ಮ್ಹಜೆಂ ವಾಚಪ್: ಉಜ್ಯಾ ತುಜ್ಯೆ ವೆಂಗೆಂತ್
"ನಿಜಾಯ್ಕಿ ಹೊ ಕವಿ ಜಿವಿತಾಚ್ಯಾ ಹರ್ಯೆಕ್ ಖಿಣಾಂಕ್ ತೀವ್ರತಾಯೆನ್ ಅನ್ಭವ್ ಕರ್ತಾ, ಆಸ್ವಾದಿತಾ" - ಮುದ್ದು ತೀರ್ಥಹಳ್ಳಿ
ಬಾಪ್ ಜೊಸಿ ಸಿದ್ದಕಟ್ಟೆ ಹಾಂವೆಂ ಪಳೆಯಿಲ್ಲೊ ಏಕ್ ಬೋವ್ ಸುಕ್ಷಿಮ್ ಸಂವೇದನಾಶೀಲ್ ಕವಿ. ಪೇಸ್‍ಬುಕಾರ್ ಸಬಾರ್ ಪಾವ್ಟಿಂ ತಾಂಚ್ಯಾ ಕವಿತಾಂಚೆರ್ ದೊಳೆ ಚರಯ್ತಾನಾ ತ್ಯಾ ಕವಿತಾಂನಿ ಮ್ಹಾಕಾ ಕಾಳ್ಜಾಕ್ ಲಾಗ್ಶಿಲೊ ಸ್ಪರ್ಶ್ ಭೊಗ್ತಾಲೊ. ಆತಾಂ ಹ್ಯಾ ‘ಉಜ್ಯಾ ತುಜ್ಯೆ ವೆಂಗೆಂತ್’ ಕವಿತಾ ಪೆಳ್ಯಾಂತ್ಲ್ಯೊ ಕವಿತಾ ವಾಚ್ತಾನಾ, ತಾಂತ್ಲಿ ಏಕೇಕ್ ಕವಿತಾ ಏಕೇಕ್ ಸಂಸಾರ್ ದಾಕಯ್ತಾನಾ ತಾಂತ್ಲೆಂ ದೂಕ್, ಸಂತೊಸ್, ಸೂಕ್ಷಿಮ್ ಸಂವೇದನ್ ಮ್ಹಜ್ಯಾಚ್ ದೊಳ್ಯಾಂನಿ ದೆಕೊನ್ ಅನ್ಭವ್ ಜೊಡ್ತಾನಾ ಹಾಂವ್‍ಚ್ ಭಾಗಿ ಮ್ಹಣ್ ಚಿಂತ್ತಾಂ. ಬಾಪ್ ಜೊಸಿಚ್ಯೊ ಕವಿತಾ ಎಕಾಚ್ (ಸರಾಗ್) ವಾಚ್ಪಾಕ್ ಲಾಭ್ಚ್ಯೊ ನ್ಹಯ್! ತ್ಯೊ ಗೂಂಡಾಯೆಚ್ಯೊ ಜಾವ್ನಾಸೊನ್, ಥಂಯ್ಸರ್ ಬೋವ್ ಸಶಕ್ತ್ ರಿತಿನ್ ಉಪ್ಯೋಗ್ ಕೆಲೆಂ್ಲ ಅಭೇದ್ ವರ್ಣನ್ ಆಸಾ. ಉಪಮಾಂನಿ ಭರುನ್ ಏಕ್ ಕವಿತಾ ಜಾಯ್ತೆ ಅರ್ಥ್, ಜಾಯ್ತ್ಯೊ ದಿಷ್ಟಿ ಫುಲಯ್ತಾ ಆನಿ ಹಾಂತುಂ ಚಿಂತ್ಪಾಕ್ ಈಟ್ ದಿವ್ಪಿ, ವೈಚಾರಿಕತೆಕ್ ಉತ್ತೇಜನ್ ದಿವ್ಪಿ ಘಟಾಯೆಚ್ಯೊ ಸಂಗ್ತಿ ಆಸಾತ್. ಅಪರಿಮಿತ್ ಮನ್ಶಾ ಮೋಗ್, ಎಕಾಮೆಕಾ ಭಾಂದವ್ಪಣ್, ಶಾಂತಿ, ಮಾಯ್ಪಾಸ್ ನಾಜೂಕೆನ್ ಪಾಜಾರ್ಚ್ಯಾ ಹ್ಯಾ ಕವಿತಾಂಕ್ ಉಜ್ಯಾಚಿ ತೀಕ್ಷ್ಣತಾ ಆನಿ ಕೊಯ್ತೆಚಿ ಧಾರ್‍ಯೀ ಆಸಾ.
ಸಮಾಜೆಚಿ ಭಲಾಯ್ಕಿ ವಿಬಾಡುಂಕ್ ಕಾರಣ್ ಜಾಂವ್ಚ್ಯೊ ಮಾರೆಕಾರ್ ಪಿಡಾ - ದುರ್ಬೊಳ್‍ಕಾಯ್, ಅತ್ಯಾಚಾರ್, ಸ್ತ್ರೀ ಶೋಷಣ್, ಕೋಮು ಹಗೆಂ ಮಾತ್ರ್ ನ್ಹಯ್, ಆಮ್ಚ್ಯೆ ಭಿತರ್ ಆಸ್ಚೊ ಸ್ವಾರ್ಥ್, ದುಸ್ಮಾನ್ಕಾಯ್, ಅಂಧ್ ಆಚರಣ್, ದೆಕಾವೆಚೆಂ ಭಕ್ತಿಪಣ್ ಅÀಸಲ್ಯಾ ವಿಚಾರಾಂಚೆರ್ ಸಶಕ್ತ್ ಖುಲಾಸೊ ಹಾಂಚ್ಯಾ ಕವಿತಾಂನಿ ಕೆಲಾ. ಖುರ್ಸಾ ವ್ಹಯ್ಲೊ ಮೋಗ್, ಮಠ್ವಾಸಿಚಿ ಕವಿತಾ, ಚೋರ್ ಯೇವ್ನ್ ಗೆಲ್ಲೊ, ಉಜ್ಯಾ ತುಜ್ಯೆ ವೆಂಗೆಂತ್, ನಿಸ್ಕಳ್ ಫಾಂತ್ಯಾರ್, ಬೊಲ್ಮೆಂ, ಧಾಂವ್ಚಾ ರಯ್ಲಾರ್, ಆದಾಂವ್ಚೊ ಸ್ವಗತ್, ಶೂದ್ರ್ ಗೋ ಮನಿಸ್, ಅಸಹಾಯಕ್, ಬಿದ್ರ್ಯಾಂ ಪೆಂಟೆಂತ್ಲೊ ಪಾವ್ಸ್ ತಸಲ್ಯೊ ಕವಿತಾ ಜರೂರ್ ವಾಚಿಜೆ.
‘ದಿವೊಡ್, ಸುಕ್ಣೆ ಆನಿ ಬಾಯ್’ ಕವಿತಾ ಸ್ತ್ರೀ ಶೋಷಣ್ ಮ್ಹಳ್ಳ್ಯಾ ಬಂದಡೆ ಥಾವ್ನ್ ಮುಕ್ತ್ ಜಾಂವ್ಚಿ ರೀತ್-ಕಾತ್ ಸಾಂಡ್ಚ್ಯಾ ದಿವ್ಡಾಚಿ ಆನಿ ಪಿಂಜ್ರ್ಯಾ ಥಾವ್ನ್ ಉಬೊನ್ ವೆಚ್ಯಾ ಸುಕ್ಣಾಚಿ ಪ್ರತಿಮಾ ದವರ್ನ್ ಪಿಂತ್ರಾಯ್ಲಾಂ ತರೀ ಹ್ಯೆ ಕವಿತೆಕ್ ಸ್ತ್ರೀ ಸಂವೇದನಾಚ್ಯೆ ದಿಶ್ಟಿನ್ ದೆಕ್ಚ್ಯೆ ಪ್ರಾಸ್ ಅನಿಕೀ ವಿಸ್ತøತ್ ರಿತಿನ್ ಸಮ್ಜುನ್ ಘೆವ್ಯೆತ್. ‘ಆಕಾಂತ್’- ಆಪ್ಲ್ಯಾ ಸಾಡಿಯೆಂತ್ ಸಜ್ಲೆಲ್ಯಾ ಧುವೆಕ್ ಪಳೆವ್ನ್ ಫುಲ್ಚ್ಯಾ ಎಕಾ ಆವಯ್ಚಾ ಅಂತಸ್ಕರ್ನಾಚೆಂ ಚಿತ್ರಣ್,
ಪಾಲಂವ್ ಧರ್ಣಿರ್ ಗಳ್ಳ್ಯಾರಿ ಎಕಾ ಹಾತಾನ್
ಮಿರಿಯೊ ಸಾಂಬಾಳ್ನ್ ರಾವ್‍ಲ್ಲ್ಯಾ
ಚೆಡ್ವಾಕ್ ಪಳೆವ್ನ್
ಆರ್ಸ್ಯಾ ದೊಳೆ ನಿಳೆ ಜಾತಾತ್
ವೊಣ್ತಿಂಕ್ ನಾಕ್ಷೊ ಸುಟ್ತಾತ್
ಜನೆಲಾಂಕ್ ಜಿಬೊ ಫುಟ್ತಾತ್
ಆವಯ್ ಕಾಳ್ಜಾಂತ್ ಆತಾಂ ಮುಸ್ಳಾ ಕಾಂಡ್ಣಿ!
ಹ್ಯೆ ರಿತಿನ್ ದೊಳ್ಯಾಂಕ್ ಮಾರ್ಚೆಪರಿಂ ಕೆಲ್ಲೆಂ ಚಿತ್ರಣ್ ನಿಜಾಯ್ಕಿ ವಿಜ್ಮಿತ್ ಕರ್ತಾ. ‘ಕಶೆಂ ಹಾಸೊಂ’ ಕವಿತಾಂತ್ ಆಮ್ಚಾ ಭೊಂವ್ತಣಿಚಾ ಸಂಸಾರಾಂತ್ ಆಮಿ ಹಾಸ್ಚೆಂ ತಸಲೆಂ ಕಾಂಯ್ಚ್ ನಾ ಜಾವ್ನ್ ಆಯ್ಚಾ ದಿಸಾ ಕಶೆಂ ಆಮಿ ಹಾಸೊಂಕ್‍ಚ್ ಜಾಯ್ನಾತಲ್ಯಾ ಸ್ತಿತೆಕ್ ಪಾವ್ಲ್ಯಾಂವ್ ಮಣ್ ಮಾರ್ಮಿಕ್ ಗಜಾಲ್ ವಿವರಿಲ್ಯಾ. ‘ಫುಲಾಯ್ ಪಾಕಾಟೆ ಯಾಗೋ ಪಲ್ತಡಿ’ ಕವಿತಾ ಸ್ವಾರ್ಥಿ ಆನಿ ಅವ್ಕಾಸ್‍ವಾದಿ ಸಂಸಾರ್ ಉತ್ರೊನ್ ಅನಂತತಾಯೆ ಕುಶಿನ್ ಉಬ್ಚೆಂ ಚಿತ್ರಣ್ ತರ್, ‘ಮೆಲ್ಲೆಂ ಕಾಳಿಜ್’, ‘ಆರ್ಸ್ಯಾಚಾ ಆಂಗ್ಡಿ’ ಕವಿತಾಯ್ ವಾಚ್ಪ್ಯಾಂಕ್ ದೊಶಿನಾಸ್ತಾನಾ ಸೊಡಿನಾಂತ್. ‘ಖುರ್ಸಾ ವ್ಹಯ್ಲೊ ಮೋಗ್ ಮ್ಹಜೊ’ ಕವಿತೆಂತ್ ಪ್ರಸ್ತುತ್ ವಿದ್ಯಮಾನಾಂತ್ ಜಣ್ ಎಕಾಮೆಕಾ ಸಮ್ಜಾನಾಸ್ತಾನಾ ಕಶೆಂ ತಾಂ’ತಾಂಚಾ ನಾಕಾಚ್ಯೆ ನಿಟಾಯೆಕ್ ಸಾರ್ಕೆಂ ಜಾವ್ನ್ ಉಲಯ್ತಾ ಆನಿ ಚಲ್ತಾ ಮ್ಹಳ್ಳೆಂ ಲಾಗ್ಶಿಲ್ಯಾನ್ ದೊಳ್ಯಾಂ ಮುಕಾರ್ ಹಾಡ್ತಾ.
‘ಮತ್ಲಬ್ಯಾಚಿ ಖುರ್ಸಾವಾಟ್’ ಆಮ್ಚಿ ಢಾಂಬಿಕ್ ಭಕ್ತ್ ಆನಿ ನಾಟಕೀಯ್ ರಿತೆನ್ ಖುರ್ಸಾವಾಟೆಚಿ ವಿಧಿವಿಧಾನ್ ಸಂಪವ್ಚಾ ಆಮಿ ಆತ್ಮ್‍ವಿಮರ್ಸೊ ಕರುನ್ ಘೆಂವ್ಕ್ ಉಲೊ ದಿತಾ.
‘ಸಗ್ಳೆಂ ರಾಷ್ಟ್ರ್ ನಾಸ್ ಜಾಂವ್ಚ್ಯಾ ಬದ್ಲಾಕ್
ಎಕ್ಲ್ಯಾನ್ ಮೊರ್ಚೆಂ ಬರೆಂ’
ತೊ ಎಕ್ಲೊ
ಹಾಂವ್ ಖಂಡಿತ್ ನ್ಹಯ್!
*
‘ತಾಣಿಂ ತಾಕಾ ಧರ್ನ್ ವ್ಹೆಲೊ..’
ಆವಯ್ ತಾಚಿ ಘರಾ ಯೇವ್ನ್
‘ಸೊಡಯ್’ ಮ್ಹಣಾಲಿ
ಮ್ಹಾಕಾ ಖುರ್ಸಾ ವಾಟೆಕ್ ವೇಳ್ ಜಾತಾಲೊ
*
‘ತಾಣೆಂ ಖುರಿಸ್
ಖಾಂದಿ ಘೆತ್ಲೊ’
ಆನಿ ಆಮಿ ಮೊಬಾಯ್ಲಾರ್
ಫೆÇೀಟೊ ಕಾಡ್ಲಿ
ಮ್ಹಜ್ಯಾಯ್ ಹಾತಿಂ
ಖಿಳೆ ಆಸಾತ್
ಆನಿ ದೊಳೆ ಮಾತ್ರ್
ಖಾಲಿ ಹಾತ್ ಸೊಧಿತ್ ಆಸಾತ್
ಹಾಂತುಂ ಆಸ್ಚ್ಯೊ ಉಜ್ಯಾಕೆಂಡಾ ತಸಲ್ಯೊ ಪಂಗ್ತಿ ತಸಲೆ ಪಂಕ್ತಿ ಆಮ್ಕಾಂ ಖೆಂಡ್ತಾತ್ ಮಾತ್ರ್ ನ್ಹಯ್ ಧೊಸ್ತಾತ್ ಸಯ್ತ್!
ಆನಿ ಹ್ಯಾ ಕವಿಚ್ಯಾ ಚುಟುಕಾಂವಿಶಿಂ ಏಕ್ ಉತರ್ ಸಾಂಗಿಜಾಯ್‍ಚ್. ರಾಯಾಲಾಗಿಂ, ಉಜ್ಯಾಕ್ ಬಲಿ ಜಾಲ್ಯಾಂಚಿಂ ಕಂತಾರಾಂ, ವಾಟೆ ವ್ಹಯ್ಲಿಂ ಫುಲಾಂ - ಹ್ಯಾ ಮ್ಹಾತಾಳ್ಯಾಂನಿ ಆಸ್ಚ್ಯಾ ಚುಟ್ಕುಲಾಂಕ್ ಹಾಂವ್ ಭ್ಲ್ಕುಲ್ ಚುಟ್ಕುಲಾಂ ಮ್ಹಣಾನಾ. ತಿಂ ಜಳ್ತ್ಯಾ ಉಜ್ಯಾಚಿಂ ಕಿಟಾಳಾಂ ಮ್ಹಣ್ತಾಂ! ತಿತ್ಲ್ಯಾ ತೀಕ್ಷ್ಣತಾಯೆನ್ ತಿಂ ಆಮ್ಕಾಂ ಲಾಸ್ತಾತ್.
ಗಾಂವ್ ನ್ಹಯ್ಹೆಂ ಮಸಣ್!
ಹಾಂಗಾಚೊ ಉಜೊಯ್ ಮತ್ಲಬಿ
ತೊ ಫುಲಾಂಕೀ
ಮಾಲಿಕ್‍ಯಿ ಗ್ರಾಸಿತಾ –
ಉಜೊ ಪೆಟಯ್ತೆಲ್ಯಾಂಕ್ ಏಕ್ ಸೊಡ್ನ್!
*
ತಾಂಚ್ಯಾ ಬಂದೂಕೆಚ್ಯಾ ಗುಳ್ಯಾಂಕ್
ಪಾರ್ವೆ ಎಕ್ಕಿ ಉಭ್ಲೆನಾಂತ್
ನಿಜಾಯ್ಕಿ ಪಾರ್ವೆ ನಾಂತ್‍ಚ್ –
ಸಗ್ಳೆ ಗೀದ್ ಜಾಲ್ಯಾತ್, (ಉಜ್ಯಾಕ್ ಬಲಿ ಜಾಲ್ಯಾಂಚಿಂ ಕಾಂತಾರಾಂ)
*
ರಾಯಾ
ತುಂ ಸಾಗೊರ್
ಹಾಂವ್ ತಾಂತುಂ ಪಡ್ಚಿ
ಧುಳ್
ತುಂ ಕಾಂಯ್
ಮ್ಹೆಳೊ ಜಾಶಿ?
*
ರಾಯಾ
ತುಂವೆಂ ಆಪಡ್‍ಲ್ಲೆಂ ಸಗ್ಳೆಂ
ಭಾಂಗಾರ್ ಜಾತಾಮೂ
ತರ್ ಹಾಂವ್ ಕಸೊ
ಧುಳ್ ಜಾತಾಂ? (ರಾಯಾಲಾಗಿಂ)
ದೊಳ್ಯಾ ತಳ್ಯಾ ತಡಿರ್
ಚಡೊನ್ ತಿಳ್ತಾತ್ ದುಕಾಂ
ತುಂ ಗೆಲ್ಲಿ ವಾಟ್
*
ಮ್ಹಜೆ ವಾಟೆರ್
ಫುಲಾಂಚ್ ನಾಂತ್
ಭೊವ್‍ಶಾ
ಹಾಂವೆಂ ಯೆದೊಳ್
ಝಡಾಂ ಲಾಯಿಲ್ಲಿಂ ನಾಂತ್! (ವಾಟೆ ವೊಯ್ಲಿಂ ಫುಲಾಂ)
ಹ್ಯೊ ಪಂಗ್ತಿ ವಾಚ್ ಲ್ಲ್ಯಾಂಕ್ ತುಮ್ಕಾಂ ಖಂಡಿತ್ ಜಾವ್ನ್ ಹಾಂವೆಂ ವ್ಹಯ್ರ್ ಉಚಾರ್‍ಲ್ಲೆಂ ಉತರ್ ಉತ್ರಾಂ ಅತಿಶಯ್ ಮ್ಹಣ್ ಭೊಗ್ಚೆಂನಾ!
‘ವೆಚಿಕ್ ಕೋಣ್’ ಕವಿತಾ ಜಾಗತೀಕರಣಾನ್ ಆಮ್ಚ್ಯಾ ಯುವಜಣಾಂಚೆ ಅಂತರ್ ಸಕ್ತೆಕ್ ಕಶೆಂ ಚಿಂವುನ್ ಕಾಡ್ಚೆಂ ಪ್ರೇತನ್ ಕೆಲಾಂ ತೆಂ ದಾಕವ್ನ್ ದಿಲಾಂ. ಹಾಂಗಾಸರ್ ಕವಿ, ಭುಕಾ ನಂಗಾ ದುಬ್ಳ್ಯಾಕ್ ಮೊರೊಂಕ್ ಸೊಡಿನಾಕಾತ್, ಹಾಂವ್ ವೊಳ್ಕಾನಾ, ಸಂಗೀತ್, ಬೋಟ್ ಕವಿತಾ ಲಿಖ್ತಾನಾ ತಶೆಂಚ್, ಮಾಸಾಚೆ ಆಂಗ್ಡಿ, ಫುಲಾಂಚೆ ಆಂಗ್ಡಿ, ಕುಪಾ ಫಾತೊರ್ ಚಿತ್ರಿತಾನಾ, ಆಪ್ಣಾಕ್‍ಚ್ ಲಾಂಕುಡ್ ಜಾವ್ನ್ ಉಜ್ಯಾಂತ್ ಜಳ್ಚೆಂ ತಸಲೆ ಅದ್ಭುತ್ ಅಭೇದ್ ವರ್ಣನ್ ಕರ್ಚೆಂ ದೆಕ್ತಾನಾ ನಿಜಾಯ್ಕಿ ಹೊ ಕವಿ ಜಿವಿತಾಚ್ಯಾ ಹರ್ಯೆಕ್ ಖಿಣಾಂಕ್ ಕಿತ್ಲ್ಯಾ ತೀವ್ರತಾಯೆನ್ ಅನ್ಭವ್ ಕರ್ತಾ, ಆಸ್ವಾದಿತಾ ಆನಿ ಸಮಾಜೆಂತ್ಲ್ಯಾ ಹರ್ಯೆಕಾ ಘಡಿತಾಂವಿಶಿಂ ಆಪ್ಲ್ಯಾ ಜಾಣ್ವಾಯೆಚೆಂ ಭೂತ್‍ದರ್ಶಕ್ ದವರ್ನ್ ಸೂಕ್ಷಿಮ್ ಅವಲೋಕನ್ ಕರ್ತಾ ಮ್ಹಣ್ ಕಳ್ತಾ.
ಹೊ ಸೂಕ್ಶೀಮ್ ಸಂವೇದನ್‍ಶೀಲ್ ಕವಿ ಫುಲಾಂಪರಿಂ ಮೊವಾಳ್ ಜಿನೊಸಾಚೊ ತರೀ ಉಜ್ಯಾ ಕೆಂಡಾಂ ಆನಿ ಕೊಯ್ತೆ ಧಾರಿಚ್ಯಾ ತೀಕ್ಶ್ಣತೆಚ್ಯೊ ವೊಳಿ ವಿಣುನ್ ಆಮ್ಚ್ಯಾ ಹಾತಿಂ ದಿತಾ. ಆಯ್ಚ್ಯಾ ದಿಸಾಂನಿ ಆವ್ರ್, ಬರ್ಗಾಲ್ ತಸಲ್ಯಾ ನೈಸರ್ಗಿಕ್ ಸಮಸ್ಸ್ಯಾಂ ಮಧೆಂ ಎಕಾಮೆಕಾಚ್ಯಾ ಪಾಟಿಂಕ್ ಹಗ್ಯಾಚ್ಯೊ ಕೊಯ್ತಿ ಪಾಜುನ್ ಉಜ್ಯಾಂ ಸಿಜೊನ್ ಆಸ್ತಾನಾ ಅಸಲ್ಯಾ ಕವಿತಾಂಚೆಂ ಪರಿಣಾಮ್‍ಕಾರಿ ವೊಕಾತ್ ಗರ್ಜ್ ಆಸಾ. ತ್ಯಾ ದೆಕುನ್ ಹ್ಯಾ ಕವಿನ್ ಅನಿಕೀ ಬರಯ್ಜೆ, ತಿ ಸಿದ್ಧಿ ತಾಂಕಾಂ ದೇವ್ ಭರ್ಪೂರ್ ದೀಂವ್ದಿ ಮ್ಹಣ್ ಮಾಗ್ತಾಂ.
-ಮುದ್ದು ತೀರ್ಥಹಳ್ಳಿ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ