ಮೂಳ್:ವೀಣಾ ಬನ್ನಂಜೆ
******************************************************
ಆಸ್‍ಲ್ಲಿ ಏಕ್ ಭಕ್ತಿಕ್.
ಜೆವ್ತಾನಾ- ಖಾತಾನಾ, ಉದ್ಕಾಂತ್, ದುದಾಂತ್ ಸೊಮ್ಯಾಕ್ ಉಲೊ ಮಾರ್ತಾಲಿ. ಮುಡ್ಲಾಚ್ಯಾ ಸುರ್ಯಾಚಿಂ ಕಿರ್ಣಾಂ ಆಂಗಾಕ್ ಪೆÇಶೆತಾನಾ ‘ಯೆ ಸೊಮ್ಯಾ’ ಮ್ಹಣ್ ಆಂಗ್ ಮೊಡ್ತಾಲಿ. ಘರಾಚೆಂ ದಾರ್ ಉಘಡ್ನ್ ‘ರಂಗೋಲಿ’ ಬರಯ್ತಾನಾ ‘ದಾಂಟುನ್ ಯೇ ಸೊಮ್ಯಾ’ ಮಾಗ್ತಾಲಿ. ಘರ್ಚ್ಯಾ ರೂಕ್-ಝಾಡ್, ಸುಕ್ಣ್ಯಾಂಕ್ ಸರ್ವಾಂಕ್ ಸೊಮ್ಯಾಚೊ ಪಾಠ್ ಸಾಂಗ್ತಾಲಿ.
ಸೊಮಿ ಯೇವ್ನ್‍ಚ್ ಸುದ್ಧ್ ಮ್ಹಳ್ಳೆ ಭಕ್ತಿನ್ ಘರಾಕ್ ‘ಸೊಮ್ಯಾ ಘರ್’ ಮ್ಹಣ್ ವೊಲಾಯ್ಲೆಂ. ಭೆಟ್‍ಲ್ಲ್ಯಾ ಭೆಟ್‍ಲ್ಲ್ಯಾಂಕಡೆ ತಾಕಾ ಉಲೊ ಮಾರ್ಲೊ.ಇಷ್ಟಿಣ್ಯಾಲಾಗಿಂ ತಾಚೆವಿಶಿಂ ಗಾವುನ್ ಫುಕಾರ್ಲೆಂ. ತಾಕಾ ಚೊವ್ಪಾಕ್ ಮ್ಹಣ್‍ಚ್ ಹರ್ದೆಂ ಉಸವ್ನ್ ದೊಳೆ ಧುತಾಲಿ. ತೊ ಯೆತಾಚ್ ಮ್ಹಣ್ ಜೀವ್ ಧರ್ನ್ ರಾವ್‍ಲ್ಲಿ.
***
ಏಕ್ ದೀಸ್ ...
ತಿಚೊ ಉಲೊ ಸೊಮ್ಯಾಕ್ ಆಯ್ಕಾಲೊ.
ಭಿರ್ಮತ್ ದಿಸ್ಲಿ.
ಮೊಗಾಳ್ ಹಾತಾನ್ ದಾರ್ ಬಡಯ್ಲೆಂ.
ಭಕ್ತಿಕಾನ್ ದಾರ್ ಉಗಡ್ಲೆಂ.
ದೊಳೆ ಸೊಡ್ನ್ ಪಳೆಲೆಂ, ತಿ ಫುಗ್ಲಿ.
ಪಾತ್ಯೆಂವ್ಕ್ ತ್ರಾಸ್ ಜಾವ್ನ್ ದೊಳೆ ಗಷ್ಟಿಲೆ.
ಸೊಮಿ ಹಾಸ್ತಾಲೊ.
‘ವ್ಹಯ್, ಮ್ಹಜೊ... ಸಪ್ಣಾಂತ್ಲೊ ಸೊಮಿ ಅಯ್ಲಾ!’ ತಿಚೆಂ ಹರ್ದೆಂ ಬೊಬಾಟ್ಲೆಂ. ಹಾತ್ ಕಾಂಪ್ಲೆ.
ಮನ್ ಕಡೊನ್ ದೊಳ್ಯಾಂನಿ ಭರ್ಲೆಂ.
ಕೂಡ್ ಥಿರ್ಲಿನಾ. ಬಾಗ್ವೊನ್ ಪಾಂಯಾಂಕ್ ಪಡ್ಲಿ.
ಸೊಮಿ ಹಾಸ್ತಾಲೊ.
ಉಕಲ್ಲೆಂ, ಗೊಪಾಂತ್ ಲಿಪಯ್ಲೆಂ, ತಕ್ಲಿ ಪೆÇಶೆಲಿ.
ಹಿಚೆ ಜಿಬೆಕ್ ನವೊ ಜೀವ್ ಆಯ್ಲೊ.
“ಯೆಯಾ, ಭಿತರ್ ಯೆಯಾ, ಬಸಾ.” ಆಪ್ಲ್ಯಾ ಹರ್ದ್ಯಾನ್ ತಾಚೊ ಬಸ್ಪಾ ಜಾಗೊ ಪುಸ್ಲೊ.
“ಮ್ಹಜೆಂ ಜಿವಿತ್ ಸಾರ್ಥಕ್ ಜಾಲೆಂ,” ಮ್ಹಣಾಲಿ.
ಪಾಂಯ್ ಧುಲೆ, ಪಾಂಯಾ-ಉದಾಕ್ ಸೆವ್ಲೆಂ.
ಘರ್ಚಾ ದಾರಾಕ್ ಅಯ್ಲಿ.
ಗಳೊ ಫುಮಾರೊನ್ ಇಷ್ಟಿಣ್ಯಾಂಕ್ ಆಪಯ್ಲೆಂ,
“ಯೆಯಾಗೊ, ಹಾಂಗಾ ಪಳೆಯಾ, ಹಾಂವೆಂ ವಿಚಾರ್‍ಲ್ಲೊ, ಸೊಧ್‍ಲ್ಲೊ, ಸೊಮಿ ಅಯ್ಲಾ ಪಳೆಯಾಗೊ, ದೊಳೆಭರ್ ಪಳೆಯಾಗೊ, ಹೊ ತಶೆಂ ಪೂರಾ ಯೆಂವ್ಚೊ ನ್ಹಯ್, ಸಮ್ಜಾಗೊ... ಸುಕ್ಣ್ಯಾಂನೊ, ರುಕಾ ಝಾಡಾಂನೋ, ಯೆಯಾಗೊ, ಆಮಿ ಆಪಯಿಲ್ಲೊ ಸೊಮಿ ಆಯ್ಲಾ.” ಉಮೆದ್ ವಾಳ್ಳಿ.
ಝಾಡ್‍ವಾಲಿಂಕ್ ಹಾಲವ್ನ್ ಅಪಡ್ನ್ ಜಾಗಯ್ಲೆಂ.
ತಿಂ ಸಂತೊಸಾನ್ ಧಲ್ಲಿಂ, ಹಾಲ್ಲಿಂ.
ಸುಕ್ಣೆಂ ಘೊಂಟೆರ್ ಸೊಡ್ನ್ ದಿಗಂತಾಭಾಯ್ರ್ ಉಬ್ಲೆಂ.
ಸೊಮಿ ಹಾಸ್ತಾಲೊ...
****
ಕೊನ್ಶಾಕ್ ಕಾಮಾಚೊ ಚೆಡೊ ಕುರ್ವೊನ್ ಬಸ್‍ಲ್ಲೊ.
ತಾಕಾ ಸೊಮಿ ದಿಸ್ತಾಲೊ. ಅಪ್ಡುಂಕ್ ಭೈಂ.
ಪಯ್ಸ್ ಥಾವ್ನ್ ದೊಳೆಭರ್ ಚೊವುನ್ ಆಸ್ಡ್ಯಾಂನಿ ನಮಾನ್ ಪಾಟಯ್‍ಲಾಗ್ಲೊ.
ಸೊಮಿ ಉಟೊನ್ ತಾಚ್ಯಾ ಪಾಂಯಾ ಪಡೊನ್ ವಂದಿಲಾಗ್ಲೊ.
ಭಕ್ತಿಕಾಚ್ಯಾ ದೊಳ್ಯಾಂತ್ ವಿಜ್ಮಿತ್ಕಾಯೆಚಿ ಸುಳಿ.
“ಹೊ ಸಕ್ಡಾಂಪರಿಂ ನ್ಹಯ್, ಚೊಯ್‍ಗೋ, ಕಿತ್ಲೊ ಮ್ಹಾನ್‍ ಪಳೆಯಾಗೊ,” ತಿ ನಾಚ್ಲಿ.
ಇಷ್ಟಿಣ್ಯಾಂನಿ ಮೌನ್‍ಪಣಿಂ ಪಳೆಲೆಂ, ಫುಲ್ಲಿಂ.
ಸೊಮಿ ಭಾಯ್ರ್ ಸರ್ಲೊ.
ತಿ ರಡ್ಲಿ. “ವಚನಾಕಾ” ಮ್ಹಣಾಲಿ.
ಸೊಮಿ, “ಪರತ್ ಯೆತಾಂ”ಮ್ಹಣಾಲೊ.
ಭಕ್ತಿಕ್, “ನಾಕಾ, ಅತಾಂ ಗೆಲ್ಯಾರ್ ಖಂಯ್‍ಪಾಟಿಂ ಯೆತಾಯ್?” ಮ್ಹಣಾಲಿ.
ಸೊಮಿ, “ತುಮ್ಕಾಂ ಮ್ಹಜ್ಯಾ ಘರಾಚೆಂ ದಾರ್ ಉಗ್ತೆಂಚ್ ಆಸಾ, ಯೆಯಾ.” ಆಪುಣ್ ಆಸ್ಚೊ ಜಾಗೊ ದಾಕಯ್ಲೊ.
ತಿಣೆಂ ದುಖಾಂ ಗಳವ್ನ್ ಧಾಡ್ಲೆಂ.
ದೊಳೊ ತಾಣೆಂ ದಾಕಯಿಲ್ಲ್ಯಾ ಜಾಗ್ಯಾರ್ ಆಸ್ಲೊ.
****
ಆನ್ಯೇಕ್ ದಿಸಾ...ಸೊಮ್ಯಾನ್ ದಾಕಯಿಲ್ಲೊ ಜಾಗೊ...
ಭಕ್ತಿಕಾನ್ ದಾರ್ ಬಡಯ್ಲೆಂ.
ತೊ ಥಂಯ್ಚ್ ಅಸ್ಲೊ.
ಆಪ್ಲ್ಯಾ ಕಾಮಾ ಮಧೆಂಯ್ ದಾರ್ ಉಘಡ್ಲೆಂ.
ಭಕ್ತಿಕಾಕ್ ಪಳೆವ್ನ್ ತಾಣೆಂ ಕಾಮ್ ಸೊಡ್ಲೆಂ.
ತಿಚೆ ಥಂಯ್ ಸಂತೊಸ್ಲೊ, ಸಾಂಗಾತಾ ಅಯಿಲ್ಲ್ಯಾ ಇಷ್ಟಿಣ್ಯಾಂಕ್ ವೇಂಗ್ ಮಾರ್ಲಿ.
ಇಶ್ಟಿಣ್ಯಾಂಕ್‍ಯಿ ಸಂತೊಸ್.
ಭಕ್ತಿಕ್ ಉಲಯ್ಲಿನಾ, ಜೆವ್ಲಿ.
ಆಯ್ಕೊಂಕ್ ನಾ, ದೆಕ್ಲೆಂ.
ಭುಕೆಲಿನಾ, ಧಾದೊಸ್ ಜಾಲಿ
“ಮ್ಹಜೆ ತಸ್ಲಿ ಕಿರ್ಕೊಳ್ ಆಯ್ಲ್ಯಾರೀ ಸೊಮ್ಯಾನ್ ಸತ್ಕಾರ್ ಕೆಲೊ.
ಸಾಂಗಾನಾಸ್ತಾಂ ಗೆಲ್ಯಾರೀ ನೆಗಾರುಂಕ್ ನಾ.
ಆಪ್ಲೆಂ ಕಾಮ್ ಸೊಡ್ನ್ ಅಮ್ಚೆ ಥಂಯ್ ದಯಾ ಕೆಲಿ.
ಸೊಮಿ ವ್ಹರ್ತೊ, ಸೊಮಿ ವ್ಹರ್ತೊ”
ಭಕ್ತಿಕ್ ನಾಚ್ತಾಲಿ.
ತಿಚ್ಯಾ ನಾಚಾಕ್ ಭುಂಯ್‍ಮಾತೆಚ್ಯಾ ಹರ್ದ್ಯಾಕೀ ಪುರಾಸಣ್ ಭೊಗ್ಲಿ. ಇಷ್ಟಿಣ್ಯೊ ವಿಜ್ಮಿತ್ ಪಾವೊನ್ ಸೊಮ್ಯಾಕ್ ಅಪ್ಲ್ಯಾ ಹರ್ದ್ಯಾರ್ ವಾವೊಯ್ತಾಲಿಂ.
ವೇಳ್ ಉತರ್ಲೊ.
ಸೊಮ್ಯಾ ಸಾಂಗಾತಾ ರಾವೊಂಕ್ ಸಕನಾಸ್ತಾಂ ಭಕ್ತಿಕ್ ಹರ್ದ್ಯಾಭೊರ್ ಘೆವ್ನ್ ಪರ್ತಾಲಿ.
“ಯೇ, ವಿಸರ್ನಾಕಾ,” ಮ್ಹಣಾಲಿ.
ಸೊಮಿ ಹಾಸ್ತಾಲೊ...
****
ತಿಸ್ರೆ ಪಾವ್ಟಿಂ...
ತೆಂಚ್ ದಾರ್, ತೊಚ್ ಹಾತ್, ನವೊ ಅವಾಜ್.
ಭಕ್ತಿಕಾನ್ ದಾರ್ ಉಗಡ್ಲೆಂ.
ಪಾತ್ಯೆಂವ್ಕ್ ಜಾಲೆಂ ನಾ, ಆಜ್ಯಾಪ್, ಆಪಯ್ನಾಸ್ತಾಂ ಅಯ್ಲೊ ತರೀ ಕಸ್ಲೊ ಸಂಭ್ರಮ್!
“ಹೊ ಹಾಂವೆಂ ಆಪಯ್ನಾಸ್ತಾನಾಂಯ್ ಯೆತಾ. ಮ್ಹಜೆ ವಯ್ರ್ ಕಿತ್ಲೊ ಮೋಗ್! ಕಿತ್ಲೊ ಮಾಯಾಮೋಗ್!
ಹಾಂವ್ ಭೆಶ್ಟೆಂಚ್ ಸೊಮ್ಯಾವಿಶಿಂ ಭಿಯೆತಾಲಿಂ. ಹೊ ಭಕ್ತಿಕ್ ಕಿತ್ಲೊ ಸಾಧೊ.”
ಭಿತರ್ಲೆ ಭಿತರ್ ತಿಕಾ ಸಂತೊಸಾಚೆಂ ಗರ್ವ್.
“ಯೆಯಾ, ಯೆಯಾ, ಮ್ಹಜೊ ಸೊಮಿ ಆಪಯ್ನಾಸ್ತಾಂ ಯೆತಾ ಮ್ಹಳ್ಯಾರ್ ಕೆದೆಂ ವರ್ತೆಂ ಭಾಗ್ ಮ್ಹಜೆಂ, ಬಸಾ.”
ಖೆಳೊಂಕ್ ಅಯಿಲ್ಲ್ಯಾ ಭುಗ್ರ್ಯಾಂಕ್ ತಿ ವಿಸರ್ಲಿ.
ಜೆಂವ್ಕ್ ಅಯಿಲ್ಲ್ಯಾ ಘೊವಾಕ್ ತಿ ವಿಸರ್ಲಿ.
ಸಂಭ್ರಮುಂಕ್ ಇಷ್ಟಿಣ್ಯೊ ಬಗ್ಲೆನ್ ಅಸ್ಲ್ಯೊ.
ಇಷ್ಟಿಣ್ಯೊ ಸೊಮ್ಯಾಕ್ ಪಾತ್ಯೆಲ್ಯೊ.
ಸೊಮಿ ಅಯಿಲ್ಲೆಪರಿಂಚ್ ವಚೊಂಕ್ ಉಟ್ಲ್ಲೊ. ಪಾಯಾಂಕ್ ತಿಣೆಂ ಧರ್ಲೆಂ, “ಸೊಡ್ಚಿಂ ನಾ” ಮ್ಹಣಾಲಿ.
ರಡ್ಲಿ, “ವಚಾನಾಕಾ” ಮ್ಹಣಾಲಿ.
ಇಷ್ಟಿಣ್ಯೊಯ್ ಪಾಂಯ್ ಸೊಡುನ್ ಉಟ್ಲ್ಯೊನಾಂತ್. ಸೊಮ್ಯಾನ್ ಪಳೆಲೆಂ, ಹಾಸ್ಲೊ...
ಸಕ್ಡಾಂಚೊ ನಮಾನ್ ಘೆತ್‍ಲ್ಲ್ಯಾ ತಾಣೆಂ ಕಾಮಾಚ್ಯಾ ಚೆಡ್ಯಾಕ್ ನಮಾನ್ ಪಾಟಯ್ಲೊ.
ಭಕ್ತಿಕ್ ಚಿಕ್ಕೆ ಘುಸ್ಪಡ್ಲಿ.
ಸೊಮಿ ಗೆಲೊ...
“ಪರತ್ ಯೆತಾಂ” ಮ್ಹಣಾಲೊ.
ಭಕ್ತಿಕ್ ದೊಳೆ ಫುಲವ್ನ್ ಪಳೆಲಾಗ್ಲಿ.
****
ಚೊವ್ತೆ ಪಾವ್ಟಿಂ...
ದಾರಾಚೊ ಆವಾಜ್...
ಕಾಮಾಚ್ಯಾ ಚೆಡ್ಯಾನ್ ದಾರ್ ಉಗಡ್ಲೆಂ.
ಸೊಮ್ಯಾನ್ ಚೆಡ್ಯಾಕ್ ವಂದಿಲೆಂ.
ತಿಣೆಂ ಪಳೆಲೆಂ. ಭಿತರ್ ರಾಗ್ ಶಿಜ್ಲೊ.
“ಹೊ ಕಿತ್ಯಾ ಅಯ್ಲೊ. ಹಾಂವೆಂ ಆಪಂವ್ಕ್ ನಾ. ಫಾಲ್ಯಾಂ ಗಾಂವಾಕ್ ವ್ಹಚುಂಕ್ ಅಸಾ, ದುಸ್ರ್ಯಾನ್... ಮ್ಹಜೆ ಗಡ್ದೆ ಮಧೆಂ ಹೊ?” ಉಲವ್ನಾ, ಭಿತರ್‍ಚ್ ಶಿಜ್ಲಿ. ಸೊಮಿ ಕಾಮಾಚ್ಯಾ ಚೆಡ್ಯಾಚೊ ಪಾಂಯ್ ಸೊಡುನ್ ಉಟ್ಲೊ.
ಹಿಣೆಂ ದೊಳೆ ಅಶೀರ್ ಕರುನ್ ಪಳೆಲೆಂ.
“ಸಾಂಗಾನಾಸ್ತಾಂ ಆಯ್ಲಾಯ್‍ನೆ. ಕಿತೆಂ ಮ್ಹಜಿ ಯಾದ್ ಜಾಲಿ?”
ಸೊಮಿ ಹಾಸ್ಲೊ.
“ಫಾಲ್ಯಾಂ ಗಾಂವಾಕ್ ವಚೊಂಕ್ ಅಸಾ. ಆಂಗ್‍ಭರ್ ಇತ್ಲೆಶೆಂ ಕಾಮ್. ತುಕಾಚ್ ಸಾಂಬಾಳ್ಯೆಯೆತ್‍ನೇ?” ಮ್ಹಣಾಲಿ.
ಇಶ್ಟಿಣ್ಯಾಂಕ್ ಆಪಯ್ಲೆಂನಾ.
ಸೊಮಿ ಹಾಸ್ಲೊ…
“ತಾಂತುಂ ಕಿತೆಂ! ಹಾಂವ್ ಕಾಂಯ್ ತುಜಿ ಸೆವಾ ಕರುಂ?” ವಿಚಾರ್ಲೆಂ. ತಿಚ್ಯಾ ಕಾಮಾಕ್ ಹಾತ್ ದಿಲೊ. ತಿಚಿಂ ವಸ್ತುರಾಂ ಗಡಿ ಕೆಲಿಂ.
ಜೆವ್ಣಾಕ್ ವಾಟ್ಲಿ ಮಾಂಡುನ್ ಜೆವ್ಣಾ ಉಪ್ರಾಂತ್ ಧುವ್ನ್ ಪುಸುನ್ ಪಾಟಿಂ ದವರ್ಲಿ.
ಹರ್ಯೆಕ್ ಪಾವ್ಟಿಂ ಧಾಂವೊನ್ ಯೆಂವ್ಚ್ಯಾ ಇಶ್ಟಿಣ್ಯಾಂಕ್ ಮೆಳೊಂಕ್ ಖುದ್ಧ್ ತಾಂಚ್ಯಾ ಘರಾ ಗೆಲೊ.
ತಾಂಕಾಂ ಸಂಭ್ರಮ್!
“ಹೊ ಭಕ್ತಿಕಾಪಾಸತ್ ಮಾತ್ರ್ ಯೆಂವ್ಚೊ ನ್ಹಯ್, ಅಮ್ಕಾಂಯ್ ಭೆಟ್ತಾ,” ಭಿತರ್ಲೆ ಭಿತರ್ ಫುಗ್ಲಿಂ.
ಭಕ್ತಿಕಾ ಸಂಗಿಂ ತುಲನ್ ಕರಿಲಾಗ್ಲಿಂ.
ತಾಚ್ಯಾ ಉಂಚಾಯೆಂತ್ ಅಪ್ಣಾಕ್ ಮೆಜುಂಕ್ ಲಾಗ್ಲಿಂ.
ಸೊಮಿ ಹಾಸ್ಲೊ, ಪಾಟಿಂ ಆಯ್ಲೊ. ಭಕ್ತಿಕಾಚೆ ಭಿತರ್ ವ್ಹಡ್ಲೊ ದೊಂಬರಾಟ್!
“ಹೊ ಕಸ್ಲೊ ಸೊಮಿ, ಹಾಂವೆಂ ಅಪಂವ್ಕ್‍ನಾ, ಅಯ್ಲೊ, ಆಪಯ್ನಾಸ್ತಾಂ ತಾಚೆಯಿತ್ಲ್ಯಾಕ್ ಆಸ್‍ಲ್ಲ್ಯಾ ಇಷ್ಟಿಣ್ಯಾಂಗೆರ್‍ಯಿ ಗೆಲೊ. ಹೊ ಹಾಂವೆಂ ವ್ಹಳ್ಕಾಲ್ಲೊ ನ್ಹಯ್ ಆಸೊಂಕ್ ಪುರೊ. ತಾಚ್ಯಾ ವೆಸಾರ್ ಆನಿ ಕೋಣ್‍ಗಿ ಆಸ್ತಲೊ. ಮ್ಹಜೊ ಸೊಮಿ ಅಸೊನಾ,” ಸಾಂಗ್ಲೆಂ ನಾ, ಚಿಂತ್ಲೆಂ.
ಭಿತರ್ ಪೆÇಕೊರ್ಣಿ
ಸೊಮಿ ಭಾಯ್ರ್ ಸರ್ಲೊ.
ತಿಣೆಂ ಪರತ್ ಕೆನ್ನಾಂ ಯೆತಾಯ್ ವಿಚಾರ್ಲೆಂ ನಾ.
ಸೊಮಿ ಹಾಸುನ್ ಹಾತ್ ಮುಗ್ದುನ್ “ಪರತ್ ಯೆತಾಂ” ಮ್ಹಣಾಲೊ.
ತಿಕಾ ಆಯ್ಕಾಲೆಂನಾ.
ಇಶ್ಟಿಣ್ಯೊ ತಿಚ್ಯಾ ಸಾಂಗಾತಾ ಆಯ್ಲಿಂ, ತಿ ಮ್ಹಣಾಲಿ,
“ತೊ ಹಾಂವೆಂ ವಳ್ಕಾಲ್ಲೊ ಸೊಮಿ ಆಸೊಂಕ್ ಸಾಧ್ಯ್ ನಾ. ಆಪಯ್ನಾಸ್ತಾಂ ಯೆತಾ. ಚತ್ರಾಯೆನ್ ರಾವ್ಯಾಂ.”
ಇಶ್ಟಿಣ್ಯಾಂನಿ ಮೌನ್‍ಪಣಿಂ ಆಯ್ಕಾಲೆಂ, ಉಲಯ್ಲಿಂನಾಂತ್.
****
ಪಾಂಚ್ವೆ ಪಾವ್ಟಿಂ...
ಸೊಮಿ ಅಯ್ಲೊ, ದಾರ್ ಬಡಯ್ಲೆಂ. ಏಕ್ ನ್ಹಯ್, ದೋನ್ ನ್ಹಯ್, ತೀನ್ ಪಾವ್ಟಿಂ...
ದಾರ್ ಅರ್ದೆಂ ಉಗ್ತೆಂ ಜಾಲೆಂ.
“ಓಹ್! ತುಂಗಿ! ಕಿತೆಂ ಆಯ್ಲೊಯ್? ಮ್ಹಜೆ ಥಾವ್ನ್ ಕಾಂಯ್ ಉಪ್ಕಾರ್?”
ಸೊಮಿ ಹಾಸ್ತಾಲೊ...
“ಆನಿ ಕಿತ್ಯಾಕ್ ಅಯ್ಲಾಯ್?”
ಸೊಮಿ ಹಾಸತ್ ವಿಚಾರಿ, “ಭಿತರ್ ಯೇಂವ್?”
“ಯೇವ್ನ್ ಜಾಲೆಂನೇ, ವಿಚಾರುಂಕ್ ಕಿತೆಂ ಆಸಾ?”
ಭಕ್ತಿಕ್ ದಾರಾಥಾವ್ನ್ ಪಯ್ಸ್ ಸರ್ಲಿ.
ಸೊಮಿ ರಾವೊಂಕ್ ಆಶೆಲ್ಲೊ ತಿತ್ಲೊ ವೇಳ್ ತಿಣೆಂ ದವರ್ನ್ ಘೆತ್ಲೆಂನಾ.
ಸೊಮ್ಯಾನ್ ದೆಕ್ಲೆಂ.
“ವೆತಾಂ” ಮ್ಹಣಾಲೊ
ತಿಣೆಂ ದಾರ್ ಉಸಯ್ಲೆಂ.
“ಪರತ್ ಅಶೆಂ ಯೇನಾಕಾತ್. ಕಾಂಯ್ ತರೀ ಕಾಮ್ ಅಸ್ಲ್ಯಾರ್ ಮಾತ್ರ್ ಯೆಯಾ. ಆಮಿ ಕುಟ್ಮಾದಾರಾಂ, ಆಮ್ಕಾಂ
ತೊಂದ್ರೆ ಜಾತಾತ್” ಮ್ಹಣಾಲಿ. ಸೊಮಿ ಹಾಸ್ಲೊ.
ಹಿಣೆಂ ಘರ್‍ಚ್ ‘ಸೊಮ್ಯಾ ಘರ್’ ಮ್ಹಣ್ ಚಿಂತುನ್ ದಾರ್ ದಾಂಪ್ಲೆಂ.
ಇಶ್ಟಿಣ್ಯೊ ರಾಕ್ಲ್ಯೊ.
ಕಾಮಾಚೊ ಚೆಡೊ ಕೊನ್ಶಾಕ್ ಬಸೊನ್ ರಡ್ತಾಲೊ. ಸುಕ್ಣೆಂ ಘೊಂಟೆರಾಕ್ ಪಾವ್‍ಲ್ಲೆಂ.
ಝಾಡಾಂ-ವಾಲಿ ಸಗ್ಳ್ಯೊ ತಟಸ್ಥ್ ಜಾವ್ನ್ ದುಕಾಂ ಗಳವ್ನ್ ಬಾವ್ಲ್ಯೊ. ಭಕ್ತಿಕ್ ಭಿತರ್ ದಾರ್ ದಾಂಪುನ್ ಸೊಮ್ಯಾಚಿ ಪುಜಾ
ಕರುನ್ ಧ್ಯಾನಾಕ್ ಬಸ್ಲಿ!
*****************************
(ವೀಣಾ ಬನ್ನಂಜೆ, ಆದ್ಯಾತ್ಮಿಕ್ ಬರ್ಪಾಂಕ್ ಕಾನಡಿ ಸಾಹಿತ್ಯಾಂತ್ ಫಾಮಾದ್. ‘ಮನ್, ರುಮ್ಡಿ, ಫಳ್’ ಕಾಣಿ ತಿಚ್ಯಾ ‘ಎಚ್ಚರದ
ಕನಸು’ ಮ್ಹಳ್ಳ್ಯಾ ವಿಶಿಷ್ಟ್ ಕಾಣಿಯೆ ಸಂಗ್ರಹಾ ಥಾವ್ನ್ ವಿಂಚ್ಲ್ಯಾ)
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ