾಂಗಾ ಏಕ್ ದೋನ್ ಧವೆ ಕೇಸ್. ಗಳ್ಯಾಂತ್... ಹಾಂ, ಗಳ್ಯಾಂತ್ ಕಿತೆಂ ಆಸ್ಲೆಂ... ಪಳೆಂವ್ಕ್ ನಾ!

ಆನಿ ತೊ ಕಿಸ್ಣ! ಆಮ್ಚ್ಯಾ ಕ್ಲಾಸಿಂತ್ಲೊ ರೋಮಿಯೊ. ಹಾಂವೆಂ ಆನಿ ಸಾಂಗಾತ್ಯಾಂನಿ ಮೆಳುನ್ ತಾಕಾ ರೋಮಿಯೊ ಕರ್ತಾನಾ ಸಹಜ್ ಜಾವ್ನ್ ಜೂಲಿಯೆಟಾಚ್ಯಾ ಜಾಗ್ಯಾರ್ ಸುಮಿಂಚ್ ಆಮ್ಕಾಂ ಸಾಂಪಡ್‌ಲ್ಲೆಂ. ಛೆ! ಕಸಲಿ ನಾಲಿಸಾಯ್. ಮ್ಹಜ್ಯಾ ವಿಕಾಳ್ ಮತಿಕ್ ಬರೆಂ ಕಾಂಯ್ ಕರುಂಕ್ ಜಾಲೆಂ ನಾ ನ್ಹಯ್. ಹಾಂವೆಂ ಮ್ಹಾಕಾಚ್ ಕುಟಿ ಘಾಲ್ಯೊ. ತೆಂ ಪೂರಾ ಕಶೆಂ ವಿಸ್ರೊಂ... ಭುರ್ಗೆಪಣಾಲಿಂ ಆನ್ನಾಡ್‌ಪಣಾಂ ವ್ಹಯ್, ಪೂಣ್ ಮ್ಹಜೆಂ ಅಂತಸ್ಕರ್ನ್ ಮಾತ್ ಅಜೂನ್ ಕಳ್ವಳ್ತಾ, ಪಶ್ಚಾತ್ತಾಪಾನ್...

ಮೇಬಲ್ ಟಿಚೆರ್ ಆಮ್ಚಿ ಕ್ಲಾಸ್ ಟಿಚೆರ್. ಕ್ಲಾಸಿಂತ್ಲ್ಯಾ ಉಪ್ರಾಳಿ ಚೆಡ್ವಾಂ ನಿಮ್ತಿಂ ‘ಮಾವ್ನ್’ ಮ್ಹಳ್ಳೆಂ ತೀರ್ ತಿರ್ಕುಟ್. ಕಿತೆಂ ಗಲಾಟೊ, ಕಸ್ಲೊ ಖೆಳ್! ಮೇಬಲ್ ಟಿಚೆರಿನ್ ಏಕ್ ಉಪಾಯ್ ಕೆಲ್ಲೊ. ಪಯ್ಲ್ಯಾ ಬಾಂಕಾರ್ ಚೆಡ್ವಾಂಕ್ ಬಸಯ್ಲ್ಯಾರ್ ತಾಂಚೆ ಪಾಟ್ಲ್ಯಾನ್ ಚೆಡೆ, ತಾಂಚೆ ಪಾಟ್ಲ್ಯಾನ್ ಚೆಡ್ವಾಂ... ಅಶೆಂ ಜಾಗೊ ದಿಲೊ. ತವಳ್ ಚೆಡ್ವಾಂನಿ ಚೆಡ್ಯಾಂಕಡೆ ಉಲಂವ್ಚೆಂ ಏಕ್ ಮ್ಹಾಪಾತಕ್. ತಶೆಂ ಚೆಡೆಯಿ ಚೆಡ್ವಾಂಕಡೆ ಉಲಯ್ನಾಸ್ಲೆ. ಅಶೆಂ ಟಿಚೆರ್ ಕ್ಲಾಸಿಂತ್ ಮಾವ್ನ್ ಸಾಂಬಾಳ್ಚ್ಯಾಂತ್‌ ಯಶಸ್ವಿ ಜಾಲ್ಲಿ. ಪೂಣ್ ಕಿತ್ಲೆ ದೀಸ್?

ಹಾಂವ್, ಕಿಸ್ಣ ಆನಿ ಜಗ್ಗು, ಗೋಪಾ, ವಿನ್ನು... ಆಕ್ರೇಚ್ಯಾ ಬಾಂಕಾರ್ ಬಸ್ತೆಲ್ಯಾಂವ್. ಆಮ್ಚೊ ಏಕ್ ಬರೊ ಪಂಗಡ್, ಪಂಗ್ಡಾಕ್ ಏಕ್ ವಿಚಿತ್ರ್ ನಾಂವ್. ಖಂಯ್ ಗೆಲ್ಯಾರೀ ಕಿತೆಂ ಕೆಲ್ಯಾರೀ ಸಾಂಗಾತಾಚ್. ಆಮ್ಚೆ ಪಯ್ಕಿ ಸಾರ್ಕೆಂ, ನಿರ್ಮಳ್ ನ್ಹೆಸೊನ್ ಯೆಂವ್ಚೊ ಮ್ಹಳ್ಯಾರ್ ಕಿಸ್ಣ ಮಾತ್ರ್. ಬುದ್ವಾರಾ ಮಾತ್ರ್ ಆಮ್ಕಾಂ ವಿವಿದ್ ರಂಗಾಚೆಂ ವಸ್ತುರ್ ನೆಸ್ಯೆತೆಂ. ಉರ್‌ಲ್ಲ್ಯಾ ದಿಸಾಂನಿ ತೆಂಚೆ ಯೂನಿಫೊರ್ಮ್. ಬುದ್ವರಾ ಮಾತ್ರ್ ಆಮ್ಚೊ ಕಿಸ್ಣ ಎಕ್ದಮ್ ರೋಮಿಯೊಚ್ ಆನಿ ಸುಮಿ ಕಾಂಯ್ ಉಣ್ಯಾಚೆಂ ನ್ಹಯ್. ತಾಚೆಲಾಗಿಂ ಆಸ್‌ಲ್ಲೆ ತಸ್ಲೆ ಚೂಡಿದಾರ್ ಹೆರಾಂಲಾಗಿಂ ನಾತ್‌ಲ್ಲೆ. ತಶೆಂ ತಾಚ್ಯಾ ಪಾಟ್ಲ್ಯಾನಿ ಚಾರ್-ಚೊವ್ಗಾಂಚಿ ಪಾಟ್ಲಾಮ್ ಸದಾಂ ಆಸ್ತಾಲಿ. ಆಮಿ ಆಕ್ರೇಚ್ಯಾ ಬಾಂಕಾರ್ ತರ್ ಆಮ್ಚ್ಯಾ ಮುಕ್ಲ್ಯಾನ್ ಸುಮಿ ಆನಿ ಹೆರಾಂ ತಾಚ್ಯೊ ಇಶ್ಟಿಣ್ಯೊ.

ಏಕ್ ದೀಸ್ ಅಶೆಂ ಘಡ್ಲೆಂಕೀ ಪಾಟ್ಲ್ಯಾನ್ ಬಸ್‌ಲ್ಲ್ಯಾ ಕಿಸ್ಣಾನ್ ಪಾಂಯ್ ಚಿಕ್ಕೆ ಲಾಂಬ್ ಸೊಡ್‌ಲ್ಲ್ಯಾನ್ ಮುಕಾರ್ ಬಸ್‌ಲ್ಲ್ಯಾ ಸುಮಿಕ್ ಲಾಗ್ಲೊ ದಿಸ್ತಾ. ತೆಂ ರಪ್ಪ್ ಕರ್ನ್ ಘುಂವ್ಲೆಂ. ಕಿಸ್ಣನ್ ‘ಸೊರ್ರಿ’ ಮ್ಹಳೆಂ. ತೆಂ ಫಕತ್ ಹಾಸ್ಲೆಂ.

ತೆಂ ಹಾಸ್ಲೆಂ!! ಜಗ್ಗು, ವಿನ್ನು, ಗೋಪಾ ಆನಿ ಹಾಂವ್ ದೊಳೆ ಕೊಂಗೆ ಕರ್ನ್ ಪಳೆವ್ನ್‌ಚ್ ಬಾಕಿ. “ಹಾಯ್, ಹಾಯ್ ರೋಮಿಯೊ... ಉಟ್ತಾನಾ ಕೊಣಾಚೆಂ ತೋಂಡ್ ಪಳೆಲ್ಲೆಂರೆ?” ಜಗ್ಗಾನ್ ಕೊಲಾಯ್ಲೆಂ.

“ದೆಕ್ಲೆಂರೆ ದೆಕ್ಲೆಂ ಪಾಟಿಂ ಘುಂವೊನ್ ದೆಕ್ಲೆಂ,

ಪರ್ತುನ್ ಪಾಟಿಂ ದೆಕ್ಲೆಂ ಪೊಪಾಯ್‌ಪರಿಂ ಪಿಕ್ಲೆಂ” - ಮ್ಹಜಿ ಏಕ್ ಶಾಯರಿ  ಉಸಳ್ಳಿ.

ಸುಮಿ ಪರತ್ ಪಾಟಿಂ ಘುಂವೊನ್ ಕಿಸ್ಕ್ ಕರ್ನ್ ಹಾಸ್ಲೆಂ, ಸಾಂಗಾತಾಚ್ ತಾಚ್ಯೊ ಇಶ್ಟಿಣ್ಯೊ.

ದುಸ್ರೆ ಸಕಾಳಿಂ ಜಗ್ಗಾನ್ ಏಕ್ ನವಿಚ್ ಖಬರ್ ಸಾಂಗ್ಲಿ: ಸುಮಿನ್ ಕಿಸ್ಣಕ್ ಚೊಕ್ಲೆಟ್ ದಿಲೆಂ ಖಂಯ್.

“ತುಕಾ ಕೊಣೆಂ ಸಾಂಗ್ಲೆಂರೆ?”

“ಖುದ್ಧ್ ಪಳೆಲೆಂರೆ!”

ಸಕ್ಡಾಂಕೀ ಸತ್‌ಚ್.

ಶಾಯರಿ ಪಾಟ್ಲ್ಯಾನ್ ಶಾಯರಿ ಘುಂತ್ಲ್ಯೊ. ಸುಮಿ ಹರ್ಯೆಕ್ ಶಾಯರಿ ಕಾನ್ ನೀಟ್ ಕರ್ನ್ ಆಯ್ಕಾತಾಲೆಂ... ಕಿಸ್ಕ್ ಕರ್ನ್ ಹಾಸ್ತಾಲೆಂ.

ಮೇಬರ್ ಟಿಚೆರ್ ಲೆಕ್ಕ ಶಿಕವ್ನ್ ಆಸ್ಲಿ.

ಹಾಂವ್ ವ್ಹಳೂ ಪುಸ್ಪಸ್ಲೊಂ.

‘ಗಾಲಾರ್ ಫೊಂಡ್ಕುಲೆ ಕೂಲ್ ಕೂಲ್

ತಾಚೆರ್ ಆವಾಳೆ ಗೋಲ್ ಗೋಲ್

ತಾಕಾಚ್ ಕಿಸ್ಣ ಆಮ್ಗೆಲೊ ಉಚಾಂಬಳ್’

‘ಕಿಸ್ಕ್’ ಕರ್ನ್ ಜಾಲ್ಲ್ಯಾ ಆವಾಜಾಕ್ ಮೇಬಲ್ ಟಿಚೆರ್ ಘುಂವ್ಲಿ. ಸುಮಿನ್ ದಯಾ ದಾಕ್ಶೆಣ್ ನಾಸ್ತಾಂ ಮ್ಹಜೆರ್ ಬೋಟ್ ಜೊಕ್ಲೆಂ. ಮಾಗಿರ್ ಕಾಣ್ಘೆನಾಂಯ್... ಬೆತಾಚೆ ಮಾರ್. ಬುಖಾಂಡ್ಯಾರ್ ದಾಡ್ಕಾಂ ಉದೆಲ್ಲಿಂ. ಖಂಚಾಯಿತ್ ಘರಾ ಗೆಲೊಂ. ದೋನ್ ದೀಸ್ ಪಾಟಿಂ ಶಾಳಾಕ್ ಆಯ್ಲೊ ನಾಂ.

ಸಾಂಜೆರ್ ಜಗ್ಗಾ ಘರಾ ಆಯಿಲ್ಲೊ. ಕಿಸ್ಣ ಆನಿ ಸುಮಿ ವಿಶ್ಯಾಂತ್ ಖೂಬ್ ಸಾಂಗಿಲಾಗ್ಲೊ. ಸುಮಿನ್ ನವೆಂ ಪೆನ್ನ್ ದಿಲ್ಲೆವಿಶಿಂ, ಕಿಸ್ಣನ್ ನೋಟ್ಸ್ ಬರಂವ್ಕ್ ದಿಲ್ಲೆವಿಶಿಂ... ಛೆ! ಮತ್ ಪಿಸಾಂತುರ್ ಜಾಲಿ. ಹಾಂವೆಂ ಮುಟ್ ಆಂರ್ದಿಲಿ.

ದುಸ್ರ್ಯಾ ದಿಸಾಚ್ ಕ್ಲಾಸಿಕ್ ಗೆಲೊಂ. ಮೇಬಲ್ ಟಿಚೆರಿಚಿ ಕ್ಲಾಸ್. ಹಾಂವೆಂ ಪಾಟಿಂ ಮುಕಾರ್ ಪಳೆಲೆಂ ನಾ. ಹಾಂವೆಂ ನಿಚೆವ್ ಕರ್ನ್ ಜಾಲ್ಲೊ.

ಕಿಸ್ಣಚಿ ಏಕ್ ವ್ಹಾಣ್ ವ್ಹಳೂ ಸುಮಿಚಾ ಕಡ್ತರಾ ಬಗ್ಲೆನ್ ದವರ್ನ್ ಸುಮಿಚೆಂ ಆನ್ಯೇಕ್ ಕಡ್ತಾರ್ ಕಿಸ್ಣಚಾ ವ್ಹಾಣಾಕಡೆ ದವರ್ನ್ ಹಾತ್ ಧುಲೆ. ಕಿಸ್ಣಕ್ ಖಬರ್‌ಚ್ ನಾ. ಜಗ್ಗ, ವಿನ್ನು ಆನಿ ಹೆರ್ ಕಿತೆಂ ಜಾತಾ ಪಳೆಂವ್ಕ್ ರಾಕೊನ್ ರಾವ್ಲೆ. ಹೆ ಕುಸುಕುಸು ಹಾಸ್ತಾಲೆ ತರೀ ಕಿಸ್ಣಕ್ ಕಿತೆಂಚ್ ಕಳೊಂಕ್ ನಾ. ತೊಯ್ ಸಾಂಗಾತಾ ಮೆಳೊನ್ ಮಾಂಕ್ಡಾಪರಿಂ ಹಾಸ್ತಾಲೊ.

ಟಿಚೆರ್ ಗೆಲಿ. ತಿಸ್ರೆ ಪಿರೇಡಿಕ್ ಅನಿತಾ ಮೇಡಂ ಯೇಂವ್ಕ್ ವೇಳ್ ಆಸ್‌ಲ್ಲೊ. ಸುಮಿ ಕಡ್ತಾರಾಖಾತಿರ್ ಸಾಸ್ಪೊಂಚೆಂ ದೆಕ್ಲೆಂ. ಹಾಂವೆಂ ಜಗ್ಗ, ವಿನ್ನು, ಗೋಪಾ ಉಸ್ವಾಸ್ ಬಾಂದುನ್ ಕಾಂಯ್ ಗೊತ್ತುನಾ ಮ್ಹಳ್ಳೆಪರಿಂ ಏಕ್ ದೊಳೊ ಸುಮಿ ಆನಿ ಕಿಸ್ಣಚೆರ್ ದವರ್ನ್ ಹೆವ್ಶಿನ್ ತೆವ್ಶಿನ್ ಪಳೆತಾಲೆ.

ಸುಮಿಕ್ ಕಿಸ್ಣಚಿ ವ್ಹಾಣ್ ಮೆಳ್ಳಿ ದಿಸ್ತಾ. ಪಾಟಿಂ ಚಿಲ್ಲುನ್ ತೊ ಪಾಟಿಂ ಘುಂವ್ಲೆಂ. “ಥು... ತುಕಾ ಲಜ್ ದಿಸಾನಾ... ಮ್ಹಜಿ ವ್ಹಾಣ್ ಪಾಟಿಂ ದೀ” ಸುಮಿ ಸಾಂಗಾತಾ ತಾಚಿಂ ಸಾಂಗಾತಿಣಿಂಯ್ ಯೆಟುಂಕ್ ಲಾಗ್ಲಿಂ. ಕಿಸ್ಣಕ್ ಕಿತೆಂ ಘಡ್ತಾ ಮ್ಹಣ್‌ಚ್ ಸಮ್ಜೊಂಕ್‌ನಾ. ಹಾಂವೆಂ ಚಲಾಕೆನ್ ಸುಮಿಚೆಂ ಕಡ್ತಾರ್ ಪಾಟಿಂ ಲೊಟ್ಲೆಂ. ಕಡ್ತಾರ್ ಮೆಳ್‌ಲ್ಲೆಂಚ್ ತೆಂ ಸವ್ಕಾಸ್ ಥಂಡ್ ಜಾಲೆಂ. ಕಿಸ್ಣಚೆಂ ರಡ್ಣೆಂ ಸುರುಚ್! ಜಗ್ಗಾ ಭುಜಯ್ಲಾಗ್ಲೊ.

ದನ್ಪಾರಾಂ ಜೆವ್ಣಾಚೊ ವೇಳ್. ಆಮಿ ಭಾಯ್ಲ್ಯಾ ಖಾಟ್ಯಾರ್ ಬಸೊನ್ ಜೆಂವ್ಚೆಂ ತರ್ ಚೆಡ್ವಾಂ ಕ್ಲಾಸಿಂತ್‌ಚ್ ಬಸ್ತಾಲಿಂ. ಹರ್ಶೆಚೆಂಪರಿಂ ಕೊಣೀ ಉಲಯ್ನಾಂತ್. ಕಿಸ್ಣ ಆಮ್ಚ್ಯಾ ಪಂಗ್ಡಾಂತ್ ನಾತ್‌ಲ್ಲೊ. ಹಾಂವ್ ಉದಕ್ ಹಾಡುಂಕ್ ಮ್ಹಣ್ ಉಟೊನ್ ಕ್ಲಾಸಿಕ್ ಗೆಲೊಂ. ಸಗ್ಳ್ಯಾ ಚೆಡ್ವಾಂಚಿ ದೀಶ್ಟ್ ಮ್ಹಜೆರ್ ಪಡ್ಲಿ.

ಕೋಣ್‌ಗಿ ‘ಕುಸು...ಕುಸು’ ಕರ್ನ್ ಭಿಕ್ಕೊಂಚೆ ಆಯ್ಕಾಲೆಂ. ಸುಮಿಕ್ ತಾಚ್ಯಾ ಸಾಂಗಾತಿಣೆಂನಿ ವೆಡೊ ಘಾಲ್ಲೊ. ಹಾಂವೆಂ ಪಾಂಯ್ ಕಾಡ್ಲೆ.

ಸಾಂಜೆರ್ ಸಕ್ಡಾಂ ಗೆಲ್ಲಿಂ. ಹಾಂವ್ ಕ್ಲಾಸ್‌ರೂಮ್ ಜಾಡುಂಕ್ ಆಸ್‌ಲ್ಲ್ಯಾನ್ ಚಿಕ್ಕೆ ಪಾಟಿಂ ಉರ್ಲೊಂ. ಆಮ್ಸೊರಾನ್ ಧಾಂವೊನ್ ಯೆತಾನಾ ಗೆಟಿಲಾಗಿಂ ಸುಮಿ ಎಕ್ಲೆಂಚ್ ಆಸ್‌ಲ್ಲೆಂ. ಮ್ಹಜಿ ಚಾಲ್ ರಾವ್ಲಿ. ಕಾಳ್ಜಾಂತ್ ದಡ್ದಡೆ ಸುರು ಜಾಲೆ... ತಕ್ಲಿ ಪಂದಾ ಘಾಲಿತ್ ತಾಚೆ ಲಾಗ್ಶಿಲ್ಯಾನ್ ಪಾಶಾರ್ ಜಾತಾನಾ - “ಪುರು’’ ಸುಮಿ ಮ್ಹಣಾಲೆಂ.

“ಹಾಂ... ಹಾಂ...” ಹಾಂವ್ ಗಾಗೆಲೊಂ.

“ಸೊರ್ರಿ ಜಾಯ್ತೆ...” ತೆಂ ಮ್ಹಣಾಲೆಂ.

ಹಾಂವೆಂ ದೊಳೆ ಮೆಳಯ್ಲೆ. “ಪೋರ್ ಮ್ಹಜೆವರ್ವಿಂ ತುಕಾ ಮಾರ್ ಪಡ್ಲೆ. ಸೊರ್ರಿ ಜಾಯ್ತೆ. ಬೆಜಾರ್ ಕರಿನಾಕಾ. ಪೂಣ್ ಶಾಯರಿ ಸಾಂಗ್ಚಿ ರಾವಯ್ನಾಕಾ. ಮ್ಹಸ್ತ್ ಖುಶಿ ಜಾತಾ... ಹಾಸೊ ತಡ್ವುಂಕ್ ಪಳೆತಾಂ...” ಎಕಾಚ್ ಧಮ್ಮಾನ್ ತೆಂ ಸಾಂಗ್ತಾನಾ, ಹಾಂವ್ ಪೆಂಗಾಪರಿಂ ತಕ್ಲಿ ಹಾಲಯಿತ್ ವೆವೆಗಿಂ ಮೆಟಾಂ ದೆಂವ್ಲೊಂ... ಜಗ್ಗುಚಾ ದೊಳ್ಯಾಂಕ್ ಪುಣೀ ಸಾಂಪಡ್ಲ್ಯಾರ್ ಮ್ಹಾಕಾ ಬರ್ಕಾತ್ ನಾ.

ಘರಾ ವಚೊನ್ ಗಳ್ಗಳ್ಯಾಂ ರಡ್‌ಲ್ಲೊಂ...

ಕಿಸ್ಣಚೊ ಬಾಪಯ್ ಪೊಲಿಸ್‌ನೇ, ವರ್ಗಾವರ್ಗಿ ಜಾತಾನಾ ಸಕ್ಡಾಂಕ್ ಘೆವ್ನ್ ಗಾಂವ್ ಸಾಂಡುನ್ ಗೆಲೊ. ತೊ ಮೆಳ್ಳೊನಾ... ತುಂ, ಸುಮಿ ಆಜ್ ಮೆಳ್ಳೆಂಯ್. ಕಿತೆಂ ಮ್ಹಳೆಂಯ್ ತುವೆಂ?

“ಕಶೆಂ ಚಲ್ತಾ ಸಗ್ಳೆಂ... ಶ್ರೀಮತಿ ಆನಿ ಭುರ್ಗಿಂ... ಕಿತ್ಲಿಂ ಭುರ್ಗಿಂ ತುಕಾ?"

ತುಜ್ಯಾ ಆನಿ ಕಿಸ್ಣಾಚಾ ದುಕಾಂಚೊ ಶಿರಾಪ್ ಕೊಣ್ಣಾ. ಶ್ರೀಮತಿಕ್ ಮ್ಹಜಿ ಸಾವ್ಳಿಚ್ ಜಾಯ್ನಾ ಆನಿ ಜಲ್ಮಾಲ್ಲೆಂ ಏಕ್ ಭುರ್ಗೆಂ... ತಾಚೆಂ ವದನ್ ಪಳೆನಾಸ್ತಾಂ ಲಾಗಿಂ ಲಾಗಿಂ ದೇಡ್ ವರ್ಸ್ ಜಾಲೆಂ! ಹೆಂ ಪೂರಾ ವಿಸ್ರೊಂ ಮ್ಹಳ್ಯಾರ್... ಕಶೆಂ? ತುಂ ಬರೆಂ ಆಸಾಯ್‌ಮೂ, ಸುಮಿ...ಹಾಂ?

ಪಾವ್ಸ್ ಬಳ್ ಜಾಲ್ಲೊ. ಶೆಳೆರ್ ಮಾರ್ನ್ ಪೇಂಟ್ ದೊಂಪ್ರಾ ಪರ್‌ಯಾಂತ್ ಭಿಜ್‌ಲ್ಲ್ಯಾಚಿ ಖಬರ್ ನಾ.

ಮ್ಹಜೆಂ ಬಸ್ ಯೇವ್ನ್ ರಾವ್‌ಲ್ಲೆಂ. ಹಾಂವ್ ಧಾಂವ್ಲೊಂ.