ಕಾಳ್ಜಾ ಗಾಜ಼್

ಮರಿ ಮಾಗ್ದಲೆನ್ ಆನಿ ನಜರೆತಿಚ್ಯಾ ಜೆಜು ಮಧೆಂ ಕಿತೆಂಗೀ ಆಸಾ... ಮ್ಹಣ್ ಮೀಟ್ ಆನಿ ಖೊಲೊ ಕಾಣ್ಘೆವ್ನ್ ತಯಾರ್ ರಾಂವ್ಚೆ ಆಸಾತ್! ತಾಂಚೆ ಮಧೆಂ ಆಸ್ ಲ್ಲೊ  ಮಧುರ್ ಮೋಗ್ ವ ಭಿರ್ಮತೆ ಕೂಪ್ ವ ಆಕರ್ಶಣ್ ವ ಸೊಮಿ ಅನಿ ಶಿಸಾ ಮಧ್ಲೊ ಭಾಂದ್.... ತೆಂ ಸಗ್ಳೆಂ ದೇವ್ ಶಾಸ್ತ್ರಿ ವರವ್ನ್, ಘುಂತುನ್ ಪಳೆತೆಲೆ.

ಪಾತ್ಕಿ (ವೆಭಿಚಾರಿ) ಮ್ಹಣ್ ತವಳ್ ವ್ಹಳ್ಕಾಲ್ಲಿ ಸ್ತ್ರೀ ಆಜ್ ತಶಿ ಉರೊಂಕ್ ನಾ! ತಿಕಾ ಆಜ್ ಸಾಂತಿಣಿಚೊ ಮ್ಹಾನ್ ಲಾಭ್ಲಾ. ಕರೆಜ್ಮಾಚೊ ಕಾಳ್ ಹೊ. ಏಕ್ ಸತ್ ಮತಿಂತ್ ಖಂಚೊಂಕ್ ಫಾವೊ – ಹರ್ಯೆಕಾ ಸಾಂತಾ ಪಾಟ್ಲ್ಯಾನ್ ಆಯ್ಭ್ ಆಸಾ. ಹರ್ಯೆಕಾ ಪಾತ್ಕ್ಯಾಕ್ ಫಾಲೆಂ ಆಸಾ!

ತೆ ಘುಂವ್ಡೆರ್

ಅಜೂನ್ ತೆ ಘುಂವ್ಡೆರ್

ಭೆಟ್ ಲ್ಲ್ಯಾ ಚಾರ್ ಮೆಟಾಂಚಿ

ಉಟ್ತಾ ಜಿವಿ ಮ್ಹೂರ್

ಆನಿ ತಿ ಮಾಗ್ದೆಲಾಚಿ ಸ್ತ್ರೀ

ವಿಂಚುನ್ ಬಸ್ಲ್ಯಾ

ಶಿಂಪ್ ಲ್ಲ್ಯಾ ಯಾದಿಂಚೊ ಸಾಸ್ವಾಕಣ್

ಫುಡ್ಲ್ಯಾನ್ ಯೆಂವ್ಚೊ ದಿಸ್ಲೊ ತೊ

ಚಿಂತ್ ಲ್ಲೆ ಪರಿಂ ತುರ್ತಾನ್ ಆಯ್ಲೊ ನಾ

ಭೊ ಗ್ ಲ್ಲೆಪರಿಂ ಸವ್ಕಾಸ್ ಪಾವ್ಲೊನಾ

ಹೆರ್ ದಾದ್ಲ್ಯಾಂ ಪರಿಂ ನ್ಹಯ್ ತಿ ಚಾಲ್...

ಮೆಜೂನ್ ಕಾಡ್ ಲ್ಲಿಂ ಮೆಟಾಂ ತಿಂ

ತುಕುನ್ ದವ್ರಿಲ್ಲಿಂ ಪಾವ್ಲಾಂ

ನೀಟ್ ಆಪ್ಣಾತೆವ್ಶಿಂ!

ಅಪುಣ್ ಥಕ್ ಲ್ಲಿ ನಾರಿ

ತೊ ಸಾವ್ಳೆಚೊ ವೊಡಾರೂಕ್

ಸಾವ್ಳೆನ್ ಕಾಂಯ್ ಭುಲಯ್ಲೆಂ?

ವ ಪುರಾಸಣ್ ತೆ ಸಾವ್ಳೆಕ್ ಭುಕೆಲ್ಲಿ?

ಫಕತ್ ಎಕಾ ಮೆಟಾಂಚೊ ಅಂತರ್

ಕೊಣೆಂ ಕಾಡ್ಚೆಂ, ಕೊಣಾಶಿಂ ಪಯ್ಲೆಂ ಮೇಟ್?

ಖರಿಚ್

ಹಿ ಉಸ್ವಾಸ್ ಮೊಡ್ಯಾಚಿ ಭೆಟ್!

ಎಕಾಂತ್ ಕೂಡ್ –

ಜಶೆಂ

ವಿಶ್ವೆ ಎಕಾಮೆಕಾಚೆರ್

ಮೊಗಾರ್ ಪಡ್ಲ್ಯಾತ್

ಶಾಂತ್ ತೆಂ ವದನ್ –

ಜಶೆಂ

ಕಾಳೊಕಾ ವಿಣೆಂ ರಾತ್

ಆವಾಜಾವಿಣೆಂ ದೀಸ್

ಪುಣ್ ಅಪುಣ್....

ಪಾವ್ಸಾಕ್ ಥಂಡ್ ಥಾಪೊ

ಜಾಲ್ಲಿ ಅಕಾಸಾಚಿ ಘೊಣ್

“ಬರೊ ದೀಸ್, ಮಿರಿಯಂ”

ತಾಣೆಂ ಕಾಳ್ಜಾಕ್ ಚಿರ್ಪುಟ್ ಮಾರ್ಲೆಂ,

“ತುಜ್ಯಾ ಪ್ರೇಮಿಂನಿ

ವರ್ಸಾಂನಿ ಆಳ್ವೊನ್ ವೆಚಿ

ಸೊಭಾಯ್ ಚಿಂವ್ಲಿ

ತುಜ್ಯಾ ಗೊಪಾಂತ್ ತೆ

ತಾಂಚ್ಯಾಚ್ ಮೊಗಾರ್ ಪಡ್ಲೆ....

ಬಾಳ್ವೊಂಚಿ ಸೊಭಾಯ್

ಚಿಂವುಂಕ್ ಆಸಾಂ ಹಾಂವ್

ಅಪುಣ್

ತುಜೆಚ್ ಖಾತಿರ್

ತುಜೊ ಮೋಗ್ ಕರ್ತಾಂ”

ಮಾಗಿರ್

ವಾರೆಂ-ವೊರಾಂ

ಸುರ್ಯೊ-ಲಾರಾಂ

ಹಾಲ್ಲಿಂಚ್ ನಾಂತ್

ತಾಣೆಂಚ್ ಏಕ್ ಮೇಟ್

ಮುಕಾರ್ ದವರ್ಲೆಂ

ಮ್ಹಾಕಾ ಮಧೆಂಚ್ ಚಿರುನ್

ತೊ ಪಾಶಾರ್ ಜಾಲೊ!

ತೊ ಚಲಾನಾತ್ಲೊ ವಾಟೆ ವಯ್ರ್...

ತೊಚ್ ದಿಸ್ಲೊ ಜಶಿ ವಾಟ್

ಮ್ಹಜೆ ಭಾಗಿಂತ್ ಜಲ್ಮೊನ್

ಮುಡ್ಲಾಕ್ ಗೆಲೊ ಉಸ್ವಾಸ್