ಕಾಣಿಯೆಗಾರಾಲಾಗಿಂ ಮುಲಾಕಾತ್:
ಪ್ರಸ್ತಾವನ್:
ಮಂಗ್ಳುರಿ ಕೊಂಕ್ಣಿ ಸಾಹಿತ್ಯ್ ಶೆತಾಕ್ ಮೆಳಾಕಾಳಾಕ್ ಸರಿ ಜಾವ್ನ್ ವೆವೆಗ್ಳ್ಯಾ ಬರವ್ಪ್ಯಾಂನಿ ಆಪ್ಲೆ ಲಿಖ್ಣೆನ್ ಯೋಗ್ದಾನ್ ದಿಲಾಂ. ವೆಳಾಕಾಳಾಕ್ ಕೋಣ್ ನಾ ಕೋಣ್ ಬರವ್ಪಿ ಪ್ರಭಾವಿಕ್ ಜಾವ್ನ್ ಆನಿ ಥೊಡ್ಯಾ ತೆಂಪಾನ್ ತ್ಯಾಚ್ ವೆಳಾಚ್ಯಾ ಪಾಂಯ್ ವೊಡ್ಚ್ಯಾ ಖೆಳಾಕ್ ಸಾಂಪ್ಡುನ್ ತಾಂಚೆಂ ಪರಿಶ್ರಮ್ ನಾಂವ್ ನಾಸ್ತಾಂ ಗೆಲ್ಲೆಂ ಆಸಾ. ಆಯ್ಚ್ಯಾ ಬರವ್ಪ್ಯಾಂಕ್ ಕಾಲ್ಚ್ಯಾ ಜಾಯ್ತ್ಯಾ ಬರವ್ಪ್ಯಾಂಚಿ ಮುಲಾಕಾತ್ ಜಾಂವ್ಕ್ ನಾ. ಆದಿಂ ಕಿತೆಂ ಘಡುನ್ ಗೆಲಾಂ ಹಾಚಿ ಖಬರ್ ಆಯ್ಚ್ಯಾಂಕ್ ಮೆಳುಂಕ್ ನಾ ದೆಕುನ್ ಆಜ್ ಆಮಿ ಕೆಲ್ಲೆಂಚ್ ಪಯ್ಲೆಂ ಆನಿ ಊಂಚಿ ಮ್ಹಣ್ ಚಿಂತಾಪ್ ಯೆತಾ. ಹಾಂಗಾಸರ್ ಎಕಾ ಮಾಲ್ಗಡ್ಯಾ ಬರವ್ಪ್ಯಾಚಿ ಮುಲಾಕಾತ್ ಕರ್ಯಾಂ.
ಜಲ್ಮ್ – 17, ನವೆಂಬರ್ 1945
ಗಾಂವ್ – ಕುಡ್ಬೆಲ್, ಬಂಟ್ವಾಳ್ ತಾಲೂಕ್
ವ್ಹಡಿಲಾಂ – ದೆ. ಲಾರೆನ್ಸ್ ಮೊರಾಸ್ ಆನಿ ಮೇರಿ ಎಫ್ರೆಜಿಯಾ ಮೊರಾಸ್
ಸ್ಥಾನ್ – 9 ಜಣಾಂ ಭುರ್ಗ್ಯಾಂ ಪಯ್ಕಿ ಪಾಂಚ್ವೊ
ಲಗ್ನ್ – 09, ಮಾರ್ಚ್ 1975
ಪತಿಣ್ – ವಲೇರಿಯಾ ಸಾರಾ
ಭುರ್ಗಿಂ - ಪ್ರಮೀಳಾ ವೀಣಾ, ಪ್ರಿಯಾ ವಿಲ್ಮಾ, ಪ್ರೀತಿ ಡಾಯ್ನಾ
ಸಾಹಿತಿಕ್ ವಾವ್ರ್ – 12 ವರ್ಸಾಂಚೆ ಪ್ರಾಯೆರ್ ಕೊಂಕ್ಣಿ ಸಾಹಿತ್ಯಾಕ್ ವೇಂಗ್
- ರಾಯ್ಮಂದ್ ಮಿರಾಂದಾಚ್ಯಾ ಸಂಪಾದಕ್ಪಣಾಚ್ಯಾ ‘ಕಾಣಿಕ್’ ಪತ್ರಾಚೊ ಸಹ ಸಂಪಾದಕ್ ಆನಿ ಗಾಂವಾಂತ್ಲೊ ಪ್ರಮುಖ್ ವಿಕ್ರ್ಯಾ ಪ್ರತಿನಿಧಿ (ಸಕ್ಕಡ್ ಪತ್ರಾಂಕ್)
- ಝೆಲೊ, ಮಿತ್ರ್, ಕಾಣಿಕ್, ರಾಕ್ಣೊ, ದಿವೊ, ಮಾಂಯ್ ಗಾಂವ್, ಕುಟಾಮ್ ಪತ್ರಾಂನಿ ಲೇಕನಾಂ, ಕಾಣಿಯೊ, ವಿನೋದ್ ಆನಿ ರೂಪಾಂತರ್ ಸಾಹಿತ್ಯ್.
ಪುಸ್ತಕಾ ರುಪಾರ್ ಪ್ರಕಟಿತ್ 14 ಕೃತಿಯೊ – ತಿರಾಸ್ಕಾರ್, ಹಾಂವ್ ತುಕಾ ಭಾಗಿ ಕರ್ತಲೊಂ, ಮಸ್ತಿಲ್ಲೆಂ ಫುಲ್, ಒಲಿವಿಯಾ, ವಜ್ರಾಂಚೊ ಕುರೊವ್, ಹಾಂವ್ ನಿರ್ಭಾಗಿ, ತಿಣೆಂ ಆಶೆಲ್ಲಿ ಸುನ್, ತುಂ ಮ್ಹಜೆಂಚ್ ಬಾ, ಎಕ್ಸುರಿ ಫಾಂಟಿ, ಆವಯ್ಚೆಂ ಕಾಳಿಜ್, ವಾಗ್ ಮಾರ್ಲೊ, ತುಂವೆಂಚ್ ವಿಕ್ರೀತ್ ಕೆಲೆಂಯ್, ಲಿಪ್ಲಲೊ ಸಾಳಿಯೊ, ವಜ್ರಾಂ ಆನಿ ಮೊತಿಯಾಂ.
ಸ್ವಂತ್ ಪ್ರಕಾಶನ್ - ನಿತ್ಯಾಧಾರ್ ಪ್ರಕಾಶನ್
ಪ್ರಸ್ತುತ್ ವಸ್ತಿ - ಪ್ರೇಮ್ ನಗರ್, ಬಜ್ಜೋಡಿ
***********************************
“ಸ್ವಅನ್ಭವ್ ನಾಸ್ತಾಂ ಲಿಖ್ಲ್ಲೆಂ ಮತಿಚೆಂ ಸಾಹಿತ್ಯ್ ಜಾತಾ ಶಿವಾಯ್ ಕಾಳ್ಜಾಚೆಂ ಜಾಯ್ನಾ” - ಎಮ್. ಪೆಟ್ರಿಕ್
ಮಂಗ್ಳುರ್ಗಾರಾಂಕ್ ಚಡಾವತ್ ಜಾವ್ನ್ ತೀನ್ ಭಾಸಾಂಚೆರ್ ಪ್ರಭುತ್ವ್ ಆಸಾ. ತುಳು ಪರಿಸರಾಂತ್ ವಾಡ್ತಾಂವ್ ಅನಿ ಕನ್ನಡ ಭೊಂವಾರ್ ಆಮ್ಕಾಂ ವಾಗಯ್ತಾ. ತುಳು-ಕನ್ನಡ ಪರಿಸರಾಂತ್ ಆಸೊನೀ ಕೊಂಕ್ಣಿಂತ್ ಲಿಖ್ಣಿ ಧರುಂಕ್ ತುಮ್ಕಾಂ ಕಿತೆಂ ಪ್ರೇರಣ್?
ತುಮಿ ಸಾಂಗ್ಚೆಂ ಸಾರ್ಕೆಂ. ಆಜ್, ಆಮ್ಚಿ ಕೊಂಕ್ಣಿ ಇಗರ್ಜ್ ಆನಿ ಘರಾಂಕ್(!) ಸೀಮಿತ್ ಭಾಸ್. ಮ್ಹಜೊ ಆದ್ಲೊ ಭೊಂವಾರ್ಯಿ ಕನ್ನಡ್ ಪ್ರಭಾವಿತ್ ಆಸ್ಲೊ ಆನಿ ಹಾಂವೆಂ ವಾಚ್ಲ್ಲಿ ಪಯ್ಲಿ ಕಾದಂಬರಿಯ್ ತ್ರಿವೇಣಿಚಿ. ಇಸ್ಕೊಲಾಂತ್ ಸೆಲಿನ್ ಟೀಚರಿನ್ ಕಾಣಿ ವಿವರುಂಚಿ ರೀತಿಕ್ ರೋಮಾಂಚಿತ್ ಜಾಲ್ಲೊಂ ಆಸಾಂ. ಜೋಡಿ ನಕ್ಷತ್ರ ಮ್ಹಳ್ಳಿ ಕಾಣಿ ತಿಣೆಂ ವಿವರಿತಾನಾ ಹಾಂವ್ ಬರೊ ರಡ್ಲಾಂ! ಕನ್ನಡಾನ್ ಕಾಣಿಯಾಂ ತೆವ್ಶಿಂ ರೂಚ್ ದಿಲಿ ತರೀ ಕೊಂಕ್ಣಿ ಮ್ಹಜೊ ಪಯ್ಲೊ ಮೋಗ್. 14 ವರ್ಸಾಂಚೆ ಪ್ರಾಯೆರ್ ಜೊ.ಸಾ ಅಲ್ವಾರಿಸಾಚಿ ‘ಆಂಜೆಲ್’ ವಾಚ್ಲಿ. ತಿ ಮ್ಹಾಕಾ ದಿಲ್ಲಿ ಹೆಡ್ ಮಾಸ್ಟ್ರಾನ್! ತ್ಯಾ ವೆಳಾರ್ ಭುರ್ಗಿಂ ದೊತೊರ್ನಿಕ್ ಚೀತ್ ದೀನಾಂತ್ ಮ್ಹಳ್ಳ್ಯಾ ಕಾರಣಾಕ್ ಟಿಚರಾಂನಿ ಸೊಧ್ಲ್ಲೊ ಉಪಾಯ್ಚ್ ಕಾಣಿ ಸಾಂಗ್ಚಿ. ಕಾಣಿ ಮ್ಹಣ್ತಾನಾ ಭುರ್ಗಿಂ ಜೀವ್ ಸೊಡ್ನ್ ಆಯ್ಕಾತಾಲಿಂ. ತಶೆಂ ‘ಆಂಜೆಲ್’ ಮೆಳ್ಳಿ. ಆಶೆಂ ಕೆಲ್ಲ್ಯಾನ್ ಕೊಂಕ್ಣಿಕ್ ಮ್ಹಾನ್ ಬರವ್ಪಿ ಮೆಳ್ಳ್ಯಾತ್. ಮ್ಹಜೆ ಸಾಂಗಾತಿ (ಜೆಪ್ಪು ಸಾಂ. ಜುಜೆ ಸೆಮಿನರಿ ಇಸ್ಕೊಲಾಂತ್ ಶಿಕ್ಲ್ಲೆ) ಜೆಮಿ ಬರೊಕಾಸ್, ಪ್ರೇಮ್ ಕುಮಾರ್, ವಿಲ್ಫಿ ರೆಬಿಂಬಸ್, ಅಲ್ಫೋನ್ಸ್ ಡಿ’ ಡೆಸ್, ರೊನಾಲ್ಡ್ ಪಿಂಟೊ, ಚಾರ್ಲ್ಸ್ ಬೆನಿಟೊ (ವಿ. ಬಿ. ಚಾರ್ಲ್ಸ್, ಗೋರಿಗುಡ್ಡ).. ಸಗ್ಳೆ ಆಸಲ್ಯಾ ಕೊಂಕ್ಣಿ ಶಿಕ್ಪಾಚಿಂ ಫಳಾಂ.
ತುಮ್ಚೊ ಸುರ್ವಿಲೊ ಕೊಂಕ್ಣಿ ವಾವ್ರ್ ಕಸೊ ಆಸ್ಲೊ?
ಸಾಂಗ್ಲ್ಯಾರ್ ಆಜ್ ಕೊಣೀ ಪಾತ್ಯೆಂವ್ಚೆ ನಾಂತ್! ಆಮಿ ಚೊವ್ತ್ಯಾ ಕ್ಲಾಸಿಂತ್ ಆಸ್ತಾನಾ ಕೊಂಕ್ಣಿ ಪತ್ರ್ ಸುರು ಕೆಲ್ಲೆಂ! ಹಾತ್ ಬರ್ಪಾಚೆಂ ಪತ್ರ್ ತೆಂ. ‘ಕೊಂಕ್ಣಿ ನ್ಯೂಸ್’ – ತಾಚೆಂ ನಾಂವ್. ಪ್ರೇಮ್, ಅಲ್ಪೋನ್ಸ್, ಹಾಂವ್ ಆನಿ ಹೆರ್ ಮೆಳೊನ್ 12 ಪಾನಾಂಚೆಂ ಹೆಂ ಹಾತ್ ಬರ್ಪಾಚೆಂ ಪತ್ರ್ ತಯಾರ್ ಕರ್ನ್ ಹೆರಾಂಕ್ ವಾಚುಂಕ್ ಸರ್ಕ್ಯೂಲೆಟ್ ಕರ್ತಲ್ಯಾಂವ್. ಥೊಡೆ ಪಾವ್ಟಿಂ ಚಡಿತ್ ಕೊಪಿ (ಹಾತ್ ಬರ್ಪಾಚ್ಯೊಚ್) ಕರ್ತಲ್ಯಾಂವ್. ಹಾಂತುಂ ಪ್ರೇರಿತ್ ಜಾಲ್ಲ್ಯಾ ವಾಸು ವಾಲೆನ್ಸಿಯಾ-ನ್ ಅಸಲೆಂಚ್ ಸ್ವಂತ್ ಪ್ರೇತನ್ ಕೆಲ್ಲೆಂ ಉಡಾಸ್ ಆಸಾ ಮ್ಹಾಕಾ. ತರ್ನಾಟ್ಪಣಾರ್ ‘ಶಿಮ್ಟಿ ವಾಲೆನ್ಸಿಯಾ’ ಮ್ಹಣ್ ಬರವ್ಪ್ಯಾಂಚೊ ಆಮ್ಚೊ ಏಕ್ ಪಂಗಡ್ ಆಮಿ ರಚ್ ಲ್ಲೊ ಆನಿ ಸರಾಗ್ ಬರ್ಪಾಂ ಆಮ್ಚೆ ಥಾವ್ನ್ ವ್ಹಾಳ್ತಾಲಿಂ.
ತುಂವೆಂ ಕೊಂಕ್ಣಿ ಪುಸ್ತಕಾಂ, ಪತ್ರಾಂಚೊ ವಿಕ್ರೊ ಕರ್ಚೆ ದಿಶೆನ್ ಉರ್ಭೆನ್ ವಾವ್ರ್ ಕೆಲಾ ಮ್ಹಣ್ ಆಯ್ಕಾಲೆಂ, ಕಶೆ ಆಸ್ಲೆ ತೆ ದೀಸ್?
ವ್ಹಯ್, ಕೊಂಕ್ಣಿ ವಾಚಾಪ್ ಸಗ್ಳ್ಯಾ ಮಂಗ್ಳುರಾಕ್ ಪಾವಯ್ಜೆ ಮ್ಹಣ್ ಮ್ಹಾಕಾ ಭೊಗ್ಲ್ಲೆಂ ದೆಕುನ್ ಇಲ್ಲೆಂ ಪ್ರೇತನ್ ಕೆಲೆಂ ಹಾಂವೆಂ. ಕಿತ್ಯಾಕ್, ಮ್ಹಾಕಾ ಕೊಂಕ್ಣಿ ವಾಚಾಪ್ ಬರೆಂ ಲಾಗ್ತಾಲೆಂ. ತೆಂ ಹೆರಾಂಕಿ ಮೆಳಾಜೆ ಮ್ಹಳ್ಳಿ ಆಶಾ ಆಸ್ಲಿ. ತ್ಯಾ ಕಾಳಾರ್, ಏಕ್ ದೀಸ್ ಹಾಂವ್ ಎಕಾ ಆಂಗ್ಡಿ ಕಡೆನ್ ಪಾಶಾರ್ ಜಾತಾನಾ ‘ಕಾಣಿಕ್’ ಪ್ರತಿಯೊ ದಿಶ್ಟಿಕ್ ಪಡ್ಲೊ ್ಯ. ಫಕತ್ 5 ಪ್ರತಿಯೊ! ಮುಂಬಯ್ ಥಾವ್ನ್ ತ್ಯೊ ಯೆತಾಲ್ಯೊ. ಸಗ್ಳ್ಯಾ ಮಂಗ್ಳುರಾಕ್ ಫಕತ್ 5 ಪ್ರತಿಯೊ?! ಹಾಂವೆಂ ಮುಂಬಯ್ ಆಸ್ಲ್ಲ್ಯಾ ಆಂಡ್ರ್ಯು ಮೆಂಡೊನ್ಸಾಚಿ ಖಬರ್ ಕಾಡ್ಲಿ, ಪತ್ರ್ ಬರವ್ನ್ ಆಪುಣ್ ಹ್ಯಾ ಪತ್ರಾಚಿ ಏಜೆನ್ಸಿ ಘೆತಾಂ ಮ್ಹಣ್ ಕಳಯ್ಲೆಂ. ತಾಣೆಂ ಖುಶೆನ್ ಮ್ಹಾಕಾ ಪ್ರತಿಯೊ ಧಾಡ್ಲ್ಯೊ. ಆಶೆಂ ‘ಕಾಣಿಕ್’ ಪತ್ರ್ ಮಂಗ್ಳುರ್ಗಾರಾಂಕ್ ಮೊಗಾಚೆಂ ಜಾಲೆಂ. ಹೆರ್ ಪತ್ರಾಂ, ಪುಸ್ತಕಾಂ, ಕೊವ್ಳ್ಯೊಯ್ ಕೊಂಕ್ಣಿ ಘರಾ ಘರಾಂನಿ ಪಾವಂವ್ಚೆಂ ಖಾಲ್ತೆಂ ಪ್ರೇತನ್ ಹಾಂವೆಂ ಕೆಲಾಂ. ಹಾಂತುಂ ತೃಪ್ತಿ ಆಸಾ.
ತುಮಿ ಏಕ್ ಕಾಣಿಯಾಂಗಾರ್. ಕಾದಂಬರಿಥಂಯ್ ವಿಶೇಸ್ ವೋಡ್ ಆಸ್ಲೆಲೆ. ತುಮಿ ಬರಂವ್ಕ್ ದೆಂವ್ಚ್ಯಾ ಫುಡೆಂ ತುಮ್ಕಾಂಚ್ ತುಮಿ ತಯಾರ್ ಕೆಲ್ಲಿ ರೀತ್ ಕಶಿ?
ಚಡ್ ಆನಿ ಚಡ್ ವಾಚ್ಪಾಮುಕಾಂತ್ರ್ ಗಿನ್ಯಾನ್ ಜೊಡ್ಚಿ ಪ್ರಕ್ರಿಯಾ ಚಾಲು ದವರ್ಲಿ. ದುಸ್ರ್ಯಾನ್, ಕಾಣಿ ವ ಕಾದಂಬರಿ ಬರಂವ್ಕ್ ಕೋಚಿಂಗ್ ದಿಲ್ಲೆಂಚ್ ಸಿರಿವಂತಾನ್. ನಾಟಕ್ ಶೆತಾಂತೀ ಹಾತ್ ಘಾಲುಂಕ್ ಸಿರಿವಂತಾಚೆಂ ಪ್ರೇರಣ್, ಮಾರ್ಗದರ್ಶನ್, ತಿದ್ವಣ್ಚ್ ಕಾರಣ್. ತಾಚ್ಯಾ ‘ಫಾರಿಕ್ಪಣ್’ ಕಾಣಿಯೆಕ್ ಹಾಂವೆಂ ಆನಿ ಮೈಕಲ್ ಕದ್ರಿ ಮ್ಹಳ್ಳ್ಯಾನ್ ನಾಟಕಾಚೆಂ ರೂಪ್ ದಿಲ್ಲೆಂ. ತಾಚಿಂ 8 ಪ್ರದರ್ಶನಾಂ ಜಾಲ್ಲಿಂ. ತ್ಯಾ ವೆಳಾರ್ ಎಕಾಮೆಕಾ ಬರವ್ಪಿ ವಿಚಾರ್ನ್ ಶಿಕ್ತಾಲೆ. ಮಾಲ್ಗಡೆ ಬರವ್ಪಿ ಉದೆತ್ಯಾ ಬರವ್ಪ್ಯಾಂ ಸಾಂಗಾತಾ ವೇಳ್ ಖರ್ಚುಂಕ್ ತಯಾರ್ ಆಸ್ಲೆ ಸಯ್ತ್. ಇತ್ಲೆಂ ಮಾತ್ರ್ ಪಾವನಾ. ವೆವೆಗ್ಳ್ಯಾ ಜಾಗ್ಯಾಂಚಿ ಭೊಂವ್ಡಿ, ವೆವೆಗ್ಳ್ಯಾ ಸಂಸ್ಕೃತೆ ಸಾಂಗಾತಾ ಮಿಸ್ಳಾಪ್ ಮಸ್ತ್ ಗರ್ಜೆಚೆಂ. ಹರ್ಯೆಕ್ ಭೊಂವ್ಡೆನ್ ಬರವ್ಪ್ಯಾಚ್ಯಾ ಬರ್ಪಾಕ್ ಕಿತೆಂ ತರೀ ದೀಜೆ. ತೆಂ ತಾಣೆಂ ಜೊಡುನ್ ಘೆಜೆ. ಹಾಂವೆಂ ಕಾದಂಬರಿಂನಿ ತೊಟಾಚೆಂ ಚಿತ್ರಣ್ ದಿಲಾಂ ಜಾಲ್ಯಾರ್ ತೊಟಾಂತ್ ರಾವ್ಲಾಂ, ಕಾಮ್ ಕೆಲಾಂ. ಸ್ವಅನ್ಭವ್ ಜೊಡುನ್ ಲಿಖ್ಣೆಂತ್ ದಾಖಲ್ ಕೆಲಾಂ.
ಆಜ್ ಗೂಗಲ್ ಜಾಯ್ತಿ ಮಾಹೆತ್ ದಿತಾ, ಹೆರ್ ಮುಳಾಂ ಥಾವ್ನ್ ಬುತಾಂವ್ ದಾಂಬ್ಲ್ಯಾರ್ ಮಾಹೆತ್ ದಿಶ್ಟಿ ಫುಡೆಂ ಹಾಜಿರ್ ಜಾತಾ. ಆಶೆಂ ಆಸ್ಲ್ಯಾರಿ ಉದೆವ್ನ್ ಯೆಂವ್ಚ್ಯಾ ಬರವ್ಪ್ಯಾಂನಿ ಹೆಳ್ಲ್ಲ್ಯಾ ಬರವ್ಪ್ಯಾಂಚಿ ಸಲಹಾ ಘೆಂವ್ಚಿ ಗರ್ಜ್ಗಿ? ಹೆಳ್ಲ್ಲ್ಯಾಕಡೆ ಶಿಕ್ಚೆಂ ಕಿತೆಂ?
ಗೂಗಲ್ ಮಾಹೆತ್ ದಿತಾ ವ್ಹಯ್, ವಾಚಾಪ್ಯಿ ದರಬಸ್ತ್ ಮೆಳ್ತಾ ವ್ಹಯ್. ಆಜ್ ಹೆಳ್ಲ್ಲ್ಯಾಂಚೊ ಸಂಪರ್ಕ್ ಉದೆವ್ನ್ ಯೆಂವ್ಚ್ಯಾ ಬರವ್ಪ್ಯಾಂಕ್ ಕಿತ್ಯಾ ಗರ್ಜೆಚೊಗಿ ಮ್ಹಳ್ಯಾರ್, ಭಾಸ್ ಶಿಕ್ಚಿ ಗರ್ಜ್. ವ್ಯಾಕರಣ್ ಶಿಕ್ಚಿ ಗರ್ಜ್. ಸಬ್ದ್ ಮೆಳ್ನಾಂತ್ ಮ್ಹಣ್ ಇಂಗ್ಲೀಶ್ ಆನಿ ಸ್ಟೈಲೀಶ್ ಆಸುಂದಿ, ನವೆಸಾಂವ್ ಹಾಡ್ತಾಂ ಮ್ಹಣ್ ಹಿಂದಿ ಸಬ್ದ್ ವಾಪಾರ್ನ್ ಕೊಂಕ್ಣಿ ಭಾಸೆಚಿ ವೀದ್ವಾವ್ಳಿ ಕರ್ಚಿ ದಿಸ್ತಾ. ತಿದ್ವಿನಾಸ್ತಾಂ, ಗಣ್ಣೆಂ ಕರಿನಾಸ್ತಾಂ, ಫಿಕಿರ್ ಕರಿನಾಸ್ತಾಂ ಎಕಾ ಬರವ್ಪ್ಯಾನ್ ಬರಯಿಲ್ಲಿ ಭಾಸ್ ವಾಚ್ಪ್ಯಾಂಕ್ ಘುಸ್ಪಡಾಯ್ತಾ ಆನಿ ಭಾಸೆಚ್ಯಾ ಅಸ್ಮಿತಾಯೆಕ್ ಕರಿ ಪುಸ್ಚೆಂ ಕಾಮ್ ಬರವ್ಪಿಚ್ ಕರ್ತಾ. ದೆಕುನ್ ಉದೆತ್ಯಾ ಬರವ್ಪ್ಯಾಂನಿ ಪ್ರಾಕ್ಟಿಕಲ್ ಜಾಣ್ವಾಯ್, ಅನ್ಭವ್ ವಿಚಾರುನ್ ಶಿಕಾಜೆ.
ತುಮ್ಕಾಂ ಚಡ್ ಪಸಂದಾಯೆಚೊ ಪ್ರಕಾರ್ ಕಾಣಿ. ಪುಣ್ ತುಮ್ಚ್ಯಾ ಕಾಣಿಯಾಂಚೆರ್ ಆಸ್ಚೊ ಅಪ್ವಾದ್ ಮ್ಹಳ್ಯಾರ್, ತ್ಯೊ ಅಪ್ಡೇಟ್ ಜಾವ್ನಾಂತ್. ತಾಂತ್ಲೆಂ ವಿಶಯ್, ಪರಿಸರ್, ಸನ್ನಿವೇಶ್, ಪಾತ್ರ್ ಆನಿಕೀ ತುಮ್ಚ್ಯಾ ಕಾಳಾರ್ಚ್ ಉರ್ಲ್ಯಾತ್. ತುಮಿ ಗ್ರಾಸುಂಚ್ಯೊ ಸಂಗ್ತ್ಯೊ ಸೀಮಿತ್..... ಆಶೆಂ..
ಹೆಂ ಹಾಂವ್ ನೆಗಾರ್ನಾಂ. ವ್ಹಯ್, ಹಾಂವ್ ಪಾಂಚ್ವಿ ಮಾತ್ರ್ ಶಿಕ್ಲಾಂ. ಉಣ್ಯಾ ಶಿಕ್ಪಾನ್ ಮ್ಹಾಕಾ ಸಭಾರ್ ಪಾವ್ಟಿಂ ಅಸಹಾಯಕ್ ಕೆಲಾಂ. ಆಧುನಿಕ್ ಶಿಕ್ಪಾಚೊ ಆಧಾರ್ ಮೆಳುಂಕ್ ನಾ ಜಾಲ್ಲ್ಯಾನ್ ಆಯ್ಚ್ಯಾ ಸಾಹಿತಿಕ್ ಭೊಂವಾರಾಂತ್ ಹಾಂವ್ ಸಲ್ವಲಾಂ ಜಾಂವ್ಕ್ ಪುರೊ. ಮ್ಹಜಿ ಚಿಂತ್ಪಾ ರೀತ್ ಆನಿ ಜಿಯೆಂವ್ಚ್ಯಾ ಪರಿಸರಾಚಿ ಪರಿಧಿ ಲ್ಹಾನ್ ದೆಕುನ್ ತಿತ್ಲೆಂ ಮಾತ್ರ್ ಕಾಣಿಯಾಂನಿ ಹಾಡುಂಕ್ ಸಕ್ಲಾಂ. ಮ್ಹಾಕಾ
ಕಾಣಿಯೆ ಪ್ರಕಾರ್ ಮೊರುನ್ ಯೆತಾ, ಬರಂವ್ಕ್ ಉರ್ಭಾ ಘೆನಾಂತ್ ಮ್ಹಣ್ತಾತ್. ಕಿತೆಂ ಕಾರಣ್ ಆಸ್ಯೆತ್?
ಹಾಂವ್ ಆಯ್ಲೆವಾರ್ಚ್ಯೊ ಕಾಣಿಯೊ ವಾಚುನ್ ಆಸಾಂ. ಕಾಣಿಯೆಕ್ ವಿಂಚ್ಚೆ ವಿಶಯ್ ಬದ್ಲಾನಾಂತ್. ತಿಚ್ ಪಿಡಾ, ತೆಂಚ್ ವೊಕಾತ್! ವಿಶಯ್ ಬೆಳ್ಶೆವ್ನ್ ಯೆತಾತ್. ಎಕಾಕಾಳಾರ್ ಕಾಣಿಯಾಂಕ್ ಆಸ್ಲ್ಲಿ ಪಿಸಾಯ್ ಆನಿ ಆಸಕ್ತ್ ಆಜ್ ಹೆರ್ ಸಂಗ್ತಿಂನಿ ಫಾರ್ಲ್ಯಾ. ಕಾಣಿಯಾಂನಿ ವಾಚ್ಪ್ಯಾಂಕ್ ಧರ್ನ್ ದವರ್ಚೆ ತಿತ್ಲ್ಯಾ ಸಕ್ತೆನ್ ಬರಂವ್ಚೆ ಕಾಣಿಯಾಂಗಾರ್ ಎಕ್ಲೊ ದೋಗ್ ಉರ್ಲ್ಯಾತ್. ಆಶೆಂ ಮ್ಹಣ್ತಾನಾ ಆಯ್ಚ್ಯಾ ಬರವ್ಪ್ಯಾಂಕ್ ಶಿಕಾಪ್, ಮಾಹೆತ್, ಜಾಣ್ವಾಯ್ ನಾ ಮ್ಹಣ್ ನ್ಹಯ್! ದರಬಸ್ತ್ ಆಸಾ. ಪುಣ್ ಶಿಕ್ಲ್ಲೆಂ ಶಿಕಾಪ್ ಕಾಣಿಯಾಂನಿ ಹಾಡ್ಚ್ಯಾಂತ್ ಸಭಾರಾಂನಿ ಪ್ರೇತನ್ ಕರುಂಕ್ ನಾ, ಉರ್ಭಾ ದಾಕಂವ್ಕ್ ನಾ.
ನಾನೋ ಕಾಣಿಯಾಂಕ್ ಪಾಟಿಂಬೊ ದಿಲ್ಯಾರ್ ಕಸಲೆಂ ಭವಿಶ್ಯ್ ಮೆಳಾತ್?
ಹೊ ಪ್ರಕಾರ್ ನವೊ ನ್ಹಯ್. ಪುಣ್ ಕೊಂಕ್ಣಿಂತ್ ಪರಿಪಿಕಾಯೆಕ್ ಪಾವಾನಾತ್ಲೊ ಪ್ರಕಾರ್. ಚಿಕ್ಣಿ ಕತಾ ಸುಲಭ್ ಬರಂವ್ಕ್ ಪುಣ್ ವಾಡಾವಳಿಕ್ ಪಾವಾನಾಸ್ತಾಂ ಕಿಮ್ಚುನ್ ವೆಚಿ ಕಾಣಿ ತಿ. ಬರಿ ಭುಕ್ ಲಾಗ್ಲ್ಲ್ಯಾಕ್ ಏಕ್ ಕಪ್ ಚಾ ದಿಲ್ಯಾರ್ ಪಾವ್ತಾಗಿ? ಎಕಾ ಕಾಣಿಯೆಗಾರಾಚಿ ಸಾಹಿತಿಕ್ ತಾಂಕ್ ಲಾಂಬ್ ಕಾಣಿಯೆಂತ್ ಜಿಕುನ್ ಧರ್ಯೆತಾ. ಪುಣ್ ಚಿಕ್ಣಿಕತಾ ಬರಯ್ತೆಲೊ ಬರವ್ಪಿ ಕುಶಾಗ್ರ್ಮತಿಚೊ ಜಾಲ್ಲೆ ಶಿವಾಯ್ ನಾನೋ ಕಾಣಿ ಲೊಕಾಮನಾಂತ್ ಉರನಾ. ತಸಲ್ಯಾ ಸಕ್ತೆಚೆ ಬರವ್ಪಿ ಕೊಂಕ್ಣೆಂತ್ ಸೊಧಿಜೆ ಪಡ್ತಾ.
ಮಂಗ್ಳುರಾಂತ್ ಕೊಂಕ್ಣಿಕ್ ರೋಮಿ ಲಿಪಿ ವಾಪಾರ್ಲ್ಯಾರ್ ಕೊಂಕ್ಣಿಕ್ ಬರೆಂ ಜಾಯ್ತ್ ಗಿ?
ಆಜ್ ಕಾಲ್ ಕನ್ನಡ ಶಿಕ್ಚಿ ಭುರ್ಗಿಂ ಉಣಿಂ. ತಿಸ್ರಿ ಚೊವ್ತೆಚ್ಯಾ ಭುರ್ಗ್ಯಾಂಕೀ ಇಂಗ್ಲೀಶ್ ಚಡ್ ಆಂವಡ್ತಾ. ತ್ಯಾ ಭುರ್ಗ್ಯಾಂಕ್ ಇಗರ್ಜೆಕ್ ಯೆತಾನಾ ಲಿತುರ್ಜಿಂತ್ ವಾಂಟೊ ಘೆಂವ್ಕ್, ವಾಚ್ಪಾಂ ವಾಚುಂಕ್, ಪ್ರಾರ್ಥನಾಂ ವಾಚುಂಕ್ ಕನ್ನಡ ಲಿಪಿ ದೆಕುನ್ ಕೊಂಕ್ಣಿ ಯೇನಾ ಮ್ಹಣ್ ನಾಕ್ ಮೊಡ್ಚೆಂ ದಿಸ್ತಾ. ಲಿಪಿ ಗೊತ್ತುನಾ ಮ್ಹಳ್ಳೆಫರಾ ಕೊಂಕ್ಣಿ ಯೇನಾ ಮ್ಹಳ್ಯಾರ್ ತಾಕಾ ಅರ್ಥ್ ಆಸಾಗಿ? ಲಿಪಿ ಬದ್ಲಿಯಾಂ. ಕನ್ನಡ ವಾಚುಂಕ್ ಯೇನಾತ್ಲ್ಯಾಂಕ್ ರೋಮಿಂತ್ ಬರವ್ನ್ ಬೈಬಲ್ ವಾಚಾಪ್, ಪ್ರಾರ್ಥನಾಂ ವಾಚುಂಕ್ ಟಿಚರಾಂ ಕುಮೊಕ್ ಕರುಂದಿತ್. ಕೊಣೆಂ ತರೀ ಏಕ್ ಸುರ್ವಾತ್ ಕರಿಜೆಚ್. ಫಕತ್ ಉತ್ತೇಜನಾನ್ ಹೆಂ ಕಾಮ್ ಖಂಡಿತ್ ಜಾತಾ.
