ಮ್ಹಯ್ನ್ಯಾಳಿ ಜುಗಲ್ ಬಂದಿ:

‘ಜುಗಲ್ ಬಂದಿ’ ಸಬ್ದ್ ಭಾರತೀಯ್ ಕ್ಲಾಸಿಕಲ್ ಸಂಗೀತ್ ಶೆತಾಂತ್ ಚಡ್ ಪರಿಚಿತ್. ಹಾಂತುಂ ಸಂಗೀತಾಚೆಂ ಫ್ಯೂಶನ್  ಜಾತಾ. ದೋಗ್ ಸಂಗೀತ್ ಗಾರ್ ದೋನ್ ವೆವೆಗ್ಳಿಂ ವಾಜಾಂತ್ರಾಂ ಘೆವ್ನ್ ಎಕಾಚ್ ವೆಳಾ ಡುಯೆಟ್ ಖೆಳ್ತಾನಾ ಉಬ್ಜತಾ ’ಜುಗಲ್ ಬಂದಿ!’ ಚಡಾವತ್ ಸಿತಾರ್ ಆನಿ ಸಾರೊದ್ ವ ಪಿರ್ಲುಕ್ ಆನಿ ತಬ್ಲಾ ಅಪೂರ್ಭಾಯೆನ್ ಎಕಾಮೆಕಾ ಮಿಸ್ಳಾತಾತ್.

ಆತಾಂ, ಹಾಂಗಾ ಕವಿಂ ಮಧೆಂ ಜುಗಲ್ ಬಂದಿ ಸುರ್ವಾತ್ಲ್ಯಾ!!

ವೆವೆಗ್ಳೆ ಕವಿ ಎಕಾಚ್ ವಿಶಯಾಚೆರ್ ಅಪ್ಲಿಂ ವೆವೆಗ್ಳ್ಯಾ ಚುಟ್ಕುಲಾಂ ಸಾದರ್ ಕರ್ತಾತ್. ’ಜುಗಲ್ ಬಂದಿ’ ಖೆಳ್ತಾನಾ ದೊಗಾಂ ಸಮರ್ಥ್ ಸಂಗಿತ್ಗಾರಾಂ ಮಧೆಂ ಚಲ್ಚೆಂ ಡುಯೆಟ್ ತೆಂ. ಹಾಂಗಾಸರ್ ಸಾಹಿತ್ಯಾಂತ್ ಚಲ್ಚ್ಯಾ ಹ್ಯಾ ಜುಗಲ್ ಬಂದಿಂತ್ ಯ್ ಸಕ್ಡಾಂಯ್ ಸಮಾಸಮ್ ಪಂಥಾಹ್ವನ್ ದಿತಾತ್ ತಾಕಾ ತುಮಿಚ್ ಸಾಕ್ಸ್ ಜಾಯಾ. 
(ಹಿ ಜುಗಲ್ ಬಂದಿ’ ನಮಾನ್ ಬಾಳೊಕ್ ಜೆಜು’ ಮ್ಹಯ್ನ್ಯಾಳ್ಯಾರ್ ಪ್ರಸ್ತುತ್ ಜಾಲ್ಯಾ. ಹಾಂಗಾಸರ್ ಫಾಯ್ಸ್ ಕರುಂಕ್ ಪರ್ವಣ್ಗಿ ದಿಲ್ಲ್ಯಾ ಸಂಪಾದಕಾಂಚೊ ಆನಿ ಅಮೂಲ್ಯ್ ದೆಣ್ಗಿ ದಿಲ್ಲ್ಯಾ ಸಗ್ಳ್ಯಾ ಕವಿಂಚೊ ಹಾಂವ್ ಉಪ್ಕಾರ್ ಭಾವುಡ್ತಾಂ)

ಭಾಯಿಯೋಂ ಔರ್ ಬೆಹೆನೋಂ….

ಭಾಯಿಯೋಂ ಔರ್ ಬೆಹೆನೋಂ

ಚಾ ಪಿಯೆಯಾ

ವಿಕ್ತೆಂ ನ್ಹಯ್, ಪುಂಕ್ಯಾಕ್ ಚ್ ಪಿಯೆಯಾ

ಜಾಗಿಂ ಉರ್ಚೆ ಖಾತಿರ್

ಏಕ್ ಕಪ್… ಏಕ್ ಸಿಪ್.. ಚಾ…

ಪುಡೆಂ ತುಮ್ಚ್ಯಾ ದೊಳ್ಯಾಂಕ್

ನೀದ್ ಲಾಗಾನಾತ್ಲೆಪರಿಂ

ಆಮಿ ಪಳೆವ್ನ್ ಘೆತೆಲ್ಯಾಂವ್

ಧರಾ, ಚಾ ಪಿಯೆಯಾ.

ಜೊ. ಸಿ. ಸಿದ್ದಕಟ್ಟೆ, ಕಾರ್ಮೆಲಿತ್

**

ರಾನ್ನಾಚೊ ರಾಯು ಬದಲ್ ಜಾಲೊ!

ಪ್ರಾಣಿ ಪ್ರೇಮಾಂತು ಬುಡ್ಲೊ

ವೆಜಿಟೇರಿಯನ್ ಜಾಲೊ

ರಾನ್ನಾಚೆ ನಕ್ಶಾ ಬದಲ್ಲೆ…

ಫುಡೆಂ ಶಿಕಾರ್ ಆಶಿಲೊ ಅತ್ತ ಸಕ್ಟಾಲೊ ಮಿತ್ರ ಜಾಲೊ!

ಶತ್ರು ಮಿತ್ರ ಫರಕ್ ನಾ ಜಾಲ್ಲೆ

ಹೆಂ ಆಶ್ಶಿ ಕಶ್ಶಿ ಜಾಲೆ?!

ಇತೆಕ್ ಮ್ಹಳ್ಯಾರ್… ಇಲೆಕ್ಶನ್ ಆಯಿಲೆ.

**

ಖೆಳ್ತೆಲೆ ಸೊಡ್ನ್

ಖೆಳ್ ಪಳೆಯ್ತೆಲೆ ಚ್ ಸಲ್ವೊಂಚೊ

ವಿಚಿತ್ರ್ ಖೆಳ್ –

ರಾಜಕೀಯ್!

      ಶೀಲಾ ಭಂಡಾರ್ ಕರ್

**

ತಾಣೆಂ ಹಾಸ್ಕುರ್‍ಯಾ ತೊಂಡಾನ್

ಚಾ ವೊಡ್ಡಾಯ್ಲಿ

ಆಮ್ಸೊರಾನ್ ತೊಂಡಾಕ್ ವ್ಹರ್ತಾನಾ

ಜೀಬ್ ಲಾಸ್ಲಿ

ಆತಾಂ ಹುಲ್ಪಲ್ಲಿ ಜೀಬ್

ಚಾ ಪಳೆತಾನಾ ಆಂಗ್ ಕಾಡ್ತಾ!

            ವಿಲ್ಮಾ ಬಂಟ್ವಾಳ್

**

ಬಾಜಾಪಾನ್ ಚಾ ದಿಲಿ

ಕೇಜ್ರಿವಾಲ್ಯಾನ್ ಸಾರೊಣ್ ದಿಲಿ

ಕಾಂಗ್ರೆಸಾನ್ ಹಾತ್ ದಿಲೊ!

**

ಮೊತ್ ದಾನ್ ದಿಲ್ಲ್ಯಾ ಗಾಂವಾಂತ್

ಪರತ್ ಆಯ್ಲಾಂ ಮತ್ ದಾನ್

ರಾವ್ಡಿ ಗುಂಡಾ ಚೊರಾಂಕ್ ಸಯ್ತ್

ಪಾವ್ಲಾ ಹಾಂಗಾ ಲೊಕಾ ಮಾನ್

ದೆಕುನ್ ಜಾಯ್ಜೆ

ಗಾಂವ್ ಸೊಡ್ನ್ ಧಾಂವ್ಲಾಂ

ಸತ್ ನೀತ್ ಸಮಾಧಾನ್!

     ಆಲ್ವಿ ಕಾರ್ಮೆಲಿತ್

**

’ಹಾತಾ’ಚ್ಯಾ ಪಾಡ್ತಿಚ್ಯಾ

ಪುರ್ಶ್ಯಾಂವಾಂತ್

ಹಾತ್ ನಾತ್ ಲ್ಲ್ಯಾನ್ ಯಿ

ಹಾತ್ ಮೆಳಯ್ಲೊ ಕಂಯ್!

ವೋಟ್ ಮಾಗೊಂಕ್ ಆಯಿಲ್ಲ್ಯಾಂಕಡೆ

ಮಾಗ್ತೆಲ್ಯಾನ್ ಭಿಕ್ ಮಾಗ್ಲಿ ಕಂಯ್!

ಮಾಗ್ತೆಲ್ಯಾಂಚಿ ಮಿಲಾಕತ್ ಜಾಲಿ!!

**

ಎಲಿಸಾಂವಾಚ್ಯಾ ಪ್ರಚಾರಾಕ್ ವಾಪಾರ್ ಲ್ಲೆಂ

ಬ್ಯಾನರ್

ರಸ್ಯ್ತಾ ದೆಗೆಚೆ

ಮೊಶಿಚೆ ಭುಕೆಕ್ ಗ್ರಾಸ್ ಜಾತಾನಾ

ಜಮ್ಯಾಕ್ ಆಪ್ಲ್ಯಾ ಪಾಡ್ತಿಚೊ

ಚರವ್ ಸ್ಕಾಂದಲಾಚೊ ಉಡಾಸ್ ಆಯ್ಲೊ!

ವಿನೋದ್ ಕುಲಾಸೊ

**

ತೀನಾಂತ್ ದೋನ್ ವಾಂಟೆ

ಕಲ್ವಾರಿರ್ ಮೆಜೊರಿಟಿ

ಮೆಳಾತ್ ಮ್ಹಳ್ಳಿ ಗ್ಯಾರಂಟಿ

ಸಯ್ತಾನಾಚೆ ಪಾದ್ತಿಕ್!

ನಿಮಾಣೆ ಘಡಿಯೆ

ದೆವಾಚೆ ಪಾಡ್ತಿಕ್ ಸೆರ್ವೊನ್

ಮಂಗ ಕೆಲೆಂ ಸಯ್ತಾನಾಕ್

ಉಜ್ವೆ ಕುಶಿಚ್ಯಾ ಚೊರಾನ್!

**

ರಸ್ತ್ಯಾರ್ ಶಿಂಪ್ಡಾಲ್ಲ್ಯಾ

ರಗ್ತಾ ಕಿರೆಂಚ್ ಥಾವ್ನ್

ಏಕ್ ಥೆಂಬೊ ರಗತ್

ಧಾವ್ಯಾ ನಾಕ್ಶೆರ್

ಉಸ್ಳೊನ್ ಬಸ್ತಾನಾ

ಉಡಾಸ್ ಆಯ್ಲೊ ಮ್ಹಾಕಾ;

ವೋಟ್ ಘಾಲುಂಕ್ ವಿಸ್ರಾಲ್ಲೊಂ!

    ಆಂಡ್ರ್ಯೂ ಎಲ್. ಡಿ’ ಕುನ್ಹಾ, ಬಿಜೈ

**

ಶೆರಾಂತ್ಲ್ಯಾ

ರೊಳ್ಣೆಂನಿ ಲೊಳ್ಚೆ

ನಿದ್ರೆಸ್ತ್ ನರ್ತಿತ್ ನಾಗ್

ಜಿಡೆಂ ಝಡವ್ನ್ ಭಾಯ್ರ್ ಪಡ್ಲ್ಯಾತ್

ಗಲ್ಲ್ಯಾಂ ಗಲ್ಲ್ಯಾಂನಿ ಪೊಟಾಂ ಝರಯ್ತಾತ್

ಫುಂಕುನ್ ಆಸಾತ್ ಪ್ರಚಾರಾಚ್ಯೊ ಪುಂಗ್ಯೊ.

ಖರ್ಚಾಕ್ ಪುಜಾ ಕರ್ಚ್ಯಾ ಅರ್ಚಕಾಂಚೆ

ಜಬರ್ ದಸ್ತೆನ್ ಜೈಕಾರ್

ಆಮ್ಚ್ಯಾ ನಾಗಾಂಚ್ಯಾ ಮಸ್ತಕಾಂನಿ

ಚಿಮ್ಟಿ  ಭರ್ ವೀಕ್ ನಾ

ತೆ ಭಿಲ್ಕುಲ್ ಘಾಸ್ ಘಾಲ್ಚೆನಾಂತ್

 ಅನಿಲ್ ನಜ್ರೆತ್, ಬೈಂದೂರ್

ನ್ಯಾನೊ ಕಾಣಿಯೊ:

ಮಾಗ್ತೆಲ್ಯಾಂಚೆ ಭೊಂವಾರಿಂ

ವ್ಹಡ್ಲ್ಯಾ ಫೆಸ್ತಾ ದೀಸ್ ಸಾಂತಾಚೆ ಇಮಾಜಿ ಮುಕಾರ್ ಆಂಗವ್ಣ್ ಅರ್ಪಣ್. ಕಿಣಾಕಿಣಾನ್ ಲಾಂಬ್ ಲಾಯ್ನ್ ವ್ಹಾಡತ್ ವ್ಹೆತಾಲಿ. ಎಕ್ಲೆಂ ಮಾಗ್ತೆಲೆಂ ಆಂಗವ್ಣ್ ಫಾರಿಕ್ ಕರುಂಕ್ ರಾವ್ ಲ್ಲ್ಯಾಂ ಲಾಗಿಂ ಹಾತ್ ವೊಡ್ಡಾವ್ನ್ ರಾವ್ ಲ್ಲೆಂ. ತಿತ್ಲ್ಯಾರ್ ಏಕ್ ಭುರ್ಗೆಂ ತಾಚ್ಯಾ ಆವಯ್ಚೊ ಹಾತ್ ಚಿಲ್ಲುನ್ ಧಾಂವ್ಲೆಂ ಆನಿ ಹಾತಾಂತ್ಲೆ ಶೆಂಭೊರಾಂಚೆ ದೋನ್ ನೋಟ್ ವ್ಹರ್ನ್ ಮಾಗ್ತೆಲ್ಯಾ ಸ್ತ್ರೀಯೆಚೆ ಹಾತಿಂ ಘಾಲೆ.

ಲಾಯ್ನಿರ್ ರಾವ್ ಲ್ಲ್ಯಾಂನಿ ಹೆಂ ಪಳೆಲೆಂ. “ಭುರ್ಗೆಂ ಹುಶಾ…ರ್ ಆಸಾ!” ಮ್ಹಣ್ ಉದ್ಗಾರುನ್ ಮುಕಾರ್ ಗೆಲಿಂ!

**

ದೆವಾಳಾಚೆ ವಾಟೆರ್ ರಸ್ಯ್ತಾ ದೆಗೆನ್ ಮಾಗ್ತೆಲ್ಯಾನ್ ಹಾತ್ ವೊಡ್ಡಾಯ್ಲೊ ಮ್ಹಣ್ ಮಾಮಾಕ್ ಪಿಂತೆಗ್ ಚಡ್ಲೊ.

“ ತುಕಾ ಕಿತೆಂ ವ್ಹಡ್ಲೊ ರೋಗ್ ಆಯ್ಲಾ? ಹಾತ್ ದಾಕಯ್…ಹಾಂ.. ಇತ್ಲೆ ಘಟ್ ಆಸಾತ್!

ಪಾಂಯ್? ಕಾಂಯ್ ತೊಂದ್ರೆ ನಾಂತ್! ದೊಳೆ… ಹಾಂ ದಿಸ್ತಾತ್! ತೋಂಡ್… ಉಲಂವ್ಕ್ ಜಾತಾ… ಆನಿ ಕಿತೆಂ ಸಂಕಡ್ ತುಕಾ ಕಾಮ್ ಕರ್ನ್ ಜಿಯೆಂವ್ಕ್?”

ಮಾಗ್ತೆಲೊ ಉಸ್ಮಡ್ಲೊ, “ಕಾಳ್ಜಾಂತ್ ದೋನ್ ಬುರಾಕ್ ಆಸಾತ್ ಕಂಯ್.. ಹರ್ದೆಂ ಪಿಂದುನ್ ದಾಕಂವ್?”

**

ಟ್ರಾಫಿಕ್ ಸಿಗ್ನಲ್ ಪಡ್ಲೆಂ… ಹಾಕಾಚ್ ರಾಕುನ್ ರಾವ್ ಲ್ಲಿ ತಿ ಮ್ಹೆಳ್ಕುರಿ ಚಲಿ, ಥಾಂಬ್ ಲ್ಲ್ಯಾ ಕಾರಾ ಸರ್ಶಿಂ ಧಾಂವ್ಲಿ. ಹಾತ್ ವೊಡ್ಡಾವ್ನ್ ರಾವ್ಲಿ. ಕಾರಾಚೊ ಗ್ಲಾಸ್ ನಿಸರ್ಲೊ.

ದಡಂಗ್ ಜಿವಾಚೊ ಮನಿಸ್ ಭಿತರ್, “ಕಿತ್ಲೆ ದೀಜೆ?” ವಿಚಾರಿ.

“ತುಮ್ಚೆ ಖುಶೆಚೆ ಸಾಭ್!” ಚಲಿಯೆಚೆ ದೊಳೆ ಫುಲ್ಲೆ!

“ಯೇ, ಭಿತರ್ ಬಸ್” ತ್ಯಾ ಮನ್ಶಾನ್ ವೋಂಟ್ ಲೆಂವ್ಲೆ.

ದಿವೊಡ್ ಘುಡ್ಡಾಯಿಲ್ಲೆಪರಿಂ ತೆಂ ಚೆಡುಂ ಥಂಯ್ಚೆಂ ಪಾಟಿಂ ಪಳೆನಾಸ್ತಾಂ ಧಾಂವ್ಲೆಂ!

**

’ಪೆಟೆ ಆಸಾತ್, ಚತ್ರಾಯ್!’ ಮ್ಹಣ್ ಬೋರ್ಡ್ ಗೆಟಿರ್ ಆಸ್ಲ್ಯಾರೀ ಭಿತರ್ ಆಯಿಲ್ಲ್ಯಾ ಮಾಗ್ತೆಲ್ಯಾಕ್ ತಿಣೆಂ ಜ್ಯೋರ್ ಕೆಲೆಂ,

“ಥಂಯ್ ಬೋರ್ಡ್ ಘಾಲ್ಯಾರೀ ತುಮ್ಕಾಂ ಪೆಟ್ಯಾಂಚೆಂ ಭೆಂ ನಾಂಗೀ?”

ಮಾಗ್ತೆಲೊ ಶೆಳ್ಯಾ ತಾಳ್ಯಾನ್ ಗುಣ್ಗುಣ್ಲೊ, “ಪೆಟ್ಯಾಂಚೆಂ ಭೆಂ ಪುಣೀ ನಾ. ಪುಣ್ ತಾಂಕಾಂ ಪೊಸ್ಚ್ಯಾ ಮನ್ಶಾಂಚ್ಯಾ ದೊಳ್ಯಾಂಕ್ ಪಳೆತಾನಾ ಭೆಂ ದಿಸ್ತಾ!”

**

“ತುಕಾ ಭಿಕ್ ಮಾಗುಂಕ್ ಲಜ್ ದಿಸಾನಾ?” ಮದಾಮ್ ಗರ್ಜಾಲಿ.

“ತುಜ್ಯಾ ದೆವಾಳಾಂತ್ಲೊ ದೇವ್ ತುಕಾ ಹೆಂಚ್ ಸವಾಲ್ ವಿಚಾರ್ತಾಗಿ?” ಮಾಗ್ತೆಲೊ ಮುಕಾರ್ ಗೆಲೊ.

**

“ಮ್ಹಾಕಾ ಭುರ್ಗಿಂ ಮ್ಹಳ್ಯಾರ್ ಭಾರೀ ಕೊಂಡಾಟೊ ಆಲಿಸಾ…” ಪಾರ್ಕಾಂತ್ ಆಯ್ಕಾಲ್ಲೆಂ ಉಲೊಣೆಂ!

ತಿತ್ಲ್ಯಾರ್ ಎಕ್ಲಿ ತರ್ನಿ ಆವಯ್, ಮಾಗ್ತೆಲಿ, ಹಾಂಡ್ಯೆರ್ ಭುರ್ಗ್ಯಾಕ್ ಘೆವ್ನ್ ಆಯ್ಲಿ.

“ಆಯ್ಲಿ ಮಾರ್.. ತ್ಯಾ ಭುರ್ಗ್ಯಾಚ್ಯಾ ನಾಕಾಂತ್ ದೆಂವ್ತಾ ಪಳೆ ಮೊಂವ್.. ವ್ಯಾಕ್!” ತಿ ಚಡ್ಪಡ್ಲಿ.

**

“ತುಂ ಉಪಾಶಿಂ ಪಡ್ಲ್ಯಾರೀ ವ್ಹಡ್ ನಾ ಪುತಾ, ಹೆರಾಂ ಮುಕಾರ್ ಹಾತ್ ವೊಡ್ಡಾಯ್ನಾಕಾ…”

ಆವಯ್ನ್ ಪುತಾಚೆಂ ಮಾತೆಂ ಪೊಶೆವ್ನ್ ಸಾಂಗ್ಲೆಂ.

ಹಿಚ್ ಆವಯ್ ಆಮ್ಗೆರ್ ಯೇವ್ನ್ ಪುತಾಕ್ ಶಿಕಯ್ಜೆ ಮ್ಹಣ್ ಹಾತ್ ವೊಡ್ಡಾಯ್ತಾಲಿ, ಹರ್ಯೆಕಾ ಮ್ಹಯ್ನ್ಯಾಂತ್!!

**

ತೊ ಮಾಗ್ತೆಲೊ ದೆವಾಳಾಚ್ಯಾ ಗೆಟಿಕಡೆ ಸದಾಂಚ್ ಬಸ್ತಾ. ಆಜೂನ್ ದೆವಾಳಾ ಭಿತರ್ ಗೆಲ್ಲೊ ನಾ!

“ತುಂ ಕಿತ್ಯಾ ಭಿತರ್ ವ್ಹಚುನ್ ಮಾಗಿನಾಂಯ್? ದೇವ್ ದಿತಾ” ವಿಚಾರ್ಲೆಂ ಎಕ್ಲ್ಯಾನ್.

“ತೊ ದೀನಾ ಮ್ಹಣ್ ಹಾಂವ್ ಪಕ್ಕಾ ಜಾಣಾಂ” ಮಾಗ್ತೆಲೊ ಹಾಸ್ಲೊ.

“ಕಿತ್ಯಾ ಮ್ಹಣಾಂಯ್?” ಹೊ ಆಜ್ಯಾಪ್ಲೊ.

“ಇತ್ಲಿಂ ಜಣಾಂ ಭಿತರ್ ವೆತಾತ್, ಭಾಯ್ರ್ ಯೆತಾತ್… ಜರ್ ದೇವ್ ತಾಂಕಾಂ ದಿತಾ ತರ್ ಮ್ಹಾಕಾಯ್ ಕಾಂಯ್ ದಿತಿಂ..”

**

“ಹಾಂವೆಂ ಮಾಗ್ ಲ್ಲೆಂ ದೇವ್ ದೀನಾ” ಶಿಸಾಚ್ಯಾ ತಾಳ್ಯಾಂತ್ ನಿರಾಶಾ ನಿಶೆತಾಲಿ.

“ಮಾಗ್ ಲ್ಲೆಂ ದಿಂವ್ಕ್ ನಾ, ಜಾಂವ್ಕ್ ಪುರೊ, ಪುಣ್ ತುಕಾ ಗರ್ಜೆಚೆಂ ದಿಂವ್ಕ್ ನಾಂಗಿ?” ಗುರುನ್ ವಿಚಾರ್ಲೆಂ.

“ಹಾಂ! ದಿಲಾಂ!” ಶಿಸ್ ವೊಪ್ಲೊ.

“ತರ್ ಜಾಣಾ ಜಾ.. ತುವೆಂ ಮಾಗ್ ಲ್ಲ್ಯಾ ಗರ್ಜೆಪ್ರಾಸ್ ಹೆರ್ ಏಕ್ ಗರ್ಜ್ ಪ್ರಮುಖ್ ಆಸ್ ಲ್ಲಿ”

**

ಹೊ ಮಾಗ್ತೆಲೊ ತ್ಯಾ ಪ್ರಾಯ್ವಂತಾ ಲಾಗಿಂ ವ್ಹಚೊನ್ – “ಕಾಂಯ್ ಚಿಲ್ಲರ್ ಪುಣಿ ದೀ.. ಖೊಮ್ಟ್ಯಾಂತ್ ಪೂತ್ ನಿದ್ಲೆಕಡೆ ಆಸಾ”

ಪ್ರಾಯ್ವಂತ್ ಹುಸ್ಕಾರ್ನ್ ರಡುಂಕ್ ಲಾಗ್ಲೊ!!

ಮಾಗ್ತೆಲೊ ಭಿಯೆಲೊ, ಹೆಣೆಂ ಮ್ಹಾತಾರೊ ರಡ್ತಾ.. ತೆಣೆಂ ಲೋಕ್ ಪಳೆತಾ!

“ಕಿತೆಂ ಜಾಲೆಂ ಮಾಮಾ… ಕಿತ್ಯಾ ರಡ್ತಾಯ್?” ಮಾಗ್ತೆಲ್ಯಾನ್ ಹಾಳ್ವಾಯೆನ್ ಸವಾಲ್ ಕೆಲೆಂ.

“ಸಕಾಳಿಂ ಹಾಂವೆಂ ಮ್ಹಜ್ಯಾ ಪುತಾಲಾಗಿಂ ಪಯ್ಶೆ ವಿಚಾರ್ ಲ್ಲ್ಯಾಕ್ ’ವ್ಹಚೊನ್ ಭಿಕ್ ಮಾಗ್’ ಮ್ಹಣಾಲೊ” ಮಾಗ್ತೆಲ್ಯಾನ್ ಜಾಪ್ ಕಾಡ್ಲಿ ನಾ.

ಹಾಂಗಾ ಜಿಣಿ ’ಎಕ್ ಚ್ ದೀಸ್’ ಮ್ಹಣ್ ಪಾತ್ಯೆಲ್ಯಾ ಉಪ್ರಾಂತ್…..

ಮರಣ್!

ಆಶೆನಾಸ್ತಾಂ ಯೆಂವ್ಚೆಂ ಭಾಗ್?!

ದೇವ್, ಕವಿತಾ ಉಪ್ರಾಂತ್ ಸದಾಂನಿತ್ ಧೊಸ್ಚಿ ಗಜಾಲ್ ಆಸ್ಲ್ಯಾರಿ ತೆಂ ಮರಣ್; ಮ್ಹಜ್ಯಾ ವಾಂಟ್ಯಾಕ್!

ಹಾಂವ್ ಮೊರೊನ್ ಭದ್ರ್ ಕೆಲ್ಲ್ಯಾ ಪೆತೆಂತ್ ಸ ಫುಟಿಂಚ್ಯಾ ಫೊಂಡಾಭಿತರ್ ನಿದ್ಲ್ಯಾರ್ ಯಿ, ಖಂಚ್ಯಾನ್ ಕಿಡಿ ಯೆತಾತ್ ಗಾಯ್… ಎಕೆಕ್ ಚ್ ವಿಶ್ವೆ ತ್ಯಾ ಕಿಡಿಂನಿ ಗ್ರಾಸುಕ್ ಖಾತಾನಾ ಹಾಂವ್ ಕಶೆಂ ಸೊಸಿನ್ ಗಾಯ್…. ಮ್ಹಳ್ಳ್ಯಾ ಚಿಂತ್ನಾಂಸಂಗಿಂ ಸಪ್ಣಾಂ ಪಡೊನ್ ಲ್ಹಾನ್ಪಣಾರ್ ನೀದ್ ನಾಸ್ತಾಂ ವ್ಹಳ್ವಳ್ ಲ್ಲೆ ದೀಸ್ ಮ್ಹಾಕಾ ಉಡಾಸ್ ಅಸಾತ್.

ಫಿಲೊಸೊಫಿ ವಿದ್ಯಾರ್ಥಿ ಜಾವ್ನಾಸ್ತಾನಾ ಮರಣ್ ಏಕ್ ವೆಂಗ್ಯ್ ಮ್ಹಣ್ ಭೊಗ್ ಲ್ಲೆಂಯ್ ಆಸಾ! ಮೆಲ್ಲೆ ವೆಕ್ತಿ ಖಾತಿರ್ ಹರ್ದೆಂ ಬಡವ್ನ್ ರಡ್ಚೆಂ ಕಿತ್ಯಾ ಮ್ಹಣ್ ಸವಲಾಂ ಉದವ್ನ್, ಮೆಲ್ಯಾ ಉಪ್ರಾಂತ್ ಪುನರ್ ಜಿವಂತ್ಪಣ್ ಆಸಾ ಮ್ಹಣ್ ಪಾತ್ಯೆಂವ್ಚ್ಯಾಂನಿ ಆಮಿ ಕಿತ್ಯಾ ಮೊಳಾಬ್ ಕೊಸ್ಳಾಲ್ಲೆಪರಿಂ ಬಸ್ಚೆಂ ಮ್ಹಣ್ ವಾದ್ ಯಿ ಮಾಂಡ್ ಲ್ಲೊ ಆಸಾ.

ಮ್ಹಜೊ ಬಾಪ್ಪು… ಮಿಶ್ಯಾಂಗಾರ್ ಮಾವ್ರಿಸಾಬ್ ಮ್ಹಣ್ ನಾಂವಾಡ್ದಿಕ್. ಆಮಿ ಲ್ಹಾನ್ ಆಸ್ತಾನಾ ಖಾಂದಾರ್ ಭೊಂವ್ಡಾಯಿಲ್ಲೊ ಬಾಪ್ಪು… ಇಸ್ಕೊಲಾಚಿಂ ಮೆಟಾಂ ಚದುಂಕ್ ತಯಾರ್ ಜಾತಾನಾ ಆಮ್ಕಾಂ ಚಾರ್ ಯಿ ಜಣಾಂಕ್ ಯುನಿಫಾರ್ಮ್ ಥಾವ್ನ್ ಧರ್ನ್ ಬುಕಾಚ್ಯಾ ಬಾಂಯ್ಡಾಪರ್ಯಾಂತ್ ವಿಶೇಸ್ ಕಾಳ್ಜಿ ಘೆವ್ನ್ ಶಿಸ್ತೆನ್ ಆಮ್ಚೆ ಪಾಟಿಕ್ ಲಾಗ್ಚೊ ಬಾಪ್ಪು…. ಏಕ್ ದೀಸ್ ಸರ್ಲೊ!

ಹಾಂವ್ ರಡೊಂಕ್ ನಾ! ಆಸಲೊ ಏಕ್ ಬಾಪ್ಪು ದಿಲೊಯ್ ನೆ ಮ್ಹಣ್ ಆರ್ಗಾಂ ದಿಲಿಂ.

’ಮೊರಾನ್ ಸಾಂಡ್ಲೆಲಿಂ ಪಾಕಾಂ’ ಮ್ಹಜೆ ಕವಿತಾ ಪುಸ್ತಕ್ ಫಾಯ್ಸ್ ಜಾಲ್ಲೆಂ ಮಾತ್ರ್. ತ್ಯಾ ಸಂತೊಸಾಚ್ಯಾ ಸುವಾಳ್ಯಾರ್ ಬಾಬ್ ಸರ್ಲೊ! ಮೊರ್ಣಾಚ್ಯಾ ಶೆರ್ಮಂವಾರ್ ಬಾಪ್ ಆಲ್ವಿ ಕಾರ್ಮೆಲಿತ್ ಹಾಣಿಂ ’ಮೊರಾನ್ ಸಾಂಡ್ಲೆಲಿಂ ಪಾಕಾಂ’ ಕವಿತಾ ಮೊರ್ಣಾಕ್ ಸರಿ ಕರ್ನ್ ವಿಸ್ಕಾಳಾಯ್ಲಿ.

ದುಖಾಚೊ ಏಕ್ ಯಿ ಥೆಂಬೊ ಮ್ಹಜ್ಯಾ ದೊಳ್ಯಾಂನಿ ಉದೆಲ್ಲೊನಾ!

ನಿಮಾಣೆಂ, ಭಾವಾಂನಿ ಪೆಟೆಕ್ ಖಾಂದ್ ದಿತಾನಾ.. “ಹೋ!! ಬಾಬ್ ಆನಿ ಆಸನಾ!” ಮ್ಹಳ್ಳೆಂ ಭೊಗಾಪ್ ಉದೆವ್ನ್ ಅಪಾಪಿಂಚ್ ದೊಳೆ ಭರುನ್ ಆಯ್ಲೆ. ವೋಂತ್ ಚಾಬೊನ್ ಧರ್ನ್ ದೊಳೆ ದಾಂಪುಣ್ ರಡ್ಲೊಂ!

ದೊಳೆ ಉಗಡ್ತಾಂ, ಇಗರ್ಜ್ ಖಾಲಿ… ಸಕ್ಡಾಂ ಸಿಮಿಸ್ತ್ರೆ ಸರ್ಶಿಂ ಚಮ್ಕಾತಾಲಿಂ.

ತವಳ್ ಥಾವ್ನ್ ಮೊರ್ಣಾಕ್ ಗೆಲ್ಯಾರ್ ಅಪಾಪಿಂಚ್ ದುಖಾಂ ಫುಟ್ತಾತ್. ಖಂಯ್ ಆಸಾ ರಾಜಾಂವ್?

ಮೊರ್ಣಾ ಸಾಂಗಾತಾ  ಹಾಂವೆಂ ಶಿಕ್ ಲ್ಲೆ ಜಿಣ್ಯೆ ಪಾಠ್ ಮುಕಾರುನ್ ಗೆಲೆ.

ಹ್ಯಾಚ್ ವರ್ಸಾಚ್ಯಾ ಸುರ್ವೆರ್ ಏಕ್ ಆನಿರೀಕ್ಷಿತ್ ಮೊರ್ಣ್!

ದೋನ್ ದಿಸಾ ಆದಿಂಚ್ ಉಲಯಿಲ್ಲ್ಯಾ ವೆಕ್ತಿಚೆಂ ಅವ್ಚಿತ್ ನಿರ್ಗಮನ್! ಪ್ರಾಯ್ ಕಾಂಯ್ ವಿಸಾಂಚಿ ಆಸತ್.

ದೊಳೆಭರ್ ಸಪ್ಣಾಂ ಘೆವುನ್ ವಾಡ್ಚೆಂ ಚೆಡುಂ ತೆಂ; ಲ್ಹಾನ್ ಥಾವ್ನ್ ವ್ಹಳ್ಕಾತಾಲೊಂ. ದುಬ್ಳಿಕಾಯೆಚಿಂ ದರಿದ್ರ್ ಮುಖಾಂ ಪಳೆಲ್ಲ್ಯಾ ತಾಕಾ ಅಪುಣ್ ಉಂಚ್ಲ್ಯಾ ಮಟ್ಟಾಕ್ ಪಾವ್ತಾಚ್ ಆಪ್ಣಾಪರಿಂ ಕಷ್ಟೊಂಚ್ಯಾಂಕ್ ತೆಂಕೊ ಜಾಂವ್ಚಿ ಖತ್ಕತಿ ಉರ್ಭಾ ತಾಚ್ಯಾ ಉತ್ರಾಂನಿ ನಿಶೆತಾಲಿ.

ಸ್ವಭಾವಾನ್ ಮಾತ್ಶೆಂ ರಾಗಿಶ್ಟ್, ಪುಣ್ ತಿತ್ಲೆಂಚ್ ಭೊಳೆಂ… ಆಪ್ಣಾಚಿ ಚುಕ್ ಘಡ್ಯೆನ್ ವ್ಹಳ್ಕುನ್ ಸುಧಾರ್ಸುನ್ ವೆಚೊ ಮನೋಭಾವ್.

ಮ್ಹಾಕಾಚ್ ಸಲಹಾ ದಿತಾಲೆಂ ತೆಂ! ತುಜೆಂಕಾಮ್ ಬರ್‍ಯಾನ್ ಕರ್’ – ಹೊ ತಾಚೊ ಸದಾಂಚೊ ಆನಿ ಆಕ್ರೆಚೊ ಶುಭಾಶಯ್!

ತ್ಯಾ ಅವ್ಚಿತ್ ಮೊರ್ಣಾನ್… ಕೊಣೆಂಗಿ ಬಳಾನ್ ಕಾನ್ಸುಲಾರ್ ಥಾಪಡ್ ಮಾರ್ ಲ್ಲೆ ಪರಿಂ ಮ್ಹಾಕಾ ಜಾಗಯ್ಲೆಂ.

ದೊಳೆ ರಾಜಾಂವಾ ಭಾಯ್ರ್ ಭಿಜ್ತಾಲೆ.

ವಿಸಾಂಚೆ ಪಿರಾಯೆರ್ ಅವ್ಚಿತ್ ಉಟೊನ್ ಗೆಲ್ಲ್ಯಾಕ್ ನಿಯಾಳುನ್ ಏಕ್ ವೋಳ್ ಆಶಿ ಆಯ್ಲಿ:

ತುವೆಂ ಲಿಕುನ್ ಸೊಡ್ ಲ್ಲಿ ಅರ್ದಿ ವೋಳ್

ಮ್ಹಜಿಂ ನಕ್ಲಾಂ ಕರಿ

ವಿಚಾರ್ನ್- “ತುಂ ಕೆನ್ನಾಂ ಪೂರ್ಣ್ ಕರಿ?”

ಹಾಂಗಾ ಕಿತ್ಲೆ ದೀಸ್? ಕಿತ್ಲ್ಯೊ ರಾತಿ? ಕೆಲೆಂಡರಾಂ ಕೊಣೆಂ ಕೆಲ್ಲಿಂ… ದೀಸ್, ಮ್ಹಯ್ ನೆ, ವರ್ಸಾಂ ಕಿತೆಂ ಮೆಜುಂಕ್?

ಮ್ಹಾಕಾ ಏಕ್ ಸತ್ ಝಳ್ಕಾಲೆಂ! ಜಿವಿತ್ ಮ್ಹಳ್ಯಾರ್ “ಏಕ್ ದೀಸ್”. ವ್ಹಯ್, ಎಕ್ ಚ್ ದೀಸ್!

ತೊ ಕಿತ್ಲೊ ಲಾಂಬ್, ಕಿತ್ಲೊ ಮಟ್ವೊ ಹಾಂವ್ ನೆಣಾಂ. ಹಾಂವ್ ಹ್ಯಾ ಎಕಾ ದಿಸಾಂತ್ ’ರಾತ್-ದೀಸ್’ ಮ್ಹಣ್ ಫರಕ್ ಕರುಂಕ್ ವ್ಹಚನಾ. ಮ್ಹಯ್ ನೊ, ವರ್ಸ್ ಮ್ಹಣ್ ಲೇಕ್ ಘಾಲಿನಾಂ.

ಹಾಂಗಾ ಜಿವಿತ್ ’ಎಕ್ ಚ್ ದೀಸ್’ ಮ್ಹಣ್ ಪಾತ್ಯೆಲ್ಯಾ ಉಪ್ರಾಂತ್… ಮ್ಹಜೊ ಭೊಂವೊರ್ ಬದಲ್ಲಾ.. ದಿಶಾ ಬದಲ್ಲ್ಯಾ… ಅಪ್ರೋಚ್ ಬದಲ್ಲಾ. ಕಿತೆಂ ಜಾಂವ್, ಕಶೆಂ ಜಾಂವ್, ’ಮ್ಹಜೆ ಕಾಮ್ ಬರ್‍ಯಾನ್ ಕರ್ನ್’, ಹಾಂವ್ ಹೊ ’ಏಕ್ ದೀಸ್’’ ಸಾರುಂಕ್ ಶಿಕೊನ್ ಆಸಾಂ.

ಚುಕೊನ್ ಪಡ್ಲ್ಯಾರ್ ವೆಳಾ ಆದಿಂ ಉಟೊನ್ ಗೆಲ್ಲ್ಯಾಚಿ ಯಾದ್ ಆಯ್ಲ್ಯಾರ್ ಪುರೊ.. ಪರತ್ ಸುಡ್ಸುಡಾಯೆನ್ ಕಾಮಾಕ್ ಲಾಗ್ತಾಂ.

ಅತಾಂ ಧಯ್ರಾನ್ ಮ್ಹಣುಂ….

ಮರಣ್!

ಆಶೆನಾಸ್ತಾಂ ಯೆಂವ್ಚೆಂ ಭಾಗ್!

ತವಳ್ ರಾತ್ ಜಾಲ್ಲಿ!

ತವಳ್ ರಾತ್ ಜಾಲ್ಲಿ!

ರಾತ್ ಜಾಯ್ಜೆಚ್ ಆಸ್ಲಿ;

ಉಜ್ವಾಡಾನ್

ಪರ್ಜಳುಂಕ್!

**

ನಿಗೂಢ್ ರಾತ್…

ಬೊಂಟೆಕ್ ಲಾಗ್ಚಿ ಮನ್ಜಾತ್

ಪೃಥ್ವೆ ಪಾಸ್ಳೆಂತ್ ನಿದ್ರೆಸ್ತ್.

ವಾಂಟೆ ಘಾಲ್ಚಿ ಮನ್ಶಾ ಜಾತ್

ಶೆಳಿಯೆ ಪಾಟ್ಲ್ಯಾನ್ ಲಾಗ್ಲ್ಯಾ,

ಪೊರ್ವಾಂ ಫೆಸ್ತ್!

**

ಚುಡಿಚ್ಯಾ ಉಜ್ವಡಾಂತ್

ತಾಚೆಂ ವದನ್ ದಿಸ್ಲೆಂ

ತರೀ ವ್ಹಳಕ್ ಧರ್‍ಲಿ ನಾ!

ಸುರ್ಯಾಚ್ಯಾ ಉಜ್ವಾಡಾ ಮುಕಾರ್

ಚುಡಿಚೊ ಉಜ್ವಾಡ್

ಕಿತೆಂ ಮ್ಹಣ್

ವ್ಹಳಕ್ ಧರಿತ್?

**

ಆದಾಂವ್ನ್ ಫಳಾಕ್ ಮಾರ್ ಲ್ಲೊ ಘಾಸ್

ಜುದಾಸಾನ್ ಪೊಲ್ಯಾರ್ ದಾಂಬ್ ಲ್ಲೊ ಕೀಸ್

ನವ್ಯಾ ಇತಿಹಾಸಾಕ್

ಬರಯಿಲ್ಲೆಂ ಪ್ರಸ್ತಾವನ್

**

ಜರ್ ತಾಣಿಂ ತಾಚೆ ಹಾತ್

ಭಾಂದುಂಕ್ ನಾತ್ಲೆ ಆನಿ ವೆಡೊ ನಾತ್ಲೊ

ತರ್ ತೊ

ನೊವಾಯ್ ನೊವಾಂಕ್ ಸೊಡ್ನ್

ಧಾಂವ್ತೊ

ಉಮೊ ದೀವ್ನ್ ಧಾಂವ್ ಲ್ಲ್ಯಾಕ್

ಸೊಧುನ್!

**

ತೆ ರಾತಿಂ ತಾಕಾ

ಧರ್‍ಲೊಚ್ ಮ್ಹಣ್

ಕಿಡ್ಕಿಡೊನ್ ಹಾಸ್ಲೊ ಶಾಸ್ತ್ರಿ…

ಉಜ್ವಾಡ್ ಮುಟಿಂತ್

ಧರುಂಕ್ ಜಾತಾವೆ ಕಾಯ್ಫಾಸಾ?

**

ತೊ ’ಉಜ್ವಾಡ್’ ಘೆವ್ನ್ ಉಗ್ಯಾನ್

ಭೊಂವ್ತಾಲೊ

ತಾಚೆ ಸಾಂಗಾತಿ ’ತಲ್ವಾರ್’

ಪೊತ್ಯಾಂತ್ ಲಿಪವ್ನ್ ಯಿ

ಕಾಂಪ್ತಾಲೆ.

**

’ತಲ್ವಾರ್ ಭಾಯ್ರ್ ಕಾಡುಂ,

ಸೊಮ್ಯಾ?” ಪೆದ್ರುಚೆಂ ಸವಾಲ್.

“ಸಿಮಾಂವ್, ಭಿಂವ್ಕುರ್‍ಯಾಂಕ್

ತಲ್ವಾರ್ ಯಿ ರಾಕಣ್ ದೀನಾ!”

**

ತಾಂಚೆಲಾಗಿಂ ಆಸ್ ಲ್ಲೆಂಚ್ ತಿತ್ಲೆಂ –

’ಖುರ್ಸಾಚೆಂ ರುಕಾಡ್’

ರುಕಾಡ್ ಚ್ ತಾಂಚೆ ಸುಕೆ ಆತ್ಮೆ

ಲೆಕುನ್

ಸೊಮ್ಯಾನ್ ಖಾಂದ್ ಮಾರ್ಲೊ.

**

ಪೆದ್ರುನ್ ನೆಗಾರ್ತಾನಾ

ಜುದಾಸಾನ್ ವಿಕ್ರಿತ್ ಕರ್ತಾನಾ

ಶಿಸ್ ಪೊಳ್ತಾನಾ

ಬಾಪ್ ಜಾಪ್ ಕಾಡಿನಾಸ್ತಾಂ

ಮೊನೊ ಉರ್ತಾನಾ

ತಾಕಾ

ತವಳ್ ರಾತ್ ಜಾಲ್ಲಿ!

(ಹಿಂ ಚುಟುಕಾಂ "ಕಿಟಾಳ್ .ಕಾಮ್" ಚೆರ್ ಫಾಯ್ಸ್ ಜಾಲ್ಯಾಂತ್.. ಲಿಂಕ್ ಪಳೆಯಾ)

 http://kittall.com/kitall/index.php?action=kavitha_inner&type=79

(ಹೆಂ ಬರಪ್ ನಮಾನ್ ಬಾಳೊಕ್ ಜೆಜು’ ಮ್ಹಯ್ನ್ಯಾಳ್ಯಾರ್ ’ಝೀರೊ ಆನಿ ಏಕ್’ ಅಂಕಣಾಂತ್ ಫಾಯ್ಸ್ ಜಾಲ್ಲೆಂ ಪಯ್ಲೆಂ ಬರಪ್. ಹೆಂ ಕಿತ್ಯಾಕ್ ಗಿ ಮ್ಹಾಕಾ ಚಡ್ ಆಂವಡ್ತಾ. ತುಮಿಯ್ ವಾಚುನ್ ಕಶೆಂ ಲಾಗ್ಲೆಂ ಸಾಂಗಾ)

ಆಮ್ಲೆಟ್ ಗಾಡಿ ಯೆ ಮುಕಾರ್ ಪರ್ಮಳ್ ಘೆತಾಲಿ ಜಿಣಿ!

’ಶವರ್’ ಆನ್ ಅಸ್ ಲ್ಲೆಂ. ಪಂದಾ ಬಸ್ ಲ್ಲ್ಯಾ ತಾಚೆರ್ ನಿರಂತರ್ ಉದ್ಕಾ ಝರ್ ವ್ಹಾಳ್ತಾಲಿ. ತೊ ಶವರಾ ಪಂದಾ ಬಸೊನ್ ದೇಡ್ ಘಂಟೊ ಉತರ್ಲಾ, ಆನಿಕೀ ಉಟೊಂಕ್ ಅಯ್ಕನಾ. ತಾಚೆ ದೊಳೆ ಬಾತ್ ರುಮಾಂತ್ಲೆ ವೊಣ್ತಿಕ್ ಖಿಳೋನ್ ರಾವ್ಲ್ಯಾತ್… ಮತ್ ಯಿ ಶೂನ್ಯ್…. ತಾಚಿ ಕಾಳ್ಜಾ ಉಡಿ ಶವರಾಂತ್ಲ್ಯಾನ್ ದೆಂವ್ಚ್ಯಾ ಉದ್ಕಾ ನಿಮ್ತಿಂ ಲಿಪ್ಲ್ಯಾ.

ಸಗ್ಳೆಂ ಶೂನ್ಯ್…. ಸಂಪೂರ್ಣ್ ವ್ಯರ್ಥ್!

ಜಿವಿತ್ ಚ್ ಕಚ್ರೊ…. ಕಿತೆಂ ಆಸಾ ಜಿಣ್ಯೆಂತ್, ಮಾತ್ತಿ?

ಜಬ್ಬೊರ್ ಸಪ್ಣೆಲಿ ತೊ. ಮೊಗಾರ್ ಪಡ್ಲ್ಯಾರ್ ಜಿಣಿ ಸುಡ್ಸುಡಿತ್ ಮ್ಹಣ್ ಪಳೇವ್ನ್ ಜಾಣಾಸ್ಲೊ. ಅಚಾನಕ್ ತೊ ಯಿ ಮೊಗಾರ್ ಪಡ್ಲೊ. ನವೊಚ್ ಅನ್ಭವ್… ಎಸ್ಸೆಮೆಸ್ಸಾಂತ್ಲೊ ಮೋಗ್ ಕೊಂಬ್ರೆ ಫುಟೊನ್ ಕಾಟ್ ತುಟ್ಚೆ ತಿತ್ತುನ್ ಪಾವ್ಲೊ. ’ತೆಂ’ ಏಕ್ ಬಾಕಿ ಆಸ್ ಲ್ಲೆಂ.. ತೆಂಯಿ ಜಾಲೆಂ! ಅತಾಂ ತಾಚೆಂ ಮುಸ್ಕಾರ್ ಪಳೆಂವ್ಕ್ ಗಲೀಜ್. ತಾಂಚ್ಯಾ ಉಲವ್ಣ್ಯಾಂತ್ ಕಾಂಯ್ ಥ್ರಿಲ್ ಉರೊಂಕ್ ನಾ. ’ತೆಂ’ ಕಾಂಯ್ಚ್ ಜಾಂವ್ಕ್ ನಾತ್ಲೆ ಪರಿಂ ಗಾಗ್ರೊ ಪಾಪುಡ್ನ್ ಗೆಲೆಂ. ಹೊ ಬಾರಾಕ್ ಗೆಲೊ.. ಪಿಯೆಲೊ…. ಮೆಲ್ವಿನ್ ಲುದ್ರಿಗಾಚಿ ಕವಿತಾ ತಾಣೆಂಯ್ ವಾಚ್ ಲ್ಲಿ… ಗ್ಲಾಸ್ ಹಾತಿಂ ಧರ್ನ್ ಗುಣ್ಗುಣ್ಲೊ… ಬಾಪಯ್ ಕೊಪಾಂತ್ಲೆಂ ಪಿಯೆ ಪುತಾ, ಸೊಡಿನಾಕಾ ಆವಯ್ಚೆಂಯ್… ಪಿಯೆ ಪಿಯೆ…” ಛೆ! ಜೀಬ್ ದಾಡ್ಡ್ ಜಾಲ್ಲಿ…. ಥ್ರಿಲ್ ನಾ.

ಪಿಯೆಂವ್ಚೆಂ ಸೊಡ್ಲೆಂ…. ಧುಂವೊರ್ ಧರ್ಲೊ….

ಧುಂವೊರ್ ವೊಂಟಾಂತ್ಲ್ಯಾನ್ ಉಭೊನ್ ದೆದೆಸ್ಪೊರ್ ಆತ್ಮ್ಯಾ ಪರಿಂ ವಾರ್‍ಯಾರ್ ಫುಲ್ತಾನಾ ಖುಶಿ ಜಾಲಿ. ಕಿತ್ಲೆ ದೀಸ್? ವೊಂಟ್ ಕಾಳೆ ಜಾಲೆ….

ಧುಂವ್ರಾ ಪೆಕೆಟ್ ತಳ್ಯಾಕ್ ಉಡಯ್ಲಿ. ತಳ್ಯಾ ದೆಗೆರ್ ಬಸೊನ್ ಕವಿತಾ ಘುಂತ್ಲಿ.

ಕವಿತೆನ್ ತಾಕಾ ಜಿಯೆಂವ್ಕ್ ಯಿ ಸೊಡ್ಲೆಂನಾ.. ಮೊರೊಂಕ್ ಯಿ!

ಕೊಣೆಂಗಿ ತಾಚೆ ವಾಡ್ ಲ್ಲೆ ಕೇಸ್, ಖಾಡ್ ಪಳೆಲೆಂ…. ಫೊಂಡಾಂತ್ ರಿಗ್ ಲ್ಲೆ ದೊಳೆ ಪಾರ್ಕಿಲೆ… ವೆದಿರ್ ವ್ಹೆಲೆಂ…..

ಫುಲಾಂ ಫಳಾಂ ದಿಲಿಂ. ಪೇಪರಾಂನಿ ಫೊಟೋ ಆಯ್ಲ್ಯೊ. ಚಾರ್ ಜಣ್ ವ್ಹಳ್ಕಾಲೆ. ಆತಾಂ ಹಾಣೆಂ ನಿತಳ್ ಹಾಸುಂಕ್ ಸುರು ಕೆಲೆಂ… ಖಾಡ್ ತಾಸ್ಲೆಂ.. ಕೇಸ್ ಮಟ್ವೆ ಕೆಲೆ.

ಹಾ! ಆತಾಂ ಟಿಪ್ ಟೋಪ್ ಸೇಲ್ಸ್ ಮೆನಾಪರಿಂ ದಿಸ್ತಾಲೊ! ಪುಣ್ ಸನ್ಮಾನ್ ಕೆಲ್ಲ್ಯಾಂಕ್ ಆತಾಂ ಹಾಚಿ ವ್ಹಳಕ್ ಮೆಳ್ಳಿನಾ… ತುವೆಂ ಬದ್ಲುಂಕ್ ನಜೊ ಆಸ್ಲೆಂ.. ಕವಿತಾ ಚುಕ್ತೆಲಿ ಮ್ಹಣಾಲೆ…. ತಾಂಕಾಂ ಮಾತ್ತಿ ಪಡೊಂ.

ಜಿವಿತ್ ಮ್ಹಳ್ಯಾರ್ ಕಿತೆಂ? ಫುಲಾಂಪರಿಂ!? ಎಕೆಕ್ ಚ್ ಪಾಕ್ಳ್ಯೊ ಉಸಯ್ಲ್ಯೊ.. ಉಸಯ್ಲ್ಯೊ…. ಆಕ್ರೇಕ್ ಭಿತರ್ಲ್ಯಾ ಭಿತರ್ ಕಾಂಯ್ ನಾ.. ಪೊಕೊಳ್ ಝೀರೋ!!

ಜಿಯೆವ್ನ್ ಕಿತೆಂ ಫಾಯ್ದೊ? ಖಂಚ್ಯಾತ್ ಯಿ ಶಾಶ್ವಿತ್ ಥ್ರಿಲ್ ನಾ. ಹಾಂವೆಂ ಆಶೆಲ್ಲೆಂ ತರೀ ಕಿತೆಂ?

ಥ್ರಿಲ್… ಥ್ರಿಲ್…. ಜಿಣಿಯೆಂತ್ ಸಂತೊಸ್. ಜಿಣ್ಯೆಂತ್ ಆಜ್ ಕಿತೆಂ ಆರ್ಥ್ ದಿತಾ ಫಾಲ್ಯಾಂ ತಾಕಾ ಆರ್ಥ್ ಚ್ ಆಸಾನಾ. ಸಗ್ಳೆಂ ಕ್ಷಣಿಕ್…. ವಾಂಚ್ಚೆಂ ಖಂಚ್ಯಾ ಸುಖಾಕ್?

ಜೀವ್ಗಾತ್ ಕೆಲ್ಯಾರ್?

ಛೇ……

ಶವರಾಂತ್ಲೆಂ ಉದಕ್ ಯೆಂವ್ಚೆಂ ರಾವ್ಲೆಂ. ಭೊವ್ ಶಾ ಟ್ಯಾಂಕ್ ಖಾಲಿ ಜಾಲಿ?

ಥೊಡೊ ವೇಳ್ ಥಂಯ್ಚ್ ಬಸ್ಲೊ ತೊ.

ಮಾಗಿರ್ ಎಕಾಚ್ಛಾಣೆಂ ಉಟೊನ್ ನ್ಹೆಸೊನ್ ಶೆರಾಕ್ ಗೆಲೊ.

ಲೋಕ್ ಸಗ್ಳೊ ಧಾಂವ್ತಾ… ಸಕ್ಡಾಂಕ್ ತುರ್ತ್… ಕಸಲೆ ಧಾಂವ್ಣೆರ್ ಆಸಾತ್ ಕೋಣ್ ಜಾಣಾ?

ತೊಂಡಾ ಎಕ್ಕೀ ಪಳೆಂವ್ಕ್ ಲಾಯೆಕ್ ನಾಂತ್.. ಸಗ್ಳಿಂ ಬಾವ್ಕಟ್, ಘಾಮೆಲ್ಲಿಂ.. ಥಕ್ ಲ್ಲಿಂ…

ತೊ ಚಲ್ತಾಲೊ.. ಖಂಯ್ ತೆಂ ತೊ ನೆಣಾ. ಪುಣ್ ಎಕೆ ಸುವಾತೆರ್ ಯೆತಾನಾ ತಾಚಿ ಚಾಲ್ ರಾವ್ಲಿ.

ಉಜ್ವ್ಯಾಕ್ ’ಐಡಿಯಲ್ ಪಾರ್ಲರ್” ಮಾತೆಂ ಉಭಾರುನ್ ರಾವ್ ಲ್ಲೆಂ. ಘಾಣ್ ಯೆಂವ್ಚ್ಯಾ ಮುದ್ಯಾ ಮೂಸ್ ರಾಸ್ ಪಡ್ಚೆ ಪರಿಂ ಖಳ್ಮಿತ್ ನಾಸ್ತಾಂ ಐಡಿಯಲಾಚ್ಯಾ ದಾರಾರ್ ಗಡ್ದಿ.

ತಾಕಾ ವೊಂಬಾಲೆಂನಾ…..

ದಾವ್ಯಾಕ್ ಆಮ್ಲೆಟ್ ಗಾಡಿ! ಚೊವ್ಗ್ ಗಿರಾಯ್ಕ್…. ಗ್ಯಾಸ್ ಲಯ್ಟಾಚೊ ಮಸ್ಕ್ ಉಜ್ವಾಡ್. ಚಡುಣೆಂ ಸಾಟಾಂಕ್ ತೆಂಕ್ ಲ್ಲೊ ಮನಿಸ್ ಆಮ್ಲೆಟ್ ಮಾರಿತ್ ಆಸಾ. ಥಂಯ್ ತೊ ಪಾವ್ಲೊ….. ಆಸ್ ಲ್ಲೆ ಚೊವ್ಗ್ ಗಿರಾಯ್ಕ್ ಆಪ್ಲ್ಯಾ ಪ್ಲೆಟಿಂತ್ಲೆಂ ತಿರ್ಸುನ್ ಉಟೊನ್ ಗೆಲೆ.

ಥಂಯ್ ಉರ್‍ಲೆ ಮ್ಹಳ್ಯಾರ್ ಆಮ್ಲೆಟ್ ಗಾಡಿಯೆಚೊ ಆನಿ ತೊ.

’ಕಿತೆಂ?’ ಮ್ಹಳ್ಳೆ ಜಿನ್ಸಿಂ ಆಮ್ಲೆಟ್ ವಾಲ್ಯಾನ್ ಪಳೆಲೆಂ.

’ಡಬಲ್ ಆಮ್ಲೆಟ್’ ಹಾತ್ ಭಾಸ್ ಕೆಲಿ ಹಾಣೆಂ.

ದೋನ್ ತಾಂತಿಯಾಂ ಫೊಡ್ಲಿಂ, ಕುಲೆರಾನ್ ಮಾರ್ಲಿಂ, ಕಾಯ್ಲಿರ್  ವೊತ್ಲೆಂ.

ಚುಂಯ್ಯ್….. ಸ್ವಾದ್ ಸುಟ್ಲೊ. ಆಮ್ಲೆಟ್ ವಾಲ್ಯಾನ್ ಮಿರಿಯಾಂ ಪಿಟೊ ಘಾಲೊ… ಕಿತ್ಲಿ ಜೊಗಾಸಾಣ್….

ಆಮ್ಲೆಟಾಚೆರ್ ಮೊಗಾರ್ ಪಡೊನ್ ಭಾಜ್ತಾ ಬಾವ್ಡೊ. ಹಾಚ್ಯಾ ವೊಂಟಾರ್ ಹಾಸ್ಯಾಚಿ ಸಾಯ್ ಮಾಂಡ್ಲಿ.

ತಾನೆಂ ಪ್ಲೆಟಿಕ್ ಶಿರೊತಿ ಕುಡ್ಕೊ ಘಾಲುನ್ ಆಮ್ಲೆಟ್ ಪಾತ್ಳಾಯ್ಲೆಂ.

ಆಮ್ಲೆಟಾಚಿ ರೂಚ್ ಆಹಾ! ’ಆನ್ಯೆಕ್ ಡಬ್ಬಲ್ ಮಾರ್’ ಹೊ ಉಲಯ್ಲೊ.

’ಕಶೆಂ. ಆಮ್ಲೆಟ್ ಬರೆಂ ಲಾಗ್ಲೆಂಮೂ ತುಮ್ಕಾಂ, ತುಮಿ ಹೆಪ್ಪಿ ನೇ ಸರ್!” ಆಮ್ಲೆಟ್ ವಾಲ್ಯಾಚೊ ಗಣ್ಗಣಿತ್ ತಾಳೊ!

’ಹೂಂ…..” ಹುನೊನಿ ಆಮ್ಲೆಟಾ ಕುಡ್ಕೊ ತೊಂಡಾಕ್ ಚೆಪುನ್ ಪಿಂರ್ಗಾಲೊ ತೊ.

ಆಮ್ಲೆಟ್ ವಾಲೊ ಪರತ್ ಆಮ್ಲೆಟ್ ಭಾಜ್ಚ್ಯಾಂತ್ ವೆಸ್ತ್… ಹಾ! ಕಿತ್ಲಿ ಶೃದ್ಧಾ. ಕಿತೆಂ ತಲ್ಲೀನತಾ…. ಮೀಟ್ ಮಿರ್ಸಾಂಗ್ ಹಳ್ತ್, ಸಾರ್ಕೆಂ ಬಾಜ್ಲ್ಯಾ ಶಿವಾಯ್ ಆಮ್ಸೊರಾನ್ ವಾಡಿನಾ. ಹಾಚೆಂ ಆಟ್ ನೇಟ್ ಪಳೇವ್ನ್ ಚ್ ಆಯಿಲ್ಲೆ ದೋಗ್ ಗಿರಾಯ್ಕ್ ಮುಕಾರ್ ಗೆಲೆ.

ತೆಂ ತಾಣೆಂಯ್ ದೆಕ್ಲೆಂ, ಹಾಣೆಂಯ್, ತಾಚ್ಯಾ ಮುಕಾಮಳಾರ್ ಹಾಸೊ.

’ಕಾಮ್ ಚಿಕ್ಕೆ ವೆಗ್ಗಿಂಕೆಲ್ಯಾರ್ ತುಜೆ ತೆ ಗಿರಾಯ್ಕ್ ರಾವ್ತೆ” ಆಕ್ಷೇಪ್ ಉಚಾರ್ಲೊ ಹಾಣೆಂ.

“ದೇವ್ ಆಸಾ ಸರ್. ತೊ ಪಳೆತಾ ಆನಿ ದಿತಾ. ಆಯಿಲ್ಲೆ ಮ್ಹಜೆ, ಗೆಲ್ಲೆ ಮ್ಹಜೆ ನ್ಹಯ್. ಮ್ಹಾಕಾ ವೊಟ್ಟಾರೆ ತುಮಿ ದಾದೋ..ಶಿ ಜಾಯ್ಜೆ. ತಾಂಚೆಯ್ ಚಾರ್ ಕಾಸ್ ಮೆಳ್ತಾತ್ ಮ್ಹಣ್ ತುರ್ತಾನ್ ತುಮ್ಕಾಂ ಆರ್ದೆಂಕುರೆಂ ಉಕಡ್ನ್ ದಿಂವ್ಕ್ ಮ್ಹಾಕಾ ಜಾಯ್ನಾ” ತಾಣೆಂ ಪ್ಲೆಟಿಕ್ ಶಿರೊತಿ ವೊಡ್ಲಿ.

ಹಾಣೆಂ ಖಾಂವ್ಚೆಂ ರಾವವ್ನ್ ತಾಕಾಚ್ ಪಳೆಲೆಂ!

ತೊ ಗಡ್ಬಡ್ಲೊ.. “ಕಾಂಯ್ ಚಡುಣೆಂ…?”

“ಓಹ್, ಪರ್ಫೆಕ್ಟ್!” ಜಾಪ್ ಹಾಚಿ. ತೊ ಹಾಸ್ಲೊ.

“ಗೆಲ್ಲೆ ವ್ಹಚೊಂದಿತ್, ತುಮಿ ಆಯ್ಲ್ಯಾತ್ ನೆ.. ತಿತ್ಲೆಂಚ್ ಪುರೊ. ಗೆಲ್ಲೆ ಐಡಿಯಲಾಕ್ ರಿಗ್ಲ್ಯಾತ್, ತಾಂಚೆಂ ಕೊರೊಡಾಂಚೆಂ ಬಿಲ್ಡಿಂಗ್ ಆನಿ ಮ್ಹಜಿ ದೋನ್ ರೊದಾಂಚಿ ಗಾಡಿ…. ಕಿತ್ಲೆಂ ಆಸ್ಲ್ಯಾರೀ ಆಮಿ ದೊಗಾಂಯ್ನಿ ವೆಚೆಂ ಎಕೆಚ್ ಕಡೆ.”

ಹಾಕಾ ಗಳ್ಯಾಂತ್ ಶಿರ್ಕಾಲೆಂ… ಉಸ್ತುರೆಂ ಆಯ್ಲೆಂ. ತಾಣೆಂ ಗೊಬ್ಳ್ಯಾಂತ್ ಉದಕ್ ದಿವ್ನ್ ಸುದಾರ್ಸಿಲೆಂ.

“ಹಾಂವ್ ಹಾಂಗಾ 45 ವರ್ಸಾಂಥಾವ್ನ್ ಹ್ಯಾಚ್ ಗಾಡಿಯೆರ್ ಆಮ್ಲೆಟ್ ಮಾರ್ನ್ ಆಸಾಂ. ಹಾಂತುನ್ ಚ್ ಚೊವ್ಗಾಂ ಭುರ್ಗ್ಯಾಂಕ್ ಶಿಕಯ್ಲಾಂ, ಕಾಜಾರ್ ಕೆಲಾಂ.. ಸ್ವಂತ್ ಘರ್ ಬಾಂದ್ಲಾಂ, ರಾವ್ಳೆರ್ ನ್ಹಯ್ ಆಸುಂಕ್ ಪುರೊ… ಪುಣ್ ಸಮಾಧಾನ್ ಆಸಾ.. ಸ್ವಂತ್ ಘರ್ ಸರ್.”

ಹಾಚಿ ಜಾಪ್ ನಾ. ದೊಳೆ ಮಾತ್ರ್ ಆಮ್ಲೆಟ್ ವಾಲ್ಯಾಚೆ ವೋಂಟ್ ಪಾರ್ಕುಂಕ್ ಲಾಗ್ಲ್ಯಾತ್.

“ದೇವ್ ಆಸಾ ಸರ್. ತೊ ಪಳೆತಾ ಆನಿ ದಿತಾ. ಗರ್ಜೆ ತೆಕಿದ್ ದಿಲ್ಲೆಂ ಪುರೊ. ಮರ್ಜೆ ತೆಕಿದ್ ದಿಲ್ಯಾ ಆಮಿ ಖಂಯ್ ತಾಕಾ ಲೆಕ್ತಾಂವ್?

ಜಿಣ್ಯೆಂತ್ ತೃಪ್ತಿ ಜಾಯ್ ತರ್ ತಾಣೆಂ ದಿಲ್ಲ್ಯಾಂತ್ ಸಂತೊಸ್ ಪಾವಾಜಯ್. ದಿನಾತ್ಲ್ಯಾ ವಿಶ್ಯಾಂತ್ ಚಿಂತುನ್ ಖರ್ಗೊನ್ ಫಾಯ್ದೊ ನಾ. ಐಡಿಯಲಾಚ್ಯಾಕ್ ದಿಲಾಂ ತೆಂ ತೊ ಸಾಂಬಾಳ್ತಲೊ. ಹಾಂವ್ ಹೆಲ್ಲಿ ಆಸಾಂ ಸರ್, ಮ್ಹಜೆಂ ತಾಕಾ ದಿಂವ್ಕ್ ನಾ, ತಾಚೆಂ ಮ್ಹಾಕಾ ದಿಂವ್ಕ್ ನಾ.”

ಹಾಚ್ಯಾ ಜಿವಾಂತ್ ಖಂಯ್ ನಾತ್ ಲ್ಲೊ ಹುರುಪ್! ಅಪುಣ್ ಕಿತ್ಯಾ ಆಮ್ಲೆಟ್ ವಾಲ್ಯಾ ಪರಿಂ ಚಿಂತುಂಕ್ ಪಾವ್ಲೊಂ ನಾ?!

45 ವರ್ಸಾಂ… ಏಕ್ ಗಾಡಿ… ತೆಂಚ್ ಆಮ್ಲೆಟಾಚೆಂ ತಟ್ಟೆಂ.. ಉಫ್!!

ಕಸ್ಲೆಂ ಥ್ರಿಲ್ ಗಾಯ್ ಹಾಂತುಂ?

“ಕಿತ್ಲೆ?” ಹಾಣೆಂ ವಿಚಾರ್ಲೆಂ.

“ಪಂದ್ರಾ ದಿಯಾ ಸರ್” ತಾಣೆಂ ಮ್ಹಳೆಂ

“ಪಂದ್ರಾ! ಹೆರ್ ಕಡೆನ್ ವೀಸ್ ಕಾಣ್ಘೆತಾತ್!”

“ಕಾಮಾ ತೆಕಿದ್ ಕೂಲ್ ಸರ್. ಚಡಿತ್ ನಾಕಾತ್. ಮ್ಹಜ್ಯಾ ಘಾಮಾಕ್ ಇತ್ಲೆ ಪುರೊ. ಹೆರ್ ಕಿತ್ಲೆಯ್ ಘೆಂವ್ ಪುಣ್ ಮ್ಹಜೆ ಪಂದ್ರಾಚ್. ಲೋಕ್ ಯ್ ಘಾಮ್ ಪಿಳ್ತಾನೆ ಸರ್… ಆಮಿ ತಾಂಚೆಂ ಪಿಳ್ಳ್ಯಾರ್ ಕಶೆಂ?”

ಹಾಣೆ ಚುಪ್ ಚಾಪ್ ಪಂದ್ರಾ ದಿಲೆ ಆನಿ ನಿಕಾಳ್ಳೊ.

ಪುಣ್ ಆಮ್ಲೆಟ್ ವಾಲೊ ಮತಿಂತ್ಲೊ ನಿಕಾಳ್ಳೊ ನಾ. ಕಿತ್ಯಾಕ್ ಆಮ್ಲೆಟ್ ಗಾಡಿಯೆ ಮುಕಾರ್ ಪರ್ಮಳ್ ಘೆವ್ನ್ ರಾವ್ ಲ್ಲಿ ಜಿಣಿ ತಾಣೆಂ ಪಳೆಲ್ಲಿ.