ಕಾಳ್ಜಾ ಗಾಜ಼್

ಪರತ್ ಕಾರ್ಟೂನ್ ಸೊಡೊಂವ್ಕ್ ಬಸ್ತಾನಾ…

ಯಾದ್ ಹೈಸ್ಕೂಲಾಚಾ ದಿಸಾಂನಿ ಘಾಂಟೆತಾ. ಆಟ್ವೆ ಥಾವ್ನ್ ಧಾವಿ ಪರ್ಯಾಂತ್ ಸಿದ್ದಕಟ್ಟೆಚ್ಯಾ ಸರ್ಕಾರಿ ಇಸ್ಕೊಲಾಂತ್ ಶಿಕ್ ಲ್ಲೊಂ. ಮ್ಹಜೆ ಸಾಂಗಾತಾ ಶಿಕ್ ಲ್ಲಿಂ ಚಡಾವತ್ ಕ್ರಿಸ್ತಾಂವ್ ಭುರ್ಗಿಂ “ಹೆಬ್ಬೆ.. ಸರ್ಕಾರಿ ಗಿ?’ ಮ್ಹಣ್ ತೋಂಡ್ ಹಿಂವ್ಳಾವ್ನ್ ಪಯ್ಸ್ ಹೈಸ್ಕೂಲಾಕ್ ಗೆಲಿಂ. ವ್ಹಚೊಂದಿ ಪೆಲ್ಯಾನ್!  ಸರ್ಕಾರಿ ಮ್ಹಳ್ಯಾರ್ ತಿತ್ಲೆಂಯ್ ಸಸಾರ್ ಗಿ? ಮ್ಹಜೆಂ ಸರ್ಕಾರಿ ಇಸ್ಕೊಲ್ ಸೂಪರ್ರ್..

ತೆಂ ಆಸೊಂ, ತ್ಯಾ ಹೈಸ್ಕೂಲಾಂತ್ ಕನ್ನಡ ಶಿಕಂವ್ಚ್ಯಾ ಮಮತಾ ಮೇಡಮ್ಮಾನ್ ಇಸ್ಕೊಲಾಚ್ಯಾ ಪ್ರವೇಶಾರ್ ಆಸ್ಚ್ಯಾ ನೋಟಿಸ್ ಬೊರ್ಡಾಂಚಿ ಜವಾಬ್ದಾರಿ ಮ್ಹಾಕಾ ದಿಲ್ಲಿ. ಕೊಣೀ ಭುರ್ಗಿಂ ತೆಣೆಂ ಹುಂಗೊನೀ ಪಳೇನಾತ್ಲಿಂ! ತ್ಯಾ ಬೊರ್ಡಾರ್ ಖಬ್ರೆ ಪತ್ರಾಂತ್ ಆಯಿಲ್ಲಿಂ ಲೇಕನಾಂ, ವಿದ್ಯಾರ್ಥಿಂನಿ ದಿಲ್ಲಿಂ ಲೇಕನಾಂ, ಕವನಾಂ ಉಮ್ಕೊಳಾಂವ್ಚಿ ಜವಾಬ್ದಾರಿ ಮ್ಹಜಿ!

ಹಾಂ! ಹಾಂವ್ ಚ್ ಸಂಪಾದಕ್! ತೊ ನೋಟಿಸ್ ಬೋರ್ಡ್ ಚ್ ಮ್ಹಜೆಂ ಪತ್ರ್!!

ತವಳ್ ರಾಕ್ಣೊ ಪತ್ರಾರ್ ಬಿ. ವಿಲ್ಸನ್ ನಾಂವಾಚೊ ವೆಂಗ್ಯ್ ಚಿತ್ರ್ ಕಾರ್ ಬಾರೀಚ್ ಚಿತ್ರಾಂ ಫಾಯ್ಸ್ ಕರ್ತಾಲೊ. ಸರಳ್ ಪುಣ್ ಬಾರಿಚ್ ಮಜೆಚಿಂ ವೆಂಗ್ಯ್ ಚಿತ್ರಾಂ. (ಉಪ್ರಾಂತ್ ಹಾಂವೆಯಿ ಬಿ. ವಿಲ್ಸನಾಪರಿಂಚ್ ರಾಕ್ಣೊರ್ ವೆಂಗ್ಯ್ ಚಿತ್ರಾಂ ಕೆಲ್ಲಿಂ ಆಸಾತ್. ತ್ಯಾ ಉಪ್ರಾಂತ್ ’ಕಾಜುಲೊ’ ಪತ್ರಾರ್ ವೆಂಗ್ಯ್ ಚಿತ್ರಾಂಚಿ ಸುಗ್ಗಿ ಲುಂವ್ ಲ್ಲಿ ಯ್ ಆಸಾ!)

ತ್ಯಾ ಉಪ್ರಾಂತ್ ಮ್ಹಾಕಾ ಕನ್ನಡ ದಿಸಾಳ್ಯಾಂನಿ ಪಿ. ಮಹಮ್ಮದ್ ಕಾರ್ಟೂನಿಸ್ಟ್ ಝಳ್ಕೆಕ್ ಪಡ್ಲೊ. ತಾಣೆಂ ಸೊಡಂವ್ಚಿಂ ರಾಜಕೀಯ್ ವೆಕ್ತಿಚಿಂ ಚಿತ್ರಾಂ ತ್ಯಾ ದಿಸಾಂನಿ ಕೊಪಿ ಕರ್ನ್, ಮ್ಹಳ್ಯಾರ್ ತಾಚೆಪರಿಂಚ್ ಸೊಡವ್ನ್ ವ್ಹರ್ನ್ ತ್ಯಾ ನೋಟೀಸ್ ಬೊರ್ಡಾರ್ ಚಿಡ್ಕಾಂವ್ಚೆಂ ಆಸ್ ಲ್ಲೆಂ.

ಸವ್ಕಾಸ್ ಟಿಚರಾಂಚೆ ಆನಿ ವಿದ್ಯಾರ್ಥಿಂಚೆ ದೊಳೆ ನೊಟಿಸ್ ಬೊರ್ಡಾ ತೆವ್ಶಿಂ ಘುಂವ್ಲೆ!!

ಮ್ಹಾಕಾ ಹೆಂಚ್ ಪುರೊ ಆಸ್ಲೆಂ. ಹಾಂವೆ ಸ್ವಂತ್ ವೆಂಗ್ಯ್ ಚಿತ್ರಾಂ ರಚ್ಲಿಂ. ಹೊಗ್ಳಿಕ್ ಯಿ ಮೆಳ್ಳಿ. ಸ್ಕೂಲ್ ಡೇ, ಟೀಚರ್ಸ್ ಡೇ.. ಆಶೆಂ ಕಸಲೆಯ್ ದೀಸ್ ಆಚರಣ್ ಆಸ್ಲ್ಯಾರ್ ನೋಟೀಸ್ ಬೊರ್ಡಾರ್ ವೆಂಗ್ಯ್ ಚಿತ್ರಾಂಚಿ ರಾಸ್. ಸಕ್ಡಾಂ ಫ್ರೀ ಟಾಯ್ಮಾರ್ ಥಂಯ್ಚ್ ರಾಸ್ ಪಡ್ತಾಲಿಂ.

’ದೇವ್ ದಾಸ್” ಮಾಸ್ಟ್ರಾನ್ ಮ್ಹಜಿ ಪಾಟ್ ಥಾಪ್ಡುನ್ ’ಇಂವ ಮಾತ್ರ ಬುದ್ಧಿ ಜೀವಿ.. ಬಾಕಿ ಎಲ್ಲಾ ಬುತ್ತಿ ಜೀವಿಗಳು” ಮ್ಹಣ್ ದಿಲ್ಲಿ ಪ್ರಶಸ್ತಿ ವಿಸ್ರುಂ ಕಶೆಂ?

ಆತಾಂ ಪರ್ತುನ್ ಕಾಂಯ್ ತರೀ ಸೊಡಂವ್ಚಿ ತಾಳ್ಣಿ ಆಯ್ಲಿ. ಎಕಾ ವೆಂಗ್ಯ್ ಚಿತ್ರ್ ಕಾರಾಕ್ ತಾಳ್ಣಿ ಖಂಯ್ ಥಾವ್ನ್ ಯೆತಾ ಸಾಂಗಾ? ರಾಜಕೀಯಾಥಾವ್ನ್!!

ರಾಜಕೀಯ್ ಚ್ ಎಕಾ ವೆಂಗ್ಯ್ ಚಿತ್ರಾಕಾರಾಕ್ ವ್ಹಡ್ಲೊ ಬಂಡ್ವಾಳ್. ತಾಚಿ ಮೊಡ್ಕಿ ರಾಂಡ್ಣಿರ್ ಚಡ್ಚಿಚ್ ರಾಜಕೀಯ್ ಆಸ್ ಲ್ಲ್ಯಾನ್ ಮ್ಹಣ್ ಮ್ಹಜಿ (ಮೂಢ್) ಪಾತ್ಯೆಣಿ (!).

ಮ್ಹಾಕಾಯಿ ತಾಳ್ಣಿ ಹಾಡ್ ಲ್ಲ್ಯಾ ರಾಜಕೀಯ್ ಮುಕೆಲ್ಯಾಂಕ್ ಥ್ಯಾಂಕ್ಸ್ ತರಿ ಮ್ಹಣಾಜೆ ನ್ಹಯ್?