"ಏಕ್ ಭ್ಯೆಂ ಮ್ಹಳ್ಯಾರ್  ಪ್ರತಿಕ್ರಿಯಾ  
ಅನ್ಯೆಕ್ ಭ್ಯೆಂ ಮ್ಹಳ್ಯಾರ್ 
ಕ್ರಿಯಾ"

............................................................................................................

ಹಾಂವ್ ಎಕಾ ಕಥೊಲಿಕ್ ಶಾಳಾಚ್ಯಾ ಬಗ್ಲೆನ್ ಪಾಶಾರ್ ಜಾವ್ನ್ ವ್ಹೆತಾಲೊಂ. ಥಂಯ್ ಎಕಾ ವೊಣ್ತಿರ್ ಅಶೆಂ ಕಾಂತಾಯಿಲ್ಲೆಂ-‘ಭಯವೇ ಜ್ಞಾನದ ಮೂಲ’. ಹೆಂ ಉತರ್ ಖಂಡಿತ್ ಜಾವ್ನ್ ಬೈಬಲಾಂತ್ಲ್ಯಾ ಪಾನಾಂತ್ಲೆಂ. ಪುಣ್ ಬೈಬಲಾಂತ್ಲ್ಯಾ ಉತ್ರಾಕ್ ಅನಿ ವೊಣ್ತಿವಯ್ಲ್ಯಾ ವೊಳಿಕ್ ಫರಕ್ ಜರೂರ್ ಆಸಾ. Bible ಮ್ಹಣ್ತಾ, "The FEAR of the LORD is the begining of Wisdom"  ಪುಣ್ ವೊಣ್ತಿರ್ ಪಾವ್ತಾನಾ The FEAR of the LORD ಆಸ್‍ಲ್ಲೆಂ FEAR ಮಾತ್ರ್ ಉರ್ಲಾಂ. ಭ್ಯೆಂ ಮಾತ್ರ್ ಉರ್ಲಾಂ. ಬೈಬಲಾಂತ್ಲೆಂ ಉತರ್ ತ್ಯಾ ವೊಣ್ತಿರ್ ಆಸಾ ತಶೆಂ ಪಾವುಂಕ್ ಅನರ್ಹ್‍ಗಿ? ವ ತೆಂ ಉತರ್ ವೊಣ್ತಿರ್ ತೆ ಪರಿಂ ಲಿಖ್‍ಲ್ಲ್ಯಾ ಪಾಟ್ಲ್ಯಾನ್ ಆಮ್ಚೆ ಥಂಯ್ ಖಂಚೆಂಗಿ ಭ್ಯೆಂ ಲಿಪ್ಲಾಂ?

ಭ್ಯೆಂ - ಕೊಣಾಕೀ ಸೊಡ್ನ್ ನಾ. ಹರ್ಯೆಕ್ಲ್ಯಾಕೀ ತಾಣಿಂ ಭಿಯೆಂವ್ಚೆ ಜಾಯ್ತೆ ವಿಚಾರ್ ಆಸಾತ್. ಪುಣ್ ಭ್ಯೆಂ ಖಂಯ್ ಆಸಾ, ಖಂಯ್ ತಾಚೆಂ ಠಿಕಾಣೆಂ ಮ್ಹಣ್ ವಿಚಾರ್ಲ್ಯಾರ್ ಬೋಟ್ ದಾಕವ್ನ್ ‘ಅಳೆ ಥಂಯ್’ ಮ್ಹಣುಂಕ್ ಜಾಯ್ನಾ. 

ಭ್ಯೆಂ ಮ್ಹಣ್ತಾನಾ ತಾಂತುಂ ದೋನ್ ಥರ್- ಏಕ್ ಭ್ಯೆಂ ಮ್ಹಳ್ಯಾರ್ ಪ್ರತಿಕ್ರಿಯಾ. ಅನ್ಯೆಕ್ ಭ್ಯೆಂ ಮ್ಹಳ್ಯಾರ್ ಕ್ರಿಯಾ. ಚಡಾವತ್ ಅಮ್ಕಾಂ ಭ್ಯೆಂ ಮ್ಹಳ್ಯಾರ್ ಏಕ್ ಪ್ರತಿಕ್ರಿಯಾ ಮ್ಹಣ್‍ಚ್ ಕಳಿತ್ ಆಸ್ಚೆಂ. ರಾತಿಂ ಎಕ್ಲೆಂಚ್ ವಚುನ್ ಆಸಾಯ್ ರಸ್ತ್ಯಾರ್, ಜಾಗ್‍ಮಗ್ ನಾ.. ಪಯ್ಸ್ ಥಾವ್ನ್ ಏಕ್ ವೆಕ್ತಿ ಯೆಂವ್ಚಿ ದಿಸ್ತಾ. ಭಿತರ್ಲೆ ಭಿತರ್ ಮನ್ ಜಾಗ್ರತ್ ಜಾತಾ. I should be safe... ಹಿ ಪ್ರತಿಕ್ರಿಯಾ. ರಾತಿಚ್ಯಾ ಬಾರಾ ವೊರಾರ್ ಘರಾಂತ್ ಏಕ್ ಅವಾಜ್! ಭ್ಯೆಂ ದಿಸ್ತಾ. ಮಾಜಾರ್‍ಗಿ? ಚೋರ್‍ಗಿ? ಆಶೆಂ ಅನಿರೀಕ್ಷಿತ್ ಜಾವ್ನ್ ಘಡ್‍ಲ್ಲ್ಯಾ ಘಡಿತಾಕ್ ತಕ್ಷಣಾಚಿ ಪ್ರತಿಕ್ರಿಯಾ - ಭ್ಯೆಂ.

ಅನಿರೀಕ್ಷಿತ್ ಘಡಿತಾಂಕ್ ಆಮಿ ದಾಕಂವ್ಚಿ ಪ್ರತಿಕ್ರಿಯಾ ಕಸಲ್ಯಾ ಮಟ್ಟಾಚಿ? ಸಕ್ಡಾಂನಿ ಭಿಂಯಾಕ್ ಪಾಟ್ ಘಾಲ್ನ್ ಧಾಂವ್ಚೆಂ ಚಡ್. face ಕರಿನಾಂವ್, ಚೋರ್ ಆಸಾ ತರ್ ತಾಚಿ ವಾಟ್ ಚುಕವ್ನ್ ವೆಚೆಂ, ವಾಟೆರ್ ಸುಣೆಂ ಮೆಳ್ಳೆಂ ತರ್ ಶೀದಾ ಪಾಟಿಂಚ್ ಧಾಂವ್ಚೆಂ. ಪುಣ್ ಸಕ್ಕಡ್ ತಶಿಂ ನ್ಹಯ್. ಭಿಂಯಾಕ್ ಫುಡ್ ಕೆಲ್ಲೆಯ್ ಆಸಾತ್. ಚೊರಾಕ್ ಮುಕಾರ್ ರಾವ್‍ಲ್ಲೆ ಆಸಾತ್. ಘೊಂಕ್ಚ್ಯಾ ಸುಣ್ಯಾಕ್ ಭೆಶ್ಟಾವ್ನ್ ಮುಕಾರ್ ವೆಚಿಂ ಆಸಾತ್. ಹೆಂ ತಾಂಚೆಂ ಧಯ್ರ್. 

ತರ್ ಮ್ಹಜೆಂ ಏಕ್ ಸವಾಲ್. ಬಂದೂಕ್ ಧರ್‍ಲ್ಲ್ಯಾ ಶಿಪಾಯಾಕ್ ಭ್ಯೆಂ ನಾಂಗಿ? ರಿವಾಲ್ವಾರ್, ಲಾಠಿ ಆಸ್ಚ್ಯಾ ಪೊಲಿಸಾಕ್ ಭ್ಯೆಂ ನಾಂಗಿ? ಖಂಡಿತ್ ತಾಂಕಾ ಧಯ್ರ್ ಆಸಾ. ಶೌರ್ಯ ಪ್ರಶಸ್ತಿ ಮೆಳ್ಳ್ಯಾ ಜಾಂವ್ಕಿ ಪುರೊ. ಪುಣ್ ಖಾಸ್ಗೆನ್ ತಾಂಚೆಲಾಗಿಂ ವಿಚಾರ್ಲ್ಯಾರ್ ತುವೆಂ  ಭಿಯೆಲ್ಲಿ ಘಡಿನಾಂಗಿ? ನಾ ಮ್ಹಣ್ಚೆಂ ಕಶೆಂ? ತಾಣಿಂ ಹಾತಿಂ ಧರ್‍ಲ್ಲ್ಯಾ ಬಂದೂಕೆ ಪಾಟ್ಲ್ಯಾನ್ ಸ್ವರಕ್ಷಣ್ ಆಸಾ ನ್ಹಯ್! ಬಂದೂಕ್ ಧರ್‍ಲ್ಲ್ಯಾಚೆಯ್ ಹಾತ್ ಕಾಂಪ್ತಾತ್ ನ್ಹಯ್? ಆಪ್ಣಾಚೆ ಬಚಾವೆಚೆಂ ಭ್ಯೆಂ ಆಸ್‍ಲ್ಲೊ ನ್ಹಯ್‍ಗಿ ಸುರಿ, ತಲ್ವಾರ್, ಬಂದೂಕ್, ಫಾತೊರ್ ಹಾತಿಂ ಘೆತಾ? ತರ್ ಎಕ್ ಗಜಾಲ್ ಸ್ಪಶ್ಟ್ - ಭಿಂಯಾಚೆಂ ಮೂಳ್ ಕಳಿತ್ ನಾತ್‍ಲ್ಯಾಕ್ ಭ್ಯೆಂ ಜಿಕುಂಕ್ ಜಾಯ್ನಾ. 

ಭ್ಯೆಂ ಏಕ್ ಪ್ರತಿಕ್ರಿಯಾ ಜಾವ್ನ್ ಅಮ್ಕಾಂ ಕಳಿತ್ ಆಸಾ. ಅತಾಂ ಭ್ಯೆಂ ಕ್ರಿಯಾ ಜಾವ್ನ್ ಅಮ್ಚೆಚ್ ಭಿತರ್ ಆಸಾ ಮ್ಹಣ್ ಹಾಂವ್ ಸಾಂಗ್ತಾಂ. ಪಾಳ್ಣ್ಯಾಂತ್ಲ್ಯಾ ಬಾಳಾಕ್ ಪಳೆಯಾ. ಕಾಲ್ ಜಲ್ಮಾಲ್ಲೆಂ ಬಾಳ್ ನಿದೆಂತ್ ಉಡೊನ್ ಪಡ್ತಾ. ತಾಕಾ ಕೊಣೆಂ ಭೆಶ್ಟಾಯ್ಲಾಂ? ತಾಕಾ ಸಪಣ್ ಪಡ್ಲೆಂ- ರೆಡಿಮೆಡ್ ಜಾಪ್ ಆಮ್ಚಿ. ಪುಣ್ ಮೂಳ್ ಕಾರಣ್ ಕಿತೆಂ? ಸಪಣ್ ನ್ಹಯ್.

ಮನ್ಶಾಚ್ಯಾ ಭಿಂಯಾಕ್ ಏಕ್ ಮೂಳ್ ಆಸಾ. ಅಪುಣ್ ನಾಂಚ್ ಜಾಂವ್ಚೆಂ ಮೂಳ್‍ಚ್ ಭ್ಯೆಂ. ಹೆಂ - ಕುಡಿಚ್ಯಾ ನಾಸಾಚೆಂ ಭ್ಯೆಂ ನ್ಹಯ್. ಕುಡಿಕ್ ಕಾಂಯ್ ಘಾಯ್ ಜಾಲ್ಯಾರ್ ಗೂಣ್ ಜಾತಿತ್. ಜೀವ್‍ಚ್ ವೆತಾ ಕೊಣ್ಣಾ! ಆಪುಣ್ ನಾಂಚ್ ಜಾತಾ ಕೊಣ್ಣಾ! ಮ್ಹಳ್ಳೆಂ ಕಾರಣ್ ಭಿಂಯಾಚೆಂ ಮೂಳ್. ಹೆಂ ಭ್ಯೆಂ ಆಸ್‍ಲ್ಲೊ ಜೆವಿನಾ, ನಿದಾನಾ, ಸುಶೆಗ್ ಘೆನಾ. ಎಕ್‍ಚ್ ಪಿಸೊ ತೊ ಜಾತಾ ವ ಜಿವ್ಗಾತ್ ಕರ್ತಾ. 

ಪುಣ್ ಹಾಂಚೆ ಮಧೆಂ ಏಕ್ ವಾಟ್ ಆಸಾ. ತಿ ಅಧ್ಯಾತ್ಮಾಚಿ. ಹೊ ಏಕ್ ನಿರ್ಭೀತ್ ಸಂಸಾರ್, ದೆಕುನ್ ಜೆಜುನ್ ಮ್ಹಳ್ಳೆಂ, ‘ಜೊ ಕೋಣ್ ಆಪ್ಲೊ ಜೀವ್ ವಾಂಚಂವ್ಕ್ ಸೊದ್ತಾ ತೊ ಅಪ್ಲೊ ಜೀವ್ ಹೊಗ್ಡಾಂವ್ದಿ!’. ‘ಜೀವಭಯ’ ಥಾವ್ನ್ ಜರ್ ಹಾಂವ್ ಭಾಯ್ರ್ ಅಯ್ಲೊಂ ತರ್ ಪರತ್ ಹಾಂವ್ ಮೊರನಾ. ಜೀವ್‍ಚ್ ವೆತಾ ಕೊಣ್ಣಾ ಮ್ಹಳ್ಳೆಂ ಭ್ಯೆಂ ಕೆದಳಾ ಪರ್ಯಾಂತ್ ಕಾಳ್ಜಾ ಗುಂಡಾಯೆಂತ್ ರೊಂಬೊನ್ ಆಸ್ತಾ ತವಳ್ ಪರ್ಯಾಂತ್ ದಿಸ್ಪೊಡ್ತ್ಯಾ ಲ್ಹಾಲ್ಹಾನ್ ಕಾರಣಾಂಕೀ ಆಮಿ ಉಡೊನ್ ಪಡ್ಚೆಂ ಸೊಡಿನಾಂವ್.

ಜೀವ್ ದಿಲ್ಲೊ ದೆವಾನ್. ದೆಕುನ್ ದೇವ್‍ಭಿರಾಂತ್ ಆಸ್ಲ್ಯಾರ್ ಜಿವಾಭಿರಾಂತ್ ಚಿಲ್ಲರ್ ಸಂಗತ್. 

ನಾಟಕ್ ರಿವ್ಯೂ: ಕೋಣ್ ತುಂ ಆಂಜಾ?

ನಟನಾಂತ್ ಜಿಕ್ಲಲೊ ‘ಆಂಜ್’

ಕಲಾ ಕುಟಮ್, ಮಂಗ್ಳುರ್ ಏಕ್ ಹವ್ಯಾಸಿ ನಾಟಕ್ ಪಂಗಡ್. ಸಂದ್ರಾಪಾಪರ್ಮಾಣೆಂ ಆನಿ ಆಪಾಪ್ಲ್ಯಾ ತಾಂಕಿ ಭಿತರ್ ನಾಟಕ್ ಪ್ರದರ್ಶನ್ ದೀಂವ್ಕ್ ತಯಾರ್ ಜಾಲ್ಲೊ ಪಂಗಡ್. ನಾಟಕ್ ರಸಿಕಾಂಕ್ ಪ್ರಯೋಗಾತ್ಮಕ್ ನಾಟಕಾದ್ವಾರಿಂ ಪಾಂವ್ಚ್ಯಾಕ್ ಮಾನೆಸ್ತ್ ಜೋನ್ ಎಂ. ಪೆರ್ಮನ್ನೂರ್ ಹಾಣಿಂ ಭಾಂದುನ್ ಹಾಡ್‍ಲ್ಲೊ ಪಂಗಡ್. ಏಕ್‍ಪಾತ್ರೀಯ್ ನಾಟಕ್ ‘ಮುನ್ನಿ’ ಆನಿ ‘ಇಂದಿರಾ’ಚೆ ಯಶಸ್ವೆ ಸಾಂಗಾತಾ ಕೊಮಿಡಿ ತಶೆಂಚ್ ಕಲಾತ್ಮಕ್ ನಾಟಕ್‍ಯಿ ಎದೊಳ್ ಹ್ಯಾ ಪಂಗ್ಡಾನ್ ಕೊಂಕ್ಣಿ ಸಮಾಜೆಕ್ ದಿಲ್ಯಾತ್. ಹಾಂಚೆ ಪಯ್ಕಿ ಮೆಯಾಚ್ಯಾ 22 ತಾರಿಕೆರ್ ಸಾಂಜೆಚ್ಯಾ 6.30 ವೊರಾಂಕ್ ಬಾಳ್ ಮರಿಯೆಚಿ ಫಿರ್ಗಜ್, ಬಜ್ಜೋಡಿಚ್ಯಾ ಸಾಲಾಂತ್ ‘ಕೋಣ್ ತುಂ ಆಂಜಾ?’ ನಾಟಕ್ ಸಾದರ್ ಜಾಲೊ. 

“ಹ್ಯಾ ಸಂಸಾರಾಂತ್ ಜಲ್ಮಾಕ್ ಯೆತಾನಾ ಹರ್ಯೆಕ್ಲಿಂ ಆಂಜ್ಯಾಪರಿಂ ಆಸ್ತಾತ್, ಕಮೇಣ್ ತಿಂ ವೆವೆಗ್ಳೆಂ ರೂಪ್ ಘೆತಾತ್” - ಹೊ ಡಯ್ಲೊಗ್ ‘ಕೋಣ್ ತುಂ ಆಂಜಾ?’ ನಾಟಕಾಚ್ಯಾ ಗ್ರ್ಯಾನಿಚೊ. ಜಾಂವ್ ಏಕ್ ಭುರ್ಗೆಂ ಕಚ್ರ್ಯಾಂತ್ ಮೆಳ್ಳೆಲೆಂ, ರಾವ್ಳೆರಾಂತ್ ವ್ಹಾಡ್ಲೆಲೆಂ, ರಸ್ತ್ಯಾ ಬಗ್ಲೆಚ್ಯಾ ಖೊಮ್ಟ್ಯಾಂನಿ ಜಲ್ಮಾಕ್ ಆಯಿಲ್ಲೆಂ.. ತೆಂ ಆಂಜ್‍ಚ್ ಸಯ್. ಪುಣ್ ತಾಂಚಿಂ ರುಪಾಂ ಕ್ರಮೇಣ್ ಬದ್ಲಾತಾತ್. ಕೋಣ್ ಬದ್ಲಿತಾ, ಕಿತ್ಯಾ ಆನಿ ಕಶೆಂ ಮ್ಹಳ್ಳ್ಯಾ ಸವಲಾಂಕ್ ಜಾಪಿ ಸೊಧುನ್ ವೆತಾ ಜೋನ್ ಎಂ. ಪೆರ್ಮನ್ನೂರ್ ಹಾಂಚ್ಯಾ ದಿಗ್ದರ್ಶನಾಖಾಲ್ ಸಾದರ್ ಜಾಲ್ಲೊ ನಾಟಕ್ – ‘ಕೋಣ್ ತುಂ ಆಂಜಾ?’

ನಾಟಕಾಚಿ ಜಿ ಕಾಣಿ ಆಸಾ, ಪಯ್ಲ್ಯಾ ಭಾಗಾಂತ್ ಆಮ್ಚ್ಯಾ ಪರಿಸರಾಕ್, ಕುಟ್ಮಾಂಕ್ ಆಪ್ತ್ ಜಾಂವ್ಚೆ ತಸಲಿ. ಪ್ರಾಯೆನ್ ವಾಡ್ಚ್ಯಾ ಚೆಡ್ವಾಚೆ ಆತ್ರೆಗ್, ತಳ್ಮಳೆ, ಸಪ್ಣಾಂ ಆನಿ ಹಟ್ ಮಾಂಚಿಯೆರ್ ಉಭಿಂ ಜಾತಾನಾ ಜಾಯ್ತ್ಯಾಂಚಿಂ ಭೊಗ್ಣಾಂ ಉಸ್ತಿತಾತ್ ತೆಂ ಖರೆಂ. ಹರ್ಯೇಕ್ ದೃಶ್ಯಾಂ ರಿಯಾಲಿಸ್ಟಿಕ್ ದಿಸ್ತಾತ್ ಆನಿ ದೃಶ್ಯಾಂಚೊ ವೇಗ್ ಬರ್ಯಾನ್ ಧಾಂವ್ತಾ. ಕಾಣಿ ಮಧ್ಯಂತರ್ ಉತ್ರಾತಾನಾ ನೀಜ್ ಕಾಣ್ಯೆಚಿಂ ಎಕೆಕ್‍ಚ್ ಮುಖಾಂ ಉಗ್ಡಾಪಿಂ ಜಾತಾನಾ ಪ್ರೇಕ್ಶಕಾಂಕ್ ಘಡಿಯೆಕ್ ಮೆಸ್ಮರೈಸ್ ಕೆಲ್ಲೆಪರಿಂ ಭೊಗ್ತಾ. ಹಾಂಗಾಸರ್‍ಚ್ ಕಾಣಿ ಲಿಖ್ಲೆಲ್ಯಾ ಆನಿ ತ್ಯಾ ಪರ್ಮಾಣೆಂ ದಿಗ್ದರ್ಶನ್ ದಿಲ್ಲ್ಯಾ ಜೋನ್ ಪೆರ್ಮನ್ನೂರಾಚಿ ಶ್ಯಾತಿ ಉಟೊನ್ ದಿಸ್ಚಿ! ಉಪ್ರಾಂತ್ ಗಣ್ಣ್ ಜಾಂವ್ಚಿ ಕಾಣಿ ಪ್ರೇಕ್ಶಕಾಂಚಿ ಸೊಸ್ಣಿಕಾಯ್ ಇಲ್ಲಿ ಪಾರ್ಕಿತಾ ಆನಿ ಇಲ್ಲಿಶಿ ನಾಟಕೀಯ್ ವೋಲ್ ಪಾಂಗುರ್ತಾ. 

ಹಾಂತುಂ ದೊಗಾಂಚ್ ಕಲಾಕರಾಂನಿ ಪಾತ್ರಾಂಕ್ ಜೀವ್ ದಿಲಾ. ತಾಂತುಯ್ ದೊಗಾಂಚ್ ಸ್ತ್ರೀಯಾಂನಿ ಹೊ ನಾಟಕ್ ಆಪ್ಲ್ಯಾ ಭುಜಾಂಚೆರ್ ಘೆವ್ನ್ ಸಾದರ್ ಕೆಲ್ಲಿ ರೀತ್ ಹೊಗ್ಳಿಕೆಚಿ. ಶ್ರೀಮತಿ ಯುಲಾಲಿಯಾ ಡಿ’ ಸೋಜಾ, ಗ್ರ್ಯಾನಿ ಜಾವ್ನ್, ಆವಯ್ ನ್ಹಯ್ ತರೀ ಆವಯ್ಚೊ ಪಾತ್ರ್ ಖೆಳ್ನ್, ನಾತಿಕ್ ಚಲಾಕೆನ್ ವಾಟೆಕ್ ಹಾಡ್ಚಿ ರೀತ್ ಸುಪರ್ಬ್! ‘ಇಂದಿರಾ’ – ಏಕ್ ಪಾತ್ರೀಯ್ ನಾಟಕ್ ಡಾನ್ ಬೊಸ್ಕೊ ಹೊಲಾಂತ್ ಸಾದರ್ ಜಾವ್ನ್ ಆಕೇರ್ ಜಾತಾನಾ ಲೊಕಾಂನಿ ಮಾರ್‍ಲ್ಲ್ಯೊ ಶಿಲೊಣ್ಯೊ ಮ್ಹಾಕಾ ಉಡಾಸ್ ಆಸಾತ್. ಹಿಚ್ ತಿ ಇಂದಿರಾ! ಅಮೋಘ್ ನಟನ್, ತರೀಪುಣ್ ಥೊಡೆ ಕಡೆ ತೆಚೆ ಥಂಯ್ ದಿಗ್ದರ್ಶಕ್ ಝಳ್ಕತಾ. 

ತ್ಯಾ ಉಪ್ರಾಂತ್ ಶ್ರೀಮತಿ ಸುನೀತಾ, ವೃತ್ತೆನ್ ಸಿವಿಲ್ ಇಂಜಿನಿಯರ್, ಪರ್ಗಾಂವಾಂತ್ ವಾವ್ರ್. ರಜೆರ್ ಆಯಿಲ್ಲಿ ತಿ ರಂಗ್ ಪುಸುನ್ ಮಾಂಚಿಯೆರ್ ಚಡ್ಲ್ಯಾ. ತಿಚೊ ಮಾದ್ರಿಚೊ ಪಾತ್ರ್ ಥೊಡ್ಯಾಚ್ ಘಡ್ಯಾಂಚೊ ತರೀ ನಾಟಕಾಂತ್ ಭೋವ್ ನಿರ್ಣಾಯಕ್. ತ್ಯಾ ಭಾಯ್ರ್ ನಾತ್ ಜಾವ್ನ್ ಮ್ಹಾತಾರೆಕ್ ಆಪ್ಲ್ಯಾ ಮುಟಿ ಭಿತರ್ ಹಾಡ್ಚ್ಯಾ ಕಸ್ರತೆಂತ್ ತಿಚೆಂ ಅಭಿನಯ್

ಉತ್ತೀಮ್. ಥೊಡ್ಯಾ ಸಂದರ್ಭಾಂನಿ ದೊಗಾಂಯ್ನಿ ಎಕಾಮೆಕಾ ಸ್ಪರ್ದ್ಯಾಕ್ ಲಾಗ್‍ಲ್ಲೆಪರಿಂ ನಟನ್ ದಿಲಾಂ. ಹ್ಯಾ ದೊಗಾಂಯ್ ಕಲಾಕಾರಾಂಚ್ಯೆ ನಾಟಕ್ ಅಭಿರುಚಿಕ್ ಆನಿ ವಾವ್ರಾಕ್ ಆಮಿ ಶಾಭಾಸ್ಕಿ ಪಾಟಂವ್ಕ್ ಫಾವೊ. 

ದಿಗ್ದರ್ಶನಾಚ್ಯಾ ಸಂಗ್ತಿಕ್ ಯೆಂವ್ಚೆಂ ತರ್, ಜೋನ್ ಪೆರ್ಮನ್ನೂರ್ ಸದಾಂ ಅಭ್ಯಾಸ್ ಕರ್ಪಿ ಆನಿ ಪ್ರಯೋಗ್ ಕರುಂಕ್ ಸದಾಂ ತಯಾರ್. ಹೊ ನಾಟಕ್ ಆದಿಂ ಏಕ್ ಪಾವ್ಟಿಂ ವೆಗ್ಳ್ಯಾಚ್ ರಿತಿನ್, ದುಸ್ರ್ಯಾಚ್ ಕಲಾಕಾರಾಂ ಥಾವ್ನ್ ಸಾದರ್ ಕೆಲ್ಲೊ ತರೀ

ಹ್ಯಾ ಪಾವ್ಟಿಂ ವೆಗ್ಳ್ಯಾಚ್ ಆಯಾಮಾನ್ ಚಿಂತುನ್ ಆಯ್ಚ್ಯಾ ವ್ಹಾಳ್ಯಾಕ್ ಸರಿ ಜಾವ್ನ್ ತಾಣಿಂ ನಾಟಕ್ ಆಮ್ಚೆ ಮುಕಾರ್ ದವರ್ಲಾ. ಪಾತ್ರ್‍ಧಾರಿಂಚಿ ವಿಂಚವ್ಣ್ ಬರಿ ಆಸಾ ಆನಿ ತಾಂಚೆ ಥಾವ್ನ್ ಬರೆಂ ನಟನ್ ಭಾಯ್ರ್ ಕಾಡ್ಚೆ ಪ್ರೇತನ್ ಜಾಲಾಂ. ಪಟಾಪಟ್ ಉಲಂವ್ನ್‍ಚ್ ವೆಚ್ಯಾ ಬದ್ಲಾಕ್ ಮಾವ್ನ್’ಪಣ್, ಆಂಗಿಕ್ ಅಭಿನಯ್, ಮುಕಮಳಾಚಿ ಭಾಸ್ ಆನಿ ಜೊಕ್ತೆಂ ಸಂಗೀತ್ ಹ್ಯಾ ನಾಟಕಾಚಿ ಗಿರೆಸ್ತ್‍ಕಾಯ್. ಉತ್ರಾಂನಿ ಸಾಂಗುಂಕ್ ಜಾಯ್ನಾತ್‍ಲ್ಲೆಂ ಅಂಗಿಕ್ ಅಭಿನಯಾಂತ್ ಆನಿ ಮಾವ್ನ್’ಪಣಾಂತ್ ಉತ್ರಾಂವ್ಕ್ ಕಲಾಕರಾಂಕ್ ಬರೊ ಸ್ಕೋಪ್ ದಿಗ್ದರ್ಶಕಾನ್ ದಿಲಾ. ಆವಾಜ್ ಆನಿ ಉಜ್ವಾಡ್ ಗರ್ಜೆಪುರ್ತೊ ಆಸೊನ್ ನಾಟಕಾಕ್ ಪೂರಕ್ ಜಾಲಾ.

ಥೊಡ್ಯೊ ಹರ್ಕತ್ಯೊ ಜರೂರ್ ಆಸ್ತಾತ್. ಸಂಗೀತ್ ಥೊಡ್ಯಾ ಜಾಗ್ಯಾಂನಿ ಪಾತ್ರ್‍ಧಾರಿಚ್ಯಾ ಉತ್ರಾಂಕ್ ಮಾರ್ನ್ ಕಾಡ್ತಾಲೆಂ. ಕೋಲರ್ ಮೈಕ್ ವಾಪಾರ್ ಲ್ಲೆಂ ಬರೆಂ ಜಾಲೆಂ. ಥೊಡೆ ಪಾವ್ಟಿಂ ತೊ ಸ್ವಿಚ್ ಆಫ್ ಜಾಲ್ಲ್ಯಾನ್ ವ ನ್ಹೆಸಣ್ ಬದ್ಲುನ್ ಯೆತಾನಾ ತೊ ಶಿರ್ಕಾಂವ್ಕ್ ವಿಸ್ರಾಲ್ಲ್ಯಾನ್ ಥೊಡಿ ಘುಸ್ಪಡ್ ದಿಸುನ್ ಆಯ್ಲಿ. ತಾಂತ್ರಿಕ್ ಗಜಾಲಿಂಕ್ ಭಾಯ್ರ್ ದವರ್ಲ್ಯಾರ್ ಹೊ ನಾಟಕ್ ಬಹುತೇಕ್ ಯಶಸ್ವೆಕ್ ಮೇಟ್ ತೆಂಕುಂಕ್ ಪಾವ್ಲಾ ತೆಂ ಖಂಡಿತ್.

ಆಜ್ ದೃಶ್ಯ್ ಮಾಧ್ಯಮಾಂಚೆಂ ರಾಜ್ ಚಲ್ತಾ. ನಾಟಕ್ ಶೆತಾಂತ್ ಅದ್ಭುತ್ ಬೆಳೆಂ ಕಾಡ್ನ್ ಆಸ್‍ಲ್ಲ್ಯಾ ತುಳು ನಾಟಕಿಸ್ತಾಂನಿ ಸಯ್ತ್ ರಂಗ್ ಭುಂಯ್ ಥಾವ್ನ್ ವ್ಹಡ್ಲ್ಯಾ ಸ್ಕ್ರೀನಿಂಕ್ ಉಡ್ಕಿ ಮಾರ್ಲ್ಯಾ. ಸಭಾರ್ ಕಲಾಕರಾಂಚೆ ವ್ಹಡ್ ಪಂಗಡ್ ಆಸ್‍ಲ್ಲೆ ಭೆತುನ್ ತೆಗಾ ಚೊವ್ಗಾಂಚೊ ಏಕ್ ರಚುನ್ ಟ್ವೆಂಟಿ ಟ್ವೆಂಟಿ ಕ್ರಿಕೆಟ್ ಖೆಳಾಪರಿಂ ಹಾಸ್ಕುಳೆ ಸಾದರ್ ಕರುನ್ ದೀಸ್ ಕಾಡ್ಚೆ ಉದೆಲ್ಯಾತ್. ಫಿಲ್ಮಾಕ್ ಸೊಡ್ಯಾಂ, ಸೀರಿಯಲಾಂಕ್ ಸಯ್ತ್ ಹ್ಯಾಂಡಲ್ ಕರುಂಕ್ ಪರಿಣತೆಚೊ ಅಭಾವ್ ಧೊಸುನ್ ಆಸ್ಚ್ಯಾ ಕೊಂಕ್ಣಿಚ್ಯಾ ಸದ್ದ್ಯಾಚ್ಯಾ ಪರಿಗತಿಂತ್ ವ್ಹಡ್ಲ್ಯಾ ಸ್ಕ್ರೀನಿರ್ ವಿಶೇಸ್ ಭರ್ವಸೊ ದವರ್ಚೆ ಕೊಣೀ ದಿಸಾನಾಂತ್. ತಶೆಂ ಮ್ಹಣ್ ಕೊಂಕ್ಣಿ ರಂಗ್‍ಭುಂಯ್ಚಿ ಗಜಾಲ್ ಕಿತೆಂ ಬರಿ? 

ವಿಸ್ತಾರ್ ಕೊಂಕ್ಣಿ ಸಮಾಜೆಂತ್ ರಂಗ್‍ಭುಂಯ್ ಜಿವಿ ದವ್ರುಂಕ್ ಎಕ್ಲೆ ದೋಗ್ ಪೆಂಕಾಡ್ ಭಾಂದುನ್ ರಾವ್ತಾತ್ ತೆಂ ಥೊಡ್ಯಾ ಮಟ್ಟಾಕ್ ಪುಣೀ ಧಾದೊಸ್ಕಾಯೆಚೆಂ! ಕೊಂಕ್ಣಿಂ ರಂಗ್‍ಭುಂಯ್ತ್ ಅಪ್ರೂಪ್ ತರೀ ಝಡ್ಚ್ಯಾ ಪಾವ್ಸಾಕ್ ಏಕ್ ದೋನ್ ನಾಟಕ್ ಮುಂಗೆ ಯೆತಾತ್. ಘರಾಚ್ ದೃಶ್ಯ್ ಮಾಧ್ಯಮಾಮುಕಾರ್ ವೇಳ್ ಖರ್ಚಿಯೆತ್ ತರೀ ಆಜ್ ಇಲ್ಲೊ ಇಲ್ಲೊಚ್ ಲೋಕ್ ನಾಟಕಾತೆವ್ಶಿಂ ಗುಮಾನ್ ದೀವ್ನ್ ಆಸಾ ತೆಂ ಪಳೆತಾನಾ ನಾಟಕ್ ದಿಗ್ದರ್ಶಕಾಂಕ್ ಆನಿ ಕಲಾಕರಾಂಕ್ ಪಾಕಾಟೆ ಪುಲ್‍ಲ್ಲೊ ಅನ್ಭವ್ ದಿತಾತ್. ವ್ಹಯ್, ನಿಜಾಯ್ಕಿ ಕಲಾಕರಾಂಕ್ ಉಭೊಂಕ್ ಕೊಂಕ್ಣಿ ಪ್ರೇಕ್ಶಕಾಂನಿ ಜರೂರ್ ಪಾಕಾಟೆ ದೀಜೆ. ವ್ಹಳೂ ತರೀ ಹೆಂ ಜಾವ್ನ್ ಆಸಾ ಆನಿಕೀ ತುರ್ತಾನ್ ತೆಂ ಜಾಂವ್ದಿ ಮ್ಹಣ್ ಆಶೆತಾಂ.  

ಪಿಡಾ, ರೆತಿರ್ ಆನಿ ಹೀಲಿಂಗ್

ಪಿಡೆ ಪಾಟ್ಲ್ಯಾನ್ ಮಿಸ್ತೆರ್?:

‘ಕಶಿ ಭಲಾಯ್ಕಿ?’ಮ್ಹಳೆಂ ಸವಾಲ್ ದೊಗಾಂನಿ ಭೆಟ್ತಾನಾ ಔಪಚಾರಿಕ್ ಜಾವ್ನ್ ವಿಚಾರ್ಚೆ ತಸಲೆಂ. ಭಲಾಯ್ಕೆಚಿ ಖಂತ್ ಸಗ್ಳ್ಯಾಂಕೀ ಧೊಸ್ತಾ. ಆಜ್‍ಕಾಲ್ ಭಲಾಯ್ಕೆ ಕೇಂದ್ರಾಂ, ಮೆಡಿಕಲ್ ಕೊಲೆಜಿಂಚೊ ಸಂಖೊ ಕಿತ್ಲೊ ವಾಡ್ಲಾಗಿ ತಿತ್ಲಿಚ್ ಚಡ್ ಭಲಾಯ್ಕಿ ಭಿಗಡ್ಲ್ಯಾ. ವಕ್ತಾಂ ನಾತ್‍ಲ್ಲ್ಯೊ, ಚಿಕಿತ್ಸಾ ನಾಂತ್ ತಸಲ್ಯೊ ನವ್ಯೊ ಪಿಡಾಯ್ ಸುರು ಜಾಲ್ಯಾತ್. ಎಕೆ ನವೆ ಪಿಡೆಕ್ ವಕತ್ ಸೊಧುನ್ ಕಾಡ್ಲೆಂ ಮ್ಹಣ್ತಾನಾ ಆನ್ಯೇಕ್ ನವಿ ಪಿಡಾ ಸುರು ಜಾತಾ. ಪಿಡಾ ಯೆತಾನಾ ಮನ್ಶಾಕ್ ಅಪ್ಲ್ಯಾ ಅಸ್ತಿತ್ವಾವಿಶಿಂ ಬಾರೀಕ್ ದುಬಾವ್ ಉದೆವ್ನ್ ಕಾಂಪ್ ಸುರು ಜಾತಾ. ಪಿಡಾ ಸಬಾರಾಂಕ್ ನಿರಾಶೆಕ್ ವಳಗ್ ಕರಿತ್ ವ ಆಶಕ್ತ್ ಕರಿತ್. ಹಾಂಗಾಸರ್ ಭಾವಾಡ್ತಾಚಿ ಪರೀಕ್ಷಾ ಜಾತಾ. ಸೊಸ್ಣಿಕಾಯ್ ಅನಿ ಆಶಾವಾದಾಚಿಂ ಖೆಳ್ಕುಳಾಂ ಜಾತಾತ್. ಪೂಣ್ ಪಿಡೆ ಪಾಟ್ಲೆ ಮಿಸ್ತೆರ್ ಸೊಧುನ್ ಸಮ್ಜುನ್ ಘೆಂವ್ಚೆಂ ಕಾಮ್ ಏಕ್ ಭಾವಾಡ್ತಿ ಮಾತ್ರ್ ಕರ್ತಾ!

ಪಿಡಾ ಅನಿ ದೈವಿಕ್ ನದರ್:

ಆದಿಂ ಮಾಗಾಂ ಪಿಡಾ ಯೆಂವ್ಚಿ ದೆವಾ ಥಾವ್ನ್ ಮ್ಹಣ್ ಪಾತ್ಯೆತಾಲೆ. ಅನಿ ತಿ ಗೂಣ್ ಕರುಂಕ್ ಹೋಮ್‍ಬಲಿಯೊ ಭೆಟವ್ನ್ ದೆವಾಚಿಚ್ ಮಜತ್ ಮಾಗ್ತಾಲೆ. ಅಪ್ಣಾಚೆರ್ ಧಾಡ್ಲ್ಯಾ ಪಿಡೆ ಕಷ್ಟಾಂ ಖಾತಿರ್ ದೆವಾಚೆರ್ ಶಿಣ್ ಉಚಾರ್‍ಲ್ಲಿಂ ದೃಷ್ಟಾಂತಾಂ ಬೈಬಲಾಂತ್ ಆಸಾತ್. ಪರ್ನ್ಯಾ ಸೊಲ್ಲ್ಯಾಂತ್ ಪಿಡಾ ಗೂಣ್ ಜಾಂವ್ಚೆ ಖಾತಿರ್ ಮ್ಯಾಜಿಕ್ ತಂತ್ರಾ-ಮಂತ್ರಾಂಚೊ ಅಧಾರ್ ಆಶೆವ್ನ್ ಘೆಲ್ಲೆಯ್ ದಾಕ್ಲೆ ಅಸಾತ್ (2 ರಾಯ್ 1:1-4). ಬೈಬಲ್ ಬರಯ್ಣಾರ್ ಕಷ್ಟ್ ಆನಿ ಪಿಡಾ ವಾಯ್ನ್ ಮ್ಹಣ್ ಪಿಂತ್ರಯ್ತಾ ಆನಿ ಭಲಾಯ್ಕಿ ಮ್ಹಳ್ಯಾರ್ ದೆವಾಚೆಂ ಅಪೂರ್ವ್ ಬೆಸಾಂವ್ ಮ್ಹಣ್‍ಯಿ ಲೆಕ್ತಾ(ಸಿರಾಖ್ 38:9) ಕ್ರಮೇಣ್ ಪಿಡಾ ಸಯ್ತಾನಾಚ್ಯಾ ಕುತಂತ್ರದ್ವಾರಿಂ ಯೆತಾ ಮ್ಹಳ್ಳಿ ಪಾತ್ಯೆಣಿಯಿ ದಾಟೊನ್ ಯೆತಾನಾ ಲೋಕ್ ದೆವಾಶಿಂ ಪರ್ತೊನ್ ಸಯ್ತಾನಾಚ್ಯಾ ಪಾಸಾಂತ್ಲೆಂ ನಿವಾರುಂಕ್ ಪರತ್ತಾ. ಜೊಬಾಚ್ಯಾ ಪುಸ್ತಕಾಂತ್ ಅಸಲೆಂ ಏಕ್ ಚಿತ್ರಣ್ ವಾಚುಂಕ್ ಮೆಳ್ತಾ. ನವೊ ಸೊಲ್ಲೊ ಜೆಜುಕ್ ಗೂಣ್ ಕರ್ಚೊ ವಯ್ಜ್ ಜಾವ್ನ್ ಪಿಂತ್ರಾಯ್ತಾ. ಪೂಣ್ ತೊಚ್ ಕೆದ್ನಾಂಯ್ ಪಿಡೆಕ್ ವ್ಹಳಗ್ ಜಾಲ್ಲೊ ಸಾಂಗಾನಾ. ಜೆಜು ಅಪ್ಲೆಂ ಮಿಸಾಂವ್ ಕಾಮ್ ಸಬಾರಾಂಕ್ ಗೂಣ್ ಕರ್ಚೆ ನಿಮ್ತಿಂ ಸುರ್ವಾತ್ತಾ ಅನಿ ಆಪ್ಲ್ಯಾ ಶಿಸಾಂಕೀ ಗೂಣ್ ಕರ್ಚಿ ಸಕತ್ ದಿವುನ್ ಧಾಡ್ಚೆಂಯ್ ಅಮಿ ವಾಚ್ತಾಂವ್ (ಮಾತೆವ್ 10:38).

ವಿವಿದ್ ಥರಾಂನಿ ಯೆಂವ್ಚ್ಯೊ ಪಿಡಾ:

ಹ್ಯಾ ಪಾಟ್‍ಥಳಾರ್ ಚಾರ್ ಥರಾಂನಿ ಯೆಂವ್ಚ್ಯಾ ಪಿಡೆಚೆಂ ವಿಂಗಡನ್ ಕರ್ಯೆತ್.

 ಆಪ್ಲ್ಯಾಚ್ ಬೆಜವಾಬ್ದಾರಿಪಣಾನ್ ವ ಅಪ್ಣಾಕ್ ಕಿತೆಂ ಬರೆಂ ನ್ಹಯ್ ಮ್ಹಣ್ ಜಾಣಾ ಅಸೊನ್‍ಯಿ ಖರಿಮಸ್ತೆನ್ ಆಪ್ಣಾಯಿಲ್ಲಿ ಪಿಡಾ.

 ಹೆರಾಂ ಥಾವ್ನ್, ಮ್ಹಣ್ಜೆ ಆವಯ್-ಬಾಪಯ್ ಥಾವ್ನ್ ಅಮಾಯಕ್ ಭುರ್ಗ್ಯಾಂಕ್ ಯೆಂವ್ಚ್ಯೊ ಪಿಡಾ.

 ದೆಂವ್ಚಾರಾಚೆ ಕುಯುಕ್ತೆನ್ ಯೆಂವ್ಚ್ಯೊ ಪಿಡಾ.

 ದೆವಾನ್ ಅಪ್ಲ್ಯಾ ಮೊಗಾಚಿ ಕುರ್ಹು ಜಾವ್ನ್ ಧಾಡ್ಚಿ ಪಿಡಾ.

ಮನ್ಶ್ಯಾಕ್ ಭಲಾಯ್ಕಿ ಗರ್ಜೆಚಿ:

ಹ್ಯಾ ಪ್ರಕಾರ್ ಮನಿಸ್ ಫಕತ್ ಕುಡಿನ್ ಮಾತ್ರ್ ಪಿಡೆನ್ ವ್ಹಳಗ್ ಜಾಂವ್ಚೊ ನ್ಹಯ್. ಮನ್ಶಾ ಥಂಯ್ ತೀನ್ ರಿತಿಂಚಿ ಭಲಾಯ್ಕಿ ಗರ್ಜೆಚಿ. ಭಲಾಯ್ಕಿ ಅತ್ಮ್ಯಾಚಿ, ಭಲಾಯ್ಕಿ ಮತಿಚಿ ಆನಿ ಅಕ್ರೇಕ್ ಕುಡಿಚಿ. ಹಿ ವರ್ಗಾ ಮಾಂಡಾವಳ್ ಪಾಟಿಂ-ಮುಕಾರ್ ಜಾಂವ್ಕ್ ನಜೊ. ವ್ಹಾಣ್ ಪಾಂಯಾಂಕ್‍ಚ್ ಘಾಲ್ಚಿ ಶಿವಾಯ್ ಮಾತ್ಯಾಕ್ ಖೊವಂವ್ಚಿ ನ್ಹಯ್. ನೆಣಾರ್ಯಾಂಚ್ಯಾ ವರ್ತುಲಾಂತ್ ಕುಡಿಚಿ ಭಲಾಯ್ಕಿಚ್ ಪಯ್ಲೆಂ ಸ್ಥಾನ್ ಘೆತಾ. ಪೂಣ್ ಅಮ್ಕಾಂ ಭಾವಾಡ್ತ್ಯಾಂಕ್ ಕುಡಿಚ್ಯಾ ಭಲಾಯ್ಕೆ ವರ್ನಿ ಬಾಪಾಚ್ಯಾ ಸದ್ರೆ ಮುಕಾರ್ ರಾಂವ್ಚ್ಯಾ ಅತ್ಮ್ಯಾಚಿ ಭಲಾಯ್ಕಿ ಪಯ್ಲೆಂ ಸ್ಥಾನ್ ಘೆತಾ. ದೇವ್ ಕೋಣ್‍ಚ್ ಪಿಡೆ-ಶಿಡೆಂತ್ ವಳ್ವಳ್ಚೆಂ ಪಳೆಂವ್ಕ್ ಆಶೆನಾ. ತೊ ಆಶೆತಾ ಸರ್ವ್ ಬರೆಂ ಆನಿ ಸಮೃದ್ದಿ. ತಸೆಂಚ್ ಎಕ್ಲ್ಯಾಕ್ ಆಪ್ಲಿ ಕೂಡ್ ಭಲಾಯ್ಕೆಭರಿತ್ ಸಾಂಬಾಳುಂಕ್ ಹಕ್ಕ್ ಆಸಾ ಮಾತ್ರ್ ನ್ಹಯ್ ತೆಂ ತಾಚೆಂ ಕರ್ತವ್ಯ್‍ಯ್ ವ್ಹಯ್.

ರೆತಿರ್ ಅನಿ ಹೀಲಿಂಗ್:

‘ಭಲಾಯ್ಕಿ ದಿಂವ್ಚಿ ದೆವಾನ್’ ಮ್ಹಳ್ಳೆಂ ಚಿಂತಪ್ ಆಜ್‍ಕಾಲ್ಚೆಂ ನ್ಹಯ್. ಪಿಡಾ, ಕಷ್ಟ್, ದಗ್ದಣಿ ಯೆತಾನಾ ಅಪಾಪಿಂಚ್ ಭಾವಾಡ್ತ್ಯಾಚಿ ದೆವಾಸಂಗಿ ಆಸ್ಚಿ ತಿ ಸಳಾವಳ್ ಘಟ್ ಜಾತಾ ಮ್ಹಣ್ಯೆತ್. ರೆತಿರ್, ನೊವೆನಾದ್ವಾರಿಂ ಭಾವಾಡ್ತಿ ಅಪ್ಲೆಂ ದೂಖ್, ಪಿಡಾಶಿಡಾ ಗೂಣ್ ಜಾಂವ್ಚೆ ಖಾತಿರ್ ಸಾಂತಾಲಾಗಿಂ ವ ದೆವಾಲಾಗಿಂ ಮಾಗ್ತಾ. ಸಬಾರ್ ಜಣಾಂ, ಸರ್ಗಿಂಚ್ಯಾ ವಯ್ಜಾ ಥಾವ್ನ್ ಮಾಗ್‍ಲ್ಲೆಂ ಸಗ್ಳೆಂ ಮೆಳ್ತಚ್ ಮ್ಹಳ್ಳ್ಯಾ ಅಖಂಡ್ ವಿಶ್ವಾಸಾನ್ ರೆತಿರಿಂಕ್ ವೆತಾತ್. ನಿಜಾಯ್ಕಿ ಎಕಾ ಭಾವಾಡ್ತ್ಯಾನ್ ರೆತಿರ್ ಕಿತ್ಯಾಕ್ ಕರಿಜ್ ಮ್ಹಳ್ಳೆಂ ಸವಾಲ್ ಅಮಿ ವಿಚಾರುಂಕ್ ಜಾಯ್.

ರೆತಿರ್...ಕಿತ್ಯಾಕ್ ಜಾಯ್?:

ರೆತಿರ್ ಜಾಯ್ ಜಿವಿತಾಚೆ ನವ್ಸರ್ಣೆ ಖಾತಿರ್, ಕ್ರಿಸ್ತಿ ಭಾವಾಡ್ತಾಂತ್ ಭಡ್ತಿ ಮೆಳ್ಚೆ ಖಾತಿರ್, ಎಕಾಮೆಕಾಚೆ ಸೆವೆಂತ್ ಉರ್ಬೆವಂತ್ ಜಾಂವ್ಚೆ ಖಾತಿರ್ ಆನಿ ಖೊಟ್ಯಾ ಜಿಣ್ಯೆಕ್ ಪಾಟ್ ಕರುನ್ ದೆವಾಚೆ ಸಳಾವಳಿನ್ ವಾಡ್ಚೆ ಖಾತಿರ್... ಪೂಣ್ ಸಕ್ಡಾಂಚೊ ಶೆವೊಟ್ ಅಸಲೊಚ್ ಆಸಾತ್ ಮ್ಹಣ್ ಸಾಂಗೊಂಕ್ ಕಷ್ಟ್. ಸಬಾರಾಂ ಆಪ್ಣಾ ಪಿಡೆ ಥಾವ್ನ್ ಸುಟ್ಕಾ ಮೆಳಾಜೆ ವ ಮೆಳ್ತಾ ಮ್ಹಳ್ಳೆ ಆಶೆನ್ ರೆತಿರೆಕ್ ವೆತಾತ್. ಹೆಂ ಚೂಕ್ ನ್ಹಯ್. ಕಿತ್ಯಾಕ್ ಗೂಣ್ ಕರ್ಚೆಂಯ್ ದೆವಾಚ್ಯಾ ಮಿಸಾಂವಾಚೊ ವಾಂಟೊ. ಪೂಣ್ ಸಬಾರಾಂನಿ ‘ಆಪ್ಣಾಚಿ ಪಿಡಾ ಗೂಣ್ ಜಾಂವ್ಕ್ ನಾ’, ‘ಹಾಂಗಸರ್ ಜಾಯ್ನಾ ತರ್ ಥಂಯ್ಸರ್ ಜಾತೆಲಿ’, ‘ಹೊ ನ್ಹಯ್ ತರ್ ತೊ ಗೂಣ್ ಕರ್ತಲೊ’ ಮ್ಹಳ್ಳ್ಯಾ ಗಿರಾಂತೆನ್ ಸರ್ತೆ ಪ್ರಕಾರ್ ಎಕಾ ರೆತಿರೆ ಥಾವ್ನ್ ಆನ್ಯೇಕ್ ರೆತಿರೆಕ್ ಧಾಂವ್ಚೆಂ ಕಿತ್ಲೆಂ ಸಮರ್ಥನೀಯ್ ಮ್ಹಣ್ ಸಾಂಗೊಂಕ್ ಜಾಯ್ನಾ. ಹಿ ವಾಡಾವಳ್ ಕಿತ್ಲಿ ಸಾರ್ಕಿ ಮ್ಹಣ್ ಆಮಿಂಚ್ ಚಿಂತುನ್ ಪಳೆಜೆ, ತ್ಯಾ ಶಿವಾಯ್ ರೆತಿರ್‍ಚ್ ಆಮ್ಚ್ಯಾ ಪಿಡೆಂಕ್ ವಕತ್‍ಗೀ?

ಮಾನಸಿಕ್ ದಬಾವ್ ಚಡ್ ಜಾಲಾ:

ಆಜ್‍ಕಾಲ್ ಭಲಾಯ್ಕೆ ಪಾಸತ್ ಯೋಗ, ಧ್ಯಾನ್ ತಸಲ್ಯೊ ನವ್ಯೊ (ಪುರಾತನ್‍ಯಿ ವ್ಹಯ್) ಚಿಕಿತ್ಸಾ ಚಾಲ್ತೆರ್ ಆಸಾತ್. ಯೋಗ, ಧ್ಯಾನಾ ಥಾವ್ನ್ ಭಲಾಯ್ಕೆಚೆರ್ ಬರೊ ಪರಿಣಾಮ್ ಪಡ್ತಾ ತೆಂ ಸಮ್ಜುನ್ ಅಸಲ್ಯೊ ಚಿಕಿತ್ಸಾ ಘೆಂವ್ಚೆ ಖಾತಿರ್‍ಚ್ ಜಾಯ್ತೊ ವಿದೇಶಿ ಲೋಕ್ ಆಮ್ಚ್ಯಾ ದಾರಾರ್ ಉಬೊ ಜಾಲಾ. ಮನ್ಶಾಚೆಂ ಜಿವಿತ್ ಆಜ್ ಹಜಾರ್ ದಬಾವಾಂನಿ ಭರ್ಲೆಲೆಂ ಜಾಲಾಂ ತೆ ಮಾತ್ರ್ ಸತ್. ಮಾನಸಿಕ್ ದಬಾವ್ ಅಧಿಕ್ ಜಾವ್ನ್ ಯೆಂವ್ಚ್ಯಾ ಹ್ಯಾ ಕಾಳಾರ್ ಕೌನ್ಸಿಲಿಂಗ್ ಸೆಂಟರಾಂಯ್ ವಾಡತ್ ಅಸಾತ್. ಮತಿಚ್ಯಾ ಪಿಡೆಂಕ್, ದಬಾವಾಂಕ್ ಧ್ಯಾನ್ ಖಂಡಿತ್ ಉಪ್ಕಾರ್ತಾ. ರೆತಿರೆ ಥಾವ್ನ್‍ಯಿ ಮತಿಚ್ಯಾ ಭಲಾಯ್ಕೆಚೆರ್ ಕಾಂಯ್ ಥೊಡೊ ಬರೊ ಪರಿಣಾಮ್ ಪಡ್ತಾ ಮ್ಹಣ್ಚ್ಯಾಂತ್ ದುಸ್ರೆಂ ಉತರ್ ನಾ. ರೆತಿರ್ ತಿ ಜಾಂವ್ ಕಾರಿಜ್ಮಾತಿಕ್ ವ ಅಕಾರಿಜ್ಮಾತಿಕ್, ಹಾಚೆ ಥಾವ್ನ್ ಮನ್ಶಾಚಾ ಮತಿಚೊ ದಬಾವ್ ಉಣೊ ಜಾಂವ್ಕ್ ಸಕ್ತಾ. ಸಂತೊಸ್ ಉಮಾಳ್ತಾ ಅನಿ ನವೊ ಜೀವ್ ಭರ್ತಾ.

ರೆತಿರೆ ಥಾವ್ನ್ ಮೆಳ್ಚೊ ಉಲ್ಲಾಸ್:

ಭುರ್ಗಿಂ ಕಿತ್ಯಾಕ್ ಕೆದಳಾಯ್ ಖುಶಾಲ್‍ಭರಿತ್ ಆಸ್ತಾತ್? ತಿಂ ಖೆಳ್ತಾತ್, ತಿ ಖೆಳಾಂತ್ ವ್ಯಸ್ತ್ ಆಸ್ತಾನಾ ತಾಂಕಾಂ ಪಳೆಯಾ. ಕಿತ್ಲಿಂ ಸಂತೊಸ್ಭರಿತ್ ತಿಂ, ಖಂಚ್ಯಾಚಿಚ್ ತಾಂಕಾಂ ಪರ್ವಾನಾ. ಪಡೊನ್ ಮಾರ್ ಜಾಲ್ಯಾರೀ ತಿ ದೂಕ್ ಘಡ್ಯೆನ್ ವಿಸ್ರತಾ, ಖೆಳ್ ಆಕೇರ್ ಜಾತಾ ಪರ್ಯಾಂತ್ ತಿಂ ಸುಶೆಗಾತ್ ಆಸ್ತಾತ್. ಪೂಣ್ ಖೆಳ್ ಅಕೇರ್ ಜಾಲ್ಲೆಂಚ್ ದೊಂಪಾರ್ ಮಿರ್ಮಿರೊಂಕ್ ಸುರು ಜಾತಾ. ಆಶೆಂಚ್, ರೆತಿರೆವೆಳಾ ಸಂಗೀತಾ ಸವೆಂ ಗಾಯ್ತಾನಾ, ತಾಳಿಯೊ ಪೆಟ್ತಾನಾ, ನಾಚ್ತಾನಾ, ಊಂಚ್ಲ್ಯಾ ತಾಳ್ಯಾನ್ ಉಲೆ ದಿತಾನಾ ಆಮ್ಚೆಂ ಗುಮಾನ್ ಆಮ್ಚ್ಯಾ ಪಿಡೆ ಥಾವ್ನ್ ಉಟ್ತಾ ಅನಿ ದೆವಾ ಥಂಯ್ ಪಾವ್ತಾ. ಮತಿಚೊ ಶಿರೊ ಸುಡಾಳಾಯೆನ್ ಕಾಮಾಕ್ ಲಾಗ್ತಾತ್. ಆಮಿ ರಿಲ್ಯಾಕ್ಸ್ ಜಾತಾಂವ್. ಥೊಡೊ ಸುಶೆಗ್ ಮೆಳ್ತಾ. ಅಶೆಂ ಮಾನಸಿಕ್ ಶಾಂತಿ, ಉಲ್ಲಾಸ್ ರೆತಿರೆ ಥಾವ್ನ್ ಮೆಳೊಂಕ್ ಪುರೊ. ಪೂಣ್ ಕುಡಿಚ್ಯೊ ಜಾಯ್ತ್ಯೊ ಪಿಡಾ ತಿತ್ಲೆ ಸಲೀಸಾಯೆನ್ ಗೂಣ್ ಜಾಯ್ನಾಂತ್. ಥೊಡೆ ಪಾವ್ಟಿಂ ರೆತಿರೆಕ್ ವಚೊನ್ ಗೂಣ್ ಜಾಲ್ಲಿ ದೂಕ್ ದೋನ್ ದಿಸಾಂನಿ ಪರತ್ ಉಬ್ಜಾತಾ. ತೆದಾಳಾ ಪರತ್ ರೆತಿರೆಕ್ ಧಾಂವ್ಣಿ!

ರೆತಿರೆಂತ್ ಆಜಾಪಾಂ ಘಡ್ತಾತ್?:

ಆಜಾಪಾಂ ಘಡ್ತಾತ್ ಮ್ಹಳ್ಳಿ ಸಂಗತ್ ಅಮಿ ನೆಗಾರ್ನಾಂವ್. ಆಜಾಪಾಂ ಘಡೊನ್ ಗೂಣ್ ಜಾವ್ನ್ ಸಾರ್ಕೆ ಸ್ಥಿತೆಕ್ ಪಾವ್‍ಲ್ಲಿಂ ಜಾಯ್ತಿಂ ಆಸಾತ್. ಪೂಣ್ ಗೂಣ್ ಜಾಯ್ನಾತ್‍ಲ್ಲಿ ಪಿಡಾ ಆಸಾ ತಶಿ ಸ್ವೀಕಾರ್ ಕರಿನಾಸ್ತಾಂ ಬಾರಾಯ್ ಮಯ್ನೆ ರೆತಿರೆಂಕ್ ವಚೊನ್ ಕಿತೆಂ ಫಾಯ್ದೊ? ಆಸಲ್ಯಾ ವಾಡಾವಳಿಕ್ ಕೋಣ್ ಕಾರಣ್ ಜಾಂವ್ಕ್ ಪುರೊ? ಥೊಡಿಂ ರೆತಿರೆ ವ್ಯಸನಿ ಜಾಯ್ಜೆ ತರ್ ಕಸಲಿಂ ಕಾರಣಾಂ ಆಸ್ತಿತ್?

• ಪಿಡೆ ವಿಶಿಂ ಸಾರ್ಕಿ ಸಮ್ಜಣಿ, ಶಿಕೊಣ್ ದೀನಾತ್‍ಲ್ಲಿಚ್ ಪಯ್ಲಿ ಸಲ್ವಣಿ.

• ಥೊಡ್ಯಾ ರೆತಿರೆಂನಿ ‘ಪಿಡಾ ಗೂಣ್ ಕರ್ಚೆಂ’ಚ್ ಪ್ರಮುಖ್ ಅಕರ್ಷಣ್ ಜಾವ್ನಾಸ್ತಾ.

• ಪಿಡೆಚೆ ಆಧ್ಯಾತ್ಮಿಕ್‍ಪಣಾ ವಿಶಿಂ ಪ್ರಸಂಗ್‍ದಾರ್ ಕೆದಿಂಚ್ ಉಲಯ್ನಾ. ಗೂಣ್ ಜಾಯ್ನಾತ್‍ಲ್ಲಿ ಪಿಡಾ ಮಾನುನ್ ಘೆವ್ನ್ ತೆ ಪಿಡೆ ಸಾಂಗಾತಾಚ್ ಅತ್ಮಿಕ್ ಜಿಣಿ ಉರ್ಜಿತ್ ಕರ್ಯೆತ್‍ಗೀ ಮ್ಹಳ್ಳೆವಿಶಿಂ ಪ್ರಸಂಗ್‍ದಾರಾಂನಿ ಉಲಂವ್ಚೆಂ ಉಣೆಂ.

• ಆಪುಣ್ ‘ಅಜಾಪಾಂಚೊ ಮನಿಸ್’ ಮ್ಹಣ್ ಪರ್ಗಟ್ ದಾಕಂವ್ಚೆ ಖಾತಿರ್ ರೆತಿರೆ ಮುಕೆಲ್ಯಾಂನಿ ಪ್ರಚಾರ್ ಆಪ್ಣಾಂವ್ಚೊಯ್ ಅಸ್ತಾ.

ತಾರಣ್ ಹಾಡ್ಚಿ ಪಿಡಾ:

ಪಿಡೆಶೆಡೆ ಥಾವ್ನ್ ಕೊಣೆಂಚ್ ಚುಕೊನ್ ಘೆಂವ್ಕ್ ಜಾಯ್ನಾ. ಪೂಣ್ ದೇವ್ ಕೊಣೆಂಚ್ ಅಸ್ವಸ್ಥ್‍ಪಣಿ ವಳ್ವಳ್ಚೆಂ ಆಶೆನಾ. ಜೆಜುನ್ ಜಾತಾ ತಿತ್ಲ್ಯಾ ಜಣಾಂಕ್ ಗೂಣ್ ಕೆಲೆಂ ಮ್ಹಣ್ ಜಾಯ್ತೆ ಕಡೆ ಬೈಬಲಾಂತ್ ವಾಚುಂಕ್ ಮೆಳ್ತಾ. ದೆವಾ ಮುಕಾರ್ ಮನ್ಶಾಚೊ ಹರೇಕ್ ದುಖಾ ಥೆಂಬೊ ಮೊಲಾಧಿಕ್. ಪಿಡಾ ಎಕಾ ಭಾವಾಡ್ತ್ಯಾಕ್ ತಾರಣ್ ಹಾಡುಂಕ್‍ಯಿ ಸಕ್ತಾ. ಅಪ್ಣೆಂ ಮೋಗ್ ಕರ್ತೆಲ್ಯಾಂಚೆರ್ ದೇವ್ ಜಾಯ್ತೆ ಕಷ್ಟ್ ಆನಿ ಪಿಡಾ ಧಾಡ್ತಾ. ತಾಚ್ಯಾ ಭಕ್ತಾಂಚೊ ವಿಶ್ವಾಸ್ ಪಾರ್ಕುಂಚೆ ಖಾತಿರ್, ಸೊಸ್ಣಿಕಾಯ್ ವಾಡಂವ್ಚೆ ಖಾತಿರ್, ಅಪೂರ್ಣ್ ವಿಶ್ವಾಸ್ ಸಂಪೂರ್ಣ್ ಕರ್ಚೆ ಖಾತಿರ್, ತಾಂಚೊ ಮೋಗ್ ಕಿತ್ಲೊ ತೊ ಪಾರ್ಕುಂಚೆ ಖಾತಿರ್ ದೇವ್ ಪಿಡಾ ಆನಿ ಸಂಕಷ್ಟ್ ಧಾಡ್ನ್ ಪರೀಕ್ಷಾ ಕರ್ತಾ. ಜೊಬಾಚ್ಯಾ ಜಿಣ್ಯೆಂತ್‍ಯಿ ಅಶೆಂಚ್ ಘಡ್ಲೆಂ. ಸಿರಾಖಾಚ್ಯಾ ಪುಸ್ತಕಾಂತ್ ಆಮಿ ವಾಚ್ತಾಂವ್, “... ಸರ್ವೆಸ್ಪರಾಚಿ ಸೆವಾ ಕರುಂಕ್ ತುಂ ಆಶೆತಾಯ್ ಜಾಲ್ಯಾರ್ ತಾಳ್ನೆಕ್ ತಯಾರ್ ರಾವ್... ಜೆಂ ಕಿತೆಂ ಸಗ್ಳೆಂ ತುಜೆರ್ ಯೆತಾ, ತಾಚೊ ಸ್ವೀಕಾರ್ ಕರ್, ತುಜ್ಯಾ ಕಷ್ಟಾಂತ್ ಸೊಸ್ಣಿಕ್ ಜಾ. ಕಿತ್ಯಾಕ್ ಭಾಂಗಾರ್ ಉಜ್ಯಾಂತ್ ಘಾಲುನ್ ತಪಾಸ್ತಾತ್ ತಶೆಂ ದೆವಾಕ್ ಮಾನ್ವತೆಲ್ಯಾ ಮನ್ಶಾಂಕ್ ಕಷ್ಟಾಂಚಾ ಅಗ್ಟ್ಯಾಂತ್ ಲಾಸ್ಚೆಂ ಪಡ್ತೆಲೆಂ’. (ಸಿರಾಖ್ 2: 1-5)

   ಅವಿಲಾಚ್ಯಾ ಸಾಂ.ತೆರೆಜಾನ್ ಜೆಜುಕ್ ಏಕ್ ಪಾವ್ಟಿಂ ವಿಚಾರ್ಲೆಂ, ‘ಕಿತ್ಯಾ ಜೆಜು ಮ್ಹಜೆರ್ ಇತ್ಲೆಯ್ ಕಷ್ಟ್, ವಿಘ್ನಾಂ ಧಾಡ್ತಾಯ್? ಹಿ ಪಿಡಾ ಹಾಂವೆಂ ಕಶೆಂ ಸೊಸ್ಚಿ? ಜೆಜುನ್ ಜಾಪ್ ದೀವ್ನ್ ಮ್ಹಳೆಂ, ‘ಹಾಂವೆಂ ಮೋಗ್ ಕರ್ತೆಲ್ಯಾಂಕ್ ಆಶೆಂಚ್ ಚಲಂವ್ಚೆಂ!” ತಕ್ಷಣ್ ತೆರೆಜಾನ್ ಜಾಪ್ ದಿಲಿ, “ದೆಕುನ್‍ಚ್ ಜಾಯ್ಜೆ, ತುಕಾ ಭೋವ್ ಉಣೆಂ ಮಿತ್ರ್ ಆಸಾತ್!”

   ಖಂಡಿತ್ ಜಾವ್ನ್ ಕಷ್ಟಾಂ ವಯ್ರ್ ಕಷ್ಟ್, ಪಿಡೆ ವಯ್ರ್ ಪಿಡಾ ಯೆತಾನಾ ಕೊಣೀ ದೆದೆಸ್ಪೊರ್ ಜಾತಾಚ್. ಹ್ಯಾ ವಗ್ತಾ ಕಿತೆಂ ಕರ್ಚೆಂ ಕಳನಾ. ಉದ್ಕಾ ಲೊಟಾಕ್ ಸಾಂಪಡ್ಲೆಲ್ಯಾ ಎಕ್ಲ್ಯಾಕ್ ಕಿತೆಂ ತರೀ ಸಾಂಪಡ್ಲ್ಯಾರ್ ಜೀವ್ ವಾಂಚ್ತಲೊ. ಅಸಲ್ಯಾ ಸಂಧಿಗ್ದ್ ಪರಿಸ್ಥಿತೆಂನಿ ರೆತಿರ್‍ಚ್ ಜೀವ್ ವಾಂಚಯ್ತಾ ಮ್ಹಣ್ ಚಿಂತ್ತಾಂವ್. ಗೂಣ್ ಜಾಂವ್ಚೆ ಖಾತಿರ್ ಕಿತ್ಲ್ಯಾ ರೆತಿರೆಂನಿ ಪಾತ್ರ್ ಘೆಂವ್ಕ್‍ಯಿ ತಯಾರ್ ಜಾತಾಂವ್. ಹ್ಯಾ ವರ್ವಿಂ ಆಮಿ ಕಿತೆಂ ಸಾಂಗೊಂಕ್ ಆಶೆತಾಂವ್? ಗೂಣ್ ಕರಿಜೆಚ್ ಮ್ಹಣ್ ದೆವಾಚೆರ್ ದಬಾವ್ ಘಾಲ್ತಾಂವ್? ಥೊಡ್ಯಾಂನಿ ದೆದೆಸ್ಪೊರ್ ಜಾವ್ನ್ ಮ್ಹಣ್ಚೆಂ ಆಸ್ತಾ, “ಮ್ಹಾಕಾ ವಳ್ವಳುಂಕ್ ಸೊಡಿನಾತ್ಲ್ಯಾರ್ ಪುರೊ, ಎಕ್‍ಚ್ ಪಾವ್ಟಿಂ ಉಕಲ್ನ್ ವೆಲ್ಯಾರ್ ಪುರೊ”. ಅಸಲೆಂ ಚಿಂತಪ್ ಸ್ವಾರ್ಥಿ ಚಿಂತಪ್ ನ್ಹಯ್‍ಗೀ? ದೆವಾಬಾಪಾಚೆ ಸಮ್ಜಣೆ ವಿಣೆಂ ಅಮ್ಚೆ ಥಂಯ್ ಘಡೊಂಕ್ ಸೊಡ್ಲಾಂ ತೆಂ ದೆವಾಚೆ ನದ್ರೆನ್ ತಾರಣಾಚೆಂ ಕೀರ್ಣ್‍ಯಿ ಜಾಂವ್ಕ್ ಪುರೊ. ಅಸಲಿ ದೆವಾಚಿ ಮಾಂಡಾವಳ್ ಸಮ್ಜುನ್ ಘೆನಾಸ್ತಾಂ ಪಾಂಚ್ ಹಜಾರ್ ಲೊಕಾಕ್ ವಾಡ್‍ಲ್ಲ್ಯಾ ದುಸ್ರ್ಯಾ ದಿಸಾ ಪರತ್ ತಸಲ್ಯಾ ಜೆವ್ಣಾಕ್ ಅಶೆವ್ನ್ ಜೆಜುಕ್ ಸೊಧುನ್ ಘೆಲ್ಲ್ಯಾ ಲೊಕಾ ಪರಿಂ ಬೆವಿಶ್ವಾಸಿ ಅನಿ ಕುರ್ಡಿಂ ಅಮಿ ಜಾಂವ್ಚೆಂ ನಾಕಾ.ಆಮ್ಚ್ಯಾ ಹರೇಕಾ ದುಕಾ ಥೆಂಬ್ಯಾಂಕ್ ದೇವ್ ಮೋಲ್ ದಿತಾ ಆನಿ ಗವ್ರವ್ ದಿತಾ. ತೆಂ ಸಮ್ಜುನ್ ಅಮ್ಚೆ ಖುರಿಸ್ ಖಾಂದಿ ಘೆವುನ್ ಜೆಜುಚೊ ಪಾಟ್ಲಾವ್ ಕರುಂಕ್ ಶಿಕುಯಾಂ. ತವಳ್ ಸರ್ಗಿಂಚೆಂ ತಾರಣ್ ಆಮಿ ಜೊಡ್ತೆಲ್ಯಾಂವ್.

ಆಶಿ ಏಕ್ ಜೀಣ್.. - ಕನ್ನಡ ಕಾಣಿ

ಆಶಿ ಏಕ್ ಜೀಣ್...

ಕನ್ನಡ್ ಮೂಳ್: ಎಚ್.ಕೆ. ಅನಂತರಾವ್

ಗೋಮುಚೆಂ ಜೀವನ್ ಯಂತ್ರಾಪರಿಂ ಚಲ್ತಾಲೆಂ. 

ಅಶಿಂಚ್ ತೀಸ್ ವರ್ಸಾಂ ಪಾಶಾರ್ ಜಾಲ್ಲಿಂ. ಅಪ್ಲಿಂ ಬಾಪಯ್ ಆವಯ್ ಕೋಣ್ ತೆಂ ತಾಕಾ ಕಳಿತ್ ನಾ. ತಾಕಾಚ್ ಕಿತ್ಯಾ, ತಾಚ್ಯಾ ಗಾಂವ್ಚಾಂಕೀ ಕಳಿತ್ ನಾತ್‍ಲ್ಲೆಂ. ಜಿಣೆಂ ಆಶೆಂಚ್ ಚಲ್ಲ್ಯಾರ್ ದೆಸಾಕ್ ಬರೆಂ ಮ್ಹಣ್ ಸರ್ಕಾರಾನ್ ನಿಚೆವ್ ಕೆಲ್ಲೊ. ‘ಆಸ್ತ್’ ಮ್ಹಳ್ಳೊ ಸಬ್ದ್ ಸರ್ಕಾರಾಕ್ ಮಾತ್ರ್ ಲಾಗು ಜಾತಾಲೊ. ಗೋಮುಖಿ ಸಯ್ತ್ ಸರ್ಕಾರಾಚಿ ‘ಆಸ್ತ್’.

‘ಮೋಗ್’ ಮ್ಹಳ್ಳೊ ಸಬ್ದ್ ಆನಿ ತಾಚಿಂ ಭೊಗ್ಣಾಂ ಲ್ಹಾನ್ಪಣಾರ್‍ಚ್ ತಾಚೆ ತಕ್ಲೆಂತ್ ಭರ್‍ಲ್ಲಿಂ ಸರ್ಕಾರಾನ್. ಗೋಮುಖಿ ದೆಸಾಚೊ ಖೂಬ್ ಮೋಗ್ ಕರ್ತಾಲೊ. ಮನ್ಶಾಂವಯ್ರ್, ಮನ್ಜಾತಿಂಚೆರ್, ಪ್ರಕೃತಿಚೆರ್ ಆಸಲಿಂ ಭೊಗ್ಣಾಂ ವಾಡಾನಾಶೆಂ ಪಯ್ಲೆಂಚ್ ಚತ್ರಾಯ್ ಘೆತ್‍ಲ್ಲಿ ಸರ್ಕಾರಾನ್.

ಗೋಮುಖಿಚಿ ಜೀಣ್ ಯಂತ್ರಾಪರಿಂ ಚಲ್ತಾಲಿ. ಸಕಾಳಿಂ ಪಾಂಚ್ ವೊರಾರ್ ಸಯ್ರಾನಾಚಾ ಆವಾಜಾಕ್ ಉಟ್ತಾಲೊ. ಧಾ ಮಿನುಟಾಂನಿ ನಿತಳ್ ಜಾವ್ನ್ ಖೆಳಾಂಗ್ಣಾಕ್ ಧಾಂವಾಜೆ. ತೆಂ ಚುಕಯಿಲ್ಲೆಪರಿಂ ನಾ. ಭಲಾಯ್ಕಿ ಬರಿ ನಾ ತರ್ ಎಕಾ ದಿಸಾ ಆದಿಂಚ್ ದಾಕ್ತೆರಾಚಿ ಚೀಟ್ ದಾಕವ್ನ್ ಪರ್ವಣ್ಗಿ ಮಾಗೊನ್ ಘೆಜೆ. ಕೂಡ್ ಪುರಾಸಾಣೆನ್ ಗಳ್ತಾಪರ್ಯಾಂತ್ ವ್ಯಾಯಾಮ್ ಕರ್ನ್ ಸ ವೊರಾಂಚೆರ್ ಪಾಟಿಂ ಯೆತಾಲೊ. ಖೆಳಾಂಗ್ಣಾಂತ್ ಜಾಯ್ತೆ ನಾಗರಿಕ್ ಜಮ್ತಾಲೆ. ಖೆಳ್ ಶಿವಾಯ್ ಹೆರ್ ಕಿತೆಂಯ್ ಥಂಯ್ ಉಲಂವ್ಚೆ ಪರಿಂ ನಾತ್‍ಲ್ಲೆಂ. ತೆ ವಿಶಿಂ ಉಲವ್ನ್ ಕಾಂಟಾಳೊ ಆಯಿಲ್ಲೆ ತೆ ಮಾವ್ನ್‍ಪಣಿಂ ಆಪಾಪ್ಲ್ಯಾ ವಾವ್ರಾಂತ್ ವೆಸ್ತ್ ಜಾತಾಲೆ.

ಸಾಡೆಸ ವೊರಾರ್ ಸಕಾಳಿಂಚ್ಯಾ ಫಳ್ಹಾರಾಚೊ ಸಯ್ರಾನ್. ಸಾಂಗಾತಾಚ್ ತೆ ಎಕಾ ಕುಡಾಂತ್ ಹಾಜರ್ ಜಾತಾಲೆ. ವ್ಹಡ್ ಜಯ್ತ್ ಜೆವ್ಣಾಚ್ಯಾ ಮೆಜಾ ಮುಕಾರ್ ಬಸ್‍ಲ್ಲ್ಯಾ ಶೆಂಬೊರ್ ನಾಗರಿಕಾಂ ಮಧೆಂ ಗೋಮುಖಿಕ್ ಸೊಧುನ್ ಕಾಡ್ಚೆಂ ಸೊಂಪೆಂ ಕಾಮ್ ನ್ಹಯ್. ಸಗ್ಳ್ಯಾಂಕ್ ಎಕಾಚ್ ಲೆಕಾಚೆ ಕಪ್ಡೆ. ಸಕ್ಡಾಂಚೆ ಹಾತ್ ಎಕ್‍ಚ್ ಪಾವ್ಟಿಂ ತೊಂಡಾಕ್ ಲಾವ್ನ್ ವಾಟ್ಲೆಕ್ ಯೆಂವ್ಚೆ ಪಳೆಲ್ಯಾರ್ ಹೆಂಯ್ ಎಕಾ ರಿತಿಚೆಂ ಪ್ರದರ್ಶನ್ ಕೊಣ್ಣಾ ಮ್ಹಳ್ಳೊ ದುಬಾವ್ ಯೇಂವ್ಕ್ ಆಸಾ.

ಸಾತ್ ವೊರಾಂಚ್ಯಾ ಸಯ್ರಾನಾ ಸವೆಂ ಲಾಗಿಂಚ್ ಆಸ್ಚ್ಯಾ ಕಾಮಾಥಳಾಕ್ ವ್ಹಚಾಜೆ. ದೇಸ್ ಉದ್ಧಾರ್ ಕರ್ಚ್ಯಾ ಯಂತ್ರಾಂ ಮಧೆಂ ಗೋಮುಖಿಕ್ ವೇಳ್ ಧಾಂವ್ಲೊಯ್ ಕಳಾನಾತ್ಲೊ. ತಾಚ್ಯೆ ಸಾಂಗಾತಾ ಕಾಮ್ ಕರ್ಚೆ ಹೆರ್ ನಾಗರಿಕ್ ಕಾಮೆಲಿ ಯಂತ್ರಾಚೊ ವಿಶಯ್ ಸೊಡ್ಲ್ಯಾರ್ ಹೆರ್ ಕಿತೆಂಚ್ ಉಲಯ್‍ನಾತ್ಲೆ. ಥಂಯ್ ತಸಲ್ಯಾಕ್  ಪುರಾ ಆಸ್ಪದ್‍ಚ್ ನಾತ್‍ಲ್ಲೊ.

ಎಕಾ ವೊರಾರ್ ಜೆವ್ಣಾಚೆಂ ಸಯ್ರಾನ್. ಸಕ್ಕಡ್ ಸುಡ್ಸುಡಿತ್ ಜಾವ್ನ್ ಜೆವ್ಣಾ ಸಾಲಾಕ್ ಪಾಂಯ್ ವೊಡ್ತಾಲೆ. ಶೆಂಬೊರ್ ತೊಂಡಾ ಎಕ್‍ಚ್ ಪಾವ್ಟಿಂ ಉಗಡ್ತಾತ್. ಎಕ್‍ಚ್ ಪಾವ್ಟಿಂ ಚಾಬ್ತಾತ್ ಆನಿ ಎಕ್‍ಚ್ ಪಾವ್ಟಿಂ ಕುಲೆರ್ ತೊಂಡಾಕ್ ಯೆತಾ. ಜೆವಾಣ್ ಜಾತಾ ಪರ್‍ಯಾಂತ್ ಗೋಮುಖಿಚಿ ದೀಷ್ಟ್ ವಾಟ್ಲೆವಯ್ಲಿ ಉಟನಾ, ಸಕ್ಕಡೀ ತಶೆಚ್.

ದೇಡ್ ವೊರಾರ್ ಪರತ್ ಸಯ್ರಾನ್, ಯಂತ್ರಾಂ ರಾಕ್ತಾತ್ ಮ್ಹಣ್ ಕಳಂವ್ಕ್. ಜೆವಾಣ್ ಜಾಲ್ಲೆಂಚ್ ಪೋಟ್ ಪೊಶೆವ್ನ್ ಸುಶೆಗ್ ಘೆಂವ್ಚೆಪರಿಂ ನಾ. ಶೀದಾ ಕಾಮಾಥಳಾಕ್. ಸಾಡೆಸ ಪರ್‍ಯಾಂತ್ ದೇಸ್ ಸೆವೆಚ್ಯಾ ಯಂತ್ರಾಂ ಮಧೆಂ ನಿರಂತರ್ ವಾವ್ರ್. ಪರತ್ ಸಯ್ರಾನ್. ಕಾಮಾಥಳಾ ಥಾವ್ನ್ ಥೊಡೆ ಸೊಜೆರಾಂಚ್ಯಾ ಶಿಕ್ಪಾ ಶಿಭಿರಾಕ್, ಥೊಡೆ ದೆಸಾನ್ ಜೊಡ್ಲ್ಯಾ ಪ್ರಗತೆಚ್ಯಾ ಶಿಕ್ಪಾಕ್, ಬಾಕಿಚೆ ಸರ್ಕಾರಾನ್ ಯೆವ್ಜಿಲ್ಲ್ಯಾ ವಿವಿಧ್ ಕಾಮಾಂಕ್.

ಸಂಸಾರಾಚ್ಯಾ ಸಗ್ಳ್ಯಾ ದೆಸಾಂಪಯ್ಕಿ ಆಪೆÇ್ಲ ದೇಸ್ ಭೋವ್ ಸಕ್ತೆವಂತ್ ಮ್ಹಣ್ ಗೋಮುಖಿಕ್ ಥೊಡ್ಯಾ ದಿಸಾ’ದಿಂಚ್ ಕಳಯಿಲ್ಲೆಂ. ಕಿಣಾಭಿತರ್ ಸಂಸಾರ್ ಸಗ್ಳೊ ನಾಸ್ ಕರ್ನ್ ಉಡಂವ್ಚಿ ಅಣುಸಕತ್ ಆಸ್‍ಲ್ಲ್ಯಾ ಆಪ್ಲ್ಯಾ ದೆಸಾವಿಶಿಂ ಗೋಮುಖಿಕ್ ಕಿತ್ಯಾಕ್‍ಗೀ ಅಭಿಮಾನ್ ನಾ. ಪಡ್ಡ್ಯಾವಯ್ರ್ ಆಪ್ಲ್ಯಾ ದೆಸಾಲಾಗಿಂ ಆಸ್ಚಿಂ ಮಾರಕ್ ಆಯ್ದಾಂ ತಾಣೆಂ ಚೊಯಿಲ್ಲಿಂ. ಕಾಮಾಥಳಾಂತ್ ಆಪ್ಣೆಂ ತಯಾರ್ ಕೆಲ್ಲಿಂ ಅಯ್ದಾಂ ಪಡ್ದ್ಯಾವಯ್ರ್ ಪಳೆತಾನಾ ಲಜ್ ಬೊಗ್‍ಲ್ಲಿ.

ಸ ಮ್ಹಯ್‍ನ್ಯಾಚಿ ಸೊಜೆರಾ ತರ್ಬೆತಿ ಮೆಳ್‍ಲ್ಲ್ಯಾ ತಾಕಾ ಮಾರಕ್ ಆಯ್ದಾಂ ವಾಪಾರುಂಚಿ ವಿಧಾನಾಂ ಸರ್ಕಾರಾನ್ ಶಿಕಯಿಲ್ಲಿಂ. ದೇಸ್ ಪ್ರಗತೆಚ್ಯಾ ಶಿಕ್ಶಕಾಚೆಂ ಭಾಶಣ್ ಗುಮಾನ್ ದೀವ್ನ್ ಅಯ್ಕಾಜೆ. ತೊ ಮಧೆಂ-ಮಧೆಂಚ್ ಸವಲಾಂ ಘಾಲ್ತಾ. ಗೋಮುಖಿನ್ ಏಕ್ ಪಾವ್ಟಿಂಯ್ ಚೂಕ್ ಜಾಪ್ ದಿಲ್ಲಿನಾ. ಕಿತ್ಯಾ, ತೊ ತ್ಯಾ ಭಾಶಣಾಕ್ ಗುಮಾನ್ ದೀವ್ನ್ ಆಯ್ಕಾತಾಲೊ.

ಸಾಡೆಆಟಾಂಕ್ ಏಕ್ ಸಯ್ರಾನ್. ಏಕ್ ಗೊಬ್ಳೊ ಸೊರ್ಯಾಸಂಗಿಂ ರಾತಿಚೆಂ ಜೆವಾಣ್. ವೀಜ್ ದಿವ್ಯಾಚ್ಯಾ ಮಂದ್ ಉಜ್ವಾಡಾಂತ್ ಹೆಂ ಚೊಯ್ಲ್ಯಾರ್ ಯಂತ್ರಾಂ ಜೆವಾಣ್ ಕರ್ತಾತ್‍ಗಾಯ್ ಮ್ಹಳ್ಳೊ ದುಬಾವ್ ಉಟ್ತಾಲೊ.

ದಿಸಾಚೆಂ ಅಕ್ರೇಚೆಂ ಸಯ್ರಾನ್ ರಾತಿಂ ನೋವ್ ವೊರಾಂಚೆರ್. ತೊ ಸಕ್ಡಾಂಕ್ ನಿದೊಂಕ್ ಆದೇಶ್. ಪಂದ್ರಾಚ್ ಮಿನುಟಾಂನಿ ದಾಟ್ಟ್ ಕಾಳೊಕ್. ಗೋಮುಖಿಕ್ ವೋಚ್‍ಮೆನಾಚ್ಯಾ ಟೊರ್ಚಾಚೊ ಉಜ್ವಾಡ್ ದಿಸ್ತಾ ತವಳ್ತವಳ್. ಪುರಾಸಾಣೆನ್ ಪಿಟೊ ಜಾಲ್ಲೆ ಕುಡಿಕ್ ನೀದ್ ವೆಗಿಂಚ್ ಗ್ರಾಸಿತಾ.

ಎಕೇಕ್ ದೀಸ್ ಪುರಾಸಣ್ ಜಾಲ್ಯಾರ್‍ಯಿ ಗೋಮುಖಿಕ್ ವೆಗ್ಗಿಂ ನೀದ್ ಯೇನಾ. ಚಾರ್ ದೀಸ್ ಆಪ್ಣಾಸಂಗಿಂ ಮಾಂದ್ರಿ ವಾಂಟುನ್ ಘೆತ್‍ಲ್ಲ್ಯಾ ಸೌಮ್ಯಾಚಿ ಯಾದ್ ಯೆತಾ. ತಾಕಾ ನಿಯಾಳ್ಚೊ ಆಪ್ರಾದ್ ಮ್ಹಣ್ ಜಾಣಾಸೊನೀ ಗೋಮುಖಿ ಲಾಚಾರ್. ಆಪ್ಣಾಸಂಗಿಂ ನಿದ್‍ಲ್ಲ್ಯಾ ಕೊಣಾಕೀ ಭುರ್ಗಿಂ ಜಾಲ್ಯಾಂತ್‍ಗಾಯ್ ಮ್ಹಣ್ ಚಿಂತ್ತಾ. ಕಿತ್ಲಿಂ ತರ್ನಿಂ ಚೆಡ್ವಾಂ ಆಪ್ಣಾಸಂಗಿಂ ನಿದ್ಲಿಂ ಹಾಬಾ ಮ್ಹಣ್ ಲೇಕ್ ಘಾಲುಂಕ್ ವ್ಹಚೊನ್ ಸಲ್ವತಾ. ದೊಳೆ ಬಳಾನ್ ದಾಂಪುನ್ ತಾಂಚಿಂ ರುಪಾಂ ವ್ಹಳ್ಕೊಂಕ್ ಸಕನ್‍ಗಿ ಮ್ಹಣ್ ಪಳೆತಾ. ಸೌಮ್ಯಾ ಶಿವಾಯ್ ಹೆರ್ ವದನಾಂ ವಿಸ್ರಾಲ್ಲೆಂ ತಾಕಾ ಗಮ್ತಾ.

ಸರ್ಕಾರಾನ್ ನಾಗರಿಕಾಂಚಿ ಲಂಯ್ಗಿಕ್ ವೊಡ್ನಿ ಥಾಂಬಂವ್ಚಿ ಜವಾಬ್ದಾರಿಯಿ ಆಪ್ಣಾಯ್ಲ್ಯಾ. ಹರ್ ಮ್ಹಯ್‍ನ್ಯಾಂತ್ ಚಾರ್ ದಿಸಾಂ ಖಾತಿರ್ ದಾದ್ಲ್ಯಾಕ್ ಸ್ತ್ರಿಯೆಚೊ, ಸ್ತ್ರಿಯೆಕ್ ದಾದ್ಲ್ಯಾಚೊ ಸಾಂಗಾತ್ ಮೆಳ್ತಾಲೊ. ಕೊಣಾಕ್ ಕೋಣ್ ಮ್ಹಳೆಂಯ್ ಸರ್ಕಾರಾಚೆಂ ತಿರ್ಮಾನ್. ಜಾಯ್ ಜಾಲ್ಲ್ಯಾಂಕ್ ವಿಂಚುನ್ ಕಾಡ್ಚೊ ಅಧಿಕಾರ್ ನಾಗರಿಕಾಂಕ್ ನಾ.

ಮಾಂದ್ರೆರ್‍ಯಿ ದಾದ್ಲೆ-ಸ್ತ್ರಿ ಯಂತ್ರಾಪರಿಂ ಚಲ್ತಾಲಿಂ, ಪೂಣ್ ಸೌಮ್ಯಾ ಗೋಮುಖಿಕಡೆ ಗಪ್ಪೆ ಮಾರ್ತಾಲೆಂ. ಗೋಮುಖಿಕ್ ಭೈಂ ದಿಸ್‍ಲ್ಲೆಂ. ಹೆಂ ಸರ್ಕಾರಾಕ್ ಕಳ್ಳ್ಯಾರ್ ಕಠೀಣ್ ಶಿಕ್ಶೆಕ್ ವ್ಹಳಗ್ ಜಾಯ್ಜೆ ಆಸ್‍ಲ್ಲೆಂ. ಕೋಣ್ ಗುಪ್ತ್ ದಳಾಚೆ ಮ್ಹಣ್ ಸಾಂಗೊಂಕ್ ಕಷ್ಟ್. ಕಾಮಾಥಳಾಕ್ ಕಿತೆಂಗಿ ಉಲಂವ್ಕ್ ಲಾಗ್‍ಲ್ಲ್ಯಾ ಬಾಳ್ಯಾಕ್ ತಾಣೆಂಚ್ ಧರ್‍ಲ್ಲೊ. ತಾಕಾ ಪಾಶಿ ದಿಲಿ ಮ್ಹಣ್ ಕೊಣೆಂಗಿ ಗೋಮುಖಿಚೆ ಕಾನ್ ಫುಂಕ್‍ಲ್ಲೆ.

ಆಪುಣ್ ಪ್ರಾಮಾಣಿಕ್ ನಾಗರಿಕ್. ಹೆಂ ಸರ್ಕಾರಾಚಾ ಗುಮಾನಾಕ್‍ಯಿ ಗೆಲ್ಲೆಂ. ಸರ್ಕಾರಾಚಿ ಶಾಭಾಸ್ಕಿ ಜೊಡ್‍ಲ್ಲ್ಯಾ ಆಪ್ಣಾಕ್ ಗುಪ್ತ್ ದಳಾಚೆ ಕಾಂಯ್ ಕರ್ಚೆನಾಂತ್.

ಸೌಮ್ಯಾಚಿ ಯಾದ್ ಯೆತಾನಾ ತಾಕಾ ಭೈಂಯಿ ದಿಸ್ತಾ. ತಾಣೆಂ ಮೊವಾಳಾಯೆನ್ ಆಂಗಾರ್ ಹಾತ್ ಚರಯಿಲ್ಲೆಂ ದೃಶ್ಯ್ ಮತಿಂ ನಿಯಾಳ್ತಾನಾ ಆಂಗಾರ್ ಹಿಂವ್ ಲಾಗ್ತಾ. ತಾಚೆ ಸಾಂಗಾತಾ ಸಾರ್‍ಲ್ಲ್ಯೊ ಚಾರ್ ರಾತಿಚ್ ಖರೆಪಣಿಂ ಜಿಯೆಲ್ಲಿಂ ಭೊಗ್ಣಾಂ ಉದೆವ್ನ್ ಜೀಣ್ ಸುಫಳ್ ಜಾಲಿ ಮ್ಹಣ್ ದಿಸ್ತಾ.

ಅರ್ದ್ಯಾ ನಿದೆಂತ್ ಸಪಣ್ ದೆಕ್ತಾ ಗೋಮುಖಿ. ಸೌಮ್ಯಾಚಾ ಉಸ್ಕ್ಯಾರ್ ತಕ್ಲಿ ದವರ್ನ್ ನಿದ್ಲಾ. ತೆಂ ಕೆಸಾಂನಿ ಬೊಟಾಂ ಚರಯಿತ್ ಕಿತೆಂ-ಕಿತೆಂ ಉಲಯ್ತ್ ಆಸಾ. ದೊಳೆ ಸೊಡ್ತಾ. ಪಾಂಚ್ ವರ್ಸಾಚೆಂ ಸೊಭಿತ್ತ್ ಭುರ್ಗೆಂ ರಡತ್ ಯೆತಾ. ಸೌಮ್ಯಾ ಮ್ಹಣ್ತಾ, “ಆಮ್ಚೆಂ ಭುರ್ಗೆಂ”.

ಉಕಲ್ನ್ ಘೆವ್ನ್ ಸಯ್ಲಾಪ್ ಕರುಂಕ್ ಹಾತ್ ವಿಸ್ತಾರ್ತಾ. ರಡ್ಣ್ಯಾ ಮಧೆಂ ಸಾಂಗ್ತಾ ಭುರ್ಗೆಂ, “ಆಮ್ಚೊ, ಸಗ್ಳ್ಯಾ ಸಂಸಾರಾಂತ್ ಸಕ್ಡಾಂ  ಪಯ್ಕಿ ಸಕ್ತೆವಂತ್ ದೇಸ್”.

ಸವ್ಕಾಸ್ ಭುರ್ಗ್ಯಾಚೆಂ ರಡ್ಣೆಂ ಮಾಯಾಗ್ ಜಾವ್ನ್ ಬಾಳ್ಯಾ ದಿಸೊನ್ ಯೆತಾ. ಘಾಬ್ರೆವ್ನ್ ಉಟ್ತಾ ಗೋಮುಖಿ. ಸಯ್ರಾನ್ ಆವಾಜ್ಚೆಂ ಆಯ್ಕಾತಾ.

ಟೊಯ್ಲೆಟಾ ತೆವ್ಶಿಂ ಮೆಟಾಂ ಕಾಡ್ತಾನಾ ಗೋಮುಖಿಕ್ ದೋಗ್ ಆಡಯ್ತಾತ್, “ಆಮಿ ಗುಪ್ತ್ ದಳಾಚೆ ಪೊಲಿಸ್. ಆವಾಜ್ ಕಾಡಿನಾಸ್ತಾಂ ಬರಾಬರ್ ಚಲ್”.

ಭಿಂಯಾನ್ ಭಿತರ್ಲೆಂ ವಸ್ತುರ್ ಭಿಜಯ್ತಾ ಗೋಮುಖಿ. “ಹಾ... ಹಾಂವೆ ಕೆಲ್ಲೊ ಆಪ್ರಾದ್ ಕಸಲೊ?”

“ತುವೆಂ ದೆಕ್‍ಲ್ಲೆಂ ಸಪಣ್ ದೆಸಾಕ್, ಸರ್ಕಾರಾಕ್ ಮಾರೆಕಾರ್.. ಚಲ್ ಬರಾಬರ್.”

ಹರ್ ಎಕ್ಲ್ಯಾಚ್ಯಾ ತಕ್ಲೆಪಂದಾ ಸಪ್ಣಾಂ ಪಿಂತ್ರಾಂವ್ಚೆಂ ಯಂತ್ರ್ ಆಸ್ತಾ ಮ್ಹಳ್ಳೆಂ ಹ್ಯಾ ನಾಗರಿಕಾಂಕ್ ಕಳಿತ್ ನಾ. 

ಜಯ್ಲಾ ತೆವ್ಶಿಂ ಮೆಟಾಂ ಕಾಡ್ತಾ ಗೋಮುಖಿ.

                                

  ಕೊಂಕ್ಣೆಕ್: ಜೊ.ಸಿ.ಸಿದ್ಧಕಟ್ಟೆ.

ನಾಟ್ಕುಳೊ:

ಫಟ್ ಸಾಕ್ಸ್

ಪಯ್ಲೆಂ ದೃಶ್ಯ್

ಅಂತೊನ್: ಅರೆರೆ... ವಿನ್ಸಿ, ಕಿತೆಂರೆ ಬಾರೀ ಅಪ್ರೂಪ್. ಕಿತ್ಲೆ ದೀಸ್ ಜಾಲೆರೆ ತುಕಾ ಮೆಳ್ನಾಸ್ತಾಂ?

ವಿನ್ಸಿ     : ವ್ಹಯ್ ಅಂತೊನಾಮಾ, ಭೊಂವೊನ್ ಭೊಂವೊನ್ ಪುರೊ ಜಾಲೆಂ... ಪಿಶ್ಯಾ ಸುಣ್ಯಾ ಪರಿಂ ಭೊಂವ್ಲೊಂ ತರೀ ಕಾಂಯ್ ಫಾಯ್ದೊನಾ.

ಅಂತೊನ್: ಓಹೋ... ಕಾಮಾಕ್ ಅರ್ಜಿ ಘಾಲ್ನ್ ಆಸಾಯ್‍ಗಿ? ಕಿತ್ಲೆ ಇಂಟರ್‍ವ್ಯೂ ಜಾಲೆ?
ವಿನ್ಸಿ     : ಇಂಟರ್‍ವ್ಯೂ ನ್ಹಯ್ ಅಂತೊನಾಮಾ

ಅಂತೊನ್: ಮಾಗಿರ್ ಕಾಲೆಂರೆ? ಕಾಮಾಖಾತಿರ್ ಭೊಂವೊನ್ ದೊಂಪ್ರಾ ಘಾಂಟಿ ಜರಂವ್ಚಿ ಪ್ರಾಯ್‍ನೆ ತುಜಿ?

ವಿನ್ಸಿ     : ಛೆಕ್. ಮ್ಹಾಕಾ ಖಂಚ್ಯಾ ಆಫಿಸಾಂತ್ಲೆಂ ಕಾಮ್ ಮೆಳ್ತಾ ಮ್ಹಣ್ ಕಾಮಾಕ್ ಅರ್ಜಿ ಘಾಲ್ಚಿ ಹಾಂವೆಂ?

ಅಂತೊನ್: ಕಿತ್ಯಾರೆ? ತರ್ನಾಟೊನೇ ತುಂ.. ಹಾತ್ ಪಾಂಯಾಂನಿ ಬಳ್ ನಾಂಗಿ ಕಾಮ್ ಕರುಂಕ್?

ವಿನ್ಸಿ     : ತೆಂ ಸಗ್ಳೆಂ ಆಸಾಮೂ... ಹಾಂವ್ ಕಾಮ್ ನ್ಹಯ್, ಚೆಡುಂ ಸೊಧುನ್ ಆಸಾಂ.

ಅಂತೊನ್: ಓಹೋ... ತಶೆಂ ಮ್ಹಣ್. ಸೆಲ್ಫ್ ಎಂಪ್ಲೊಯ್‍ಮೆಂಟ್! ವೆರ್ರಿ ಗುಡ್, ವೆರ್ರಿ ಗುಡ್, ತುಂ ಸಯ್ರಿಕ್ಯೊ   ಕರುಂನ್ ಥಕ್ಲ್ಯೊಯ್‍ಗಿ. ಆತಾಂಚ್ಯಾ ತರ್ನಾಟ್ಯಾಂನಿ ತುಜೆಥಾವ್ನ್ ಶಿಕಾಜೆ, ಆತಾಂ ಪೂರಾ ಉಟ್‍ಲ್ಲಾಬಸ್‍ಲ್ಲ್ಯಾಂಕ್ ಘೊಳೊಂಕ್ ಭಾಯ್ಲ್ಯಾ ಗಾಂವಾಕ್ ಧಾಂವ್ತಾತ್. ಗಾಂವಾಂತ್ ರಾವೊನ್ ಆಮ್ಚ್ಯಾ ತನ್ರ್ಯಾಟ್ಯಾಂನಿ ಸ್ವಂತ್ ಬಿಜ್ನೆಸ್ ಕರುಂಕ್ ಶಿಕಾಜೆ... ವೆರ್ರಿಗುಡ್ (ಪಾಟ್ ಥಾಪುಡ್ತಾ)

ವಿನ್ಸಿ     : ಛೆಛೆ... ಖಂಚೆ ಸೆಲ್ಫ್ ಎಂಪ್ಲೊಯ್‍ಮೆಂಟ್ ಆಂತೊನಾಮಾ. ಹಾಂವ್ ಸಯ್ರಿಕ್ ಸೊದ್ತಾಂ ಮ್ಹಳ್ಳೆಂ ಮ್ಹಾಕಾಚ್.

ಅಂತೊನ್: ಓ! ಪಯ್ಲೆಂಚ್ ಸಾಂಗುಂಕ್ ಜಾಯ್ನಾಯೆರೆ... ತುಕಾ ಭೆಶ್ಟೆಂ ಫುಗಾರ್ಲೆಂ ಹಾಂವೆಂ, ಆತಾಂ ತುಂ ಕಾಜಾರ್ ಜಾಂವ್ಕ್ ಭಾಯ್ರ್ ಸರ್ಲಾಯ್‍ಗೀ?

ವಿನ್ಸಿ     : ವ್ಹಯ್ ಆಂತೊನಾಮಾ, ಚೆಡುಂಚ್ ಮೆಳಾನಾ.

ಅಂತೊನ್: ಅರೆ, ತೆಂ ಕಶೆಂ ಜಾಂವ್ಚೆಂ? ಆಸಲ್ಯಾ ಪುಡ್ಪುಡಿತ್ ಚೆಡ್ಯಾಕ್ ಸಗ್ಳ್ಯಾ ಮಂಗ್ಳುರಾಂತ್ ಚೆಡುಂ ಮೆಳಾನಾ ಮ್ಹಳ್ಯಾರ್..?

ವಿನ್ಸಿ     : ಎದೊಳ್ ಸಾತ್-ಆಟ್ ಕಡೆ ಗೆಲೊಂ ಆಂತೊನಾಮಾ. ಚೆಡ್ವಾಂ ಪುರಾ ಚಡ್ ಶಿಕ್ಲ್ಯಾಂತ್, ಎಕ್ಲೆಂ ಎಮ್.ಬಿ.ಬಿ.ಎಸ್ ಖಂಯ್, ಆನ್ಯೆಕ್ಲೆಂ ಎಮ್‍ಬಿಎ ಖಂಯ್, ಆನ್ಯೆಕ್ಲೆಂ.. ಇಂಜಿನಿಯರ್ ಖಂಯ್...

ಅಂತೊನ್: ನ್ಹಯ್, ಹ್ಯಾ ಚೆಡ್ವಾಂನಿ ಕಾಲೆಂ ಚೆಡ್ಯಾಕಡೆ ಕಾಜಾರ್ ಜಾಂವ್ಚೆಂಗಿ ನ್ಹಯ್ ಡಿಗ್ರ್ಯಾಂಕಡೆ ಕಾಜಾರ್ ಜಾಂವ್ಚೆಂ? ಸಾಂಗ್‍ಲ್ಲೆಪರಿಂ, ತುಂ ಕಿತ್ಲೆಂ ಶಿಕ್ಲಾಯ್‍ರೆ?

ವಿನ್ಸಿ     : ಧಾವೆಂತ್ ಲಾಸ್ಟ್ ಕ್ಲಾಸ್ ಪಾಸ್!

ಅಂತೊನ್: ಹ್ಹಹ್ಹಹ್ಹ... ತುಜಿ ಜಾಲ್ಲಿ ಧಾವಿ ಮಾತ್ರ್‍ಗಿ? ಧಾವಿ ಸೊಡ್ತಾನಾ ಮುಕಾರ್ ಕಾಜಾರ್ ಜಾಂವ್ಕ್ ಆಸಾ ಮ್ಹಣ್ ಗೊತ್ತುನಾತ್ಲೆಂಯೆರೆ? ಕಾಜಾರ್ ಜಾತಾನಾ ಚೆಡ್ವಾಂ ಡಿಗ್ರಿ ವಿಚಾರ್ತಾತ್ ಮ್ಹಣ್ ಗೊತ್ತುನಾತ್ಲೆಂಯೆರೆ. ಸೊಡ್‍ಯಾಂ, ತವಳ್‍ಚ್ ಏಕ್ ಲವ್ವ್ ಗಿವ್ವ್ ಮ್ಹಣ್ ಕೆಲ್ಲೊಯ್ ಜಾಲ್ಯಾರ್... ಯೆದೊಳ್ ಕಾಜಾರ್ ಸುಲಾಭಾಯೆನ್ ಜಾತೆಂ... ನಾಲಾಯಕ್ ಖಂಚೊ!

ವಿನ್ಸಿ     : ತಶೆಂ ಮ್ಹಣಾನಾಕಾ ಅಂತೊನಾಮಾ, ಕಿತೆಂ ಪುಣೀ ಕರ್ನ್ ಏಕ್ ಚೆಡುಂ ಪಳೆನೆ.

ಅಂತೊನ್: ತುಕಾ ಆತಾಂ ಖಂಚೆಂರೆ ಚೆಡುಂ. ಶಿಕಾಪ್ ಉಣೆಂ ಆಸಾ, ಕಾಮ್‍ಯಿ ನಾ ಮ್ಹಣ್ತಾಯ್..

ವಿನ್ಸಿ     : ಕಾಜಾರಾಂ ಸರ್ಗಾರ್ ಬರವ್ನ್ ಘಾಲ್ಯಾಂತ್ ಮ್ಹಣ್ತಾತ್‍ನೇ 

ಅಂತೊನಾಮಾ. ಮ್ಹಜ್ಯಾ ವಾಂಟ್ಯಾಚೆಂ ಚೆಡುಂ ಆಸ್ತೆಲೆಂಚ್‍ನೆ?

ಅಂತೊನ್: ವ್ಹಯ್ ಹಾಬಾ, ಸರ್ಗಾರ್ ಬರವ್ನ್ ಘಾಲ್ಲೆಂ ತ್ಯಾ ಚೆಡ್ವಾನ್‍ಚ್ ಪುಸುನ್ ಕಾಡ್ಲಾಂ ಆಸ್ತೆಲೆಂ. ತ್ಯಾ ಶಿವಾಯ್ ಮ್ಹಜ್ಯಾ ಪಾಟಿಕ್ ಕಿತ್ಯಾ ಲಾಗ್ತಾಯ್? ತುಕಾ ಕೊಣಾಸಾಂಗಾತಾ ಜಾತಾ ಮ್ಹಣ್ ಬರಯಿಲ್ಲೆಂ ಮ್ಹಾಕಾ ಕಾಂಯ್ ಸಾಂ. ಪೆದ್ರುನ್ ಸಾಂಗ್ಲಾಂಗಿ?

ವಿನ್ಸಿ     : ತುಂ ಆಮ್ಚ್ಯಾ ವಾಡ್ಯಾಚೊ ಗುರ್ಕಾರ್‍ನೆ... ತುಜ್ಯಾ ವಾಡ್ಯಾಂತ್ಲ್ಯಾಂನಿ ಕಶ್ಟಾತಾನಾ ತುಕಾ ಬರೆಂ ಲಾಗ್ತಾಗಿ?

ಅಂತೊನ್: ಅಳೆಳೆ... ಆಂ ತಶೆಂ... ಇಮೋಶನಲ್ ಬ್ಲ್ಯಾಕ್‍ಮೇಲ್ ಕರಿನಾಕಾ... ಹಾಂವ್ ಪಯ್ಲೆಂಚ್ ಖಾಲ್ತ್ಯಾ ಆನಿ ಬೊಳ್ಯಾ ಕಾಳ್ಜಾಚೊ...ಕಾಳಿಜ್ ವೆಗ್ಗಿಂ ಮೆಳ್ಟ್ ಜಾತಾ ಮ್ಹಜೆಂ.

ವಿನ್ಸಿ     : ಏಕ್ ಕಾಜಾರ್ ಕರಯ್ ಆಂತೊನಾಮಾ... ಮಾಗಿರ್ ಪುರಾ ಹಾಂವ್ ಪಳೆತಾಂ.

ಅಂತೊನ್: ಹಾಂ... ಸಮಾ, ತೆಂ ಸಮಾ. ಏಕ್ ಕಾಮ್ ಕರ್‍ರೆ.

ವಿನ್ಸಿ     : ಕಿತೆಂ, ಸಾಂಗ್ ಆಂತೊನಾಮಾ.

ಅಂತೊನ್: ಏಕ್ ವಿಧವ್ ಚೆಡುಂ ಆಸಾ... ಗುಣಾನ್ ಬರೆಂಚ್, ರೂಪಾನ್‍ಯಿ ಸೊಭಿತ್, ತುಂಚ್ ಕಾಜಾರ್ ಜಾ. ಎಕಾ ವಿಧವ್ ಚೆಡ್ವಾಕ್ ಜಿವಿತ್ ದಿಲ್ಲೆಂ ಪೂನ್ ಮೆಳ್ತೆಲೆಂ ತುಕಾ. ತ್ಯಾ ಶಿವಾಯ್ ‘ರಾಕ್ಣ್ಯಾರ್’ ತುಜೆವಿಶಿಂ ಶಾಭಾಸ್ಕಿ ಪಾಟವ್ನ್ ಏಕ್ ತುಮ್ಚಿ ಫೋಟೊ ಘಾಲಾವ್ಯಾಂ.

ವಿನ್ಸಿ     : ಅಳೆ ಆಂತೊನಾಮಾ, ಮ್ಹಾಕಾ ತಿತ್ಲೆಂ ಸಸಾರ್ ಕರಿನಾಕಾ ಹಾಂ... ವಿಧವ್ ಚೆಡ್ವಾಕಡೆ ಹಾಂವೆಂ ಕಿತ್ಯಾ ಜಾಯ್ಜೆ. ದುಸ್ರೆಂ ಕೊಣೀ ಆಸ್ಲ್ಯಾರ್ ಸಾಂಗ್‍ನೆ...
ಅಂತೊನ್: ತೆಂ ನಾಕಾ ಜಾಲ್ಯಾರ್... ತುಂ ಆಮೆರಿಕಾ ವ್ಹಚಾಜೆ.

ವಿನ್ಸಿ     : ಕಿತ್ಯಾ?

ಅಂತೊನ್: ಥಂಯ್ ಚೆಡ್ಯಾ-ಚೆಡ್ಯಾ ಮಧೆಂ ಕಾಜಾರ್ ಜಾತಾ ಖಂಯ್...

ವಿನ್ಸಿ     : ಛೆಕ್ಕ್... ತೆಂ ನಾಕಾ...

ಅಂತೊನ್: ಆನಿ ಕಿತೆಂರೆ? ತುಕಾ ಮಾಗಿರ್ ಚೆಡುಂ ಕೋಣ್ ದಿತಾ? ಶಿಕ್ತಾನಾ ಶಿಕೊಂಕ್ ಕಿತೆಂ ಮಾಂಡೆಂ ಮಾರ್?

ವಿನ್ಸಿ     : ಕಾಂಯ್ ಪುಣೀ ಕರ್‍ನೆ... ಆಂತೊನಾಮಾ.

ಅಂತೊನ್: (ಚಿಂತ್ತಾ) ಓಕೆ. ತರ್ ಆಯ್ಕ್ ಮಾಲ್ಗಡ್ಯಾಂನಿ ಮ್ಹಳಾಂ, ಹಜಾರ್ ಫಟಿ ಮಾರ್ನ್ ಪುಣೀ ಏಕ್ ಕಾಜಾರ್ ಕರ್... (ತಿತ್ಲ್ಯಾರ್ ಫೆಲಿಸ್ ಯೆತಾ... ಇಲ್ಲೊ ಪಿಯೆಲಾ)

ಫೆಲಿಸ್   : ಹಜಾರ್ ಆನಿ ಏಕ್ ಫಟ್ ಮಾರ್ನ್ ಪುಣೀ ಕಾಜಾರ್ ಜಾಯ್ಜೆ ಆಂತೊನಾಮಾ.

ವಿನ್ಸಿ     : ಓಹೋ... ಫೆಲಿಸಾಮ್ ಕಿತೆಂ ಆಜ್ ಬಸ್ಸ್ ಫುಲ್ಲ್ ಲೋಡ್ ಜಾಲ್ಲೆಪರಿಂ ದಿಸ್ತಾ.

ಫೆಲಿಸ್   : ವಯ್‍ರೆ, ಇಸ್ಕೊಲ್ ಸೊಡ್ಚೊ ವೇಳ್‍ನೆ... ಬಸ್ಸ್ ಫುಲ್ಲ್ ಲೋಡ್... ಕೊಣೆಂಗೀ ಮ್ಹಜೊ ಪಾಂಯ್ ಗುಡ್ಡಾಯ್ಲೊ... ಆತಾಂ ಪಳೆತಾನಾ ಏಕ್ ವ್ಹಾಣ್‍ಚ್ ನಾ... ದೆಕುನ್ ಪಾಂಯ್ ವೊಡ್ನ್ ಚಲ್ತೆಂ ಆಸಾಂ.

ಅಂತೊನ್: ಪಿಯೆಲ್ಲೆ, ಆಪುಣ್ ಪಿಯೆಲಾಂ ಮ್ಹಣ್ ಕೆದ್ನಾಂಯ್ ಸಾಂಗಾನಾಂತ್ ಪಳೆಯಾ... ಹ್ಹಹ್ಹಹ್ಹ

ಫೆಲಿಸ್  : ಹೋ... ತುಂ ಅಂತೊನಾಮ್… ನಮಸ್ಕಾರ್ ಗುರ್ಕಾರಾಮಾ... ಮಾರ್ಲೊ... ತುಮಿ, ಆತ್ತಾಂ ಕಾಲೆಂ... ಕಾಜಾರ್ ಗಿಜಾರ್ ಮ್ಹಣ್ ಉಲಯ್ತೆಲ್ಯಾತ್? ಆಂತೊನಾಮಾಕ್ ಕಾಜಾರ್‍ಗಿ? ಮ್ಹಾಕಾ ಇನ್ವಿಟೇಶನ್ ಯೆವ್ನಾನೇ! ಹಾಂವ್ ವಾಡ್ಯಾಂತ್ಲೊ ಆಕ್ಟಿವ್ ಮೆಂಬರ್‍ನೆ!!

ಅಂತೊನ್: ಕಾಜಾರ್ ಮ್ಹಾಕಾ ನ್ಹಯ್‍ರೆ ಪುನೆಕೆಲ್ಲ್ಯಾ... ಆನಿ ಸಗ್ಳ್ಯಾ ಗಾಂವಾರ್ ಗಾಜಯ್ನಾಕಾ... ಕಾಜಾರ್ ಅಳೆ ಹ್ಯಾ ವಿನ್ಸಿಕ್.

ಫೆಲಿಸ್  : ಹೋ... ವಿನ್ಸಿಕ್‍ಗಿ! ಜಾವ್ಯೆತ್, ಜಾವ್ಯೆತ್. ಹಾಂವೀ ಚಿಂತುಂಕ್ ಪಡ್ಲೊಂ, ಹ್ಯಾ ಅರ್ದ್ಯಾಮಾತಾರ್ಯಾ ಆಂತೊನಾಮಾಕ್ ಕಿತೆಂ ಹೊರ್ಬೊಸ್ ಲಾಗ್ಲಾಗಿ ಮ್ಹಣ್... ಹ್ಹೆಹ್ಹೆಹ್ಹೆ.

ಅಂತೊನ್: ತೋಂಡ್ ದಾಂಪ್‍ರೆ... ಲಜ್ ಸಾಂಡ್ಲೆಲ್ಯಾ...

ಫೆಲಿಸ್  : ಆತಾಂ, ತುಮ್ಚೆಂ ಪ್ರೊಬ್ಲೆಮ್ ಕಿತೆಂ?

ವಿನ್ಸಿ     : ಕಾಲೆಂ ಸಾಂಗ್ಚೆಂ ಫೆಲಿಸಾಮಾ... ಚೆಡುಂ ಮೆಳ್ನಾನೆ ಕಾಜಾರಾಕ್?

ಫೆಲಿಸ್  : ಹೆಬ್ಬೆ...  ತೆಂ ಬಾರೀ ಸಿಂಪಲ್.. ತುಕಾ ಕಾಲೆಂ.. ಆತಾಂ ತುಂ 
ಶಿಕೊಂಕ್‍ನಾಂಯ್... ಚೆಡ್ವಾಂ ಡಿಗ್ರಿ ವಿಚಾರ್ತಾತ್... ವ್ಹಯ್‍ಮೂ? ತೆಂ ಪುರಾ ಆತಾಂಚ್ಯಾ ಚೆಡ್ವಾಂಚೆಂ ಕಣ್ಣ್‍ಕಟ್ಟ್...

ಅಂತೊನ್: ಆತಾಂ ಕಿತೆಂ ಕರ್ಚೆಂರೆ ಫೆಲಿಸಾ...

ಫೆಲಿಸ್  : (ಹಾತ್ ವೊಡ್ಡಾಯ್ತಾ)... ಹಾತ್ ಹುನ್‍ಕರಾ... ಆಶೀರ್ವಾದ್ ಜೊಡಾ...

ವಿನ್ಸಿ    : ಕಾಲೆಂ ಕಂಯ್ ಆಂತೊನಾಮಾ

ಅಂತೊನ್: ಪಯ್ಶೆ ದೀರೆ ಇಲ್ಲೆ... ಐಡಿಯಾ ಸಾಂಗ್ತಾಖಂಯ್...

ವಿನ್ಸಿ     : ಓ... ತಶೆಂಗೀ... ಧರ್ ಫೆಲಿಸಾಮಾ... ಶೆಂಭೊರ್.

ಫೆಲಿಸ್  : ಹಾಂ... ಆಯ್ಕ್. ತುಂ ಆತಾಂ ಎಮ್‍ಬಿಎ ಇಂಜಿನಿಯರಿಂಗ್ ಪಾಸ್.

ವಿನ್ಸಿ    : ಹೆಂ ಹಾಂವ್ ಕೆದಾಳಾ ಕೊಲೆಜಿಕ್ ಗೆಲ್ಲೊಂ?

ಫೆಲಿಸ್  : ಶಟಪ್... ಹಾಂವ್‍ಚ್ ಪ್ರಿನ್ಸಿಪಾಲ್... ತುಂ ಎಮ್‍ಬಿಎ ಪಾಸ್. ಆನಿ ದೇಡ್ ಮ್ಹಯ್‍ನ್ಯಾನ್ ಗಲ್ಫಾಕ್ ವೆತಾಯ್.

ವಿನ್ಸಿ    : ಛೆ... ತೆಂ ಜಾಯ್ನಾ ಫೆಲಿಸಾಮಾ... ಪಾಸ್‍ ಪೊರ್ಟ್  ಜಾವ್ನಾ... ಆನಿ ವೀಜಾ ಕೋಣ್ ದಿತಾ...?

ಫೆಲಿಸ್  : ಶಟಪ್... ಹಾಂವ್‍ಚ್ ಪಾಸ್‍ ಪೊರ್ಟ್,  ಹಾಂವ್‍ಚ್ ವಿಜಾ! ಮ್ಹಜೆಸರ್ಶಿಂ ಯೆತಾ ತೊ ಸಪ್ಣಾಂತ್ ಕೆಳಿಂ ಖಾತಲೊ.

ಅಂತೊನ್: ತುಂ ಕಾಲೆಂರೆ ವೊಪಾರಿಂನಿ ಉಲಯ್ತಾಯ್... ಸಾರ್ಕೆಂ ಬೊಗೊಳ್.

ಫೆಲಿಸ್  : ಅಳೆ, ಹಿ ವಿನ್ಸಿ ಆತಾಂ ಎಮ್‍ಬಿಎ ಪಾಸ್ ಜಾಲಾ, ದೇಡ್ ಮ್ಹಯ್‍ನ್ಯಾಂನಿ ಗಲ್ಫಾಕ್ ವ್ಹಚುಂಕ್ ಆಸಾ. ತಾಚೆ ಪಯ್ಲೆಂ ಕಾಜಾರ್ ಜಾಯ್ಜೆ... ಇತ್ಲೆಂ ಮ್ಹಳ್ಯಾರ್ ಪುರೊ... ಚೆಡುಂ ರೆಡಿ, ವಿಗಾರ್‍ಯಿ ರೆಡಿ, ಹೊಲ್‍ಯಿ ರೆಡಿ... ಮಾಗಿರ್ ಪೆಪ್ಪೆರೆಪೆಪ್ಪೆರೆ ಡುಂ...

ವಿನ್ಸಿ     : (ವಿನ್ಸಿ ಸಗ್ಳೊಚ್ ನಾಚ್ತಾ)

ಫೆಲಿಸ್  : ಅರೆವೊ... ಪಾಪಿಯಾ, ಕಾಜಾರ್ ಜಾವ್ನಾ... ಆತಾಂಚ್ ಇಜಾರ್ ಸೊಡ್ನ್ ನಾಚ್ತಾಯ್?

ಅಂತೊನ್: ಅಳೆ ಫೆಲಿಸಾ, ಹೆಂ ಪುರಾ ಜಾಯ್ನಾ. ಮ್ಹಜ್ಯಾನ್ ಜಾಯ್ನಾ... ಗುರ್ಕಾರಾಚಿ ಮರ್ಯಾದ್ ವ್ಹಚುಂಕ್ ಆಸಾ.

ಫೆಲಿಸ್  : ಮ್ಹಜ್ಯಾನ್ ಜಾತಾ ಅಂತೊನಾಮಾ... ಶೆಂಬೊರ್ ಫಟಿ ಮಾರ್ನ್... 
ವಿನ್ಸಿ     :ಏಕ್ ಕಾಜಾರ್ ಕರಿಜೆ ಮ್ಹಳಾಂ ಮಾಲ್ಗಡ್ಯಾಂನಿ...

ಅಂತೊನ್: ತರ್ ಆತಾಂ ಚೆಡುಂ ಪಳೆಂವ್ಚೆಂ ಕೊಣೆಂ... ಹ್ಯೊ ಫಟಿ ಸಾಂಗ್ಚ್ಯೊ ಕೊಣೆಂ?

ಫೆಲಿಸ್  : ಹಾಂವ್ ಆಸಾನೇ... ಹಾಂವ್ ಹ್ಯಾ ವಿನ್ಸಿಚೊ ಬಾಪ್ಪು ಮ್ಹಣ್ ಸಾಂಗ್ತಾಂ... ಪೂಣ್, ಮ್ಹಾಕಾ ಎಡ್ವಾನ್ಸ್ ತೀನ್ ಹಜಾರ್ ಜಾಯ್... ದೀಂವ್ಕ್ ರೆಡಿ ಆಸಾಯೆ ವಿನ್ಸಿ...?

ವಿನ್ಸಿ     : ತೀನ್ ಕಿತ್ಯಾಕ್ ಸಾಡೆತೀನ್ ಜಾಲ್ಯಾರೀ ದಿವ್‍ಯಾಂ... ಮ್ಹಾಕಾ ಚೆಡುಂ ಮೆಳಾನಾ ಮ್ಹಳ್ಯಾರ್ ಕಿತೆಂ?

ಫೆಲಿಸ್  : ತರ್ ಯಾರೆ... ಮ್ಹಾಕಾ ತೀಸ್ ಹಜಾರ್ ದೀ... ಮಾಗಿರ್‍ಚೆಂ ಪ್ಲ್ಯಾನ್ ಮಾಗಿರ್.

ವಿನ್ಸಿ     : ಯೇ... ಫೆಲಿಸಾಮಾ, ಘರಾ ಯಾ... ಬಾಯ್ ಆಂತೊನಾಮ್... ಇನ್ವಿಟೇಶನ್ ಪ್ರಿಂಟ್ ಜಾಲ್ಲೆಂಚ್ ತುಕಾಚ್ ಫಸ್ಟ್ ಹಾಡ್ನ್ ದಿತಾಂ. (ವೆತಾತ್)

ಅಂತೊನ್: ವ್ಹಚ್‍ರೆ... ಹ್ಯೊ ಫಟ್ ಸಾಕ್ಷಿ ಮುಕಾರ್ ದವರ್ನ್ ಕಿತೆಂ ಪುರಾ ಜಾತಾ ಪಳೆಯ್ಜೆ... ಹಾಂವ್ ಕಿತೆಂ ಕರುಂ? ವಿಗಾರಾಕ್ ಕಳಂವ್ಚೆಂಗಿ? ಪಾಪ್ ವಿನ್ಸಿ, ಬರ್ಯಾ ಮನಾಚೊ ಚೆಡೊ... ವ್ಹಡ್ ನ್ಹಯ್, ಕಾಜಾರ್ ಜಾಲ್ಯಾ ಉಪ್ರಾಂತ್ ಸಕ್ಕಡ್ ಸಮಾ ಜಾತೆಲೆಂ...(ವೆತಾ)

*******************

ದುಸ್ರೆಂ ದೃಶ್ಯ್- ವಾಟೆರ್

ಫೆಲಿಸ್  : ಅಂತೊನಾಮಾ, ಜಾಯ್ನಾ ಜಾಯ್ನಾ ಮ್ಹಳ್ಳೆಂಯ್‍ನೆ... ಕರಯ್ಲೆಂನೆ... ಹಾಂವೆಂ ಕಾಜಾರ್...

ಅಂತೊನ್: ತೆಂ ಸಮಾಮೂ? ಕಾಜಾರ್ ಜಾವ್ನ್ ಪಂದ್ರಾದೀಸ್ ಜಾಲೆ. ತುವೆಂ ಸಾಂಗ್‍ಲ್ಲ್ಯಾ ಪ್ರಕಾರ್ ವಿನ್ಸಿ ಆಜ್ ಫಾಲ್ಯಾಂ ಗಲ್ಫಾಕ್ ವ್ಹಚುಂಕ್‍ನೆ?

ಫೆಲಿಸ್  : ಹ್ಹೆಹ್ಹೆ... ತೊ ಹನಿಮೂನಾಕ್ ಗೆಲ್ಲೊ ಪಾಟಿಂ ಯೇಂವ್ಕ್‍ಚ್‍ನಾ.

ಅಂತೊನ್: ತುಕಾ ಮೆಳ್ಚೆ ಪಯ್ಶೆ ಪೂರಾ ಮೆಳ್ಳೆ ದಿಸ್ತಾ ತುಕಾ?

ಫೆಲಿಸ್  : ಮಾಗಿರ್... ಪಯ್ಶೆ ಪಯ್ಲೆಂ, ಮಾಗಿರ್ ಬಿಜ್ನೆಸ್. ಹಾಕಾ ಮ್ಹಣ್ಚೆಂ ಸೆಲ್ಫ್ ಎಂಪ್ಲೊಯ್‍ಮೆಂಟ್.

ಅಂತೊನ್ (ಪಯ್ಶಿಲ್ಯಾನ್ ಕೊಣ್‍ಗಿ ಯೆಂವ್ಚೆಂ ಪಳೆವ್ನ್) ಅಳೆರೆ, ಫೆಲಿಸಾ... ತೊ ಕೋಣ್ ಥಂಯ್ ಯೆತಾ?

ಫೆಲಿಸ್  :ಅರೆ! ತೊ... ತೊ ವಿನ್ಸಿನೇ... ಹ್ಹಹ್ಹ... ಹನಿಮೂನ್ ಜಾವ್ನ್ ಆಯ್ಲೊ ದಿಸ್ತಾ...
ಅಂತೊನ್: ತುಜಿಂ ಕರ್ಮಾಂ... ಸಮಾ ಪಳೆ...ನವ್ರೊ ಆಸಾ... ಹೊಕೊಲ್ ಖಂಯ್ ಆಸಾರೆ?

ಫೆಲಿಸ್  : ಅರೆ… ತೆಂಯಿ ಸಮಾಮೂ.. ಯೇಂವ್ದಿ... ವಿಚಾರ್‍ಯಾಂ... ಹನಿಮೂನಾಚಿ ಮಜಾ ಆಯ್ಕೊವ್ಯಾಂ... (ವಿನ್ಸಿ ಪಾವ್ತಾ ಹಾತಾಂತ್ ವಸ್ತುರಾಂಚೆಂ ಬೇಗ್)

ಅಂತೊನ್: ವಿನ್ಸಿ... ಯೇರೆ... ಯೇ... ಶೆಂಬೊರ್ ವರ್ಸಾಂಚೆಂ ಆವ್ಕ್ ತುಕಾ, ತುಜ್ಯಾಚ್ ವಿಶ್ಯಾಂತ್ ಉಲವ್ನ್ ಆಸ್ಲ್ಯಾಂವ್.

ಫೆಲಿಸ್  : ಹನಿಮೂನ್ ಕಶೆಂರೆ... ಸಾಂಗ್‍ಲ್ಲೆಪರಿಂ ಹೊಕೊಲ್ ಖಂಯ್‍ರೆ?

ವಿನ್ಸಿ     : (ಬೆಗಾಂತ್ಲೆಂ ಏಕ್ ಪೇಪರ್ ಕಾಡ್ನ್ ದಾಕಯ್ತಾ)

ಅಂತೊನ್: ಕಹಲೆಂರೆ ಹೆಂ?

ವಿನ್ಸಿ     : ಡೈವೊರ್ಸ್ ಪೇಪರ್?

ಫೆಲಿಸ್  : ಅರೆ!!

ಅಂತೊನ್: ಕಾಲೆಂ ಜಾಲೆಂರೆ.??

ಫೆಲಿಸ್  : ತಕ್ಲಿ ಸಮಾ ಆಸಾಯೆರೆ?

ಅಂತೊನ್: ಕಿತ್ಯಾರೆ ಡೈವೊರ್ಸ್...

ವಿನ್ಸಿ     : ದಾಂಪಾ ತೋಂಡ್... ಹಾಂವ್ ಏಕ್ ಪಾಪಾರಿ ಚೆಡೊ ಮ್ಹಣ್ ಭಾನಾಯ್ಲೆಂ ತುವೆಂ ಫೆಲಿಸಾಮಾ.

ಫೆಲಿಸ್  : ಹಾಂವೆಂ ಕಾಲೆಂ ಕೆಲಾಂರೆ? ತುಕಾ ಕಾಜಾರ್ ಜಾ ಮ್ಹಣ್ ಹಾಂವೆ ಕಾಂಯ್ ವೊತ್ತಾಯ್ ಕೆಲ್ಲಿಯೆ? ತುಂಚ್‍ನೆ ಆಂಗಾರ್ ಪಡೊನ್ ಕಾಜಾರ್ ಜಾಂವ್ಕ್ ಭಾಯ್ರ್ ಸರ್‍ಲ್ಲೊಯ್?

ವಿನ್ಸಿ     : ವ್ಹಯ್ ಸಮಾ, ಪೂಣ್ ತುವೆಂ ಮ್ಹಜೊ ಫಾಯ್ದೊ ಉಟಯ್ಲೊಯ್. ಫಟ್ ಸಾಕ್ಸ್ ದೀವ್ನ್ ತುವೆಂ ಮ್ಹಜೆಂ ಕಾಜಾರ್ ಕೆಲೆಂಯ್. ತೆಣೆಂ ತ್ಯಾ ಚೆಡ್ವಾಚ್ಯಾ ಪಾಡ್ತಿಚ್ಯಾಂನಿ ಮ್ಹಾಕಾಚ್ ಮಾಂಕೊಡ್ ಕೆಲೆಂ. ತ್ಯಾ ಚೆಡ್ವಾಕ್ ಅರ್ದೆಂ ಪಿಶೆಂ ಅಂತೊನಾಮಾ. ಕಿತೆಂ ವಿಚಾರ್ಲೆಂ ತುಮಿಂ? ಹನಿಮೂನ್ ಕಶೆಂ ಆಸ್ಲೆಂ? ಹಹ್ಹಹ್ಹ... (ಪಿಶ್ಯಾಂಪರಿಂ ಹಾಸ್ತಾ) ಹನಿಮೂನ್ ಖಂಯ್ ಹನಿಮೂನ್... ತ್ಯಾ ಚೆಡ್ವಾಕ್ ಕೆದಾಳಾ ಪಿಶೆಂ ಚಾಳ್ವತಾ ಮ್ಹಣ್ ಸಾಂಗುಂಕ್ ಜಾಯ್ನಾ. ಆಮಿ ಹನಿಮೂನಾಕ್ ಭಾಯ್ರ್ ಸರ್ಚ್ಯಾ ಗಡಿಬಿಡಿಕ್ ತೆಂ ವೊಕಾತ್ ಹಾಡುಂಕ್ ವಿಸ್ರಾಲೆಂ ಕಂಯ್... ತಾಕಾ ಸಾಂಬಾಳ್ಚ್ಯಾಂತ್ ಮ್ಹಜೊ ಅರ್ದೊ ಜೀವ್ ಗೆಲೊ... ಆನಿ ಮ್ಹಜ್ಯಾನ್ ಸೊಸುಂಕ್ ಜಾಯ್ನಾ. ಆಮಿ ಕೆಲ್ಲ್ಯಾ ಘಾತಾಕ್ ಸಹಜ್ ಜಾಲ್ಲೊ ಘಾತ್ ಪಾಟಿಂ ಮೆಳ್ಳಾ.

ಅಂತೊನ್: ಬಿರ್ಮೊತ್‍ರೆ ವಿನ್ಸಿ ತುಜಿ... ಪಾಪ್ ಚೆಡೊ.

ವಿನ್ಸಿ     : ಆತಾಂ ಕಿತ್ಯಾ ಭಿರ್ಮತ್ ಪಾವ್ತಾಯ್ ಗುರ್ಕಾರಾಮಾ? ತುಕಾ ಆಮಿ ಚೂಕ್ ಕರ್ತಾಂವ್ ಮ್ಹಣ್ ಗೊತ್ತಾಸೊನೀ ತುವೆಂ ಆಮ್ಕಾಂ ಆಡಾಂವ್ಕ್ ನಾಂಯ್. ಕಾಜಾರಾ ಪಯ್ಲೆಂ ತೀನ್ ಚಿಟಿ ವಾಚ್ಲ್ಯೊ. ಕಸಲಿಚ್ ಆಡ್ಕಳ್ ಆಸ್ಲ್ಯಾರ್ ಇಗರ್ಜ್ ಮಾತೆಚ್ಯಾ ವ್ಹಡಿಲಾಂಕ್ ಕಳಯ್ಜೆ ಮ್ಹಣ್ ವಿಗಾರಾನ್ ಸಾಂಗ್ಲೆಂ. ತುಂ ಜವಾಬ್ದಾರೆಚೊ ಗುರ್ಕಾರ್ ಜಾಲ್ಲೊಯ್ ತರ್ ಹೆಂ ಆಡಾಯ್ತೊಯ್... ಹಾಂವ್ ಅಸಲ್ಯಾ ವಾಯ್ಟ್ ಪರಿಸ್ಥಿತೆಕ್ ಪಾವ್ತೊನಾಂ.

ಅಂತೊನ್: ವಯ್‍ರೆ, ಮ್ಹಜಿ ಜವಾಬ್ದಾರಿ ಹಾಂವೆಂ ಕರುಂಕ್ ನಾ. ಪೂಣ್, ಹಾಂವೆಂ ಚಿಂತ್ಲೆಂ, ಫಟ್ ಮಾರ್ನ್ ಕಾಜಾರ್ ಜಾಲ್ಯಾರೀ ಉಪ್ರಾಂತ್ ಸಾರ್ಕೆಂ ಜಾತೆಲೆಂ ಮ್ಹಣ್ ಚಿಂತ್ಲೆಂ ಹಾಂವೆಂ.

ವಿನ್ಸಿ     : ಕಿತೆಂಯ್ ಜಾಂವ್ದಿ ಗುರ್ಕಾರಾಮಾ, ತುವೆಂ ಜವಾಬ್ದಾರಿ ಪಾಳುಂಕ್‍ನಾಂಯ್, ಆನಿ ಹ್ಯಾ ಫೆಲಿಸಾಮಾನ್ ಮ್ಹಜಿ ಗೊಮ್ಟಿಚ್ ಕಾತರ್ಲಿ.

ಅಂತೊನ್: ಆತಾಂ ತ್ಯಾ ಚೆಡ್ವಾಚಿ ಕಿತೆಂರೆ ಗತ್. ತುಂ ನಿಜಾಯ್ಕಿ ತಾಕಾ ಡೈವೊರ್ಸ್ ದಿತಾಯ್‍ಗಿ?

ವಿನ್ಸಿ     : ನಾ ಗುರ್ಕಾರಾಮಾ... ಮ್ಹಜ್ಯಾ ಚುಕಿಚೆಂ ಪ್ರಾಚಿತ್ ಮ್ಹಣ್ ಚಿಂತ್ತಾಂ.
ಅಂತೊನ್: ವ್ಹಾವ್ಹಾ... ಕಿತ್ಲೆಂ ಬರೆಂ ಮನ್‍ರೆ ತುಜೆಂ ವಿನ್ಸಿ... ಭಾಂಗಾರ್ ಮನ್‍ರೆ..

ವಿನ್ಸಿ     : ವ್ಹಯ್, ಮ್ಹಜೆಂ ಭಾಂಗಾರ್ ಮನ್. ಆತಾಂ ತುಮಿಂ ತುಮ್ಚೆಂ ಮನ್ ಭಾಂಗಾರ್ ಕರ್ನ್ ಘೆಜೆ.

ದೊಗೀ   : ಮ್ಹಳ್ಯಾರ್?

ವಿನ್ಸಿ     : ಫಟ್ ಸಾಕ್ಸ್ ದೀವ್ನ್ ಮ್ಹಾಕಾ ಕಾಜಾರ್ ಕರ್ನ್ ಫೆಲಿಸಾಮಾನ್ ಕಶೆಂ ಬುಡಯ್ಲೆಂಗಿ, ತಿತ್ಲ್ಯಾಚ್ ಮಾಫಾನ್ ಸತ್ ಕಳಿತ್ ಆಸೊನೀ ಕಾಜಾರ್ ಆಡಾಂವ್ಕ್ ಪಳೆನಾಸ್ತಾಂ, ಮೌನ್ ರಾವೊನ್ ಗುರ್ಕಾರಾಮಾ... ತುವೆಂಯ್ ಫಟ್ ಸಾಕ್ಸಿಕ್ ಪಾಟಿಂಬೊ ದಿಲಾಯ್. ದೆಕುನ್, ಮ್ಹಜ್ಯಾ ಬಾಯ್ಲೆಕ್ ಸಾರ್ಕಿ ಜಾತಾ ಮ್ಹಣಾಸರ್ ಆಸ್ಪತ್ರೆಚೊ ಖರ್ಚ್ ತುಮಿ ಪಳೆತೆಲ್ಯಾತ್.

ದೊಗೀ  :ಹಾಂ!!!

*********************

ಜಿಕುನ್ ಸಲ್ವಲ್ಲ್ಯಾಂಚಿ ಕಾಣಿ

ತುಮ್ಚೆಂ ಹಟ್ ಜಿಕ್ತೆಲೆಂ ಆನಿ ತಿಚ್ ಸುರ್ವಾತ್ ಸಲ್ವಣೆಚಿ!

     ಅಸಲೊ ಏಕ್ ಸಂಧರ್ಭ್ ಮ್ಹಾಕಾಯಿ ಉದೆಲ್ಲೊ.

     ಏಕ್ ಪ್ರಾಯೆಸ್ತ್ ಜೀವ್ ಮ್ಹಜೆ ಮುಕಾರ್ ಗದ್ಗದಿತ್ ಜಾವ್ನ್ ಅಪ್ಣಾಚೆ ಆಟೆವಿಟೆ ಉತ್ರಾಂವ್ಕ್ ಸಕನಾಸ್ತಾಂ ಉರ್ಜಾತಾಲೊ. ಕಶೆಂ ಸಮಾಧಾನ್ ಕರ್ಚೆಂ ಕಳೊಂಕ್ ನಾ. ಭತರ್ಲೆ ಭಿತರ್ ತಾಚೆ ಆಟೆವಿಟೆ ಮ್ಹಾಕಾಯ್ ಪೊಕೊರುಂಕ್ ಲಾಗ್‍ಲ್ಲೆ ತರೀ ಲಿಪಂವ್ಚೆಂ ಪ್ರೇತನ್ ಹಾಂವೀ ಕರ್ತಾಲೊಂ.

        “ಕಿತೆಂ ಕರ್ಚೆಂರೆ, ತೊ ಹಿಂದ್ವಾಕಡೆ...” ತಾಣೆಂ ವೊಂಟ್ ಚಾಬೊನ್ ಧರ್ಲೆ.

        “ಜಾಂವ್ದಿ ಪೆಲ್ಯಾನ್, ತುಂ ಜಾಯ್ನಾಕಾ ಮ್ಹಣ್ ರಾವ್ಶಿ ಜಾಲ್ಯಾರ್ ಫಾಲ್ಯಾಂ ಪೂತ್‍ಯೀ ನಾ ಜಾಯ್ತ್,” ಹಾಂವೆಂ ಸುಲಾಭಾಯೆನ್ ಸಾಂಗ್ಲೆಂ.

      ತೊ ಮ್ಹಜೆ ದೊಳೆ ಧರುಂಕ್ ಪ್ರೇತನ್ ಕರ್ತಾಲೊ. ಹಾಂವ್ ಥಂಯ್ಚೊ ಉಟೊನ್ ಗೆಲೊಂ.

ಹೆರಾಕ್ಲೀಟಸ್ ನಾಂವಾಚೊ ಫಿಲೊಸೊಫರ್ ಅಶೆಂ ಮ್ಹಣ್ತಾ: “You cannot step into the same water twice” ಮ್ಹಣ್ಜೆ, ವ್ಹಾಳಾಂತ್ಲೆಂ ಉದಕ್ ವಾಳೊನ್‍ಚ್ ವೆತಾ ಆನಿ ತೊ ವ್ಹಾಳ್ ಉತರ್ತೆಲ್ಯಾಕ್, ಹರ್ಯೆಕ್ ಪಾವ್ಟಿಂ ನವೆಂಚ್ ಉದಕ್ ಪಾಂಯ್ ಧುವ್ನ್ ವೆತಾ. ಕಿತ್ಲೆಂ ಸತ್ ಹೆಂ! ಶಾಶ್ವಿತ್‍ಪಣಾಚಿಂ ಹರ್ ಖುಣಾಂ ಪುಸುನ್ ಉಡಂವ್ಚ್ಯಾ ಕಾಳಾಕ್ ಆಮಿ ಪಾವ್ಲ್ಯಾಂವ್. ಅಯ್ಚೆಂ ಫಾಲ್ಯಾಂ ನಾಕಾ, ಕಾಲ್ಚೆಂ ಆಜಿಕ್ ನಾ. ಗರ್ಜೆ ಪರ್ಮಾಣೆಂ ವಾಪಾರ್, ನಾ ತರ್ ನಾಕಾರ್... ಆನಿ ಸಂಬಂದಾಚೆಂ ಶಾಶ್ವಿತ್‍ಪಣ್ ಖಂಯ್ ಉರ್ಲೆಂ? ಸಕ್ಕಡ್‍ಯಿ ವ್ಹಾಳೊನ್ ವೆಚೆಂ ಉದಕ್‍ಚ್. ಬಾಪುಯ್, ಆವಯ್ ಹಾಂವ್ ಶಿಕೊನ್ ಪಾಕಾಟೆ ಫುಲವ್ನ್ ರಾವ್ತಾ ಪರ್ಯಾಂತ್ ಮಾತ್ರ್. ಮಾಗಿರ್ ಹಾಂವೆಂಚ್ ವಿಂಚ್‍ಲ್ಲಿ ವಾಟ್. ಆವಯ್ಚ್ಯಾ ಉಸ್ಕ್ಯಾರ್ ಥಾವ್ನ್ ಗಳ್ಯಾಕ್ ಲಾಯಿಲ್ಲಿ ಭಾಸ್, ಕಾಳ್ಜಾಕ್ ಲಕಯಿಲ್ಲೊ ಭಾವಾಡ್ತ್... ಮ್ಹಜೆ ಗರ್ಜೆಕ್ ಮಾತ್ರ್, ಮ್ಹಜೆ ಮರ್ಜೆಕ್ ಖಂಚಿಯಿ ಭಾಸ್ ಜಾತಾ, ಖಂಚೊಯ್ ಧರ್ಮ್ ಜಾತಾ.

     ಅಂತರ್ ಧರ್ಮಿಯ್ ಕಾಜಾರಾ ವಿಶ್ಯಾಂತ್ ಉಲಯ್ತಾಂ ಹಾಂವ್, ಪ್ರಗತಿಪರ್ ಚಿಂತ್ಪಿ ವಾದ್ ಮಾಂಡ್ತೆಲೆ-“ಕಾಜಾರ್ ಏಕ್ ವೈಯಕ್ತಿಕ್ ವಿಶಯ್. ತಾಂತುಂ ಧರ್ಮಾಚಿ ಅಡ್ಕಳ್ ಕಿತ್ಯಾ?” ಸಾರ್ಕೆಂ. ಜಲ್ಮ್‍ದಾತಾರಾಂಕ್‍ಚ್ ಆಡ್ಕಳ್ ಮ್ಹಣ್ ದಿಸ್ಲ್ಯಾರ್ ಖೊಟಾವ್ನ್ ವೆತಾತ್ ಖಂಯ್ ಅನಿ ಗಳ್ಯಾಕ್ ಕೊದಾಂಟಿ ಪರಿಂ ಬಾಂದ್‍ಲ್ಲೊ ಧರ್ಮ್ ಖಂಚೆಂ ಲೇಕ್?! ಕೋಣ್ ತೊ ಪ್ರಗತಿಪರ್ ಚಿಂತ್ಪಾಚೊ ಮನಿಸ್, ‘ಅಂತರ್ ಧರ್ಮೀಯ್ ಕಾಜಾರ್ ಜಾವ್ನ್ ಉದ್ದಾರ್ ಜಾಲ್ಲಿಂ’ ದಾಕಯ್ತ್? ಉತ್ರಾಂಚೊ ವಾದ್ ಮಾಂಡುನ್ ಪೆÇದೊರ್ನ್‍ಪಣ್ ಘೆತೆಲ್ಯಾಂಕ್... ಎಕ್‍ಚ್ ಕಾಜಾರ್ ಜಾವ್ನಾ ವಾ ತಾಂಚಿಚ್ ಭುರ್ಗಿಂ ಆಜೂನ್ ಕಾಜಾರಾಕ್ ಅಯ್ತಿಂ ಜಾಂವ್ಕ್‍ನಾಂತ್!

     ಲ್ಹಾನ್ಪಣಾರ್ ಬಾಪುಯ್ ಸರ್ಲ್ಯಾರೀ ಹರ್ಯೆಕ್ ಪಯ್ಶೆ ಗಾಂಟ್ ಘಾಲ್ನ್ ಬಾಂದುನ್ ದವರ್ನ್ ದಾಕ್ತೆರ್ಗಿ ಶಿಕವ್ನ್‍ಯಿ ಆಜ್ ‘ಆಪುಣ್ ಎಕಾ ಮುಸ್ಲಿಂ ದಾಕ್ತೆರಾಕಡೆ ಕಾಜಾರ್ ಜಾತಾಂ’ ಮ್ಹಳ್ಳೆಂ ಉತರ್ ಧುವೆಥಾವ್ನ್ ಯೇತ್ ತರ್, ಆಯ್ಕಾಲ್ಲಿ ಆವಯ್ ವಾಂಚತ್‍ಗ್? ತಿಚೆ ಭಿತರ್ ಉಬ್ಜೊಂಚೆ ಆಟೆವಿಟೆ ಧುವೆಚ್ಯಾ ದೊಳ್ಯಾಂಕ್ ತೊಪಾನಾಂತ್ ಕಿತ್ಯಾ? ಹಾಂತುಂ ಜೀಕ್ ಕೊಣಾಚಿ? ಖಂಡಿತ್ ಧುವೆಚಿ ಜಾತೆಲಿ; ಕಿತ್ಯಾಕ್ ಅಪ್ಲೆ ಧುವೆಚೆಂ ಸುಖ್ ಆಶೆನಾತ್ಲಿ ಆವಯ್ ಕೋಣ್ ತಿ? ಎಕ್ಲೊ/ಕ್ಲೆಂ ಕ್ರಿಸ್ತಾಂವ್, ಹಿಂದ್ವಾಲಾಗಿಂ ವಾ ಮಾಪ್ಳ್ಯಾಲಾಗಿಂ ಕಾಜಾರ್ ಜಾಂವ್ ವಾ ಏಕ್ ಹಿಂದು ಚಲಿ ಕ್ರಿಸ್ತಾಂವಾಕಡೆ ಕಾಜಾರ್ ಜಾಂವ್ ಪರಿಣಾಮ್ ಇತ್ಲೊಚ್ - ಹಟ್ ಜರೂರ್ ಜಿಕ್ತಾ ಅನಿ ತಿಚ್ ಸುರ್ವಾತ್ ಸಲ್ವಣೆಚಿ!

     ಏಕ್ ಹಿಂದು ಚಲಿ ಕ್ರಿಸ್ತಾಂವ್ ಚಲ್ಯಾಕಡೆ ಲಗ್ನ್ ಜಾವ್ನ್ ವಾಟೆರ್ ಪಡ್‍ಲ್ಲಿ ಸಂಗತ್ ತುಮ್ಕಾಂಯ್ ಕಳೊಂದಿ.

     ತೆ ಚಲ್ಯೆಕ್ ಪಳೆಲ್ಯಾರ್ ತುಮಿ, ಶಿಕ್ಪಿ ಮ್ಹಣ್ ಮಾಂದುನ್ ಘೆತೆಲ್ಯಾತ್. ರೂಪ್ ಆಸಾ ಪುಣ್ ತಿಚ್ಯಾ ಮುಕಾಮಳಾರ್ ಹಾಸ್ಯಾಚಿ ಕುರು ಚ್ ನಾ.

    “ಕ್ರಿಸ್ತಾಂವ್ ಚೆಡ್ಯಾಕಡೆ ಕಾಜಾರ್ ಜಾವ್ನ್ ಸಲ್ವಾಲಿಂ,” ನಿರಾಸ್ ಜಾಲ್ಲ್ಯಾ ಹರ್ಯೆಕಾ ಚಲಿಯೆಚೊ ಪಯ್ಲೊ ಡಯ್ಲೊಗ್ ಹೊಚ್ ತರೀ ಮ್ಹಾಕಾಚ್ ಆಡ್ಹೂಕ್ ಲಾಗ್ಲೊ.

     “ಪಪ್ಪಾಕ್ ಆಸ್ತ್ ಅಸ್ಲಿ, ತಾಣೆಂ ಸಾಂಗ್‍ಲ್ಲೆಂ ಆಯ್ಕಾಲ್ಲೆಂ ತರ್ ಆಜ್ ದುಬಾಯ್ ಆಸ್ತಿಂ. ಪುಣ್ ಮ್ಹಜ್ಯಾ ಹಟಾಮುಕಾರ್ ತಿಂ ಜಿಕೊಂಕ್ ನಾಂತ್. ಸಗ್ಳೆಂ ಸಾಂಡುನ್ ಹಾಚ್ಯಾ ಪಾಟ್ಲ್ಯಾನ್ ಅಯ್ಲಿಂ. ಮೋಗ್ ಜಾಲ್ಲ್ಯಾ ಸುರ್ವೆರ್ ಸಕ್ಡಾಂ ಸಪೊರ್ಟ್ ಕರ್ತಾಲಿಂ. ಮ್ಹಜ್ಯಾಚ್ ಖಾಸ್ ಇಶ್ಟಿಣ್ಯಾಂನಿ ‘ತೊ ಬರೊ ಚೆಡೊ, ಸೊಡ್ನ್ ಘಾಲಿನಾ’ ಮ್ಹಣ್ ಧಯ್ರ್ ದಿಲ್ಲೆಂ... ಕಾಜಾರ್ ಜಾಲ್ಯಾ ಉಪ್ರಾಂತ್ ಏಕ್ ದೀಸ್ ಪುಣೀ ಸಮಾದಾನ್ ಮ್ಹಳ್ಳೆಂ ಮೆಳೊಂಕ್ ನಾ. ತೊ ಪಿಯೆತಾ. ಮ್ಹಜೆಕಡೆ 50,000 ಆಸ್‍ಲ್ಲೆ. ತೆಯಿ ಕಾಣ್ಘೆವ್ನ್ ಇಷ್ಟಾಂಕ್ ವಾಂಟ್ಲ್ಯಾತ್ ಸಯ್ತಾನಾನ್. ತಾಚೆ ಈಷ್ಟ್ ವಾಡ್ ದಿತಾತ್ ಮ್ಹಣ್ತಾಲೊ. ಆತಾಂ ಕಾಂಯ್ ನಾ, ಮ್ಹಾಕಾ ಮ್ಹಜೆ ಪಯ್ಶೆ ಪಾಟಿಂ ಜಾಯ್.’

     ಪಾಪ್ ದಿಸ್ಲೆಂ ಮ್ಹಾಕಾ. ಗಳೊ ಹಾಂವೆಂ ಪಾರ್ಕಿಲೊ. ಭಾಂಗಾರಾಚಿ ಸುತಾ ತಸ್ಲಿ ಏಕ್ ಚೇಯ್ನ್‍ಯಿ ನಾತ್ಲಿ. “ಎಕ್ಲೆಂ ಧುವ್ ಆಸಾ. ಚರ್ಚ್‍ಸ್ಕೂಲಾಂತ್ ಇಂಗ್ಲೀಶ್ ಮೀಡಿಯಾಮಾಕ್ ಘಾಲಾಂ. ಹಾಣೆಂ ಪಿಯೆವ್ನ್ ಯೇವ್ನ್ ಸದಾಂ ರಾತಿಂ ಝಗಡ್ಚೆಂ ಪಳೆವ್ನ್ ತೆಂ ಭಿಯೆತಾ. ಶಿಕ್ಪಾಕ್ ಮನ್ ದೀನಾ. ಹುಶಾರ್ ಆಸಾ ಮ್ಹಜೆಂ ಭುರ್ಗೆಂ. ಪುಣ್ ಪರೀಕ್ಷೆಕ್ ವೆತಾನಾ ವಿಪ್ರೀತ್ ಭಿಯೆತಾ. ಜಾಪಿ ವಿಸ್ರೊನ್ ಸೊಡ್ತಾ... ಕಿತೆಂ ಕರುಂ?

     “ಮ್ಹಾಕಾ ತೊ ನಾಕಾ ಮ್ಹಣ್ ಸೊಡ್ನ್ ವಚೊಂಕ್ ಜಾಯ್ನಾ. ಹಾಂವ್ ಸೊಡ್ನ್ ವಚೊಂಕ್ ಕಾಜಾರ್ ಜಾಲ್ಲಿಂ ನ್ಹಯ್. ಆಜೂನ್ ತಾಚೊ ಮೋಗ್ ಕರ್ತಾಂ. ಕಸೊ ಸುದ್ರಾಂವ್ಚೊ?”

     ಹಿ ಕಾಣಿ ಹಾಂವ್ ಮ್ಹಜ್ಯಾ ಎಕ್ಲ್ಯಾ ಸಾಂಗಾತ್ಯಾಕಡೆ ಸಾಂಗೊನ್ ಆಸ್ಲೊಂ.

       “ಕಿತೆಂ ಕರ್ಯೆತ್” ನಿರಾಸೆನ್ ವಿಚಾರಿ ತೊ.

       “ಮಾಗ್ಯಾಂ” ಹಾವೆಂ ಮ್ಹಳೆಂ.

       “ಮಾಗ್ಲ್ಯಾರ್ ಸಕ್ಕಡ್ ಸಮಾ ಜಾತಾಗೀ?” ತಾಕಾ ದುಬಾವ್ ಆಸ್ಲೊ.

       “ತುಜೆಲಾಗಿಂ ಕಾಂಯ್ ದುಸ್ರಿ ವಾಟ್ ಆಸಾಗಿ?”

      ತಾಚಿ ಜಾಪ್ ನಾತ್ಲಿ.        

********

ದುಸ್ರೊ ಉಪಾದೆಸ್:

ದೆವಾಕ್ ನಾಂವ್ ನಾ! ತರ್ ವ್ಯರ್ಥ್ ಕಾಡ್ಚೆಂ ಮ್ಹಳ್ಯಾರ್?

                                                                     

ನಾಂವಾಕ್ ಕಿತ್ಯಾ ಮಾನ್?

ಆಮ್ಚ್ಯಾ ಸಂಪ್ರದಾಯಾ ಆನಿ ಸಂಸ್ಕೃತಿಪರ್ಮಾಣೆಂ ವ್ಹಡಾಂಕ್ ಆಮಿ ನಾಂವಾನ್ ಉಲೊ ಕರಿನಾಂವ್. ಆದಿಂ ಬಾಯ್ಲ್ ಘೊವಾಚೆಂ ನಾಂವ್ ಕಾಡಿನಾತ್ಲಿ. ಕಾರಣ್, ನಾಂವಾನ್ ಆಪಂವ್ಚೆಂ ಮ್ಹಳ್ಯಾರ್ ‘ತ್ಯಾ ಮನ್ಶಾಚೆರ್ ಮ್ಹಾಕಾ ಅಧಿಕಾರ್ ಆಸಾ’ ಮ್ಹಣ್ ಸಾಂಗ್‍ಲ್ಲೆಪರಿಂ. ದೆವಾನ್ ಸರ್ವ್ ಜಿವಿ ರಚ್ಲ್ಯಾ ಉಪ್ರಾಂತ್ ತಾಂಕಾಂ ನಾಂವ್ ದಿಂವ್ಚ್ಯಾಕ್ ಮನ್ಶಾಕ್ ಸಾಂಗ್ಲೆಂ, ಮ್ಹಣ್ಜೆ, ತಾಂಚೆರ್ ಅಧಿಕಾರ್ ದಿಲೊ! ತರ್ ಎಕ್ಲ್ಯಾಚ್ಯಾ ನಾಂವಾಕ್ ಮಾನ್ ದಿಂವ್ಚೊ ಮ್ಹಣ್ಜೆ ತಾಚೆಂ ಮುಕೆಲ್ಪಣ್, ಪ್ರಾಯ್, ಜಾಣ್ವಾಯ್ ಆನಿ ಪದ್ವೆಕ್ ಮಾನ್ ದಿಂವ್ಚೊ.

ದೆವಾಚೆಂ ನಾಂವ್ ಕಿತೆಂ?

ಪರ್ನ್ಯಾ ಸೊಲ್ಲ್ಯಾಂತ್ಲಿಂ ಪ್ರಮುಖ್ ನಾಂವಾಂ: ಯಾಹ್ವೆ (ಸರ್ವೇಸ್ಪರ್, ಸರ್ವೇಶ್ವರ್- ಜೊ ಆಸಾ (exisಣiಟಿg oಟಿe), ಅದೊನಾಯ್ (ಸೊಮಿ), ಎಲೊಹಿಮ್ (ದೇವ್), ಎಲ್ ಶಾದ್ದಾಯ್ (ಪದ್ವೆದಾರ್ ದೇವ್). ಹ್ಯಾ ನಾಂವಾಂಚೆಂ ಮೂಳ್ ವೆವೆಗ್ಳೆಂ ಆಸಾ. ವೆವೆಗ್ಳ್ಯಾ ಸಂದರ್ಭಾಂನಿ, ವೆವೆಗ್ಳ್ಯಾ ಕಾರಣಾಂಕ್ ದಿಲ್ಲಿಂ ನಾಂವಾಂ (ಜಶೆಂ ಆಮಿಂ ಬಿರುದಾಂ ದಿತಾಂವ್!). ಮೊಯ್ಜೆಕ್ ದೆವಾನ್ ಸಾಂಗ್‍ಲ್ಲೆಂ ನಾಂವ್–‘ಜೊ ಆಸಾ’ ತೊಚ್ ಹಾಂವ್! (ವಾಚ್- ನಿರ್ಗಮನ್ 3:13-14). ಹ್ಯಾ ನಾಂವಾನ್ ದೇವ್ ‘ಸದಾಂಚ್ ಆಸ್ಚೊ’ (ಅಸ್ತಿತ್ವ್) ಮ್ಹಣ್ ದಾಕಯ್ತಾ ಶಿವಾಯ್ ನಾಂವ್ ಜಾಯ್ನಾ. ತರ್, ನಾಂವ್‍ಚ್ ನಾ ತರ್ ತೆಂ ‘ಕಾಡ್ಚೆಂ’ ಕಶೆಂ?

ಅರ್ಥ್ ಇತ್ಲೊಚ್ – ‘ಎಕಾ ನಿಜಾ ದೆವಾಕ್ ಮಾನ್’ ದಿಂವ್ಚೊ ಮ್ಹಳ್ಳೊ ಪಯ್ಲೊ ಉಪಾದೆಸ್ ಹಾಂಗಾ ಮುಂದರುನ್ ವೆತಾ -ತಾಕಾ ಉತ್ರಾಂನಿ ಕರ್ನೆಂನಿ ಕಶೆಂ ಮಾನ್ ದಿಂವ್ಚೊ ಹ್ಯಾ ವಿಶಿಂ ಆಸಾ ಹೊ ದುಸ್ರೊ ಉಪಾದೆಸ್.  ತ್ಯಾ ದೆಕುನ್ - 

- ತೊ ಆಮ್ಚೆರ್ ಅಧಿಕಾರ್ ಚಲಯ್ತಾ, ದೆಕುನ್ ತಾಕಾ ಆಮಿ ನಾಂವ್ ದಿನಾಂವ್, ನಾಂವ್ ತಾಚೆಂ ಕಾಡಿನಾಂವ್.

- ದೆವಾಚ್ಯಾ ನಾಂವಾಚೊ ವಾಯ್ಟ್ ಉಪ್ಯೋಗ್ ಕರ್ಚೊ ನ್ಹಯ್.

ವ್ಯರ್ಥ್ ಕಾಡ್ಚೆಂ ಮ್ಹಳ್ಯಾರ್?

• ಫಟ್ಕಿರೊ ಸಪುತ್ (ವಾಚ್- ಮಾತೆವ್ 5:33-37) ದೆವಾಮುಕಾರ್ ಸಪುತ್ ಘೆಂವ್ಚೊ-ದೆವಾಕ್ ಸಾಕ್ಶಿದಾರ್ ಕರ್ಚೊ? (ವಾಚ್- ಹೆಬ್ರೆವ್ 6:16)

• ಅನ್ಯೆಕ್ಲ್ಯಾನ್ ತುಕಾ ಪಾತ್ಯೆಂವ್ಕ್ ದೆವಾಚೆ ನಾಂವ್ ಕಾಡುಂಕ್ ಜಾಯ್ನಾ ತರ್, ಸಾಂತಾಚೆಂ, ಪೂನ್ ಶೆತಾಚೆಂ, ಆಕಾಸಾಚೆಂ, ಪ್ರಥ್ವೆಚೆಂ ನಾಂವ್ ಮುಕಾರ್ ಹಾಡ್ಚೆಂ. 

• ಬೈಬಲಾಚೆರ್ ಕೊರ್ಟಾಂತ್ ಸತ್ ಸಾಂಗ್ತಾಂ ಮ್ಹಣ್ ಸಪುತ್ ಘೆಂವ್ಚೊ 

• ಕ್ರಿಸ್ತಾಂವ್ ಫುಡಾರಿನ್ ಬೈಬಲಾಚೆರ್ ಪ್ರಮಾಣ್ ಸ್ವೀಕಾರ್ ಕರ್ಚೆಂ (ಸಂವಿಧಾನಾಚೆರ್ ಕರುಂದಿ)

• "ಆಮಿ ಭಾಭಾವ್. ಕೊಂಟ್ರಾಕ್ಟ್ ಪುರಾ ಕಿತ್ಯಾ? ದೆವಾಮುಕಾರ್ ಹೊ ನಿರ್ಧಾರ್ ಘೆವ್ಯಾಂ" ಆಶೆಂ ಮ್ಹಣುನ್ ಮಾಗಿರ್ ನೀಜ್ ಪರಿಸ್ತಿತಿ ಉಬ್ಜತಾನಾ ಫಾಯ್ದೊ ಉಟಂವ್ಚೊ

• ಫಟ್ಕಿರೆಂ ಪ್ರವಾದ್ಪಣ್ – ಮ್ಹಾಕಾ ಮೆಸೆಜ್ ಮೆಳ್ಳಿ ಮ್ಹಣ್ ಭಾಸ್ಚೆಂ! (ವಾಚ್- 1 ಜುವಾಂವ್ 4:1) ತುಕಾ ಮೆಸೆಜ್ ಆಸಾ ಮ್ಹಣ್ ಸ್ವಬಡಾಯ್ ಉಲಂವ್ಚಿ!

• ಆಪ್ಣಾಕ್ ಫಾಯ್ದೊ ಜಾಂವ್ಕ್ ದೆವಾಚೆಂ ಉತರ್ ವಾಪಾರ್ಚೆಂ. 

• ‘ಸೊಮಿ ಸೊಮಿ’ ಮ್ಹಣ್ಚೊ ಹರ್ಯೆಕ್ಲೊ ಸರ್ಗಿಂ ರಾಜಾಂತ್ ರಿಗಾನಾ ಮ್ಹಣ್ತಾ ಮಾತೆವ್ (ವಾಚ್- 7:21-223)

ಸೊಮ್ಯಾಚ್ಯಾ ನಾಂವಾನ್ ಬಿಸಿನೆಸ್ ಕರ್ತಾನಾ ಗಿರಾಯ್ಕಾಂಕ್ ಫಾರ್ಚೆಂ, ಚೂಕ್ ಮಾಪ್ ವಾಪಾರ್ಚೆಂ.. ತಾಚ್ಯಾ ನಾಂವಾಚೊ ಹಾಂವ್, ತಾಣೆಂ ಶಿಕಯಿಲ್ಲೆಪರಿಂ ಕರ್ತಾಂಗಿ? ಕರಿನಾ ತರ್ ತಾಚ್ಯಾ ನಾಂವಾರ್ ಕಿತ್ಯಾ ಬಿಸಿನೆಸ್ ಚಲಯ್ತಾಂ? (ವಾಚ್- ಲೆವಿಶಾಸ್ತ್ರ್ 19:12)

• ಭೆಸಾಂವ್ ದೀಂವ್ಕ್ ದೆವಾಚೆಂ ನಾಂವ್ ವಾಪಾರ್ಯೆತ್ ಶಿವಾಯ್ ಶಿರಾಪ್ ದಿಂವ್ಕ್ ನ್ಹಯ್ – ತುಕಾ ದೇವ್ ಪಳೆತಾ! (ರೋಮ್ 12-14)

ಸಂಪ್ಣಿ: ಭುರ್ಗ್ಯಾಂನಿ ಬರೆ ಚಾಲಿನ್ ಜಿಯೆಲ್ಯಾರ್‍ಚ್ ಆವಯ್ ಬಾಪಾಯ್ಕ್ ನಾಂವ್ ಹಾಡ್‍ಲ್ಲೆಪರಿಂ! ಜರ್ ಕೊಣಾಯ್ಚಿ ಚಾಲ್ ಬರಿ ನಾ ತರ್ ತಾಂಚ್ಯಾ ಆವಯ್ ಬಾಪಾಯ್ಚೆರ್ ಬೋಟ್ ಜೊಕ್ತಾತ್. ಆಮ್ಚ್ಯಾ ಬಾಪಾ ಮಾಗ್ಣ್ಯಾಂತ್ “ತುಜೆಂ ನಾಂವ್ ಪವಿತ್ರ್ ಜಾಂವ್ ವ ನಾಂವಾಕ್ ಹೊಗ್ಳಿಕ್ ಜಾಂವ್” ಮ್ಹಣ್ತಾನಾ ಆಮ್ಚ್ಯಾ ಜಿಣ್ಯೆಚಾಲಿವರ್ವಿಂ ತ್ಯಾ ಬಾಪಾಕ್ ಹೊಗ್ಳಿಕ್ ಜಾಂವ್ ಮ್ಹಣ್ತಾಂವ್. ಆಶೆಂ ಆಸ್ತಾಂ, ಆಮ್ಚ್ಯಾ ಚಾಲಿಕ್ ಲಾಗೊನ್ ಕೊಣ್ ಚ್ ಆಮ್ಚ್ಯಾ ಸರ್ಗಿಂಚ್ಯಾ ಬಾಪಾಕ್ ಬೋಟ್ ಜೊಕಿನಾ ಜಾಂವ್! ಆಮ್ಚೆಂ ಉತರ್ ಸತಾಚೆಂ ಜಾಯ್ಜಯ್ ದೆಕುನ್ ಜೆಜುನ್ ಯಿ ಸಾಂಗ್ಲಾಂ, ತುಮ್ಚೆಂ ಉತರ್ ಜಾಂವ್ 'ವ್ಹಯ್' ವ 'ನ್ಹಯ್', ತಾಚ್ಯೆ ಭಾಯ್ರ್ ಕಿತೆಂಯ್ ಯೆತಾ ತರ್ ತೆಂ ಖೊಟ್ಯಾ ಸ್ಪಿರಿತಾಥಾವ್ನ್! 

ಜರ್ ಆಮ್ಚೆಂ ಉತರ್ ಸತ್ ತರ್ ತ್ಯಾ ಉತ್ರಾಕ್ ಕೊಣಾಯ್ಚಿ ಜಾಮೀನ್  ಕಿತ್ಯಾ?