ಶರೀಫನ್

ಸಾದತ್ ಹಸನ್ ಮಂಟೊ

ಕೊಂಕ್ಣೆಕ್: ಜೊ.ಸಿ.ಸಿದ್ದಕಟ್ಟೆ

_________________________________________________________________________________

ಸಾದತ್ ಹಸನ್ ಮಂಟೊ ಭಾರತ್-ಪಾಕಿಸ್ತಾನ್ ವೆಗ್ಳೆ ಜಾತಾನಾ ಉಬ್ಜಲ್ಲ್ಯಾ ಹಿಂದು-ಮುಸ್ಲಿಮ್ ರಗ್ತಾಪಾತಾಚೆಂ ಭಿರಾಂಕುಳ್‍ಪಣ್ ಅಪ್ಲ್ಯಾ ಕಾಣಿಯಾಂನಿ ಧರ್ನ್ ದವರ್‍ಲ್ಲೊ 20ವ್ಯಾ ಶೆಕ್ಡ್ಯಾಚೊ ಶ್ರೇಷ್ಟ್‍ ತಶೆಂ ಬೋವ್ ವಿವಾದಿತ್‍ ಕಾಣಿಯಾಂಗಾರ್. ಮನ್ಶಾವರ್ತನ್, ಮನ್ಶಾಶಾಸ್ತ್ರೀಯ್ ವಿಶ್ಲೇಶಣಾಸವೆಂ ಸಾದರ್‍ ಕರ್ಚಿ ತಾಚ್ಯಾ ಕಾಣಿಯಾಂಚೊ ಖಾಸ್‍ ಗೂಣ್. 'ಭಾರತ್-ಪಾಕಿಸ್ತಾನ್ ವೆಗ್ಳಾಚಾರಾ ವೆಳಾರ್ ದಿಸೊನ್‍ ಅಯಿಲ್ಲೆಂ ಜಮ್ಯಾ ಪಿಸಾಂತುರ್‍ಪಣ್ ಮಂಟೊಪರಿಂ ಹೆರ್‍ ಕೊಣೆಂಯ್ ಬರ್ಪಾಂತ್ ಪಿಂತ್ರಾಂವ್ಕ್ ನಾ' ಮ್ಹಣ್ತಾತ್ ವಿಮರ್ಶ್ಯಾಗಾರ್. ಹಾಂಗಾ ಪರ್ಗಟ್ಲಿ ‘ಶರೀಫನ್’ ಕಾಣಿ ತಾಕಾ ಸಾಕ್ಸ್.

ಜಲಿಯಾನಾವಾಲಾಬಾಗ್ ಹತ್ಯಾಕಾಂಡಾಚೆರ್ ಬರಯಿಲ್ಲಿ ‘ತಮಾಶಾ’ ತಾಚಿ ಫುಡ್ಲದ್‍ಕಾಣಿ. ‘ಖೋಲ್‍ದೋ’ ಆನಿ ‘ಥಂಡಾಗೋಶ್ತ್’ ತಸಲ್ಯೊ ಕಾಣಿಯೊ ಸಂಪ್ರದಾಯಿಕಾಂ ಮದೆಂ ವಿವಾದಾಚೆಂ ವಾದಾಳ್ ಉಟಂವ್ಕ್ ಪಾವ್‍ಲ್ಲ್ಯೊ.

_________________________________________________________________________________

ಕಾಸಿಮ್ ದಾರಾ ಮುಕಾರ್ ಚಲೊನ್‍ಯೆತಾನಾ, ಅಪ್ಲೆ ಪೊಟ್ರೆಕ್ ರಿಗ್‍ಲ್ಲ್ಯಾ ಗುಳ್ಯಾಚೊ ಹುಲೊಪ್ ಮಾತ್ರ್ ತಾಚ್ಯಾ ಗುಮಾನಾಂತ್ ಆಸ್‍ಲ್ಲೊ. ಪುಣ್ ಆಂಗ್ಣಾಂತ್ ಪಡ್‍ಲ್ಲೆ ಬಾಯ್ಲೆಚಿ ರಗ್ತಾನ್ ಬುಡ್‍ಲ್ಲಿ ಕೂಡ್ ಪಳೆಲ್ಲೆಂಚ್ ತಾಚೆಂ ದೂಖ್ ಖಿರೊನ್ ಗೆಲೆಂ. ತಕ್ಶಣ್ ಕುರಾಡ್ ಉಕಲ್ನ್ ಮುಕಾರ್ ಯೆತೆಲ್ಯಾಂಕ್ ಕಾತರ್ನ್ ಘಾಲ್ನ್, ದಿಸ್‍ಲ್ಲೆಂ ಸಕ್ಕಡ್ ಪಿಸುಡ್ನ್ ಉಡಂವ್ಚಿ ಜಬ್ಬೊರ್ ತಾಳ್ನಿ ಅಯ್ಲಿ. ಪರತ್ ಧುವೆಚೊ ಉಡಾಸ್ ಆಯ್ಲೊ - ಶರೀಫನ್.

ಬೊಬಾಟ್ಲೊ - ‘ಶರೀಫನ್! ಶರೀಫನ್!’

ಘರ್ಚಿಂ ದೊನೀ ದಾರಾಂ ಧಾಂಪ್‍ಲ್ಲಿಂ. ತ್ಯಾ ದಾರಾ ಪಾಟ್ಲ್ಯಾನ್ ಲಿಪೊನ್ ರಾವ್ಲಾಂಗಾಯ್? ಪರತ್ ತಾಳೊ ಕಾಡ್ಲೊ –

‘ಶರೀಫನ್! ಶರೀಫನ್... ಹಾಂವ್ ಮಾ ತುಜೊ ಅಬ್ಬಾ!!’

ಜಾಪ್ ನಾ. ಮುಕ್ಲೆಂ ದಾರ್ ದೊನೀ ಹಾತಾಂನಿ ಲೊಟುನ್ ಉಗಡ್ಲೆಂ. ತವಳ್ ತಾಚ್ಯಾ ದೊಳ್ಯಾಂಕ್ ಸಾಂಪಡ್‍ಲ್ಲೆಂ ದೃಶ್ಯ್ ಕಿತ್ಲೆಂ ಭಿರಾಂಕುಳ್ ಮ್ಹಳ್ಯಾರ್ ಚೊವುನ್ ಮತ್ ಚುಕ್ಚೆಪರಿಂ ಜಾಲೆಂ.

ಧರ್ಣಿರ್ ಚಡುಣೆಂ ನಾಗ್ಡೆಂಚ್ ಉದಾರೆಂ ಪಡ್‍ಲ್ಲಿ ಚೆಡ್ವಾಚಿ ಕೂಡ್; ಪಾಕೆಂ ಚೊವುನ್ ರಾವ್‍ಲ್ಲಿಂ ತಾಚಿಂ ಲ್ಹಾನ್ ಸ್ತನಾಂ. ಜ್ಯೊರಾನ್ ರಡ್ಯಾಂಶೆಂ ಭೊಗ್ಲೆಂ. ಜಾಲೆಂ ನಾ. ವದನ್ ಘುಂವ್ಡಾವ್ನ್ ದುಖಾನ್ ಮಿಸ್ಳಾಲ್ಲ್ಯಾ ವಳೂ ತಾಳ್ಯಾನ್ ಉಚಾರ್ಲೆಂ -ಶರೀಫನ್. ಧರ್ಣಿ ವಯ್ಲಿಂ ಥೊಡಿಂ ವಸ್ತುರಾಂ ವಿಂಚುನ್ ತಾಣೆಂ ತಾಚ್ಯಾ ಆಂಗಾರ್ ಉಡಯ್ಲಿಂ. ಪುಣ್ ತಿಂ ವಸ್ತ್ರಾಂ ತಾಚೆರ್ ಪಾವನಾಸ್ತಾಂ ಚಿಕ್ಕೆ ಪಯ್ಸ್‍ಚ್ ಪಡ್‍ಲ್ಲಿಂ ತಾಣೆಂ ಚೊಯ್ಲೆಂನಾ.

ಕುರಾಡ್ ವಿಂಚುನ್ ಘರಾ ಭಾಯ್ರ್ ಧಾಂವ್ಲೊ. ತಾಚೆ ಮತಿಂತ್ ಆತಾಂ ಪೆÇಟ್ರೆಂತ್ ರಿಗ್‍ಲ್ಲ್ಯಾ ಗುಳ್ಯಾಚಿ ಪರ್ವಾ ನಾತ್‍ಲ್ಲಿ. ಬಾಯ್ಲೆಚ್ಯಾ ರಗ್ತಾನ್ ಬುಡ್‍ಲ್ಲೆ ಕುಡಿರ್‍ಯಿ ಗುಮಾನ್ ದಿಲೆಂನಾ. ಫಕತ್ ಶರೀಫನ್ - ಮೊರೊನ್ ಧರ್ಣಿರ್ ನಾಗ್ಡೆಂಚ್ ಮುದೊ ಜಾವ್ನ್ ಪಡ್‍ಲ್ಲೆಂ ಶರೀಫನ್!

ಕುರಾಡ್ ಭಿಜಾವ್ನ್ ಗಾಂವ್ಚ್ಯಾ ಗಲ್ಲೆಂನಿ ಸಳ್ಸಳ್ಯಾಂಪರಿಂ ತೊ ಧಾಂವ್ಲೊ. ಮುಕೆಲ್ ಸರ್ಕಲಾಕಡೆ ಹಾಚ್ಯಾ ದೊಳ್ಯಾಂಕ್ ಎಕ್ಲೊ ಸಿಖ್ ಸಾಂಪಡ್ಲೊ – ಕಟೀಣ್ ಗಾತ್ರಾಚೊ ಗ್ರಾಯ್ಕ್. ಪುಣ್, ಕಾಸಿಮ್ ತಾಚೆರ್ ಇತ್ಲ್ಯಾ ವೆಗಾನ್ ಆನಿ ಭಿರಾಂಕುಳ್ ರಿತಿನ್ ಉಡ್ಲ್ಲೊಕೀ, ತೊ ಮನಿಸ್ ಪೆಂಕಡ್ ಕಾತರ್ಲ್ಯಾ ರುಕಾಪರಿಂ, ಚಿರುನ್ ಗೆಲ್ಲೆ ತಕ್ಲೆಥಾವ್ನ್ ರಗತ್ ‘ಚಿಲ್’ ಕರ್ನ್ ಉಸಳ್ತಚ್ ಧರ್ಣಿಕ್ ಶೆವ್ಟಾಲೊ.

ಕಾಸಿಮಾಕ್, ಸಳ್ಸಳ್ಯಾ ತೆಲಾಕ್ ಶೆಳೆಂ ಉದಕ್ ಮಾರ್‍ಲ್ಲೆಪರಿಂ ಆಪ್ಲೆ ಕುಡಿಂತ್ ಧಾಂವ್ಚ್ಯಾ ಸಳ್ಸಳ್ಯಾ ರಗ್ತಾಚೊ ವೇಗ್ ಸಮ್ಜಾಲೊ. ರಸ್ತ್ಯಾಚ್ಯಾ ತೆ ತುದಿಯೆರ್ ಚಾರ್-ಪಾಂಚ್ ಜಣಾಂಚೊ ಜಮೊ ದಿಸ್ತಾನಾ ತಾಂಚೆಶಿಂ ಗುಳ್ಯಾಪರಿಂ ಉಸಾಳ್ಳೊ. ತಾಂಣಿಂ ‘ಹರಹರ ಮಹಾದೇವ್’ ಮ್ಹಳೆಂ, ಹೊಯೀ ಆಪ್ಲೊ ಹಿಂದು ಭಾವ್ ಮ್ಹಣ್ ಚಿಂತುನ್. ಜಾಪ್ ಜಾವ್ನ್ ಹೊ ಆಪ್ಲಿ ಕುರಾಡ್ ವಾರ್ಯಾರ್ ಧಲಯಿತ್, ‘ಮಾದರ್ ಚೋದ್’ ಮ್ಹಣ್ ಬೊಬಾಟಿತ್ ತಾಂಚೆಶಿಂ ಧಾಂವ್ಲೊ.

ತಾಂಚೆ ಪಯ್ಕಿ ತೇಗ್, ಥೊಡ್ಯಾಚ್ ಖಿಣಾಂನಿ ರಗತ್ ಲೆಪ್‍ಲ್ಲ್ಯಾ ಮೊಡ್ಯಾಂಚಿ ರಾಸ್ ಜಾಲೆ; ಬಾಕಿಚೆ ಮೆಳ್‍ಲ್ಲೆ ವಾಟೆನ್ ಧಾಂವ್ಲೆ. ಪುಣ್ ಕಾಸಿಮ್ ಅಮಾಲ್ಯಾಪರಿಂ ಕುರಾಡ್ ಭಿಜಾಯಿತ್ ಆಸ್ಲೊ - ಆಪುಣ್‍ಚ್ ಲಕೊನ್ ಎಕಾ ಮೊಡ್ಯಾ ವಯ್ರ್ ಪಡ್ತಾ ಪರ್ಯಾಂತ್. ತವಳ್‍ಯಿ ಆಪುಣ್‍ಚ್ ಸಕ್ಲಾ ಪಡ್ಲೊಂ ವಾ ಹೆರ್ ಕೊಣೆಂಯ್ ಲೊಟುನ್ ಘಾಲೆಂಗಾಯ್ ಕಳನಾಸ್ತಾಂ, ಪಡ್‍ಲ್ಲೆಕಡೆಚ್ ಆಕ್ರಮಣಾಖಾತಿರ್ ರಾಕ್ಲೊ. ಪುಣ್ ಕಾಂಯ್ ಜಾಲೆಂ ನಾ. ಥೊಡ್ಯಾ ಖಿಣಾಂ ಉಪ್ರಾಂತ್ ಸವ್ಕಾಸ್ ದೊಳೆ ಉಗಡ್ಲೆ. ಸಗ್ಳ್ಯಾ ರಸ್ತ್ಯಾರ್ ಕೊಣೀ ನಾತ್‍ಲ್ಲೆ. ತಿ’ತೀನ್ ಮೊಡಿಂ, ತ್ಯಾ ಮೊಡ್ಯಾಂ ಮದ್ಗಾತ್ ಆಪುಣ್. ಅಪ್ಣಾಕ್ ಕೊಣೆಂಯ್ ಜಿವೆಶಿಂ ಮಾರ್ಲೆಂ ನಾ ದೆಕುನ್ ನಿರಾಸ್ ಭೊಗ್ಲೆಂ. ಪರತ್ ಶರೀಫನಾಚಿ ವಿಣ್ಗಿ ಕೂಡ್ ದೊಳ್ಯಾಂ ಮುಕಾರ್ ಆಯ್ಲಿ- ಸಳ್ಸಳ್ಯಾ ಲೊಂಕ್ಡಾಪರಿಂ ಅಪ್ಲೆ ದೊಳೆ ಹುಲ್ಪಲ್ಲೆಂ ದೃಶ್ಯ್. ದುಸ್ರೆ ಘಡಿಯೆ ತೊ ಪರತ್ ಕುರಾಡ್ ಅರಾವ್ನ್ ಪೆÇಜ್ಡಿಂ ಉತ್ರಾಂ ವೊಂಕುನ್ ಧಾಂವ್ಲೊ.

   ಶ್ಹೆರ್ ಖಾಲಿ ಖಾಲಿ ಅಸ್‍ಲ್ಲೆಂ. ಭೆಶ್ಟೆಂಚ್ ಖಂಚ್ಯಾಗೀ ಎಕೆ ವೊಣಿಂತ್ ರಿಗ್ಲೊ. ಪುಣ್ ಮುಸ್ಲಿಮಾಂಚಿ ಗಲ್ಲಿ ಮ್ಹಣ್ ಸಮ್ಜಾಲ್ಲೆಂಚ್ ಥಂಯ್ಚೊ ಭಾಯ್ರ್ ಪಡ್ಲೊ. ಎದೊಳ್ ಪರ್ಯಾಂತ್ ಅಪ್ಲ್ಯಾ ದುಸ್ಮಾನಾಂಚ್ಯಾ ಆವಯ್-ಭಯ್ಣಿಂಚೆರ್ ಗಾಳಿ ಮಾರ್ಚೊ ಅತಾಂ ತಾಂಚ್ಯಾ ಸರ್ವ್ ಚೆಡ್ವಾಂ ಭುರ್ಗ್ಯಾಂಚೆರ್ ಗಾಳಿಯಾಂಚೊ ಶಿಂವೊರ್ ವೊತಿಲಾಗ್ಲೊ.

ಉಪ್ರಾಂತ್ ಲ್ಹಾನ್‍ಘರಾ ಮುಕಾರ್ ತೊ ಉಬೊ ಜಾಲೊ.

ಘರ್ಚ್ಯಾ ದಾರಾರ್ ಹಿಂದಿಂತ್ ಕಿತೆಂಗಿ ಬರಯಿಲ್ಲೆಂ. ಕಾಸಿಮಾನ್ ತಾಚೆರ್ ಕುರಾಡಿನ್ ಮಾರುನ್ ಥೊಡ್ಯಾಚ್ ಖಿಣಾಂನಿ ದಾರ್ ಪಿಟೊ ಕೆಲೆಂ. “ಭಾಯ್ರ್ ಯೆಯಾರೆ, ಮಾ..ದ್, ಯೆಯಾರೆ...” ಮ್ಹಣ್ ಬೊಬಾಟಿತ್ ಭಿತರ್ ರಿಗ್ಲೊ.

   ಭಿತರ್ಲೆಂ ಏಕ್ ದಾರ್ ಕಿರ್ರ್ ಕರ್ನ್ ಆವಾಜ್ ಕರಿತ್ತ್ ಉಗ್ತೆಂ ಜಾವ್ನ್ ಲ್ಹಾನ್ ಚೆಡುಂ ಎಕ್ಲೆಂ ದಿಸ್ಲೆಂ. ವಿಚಾರ್ಲೆಂ - “ತುಂ ಕೋಣ್?” ಜಿಬೆನ್ ಆಪ್ಲೆ ಸುಕೆ ವೋಂಟ್ ಥಂಡ್ ಕರಿತ್ “ಹಿಂದು” ಮ್ಹಣಾಲೆಂ. ತೆಂ ಚೆಡುಂ ಚಡ್ ಮ್ಹಳ್ಯಾರ್ ಚೊವ್ದಾ - ಪಂದ್ರಾಚೆ ಪ್ರಾಯೆಚೆಂ ಆಸತ್.

   ಕಾಸಿಮ್ ಕೂಡ್ಲೆ ಅಪ್ಲಿ ಕುರಾಡ್ ಉಡವ್ನ್ ಧರ್ಣಿಕ್ ಶೆವ್ಟುನ್ ರಾನ್ ಮೊನ್ಜಾತಿಪರಿಂ ಆಂಗಾರ್ ಪಡ್ಲೊ. ತಾಚಿಂ ವಸ್ತ್ರಾಂ ಪಿಂಜುನ್ ಉಡಯ್ಲಿಂ. ಅರ್ದೊ ಘಂಟೊ ಮೊನ್ಜಾತಿಪರಿಂ ತಾಕಾ ಪಿಸುಡ್ನ್ ಉಡಯ್ಲಾಗ್ಲೊ. ಪುಣ್ ಚೆಡ್ವಾಥಾವ್ನ್ ಇಲ್ಲಿಯ್ ಆಡ್ಕಳ್ ಆಯ್ಲಿನಾ. ಕಿತ್ಯಾ ಎದೊಳ್‍ಚ್ ತೆಂ ಮತ್ ಚುಕೊನ್ ಪಡ್‍ಲ್ಲೆಂ.

  ಸಕ್ಕಡ್ ಸಂಪ್ಲ್ಯಾ ಉಪ್ರಾಂತ್ ಆಪ್ಲ್ಯಾ ದೊನೀ ಹಾತಾಂನಿ ತಾಚೊ ಗಳೊ ಚಿರ್ಡುನ್ ಧರ್ಲೊ ಅನಿ ಅಪ್ಲ್ಯೊ  ನಾಕ್ಶ್ಯೊ ತಾಚೆ ಮೋವ್ ಕಾತಿ ಭಿತರ್ ರಿಗ್‍ಲ್ಲ್ಯೊ ತಾಕಾ ಗಮ್ಲೆಂ. ತಾಣೆ ದೊಳೆ ಧಾಂಪ್ಲೆ. ಧರ್ಣಿರ್ ಮೊರೊನ್ ಪಡ್‍ಲ್ಲೆ ಧುವೆಚೆಂ ಪಿಂತುರ್ ಉಡಾಸಾಕ್ ಆಯ್ಲೆಂ. ಪಾಕೆಂ ಚೊಂವ್ಚಿಂ ಧುವೆಚಿಂ ಲ್ಹಾನ್ ಸ್ತನಾಂ. ತೊ ಬಾರಿಕ್ ಕಾಂಪ್ಲೊ.

   ತವಳ್, ಹಾತಾಂತ್ ಕೊಯ್ತಿ ಆಸ್‍ಲ್ಲೊ ಎಕ್ಲೊ ಫುಟ್ಲಲ್ಯಾ ಭಾಯ್ಲ್ಯಾ ದಾರಾಂತ್ಲ್ಯಾನ್ ಭಿತರ್ ರಿಗ್ಲೊ. ಆಯಿಲ್ಲ್ಯಾಚ್ಯಾ ದೊಳ್ಯಾಂಕ್ ಕಾಸಿಮ್ ಸಕ್ಲಾ ಬಸೊನ್, ಧರ್ಣಿರ್ ನಿದ್‍ಲ್ಲೆ ಕುಡಿ ವಯ್ರ್ ವೋಲ್ ಪಾಂಗುರ್ಚೆಂ ದಿಸ್ಲೆಂ.

ಬೊಬಾಟ್ಲೊ - “ಕೋಣ್‍ತುಂ?” ಕಾಸಿಮ್ ತಾಚೆಶಿಂ ಘುಂವ್ಲೊ.

   ಕಾಸಿಮ್ ಭೆಶ್ಟೆಂಚ್ ಅಸ್ಡ್ಯೊ ಹಾಲಯ್ಲಾಗ್ಲೊ. ವದನಾರ್ ಭೊಗ್ಣಾಂ ನಾಂತ್. ತಾಕಾ ಸಾರ್ಕೆಂ ಕಾಂಯ್ ದಿಸನಾತ್ಲೆಂ.

“ಮ್ಹಜ್ಯಾ ಘರಾ ತುಂ ಕಿತೆಂ ಕರ್ತಾಯ್?” ತಿ ವೆಕ್ತಿ ಪರತ್ ಬೊಬಾಟ್ಲಿ.

  ಕಾಸಿಮ್ ಅಪ್ಲೆಂ ಕಾಂಪ್ಚೆಂ ಬೊಟ್ ಧರ್ಣಿರ್ ವೊಲಿಸಂಗಿಂ ಪಡ್‍ಲ್ಲ್ಯಾ ಮುದ್ಯಾ ತೆವ್ಶಿ ಜೊಕುನ್ ಪೊಕೊಳ್ ತಾಳ್ಯಾನ್ ಮ್ಹಣಾಲೊ - ‘ಶರೀಫನ್!’

ಅಯಿಲ್ಲೆ ವೆಕ್ತಿನ್ ವೋಲ್ ಕಾಡ್ನ್ ಉಡಯ್ಲಿ. ತಕ್ಶಣ್ ತಾಚ್ಯಾ ಹಾತಾಂತ್ಲಿ ಕೊಯ್ತಿ ನಿಸ್ರೊನ್ ಪಡ್ಲಿ. ಉಪ್ರಾಂತ್ ಕಂಗಾಲ್ ಜಾವ್ನ್ ಪಿಂರ್ಗೊನ್ ವೆಕ್ತಿ ಘರಾ ಭಾಯ್ರ್ ಧಾಂವ್ಲಿ - ‘ಬಿಮಲಾ’ ಮ್ಹಜೆ ಧುವೆ ಬಿಮಲಾ...!’

********

‘ಅನ್ಯ್ ದೇವ್’ ಮ್ಹಳ್ಳೆ ಅಸ್ತಿತ್ವಾಂತ್ ಆಸಾತ್?

‘ಅನ್ಯ್ ದೇವ್’ ಮ್ಹಳ್ಳೆ ಅಸ್ತಿತ್ವಾಂತ್ ಆಸಾತ್‍ಗಿ? 

ದೇವ್ ಏಕ್ ಮಾತ್ರ್! ವೆವೆಗ್ಳೆ ದೇವ್ ಆಸುಂಕ್ ಸಾಧ್ಯ್ ನಾ. ಸೊಂಪೆಂ ಕಾರಣ್, ದೇವ್ ಸರ್ವ್ ಪದ್ವೆದಾರ್. ಜರ್ ದೋನ್ ಜಿವಿ ಆಪುಣ್ ದೇವ್ ಮ್ಹಣ್ತಾ ತರ್ ತಾಂಚೆಪಯ್ಕಿ ಎಕ್ಲ್ಯಾ ಲಾಗಿಂ ಆಸ್‍ಲ್ಲೆಂ ಅನ್ಯೆಕ್ಲಾ ಲಾಗಿಂ ನಾ. ಜರ್ ದೊಗಾಂಯ್ ಲಾಗಿಂ ಎಕ್‍ಚ್ ಲೆಕಾನ್ ಪದ್ವಿ, ಸಕತ್ ಆಸಾ ತರ್ ತೆ ದೋಗ್ ನ್ಹಯ್, ಎಕ್‍ಚ್! ಜರ್ ಎಕಾ ಪ್ರಾಸ್ ಚಡ್ ಸಕ್ತ್ಯೊ ಆಪುಣ್ ಬಳ್ವಂತ್ ಮ್ಹಣ್ತಾತ್ ತರ್ ತ್ಯೊ ಸಗ್ಳ್ಯೊ ಎಕ್‍ಚ್ ಆಸ್ತೆಲ್ಯೊ, ನಾ ತರ್ ತ್ಯೊ ಫಟಿ ಮಾರ್ತಾತ್!

ಹೆರ್ ದೇವ್ ಮ್ಹಳ್ಳೆ ಅಸ್ತಿತ್ವಾಂತ್ ನಾಂತ್ ತರ್ ಇಸ್ರಾಯೆಲಿತಾಂಕ್ ಹೊ ಉಪಾದೆಸ್ ಕಿತ್ಯಾ ದಿಲ್ಲೊ ಆನಿ ಆಮ್ಕಾಂ ಕಸೊ ಆಜ್ ಲಾಗು ಜಾತಾ? 

 ಆದ್ಲ್ಯಾ ಖರಾರಾಚ್ಯಾ ಕಾಳಾರ್, ವೆವೆಗ್ಳ್ಯಾ ದೆವಾಂಚೆರ್ ಪಾತ್ಯೆಣಿ ಚಾಲ್ತೆರ್ ಆಸ್‍ಲ್ಲಿ ಸಾಧಿ ಗಜಾಲ್. ಪುಣ್ ಇಸ್ರಾಯೆಲಿತಾಂನಿ ಎಕಾ ನಿಜಾ ದೆವಾಕ್ ಪಾತ್ಯೆಂವ್ಚೆಂ ಸಗ್ಳ್ಯಾ ಸಮಾಜೆಂತ್ ಕ್ರಾಂತಿಕಾರಿ ಚಿಂತಾಪ್, ಹ್ಯಾಚ್ ಕಾರಣಾಕ್ ಲಾಗುನ್ ಇಸ್ರಾಯೆಲಿತ್ ಹೆರ್ ಲೊಕಾಪ್ರಾಸ್ ವೆಗ್ಳೆ ದಿಸ್ತಾಲೆ. ಪುಣ್ ಇಸ್ರಾಯೆಲಿತಾಂಚ್ಯಾ ಲಾಂಬ್ ಕಾಳಾಚ್ಯಾ ಚರಿತ್ರೆಂತ್ ಹೆರ್ ದೆವಾಂಥಂಯ್ ವೊಡ್ಣಿ ಹೆರ್ ಲೊಕಾ ಸಾಂಗಾತಾ ಭರ್ಸಾತಾನಾ ಚಡ್ತಾಲಿ, ಜಾಯ್ತೆ ಪಾವ್ಟಿಂ ಹೆರ್ ದೆವಾಂ ಪಾಟ್ಲ್ಯಾನ್ ಗೆಲ್ಲೆಂಚ್ ಇಸ್ರಾಯೆಲಿತಾಂಚ್ಯಾ ನಾಸಾಕ್ ಕಾರಣ್ ಜಾಲ್ಲೆಂ. ದೆಕ್ನ್ ಹೊ ಉಪಾದೆಸ್ ಭೋವ್ ಗರ್ಜೆಚೊ ಜಾತಾ.

ಪುಣ್ ಆಜ್ ಚಡಾವತ್ ಧರ್ಮ್ ಎಕಾ ದೆವಾಚೆರ್ ಪಾತ್ಯೆತಾತ್, ತರೀ ಆಮ್ಕಾಂ ಕಿತ್ಯಾ ಹೊ ಉಪಾದೆಸ್? 

ಸಕ್ಕಡ್ ಎಕಾ ದೆವಾಚೆರ್ ಪಾತ್ಯೆತಾತ್ ತರೀ ಸರ್ವ್ ಧರ್ಮಾಂನಿ ದೆವಾವಿಶಿಂ ಸಕ್ಡಾಂಚಿ ಸಮ್ಜಣಿ ಎಕಾಚ್ ಮಾಪಾನ್ ನಾ. ದಾಕ್ಲೊ: ಗುಡ್ಯಾಚ್ಯಾ ಮುಳಾ ಥಾವ್ನ್ ವಯ್ರ್ ಚಡುನ್ ವೆಚೆಂ. ಮುಳಾಂತ್ ಆಸ್ಲೆಲ್ಯಾಕ್ ಗುಡೊ ವಿಪ್ರೀತ್ ರೂಂದ್ ದಿಸ್ತಾ. ಚಡೊನ್ ವಯ್ರ್ ವಯ್ರ್ ಗೆಲ್ಲೊಚ್ ರುಂದಾಯ್ ಉಣಿ ಉಣಿ ಜಾವ್ನ್ ಗುಡೊ ಆಶೀರ್ ಜಾತಾ. ತಶೆಂಚ್, ಸಕ್ಕಡ್ ಧರ್ಮಾಂನಿ ದೆವಾಚ್ಯಾ ಉಗ್ಡಾಪಣ್ ಎಕಾಚ್ ಮಾಪಾನ್ ಜಾಲ್ಲೆಂ ದಿಸಾನಾ. ಕಿತ್ಲ್ಯಾ ಮಾಪಾನ್ ತಾಂಚಿಂ ಸೊಧ್ನಾಂ ತೀವ್ರ್ ಜಾಲ್ಯಾಂತ್, ಸತಾಚೊ ಅನ್ಭೋಗ್ ಜಾಲಾ, ತಿತ್ಲ್ಯಾ ಮಾಪಾನ್ ದೆವಾಚಿ ವ್ಹಳಕ್! ಉಗ್ಡಾಪಣ್ ಸಮ್ಜನಾಸ್ತಾಂ ವ ಚೂಕ್ ಸಮ್ಜುನ್ ಚುಕಿ ಕರುಂಕ್ ಸಕ್ತಾಂವ್. ಹಾಚ್ಯೆ ಭಾಯ್ರ್ ದುಡು, ಪದ್ವಿ, ನಾಂವ್, ವಸ್ತು ಜಿಣ್ಯೆಂತ್ ಪಯ್ಲೊ ಸ್ಥಾನ್ ಆಕ್ರವiಣ್ ಕರಿತ್ ದೆಕುನ್ ಹೊ ಉಪಾದೆಸ್ ಆಜ್ ಆಮ್ಕಾಂ ಗರ್ಜೆಚೊ.

ಎಕಾ ನಿಜಾ ದೆವಾ ವಿರೋಧ್ ಕಸ್ಲ್ಯೊ ಕರ್ನ್ಯೊ ಪಾತ್ಕಾಂ ಜಾತಾತ್?  

1) ದುಬಾವ್: ಅಪೊಸ್ತಲಾಂ ಮುಕಾಂತ್ರ್ ಆಮ್ಕಾಂ ಮೆಳ್‍ಲ್ಲೆ ಶಿಕವ್ಣೆಚಿ ಸ್ವಖುಶೆನ್ ಬೆಪರ್ವಾ ಕರ್ಚಿ, ವ ಹೆರಾಂನಿ ಪವಿತ್ರ್ ಸಭೆಚೆ ಶಿಕವ್ಣೆ ಭಾಯ್ಲೆಂ ಸಾಂಗ್ತಾನಾ, ಕಶ್ಟ್ ಯೆತಾನಾ, ಜಿವಾಚ್ಯಾ ಆಕ್ಲಾಸಾ ವೆಳಾರ್ ದುಬಾಂವ್ಚೆಂ. 2) ಪ. ಸಭೆಂತ್ ಸಾಕ್ರಾಮೆಂತ್ ಘೆವ್ನ್‍ಯಿ ಶಿಕ್‍ಲ್ಲಿಂ ‘ಧೃಡ್ ಸತಾಂ’ ಸಂಪೂರ್ಣ್ ನೆಗಾರ್ಚಿಂ ವ ದುಬಾಂವ್ಚಿಂ, 3) ಪರ್ಗಟ್ ರಿತಿನ್ ಭಾವಾಡ್ತ್ ಸಂಪೂರ್ಣ್ ನೆಗಾರ್ಚೊ. 4) ಪಾಪ್ ಸಾಯ್ಭಾಚೊ ಅಧಿಕಾರ್ ನೆಗಾರ್ಚೊ. 5) ನಿರಾಶಾ – ದೆವಾಚ್ಯಾ ಕಾಕುಳ್ತಿಚೆರ್ ಪಾತ್ಯೆನಾಸ್ತಾನಾ ಆಪುಣ್ ಯೆಮ್ಕೊಂಡಾಕ್ ವೆತಾಂ ಮ್ಹಣ್ ನಿರಾಶೆನ್ ಭರ್ಚೆಂ. 6) ಆಪ್ಣಾಕ್ ಕಾಕುಳ್ತಿಚಿ ಗರ್ಜ್ ನಾ ಮ್ಹಣ್ ಚಿಂತ್ಚೆಂ ವ ಜಿಣಿ ಬದ್ಲಾಪಾವಿಣೆಂ ಆಪ್ಣಾಕ್ ಕಾಕುಳ್ತ್ ಆಸಾ ಮ್ಹಣ್ ಗರ್ವಾನ್ ಭರ್ಚೆಂ. 7) ಬೆಪರ್ವಾ, ಅನುಪ್ಕಾರಿಪಣ್, ಕುರ್ಪೆಕ್ ಸ್ಪಂದನ್ ದೀನಾಸ್ತಾಂ ರಾಂವ್ಚೆಂ, ಆತ್ಮೀಕ್ ಆಳ್ಸಾಯ್, ದೇವ್ ಕ್ರೂರಿ ನಿತಿದಾರ್, ಶಿಕ್ಶಾ ಲಾಂವ್ಕ್‍ಚ್ ಆಸ್ಚೊ ಮ್ಹಣ್ ಚಿಂತುನ್ ತಾಚೊ ದ್ವೇಶ್ ಕರ್ಚೊ.

ಅನ್ಯ್ ದೆವಾಂಕ್ ಪುಜಾ ಕರ್ಚ್ಯಾ ಧರ್ಮಾವಿಶಿಂ ಕಿತೆಂ?

ಜೆಂ ಕಿತೆಂ ಸತ್ ಆನಿ ಬರೆಂ ಆಸಾ ತೆಂ ಸೊಧ್ಚಿ ವೋಡ್ ಹರ್ಯೆಕಾ ಮನ್ಶಾ ಭಿತರ್ ದೆವಾನ್ ಘಾಲ್ಯಾ. ಹರ್ಯೆಕ್ ಧರ್ಮ್ ವೆವೆಗ್ಳ್ಯಾ ನಾಂವಾನ್ ದೆವಾಕ್ ಪುಜಾ ಕರ್ತಾ ತರೀ ಸಕ್ಕಡ್ ಎಕಾಚ್ ದೆವಾಚಿ ಪುಜಾ ಕರ್ತಾತ್. ಕೊಣಾಕ್ ಕಿತ್ಲ್ಯಾ ಮಾಪಾನ್ ದೆವಾಚಿ ಖರಿ ವ್ಹಳಕ್ ಜಾಲ್ಯಾ ತಿತ್ಲ್ಯಾ ತೀವ್ರತೆನ್ ತೊ/ತಿ ದೆವಾಚಿ ಪುಜಾ ಕರ್ತಾ. ಸಭಾರ್ ಜಣ್ ಸಾರ್ಕಿ ಸಮ್ಜಣಿ ಮೆಳಾನಾಸ್ತಾಂ, ಆಪಾಪ್ಲ್ಯಾ ಸಮ್ಜಣೆ ಪರ್ಮಾಣೆಂ ಧರ್ಮ್ ಪಾಳ್ತಾತ್. ತರ್ ತಾಂಚಿ ಝಡ್ತಿ ತಾಂಕಾಂ ಕಿತ್ಲ್ಯಾ ಮಾಪಾನ್ ಜಾಣ್ವಾಯ್ ಮೆಳ್ಳ್ಯಾ ತ್ಯಾಚ್ ಮಾಪಾನ್ ಜಾತೆಲಿ. ಪವಿತ್ರ್ ಸಭಾ ಹೆರ್ ಧರ್ಮಾಂನಿಯ್ ಸತಾಚಿಂ ಕಿರ್ಣಾಂ ಆಸಾತ್ ಮ್ಹಣ್ ಶಿಕಯ್ತಾ ಆನಿ ಹೆರ್ ಧರ್ಮಾಂಕೀ ಗೌರವಾನ್ ಲೆಕುಂಕ್ ಉಲೊ ದಿತಾ, ಕಿತ್ಯಾಕ್ ತೀಂಯ್ ಸತಾಚೆ ಸೊಧ್ನೆರ್ ಆಸಾತ್. ಪುಣ್ ಜರ್ ಎಕಾ ಕ್ರೀಸ್ತಾಂವಾಕ್ ಕ್ರಿಸ್ತಾ ಮುಕಾಂತ್ರ್ ಊಂಚ್ಲೆಂ ಉಗ್ಡಾಪಣ್ ಲಾಭೊನ್‍ಯಿ ಸೊಧ್ನೆಚಾ ವಾಟೇರ್ ಆಸ್‍ಲ್ಲ್ಯಾಂ ಸಾಂಗಾತಾ ವೆತಾ ತರ್ ಹಿ ತಾಚಿ ದುರ್ದಶಾ! 

ಆಜ್ ಅನ್ಯ್ ದೆವಾಂಚಿ ಪುಜಾ ಕಶೆಂ ಚಲ್ತಾ? 

ಪಯ್ಲ್ಯಾನ್, ಎಕಾ ನಿಜಾ ದೆವಾ ಶಿವಾಯ್ ಹೆರ್ ಖಂಚ್ಯಾಯ್ ಸಂಗ್ತಿಂಕ್ ಪಯ್ಲೆಂ ಆನಿ ಉಂಚ್ಲೆಂ ಸ್ಥಾನ್ ದಿತಾನಾ ಅನ್ಯ್ ದೆವಾಚಿ ಪುಜಾ ಜಾತಾ. ಹ್ಯಾ ಭಾಯ್ರ್ ವೆವಸ್ತಿತ್ ರಿತಿನ್ ಅನ್ಯ್ ದೆವಾ ಪಾಟ್ಲ್ಯಾ ವೆಚೆಂ ಮ್ಹಳ್ಯಾರ್, ಮೂಢ್ ಪಾತ್ಯೆಣಿ, ಇಮಾಜೆಚೆಂ ಆರಾಧಾನ್, ಜ್ಯೋತಿಶ್ಯಾ ಆಯ್ಕುಂಚೆಂ, ಮಾಟ್ ಮಂತ್ರಾಂ, ಭುತಾಂಚೆಂ ಆರಾಧಾನ್, ಜಾಗ್ಯಾಂತ್ ವಾಯ್ಟ್ ಸಕ್ತೆಚಿ ಪುಜಾ, ದೆವಾಚಿ ಪರೀಕ್ಶಾ ಕರ್ಚಿ, ಜಾಕಾ ಸಮಡ್ತಿಂತ್ ಪವಿತ್ರ್ ಸ್ಥಾನ್ ಆಸಾ ತೆಂ ಮಸ್ತುಂಚೆಂ (ಪವಿತ್ರ್ ಕುಮ್ಗಾರಾಕ್ ಅಕ್ಮಾನ್, ಕೋಂತ್ ಬೆಂತಿಣ್ ಹೆರ್ ಸದಾಂಚ್ಯಾ ವಸ್ತು ಪರಿಂ ವಾಪಾರ್ಚೆಂ..), ಸಾಕ್ರಾಮೆಂತ್ ವಿಕ್ಚೆ, ದೆವಾಚ್ಯಾ ಅಸ್ತಿತ್ವಾಚೆರ್‍ಚ್ ನಾಪಾತ್ಯೆಣಿ, ಬೌತಿಕ್ ವಸ್ತುಂಕ್ ಲಬ್ದಣಿ.

ಕ್ರಿಸ್ತಾಂವಾಂನಿ ಇಮಾಜಿಕ್ ಮಾನ್ ದಿಂವ್ಚೊ ಬೊಂಬ್ಯಾಪುಜಾ ಜಾತಾಗಿ?  

ಮಾನ್ ದಿಂವ್ಚೊ ಆನಿ ಪುಜಾ (ಆರಾಧಾನ್) ಕರ್ಚಿ ಹಾಂಚೆ ಮಧ್ಲೊ ಫರಕ್ ಕಳಿತ್ ಆಸಾಜೆ. ಇಮಾಜ್ ಏಕ್ ಸಂಕೇತ್, ಜೊ ದೊಳ್ಯಾಂಕ್ ದಿಸಾನಾತ್ಲ್ಯಾ ಸಕ್ತೆಕ್ ಉಡಾಸ್ ಹಾಡಯ್ತಾ. ಇಮಾಜಿಕ್ ಮಾನ್ ದಿಲ್ಲ್ಯಾನ್, ಉಮೊ ಘೆತ್‍ಲ್ಲ್ಯಾನ್ ಪಯ್ಲೊ ಉಪಾದೆಸ್ ಮೊಡ್‍ಲ್ಲೆ ಪರಿಂ ಜಾಯ್ನಾ. ಪುಣ್ ಆರಾಧಾನ್ ಕರಿನಾಯೆ. ಏಕ್ ಇಮಾಜ್ ದೇವ್ ಜಾಂವ್ಕ್ ಸಾಧ್ಯ್ ನಾ. ಸಾಂತಾಚಿ ವ ಮರಿಯೆಚಿ ಇಮಾಜ್ ಆಮ್ಕಾಂ ತಾಂಚೆಂ ಜಿವಿತ್ ಉಡಾಸಾಕ್ ಹಾಡಯ್ತಾ ಆನಿ ಏಕ್ ಪ್ರೇರಣ್ ಕಶೆಂ ಮುಕಾರ್ ರಾವ್ತಾ. ಜರ್ ಕೊಣಾಯ್ಕಿ ಇಮಾಜಿಕ್ (ಮರಿ, ಸಾಂತ್) ಫುಲಾಂ, ಧುಂಪ್, ಉಮೊ, ಪುರ್ಶಾಂವ್ ಆಪ್ಲ್ಯಾ ಪಾತ್ಯೆಣೆಕ್ ಮಾರೆಕಾರ್ ಜಾತಾ ಮ್ಹಣ್ ಭೊಗ್ತಾ ತರ್ ತಾಣೆಂ ತೆಂ ಆಧಾರಿನಾಸ್ತಾಂ ರಾವ್ಯೆತ್.

ದೊಳ್ಯಾಂತ್ ಲಿಪ್‍ಲ್ಲೊ ಸಂಸಾರ್

ದೊಳೆ ಲ್ಹಾನ್ ಲ್ಹಾನ್; ತಾಂಚೆ ಭಿತರ್ ಲಿಪ್‍ಲ್ಲೊ ಸಂಸಾರ್ ಅಗಾಧ್! 
ಎದ್ದೆಶಾ ದೊಳ್ಯಾಂನಿ ವಿಶಾಲ್ ಬೊಂವೊರ್ ಕಿಣಾನ್ ಜಪ್ತಿ ಜಾತಾ.
ಲಿಪಿ ನಾ, ಬೊಲಿನಾ, ವ್ಯಾಕರಣಾಚೆಂ ವೊದ್ದು ವೊರಾಂಟ್ ನಾ; ದೊಳ್ಯಾಂಚಿ ಭಾಸ್ ವಿಶೇಸ್, ಮುಕ್ತ್ ಆನಿ ಪ್ರಭಾವಿಕ್.

ದೊಳೆ ಉಭಾರ್ ದೀನ್ಪಣಿಂ, ತೆಂ ಜಾಲೆಂ ಮಾಗ್ಣೆಂ
ದೊಳೆ ಪುಲಯ್, ಥಂಯ್ ಉಲ್ಲಾಸಾಚಿ ಭಿಂಗಾರಿ
ದೊಳೆ ಗೋಲ್ ಕರ್, ತುಕಾ ಕೊಣ್‍ಗಿ ಸತಯ್ತಾ
ದೊಳೆ ಅರ್ದೆಕುರೆ ಉಗ್ತೆ,  ಕೋಣ್ ತರೀ ಯೆಂವ್ಚಿ ನಿರೀಕ್ಶಾ
ದೊಳೆ ಹಿಂವ್ಳಾಯ್, ಭಿರ್ಮತ್ ಉಪ್ಯೆತಾ
ದೊಳೆ ಚುಕಯ್, ಚೊಟ್ಟ್ಯಾ ಮಾಜ್ರಾಚಿ ಸಾವ್ಳಿ
ದೊಳೆ ಭಿಜಯ್, ಖಂಯ್ಸರ್‍ಗಿ ಜಿವಿತಾಚೊ ಅಪಸ್ವರ್
ದೊಳೆ ಸಕ್ಲಾ ಗಳಯ್, ಆಟ್ರಾಂಚ್ಯಾ ಚೆಡ್ವಾಚಿ ಲಜ್
ದೊಳೆ ದಾಂಪ್, ತುಕಾ ಕೊಣಾಯ್ಚೆಂ ಪಡುನ್ ವ್ಹಚುಂಕ್ ನಾ

ಹಾ! ಹ್ಯಾ ದೊಳ್ಯಾಂನಿ ಕಿತೆಂ ನಾ, ಕಿತೆಂ ಆಸಾ! ಆಶಾ, ನಶಾ, ಪಾಸ್, ಉಪಾಸ್, ಧಯ್ರ್, ಸಯ್ರ್‍ಬಯ್ರ್, ವ್ಯಾಮೋಹ್, ದಾಹ್.. ಆನಿ ಕಿತೆಂ ಆನಿ ಕಿತೆಂ! ದಾದ್ಲ್ಯಾಕ್ ಜಿಬೆಚೆಂ ಆನಿ ರಟ್ಟ್ಯಾಚೆಂ ಬಳ್ ಕಂಯ್ ಆನಿ ಸ್ತ್ರೀಯೆಕ್ ದೊಳ್ಯಾಂಚೆಂ ಬಳ್! ದೊಳ್ಯಾಂಚ್ಯಾ ಆವ್ರಾ ಮುಕಾರ್ ಖಂಚಿ ಜೀಬ್ ಆನಿ ರಟ್ಟೆಂ ಫುಲತ್!?

ದೊಳೆ ಚಂಚಲ್ ಮ್ಹಳಾಂ ಜಾಯ್ತ್ಯಾಂನಿ. ದೊಳೆ ಚಂಚಲ್ ಮ್ಹಣ್ತೆಲ್ಯಾಂನಿ ಸಾಂಗ್‍ಲ್ಲೆಂ ದೊಳ್ಯಾಂನಿ ಲಿಪ್‍ಲ್ಲ್ಯಾ ಸುಪ್ತ್ ಸಂಸಾರಾಚಿ ಗಜಾಲ್. ಸುಪ್ತ್ ಮನಾಚೆ ಆರ್ಸೆಚ್ ದೊಳೆ. ಪ್ರಾಯೆಕ್ ಪಾವ್‍ಲ್ಲ್ಯಾ ಪೆÇೀರಿಪರಿಂ ದೊಳೆ ಕ್ಯೂರಿಯಸ್, ಅತ್ರೆಗಿ, ಅಸ್ಕತ್... ವ್ಹಯ್ ಆಸ್ಕತ್!

ಪಾರ್ಕಾಂತ್ ಎಕ್ಲಿ ಚಲಿ... ತಿಚೆಂ ಭುರ್ಗೆಂ ಖೆಳುನ್ ಆಸಾ. ತೊ ಎಕೆ ಸುವಾತೆರ್ ಬಸ್ಲ್ಯಾ. ಪ್ರಾಯ್ ವ್ಹಡ್ಲಿ ನ್ಹಯ್, ತೆಂ ತಿಚೆಂ ಫುಡ್ಲದ್ ಭುರ್ಗೆಂಚ್!

ದೊನೀ ಹಾತ್ ಧರ್ಣಿಕ್ ದೀವ್ನ್ ಪಾಂಯ್ ಸೊಡ್ನ್ ಬಸ್ಲ್ಯಾ ತಿ.

ಭುರ್ಗೆಂ ತಾಚೆಇತ್ಲ್ಯಾಕ್ ಖೆಳ್ತಾ. ಸೊಭಿತ್ ಪಾರ್ಕ್, ಥರಾವಳ್ ಮನ್ಶಾಂ ಆಶಾರ್ ಪಾಶಾರ್ ಜಾತಾತ್. 

ಚಲಿಯೆಚೆ ದೊಳೆ ಭುರ್ಗ್ಯಾಚೆರ್ ನಾಂತ್! 

ಥಂಯ್ ಥಾವ್ನ್ ರಸ್ತೊ ದಿಸ್ತಾ. ಥಂಯ್ ಏಕ್ ಪಾನಿಪುರಿ ಆಂಗಡ್. ತಾಚೆ ಮುಕಾರ್ ಪಾನಿಪುರಿ ಮಜೆನ್ ಸೆಂವ್ಚೆಂ ತರ್ನೆಂ ಜೊಡೆಂ. 
ಹ್ಯಾ ಪಾರ್ಕಾಂತ್ ಬಸ್‍ಲ್ಲ್ಯಾ ಚಲಿಯೆನ್ ದೊಳೆ ತ್ಯಾ ಜೊಡ್ಯಾಚೆರ್ ಖಿಳಾಯ್ಲ್ಯಾತ್, ತಾಂಕಾಂಚ್ ಚೊಯ್ತಾತ್!

ತ್ಯಾ ದೊಳ್ಯಾಂನಿ ತಾತ್ಸಾರ್ ಆಸಾ, ಮೊಸೊರ್ ಆಸಾ. 

ಭುರ್ಗೆಂ ಖೆಳತ್ ಪಯ್ಸ್ ಪಾವ್ತಾ.. ದೊಳ್ಯಾಂ ಭಾಯ್ರ್.

ಪಾರ್ಕಾಂತ್ ಬಸ್‍ಲ್ಲೆ ಚಲಿಯೆಚೆ ದೊಳೆ ಅತೃಪ್ತ್, ಕಿತೆಂಗೀ ಚುಕ್‍ಲ್ಲೆಪರಿಂ!

ಫುಲಾ ತೊಟಾಚೊ ಭೊಂವೊರ್ ಕಿತ್ಲೊ ಆಸ್ಲ್ಯಾರೀ ಚುಕಾಮುಕಿಂ ತವಳ್ ತವಳ್ ಭಾಯ್ರ್ ತಿಳ್ಚ್ಯಾ ದೊಳ್ಯಾಂಚೊ ಅಜೆಂಡಾ ಕಿತೆಂ? ಆಸ್‍ಲ್ಲೆಂ ಸೊಡುನ್ ನಾತ್‍ಲ್ಲ್ಯಾಕ್ ಮುರ್ಗೊಟ್ಚೆಂ ಮನ್ ನ್ಹಯ್‍ಗಿ ಹೆಂ! 

ಇತ್ಲ್ಯಾಕ್‍ಚ್ ‘ದೊಳೆ ಚಂಚಲ್ ಹಾಬಾ!’ ಮ್ಹಣ್ ಫಯ್ಸಲ್ ದಿಲ್ಯಾರ್ ಹೆರೊದಿನ್ ಹಾತ್ ಧುಲ್ಲೆಪರಿಂ ಜಾಯ್ತ್. ಆಪ್ಣಾ ಭೊಂವಾರಿಂ ಸೊಭಾಯೆಚೆಂ ವೋಡ್ತ್ ಆಸ್ಲ್ಯಾರೀ, ತಿ ಸೊಭಾಯ್ ಚಾಕ್ಚಿ ಸೊಡ್ನ್ ತುಜೆ ದೊಳೆ ನಿರಂತರ್ ಭಾಯ್ರ್ ತಿಳ್ತಾತ್ ತರ್ ತುಂ ಎಕ್‍ಚ್ ಚುಕುನ್ ಥಂಯ್ ಪಾವ್ಲಾಯ್ ವ ಕೊಣೆಂಗೀ ಬಲಾತ್ಕಾರಾನ್ ಥಂಯ್ ದಾಡ್ಲಾಂ.

ಹೆಂ ನ್ಹಯ್ ತರ್ ತುಂ ಕಠೀಣ್ ಅತೃಪ್ತೆಚೊ ಮನಿಸ್. ಆಪ್ಣಾಲಾಗಿಂ ಕಿತ್ಲೆಂ ಆಸ್ಲ್ಯಾರೀ ತಾಂತುಂ ಉಣೆಪಣ್‍ಚ್ ದಿಸ್ಚೆಂ ಆನಿ ಹೆರಾಂಥಂಯ್ ಆಸಾ ತೆಂ ವಿಶೇಸ್ ಮ್ಹಣ್ ದಿಸ್ಚೆಂ- ಹಿ ಅತೃಪ್ತೆಚಿ ಪಿಡಾ. ಹೊ ವೊಸೊ ಏಕ್ ಪಾವ್ಟಿಂ ಲಾಗ್ಲ್ಯಾರ್ ಸುಟೊಂಕ್ ಕಷ್ಟ್. 

ಕೊಣ್‍ಗಿ ಎಕ್ಲೊ ದಾಕ್ತೆರ್ ಮ್ಹಣ್ತಾಲೊ, “ಮ್ಹಜೆಲಾಗಿಂ ಯೆತಾತ್ ತೆ ಮ್ಹಜೆ... ಯೇನಾಂತ್ ತೆ ಮ್ಹಜೆ ನ್ಹಯ್”

ಹೆಂಚ್ ಉತರ್ ಆಶೆಂ ಸಾಂಗ್ಯೆತ್‍ಗಿ? “ಮ್ಹಜೆಲಾಗಿಂ ಆಸಾ ತೆಂ ಮ್ಹಜೆಂ.. ನಾ ತೆಂ ಮ್ಹಜೆಂ ನ್ಹಯ್!” ದೆಕುನ್‍ಚ್ ನಾತ್‍ಲ್ಲ್ಯಾಕ್ ಲೆಂಬೆವ್ನ್ ಆಸ್‍ಲ್ಲೆಂಯ್ ಹೊಗ್ಡಾಂವ್ಚೆಂ ಆಮ್ಕಾಂ ಸೊಭಾನಾ. ತಿ ಏಕ್ ಭೃಮಿದ್ ಮಾತ್ರ್. ಪಯ್ಶಿಲೊ ದೊಂಗೊರ್ ದೊಳ್ಯಾಂಕ್ ಕಿತ್ಲೊ ಇಂಪ್ರೆಸ್ ಕರ್ತಾ ನ್ಹಯ್?

ಉಪಾಸ್ ಕಸೊ ಸಂಭ್ರಮ್ಚೊ?

ಶಿಂಜಿಚ್ಯಾ ಬುದ್ವಾರಾ ಮಾತ್ಯಾರ್ ಆಮಿ ಗೊಬೊರ್ ಘಾಲ್ತಾನಾ, ಆಮಿ ಪಾತ್ಕಿ ಆನಿ ಧುಳಿಥಾವ್ನ್ ಆಯಿಲ್ಲಿಂ, ಆಮಿ ಧುಳಿಕ್‍ಚ್ ಪಾಟಿಂ ಪರ್ತತೆಲ್ಯಾಂವ್ ಮ್ಹಳ್ಳೆಂ ನಖ್ಖಿ ಜಾತಾ. ಆದ್ಲ್ಯಾ ಖರಾರಾಂತ್ ಆಮಿ ಪಳೆತಾಂವ್, ಆಪುಣ್ ಪಾತ್ಕಿ ಮ್ಹಣ್ ಸಮ್ಜಾಲ್ಲೆಂಚ್ ಪಾತ್ಕ್ಯಾನ್ ಕಾಡ್‍ಲ್ಲೆಂ ಪಯ್ಲೆಂ ಮೇಟ್‍ಚ್ ಉಪಾಸ್! ಹೊ ಪಶ್ಚಾತ್ತಾಪಾಚೊ, ಖೇದ್ ವೆಕ್ತ್ ಕರ್ಚೊ ಸಂಕೇತ್.

ಉಪಾಸ್-ತಪಸ್ ಹರ್‍ಎಕಾ ಧರ್ಮಾಂತ್ ವಿಶಿಶ್ಟ್ ಸ್ಥಾನ್ ಘೆತಾ. ಹರ್‍ಎಕಾ ಧರ್ಮಾಂತ್ ತಾಂಚ್ಯಾ ಪವಿತ್ರ್ ಗ್ರಂಥಾಂ ಪರ್ಮಾಣೆ ಉಪಾಸಾಕ್ ವಿಶೇಸ್ ಅರ್ತ್ ಆನಿ ಜೊಕ್ತೆಂ ಮೊಲ್ ಆಸಾ. ಆಮ್ಕಾಂ ಕ್ರಿಸ್ತಾಂವಾಂಕ್ ಚಾಳಿಸ್ ದಿಸಾಂಚೊ ಪ್ರಾಚಿತಾಚೊ ಕಾಳ್ ಮಾಗ್ಣೆಂ-ಉಪಾಸ್-ದಾನ್‍ಧರ್ಮ್ ಕರ್ಚ್ಯಾಂತ್ ಖರ್ಚುಂಕ್ ಉಲೊ ದಿತಾಸ್ತಾನಾ ಹಾಂಚೆರ್ ಗೂಂಡ್ ನಿಯಾಳ್ ಗರ್ಜೆಚೊ.

ಸ್ವ-ನೆಗಾರ್ಣೆ(self-denial) ದ್ವಾರಿಂ ಆಮಿ ಆಮ್ಚ್ಯಾ ಖೊಟೆಪಣಾಚೆಂ ದೂಖ್ ಧರುಂಕ್ ಸಕ್ತಾಂವ್. ಸ್ವÀ-ನೆಗಾರ್ಣಿ ತೀನ್ ವಾಟಾಂನಿ ಕರುಂಯೆತಾ ಮ್ಹಣ್ತಾ ಸಾಂ ಮಾತೆವ್.

ಆಮಿ ಮಾಗ್ತಾಂವ್: “…ಗುಪಿತ್ ಕುಡಾ ಭಿತರ್ ರೀಗ್, ದಾರ್ ಧಾಂಪ್, ಥಂಯ್ ಆಸಾ ತ್ಯಾ ತುಜ್ಯಾ ಬಾಪಾಲಾಗಿಂ ಮಾಗ್.''

ಆಮಿ ಉಪಾಸ್ ಕರ್ತಾಂವ್:

“ತುಮಿ ಉಪಾಸ್ ಕರ್ತಾನಾ ಬಾಪಾಕ್ ಶಿವಾಯ್ ಹೆರಾಂಕ್ ತೆಂ ಕಳಿತ್ ಜಾಯ್ನಾ ಜಾಂವ್.''

ದಾನ್‍ಧರ್ಮ್ ಕರ್ತಾಂವ್: “ತುಜೊ ಉಜ್ವೊ ಹಾತ್ ಕಿತೆಂ ಕರ್ತಾ ತೆಂ ತುಜ್ಯಾ ದಾವ್ಯಾ ಹಾತಾಕ್ ಕಳನಾ ಜಾಂವ್.''

ಹ್ಯಾ ತೀನ್ ಕರೆಜ್ಮಾಚ್ಯಾ ಆಚರಣಾಂ ಪಯ್ಕಿ ಖೂಬ್ ನಾಸಮ್ಜಣೆಕ್ ವಾ ಚೂಕ್ ಸಮ್ಜಣೆಕ್ ಒಳಗ್ ಜಾಲ್ಲೆಂ ವೃತ್ ಮ್ಹಳ್ಯಾರ್ ಉಪಾಸ್. ಆಜ್‍ಕಾಲ್ ಕರ್ಚ್ಯಾ ಉಪಾಸಾಂಕ್ ನಾನಾ ರಿತಿಂಚೆ ಅರ್ತ್ ಆಸಾತ್. ಆದಿಂ, ಧಾರ್ಮಿಕ್ ಉಪಾಸ್ ಪಳೆಂವ್ಕ್ ಮೆಳ್ತಾಲೊ ತರ್ ಆಜ್, ರಾಜಕೀಯ್ ಆನಿ ಸಮಾಜಿಕ್ ಉಪಾಸ್‍ಯಿ ಆಸಾ (ಉಪಾಸ್ ಧರ್ನ್ ಪ್ರತಿಭಟನ್ ಕರ್ಚೆಂ). ಭಲಾಯ್ಕಿ ಆನಿ ಸಿದ್ದಾಂತಾಂಚೊ ಉಪಾಸ್‍ಯಿ ಆಸಾ (ತರ್ಕಾರಿ ಜೆವಣ್ ಮಾತ್ರ್ ಸೆಂವ್ಚೆಂ). ಪಿಡೆನಿಮ್ತಿಂ ಉಪಾಸ್, ಸೊಬಾಯೆಖಾತಿರ್ ಉಪಾಸ್… ಹ್ಯಾ ಸಕ್ಡಾಂವರ್ನಿ ಥೊಡ್ಯಾಂನಿ ಅವಶ್ಯ್ ಜಾವ್ನ್ ಉಪಾಸ್ ಕರ್ಚೊ ಪಡ್ತಾ. ತೊ ಮ್ಹಳ್ಯಾರ್, ಸಂಸಾರಾಚ್ಯಾ ನಾಒಳ್ಕಿ ಗಾಂವಾಂನಿ ಕಿತ್ಲೊಸೊ ಲೋಕ್ ಪೊಟಾಕ್ ಖಾಣ್‍ನಾಸ್ತಾಂ ವಳ್ವಳೊನ್ ಮೊರ್ತಾ - ಹೊ ತಾಂಚೆರ್ ಥಾಪ್‍ಲ್ಲೊ ಉಪಾಸ್! ಅಸಲ್ಯಾ ಉಪಾಸಾಂಕ್ ಧಾರ್ಮಿಕ್ ವಾ ಸೊಬಾಯೆಶಾಸ್ತ್ರಾಚೊ ಇಂಬುನಾ.

ಪವಿತ್ರ್ ಪುಸ್ತಕಾಂತ್ಲೊ ಉಪಾಸ್:ಪವಿತ್ರ್ ಪುಸ್ತಕಾಚೆ ದಿಶ್ಟಿನ್ - ಉಪಾಸ್, ಖಾಣಾ-ಜೆವ್ಣಾಥಾವ್ನ್ ಪಯ್ಸ್ ರಾವಪ್, ಅತ್ಮಿಕ್ ಬರೆಪಣಾಖಾತಿರ್! ಉಪಾಸ್ ಆದಿಂಥಾವ್ನ್‍ಯಿ ದೆವಾಸವೆಂ ಸಂಬಂದ್ ಜೊಡುಂಕ್ ವಾ ತೊ ಥಿರ್ ಕರುಂಕ್ ಆಸ್ಚಿ ಮನ್ಶಾವಾಟ್ ಮ್ಹಳ್ಯಾರ್ ಚೂಕ್ ನ್ಹಯ್. ಹೆಂ ಆಮ್ಕಾಂ ದಾವಿದ್ ಆಪ್ಲ್ಯಾ ಕೀರ್ತನ್ 42-ಂತ್ ಸ್ಪಶ್ಟ್ ಸಾಂಗ್ತಾ. ದೆವಾಥಂಯ್ ಗುಂಡಾಯೆಚೊ, ಅತ್ಮಿಕ್ ಸಳಾವಳಿಚೊ ಸಂಬಂದ್ ಜೊಡುಂಕ್ ಉಪಾಸ್ ಏಕ್ ಬಳಿಶ್ಟ್ ಹಾತೆರ್.

ಪೊಟಾಚಿ ಭುಕ್ ಬೊವ್ ಮಾರೆಕಾರ್ ಮ್ಹಣ್ತಾತ್. ಪೊಟಾಖಾತಿರ್‍ಚ್ ವೆವೆಗ್ಳೆ ವೇಸ್, ಖುನಿ, ಚೊರ್ಪಣ್, ದಂದೊ ಚಲ್ತಾ. ತಿಚ್ ಭುಕ್ ಮುಟಿ ಭಿತರ್ ಆಯ್ಲಿ ತರ್ ಅತ್ಮೊ ಬಳ್ ಜಾತಾ. ಜೆದ್ನಾ ಅತ್ಮೊ ಬಳ್ ಜಾತಾ ತೊ ಪರಮ್ ಅತ್ಮ್ಯಾಕ್ ಸೊದುಂಕ್ ಲಾಗ್ತಾ. ಹಿ ಎಕಾ ಥರಾಚಿ ಭುಕ್‍ಚ್, ಪುಣ್ ಅತ್ಮಿಕ್! ದಾವಿದ್ ರಾಯ್ ಉಪಾಸ್ ಕರ್ತಾಲೊ. ತಾಚಿ ದೆವಾ ವಯ್ಲಿ ಭುಕ್ ಆನಿ ತಾನ್, ಬಾವ್ತಿಕ್ ಖಾಣಾಪ್ರಾಸ್ ವರ್ತಿ ಜಾವ್ನಾಸ್ಲಿ. ಪರಿಣಾಮ್, ಆಪ್ಲ್ಯಾ ಅತ್ಮ್ಯಾಚೆ ಗುಂಡಾಯೆಥಾವ್ನ್ ದೆವಾಚೆ ಗುಂಡಾಯೆಕ್ ಬೊಬ್ ಮಾರುಂಕ್ ತೊ ಸಕ್ಲೊ; ಆಪ್ಲ್ಯಾ ಕಶ್ಟಾಂಚ್ಯಾ ವೆಳಾರ್ ಸಯ್ತ್! ಉಪಾಸಾಂತ್ ಗುಪಿತ್ ತ್ರಾಣ್ ಆಸಾ.

ಪವಿತ್ರ್ ಪುಸ್ತಕ್ ವೆವೆಗ್ಳ್ಯಾ ಸಂದರ್ಬಾಂಚೊ, ವೆವೆಗ್ಳ್ಯಾ ಫಾಯ್ದ್ಯಾಂಚೊ ಉಪಾಸ್ ಆಮ್ಕಾಂ ದಾಕವ್ನ್ ದಿತಾ. ಜೊಶುವಾನ್ ಚಾಳಿಸ್ ದೀಸ್, ದಾನಿಯೆಲಾನ್ ಎಕ್ವೀಸ್ ದಿಸಾಂಚೊ ಉಪಾಸ್ ಕೆಲೊ. ಸಾಂ ಪಾವ್ಲ್ ದೋನ್ ಥರಾಂಚೊ ಉಪಾಸ್ ಕರ್ತಾಲೊ: ಏಕ್, ತೀನ್ ದಿಸಾಂಚೊ, ಆನ್‍ಏಕ್ ಚವ್ದಾ ದಿಸಾಂಚೊ! ಸಾಂ ಪೆದ್ರು ತೀನ್ ದೀಸ್ ತರ್ ಜೆಜು ಚಾಳಿಸ್ ದೀಸ್ ರೆಂವೆಭುಂಯ್ತ್ ಉಪಾಸ್ ಕರ್ತಾ. ಚಾಳಿಸ್ ದಿಸಾಂಚ್ಯಾ ಉಪಾಸಾ ಉಪ್ರಾಂತ್‍ಚ್ ಮೊಯ್ಜೆಕ್ ಯಾಹ್ವೆ ಧಾ ಉಪದೆಸ್ ದಿತಾ (ನಿರ್ಗಮನ್ 34:27-28). ಎಸ್ತೆರ್, ತೀನ್ ದಿಸಾಂಚ್ಯಾ ಉಪಾಸಾಖಾತಿರ್ ಆಪ್ಲ್ಯಾ ಶ್ಹೆರಾಚ್ಯಾ ಜುದೆವಾಂಕ್ ಎಕ್ಟಾಂಯ್ತಾ. ತಾಂಣಿ ತೀನ್ ದೀಸ್ ಉದಕ್ ವಾ ಕಸ್ಲೆಂಯ್ ಖಾಣ್ ಸೆಂವ್ಲೆಂ ನಾ. ಪರಿಣಾಮ್, ಹಾಮಾನಾಚ್ಯೊ ಶಿಂತ್ರ್ಯೊ ಉಜ್ವಾಡಾಕ್ ಆಯ್ಲ್ಯೊ ಆನಿ ಜುದೆವ್ ಬಚಾವ್ ಜಾಲೆ. ಹನ್ನಾ, ಭುರ್ಗ್ಯಾಚೆಂ ದೆಣೆಂ ಫಾವೊ ಜಾಂವ್ಚೆಖಾತಿರ್, `ದುಕಾಂ ಗಳಯ್ತಾ ಆನಿ ಕಿತೆಂಚ್ ಖಾಯ್ನಾ'. ಹ್ಯಾ ವರ್ವಿಂ ತಿಕಾ ಭುರ್ಗೊ ಸಾಮುಯೆಲ್ ಜಲ್ಮಾತಾ.

ತೀನ್ ನಮುನ್ಯಾಂಚೆ  ಉಪಾಸ್ ಆಮಿ ಪ. ಪುಸ್ತಕಾಂತ್ ಪಳೆತಾಂವ್.

1. ಪರಿಪೂರ್ಣ್ ಉಪಾಸ್ (Absolute Fast) 

2. ಸಾದಾರಣ್ ಉಪಾಸ್ (Normal Fast) 

3. ಅದುರೊ ಉಪಾಸ್ (Partial Fast).

ಪರಿಪೂರ್ಣ್ ಉಪಾಸ್ ಮ್ಹಣ್ಜೆ, ಕಾಂಯ್‍ಚ್ ಖಾಣ್-ಪೀವನ್ ಘೆನಾಸ್ತಾಂ ರಾಂವ್ಚೆಂ. ಭಲಾಯ್ಕೆರ್ ಹೊಂದ್ವೊನ್, ದಾಕ್ತೆರಾಚೆ ಪರ್ವಣ್ಗೆನ್ ಹೊ ಉಪಾಸ್ ಕರ್ಯೆತಾ. ಸಾದಾರಣ್ ಉಪಾಸ್ ಮ್ಹಳ್ಯಾರ್ ಥೊಡ್ಯಾ ದಿಸಾಂಖಾತಿರ್ ಕಸ್ಲೆಂಚ್ ಖಾಣ್ ಸೆವಿನಾಸ್ತಾಂ ರಾಂವ್ಚೆಂ. ಉದಕ್ ಕಿತ್ಲೆಂಯ್ ಪಿಯೆವ್ಯೆತ್; ಭಲಾಯ್ಕೆಕ್ ಬರೆಂ. ಕುಡಿಚೆಂ ತ್ರಾಣ್ ಸಾಂಬಾಳುಂಕ್ ಕಸ್ಲೆಂಯ್ ಪಾನಕ್ ಸೆವ್ಯೆತ್. ಅದುರ್ಯಾ ಉಪಾಸಾಂತ್ ಆಡ್ಕಳಿಂಕ್ ಆಸ್ಪದ್ ಆಸಾತ್. ಹಾಂತುಂ ಪ್ರತ್ಯೇಕ್ ಖಾಣ್ ವಾ ಪೀವನ್ ನಿಗದಿತ್ ವೆಳಾ-ಕಾಳಾಖಾತಿರ್ ಸೊಡ್ಯೆತಾ. ಅಸಲೊ ಉಪಾಸ್ ದಾನಿಯೆಲಾಚ್ಯಾ ಪುಸ್ತಕಾಂತ್ ವಾಚುಂಕ್ ಮೆಳ್ತಾ. ದಾನಿಯೆಲ್ ಆನಿ ತಾಚೆ ಸಾಂಗಾತಿ ರಾಯಾಚ್ಯಾ ಜೆವ್ಣಾ ಮೆಜಾಥಾವ್ನ್ ಮಾನ್ ಆನಿ ಹೆರ್ ಪಕ್ವಾನಾಂ ಖಾಂವ್ಕ್ ಆಯ್ಕಾನಾಂತ್, ಬದ್ಲಾಕ್ ತೆ ತರ್ಕಾರಿ ಆನಿ ಉದಕ್ ಮಾಗ್ತಾತ್. ಹೆಂ ಫಕತ್ ಧಾ ದಿಸಾಂಖಾತಿರ್. ಇರಾದೊ, ರಾಯಾಚ್ಯಾ ಚಾಕ್ರಾಂಪರಿಂಚ್ ತೆವೀ ಭಲಾಯ್ಕೆಭರಿತ್ ವಾಡ್ತೆಲೆ ಮ್ಹಣ್ ದಾಕಂವ್ಕ್. ಅದ್ಯಾಯ್ ಧಾ-ಂತ್ ಇಸ್ರಾಯೆಲಾಚಿ ಪರಿಗತ್ ಪಳೆವ್ನ್ ದಾನಿಯೆಲ್ ಆನ್‍ಏಕ್ ಅದುರೊ ಉಪಾಸ್ ಕರ್ತಾ. ದಾಕಾಂ ಸೊರೊ ಜಾಂವ್, ಮಾಸ್ ಆನಿ ಪಕ್ವಾನಾಂ ಜಾಂವ್ ತೊ ಆಪಡ್ನಾ ಆನಿ ಮಾಗ್ಣ್ಯಾಂತ್ ವೇಳ್ ಖರ್ಚಿತಾ ಆನಿ ಭಡ್ವೊ ತಾಚೆಂ ಮಾಗ್ಣೆಂ ಆಯ್ಕಾತಾ.

ಆಮ್ಚೊ ಉಪಾಸ್ ಕಸೊ?: 

ಆಡ್ವಾರ್‍ಲ್ಲ್ಯಾ ಫಳಾನ್ ಆದಾಂವ್-ಎವೆಕ್ ಪಾತ್ಕಾಕ್ ಲೊಟ್ಲೆಂ ಆನಿ ಹ್ಯಾ ವರ್ವಿಂ ಸಗ್ಳ್ಯಾ ಮನ್ಶಾಕುಳಾಚೆ ನಿರಂತರ್ ಪಡ್ಣೆಕ್ ಹೆಂಚ್ ಕಾರಣ್ ಜಾಲೆಂ. ಜೆಜು, ಹ್ಯಾ ಮನ್ಶಾಕುಳಾಕ್ ಪಾತ್ಕಾಚ್ಯಾ ಉಬ್ರಾಂತ್ಲೊ ವಯ್ರ್ ಕಾಡುಂಕ್ ಆಯ್ಲೊ ಆಸ್ತಾಂ, ಆಪ್ಲೆಂ ಸಂಸಾರಿ ಮಿಸಾಂವ್ ತಾಣೆ ಆದಾಂವ್-ಎವೆಚ್ಯಾ ಪಾತ್ಕಾಚ್ಯಾ ಹಾತೆರಾಥಾವ್ನ್‍ಚ್ ಸುರು ಕೆಲೆಂ ಮ್ಹಣ್ಜೆ, ಖಾಣಾಥಾವ್ನ್ ಪಯ್ಸ್ ರಾವಪ್ (ಉಪಾಸ್). ಕಾಂಟ್ಯಾಥಾವ್ನ್‍ಚ್ ಕಾಂಟೊ ಕಾಡ್ಚಿ ಯೆವ್ಜಣ್ ಜೆಜುಚಿ!

ಆಪ್ಲ್ಯಾ ಸಂಸಾರಿ ಮಿಸಾಂವಾಂತ್ ಜೆಜು ಆಮ್ಚೆಖಾತಿರ್ ಭುಕೆಲೊ ಆನಿ ಖುರ್ಸಾಚ್ಯಾ ಮೊರ್ನಾಚೆ ಆಕ್ರೆಚೆ ಘಡಿಯೆ ತೊ ತಾನೆಲೊ! ಜಶೆಂ ಆದಾಂವ್ಕ್ ಫಳಾಚೆರ್ ತಾಳ್ಣಿ ಆಯ್ಲಿ ತಶೆಂಚ್ ನವೊ ಆದಾಂವ್ - ಕ್ರಿಸ್ತಾಕ್‍ಯಿ ದೆಂವ್ಚಾರ್ ಫಾತ್ರಾಚೆ ಉಂಡೆ ಕರುಂಕ್ ಆನಿ ಆಪ್ಲಿ ಭುಕ್ ಭಾಗಂವ್ಕ್ ನಾಡ್ತಾ. ದೆವಾಚ್ಯಾ ಪುತಾಕ್ ಉಪಾಸಾ ಶಿವಾಯ್ ದುಸ್ರಿ ವಾಟ್ ನಾತ್‍ಲ್ಲಿ ಮ್ಹಣ್ತಾನಾ ಮ್ಹಾಕಾ ಆನಿ ತುಕಾ ಹಾಚಿ ಗರ್ಜ್ ಕಿತ್ಲಿ ಆಸ್ಚಿ ನಾ?

ಆಮಿ ಉಪಾಸ್ ಕರ್ತಾನಾ ಖಾಣಾ-ಜೆವ್ಣಾಥಾವ್ನ್ ಪಯ್ಸ್ ರಾವ್ತಾಂವ್ ವಾ ತೆಂ ಆಡಾಯ್ತಾಂವ್ ಫಕತ್ ಅತ್ಮಿಕ್ ಇರಾದ್ಯಾನ್. ಉಪಾಸ್ ಕಿತೆಂ ಸಗ್ಳೆಂ ಆಟಾಪುನ್ ಆಸಾ? ಕುಡಿಚಿ ದಂಡವ್ಣಿ, ದೆವಾಚ್ಯಾ ಉತ್ರಾಚೊ ನಿಯಾಳ್ ಆನಿ ಕಾರ್ಯಾಳ್ ಮೋಗ್. ಕುಡಿಚೆ ದಂಡವ್ಣೆಚೊ ಜಾಗೊ ಹೆರ್ ಖಂಚ್ಯಾನ್‍ಯಿ ಭರ್ತಿ ಕರುಂಕ್ ಜಾಯ್ನಾ.  ಅಶೆಂ ಕರ್ತಾನಾ ಆಮ್ಚ್ಯಾ ಸದಾಂಚ್ಯಾ ರಾಟಾವಳಿಂಚಿ ದಾವ್ ಆಪಾಪಿಂಚ್ ಉಣಿ ಜಾತೆಲಿ.

ಉಪಾಸಾವಿಶಿಂ ಸಬಾರ್ ಚೂಕ್ ಸಮ್ಜಣ್ಯೊ ಆಸಾತ್. ದೆವಾಕ್ ಮೆಚ್ವಂವ್ಕ್  ಆಮಿ ಉಪಾಸ್ ಕರಿನಾಂವ್. ಪಾತ್ಕಾಂಥಾವ್ನ್ ಸುಟ್ಕಾ ಜೊಡುಂಕಿ ಉಪಾಸ್ ಕರಿನಾಂವ್. ದೆವಾಕ್ ಯೋಗ್ಯ್ ಆಮಿ ಜಾತಾಂವ್ ಜಾಲ್ಯಾರ್ ವಾ ಆಮ್ಕಾಂ ಪಾತ್ಕಾಂತ್ಲಿ ಸೊಡ್ವಣ್ ಮೆಳ್ತಾ ಜಾಲ್ಯಾರ್ ತೆಂ ಕ್ರಿಸ್ತಾಚ್ಯಾ ರಗ್ತಾಥಾವ್ನ್ ಮಾತ್ರ್! ತರೀಪುಣ್, ಉಪಾಸ್, ತುಜ್ಯೊ ದ್ವಂದ್ವ್ ವಾಟೊ ಆನಿ ಪಾತ್ಕಾಂ ದಿಶ್ಟಿಕ್ ಆದ್ಳಾಶೆಂ ಕರ್ತಾ ಜಾಂವ್ಕ್ ಪುರೊ. ಉಪಾಸ್ ಕ್ರಿಸ್ತಾಂವಾಂಚೆಂ ಪೊತ್ ನ್ಹಯ್. ಮಾಗ್ಣೆಂ ಉಪಾಸಾ ಸಾಂಗಾತಾ ಘಾಲುಂಕ್ ಆಮಿ ಪಾಟಿಂ ಕೆಲೆಂ ತರ್ ಉಪಾಸ್ ಕರುಂಕ್ ಮೇಟ್ ಕಾಡ್ಚೆಂ ವೆರ್ತ್. ಹೆರ್ ಉಪಾವ್‍ನಾಸ್ತಾನಾ ಜೆವಿನಾಸ್ತಾಂ ರಾವ್ಲ್ಯಾರ್ ತೊ ಕರೆಜ್ಮಾಚೊ ಉಪಾಸ್ ಜಾಯ್ನಾ.

ಹೆರ್ ದೆಕ್ತಾತ್, ಕಮೆಂಟ್ ಕರ್ತಾತ್ ಮ್ಹಳ್ಳೆಖಾತಿರ್‍ಯಿ ಉಪಾಸ್ ಕರ್ಚೊ ನ್ಹಯ್. ಕರೆಜ್ಮಾಚೊ ಉಪಾಸ್, ತುಂ ಕಿತ್ಲೊ ಭಾಗೆವಂತ್, ಅತ್ಮಿಕ್ ಮನಿಸ್ ಮ್ಹಣ್ ಸಂಸಾರಾಕ್ ದಾಕಂವ್ಕ್ ಏಕ್ ವೆದಿ ನ್ಹಯ್, ಬಗಾರ್ ಏಕ್ ಅವ್ಕಾಸ್ - ಹೆರಾಂಚ್ಯಾ ಗರ್ಜಾಂಕ್ ಪಾವೊಂಕ್! ಜೆದ್ನಾ ತುಜ್ಯಾ ಪೊಟಾಂತ್ ಭುಕೆಚೆ ವಳ್ವಳೆ ವಾಡ್ತಾತ್ ತೆದ್ನಾ ಸಂಸಾರಾಚ್ಯಾ ಕೊನ್ಶ್ಯಾ-ಕೊನ್ಶ್ಯಾಂನಿ ದಿಸಾಚೆಂ ಏಕ್ ಜೆವಣ್‍ಯಿ ಮೆಳನಾಸ್ತಾಂ ವಳ್ವಳೊನ್ ಮೊರ್ಚ್ಯಾ ಹಾಡ್ಕುಟ್ಯಾ ಬಾಳಾಂಚಿ ಯಾದ್ ಯೇಂವ್ ಆನಿ ತುಂ ಕಾರ್ಯಾಕ್ ದೆಂವ್ಲ್ಯಾರ್ ತುಜ್ಯಾ ಉಪಾಸಾಕ್ ಮೊಲ್ ಆಸಾ.

ಉಪಾಸಾದ್ವಾರಿಂ ಸಗ್ಳೆಂ ಸಾದ್ಯ್!: ಉಪಾಸ್ ಆನಿ ಮಾಗ್ಣೆಂ ಸಾಂಗಾತಾ ಆಸ್ತಾನಾ ಸಂಯ್ಬಿಕ್ ಸಕತ್ ಜಾಂವ್, ಅಸಂಯ್ಬಿಕ್ ಸಕ್ತಿ ಜಾಂವ್ ಜಯ್ತ್ ಆಪ್ಣಾಂವ್ಕ್ ಸಕನಾಂತ್. ಹಾಕಾ ನಿದರ್ಶನಾಂ ಪ. ಪುಸ್ತಕಾಂತ್ ಖೂಬ್ ಮೆಳ್ತಾತ್. ಬರ್ಯಾ ಆನಿ ಖರ್ಯಾ ಇರಾದ್ಯಾನ್ ಕೆಲ್ಲೊ ಉಪಾಸ್ ಕೆದ್ನಾಚ್ ನಿರ್ಫಳ್ ಜಾಯ್ನಾ. ದೇವ್ ಉಗ್ತ್ಯಾನ್, ಪರ್ಗಟ್ ರಿತಿನ್ ದೊಡ್ತ್ಯಾನ್ ಬೆಸಾಂವಾಂ ಘಾಲ್ತಾ. ಜೊಬಾಚೆಂ ಜಿವಿತ್ ಪಳೆಯಾ. ಆಪ್ಣಾಚೆಂ ಮ್ಹಳ್ಳೆಂ ಕಾಂಯ್ಚ್ ನಾ ಜಾಲೆಂ, ತಾಚಿ ಆಸ್ತ್, ಭುರ್ಗಿಂ, ಸೆವಕ್, ಘರ್, ಬೊಕ್ರೆ-ಗಾಡ್ವಾಂ, ವಿಲಾಸಿ ಜಿಣಿ ಇತ್ಯಾದಿ… ತರೀ ತಾಣೆ ಮಾಗ್ಣೆಂ-ಉಪಾಸ್ ಕೆಲೊ ಆನಿ ದೆವಾಕ್ ಸದಾಂಚ್ ವಿಶ್ವಾಸಿ ರಾವ್ಲೊ. ಜೋಬ್ ಮ್ಹಣ್ತಾ, “ಮ್ಹಜ್ಯಾ ದಿಸ್ಪಡ್ತ್ಯಾ ಖಾಣಾ-ಜೆವ್ಣಾಪ್ರಾಸ್ ತಾಚ್ಯಾ ತೊಂಡಾಂತ್ಲ್ಯಾನ್ ಭಾಯ್ರ್ ಸರ್ಚ್ಯಾ ಉತ್ರಾಂಕ್ ಹಾಂವ್ ಅತ್ರೆಗ್ತಾಂ.'' ಆನಿ ದೇವ್, ತಾಣೆ ಹೊಗ್ಡಾಯಿಲ್ಲೆಂ ಭರ್ತಿ ಕರ್ತಾ. ಆದ್ಲ್ಯಾಪ್ರಾಸ್ ದೊಡ್ತ್ಯಾ ವಾಂಟ್ಯಾನ್ ತೊ ಗ್ರೇಸ್ತ್ ಜಾತಾ. ದೇವ್ ಪರ್ಗಟ್ ರಿತಿನ್ ಬೆಸಾಂವಾಂ ವೊತ್ತಾ.

ಕುಡಿಚ್ಯಾ ವೊಡ್ಣ್ಯಾಂಥಾವ್ನ್ ಸುಟ್ಕಾ ಸಾದ್ಯ್ ಆಸಾ ತರ್ ತಿ ಉಪಾಸಾವರ್ವಿಂ ಮಾತ್ರ್. ಕುಡಿಚ್ಯೊ ವೊಡ್ಣ್ಯೊ ಮ್ಹಣ್ಜೆ, ಲಂಯ್ಗಿಕ್ ಅತರ್ವಣಾಂ, ಕಾಮುಕ್ಪಣ್, ಪ್ರದ್ವಾರ್… ಅಸಲ್ಯಾ ಪಾಟ್ಲ್ಯಾನ್ ಏಕ್ ಖೊಟೊ ಸ್ಪಿರಿತ್ ಆಸಾ. ತೊ ಕಸಲ್ಯಾಯ್ ಒಕ್ತಾಂಕ್, ಕಾವ್ನ್‍ಸೆಲಿಂಗಾಕ್, ಆಂಗವ್ಣ್ಯಾಂಕ್ ಬಾಗ್ವಾನಾ. ಉಪಾಸಾಂತ್ ಮಾತ್ರ್ ತಾಚಿ ಸೊಡ್ವಣ್. ಹಾಕಾ ಜೊಕ್ತೆಂ ನಿದರ್ಶನ್ ನ್ಯಾಯ್‍ಕರ್ತಾಂಚ್ಯಾ ಪುಸ್ತಕಾಂತ್ ಅದ್ಯಾಯ್ 19-20-ಂತ್ ಸವಿಸ್ತಾರ್ ವಾಚುಂಕ್ ಮೆಳ್ತಾ.

ಗಿಬೆಹಾಂತ್ ವಸ್ತಿ ಕರ್ಚ್ಯಾ ಖೊಟ್ಯಾ ಆನಿ ಲಂಯ್ಗಿಕ್ ಅತರ್ವಣಾಂಚ್ಯಾ ಆಚರಣಾಂಕ್ ಉಗ್ತೊ ಪ್ರಚಾರ್ ದಿಂವ್ಚ್ಯಾ ಬೆಂಜಮಿನ್ ಕುಳಿಯೆಚ್ಯಾ ಲೊಕಾ ವಿರೋದ್ ಇಸ್ರಾಯೆಲಿತಾಂನಿ ಮಾಂಡ್‍ಲ್ಲ್ಯಾ ಝುಜಾಂತ್ ಪಯ್ಲ್ಯಾ ದಿಸಾಚ್ ಇಸ್ರಾಯೆಲಿತಾಂನಿ 22,000 ಸೊಜೆರ್ ಹೊಗ್ಡಾಯ್ಲೆ. ದುಸ್ರೆ ಪಾವ್ಟಿಂ, 18,000 ಇಸ್ರಾಯೆಲಿತ್ ಮರಣ್ ಪಾವ್ಲೆ. ಆನಿ ತಿಸ್ರೆ ಪಾವ್ಟಿಂ ಬೆಂಜಮಿನ್ ಕುಳಿಯೆ ವಯ್ರ್ ದಾಡ್ ಘಾಲುಂಕ್ ವೆಚೆ ಫುಡೆಂ ದೇವ್ ಪ್ರವಾದಿ ಫಿನೆಹಸಾಕ್ ಇಸ್ರಾಯೆಲಿತಾಂಕಡೆ ಧಾಡ್ತಾ ಆನಿ ಪಯ್ಲ್ಯಾನ್ ಪಯ್ಲೆಂ ಮಾಗ್ಣೆಂ ಆನಿ ಉಪಾಸ್ ಕರುಂಕ್ ಉಲೊ ದಿತಾ. ಚೊವಿಸ್ ವೊರಾಂಚ್ಯಾ ಉಪಾಸಾ ಉಪ್ರಾಂತ್ ಇಸ್ರಾಯೆಲಿತಾಂನಿ ದಾಡ್ ಘಾಲ್ಲ್ಯಾ ತವಳ್ ಕಸಲೆಚ್ ಆಡ್ಕಳಿವಿಣೆ ಬೆಂಜಮಿನ್ ಕುಳಿಯೆಚಿ ಖೊಟಿ ಸಕತ್ ಶರಣ್ ಜಾತಾ.

ಹೆಂ ಥೊಡ್ಯಾಂ ಥಂಯ್ ಮಾತ್ರ್ ಘಡ್ತಾ ವಾ ಆದಿಂ ಮಾತ್ರ್ ಘಡ್ತಾಲೆಂ ಮ್ಹಣ್ ನಾಕ್ ವೊಳ್ಚೆಂ ನ್ಹಯ್. ಉಪಾಸಾದ್ವಾರಿಂ ಅಸಾದ್ಯ್ ಕಾಂಯ್ ನಾ. (ಜೆರಾಲ್ ರಿತಿನ್, ಗಾಂಧಿಚೊ ಉಪಾಸ್‍ಚ್ ಉಡಾಸ್ ಕರಾ.) ಸಬಾರಾಂಕ್ ಆಪ್ಲೆ ಜಿಣಿಯೆಂತ್ ತಾಂಚ್ಯಾ ಉಪಾಸಾಚೊ ಪ್ರತಿಫಳ್ ಮೆಳ್ಳಾ. ಆಮ್ಚ್ಯಾ ಸಾಂತಾಂಚಿ ಜಿಣಿಯೆ ಕತಾ ವಾಚ್ತಾನಾ ಹೆಂ ಆಯ್ಕೊಂಕ್ ಮೆಳ್ತಾ. ತ್ಯಾ ದೆಕುನ್ ಆಮಿ ಫಕತ್ `ಆಯ್ತಾರಾಚೆ ಕ್ರಿಸ್ತಾಂವ್' ಜಾವ್ನ್ ಉರ್ಲ್ಯಾರ್ ಕಾಂಯ್ಚ್ ಘಡನಾ. ಸಾಕ್ರಿಫಿಸಾಚಿ ಜಿಣಿ ದೆವಾಕ್ ಮಾನ್ವತಾ, ಹೋಮ್‍ಬಲಿಯೊ ನ್ಹಯ್ ಬಗಾರ್, ಖಾಲ್ತಿಕಾಯೆನ್ ಆನಿ ಪಶ್ಚಾತ್ತಾಪಾನ್ ಭರ್‍ಲ್ಲೆಂ ಕಾಳಿಜ್ ತೊ ಆಶೆತಾ. ಉಪಾಸಾದ್ವಾರಿಂ ಆಮ್ಚಿ ಖಾಲ್ತಿಕಾಯ್ ವಾಡ್ತಾ ಆನಿ ಖಾಲ್ತಿಕಾಯೆನ್ ಕೆಲ್ಲೊ ಸಾಕ್ರಿಫಿಸ್ ನಿರ್ಫಳ್ ಜಾಯ್ನಾ, ಬಗಾರ್ ದೆವಾಚಿಂ ವಿಂಚ್ಣಾರ್ ಆಶಿರ್ವಾದಾಂ ಪರ್ಗಟ್ ಥರಾನ್ ವ್ಹಾಳಶೆಂ ಕರ್ತಾ.

ಸಂಪ್ಣಿ: ಚಾಳಿಸ್ ದಿಸಾಂಚೊ ಕುಡಿಚೆ ದಂಡವ್ಣೆಚೊ ಉಪಾಸ್, ಇಗರ್ಜ್‍ಮಾತಾ ಸಾಂಗ್ತಾ ದೆಕುನ್ ಮಾತ್ರ್ ಕರಿನಾಸ್ತಾಂ ಆಮ್ಕಾಂಚ್ ಏಕ್ ಇರಾದೊ ಮತಿಂ ಧರುನ್ ತೊ ಪಾಳ್ಯಾಂ. ಕುಡಿಚಿ ದಂಡವ್ಣಿ ಅತ್ಮ್ಯಾ ಆನಿ ದೆವಾ ಮದೆಂ ಏಕ್ ಆತ್ಮೀಯ್, ಸಳಾವಳಿಚೊ ಬಾಂದ್ ರಚುನ್ ಹಾಡ್ತಾ ಆನಿ ಉಪಾಸಾದ್ವಾರಿಂ ಅತ್ಮೊ ದೆವಾಚಿಂ ವಿಂಚ್ಣಾರ್ ಆಶಿರ್ವಾದಾಂ ಆಪ್ಣಾಯ್ತಾ. ಪ್ರಾಚಿತಾಚೊ ಕಾಳ್ ಥೊಡ್ಯಾ ಸಂಗ್ತಿಂಥಾವ್ನ್ ಉಪಾಸ್ ಕರುಂಕ್ ಆಪಯ್ತಾ ತರ್ ಆನಿ ಥೊಡ್ಯಾ ಸಂಗ್ತಿಂ ಥಂಯ್ ಸಂಬ್ರಮುಂಕ್ ಉಲೊ ದಿತಾ. ರಾಗ್, ಮೊಸೊರ್, ಹಗೆಂ, ಹಂಕಾರ್, ದುರ್ಸೊಣೆಂ, ಆಳ್ಸಾಯ್, ದುಬಾವಾಥಾವ್ನ್ ಉಪಾಸ್ ಕರ್ಯಾಂ ಆನಿ ಉಪ್ಕಾರ್ ಆಟವ್ಣಿ, ಭೊಗ್ಸಾಣೆಂ, ತೃಪ್ತಿ, ಸತ್ ಆನಿ ದೆವಾಚೆ ಕಾಕುಳ್ತಿಥಂಯ್ ಸಂಬ್ರಮುಯಾಂ. ಹೆ ಪರಿಂ ಪ್ರಾಚಿತಾಚೊ ಕಾಳ್ ಆಮ್ಕಾಂ ಉಪಾಸ್, ದಂಡವ್ಣೆಚೊ ತಶೆಂಚ್ ಸಂಬ್ರಮಾಚೊ ಜಾಂವ್ದಿ.