ಏಕ್ ಜಾಯ್ರಾತ್
ತೆಲುಗು ಮೂಳ್: ಶಿವಂ
ಕೊಂಕ್ಣಿಕ್: ಜೊ.ಸಿ.ಸಿದ್ದಕಟ್ಟೆ, ಕಾರ್ಮೆಲಿತ್
“ಪಳೆಯಾಂ, ಏಕ್ ಘಡಿ ಹಾಸ್” ದಿಸಾಳ್ಯಾಂತ್ ಏಕ್ ಟೂತ್‍ಪೇಸ್ಟಾಚೆಂ ಜಾಯ್ರಾತ್ ವಿಚಾರ್ತಾ.
ಹಾಸೊ! ಕಿತ್ಲೆ ದೀಸ್ ಜಾಲೆ ತಾಣೆಂ ಹಾಸೊನ್! ಬೋವ್‍ಶಾ ಪಂದ್ರಾ ವರ್ಸಾಂ ಪುಣೀ ಜಾಲ್ಯಾಂತ್. ವ್ಹಯ್ ಪಂದ್ರಾ ವರ್ಸಾಂ.
ತಾಕಾ ಸತ್ರಾ ಜಾತಾನಾ ಶಾಳಾಮೆಸ್ತ್ರಿ ಕೆಳ್ಯಾಸಾಲಿರ್ ನಿಸ್ರೊನ್ ಪಡ್ಲೊ.
ವೆಂಕಟ್‍ರಾವ್ ಆಸೊಂಕ್ ಪುರೊ. ಪಂಡಿತಾಕ್ ಧರ್ನ್ ರಾವೊಂಕ್ ಗೆಲೆ.
ಮೆಸ್ತ್ರಿನ್ ರಾಗಾನ್ ವೆಂಕಟರಾವಾಚ್ಯಾ ಪಾಟಿರ್ ಬೇತ್ ಪಿಟೊ ಪಿಟೊ ಕೆಲೆಂ. ಸಮೆಸ್ತಾಂ ಹಾಸ್‍ಲ್ಲಿಂ ತವಳ್. ತೊಯ್ ಹಾಸ್‍ಲ್ಲೊ ಸಕ್ಡಾಂ ಸಾಂಗಾತಾ.
ತ್ಯಾ ಹಾಸ್ಯಾಕ್ ತಾಚ್ಯಾ ದೊಳ್ಯಾಂನಿ ದುಕಾಂ ಭರ್ಲಿಂ.
ತೆಂಚ್ ಅಕ್ರೇಕ್ ಪಾವ್ಟಿಂ ಹಾಸ್‍ಲ್ಲೊಉಡಾಸ್. ತ್ಯಾ ಉಪ್ರಾಂತ್ ತಾಕಾ ಹ್ಯಾ ಸಂಸಾರಾಂತ್ ಕಿತೆಂ ಪಳೆವ್ನ್ ಹಾಸಾಜಾಯ್ ಮ್ಹಣ್ ಕಳ್ಳೆಂಚ್ ನಾ.
ಕಾಂಗ್ರೆಸಾಚ್ಯಾಂನಿ ಲಾಠಿಚಾರ್ಜ್ ಖಾಂವ್ಚಿ ಪಳೆಲಿ. ಬಾಯ್ಲ್-ಭುಗ್ರ್ಯಾಂಕ್ ಸೊಡುನ್ ಜಯ್ಲಾಂತ್ ಕುಸ್ಚೆಂ ಪಳೆಲೆಂ.
ಪಿಡೆನಿಮ್ತಿಂ ಅಪ್ಲೊ ಬಾಪುಯ್ ದಾಕ್ತೆರಾಚ್ಯಾ ಶುಶ್ರೂಷೆಚಿ ಸಯ್ತ್ ಗತ್‍ನಾಸ್ತಾಂ ವಳ್ವೊಳೊನ್ ಮೆಲ್ಲೊಯ್ ಪಳೆಲೆಂ. ಬಂಗಾಳಾಚ್ಯಾ ಬೊರ್ಗೊಲಾಂತ್ ಲೊಕಾಂನಿ ಖೊಲೆ ವಿಂಚುನ್ ಖಾಂವ್ಚೆಂಯ್ ಪಳೆಲೆಂ. ಕೋಣ್‍ಯ್ ತ್ಯಾ ದಿಸಾಂನಿ ತಾಕಾ ಹಾಸ್ ಮ್ಹಣ್ ಸಾಂಗೊಂಕ್ ಆಯ್ಲೆನಾಂತ್. ನಿಮಾಣೆಂ ಹೆ ಟೂತ್‍ಪೇಸ್ಟ್ ಜಾಯ್ರಾತ್‍ವಾಲೆ ಸಯ್ತ್.
“ತೊ ಸದಾಂಚ್ ಹಾಸೊನ್ ಅಸ್ತಾ” ಮ್ಹಣ್ತಾಲೆಂ ಹೆಂ ಟೂತ್‍ಪೇಸ್ಟ್ ಜಾಯ್ರಾತ್.
ಜಾಯ್ರಾತಾಚ್ಯಾ ಪಿಂತುರಾಂತ್ಲೆಂ ಮುಕಾಮಳ್ ಹಾಚೆಪರಿಂ ನಾ. ಥೇಟ್ ತಾಚ್ಯಾ ಆಫಿಸಾರಾಚ್ಯಾ ತೊಂಡಾಪರಿಂ ಹಾಸೊನ್ ಆಸಾ.
ತಾಚ್ಯಾ ಅಫಿಸರಾಕ್ ಸಾತ್ಶಿಂ ರುಪಯ್ ಪಾಗ್. ದಫ್ತರಾಕ್ ಕಾರಾರ್ ಯೆತಾ. ಫಾತೊರ್-ಮಾತಿನಾಸ್ತಾಂ ಧವ್ಯಾ ಮೊಗ್ರ್ಯಾ ತಸಲೊ ತಾಂದುಳ್ ರೇಷನ್ ನಾತ್ಲ್ಯಾ ದಿಸಾಂನಿಯ್ ತಾಚ್ಯಾ ಘರಾ ಪಾವ್ತಾಲೊ. ತಾಕಾ ಪಿಡಾ ಆಯ್ಲ್ಯಾ ವೆಳಾ ಡಿ.ಎಂ.ಓ ಘರಾ ಯೇವ್ನ್ ಖುದ್ದ್ ವೊಕಾತ್ ದೀವ್ನ್ ವೆತಾಲೊ. ತೊ ಸದಾಂಚ್ ಹಾಸೊನ್ ಆಸ್ತಾ ಸಯ್ತ್.
“ಬರ್ಯಾ ದಾಂತಾ ಪಂಗ್ತಿ ಥಾವ್ನ್ ಹಾಸೊ ಉಮಾಳ್ಳ್ಯಾರ್ ಭಲಾಯ್ಕಿ,” ಪರತ್ ಜಾಯ್ರಾತ್.
ತಾಚೆಂ ದಾಂತಾಪುರಾಣ್ ಸಾಂಗ್ಚೆಂ ನಾಕಾ. ತಾಕಾ ಭಲಾಯ್ಕಿ ಮ್ಹಳ್ಯಾರ್ ಖೂಬ್ ಸಂತೊಸ್. ಪಂದ್ರಾ ವರ್ಸಾಂ ಆದಿಂ ತೊ ಹಾಸ್ತಾಲೊ. ಪರತ್ ಹಾಸೊನ್ ಭಲಾಯ್ಕೆಭರಿತ್ ಆಸುಯಾಂ ಮ್ಹಳ್ಳೊಚ್ ತಾಚೊ ಉದ್ದೇಶ್. ಪುಣ್ ಆತಾಂ ತಾಕಾ ಹಾಸೊ ಯೇನಾಂತ್.
ದುಸ್ರೆಂ ಮ್ಹಾಝುಜ್ ರಾವ್ಲ್ಯಾ ತಕ್ಶಣ್ ಹಾಸ್‍ಯಾಂ ಮ್ಹಣ್ ಭೊಗ್‍ಲ್ಲೆಂ ತಾಕಾ.
ಝುಜಾಂತ್ ಘೊವಾಂಕ್, ಬಾಪಾಯಾಂಕ್ ಹೊಗ್ಡಾಯಿಲ್ಲೊ ಅಮಾಯಕ್ ಲೋಕ್ ಉಡಾಸಾಕ್ ಅಯ್ಲೊ ತಾಕಾ.
ತಾಂಚೆಂ ರುದಾನ್ ತಾಚ್ಯಾ ಕಾನಾಂತ್ ವಾದಾಳ್ ಉಟಯ್ತಾಲೆಂ. ಹಾಸಾನಾಸ್ತಾಂ ಗೆಲೊ ತೊ.
ಭಾರತ್ ದೇಶ್ ಸ್ವತಂತ್ರ್ ದೇಶ್ ಜಾತಲೊ ಮ್ಹಣಾಲೆ. ವೊಂಟ್ ರುಂದಾಲೆ. ಸಂತೊಸಾನ್ ಸಂಸಾರಾರ್ ಪ್ರತಿಗಾಜ್ ಉಟ್ಚೆಪರಿಂ ಹಾಸ್ಚೊ ತಾಚೊ ಉದ್ದೇಶ್.
ಭಾರತ್ ದೇಶ್ ದೋನ್ ಜಾವ್ನ್ ಕಾಪುನ್ ಗೆಲೊ. ಹಿಂದು ಮುಸ್ಲಿಮಾಂಕ್, ಮುಸ್ಲಿಂ ಹಿಂದ್ವಾಂಕ್ ಕಾಪುನ್‍ಚ್ ಗೆಲೆ. ರಗತ್ ಆವ್ರಾಪರಿಂ ವಾಳ್ಳೆಂ. ತಾಚೆ ವೋಂಟ್ ಬೆಜಾರಾಯೆನ್ ಬಾವ್ಲೆ.
ಪರ್ಜೆರಾಜ್ಯ್ ಮ್ಹಣಾಲೆ, ಖಾಂವ್ಕ್ ಖಾಣ್, ರಾವೊಂಕ್ ಘರ್ ಆಸ್ತೆಲೆಂ ಚಿಂತ್ಲೆಂ ತಾಣೆಂ.
ಪೋಟ್ ಭರ್ ಖಾವ್ನ್, ಪುರ್ಸೊತ್ ಆಸ್ತಾನಾ ಆಂಗ್ಣಾಂತ್ಲ್ಯಾ ಮಾಟ್ವಾಪಂದಾ ಬಸೊನ್ ಪೋಟ್ ಫುಟ್ತಾಸರ್ ಆಮಿ ಹಾಸ್ಚೆಂಚ್ ಆನಿ ಫುಡೆಂ ಮ್ಹಣ್ ಚಿಂತ್ಲೆಂ. ಅಯ್ಲೆಂಚ್ ತಾಂಚೆಂ ಪ್ರಭುತ್ವ್, ತಳ್ಯಾದೆಗೆರ್ ಕೊಟ್ರೆಂತ್ ಆಸ್‍ಲ್ಲ್ಯಾ ರೌಡಿ ಸುಬ್ಬಯ್ಯನ್ ತಾಕಾ ಆಡಳ್ತೆಂ ಚಲಂವ್ಚ್ಯಾ ಪಾಡ್ತಿಕ್ ಭರ್ತಿ ಕೆಲೆಂ; ಮಂದ್ ಹಾಸೊ ದೀವ್ನ್ ಚಲ್ಲೊ.
ಹೊ ಆಜೂನ್ ಸದಾಂಚೆಪರಿಂ ಪಾಗ್-ಗುಲಾಮ್‍ಗಿರಿ ಮ್ಹಣೊನ್, ಭಲಾಯ್ಕಿ ಮ್ಹಣೊನ್ ಫಿಂರ್ಗೊನ್ ಅಸಾ.
“ನಿರ್ಮಳ್, ಶುದ್ಧ್ ತ್ಯೊ ಹಾಸೊ ಆತಾಂಚ್ ತುಮ್ಚ್ಯೊ ಜಾತೆಲ್ಯೊ” ಉತ್ರಾಂ, ಸುಕಿಂ ಉತ್ರಾಂ. ನಿರ್ಮಳ್, ಶುದ್ಧ್ ಆಸ್‍ಲ್ಲೆಂ ಖಂಚೆಂಚ್ ಆಮ್ಚೆಂ ನ್ಹಯ್.
ಹಾಸೊ ಮಾತ್ರ್ ಆಮ್ಚ್ಯೊ ಕಶ್ಯೊ ಜಾತಾತ್? ಶುದ್ಧ್ ಮ್ಹಳ್ಳೆಂ ಕಾಂಯ್ ಉರ್ಲಾಂ ತರ್ ತೆಂ ಆಮ್ಚೆಂ ಮನ್ ಮಾತ್ರ್.
ತೆಂಯಿ ಅಸೊಂಕ್ ನಾತ್ಲೆಂ ತರ್, ಕೆನ್ನಾಂಗಿ ತಾಕಾ ಹಾಸ್ಯೆತ್ ಆಸ್ಲೆಂ. ಸತಾಖಾತಿರ್, ನ್ಯಾಯಾಖಾತಿರ್ ಕಾಳ್ಜಾಕ್ ಕಿತ್ಯಾ ಇತ್ಲೆ ಉಪಾದ್ರ್ ದೀಜೆ? ನಿರ್ಮಳ್, ಶುದ್ಧ್? ಕಸ್ಲಿಂ ಉತ್ರಾಂ ಹಿಂ? ಹ್ಯಾ ಉತ್ರಾಂಚೊ ಅಸ್ಲಿ ಅರ್ಥ್‍ಚ್ ನಾ ಜಾಲಾ ತಾಕಾ. ತಾಣಿಂ ವಾಪಾರ್ಚೆಂ ತೂಪ್‍ಯಿ ಶುದ್ಧ್ ನ್ಹಂಯ್. ತುಮಿ ಖಾಂವ್ಚಿಂ ಖಾಣಾಂ ಭಲಾಯ್ಕೆಭರಿತ್ ನ್ಹಯ್, ತುಮ್ಚ್ಯಾ ಭುಗ್ರ್ಯಾಂನಿ ಪಿಯೆಂವ್ಚೆಂ ದೂದ್, ತಾಕ್ ಶುದ್ಧ್ ನ್ಹಯ್.
ತುಮಿ ಸೆಂವ್ಚೆಂ ವಾರೆಂ ಶುದ್ಧ್? ನಿರ್ಮಳ್? ಘರಾಕ್ ಲಾಗ್ಗಿಂ ಕಾರ್ಖಾನೆ ಆಸೊಂಕ್ ನಜೊ ಖಂಯ್. ತಾಚ್ಯಾ ಘರಾ ಸಾಮ್ಕಾರ್‍ಚ್ ಏಕ್ ಕಾರ್ಖಾನೊ. ರಾತ್‍ಭರ್ ಭುಕ್, ಭುಕ್, ಭುಕ್ ಮ್ಹಣ್ ಎಕ್‍ಚ್ ರಡ್ಣೆಂ. ಸಕಾಳಿಂ ಉಟ್ಚೆಭಿತರ್ ತಾಚ್ಯಾ ಘರಾಭಿತರ್ ಕಾರ್ಖಾನೆಚ್ಯಾ ವಾಯ್ಟ್ ವಾರ್ಯಾಕ್ ತಿ ಧುಳ್ ಉಭೊನ್ ಆಸ್ತಾ.
ದೊಳ್ಯಾಂಕ್ ದಿಸಾನಾತ್ಲಿ ಧುಳ್ ತಿಂ ಸದಾಂಯ್ ಭಿತರ್ ಘೆವ್ನ್ ಆಸಾತ್. ಆಪ್ಲಿ ಭಲಾಯ್ಕಿ ಬರಿಚ್ ಆಸಾನಾ. ಅಪುಣ್ ಕೆದ್ನಾಂಚ್ ಹಾಸನಾ.
ನಿಜಾಯ್ಕೀ, ಸಬ್ದಾಂಕ್ ಮೋಲ್‍ಚ್ ನಾ. ‘ನಿರ್ಮಳ್, ‘ಶುದ್ಧ್’ ಮ್ಹಳ್ಳ್ಯಾ ಸಬ್ದಾಂಕ್‍ಚ್ ನ್ಹಯ್ ಜಾಯ್ತ್ಯಾ ಸಬ್ದಾಂಕ್-ದಯಾ, ಸತ್, ನೀತ್, ಬೂದ್, ನ್ಯಾಯ್ ಇತರ್ ಸಬ್ದಾಂನಿ ಅಸ್ಲಿಪಣ್ ಹೊಗ್ಡಾಯ್ಲಾಂ.
ರಾಜಕೀಯ್ ಕಾರ್ಭಾರ್ಯಾಂನಿ ಚುನಾವಾಂತ್ ಪ್ರಚಾರಾಖಾತಿರ್ ವಾಪಾರ್ಚಿಂ ಅಯ್ದಾಂ ತಿಂ ಅಜ್. ಚುನಾವ್ ಜಾಲ್ಲೊಚ್ ಹೆ ಸಬ್ದ್ ತಾಂಚ್ಯಾ ಸ್ವಂತ್ ಅಸ್ತಿಪರಿಂ ತಶೆಂಚ್ ಭದ್ರ್ ದಾಂಪುನ್ ವೆತಾತ್.
ಕಸೊ ಯೇತ್ ಹಾಸೊ ತಾಕಾ? ಕಸೊ ಜಾಯ್ತ್ ಹಾಸೊ ತಾಚ್ಯೊ?
“ಕಶೆಂ ಮ್ಹಣ್ತಾತ್‍ವೆ? ಅಜ್‍ಚ್ ಖಂಚ್ಯಾಯ್ ಅಂಗ್ಡಿಂತ್ ವಿಚಾರಾ,” ಮ್ಹಣ್ತಾ ಜಾಯ್ರಾತ್.
ಖೂಬ್ ಸೊಸ್ಣಿಕಾಯ್ ತ್ಯಾ ಪರ್ದೆಶಿ ವೆಪಾರಿಂಕ್. ಆಮ್ಚೆ ತಸಲ್ಯಾ ಪಿಶ್ಯಾಂಕ್ ಅಪಾರ್ ವಿಗ್ಯಾನಾದ್ವಾರಿಂ ಹಾಸೊ ಘೆಂವ್ಕ್ ಶಿಕಯ್ತಾತ್.
“ಆಮ್ಚಿಂ ಪೊಟಾಂ ಹುಲ್ಪಾತಾತ್. ಆಮ್ಚೊ ದೇಶ್ ವಾಳಯಾಂನಿ ಖಾವ್ನ್ ಗೆಲಾ. ತುಮ್ಕಾಂ ಕಾಂಯ್ ಕಳಿತ್ ಅಸಾ ತರ್ ಅಮ್ಚ್ಯಾ ದೇಶಾಥಾವ್ನ್ ವಾಳಯ್ ದಾಂವ್ಡಾವ್ಚಿ ಕಶೆಂ ಸಾಂಗುನ್ ದಿಯಾ. ಆಮ್ಚ್ಯಾ ಪೊಟಾಚೊ ಹುಲೊಪ್ ಪಾಲ್ವಂಚಿ ವಾಟ್ ಸಾಂಗಾ. ಆಮ್ಚೊ ದೇಶ್ ಸತ್ವಾನ್ ಭರ್ಲೊಲೊ ಕರ್ನ್ ಘೆತೆಲ್ಯಾಂವ್”, ಮ್ಹಣ್ ಆಡ್ಡೊಸ್ ಮಾಗ್ಲ್ಯಾರ್ ಟೂತ್ ಪೇಸ್ಟ್‍ವಾಲೆ ಹಾಸ್ತಾತ್.
“ತುಮ್ಚ್ಯಾ ದೇಶಾಚಿ ಗಿರೆಸ್ತ್‍ಕಾಯ್ ಆಮ್ಕಾಂ ಜಾಯ್” ಮ್ಹಣಾನಾಂತ್, “ಸಂತೊಸ್‍ಚ್ ಭಲಾಯ್ಕಿ! ಸಂತೊಸಾಚಿ ಕುರ್ಹು ಹಾಸೊ. ಘೆಯಾ ಅನಿ ಹಾಸೊನ್ ಜಿಯೆಯಾ”, ಮ್ಹಣ್ತಾತ್.
ಕಸೊ ಘೆಂವ್ಚೊ ತೊ ಟೂತ್‍ಪೇಸ್ಟ್? ಕಶೆಂ ಹಾಸ್ಚ್ಯೊ ತ್ಯೊ ಹಾಸೊ? ತಾಚೊ ಪಾಗ್ 72 ರುಪಯ್, ತಾಚ್ಯಾ ಅವಯ್ಕ್ ಬಾತ್ತಿಸ್ ದಾಂತ್. ತಾಚಿ ಬಾಯ್ಲ್ ಕಾಪಡ್ ನ್ಹೆಸ್ತಾ. ತಾಚ್ಯಾ ಭಾವಾಕ್ ಇಸ್ಕೊಲಾಚೆಂ ಫೀಸ್ ಭರ್ತಾ. ತೊಗಿ? ತೊ! ತಾಕಾ ಹಾಸಾಜೆÉ ಮ್ಹಣ್ ಭೊಗ್ತಾ ಪುಣ್ ಸಕತ್‍ನಾಸ್ತಾಂ ಗೆಲ್ಯಾ.
“ಲ್ಹಾನ್ ಟ್ಯೂಬ್ ಆಟ್ರಾ ಆಣೆಂ ಮಾತ್ರ್” ಹಾತಾಂತ್ಲೆಂ ದಿಸಾಳೆಂ ಸಕ್ಲಾ ಗಳ್ಳ್ಯಾರೀ ಥಂಯ್ ಥಾವ್ನ್ ಜಾಯ್ರಾತ್ ಬೊಬಾಟ್ತಾ - ಆಟ್ರಾ ಆಣೆಂ ಮಾತ್ರ್! ಹೊ ‘ಮಾತ್ರ್’ ಮ್ಹಳ್ಳೊ ಸಬ್ಧ್ ಭೋವ್ ಬರೊ ಅಸಾ. ದೋನ್ ವರ್ಸಾಂ ಥಾವ್ನ್ ‘ಮಾತ್ರ್’ ತಾಣೆಂ ವ್ಹಾಣೊ ನಾಸ್ತಾಂ ಚಲೊಂಕ್ ಸವಯ್ ಕೆಲ್ಯಾ. ಹಿರೋಷಿಮಾ ನಾಗಸಾಕಿ ವಯ್ರ್ ‘ಮಾತ್ರ್’ ಬೊಂಬ್ ವೊತ್ಲ್ಯಾತ್. ಕೊರಿಯಾಂತ್ 12 ಮಹಿನ್ಯಾಂ ಥಾವ್ನ್ ‘ಮಾತ್ರ್’ ಝುಜ್ ಚಲೊನ್ ಅಸಾ. ಆಂಧ್ರಾಚ್ಯಾ ಲೊಕಾಕ್ ಪಾಂಚ್ ವರ್ಸಾಂ ಥಾವ್ನ್ ‘ಮಾತ್ರ್’ ಬೊರ್ಗೊಲ್. ಭಾರತ್ ದೇಶಾಂತ್ ಜನಸಂಖೊ ನವ್ಯಾ ಗಣತಿ ಪ್ರಕಾರ್ 37 ಕೊರೊಡ್ ‘ಮಾತ್ರ್’.
ಹಾಸ್ತೆಲ್ಯಾಂಕ್ ಆನಿಕ್ ಹಾಸ್ಯೆತ್!
********
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ