ಉಲೊಣೆಂ ಮೊಗಾಚೆಂ ಅಸ್ಯೆತ್, ಉಲೊಣೆಂ ರಾಗಾಚೆಂ ಅಸ್ಯೆತ್. ಮೊಗಾಚೆಂ ಉಲೊಣೆಂ ದೊಗಾಂ ಮಧೆಂ ಫುಲ್ತಾ ಅನಿ ದೊಗಾಂಯ್ಕಿ ಫುಲಯ್ತಾ. ರಾಗಾಚೆಂ ಉಲವ್ಣೆಂ ಸಗ್ಳ್ಯಾ ವಾಡ್ಯಾಕ್ ಹಾಡಯ್ತಾ, ವಿಭಜನ್ ಕರ್ತಾ, ನೀದ್ ಚೊರ್ತಾ ಆನಿ ಮೊಡಿಂ ನಿದಯ್ತಾ.
ರಾಗ್!
ರಾಗ್ ಯೆತಾನಾ ಬೊಬಾಟ್ ಘಾಲ್ಚೆಂ ಚಡ್ ಮೊಗಾರ್ ಅಸ್ತಾನಾ ಪುಸ್ಪುಸ್ಚೆಂ ಚಡ್. ಹೆಂ ಬೊಬಾಟ್ಚೆಂ ಕಿತ್ಯಾ? ಮನಿಸ್ ಕಾಳ್ಜಾಕ್ ಲಾಗಿ ಆಸಾ ಮ್ಹಣ್ತಾನಾ ಪುಸ್ಪುಸ್ಚೆಂ ತೋಂಡ್, ತೊಚ್ ಮನಿಸ್ ಕಾಳ್ಜಾ ಪಯ್ಸ್ ಅಸಾ ಮ್ಹಣ್ತಾನಾ ಬೊಬಾಟ್ತಾ! ನಿಜಾಯ್ಕಿ ಜರ್ ಎಕ್ಲ್ಯಾಕ್ ಆನ್ಯೆಕ್ಲ್ಯಾಚೆರ್ ರಾಗ್‍ಚ್ ಯೇನಾ ತರ್ ತೊ ತಾಚ್ಯಾ ಮೊಗಾನ್ ಕುಡ್ಡೊ ಜಾಲಾ ಮ್ಹಣ್ಯೆತ್. ಮೊಗಾಂತ್ ಕುಡ್ಡೊ ಜಾಲ್ಲ್ಯಾಂಕ್ ಅನ್ಯೆಕ್ಲ್ಯಾಚೆ ಅವ್ಗುಣ್‍ಯಿ ಅಮೃತ್!
ರಾಗ್ ಕೊಣಾಕ್ ಯೇನಾ ಸಾಂಗಾ? ಲ್ಹಾನ್ ಭುರ್ಗ್ಯಾ ಥಾವ್ನ್ ಧರ್ನ್ ಮಠ್ವಾಸಿ, ಸನ್ನೆಸಿಂಕ್ ಸಯ್ತ್ ರಾಗ್ ಯೆತಾ. ಹಾಂವ್ ಲ್ಹಾನ್ ಆಸ್ತಾನಾ ವಾಚ್‍ಲ್ಲ್ಯಾ ಪ್ರಕಾರ್ ದುರ್ವಾಸ ಮುನಿ ಮ್ಹಳ್ಳೊ ರಾಗಾಕ್ ಫಾಮಾದ್. ತಾಣೆಂ ರಾಗಾನ್ ಕಾಂಯ್ ಶಿರಾಪ್ ದಿಲೊ ತರ್ ಫುಡ್ಲ್ಯಾನ್ ಆಸ್ಚೊ ತೊ ರಾಯ್ ಜಾಂವ್, ಸಾಧೊ ಕುಲ್ಕಾರ್ ಜಾಂವ್ ಉದ್ದಾರ್ ಜಾಲ್ಲೆಪರಿಂ ನಾ. ಅಮ್ಚ್ಯಾ ಬೈಬಲಾಂತ್ ಏಕ್ ರಾಗಿಶ್ಟ್ ಪ್ರವಾದಿ ಆಸಾ. ಎಲಿಯಾ ಪ್ರವಾದಿಚೊ ಶಿಸ್ ಎಲಿಶಾ. ತೊ ಏಕ್ ಪಾವ್ಟಿಂ ವಾಟೆರ್ ವೆತಾನಾ ಥೊಡ್ಯಾ ಚೆಡ್ಯಾಂನಿ ‘ಅಳೆ ಖಡ್ಡೊ ಗೆಲೊ.. ಬೋರ್ ಮಂಡೆ ಕಾಕಾ’ ಮ್ಹಣ್ ಹಿಣ್ಸಿಲ್ಲ್ಯಾಕ್ ರಾಗಾನ್, “ಅತ್ತಾಂಚಾ ಅತ್ತಾಂ ಅಸ್ವೆಲಾಂ ಯೇವ್ನ್ ಹಾಂಕಾ ನಾಸ್ ಕರುಂದಿತ್” ಮ್ಹಣ್ ಎಲಿಶಾನ್ ಮ್ಹಳೆಂ ಖಂಯ್ ಆನಿ ಆಸ್ವೆಲಾಂ ಚಾರೀ ಕುಶಿಂ ಥಾವ್ನ್ ಆಯ್ಲಿಂ ಅನಿ ಹ್ಯಾ ಚೆಡ್ಯಾಂಕ್ ಗ್ರಾಶಿಲೆಂ. ಹೊ ಕಠೀಣ್ ರಾಗ್! ಸಮರ್ಥನ್ ಕರುಂಕ್ ಜಾಯ್ನಾ ತಸಲೊ ರಾಗ್.
ರಾಗಾಚೊ ಜಲ್ಮ್‍ಚ್ ವಿಚಿತ್ರ್ ಪಳೆಯಾ, “ಮ್ಹಾಕಾ ಹೆಂ ಜಾಯ್, ಅಶೆಂ ಜಾಯ್ಜಯ್ ಮ್ಹಣ್ ಆಶಾ ಆಸ್ತಾ. ತಶೆಂ ಜಾಯ್ನಾ ತರ್ ರಾಗ್ ಯೆತಾ. ಆಪೇಕ್ಷೆಥಾವ್ನ್ ರಾಗ್, ರಾಗಾ ಥಾವ್ನ್ ಸ್ವಮೋಗ್, ಸ್ವಮೋಗಾ ಥಾವ್ನ್ ಮತಿಭಷ್ಟ್, ಮತಿಭಷ್ಟ್ ಥಾವ್ನ್ ಬೂದ್ ನಾಸ್, ಬೂದ್ ನಾಸ್ ಥಾವ್ನ್ ಆತ್ಮೊ ನಾಸ್” ಮ್ಹಣ್ ಭಗವದ್ಗೀತೆಂತ್ ಕೃಷ್ಣಾನ್ ಸಾಂಗ್‍ಲ್ಲೆಂ ಆಸಾ.
ತರ್, ಅಪೇಕ್ಷಾ ವ ನಿರೀಕ್ಷಾಚ್ ರಾಗಾಚೆಂ ಮೂಳ್ ಮ್ಹಣ್ ಜಾಲೆಂ.
ರಾಗ್ ಯೆಂವ್ದಿ - ಚಾರ್ ಗಾಳಿಂನಿ ಸಂಪ್ಲ್ಯಾರ್ ಕಿತ್ಲ್ಯಾಕೀ ಬರೆಂ. ತೊ ರಾಗ್ ಪೆಲ್ಯಾಚೊ ಸುರ್‍ಯೊ ಬುಡಯ್ತ್ ತರ್ ತೆಂ ದುರಂತ್.
ರಾಗ್ ಅಪ್ಲೆಸ್ತಕಿಂ ಬರೊಯ್ ನ್ಹಯ್ ಪಾಡ್‍ಯಿ ನ್ಹಯ್. ತೊ ಕಸೊ ಅಮಿ ವಾಪಾರ್ತಾಂವ್ ತಾಚೆರ್ ಹೊಂದ್ವೊನ್ ತಾಚೊ ಫಳ್.
ಆಕಸ್ಮಿಕ್ ರಾಗ್ ಅಯ್ಲೊ- ತೊ ಅಮ್ಚ್ಯಾ ಅಜ್ಞಾನಾಚೊ ಫಳ್
ಜಾಣ್ವಾಯ್ ಆಸುನ್ ರಾಗ್ ಅಯ್ಲೊ- ತೊ ಸಾತ್ವಿಕಾಯೆಚೊ ಫಳ್.
ಸಾತ್ವಿಕ್ ರಾಗಾ ಪಾಟ್ಲ್ಯಾನ್ ಆಪೇಕ್ಷಾ ಆಸಾನಾ, ಆಪ್ಣಾಚೊಚ್ ಸ್ವಮೋಗ್ ಆಸಾನಾ ಬಗಾರ್ ಪೆಲ್ಯಾಚೆಂ ಬರೆಂಪಣ್ ಆಸ್ತಾ.
ಗುರುಕ್, ವ್ಹಡಿಲಾಂಕ್, ಇಶ್ಟಾಕ್ ರಾಗ್ ಯೇಜೆಚ್. ತಾಂಚ್ಯಾ ರಾಗಾಚೊ ಆಶೀರ್ವಾದ್ ಆಮ್ಕಾಂ ಜಾಯ್‍ಚ್. ಜರ್ ತಾಂಕಾ ರಾಗ್ ಯೇನಾ ತರ್ ತಿಂ ಅಮ್ಚ್ಯಾ ವ್ಹಯ್ಲ್ಯಾ ಮೊಗಾನ್ ಕುಡ್ಡಿಂ ಜಾಲ್ಯಾಂತ್ ಮ್ಹಣ್ ಅರ್ಥ್. ತಾಂಚ್ಯಾ ರಾಗಾಂತ್ ಜಿಣ್ಯೆರೂಚ್ ಆಸಾ, ಆಮ್ಚೆ ತಸಲ್ಯಾಂಚ್ಯಾ ಉದ್ದರಾಚಿಂ ಸಪ್ಣಾಂ ಆಸಾತ್. ರಾಗಾಚಿ ಏಕ್ ದೀಷ್ಟ್ ಯಿ ಜೊಕುಂಕ್ ಭಿಯೆತೆಲ್ಯಾಂಕ್, ರಾಗಾಚೆಂ ಏಕ್ ಉತರ್ ಸಾಂಗಾನಾತ್ಲ್ಯಾ ವ್ಹಡಿಲಾಂಕ್ ಭುರ್ಗ್ಯಾಂವಯ್ಲೊ ವ್ಯಾಮೋಹ್ ಚಡ್ ಜಾಲಾ. ತ್ಯಾ ವ್ಯಾಮೋಹಾಂತ್ ಶಿರ್ಕೊನ್ ಮುಕಾರ್ ಏಕ್ ದೀಸ್ ವ್ಹಳ್ವಳ್ತಾನಾ ರಾಗಾರ್ ಜಾಂವ್ಚ್ಯಾಕೀ ಆಜ್ ಏಕ್ ರಾಗಾಚಿ ದೀಶ್ಟ್ ತುಮ್ಕಾಂ ಬಚಾವ್ ಕರಿತ್ ಕೊಣ್ಣಾ!
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ