ಸಾತಾಟ್ ವರ್ಸಾಂ ಆದಿಂ ಗಿಚ್ಚುನ್ ದವರ್ನ್ ತಿತ್ಲೆಚ್ ಪಾವ್ಟಿಂ ತಿದ್ವುನ್, ಕುಡ್ಸುನ್, ಕಳ್ವುನ್ ತಾಚೆ ಉಪ್ರಾಂತೀ ಪರ್ಗಟ್ ಕರುಂಕ್ ಧಯ್ರ್ ಪಾವಾನಾಸ್ತಾಂ ಆಜ್ ಪಿಶ್ಯಾ ಧಯ್ರಾನ್ ಹಾಂಗಾ ಹಿ ಕಾಣಿ ಚಿಡ್ಕಾಯ್ತಾಂ. ಹಿ ಕಾಣಿ ಕಶಿ ಆನಿ ಕಿತ್ಯಾಖಾತಿರ್ ಉದೆಲಿ ಹಾಚೊ ಜೋಪ್ ಸಯ್ತ್ ಮ್ಹಾಕಾ ನಾ. ಪುಣ್ ಕಾಣಿ ಕಿತ್ಯಾಗಿ ಕಾಳ್ಜಾಕ್ ಆಪ್ತ್ ಜಾವ್ನ್ ಆಸಾ. ತುಮ್ಚೆಲಾಗಿಂ ವಾಂಟುನ್ ಘೆವ್ಯಾಂ ಮ್ಹಣ್ ಭೊಗ್ಲೆಂ. ವಾಚುನ್ ಕಶಿ ಆಸಾ ಸಾಂಗ್ತಾತ್‍ಮು?
-***-
ಹ್ಯೆ ಪಾವ್ಟಿಚೆಂ ರಯ್ಲಾಪಯ್ಣ್ ಆರ್‍ವಿಕೆ ಕ್ ಚಿಕ್ಕೆ ದಾಧೊಸ್ಕಾಯೆಚೆಂ ಜಾಲೆಂ ಮ್ಹಣ್ಯೆತ್. ಪಯ್ಲೆಂ ಆಮ್ರುಕೊ ಹಾಸೊ, ಉಪ್ರಾಂತ್ ಹಾತ್ ಹಾಲವ್ಪ್, ಆನಿ ಮಟ್ವ್ಯಾನ್ ಪರಿಚಯ್ ಆಶಾರ್ ಪಾಶಾರ್ ಜಾತಾನಾ ಮುಕ್ಲೆ ಬಸ್ಕೆರ್ ಬಸ್‍ಲ್ಲೆ ವೆಕ್ತಿನ್ ನಾಕಾ ನಾಕಾ ಮ್ಹಳ್ಯಾರೀ ಚಾ ಘೆವ್ನ್ ದಿಲಿಚ್. ಎಕೆಕ್ ಚ್ ಘೊಟ್ ಚಾ ಗಳ್ಯಾಂತ್ ದೆಂವಯ್ತಾನಾ ರಯ್ಲಾಚೊ ದಡ್ ದಡ್ ಆವಾಜ್ ವೇಗ್ ಆರಾಯ್ತಾನಾ ಹಾಂಚೆಂ ಉಅಲವ್ಣೆಂಯ್ ತ್ವರಿತ್ ಗತಿಕ್ ಪಾವ್ಲೆಂ. ಭೊಂವ್ತೊಣಿಂ ಆಸ್‍ಲ್ಲ್ಯಾಂಚಿ ಇಲ್ಲಿಯ್ ಫಿಕಿರ್ ತಾಂಕಾಂ ನಾ. ತಾಂಚೆ ಹೆಳ್ಕೆವಿಣೆಂಚ್ ತಾಂಚೆಮಧೆಂ ಏಕ್ ಆತ್ಮೀಯ್ ವಾತಾವರಣ್ ದೆಂವುನ್ ಆಯ್ಲೆಂ.
ಆರ್‍ವಿಕೆ ಮುಕಾರ್ ಬಸ್ ಲ್ಲೆ ವೆಕ್ತಿಚೆಂ ನಾಂವ್ ಮಾರ್ಕ್ ಸಿಲ್ವನ್ – ತಮಿಳ್ ಕ್ರಿಸ್ತಾಂವ್, ಗಾಂವಾನ್ ಮಯ್ಸೂರ್ಚೊ. ಕಾಂಯ್ ಚಡುಣೆಂ ಆರ್‍ವಿಕೆಚಿಚ್. ತೊಂಡಾರ್ ಮಿರಿಯೊ ಪಡ್ ಲ್ಲ್ಯೊ ತರೀ ವದನ್ ಶಾಂತ್ ಆಸ್ಲೆಂ; ರಿಟಾಯರ್ಡ್ ಮನಿಸ್ ಮ್ಹಣ್ ತೆಂ ಪಾಚಾರ್ತಾಲೆಂ. ಎಕೆಚ್ ಪ್ರಾಯೆಚೆ ಜಾಲ್ಲ್ಯಾನ್‍ಗಿ ಕಿತೆಂಗಿ, ಆರ್‍ವಿಕೆ ಆನಿ ಸಿಲ್ವನಾಮಧೆಂ ಏಕ್ ಆತ್ಮೀಯ್ ಪಣ್ ಖಬ್ರೆವಿಣೆಂ ರುತಾ ಜಾಲ್ಲೆಂ.
ಭಾಯ್ರ್ ಕಾಳೊಕ್ ಪಡೊನ್ ಯೆತಾಲೊ. ಕಂಪಾರ್ಟ್‍ಮೆಂಟಾಂತ್ ದಿವೆ ಜಳ್ಳೆ.
ಆರ್‍ವಿಕೆನ್ ಸಿಲ್ವನಾಚಿ ಸಗ್ಳಿ ಕಾಣಿ ಆಯ್ಕುನ್ ಜಾತಾಚ್ ಆಪ್ಣಾವಿಶಿಂ ಕಾಂಯ್ ಚಾರ್ ಸಬ್ದ್ ಉಚಾರ್ಯಾಂ ಮ್ಹಣುನ್ ತೋಂಡ್ ಉಗಡ್ಲೆಂ.
“ಹಾಂವ್ ಕೊಡ್ಯಾಳ್ ಎಕಾ ಕೊಲೆಜಿಂತ್ ಲೈಬ್ರೆರಿಯನ್ ಜಾವ್ನಾಸ್ಲೊಂ. ಸದಾಂಚ್ ಪುಸ್ತಕಾಂಚೆ ಸಳಾವಳಿನ್‍ಗಿ ಕಿತೆಂಗಿ ಥೊಡೆಪಾವ್ಟಿಂ ಲೇಖನಾಂ ಬರಂವ್ಕ್ ಲಾಗ್ಲೊಂ. ನೀಜ್ ನಾಂವಾನ್ ಬರಂವ್ಚೆ ತಿತ್ಲಿ ಪ್ರಭುದ್ದತಾ ನಾತ್ಲಿ ದೆಕುನ್ ‘ಆರ್‍ವಿಕೆ’ ಮ್ಹಣುನ್ ಬರಂವ್ಕ್ ಸುರ್ವಾತ್ಲೆಂ. ಮುಕಾರ್ ತೆಂಚ್ ನಾಂವ್ ಖಾಯಾಮ್ ಜಾಲೆಂ. ಕೊಲೆಜಿಂತ್ ಲೆಕ್ಚರರಾಂಕ್ ಆಸ್ ಲ್ಲೊ ತಿತ್ಲೊಚ್ ಮಾನ್ ಮ್ಹಾಕಾ ಆಸ್ಲೊ. ಥೊಡ್ಯಾಂನಿ ಪಾಟ್ ಥಾಪುಡ್ಲಿ ಪುಣ್ ಆನಿ ಥೊಡೆ ಲೆಕ್ಚರರ್ ಘುಗಿ ನದ್ರೆನ್ ಪಳೆಲಾಗ್ಲೆ. ತಾಂಚ್ಯಾನ್ ಜಾಯ್ನಾತ್ಲೆಂ ಹಾಂವೆಂ ಕೆಲೆಂ ಮ್ಹಣ್ ವಿದ್ಯಾರ್ಥಿ ತಾಂಚ್ಯಾಕೀ ಚಡ್ ಮ್ಹಾಕಾ ಸಲಾಮ್ ಮಾರ್ತಾತ್ ಮ್ಹಣುನ್ ಭಿತರ್ಲೆ ಭಿತರ್ ಶಿಜ್ತಾಲೆ ಕೊಣ್ಣಾ! ಮುಕ್ಲ್ಯಾನ್ ನ್ಹಯ್ ತರೀ ಪಾಟ್ಲ್ಯಾನ್ ಖೊಡಿ ಕಾಡ್ಚಿ ಮ್ಹಜ್ಯಾ ಗುಮಾನಾಕ್ ಗೆಲ್ಲೆಂ, ತೆಂ ಮೊರೊಂ.. ಮ್ಹಜ್ಯೆ ವಿಶ್ಯಾಂತ್ ಇಲ್ಲೆಂ ಚಡ್‍ಚ್ ಸಾಂಗ್ಲೆಂ ಮ್ಹಣ್ ದಿಸ್ತಾ..” ಆರ್‍ವಿಕೆನ್ ಗೊಮ್ಟಿ ಆಡ್ ಘಾಲಿ.
ಸಿಲ್ವನ್ ಯಿ ಹಾಸ್ಲೊ, “ಸಾಂಗ್‍ಲ್ಲೆಪರಿಂ, ತುಕಾ ಕಿತ್ಲಿಂ ಭುರ್ಗಿಂ ಮ್ಹಳೆಂಯ್ ತುವೆಂ?”, ತಾಣೆಂ ದುಸ್ರೊ ವಿಶಯ್ ವಿಂಚ್ಲೊ.
“ದೊಗಾಂ”
“ದೊಗಾಂಚ್?”
ಆರ್‍ವಿಕೆ ಏಕ್ ಘಡಿ ವಗೊ ರಾವ್ಲೊ.
ಸಿಲ್ವನಾಚೆಂ ‘ದೊಗಾಂಚ್?’ ಮ್ಹಳ್ಳೆಂ ಸವಾಲ್ ಚಿಕ್ಕೆ ಆಡೂಕ್ ಲಾಗ್ಲೆಂ ಆರ್‍ವಿಕೆಕ್. ವ್ಹಯ್, ವ್ಜಡ್ಲೆಂ ಕೆದಾಳಾಗಿ ಆಪ್ಣಾಚ್ಯಾ ವಾಂಟ್ಯಾಕ್ ನಾ ಜಾಲಾಂ. ಆತಾಂ ಆಶ್ಚಿಂ ಮ್ಹಳ್ಯಾರ್ ಎಕ್ಲೊ ಚೆರ್ಕೊ ಆನಿ ಏಕ್ ಚೆಡುಂ – ಜಾಂಚೆಂ ಕಾಜಾರ್ ಜಾವ್ನ್ ಆಪಾಪ್ಲ್ಯಾ ವಾವ್ರಾರ್ ವೆಸ್ತ್ ಆಸಾತ್.ಚೆರ್ಕೊ ಘರ್ ಚಲಯ್ತಾ, ಸುನ್ ಕೊಲೆಜಿಂತ್ ಲೆಕ್ಚರರ್. ಆಪುಣ್ ಆನಿ ಪತಿಣ್ ದಾಧೊಸ್ಕಾಯೆನ್ ಪುತಾಸಂಗಿಂ ವಸ್ತಿ ಕರ್ನ್ ಆಸಾಂವ್.
“ವ್ಹಯ್, ದೊಗಾಂಚ್ ಭುರ್ಗಿಂ!” ಖಡ್ಪ್ ತಾಳ್ಯಾನ್ ಉಚಾರ್ಲೆಂ ಆರ್‍ವಿಕೆನ್ ಆನಿ ಆಪ್ಲಿ ದೀಶ್ಟ್ ಜನೆಲಾಭಾಯ್ರ್ ಖಿಳಾಯ್ಲಿ. ಗಯ್ರೆಂ ಜಾವ್ನ್ ಯೆಂವ್ಚ್ಯಾ ಪರಿಸರಾಂತ್ ಸಗ್ಳೆಂ ಅಸ್ಪಷ್ಟ್ ದಿಸ್ತಾಲೆಂ ಆನಿ ಥೊಡ್ಯಾವೆಳಾನ್ ಬರೊ ಕಾಳೊಕ್ ಜಾತಲೊ.
ಇತ್ಲ್ಯಾರ್ ಪಯಿಲ್ಲೆಪಾವ್ಟಿಂ ಉತ್ರಾಂಕ್ ಥಂಯ್ ಕಾತರ್ ಪಡ್ಲಿ. ಆರ್‍ವಿಕೆ ಚ್ಯಾ ಮನಾಂತ್ ಜೆನ್ನಿಚೊ ನಿಮಾಣೊ ನೋಟ್À ಉದೆಲೊ. ತಾಂತ್ಲಿಂ ಅಕ್ಶರಾಂ ಭಿಜ್‍ಲ್ಲೆಪರಿಂ ಗಯ್ರಿಂ ದಿಸ್ತಾಲಿಂ. ದುಖಾಂ ಫುಟೊನ್ ಆಸ್ಡ್ಯಾಂತಡಿರ್ ತಿಳ್ಚ್ಯಾ ಥೆಂಬ್ಯಾಂಕ್ ಮುಕ್ಲ್ಯಾನ್ ಬಸ್‍ಲ್ಲ್ಯಾ ಸಿಲ್ವನಾಚ್ಯಾ ಗುಮಾನಾಕ್ ಯೇನಾತ್ಲೆಪರಿಂ ಬೊಟಾಂನಿ ಜಿರಯ್ಲೆಂ.
ಕಿತ್ಲೆ ಸಲೀಸಾಯೆನ್ ಲಿಖುನ್ ಧಾಂವ್ಲೆಂ ಪಿಶೆಂ ಚೆಡುಂ!
“ಡಾಡಾ, ಹಾಂವ್ ಎಕಾ ಚಲ್ಯಾಲಾಗಿಂ ಮೊಗಾರ್ ಆಸಾಂ.
ತಾಚೆಸಂಗಿಂ ವೆತಾಂ. ಮ್ಹಜೆ ವಿಶ್ಯಾಂತ್ ಫಿಕಿರ್ ನಾಕಾ. ಸೊಧ್ನಾಂಯ್ ಕರಿನಾಕಾತ್.
ಹಾಂವ್ ಬರ್ಯಾನ್ ಆಸ್ತೆಲಿಂ.. ಆದೇವ್ಸ್ ಡಾಡಾ - ಜೆನ್ನಿ”
ಮ್ಹಜಿ ಫಿಕಿರ್ ತುಮ್ಕಾಂ ನಾಕಾ?! ಸೊಧ್ನಾಂ ಕರಿನಾಕಾತ್!!?
ಕಿತೆಂ ಚಿಂತ್ತಾ ಹೆಂ? ಆಪ್ಣೆಂ ತಾಕಾ ಜಲ್ಮ್ ದೀಂವ್ಕ್ ನಾಂಗಾಯ್? ವಿಂಚುಂಕ್ ಮೆಳ್ಳೆಂಲೆಂ? ತಾಚ್ಯೆ ವಿಶ್ಯಾಂತ್ ಚಿಂತ್‍ಲ್ಲೆ ತಿತ್ಲೆಂ ಆಪುಣ್ ಬಾಪುಯ್ ಜಾವ್ನ್ ಸಲ್ವಲ್ಲಿ ಗಜಾಲ್ ತಾಕಾ ಜಿರಂವ್ಕ್ ಜಾಯ್ನಾತ್ಲಿ.
“ಸಿಗ್ರೆಟ್ ಘೆತಾಯ್?” ಸಿಲ್ವನಾನ್ ಪೆಕೆಟ್ ತಾಚೆಶಿಂ ವೊಡ್ಡಾಯ್ಲಿ.
“ಮ್ಹಾಕಾ ವೋಡ್ ನಾ.. ಥ್ಯಾಂಕ್ಯೂ” ಆರ್‍ವಿಕೆನ್ ದಾಟ್ ಜಾಲ್ಲ್ಯಾ ಮೊಡಾಂ ಥಾವ್ನ್ ಭಾಯ್ರ್ ಯೇಂವ್ಕ್ ಚಿಂತ್ಲೆಂ, “ಸಿಲ್ವನ್, ತುಂ ಮಯ್ಸೂರ್ ರಾವ್ತಾಯ್ ಮು?”
“ವ್ಹಯ್, ಏಕ್ ದೀಸ್ ಘರಾ ಕಿತ್ಯಾ ಯೇನಾಂಯ್? ತುಂ ಥಂಯ್ ಘರಾಚ್ ಆಸೊನ್ ಕರ್ಚೆಂ ಆಸಾ ತರೀ ಕಿತೆಂ? ಇಲ್ಲಿ ಭೊಂವ್ಡಿ ಮಾರ್ಯಾಂ, ಉಲವ್ಯಾಂ.. ಯೇ ತುಂ..” ಸಿಲ್ವನಾನ್ ಉಗ್ತೆಂ ಆಪವ್ಣೆಂ ದಿಲೆಂ.
“ಖಂಡಿತ್, ತುಂವೆಂ ಸಾಂಗ್ಚೆಂಯ್ ಸಾರ್ಕೆಂ.. ಯೇಂವ್ಕ್ ಪಳೆತಾಂ. ಹಾಂವ್ ಅಪ್ರೂಪ್ ರಂಗಾಯಣಾಕ್ ಯೇವ್ನ್ ವ್ಹಚೊನ್ ಆಸ್ತಾಂ. ಪಾವ್ಟ್ ಮೆಳ್ತಾನಾ ತುಮ್ಗೆರ್ ರಾವ್ಯಾಂ”
ಆರ್‍ವಿಕೆನ್ ಸ್ಕೆಚ್ ಘಾಲ್ನ್ ಜಾಲ್ಲೆಂ. ರಂಗಾಯಣಾಂತ್ ಸಾದರ್ ಜಾಂವ್ಚೆ ನಾಟಕ್ ಮ್ಹಳ್ಯಾರ್ ತಾಚೊ ಜೀವ್. ದೋನ್ ಮ್ಹಯ್ನ್ಯಾಂಕ್ ಏಕ್ ಪಾವ್ಟಿಂ ಪುಣಿ ಮಯ್ಸೂರಾಕ್ ತೊ ಯೇವ್ನ್ ವ್ಹಚುನ್ ಆಸ್ತಾ. ಪುಣ್ ಹೊಟೆಲಾಂತ್ ರಾಂವ್ಚೆಂ ಮ್ಹಳ್ಯಾರ್ ಕಾಂಟಾಳ್ಯಾಚೆಂ. ಪುಣ್ ಕಿತೆಂ ಕರ್ಚೆಂ, ಏಕ್ ಜೊಡುಂಕ್ ಕಿತೆಂ ತರೀ ಹೊಗ್ಡಾಂವ್ಕ್ ಪಡ್ತಾ. ಆನಿ ಜಾಲ್ಯಾರ್ ಸಿಲ್ವನಾಗೆರ್ ತಂಬು ಮಾರ್ಲ್ಯಾರಿ ತೊ ನಾ ಮ್ಹಣ್ಚೊ ನಾ.
-***-
ಥಿಯೆಟರ್ ಫೆಸ್ಟಿವಲ್ ಆಸಾ ಮ್ಹಳ್ಳಿ ಖಬರ್ ಪಾವ್‍ಲ್ಲಿಚ್ ಆರ್‍ವಿಕೆಕ್ ಪಯ್ಲೊ ಉಡಾಸ್ ಆಯಿಲ್ಲೊ ಸಿಲ್ವನಾಚೊ. ಸಾತ್ ದೀಸ್ ಉತ್ಸವ್ ಚಲ್ತಾ. ಹರ್ಯೆಕಾ ದಿಸಾ ನವೆಚ್ ವೃತ್ತಿಪರ್ ನಾಟಕ್, ದೊಳ್ಯಾಂಕ್ ಫೆಸ್ತ್. ರಾಂವ್ಚಿ ವಿಲೆವಾರಿ ಸಿಲ್ವನಾಗೆರ್ ಜಾಲ್ಯಾರ್ ದುಸ್ರಿ ಖಂತ್ ನಾ. ಯೆತಾ ತರ್ ತಾಕಾಯ್ ವ್ಹರ್ಚೆಂ.
ಸಿಲ್ವನ್ ಘರಾ ಆಸತ್ ಗಿ ಮ್ಹಳ್ಳೊ ದುಭಾವ್ ಉಟ್ಲೊ ಆರ್‍ವಿಕೆಕ್. ಫೋನ್ ಕರ್ನ್ ತರೀ ಯೆವ್ಯೆತೆಂ. ವಿಳಾಸ್ ಸಾರ್ಕೊ ಆಸ್‍ಲ್ಲೊ. ಘರ್ ಸೊಧುನ್ ಕಾಡುಂಕ್ ಕಾಂಯ್ ತ್ರಾಸ್ ಭೊಗ್ಲೆ ನಾಂತ್. ರಿಕ್ಶಾವಾಲ್ಯಾಕ್ ವಿಳಾಸ್ ದಾಕಯ್ಲೊ ಮಾತ್ರ್, ತಾಣೆಂ ಸಿಲ್ವನಾಚ್ಯಾ ದಾರಾರ್‍ಚ್ ಹಾಡ್ನ್ ದೆಂವಯ್ಲೊ. ವೊರಾಂ ಸಾಡೆ ಇಕ್ರಾ ಜಾಲ್ಲಿಂ. ತಾಣೆಂ ಗೇಟ್ ಉಸಯ್ಲಿ. ಮುಕಾರ್ ದಿಸ್ಲೊ ಭವ್ಯ್ ಬಂಗ್ಲೊ. ಬಂಗ್ಲ್ಯಾ ಮುಕಾರ್ ಸೊಭಿತ್ತ್ ಗಾರ್ಡನ್ಸ್. ದೋಗ್ ಕಾಮ್ಗಾರ್ ಗಾರ್ಡನಾಂತ್ ಕಾಮಾರ್ ಮಗ್ನ್ ದಿಸ್ಲೆ. ವೊಣ್ತಿರ್ ಹ್ಯಾಂಗಿಂಗ್ ಗಾರ್ಡನ್ಸ್ ಸೊಭ್ತಾಲೆಂ.
ಸಿಲ್ವನ್ ಇಜಿಚೆರಾರ್ ಬಸ್‍ಲ್ಲೊ. ತಕ್ಲಿ ದಿಸ್ ಲ್ಲಿಚ್ ಧಾವೊಂನ್ ಚ್ ಆಯ್ಲೊ ಆನಿ ಆರ್‍ವಿಕೆಕ್ ವೇಂಗ್ ಮಾರ್ಲಿ. ತಿತ್ಲ್ಯಾಚ್ ಸಂಭ್ರಮಾನ್ ಘರಾ ಭಿತರ್ ಆಪವ್ನ್ ವ್ಹರ್ನ್ ಗೆಲೊ. ಭಿತರ್ ಪಾವ್ತಚ್ ಬಸ್ ಲ್ಲೆ ಕಡೆ ಥಾವ್ನ್ ಎಕೊಡಿ ನದರ್ ಮಾರ್ಲಿ ತಾಣೆಂ. ವೊಣೊದಿರ್ ಚಿಡ್ಕಾಯಿಲ್ಲಿ ಪಿಂತುರಾಂ ಎಕ್ದಮ್ ಮೋಹಕ್ ಆನಿ ಸುಂದರ್ ಆಸ್ಲಿಂ. ಫರ್ನಿಚೆರಾಂಚಿ ಸಜಾವಟ್ ಯಿ ಮೆಚ್ವಾಜೆ ತಸ್ಲಿ. ಘರಾಂತ್ ಎಸಿ ಆಸ್‍ಲ್ಲ್ಯಾನ್ ಪುರಾಸಾಣ್ ಲಿಪ್ಲಿ.
“ತಾನೆಕ್ ಕಿತೆಂ ಘೆತಾಯ್.. ಲಸ್ಸಿ ಹಾಡಂವ್?” ಸಿಲ್ವನಾಕ್ ಚ್ ಪಳೆಲೆಂ ತಾಣೆಂ. ರಯ್ಲಾರ್ ಚಾ ವಾಂಟುನ್ ಘೆತ್‍ಲ್ಲೊ ಮನಿಸ್ ಇತ್ಲ್ಯಾ ಸೊಭಿತ್ ಸುವಾತೆರ್ ಜಿಯೆತಾ! ಸರಳ್ ವೆಕ್ತಿತ್ವ್ ಪಸಂದ್ ಜಾಲೆಂ ಆರ್‍ವಿಕೆಕ್. ತಾಚ್ಯಾ ಸರ್ಭಾರಾಯೆ ಮುಕಾರ್ ಮಾತ್ಶಿ ಕಾವ್ಜೆಣಿಯ್ ಭೊಗ್ಲಿ.
ತಿತ್ಲ್ಯಾರ್ ಶೊಕೆಸಿಂತ್ ರಿಗ್‍ಲ್ಲಿ ಆರ್‍ವಿಕೆಚಿ ದೀಷ್ಟ್ ಗಕ್ಕ್ ಕರ್ನ್ ರಾವ್ಲಿ. ಗಯ್ರೆಂ ಗಯ್ರೆಂ ದಿಸ್ಲೆಂ ದೆಕುನ್ ಉಟೊನ್ ತೊ ಲಾಗ್ಗಿಂ ಗೆಲೊ. ಶರ್ಟಾಚ್ಯಾ ಬೊಲ್ಸಾಂತ್ಲೆಂ ವೋಕ್ಲ್ ವೊಡ್ನ್ ನಾಕಾವಯ್ರ್ ಚಡವ್ನ್ ದೆಕ್ಲೆಂ. ಆರ್‍ವಿಕೆಕ್ ಅಜ್ಯಾಪ್ ರಾಕುನ್ ಆಸ್ಲೆಂ!!
ಜೆನ್ನಿ!!
ಮ್ಹಜಿ ವ್ಹಡ್ಲಿ ಧುವ್!!!
ತಿತ್ಲ್ಯಾರ್ ಭಿತರ್ ಥಾವ್ನ್ ಕೊಣ್ ಗಿ ಭಾಯ್ರ್ ಯೆಂವ್ಚೆಂ ಸುಸ್ತಾಲೆಂ. ತೊ ನೀಟ್ ಜಾಲೊ.
“ಅಳೆಯಾ, ಹಿ ಮ್ಹಜಿ ಸುನ್” ಸಿಲ್ವನಾನ್ ದೊಳೆ ಮೊಡ್ಲೆ ಆನಿ ತಿಣೆಂ ಹಾಡ್ ಲ್ಲೆ ತ್ರೇಂತ್ಲೆ ಗೊಬ್ಳೆ ವಿಂಚ್ಲೆ.
ವ್ಹಯ್! ತೆಂಚ್ ತೆಂಚ್ ಜೆನ್ನಿ ಆಪ್ಣಾ ಸಾಮ್ಕಾರ್ ಉಭೆಂ ಅಸ್ಲೆಂ!!
ಆರ್ ವಿಕೆ ಎಸಿ ರುಮಾಂತ್ ಯಿ ಘಾಮೆಲೊ. ಜೆನ್ನಿನ್ ವೋಂಟ್ ಮೆಕ್ಳೆ ಕರ್ಚೆ ಆದಿಂ ಆರ್ ವಿಕೆ ಉಟ್ಲೊ. “ಸಿಲ್ವನ್, ಮ್ಹಾಕಾ ವಾಶ್ ರುಮಾಕ್ ವೆಚಿ ಗರ್ಜ್ ಆಸಾ” ವ್ಹಳೂ ತಾಳ್ಯಾನ್ ಮ್ಹಣಾಲೊ. ಸಿಲ್ವನ್, ‘ಹೆಣೆಂ ಯೇ’ ಮ್ಹಣತ್ ಆಪವ್ನ್ ವ್ಹರ್ತಾನಾ ತಾಚ್ಯಾ ಪಾಟ್ಲಾನ್ ತುರ್ತಾನ್ ಗೆಲೊ.
ದಾರ್ ಧಾಂಪ್ಲೆಂ.
ಆನಿ ಗಳ್ಗಳ್ಯಾಂ ರಡ್ಲೊ. ವೊಣ್ತಿಕ್ ಏಕ್ ಬಳಾದೀಕ್ ಮೂಟ್ ಮಾರ್ಲಿ ತಾಣೆಂ. ಆಪ್ಣೆಂ ರಡ್ ಲ್ಲೆಂ ಭಾಯ್ರ್ ಆಯ್ಕಾತ್ ಮ್ಹಳ್ಳ್ಯಾ ಕಾರಣಾಕ್ ಟ್ಯಾಪ್ ಆನ್ ಕೆಲೆಂ.
ಅಸಲೊ ಏಕ್ ಸಂದರ್ಭ್ ಜಿಣ್ಯೆಂತ್ ಯೇತ್ ಮ್ಹಣ್ ತೊ ಸಪ್ಣೆಂವ್ಕೀ ನಾತ್ಲೊ. ಆತಾಂ ಕಿತೆಂ ಕರುಂ? ಸಿಲ್ವನಾಕ್ ವಿಶಯ್ ಸಾಂಗುಂ? ಜೆನ್ನಿ ಸಾಂಗತ್ ತರ್ ಆಪುಣ್ ಕಿತೆಂ ಮ್ಹಣ್ ಜಾಪ್ ದೀಂವ್? ತೆವ್ಶಿನ್ ಹೆವ್ಶಿನ್ ಪಾಸಾಯೊ ಮಾರಿಲಾಗ್ಲೊ.
ಉಪ್ರಾಂತ್ ಥಂಡ್ ಉದಕ್ ಮುಕಮಳಾರ್ ತೀನ್ ಚಾರ್ ಪಾವ್ಟಿಂ ಮಾರ್ಲೆಂ. ತುವಾಲ್ಯಾನ್ ಪುಸಿತ್ ಭಾಯ್ರ್ ಆಯ್ಲೊ.
ತೊ ಚಡಿತ್ ಉಲಯ್ಲೊ ನಾ. ಸಿಲ್ವನ್ ನಾರ್ಮಲ್ ಆಸ್ಲೊ. ಭೊವ್ ಶಾ ಜೆನ್ನಿನ್ ತೋಂಡ್ ಸೊಡುಂಕ್ ನಾ. ಜೆವ್ಣಾವೆಳಿಂಯ್ ಆರ್‍ವಿಕೆನ್ ತೋಂಡ್ ಉಗಡ್ಲೆಂ ನಾ. ಸಿಲ್ವನ್ ಖೂಬ್ ಉಲಯ್ತಾಲೊ ಆನಿ ಹೊ ಹೂಂಗುಟ್ಟಿತಾಲೊ ಮಾತ್ರ್ ಶಿವಾಯ್ ತಾಚಿ ಜೀಬ್ ಬಳ್ ನಾತ್‍ಲ್ಲೆಪರಿಂ ಉತ್ರಾಂವೀಣ್ ಜಾಲ್ಲಿ. ಆರ್‍ವಿಕೆ ಥಂಯ್ಚೊ ಜಾತಾ ತಿತ್ಲೆ ವೆಗ್ಗಿಂ ಭಾಯ್ರ್ ಪಡುಂಕ್ ರಾಕ್ತಾಲೊ. ಕಸ್ಲೆಗಿ ಏಕ್ ನೀಬ್ ದೀವ್ನ್ ತೊ ಉಟ್ಲೊ ಆನಿ ವೇಂಗ್ ಮಾರ್ನ್ ಭಾಯ್ರ್ ಆಯ್ಲೊ. ಗೆಟಿಕಡೆ ಥಾವ್ನ್ ಘುಂವೊನ್ ಸಿಲ್ವನಾಕ್ ವಾರ್ಯಾರ್ ಹಾತ್ ಉಭಾರ್ತಾನಾ ದೊಳೆ ಮಾತ್ರ್ ಜೆನ್ನಿಕ್ ಸೊಧಿಲಾಗ್ಲೆ. ತೆಂ ಖಂಯ್ಸರಿ ದಿಸ್ಲೆಂ ನಾಂ.
-***-
ಕಿತ್ಲ್ಯೊ ರಾತಿ ಪಾಶಾರ್ ಜಾಲ್ಯೊ, ತ್ಯೊಯ್ ನಿದೆವಿಣೆಂ. ಗಜ್ಡಿ ಕಾಂಟ್ಯಾಂನಿ ಭರ್ಲ್ಯಾಶಿ ಜಾವ್ನ್ ಕೂಸ್ ಪರ್ತುನ್ ಪರ್ತುನ್ ಕಠೀಣ್ ವಿರಾರಾಯ್ ಭೊಗ್ತಾನಾ ಭಾಯ್ರ್ ಬೊಲ್ಕಾಂವಾಂತ್ ಬಸುನ್ ಸುರ್ಯೊ ಉದೆಂವ್ಕ್ ರಾಕುನ್ ಬಸ್ಚಿ ಗಿರಾಂತ್ ಲಾಗ್ಲಿ. ಫಾಂತೆ ಪರ್ಯಾಂತ್ ಸಿಗ್ರೆಟಿ ಕಿತ್ಲ್ಯೊ ಗೊಬೊರ್ ಜಾಲ್ಯೊ ತಾಕಾ ಲೇಕ್ ನಾತ್ಲೆಂ.
ಜೆನ್ನಿ ಶಿವಾಯ್ ತಾಚಿ ಮತ್ ಖಂಯ್ಸರಿ ಠಿಕಾನಾ ಜಾಲಿ.
‘ಬರ್ಯಾ ಘರಣ್ಯಾಂತ್ ಆಸಾನೇ’ ಮ್ಹಳ್ಳಿ ತೃಪ್ತಿ ಎಕ್ಯೆ ವಾಟೆನ್ ತರ್ ಸಂಬಂಧ್ ಮಸ್ತುನ್ ಗೆಲೆಂ ನೇ’ ಮ್ಹಳ್ಳಿ ಶಿರ್ ಚಾಳ್ವತಾನಾ ತೊ ಪಿಸಾಂತುರ್ ಜಾತಾಲೊ. ಬಾಯ್ಲ್ ಜಾಂವ್, ಪೂತ್ ವ ನಿಮಾಣೆಂ ಧುವ್ ಜಾಂವ್ ಜೆನ್ನಿ ಮಯ್ಸೂರಾಂತ್ ಆಸ್ಚಿ ಖಬರ್ ನೆಣಾಂತ್. ತಾಂಕಾಂ ಸಾಂಗುಂ? ಕಿತೆಂ ಫಾಯ್ದೊ? ಆಪ್ಣೆ ಭೊಗ್ಚೆ ಆಟೆವಿಟೆ ತಾಂಕಾಂಯ್ ವಾಂಟುಂ? ಖಂಚ್ಯಾಂತೀ ಪಯ್ಲೆಂಚಿ ಉರ್ಭಾ ನಾತ್ಲಿ. ಸಕಾಳಿಂಚೆಂ ವಾಕಿಂಗ್ ಸೊಡ್ನ್ ಮ್ಹಯ್ನೊಚ್ ಜಾಲೊ. ಆಪ್ಣೆಂ ಬಾಯ್ಲ್ ಭುರ್ಗ್ಯಾಂ ಥಾವ್ನ್ ಸಾಂಭಾಳ್ನ್ ದವರ್‍ಲ್ಲೊ ಜೆನ್ನಿ ವಿಶ್ಯಾಂತ್ಲೊ ಘುಟ್ ಕೆಸೊಳಿಪರಿಂ ವಾಡತ್ ಯೆತಾಲೊ. ತೊ ರೂಂದ್ ಜಾಲ್ಲೆ ತಿತ್ಲಿಚ್ ಕಾತ್ ಅಂರ್ದುನ್ ಯೇವ್ನ್ ಚಿಡ್ಕೆ ದಿತಾಲಿ.
ಅನ್ಯೇಕ್ ಮ್ಹಯ್ನೊ ಕೊಣಾಯ್ಚ್ಯಾ ಯೆಣ್ಯಾಕ್, ಕೊಣಾಯ್ಚ್ಯಾ ಮರ್ಣಾಕ್ ರಾಕಾನಾಸ್ತಾಂ ಗೆಲೊ. ಸಂಪೆÇನ್ ಗೆಲ್ಲ್ಯಾ ಹ್ಯಾ ದೋನ್ ಮ್ಹಯ್ನ್ಯಾಂನಿ ಆರ್‍ವಿಕೆಕ್ ಆಯಿಲ್ಲ್ಯೊ ತಾಳ್ಣ್ಯೊ ಏಕ್ ದೋನ್ ನ್ಹಯ್! ಜೆನ್ನಿಕಡೆ ಫೆÇನಾರ್ ಉಲಯ್ತಾಂ, ಚಿಂತ್ಲೆಂ ತಾಣೆಂ ಸಭಾರ್ ಪಾವ್ಟಿಂ. ಮನ್ ಒಪ್ಲೆಂ ನಾ. ಕಿತ್ಲೆಶೆ ಪಾವ್ಟಿಂ ಸಿಲ್ವನಾಗೆರ್ ವ್ಹಚುನ್ ಯೇವ್ನ್ ಜೆನ್ನಿಚೆರ್ ಏಕ್ ನದರ್ ಪುಣೀ ಮಾರ್ತಾಂ ಚಿಂತ್ಲೆಂ ತಾಣೆಂ. ಕಿತೆಂ ಮ್ಹಳ್ಯಾರೀ ಆತಾಂ ಸಿಲ್ವನ್ ಫಕತ್ ಸಿಲ್ವನ್ ನ್ಹಯ್.. ಆಪ್ಣಾಚೊ ಯೇಯ್! ಪುಣ್ ಭಲಾಯ್ಕೆನ್ ಆಡಾಯ್ಲೆಂ.
ಆರ್‍ವಿಕೆ ದಿಸಾನ್ದೀಸ್ ಭಾಗೊನ್ ಯೆತಾಲೊ. ಕುಡಿಚೊ ಉಲ್ಲಾಸ್ ಉಣೋ ಜಾಲ್ಲೊ. ಚಡಿತ್ ಚಲ್ಚೆಪರಿಂ ನಾತ್ಲೆಂ, ವೆಗ್ಗಿಂ ಪುರಾಸಾಣ್ ಜಾತಾಲಿ ಆನಿ ಆಡ್ ಪಡಾಜೆ ಪಡ್ತಾಲೆಂ.ತಾಚ್ಯೆ ಇಡ್ಯಾಂತ್ ಜೆನ್ನಿ ವಿಶ್ಯಾಂತ್ಲಿ ಕೆಸೊಳಿ ಭರ್ತಿ ಪಿಕೊನ್ ಫುಟೊಂಕ್ ಆಯ್ತಿ ಜಾಲ್ಲಿ.
ಧಾಕ್ಟೆಂ ಧುವ್ ಭುರ್ಗ್ಯಾಂಕ್ ರಜಾ ದೆಕುನ್ ಘರಾ ಆಯಿಲ್ಲೆಂ. ತಾಚೆಂ ಧಾಕ್ಟುಲೆಂ ಬೇಬಿ ಎಕ್ದಮ್ ಚುರುಕ್ ಆನಿ ಪೆÇಕ್ರಿಯ್. ತಾಚೆ ಸಾಂಗಾತಾ ವೇಳ್ ಗೆಲ್ಲೊಚ್ ಕಳ್ಳೊನಾ ಆರ್‍ವಿಕೆಕ್. ತಾಚೊ ಜಲ್ಮಾ ದೀಸ್ ಹ್ಯಾ ಮ್ಹಯ್ನ್ಯಾಂತ್ ಆಸ್‍ಲ್ಲ್ಯಾನ್ ಸಂಭ್ರಮುಂಕ್ ಯೋಜನ್ ಘಾಲ್ಲೆಂ.
ಆರ್‍ವಿಕೆಕ್ ತಡ್ವುಂಕ್ ಜಾಲೆಂ ನಾ. ಮಸ್ತ್ ಪುರಾಸಾಣ್ ಭೊಗ್ತಾಲಿ ದೆಕುನ್ ಚಿಕ್ಕೆ ಆಡ್ ಪಡ್ಲೊ.
ಜೆನ್ನಿಚೊ ಖೂಬ್ ಉಡಾಸ್ ಯೆತಾಲೊ. ಪುತಾಕ್ ಆಪಯ್ಲೆಂ.
“ಸನ್ನಿ, ಜೆನ್ನಿಕ್ ಮಾತ್ಶೆಂ ಆಪವ್ನ್ ಹಾಡ್ ಪುತಾ!”
ಸನ್ನಿಕ್ ಬಾಪಯ್ ಸಯ್ರ್‍ಬಯ್ರ್ ಜಾಲಾಶೆಂ ಭೊಗ್ಲೆಂ. “ಕೋಣ್ ಜೆನ್ನಿ?” ತಾಣೆಂ ಆವಯ್ಚೆಂ ತೋಂಡ್ ಪಳೆಲೆಂ. ತಿಣೆಂ, ‘ತೆಂ ಖಂಯ್ ಆಸಾ ಮ್ಹಣ್ ಆಪವ್ನ್ ಹಾಡ್ಚೆಂ!?’ ಮ್ಹಳ್ಳ್ಯಾ ಅರ್ಥಾನ್ ಘೊವಾಕ್ ಪಳೆಲೆಂ.
ಪತಿಣೆಚ್ಯಾ ಮುಕಮಳಾರ್ ಎದೆವ್ನ್ ಪಾಶಾರ್ ಜಾಲ್ಲೆಂ ನಿರಾಶೆಚೆಂ ಕೀರ್ಣ್ ತಾಣೆಂ ಪಾರ್ಕಿಲೆಂ. ತೊ ಅಮ್ರುಕೊ ಹಾಸ್ಲೊ.
“ಧರ್ ಹೊ ವಿಳಾಸ್ ಆನಿ ನಂಬರ್. ಮ್ಹಜಿ ವ್ಹಳಕ್ ಸಾಂಗ್. ಜೆನ್ನಿ ಮಯ್ಸೂರಾಂತ್ ಆಸಾ.”
“ಕಿತೆಂ?!” ಪತಿಣ್ ಹಾಂಕ್ರೆಲಿ. ಸನ್ನಿ ವಿಳಾಸ್ ವಾಚ್ಚಾರ್ ಪಡ್ಲೊ. ಧಾಕ್ಟೆ ಧುವೆಕ್ ಹೊ ಏಕ್ ಮಿಸ್ತೆರ್‍ಚ್ ಜಾಲೊ! ‘ವ್ಹಯ್’ ಮ್ಹಳ್ಳೆಪರಿಂ ದೊಳೆ ಮೊಡ್ಲೆ ಆರ್‍ವಿಕೆನ್.
ಆರ್‍ವಿಕೆನ್ ಆಪ್ಲ್ಯಾ ರಯ್ಲಾ ಪಯ್ನಾಥಾವ್ನ್ ಸುರು ಕರ್ನ್, ಸಿಲ್ವನಾಗೆರ್ ಜೆನ್ನಿಕ್ ಮೆಳ್‍ಲ್ಲೆವಿಶಿಂ ಸವಿಸ್ತಾರ್ ಥರಾನ್ ವಿವರಿಲೆಂ.
ಪೂತ್ ಮೊಬಾಯ್ಲಾಂತ್ ಸಿಲ್ವನಾಚೆಂ ನಂಬರ್ ದಾಂಬಿಲಾಗ್ಲೊ.
“ತರ್.. ಜೆನ್ನಿ ಯೆತೆಲೆಂ?!” ಪತಿಣೆಚ್ಯಾ ತೊಂಡಾರ್ ಸಂತೊಸ್ ಉಮಾಳ್ಳೊ! ಸಕ್ಡಾಂ ಪುತಾತೆವ್ಶಿಂ ಧಾಂವ್ಲಿಂ.
ಆರ್‍ವಿಕೆನ್ ನೀಳ್ ಸ್ವಾಸ್ ಘೆತ್ಲೊ.
“ಟ್ರೈ ಕರ್ನ್ ಆಸಾಂ.. ಭಿಝೀ ಯೆತಾ. ಕನೆಕ್ಟ್ ಜಾಲ್ಲೆಂಚ್ ಸಾಂಗ್ತಾಂ.. “ ಸನ್ನಿ ಜನೆಲಾಸರ್ಶಿಂ ಆಸ್‍ಲ್ಲೊ ಮೊಬಾಯ್ಲ್ ಘೆವ್ನ್ ಬೊಲ್ಕಾಂವಾಕ್ ಗೆಲ್ಲೊ ದಿಸ್ಲೊ...
ಜೆನ್ನಿ ಉಲೊಣೆಂ ವ್ಹಡ್ಲ್ಯಾನ್ ಚಲ್ತಾಲೆಂ. ‘ಕಶೆಂ ಆಸ್‍ಲ್ಲೆಂ.. ಕಶೆಂ ಜಾಲಾಂಗಾಯ್.. ಭುರ್ಗಿಂ ಪುಣೀ ಆಸಾತ್ ಗಾಯ್.. ಘೊವ್.. ಯೇ..ತ್ ಗಾಯ್.. ಯೇಯ್ ಆನಿ ಯೇಣ್…ಸಾಂ..ಗಾ.. ತಾ... ಯೆ.. ತೆ.. ಲಿಂ......
ಆ..ವಾ.. ಜ್ ಮಂ......ದ್ ಜಾವ್ನ್ ಯೆತಾಲೊ. ಬೊಲ್ಕಾಂವಾಂತ್ಲೆಂ ಉಲೊಣೆಂ ಖಂಯ್‍ಗಿ ಪ...ಯ್ಸ್ ಥಾವ್ನ್ ಗುಣ್ಗುಣ್ಚೆ ಪರಿಂ.. ಆಯ್ಕುಂಕ್ ಲಾಗ್ಲೆಂ...
ಆನಿ ನಿಮಾಣೆಂ......
ಸಗ್ಳೆಂ ಸ್ಥಬ್ದ್ ಜಾಲೆಂ!
ಆರ್‍ವಿಕೆ ಹ್ಯಾ ಸಂಸಾರಾಚೆಂ ಕಿತೆಂಚ್ ಆಯ್ಕುಂಕ್ ಸಕ್ಲೊನಾ.. ತಿತ್ಲೊಯ್ ಪಯ್ಸ್ ತೊ ಪಾವ್‍ಲ್ಲೊ!
-***-
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ