ಮತ್ಲಬ್ಯಾಚಿ ಖುರ್ಸಾ ವಾಟ್
ಸಗ್ಳೆಂ ರಾಶ್ಟ್ರ್ ನಾಸ್ ಜಾಂವ್ಚ್ಯಾ ಬದ್ಲಾಕ್
ಎಕ್ಲ್ಯಾನ್ ಮೊರ್ ಚೆಂ ಬರೆಂ!
ತೊ ಎಕ್ಲೊ
ಹಾಂವ್ ಖಂಡಿತ್ ನ್ಹಯ್!
***
ತಾಣಿಂ ತಾಕಾ ಧರ್ನ್ ವ್ಹೆಲೊ
ಆವಯ್ ತಾಚಿ ಘರಾ ಯೆವ್ನ್
ಸೊಡಯ್ ಮ್ಹಣಾಲಿ
ಮ್ಹಾಕಾ ಖುರ್ಸಾ ವಾಟೆಕ್
ವೇಳ್ ಜಾತಲೊ
***
ತಾಣೆಂ ಖುರಿಸ್
ಖಾಂದಿ ಘೆತ್ಲೊ
ಆನಿ ಆಮಿ ಮೊಬಾಯ್ಲಾಂತ್
ಫೊಟೊ ಕಾಡ್ಲಿ!
***
ಪಯ್ಶಿಲ್ಯಾನ್ ರಾವ್ಲೊಂ
ಖುರ್ಸಾ ವಾಟೆರ್
ಅಚಾನಕ್ ಖುರ್ಸಾಕ್
ಖಾಂದ್ ಮಾರುಂಕ್ ಆಪಯ್ಲೆಂ
ಸಕ್ಡಾಂಚೆ ದಿಶ್ಟಿನ್
ಸಿರೆನಾಚೊ ಸಿಮಾಂವ್ಕ್
ಜಾಲ್ಲಿ ಲಜ್ ಭೊಗ್ಲಿ
***
ತಿಣೆಂ ತುವಾಲೊ ದಿಲೊ
ತೆಂ ತುವಾಲ್ಯಾಚ್ಯಾ ಕಂಪ್ಣೆಚೆಂ
ಜಾಯ್ರಾತ್ ಮ್ಹಣ್
ಮಾಗಿರ್ ಚ್ ಗೊತ್ತು!!
***
ತಾಣಿಂ ತಾಚಿಂ ವಸ್ತ್ರಾಂ ನಿಕ್ಳಾಯ್ಲಿಂ
ಆನಿ ಸೊಡ್ತಿ ಘಾಲಿ
ಹಾಂಗಾ ನೆಸ್ ಲ್ಲ್ಯಾ ವಸ್ತ್ರಾ ಸಮೇತ್
ತಿಕಾ ಸೊಡ್ತಿ ಘಾಲ್ತಾತ್!
***
ಮ್ಹಜ್ಯಾಯ್ ಹಾತಿಂ
ಖಿಳೆ ಆಸಾತ್!
ಆನಿ ದೊಳೆ ಮಾತ್ರ್
ಕ್ರಿಸ್ತಾ ತಸಲ್ಯಾಚೆ
ಖಾಲಿ ಹಾತ್
ಸೊಧಿತ್ ಆಸಾತ್!
***
ಅಬ್ಳೆ ಹೊ ತುಜೊ
ಪೂತ್
ಮ್ಹಳ್ಳೆಪರಿಂ ಆಯ್ಕಾಲೆಂ
ಹಾಂವೆಂ ಕುಶಿಚ್ಯಾಕ್
ಪಳೆಲೆಂ
ತೊ ಅನಿ ಕೊಣಾಕ್
ಗಿ ಪಳೆತಾಲೊ!
***
ಮ್ಹಾಕಾ ತಾನ್ ಲಾಗ್ಲ್ಯಾ!
ಹೋ! ಭಾಣಾಕ್ ಉದಕ್
ಭರುಂಕ್
ಟ್ಯಾಪ್ ಆನ್ ದವರ್
ಲ್ಲೆಂ
ತಿ ಆಕ್ಲಾಸ್ಲಿ!
***
ಮ್ಹಜ್ಯಾ ದೆವಾ,
ಕಿತ್ಯಾ ಮ್ಹಾಕಾ
ಸಾಂಡ್ಲಾಂಯ್!
ಉಡಾಸ್ ಆಯ್ಲೊ ತಾಕಾ
ತಾಣೆಂ ಸಾಂಡ್ ಲ್ಲ್ಯಾ
ಆವಯ್ಚೆಂ
ಫೋನ್ ಹರ್ಯೆಕ್
ಪಾವ್ಟಿಂ ರಿಜೆಕ್ಟ್ ಕೆಲ್ಲೆಂ!
**
‘ತಾಕಾ’ ಭಿತರ್
ಆಪವ್ನ್
ವಾಯ್ನ್ ದಿಲೊ
ಸಂಪದ್ಲೆಂ!
ಭಾಯ್ರ್ ಯೇವ್ನ್
ತೊ ವಾಯ್ನ್ ಉದಕ್
ಕರ್ತಾ ಮ್ಹಣ್ ಹಾಸ್ಲೆ!
***
ಪಾತ್ಕ್ಯಾಂನಿ ದೆವಾಕ್
ಕಾಲ್ವಾರಿ ಪರ್ಯಾಂತೀ
ಚಡಯ್ಲೊ
ದೆವಾನ್ ಯಿ ಪಾತ್ಕ್ಯಾಂಕ್
ಕಾಲ್ವಾರಿ ತೆಣೆಂ ಉತ್ರಾಯ್ಲೊ!
***
ಹಾಂವ್ ಪಾತ್ಕಿ
ಮ್ಹಣ್
ಕುಟ್ಟುನ್ ದೆಂವ್ಚಾರ್
ಹಾಸ್ತಾನಾ
ಮ್ಹಜೆ ಖಾತಿರ್
ಎಕ್ಲೊ ಮೊರೊನ್
ಜಿವೊ ಜಾಲ್ಲೊ ರೂಕ್
ಧಯ್ರ್ ದಿತಾ!
***
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ